728x90 AdSpace

Hot
Menu
Zon-ol na Donate

Latest News

VITAMIN PAWL KHAT. Dr. Sian Za Kham

VITAMIN PAWL KHAT
Dr. Sian Za Kham


Tuhun ciang zatui zaha in tamman mah mah hi. Kawlte paunak  khat ah " I neih  loh sangin i theih loh poizaw " a cih bangin i theih loh man a i supna tam gige hi. Nisim a i an nek  te sungah a man pha  mahmah vitamin  hoih nono tampi  kihel hi. Hih thu  theihi le'ng  sum tampi  bei-in zatui zaha lei  kul lo  ding hi. Tua vitaminte  pen bang  an namte pan kingah cih  i theihna dingin a nuaia bangin honggelhkhia ing.

( 1) Vitamin A
Naupangte  a  khan theih  nading, mit  khuamuhna  a  hoihsak ,  guh le  hate  thakhauhsak  hi. Anteh  hing , mehthuk, sasin, ngapithau,  thawbat le  cheesete pan kingah   hi.

( 2 ) Vitamin  B1 ( Aneurine )
Voksa, mangbuh, sasin, bawngnawi, aalu, mawngphal, benang, ngasa le gatuithuk sungah  om  hi.  Hih B1 pen  naham  semte  le  naupangte ading  kisam  phadiak  hi. Beri beri  a  kici  khe  bawk  a kipan  pumpi a  bawkgawp  natnate  pen  hih  vitamin  kisapna  hang  hi pen hi.

( 3 ) Vitamin B2 ( Reboflavine )
Sasin, bawngnawi, aktui, cheese, sakal, yeast-te pan  kingah  hi. Hih  om  kei leh kam  sung  meima,  lei  sahgawp, lei  sanin  na cihte  piangding  hi.

( 4 ) Niacinamide ( Nicotinic  Acid Amide )
Khuak  zatna  tawh  nasemte  ading  kisam  phadiak  hi.  Hih  niacine  om  kei  leh  Pellagra  kici  natna  nam khat  kingah  hi. Tua  bang natna  a  neite  a  sungtholh, a cithak  thei  banah  lungsim  maan pha  lo  ding  hi. Hih  bangte  pen  mizawng  te  natna  ( Disease of poverty ) kici  hi. Tuate  annek  a  tampenin  vaimim  ai'hkeh, buhsih,meh  gina  lo  ne  uh  hi. A  dal  nadingin  sa,  aktui  le  bawngnawi an  tawh  neksak  ding  kisam  hi.  Sasin, voksa, sakal, tuu/kelsa,  ngasa, bawngsa, be-ik, aalu-te  ah  hi  vitamin  om  hi.  I gatuithuk le  vitamin  ahi  zongin  gatuithuk  tawh  a  kihuan  an  dang  khat peuh  sungah  hih  vitamin om  hi. 

( 5 ) Vitamin  C
Hih  vitamin  om  kei  leh  thazaw, liamna  khatpeuh  ah  sisan  luang baih  diak, hani  sisan  zong  uih  thei  a, kam  sung  namsia  sak  hi.  Ha  zong  ling  baihsak  phadeuh  hi. Koi  pan  kingah: Mehthuk,  ankamlumpak, lingmin, lengmaw, tampaza, aalu  le  ahihng silsel antehte  pan  kingah  hi. Naupaai  numeite, nau  nawi  pia  nupite, naupang  neulaite  in  hih  vitamin  kisam  phadiak  hi.

( 6 ) Vitamin  D
Hih  vitamin  pen Calcium le phosphorous  tawh  nasem  khawm ,  amau  teng  kigawmin  guh  piangsak  uh  hi. Hih  Vitamin  om  kei leh  rickets  kici  guhzaw  natna  kingah  thei  hi. Koi  pan  kingah: Aktui, ngagul, sardine  nga, ngaipi  thaute  pan  kingah  hi.
Ciaptehhuai: Adang  vitaminte  tawh  a  kibat  lohna  khatah  Nitaang in  mihing' vun  tung  pan  a  kap  khak  leh  tua  pan  vitamin  D   piang hi.  Tua  hi  a, naungekte  zingsang  nisuak  cilah  phoin  ni  a  sat  pian  ciang  tup  ding  hoih  hi. Khuapi  sunga  teeng  naupang ten  nisa  mu lo uh ahih  manin a  gol  ciangun  a  khuk  tuahin guh  thahatlohna   namte  ngah  thei  hi.

Calcium  pen  bawngnawi  sung, cheese  sung, anteh  thei  puam  a kilothak  a  hing  sitsette  sung  le  aktui  sungah  om  hi. Phosphorous pen  ngasa, bawngnawi, aktui, satak, buhtang  le  mangbuh  te  sa tawh  kigawi  lote  sungah om  hi.  Singgah   nam  tuamtuam  le benang  sungah  zong  om  hi.

( 7 ) Vitamin  E
Mangbuh  pan  a kingah  athau  nam  khat,  mawngphal  sathau, be-ik, sasin  le  aktui  sungah  om  hi.  Hih  vitamin  pen  numeite  ta  neih  nadingin  kisam  hi.  Satak  leh  sin  hoih  nadingin  zong  kisam  hi.

( 8 ) Vitamin K
Ankamlum, ankamlumpaak, vok-an  lingnei  lote  le  Kale  a  kici  ankam nam  khat  sung  pan  kingah  hi. Vitamin  K  om  kei  leh  sisan  a  luan ciang  kang  pak thei  lo  hi.

( 9 ) Vitamin P
Hih  vitamin  pen  sihui  neuno  ( Capillary ) kicite  thahatsak  hi. Liamna,  tem  tawh  ki-at  khak  ciang  sisan  tampi  a  luankhiat  ding  kham hi. Singgah  tuamtuam, lengmaw  le  anteh  theipuam  sungah  om  hi.

Inn  nupiten  hih a  tunga  thu  9  sung  a om  vitamin  te  meh  ding a  lei  ciangin  mangngilh  kei  ta  uh  hen.   ( May 2010 )

Source :
Zangkong Awging, Kum 23 cin Magazine page 164, 165

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: VITAMIN PAWL KHAT. Dr. Sian Za Kham Description: Rating: 5 Reviewed By: Cinpu Zomi
Scroll to Top