728x90 AdSpace

Hot
Menu
Zon-ol na Donate

Latest News

Lungsim Limlangh. Agelh – Job Thawngno

Lungsim Limlangh
Agelh – Job Thawngno


ü  Ngaihsut kibang lo mi nih nasep khop pen
Tha kituak lo bawng leeng kai tawh kibang hi.

ü  Ui in a kihtakte tawngin a kihtakte pet a,
         Mihing hong kihta ten hong koko in,
         Hong kihta lote in hong su-ek hi.

ü  Pasian in mawhna pulak pah lo, thukpah lo a,
A pulak ciangin mi mai-ah pulak in, a thuk kik teh a khangin thuk hi.

ü  Tu lai nungak tangvalte ki-it loin kingai uh a,
          Khantawn ading hi loin tawlkhat adingin kiteng uh hi.

ü  Na lian khat i sep zawh ciang bekin phatna kingah a,
          Na nengno khat i sep khialh ciangin nangawnin
          Gensiatna kingah hi.



ü  Mi pawl khatte a mi pum piangthak in, a neihsa piangthak lo a,
Mi pawl khatte a mipum piangthak loin a neihsate piangthak hi.

ü  I piak ding sumpi a tawm ciangin kithuman zo lo a, i
I piak ding sumpi a tam ciangin kihaza thei hi.

ü  Nuihna khempeuh nuamna hi kim lo a,
Kahna khempeuh dahna hi kim lo hi.

ü  Vantung a tung mite adingin leitung pen hell tawh kibang a,
Hell sung a tung mite adingin leitung pen vantung tawh kibang hi.

ü  Mihing in ei bek aman i kisa a,
Ahi zongin Pasian in kei mawh nei hing a cite deih hi.

ü  Hong kiphat ciangin nuih pah pekpak ken la,
Hong kigensiat ciangin gum pah ngeungau kei in.

ü  Kiphatna zong gensiatna kipatna hi thei a,
Kigensiatna zong pahtakna hi thei hi.

ü  Mihai sawm in hong muhkhialh sangin,
Mipil khat in hong muhkhialh dah huai zaw hi.

ü  Mi hai sawm in hong phat sangin,
Mipil khat in hong phat ut huai zaw hi.

ü  I muan pente mah in hong khemzo pen a,
I ngaih pente mah in hong mudah zo pen hi.

ü  Pilat mai-ah Jesuh a kisit theih mah bangin,
Pawlpi mite mai-ah siate thu kisit hun om thei hi.

ü  A kamtam pente nasem pente hi leh,
Siate sang a khasim piak tak zaw tampi om ding hi.

ü  A mi na muhdah manin a thu nial ken la,
A thu na deih loh manin a mi mudah ken.

ü  An na duh mah bangin,
Nasep na duh leh na puksi ngei kei ding hi.

ü  Gilkial loh na’ngin an nek a kul mah bangin,
Puksih loh na’ngin nasep kul hi.

ü  Innkuan sungah sila leh to om lo ahih manin,
Nasep kituh lo a i kikhiat laiteng nasep zo leh innkuan nuam om thei lo hi.

ü  A tak kolh khempeuh a pil kim loh hangin,
A pil khempeuh a tal kolh kim hi.

ü  Mi i hawmthawh nop leh amah sangin,
Sep zawkna leh hoih zawkna i neih phot kul hi.

ü  Kisawl ciang bek a sep pen mi thanuam kici thei lo hi.
ü   
ü  Pasian gal pen Satan hi a, mihing gal pen mihing mah hi.
ü   
ü  Thu na lang zak leh,
A lang bek mah um pah in.

ü  Meigit khatin gam khat a kat theih bangin,
Thopuan sung thu in khua khat siasak thei hi.

ü  Na kiangah mikhat hong kigensiat leh,
A kilem lohna uh leh ama pianzia thei masa in.

ü  Pastor khat a lungdam khempeuh tawh a lungdam kim loh hangin,
A dah khempeuh tawh dah khawm hi.

ü  Zu leh va in a gawl sih pih a,
Mihing in a lungsim sihpih hi.
ü  Pasian in lem a sak nak leh,
A lem lo munte ah zong lem veve hi.

ü  Sihna lamdang i sa a, a sihna lamdang lo zaw in,
Suahna lamdang zaw tham hi.

ü  Natna lamdang i sa a, a natna lamdang lo zaw in,
Damna lamdang zaw tham hi.

ü  Haina lamdang i sa a, haina lamdang lo zaw in,
Pilna lamdang zaw tham hi.

ü  Mi minthangte a sih teh minthang zaw a,
Mi minsiate a sih ma-in minsia hi.

ü  Mi khempeuh khatvei tek kikhem zo a,
Tua khemna hong kitheih leh khantawn hong ki-um nawn lo hi.

ü  Pasian in a tawisan mi khat na nen’niam leh,
Pasian in tawisang veve ding a, nang na min dai ding hi.

ü  Natna in Pasian tawh hong kinaisak a,
Sihna in Pasian tawh hong omkhawm sak hi.

ü  A cinghte tungah Pasian cingha,
A huaihamte tungah Pasian ciil hi.

ü  Thau-muuk sangin laikung kihtaak huai zaw a,
I galte sangin I lawmte kihtak huai zaw thei hi.

ü  Itna a kiam leh mawhna kizong a,
Itna a khan leh dikna kizong hi.

ü  Pawisiimna sangin sigalna hoih zaw a,
Sigalna sangin nat vehna hoih zaw lai hi.

ü  Na khempeuh ah paulap bei mawh a,
A piang khempeuh lungkim leng,
Paulap khempeuh bei pah hi.

ü  Thupha ciamteh theihna pen gual zawhna hi a,
Thusia ciamteh theihna pen guallelhna hi.

ü  Mawhsakna pen dikna pulakna hi thei a,
Gensiatna pen pahtak piakna hi thei hi.

ü  Thupha simsim le teh thusia ta zo lo ding a,
Thusia simsim leteh thupa ta zo lo diing hi.

ü  Guah zuk ma-in huih nung thei den a,
Thupha ngah ma in ze-etna kituak thei hi.

ü  Pawlpi kimkhat in siate thu dong a,
Kimkhat in siate thuhilh hi.

ü  Thupi na nasak mahmahte Pasian adingin thupi lo thei a,
Thupi na nasak het lohte Pasian adingin thupi zaw thei hi.

ü  Sahang in mi a peh ding teh ngik masa a,
Mihing hong bawl sia dingte in hong pakta masa hi.

ü  Mi ih gensiat leh ei a kiphat pian i hipah a,
Mi i phat leh ei a kiniamkhiat i hipah hi.

ü  Mipilte’ gamah mipoite kihehpih a,
Mihaite’ gamah mipoite kisimmawh hi.

ü  Hong ngaite sangin hong itte teenpih huai zaw a,
Hong itte sangin hong hehpihte teenpih huai zaw lai hi.

ü  Khatvei minthan’ khantawn ki mang lo a,
Khatvei minsiat khantawn kimang hi.

ü  Nang deih bangin a pian kei leh,
Nang deih bang Topa’ cipah in.

ü  Nang deih bang Topa’ na cih leh,
A piang bangbang ah lungkim in.

ü  Na dinmun sanga na kiniamkhiat zawk leh,
Na dinmun sangin hong kitawisang zaw ding hi.

ü  Na dinmun sanga na kitawisan’ zawk leh,
Na dinmun sangin hong kiniamkhiat zaw ding hi.

ü  Gualzawh ma-in guallelhna a om leh,
Tua gualzawh na limci thei pan hi.

ü  Tu ni-a mihaupa zing teh khutdawh suakthei a,
Tu ni mipilpa zing teh mihai suakthei hi.

ü  Sia i deih ciangin paulap tampi tawh i zong a,
I deih nawn lo ciangin paulap tampi mah tawh i hawl khia hi.


Source :
Lungsim Limlangh’ Laibu.
Agelh – Job Thawngno

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Lungsim Limlangh. Agelh – Job Thawngno Description: Rating: 5 Reviewed By: Cinpu Zomi
Scroll to Top