728x90 AdSpace

Hot
Menu
Zon-ol na Donate

Latest News

TEDIM PAU LE PAU DANGTE. Agelh - H. Pau Za Cin

TEDIM PAU LE PAU DANGTE
Agelh - H. Pau Za Cin
Photo Credit : Tedimchin.in

Vandawn a sun ding  Babel tausang lamna panin leitungah pau le ham tuamtuam hong lengkhia hi.

Pausuite in a muhna panun leitungah pau 10,000 val  omin India sung bekbekah zong 1652 om khin zo hi, ci uh hi. Amau suina pan mahin pau tampi a om hangin khatvei ni ciangin  pawlkhatte hong  bei ding a, tawmkhat bek suakta(servive) ding hi, ci uh hi. Pasian in mihingte a pau dingin hong bawl hi a, ganhing le vasate pen a ham dingin  a bawl ahi hi. Mihingte I heh ciangin kihang a, ganhingte pen hawk uh hi. Mihingte kiko-in ganhingte kuu uh hi. Tua ahih manin Pasian in a tuam vilvelin hong bawl mihingte ihi hi.

TEDIM PAU LE LAI HONG PIANKHIATNA ZIA
Tedim khua pen gal leh sa in a nawkna gal lampi mualvum  khat a om ahih mah bangin tang a kipanin Gangte, Komte, Zote, Thadote, Guite leh a tuamtuam in satin na teng ngei uh a, ahi zongin, Simgal, Zogal, Thado gal, Pawi gal leh Kawl gal in nawk tawntung ahih manin khuamang zelzelin om a,‘ khuam 7 vei kiphut a, tap 7 vei  kiluak’ kici liang hi. Tedim khua pen Lamzang gamhuam sunga om hi-in, Gui Gen leh Gui Mang a kipan Mang Sum Guite ciang dong ukna gam ahi hi. Khoi Lam in Lailo khua panin a lawmte   kim Thuam Zilom,  Tel Khaat Thawmte ,  Cin Kim Samte,  Gen En Lethil, Pau Am Samte leh  Kai Hen Hatlang te zawnin Tedim khua satin vai a hawm uh hi. Khoilam Hatzaw in Mualbem hausa Khan Thuam’ tapa Kam Kau Tedim hausa a sem dingin  a upate nih Tel Khat Thawmte le Gen En Lethil sawlin a va zolsak hi. Kum 1810 kiimpawl a kipanin Tedimah Pu Kam Hau Sukte, Pu Khoi Lam Hatzaw le Pu Mang Gin Hatlang makaihin vaipi a hawm tak ciangun venglepam khua tuamtuam panin minam kim pau namkim in hong beel hi. Tedim khua pen inn 300 hong pha-in kuamah in sim zo nawnlo ahih manin a belhtaak khuapi khat hong suak hi. Pau tuamtuam ahi Dim pau, Sihzang pau, Teizang pau, Thado pau, Vaiphei pau le a dangdang a zang naupangte tengta kineihna  le kikholh khawmna panin tu a Tedim pau a kici pau taang khat hong piangkhia tawm hi. Zo pau a tuamtuamte lak panin  Tedim pau pen a naupang pen pawlkhat hong suak hi. Tedim pau pen a nei tuam om loin Tedim khuasung mahah na kizang pah hi. Tedim gama Missionary Dr. J H Cope in Chin Hills saklam a zat dingin  Sihzang pau tawh lai na bawlin, ahi zongin tel haksa a sa tam ahih manin Ukpipa Hau Cin Khup kiangah bang kam tawh lai bawl ding na deih hiam ? ci-a a dot leh,  Hau Cin Khup in “ Mipite’ deih penpen hi lo ding hiam,” na ci  hi. Tua ahih leh,  ci-in J H Cope in 1919 kumin Tedim khua ah Zogam leilulam ukpi khempeuh leh hausa pawlkhat banah Sihzang kual, gungal kual, Tonzang kual leh Guite kual khua panin hausate a kaikhawm hi. Cope Topa in a paikhawm Upate kiangah, “ Sihzang pau haksa  sa na hih uh leh bang kam tawh lai bawl ding ihi hiam ?” ci-in dotna a bawl pen hih bangin khensatna a nei uh hi:


Guite Kual/ khawk panin Tuimui hausa  Mang Za Thang in, ‘ Paite pau in bawl le’ng a thei tam lo ding ahih ciangin, Tedim khuapi a kizang kampau tawh bawl lehang kitel kim pen ding hi,’ ci-a a gen ciangin Haiciin hausa  Tual Pum in, “ Tu-a Tuimui hausapa gen pen a maan hi,” ci-in thukimpih hi.

Hiangzang hausa  Zam Khaw Thawng in zong, “Ko Thado  pau-in om leh kuama’n thei lo ding hi. Tedim khuapi a kizang kampau-in om hen,” ci a, Hangken hausa  Kam Pum in, “Tu a Hiangzang hausapa gen pen a maan hi,” ci-in thukimpih leuleu hi.

Saalzang hausapa  Zang Khaw Lian in zong, ‘” Ko Zote pau-in om leh kuama’n tel lo ding hi. Tedim khua a kizang pau mah kitel kim pen ding hi,” ci a, Mantuang beh Phaitu hausapa  Khan Thawng in, “ Saalzang hausapa gen pen maan hi,” ci-in thukimpih leuleu hi.Hih banga hausa lian 6 in a thukim uh pen Cope Topa in kipsak pahin Tedim Khuapi Tualsuak Pau tawh lai hong bawl hi.Tedim Thukizakna cih khat Tedim kam tawh a bawlkhia pah hi. Lai Siangtho Thuciam Thak  leh Tedim Labu zong Tedim kam mah tawh a tei pah hi. Nidangin Mikangte’n Tedim Pau pen ‘Kamhau Dialect’  ci-in na ciamteh uh hi.Pu Paoneikhai Suantak, Ex-Minister, Manipur in a genna ah a pianna a pu teekteek Tedim khuami hi a, a sih dong mah Tedim pau-in pau hi, ci hi. Bukpi pau, Dim pau, Gangte pau, Khuangnung pau, Lamzang pau, Losau pau, Sihzang pau, Teizang pau, Vaiphei pau, Val pau le a dangdang i cihte zong khua min leh mun min tam vive ahi hi.Khuasung tualsuak pau vive ahi hi.

Tedim pau a zangkhawm ngeite pen Kawlgam le Vaigam in hong khenin I tenna gam pau le pilna siamna I sinna lai le pau in hong zo lua ahih manin tampi I kilamdang ta hi. Bek tham loin tuhun ciangin  Kawlgam Vaigam bek hi loin leitung gam thumna dongah I kizeel suak ta uh hi. Tua ahih manin I pianpih I nu pau(mother toungue) pen mangthang ding maw, suakta ding cih hunsungah I ding ta hi. Tua hi a, I pau taang uh Tedim pau le lai beek suakta thei lo ding hiam cih hong lungngaisak pha mahmah hi. Midangte pau kawm se loin i minam i it zah khatin eimau innsung tekah I pau tawh I zi I tate hopih tanghtangh ding hi hang.  I pau I zumpih leh I nu I pate a simmawh  I hi hiau zen hi.I lai le i pau i mansak ni keek pen I manthat ni hi pah ziau hi. i minam i it le i lai le i pau kemcing ni. Midangte pau i sin a i theih ding hi a, tua in pilna hong guanin i khawhei zong hong nuam tuam sak hi. Ahi zongin ei pau pen bel sin kul nawn lo a, i kepcing ding i vaipuak ahi hi. Tua hileh i pianna i pu I pate laigui I zopna, I zahtakna, I minam I tawisangna le manthatna ding pan I suahtakna hipah hi. H.Pau Za Cin Late(DVD) sungah hih bangin na gen hi:

Kawlgam vaigam leimong dongah I hei zongin
                   Pupa ngeina le mimbang pianpih tongsuah
Cikmah hunin almang mangsak kei ni guai
                  Pulepa laigui zom ngilhmawh nading hi e

Tu-in Tedim pau le i veng le pam pana I top tawm pau dangte pawlkhat en ding hang a, hih pen kei mimal ngaihsutna hi a, kikup ding a kong luikhiat ahi hi:

Kammal man Man lo
Aklui    Aktal   
uili        uihik
sammet           samtan                       
linlian/lianlian   geihgeih/ciahciah
cinten/cingteng            tinten/tingteng 
khiat(paihkhiat)           khiak(paihkhiak)
thangsiah         thangkam                   
hawl(mawtaw,vanleng)           mawtaw hek(khau kihekin mawtaw kihawl hi)
hun pan ni       hun nana pan ni         
hun pan tani    hun panta ni hang      
hong zawnpah leteh    hong zawn ngal leteh
manpha           mantam(tam manlua)
mittaw mitdel
khutbui khebui khut bei khe bei          
pute, pate, pupa          pite, pute, pipu
kei a’n, nang a’n          kei din, nang din         
na dam uh hiam ?       dam uh maw ?
phatuamsuah phatuamngai              
paikhawm/khawlkhawm         lengkhawm                
Sunmang        duhthusam                 
a matna/a belhna        a charna                     

Mangkam le Kawlkam i tawk khak pawlkhatte:

Raising Day(Rising Day hi lo) kilapsang ni   
Foundation Day          = Kiphuat ni/phuhkhiat ni
Training/Tentan           = Kisinna/sinna                       
Library =Laibusaal/Laibuli
Book store       = Laibu zuakna                                  
Grammar        = Kammalman
Dictionary        = Diksiannali/Tongdot bu                   
table/sabuai     = dawhkan(dawhkang)
Dawhdan(innsung innpua a kidawhsang)     
Letmatthuh      =khutpi suai nam/suai kai
Room/khan     =dei( lengla dei, lupna dei)    
lengla khan cih loh ding hi);
That/ innsawng            = innsang(dawl khatna)         
Present/Gift/letsong    = deihsakpiak
Prize    = thaman/siamman                            
Letthat = kigawmsak/kitengsak
Chair   = tokhom/tutphah                               
bench = tutphasau; tutna(mun khatpeuh hithei)
nohsiat = khut kilen/muak
                                   
And=le (nang le kei)   if = leh(nong pai leh)
                                                                                               
Tavuan/mawhpuakna             = vaipuak
Loss     =sumh(mang cih loh ding)van/mi mang thei
Literature         = Lailam                                             
Stamp =lailu;        
Post Office      =Laito
Pen      =laikung;    
Paper  =laidal;

Zolai ah lai aw- a, e, i, o, u sung panin ‘i’ bekin ‘c’ zui thei hi. Tua loteng i tawktawm pau dang cihna hi. Gtn-ci, cial,ciam citciat, ciik , ciang. Cancan(tantan), cetcet mai(ciatciat mai). ‘T’ leuleu pen lai aw ‘I’ losiah in zui thei leuleu hi.Gtn-tai, tawm, tei, tuan, to, ta cih bangin.

Pai/ Vak/Kuan/Kah/Kal: Lam kipai a, khualak leh huangsung/huansung khawngah kivak hi. Lo kuan, vai kuan, gal kuan, sabeng kuan, nasem kuan, ahi zongin zum kah, sang kah le kisinnate ah kah kici hi. Mualtung kah, singkung kah kici thei a, singtung kal, mualtung kal kici lo hi.

Hawh/ Ciah: Khualzinna le khualak vakna pan inn kiciah hi. ‘Koi a hawh ding’ I vak/I zinna ding mun dotna hi. Ka zuhai ong hawh ing ei, zong kici thei hi.(deihsakna pia masa cihna)

Cuh: ‘ Kei cuh’ pen ‘kei pen’ cih ding hi. ‘C’ pen lai aw ‘i’ in zui lo hi.

Tel/Cian: Ka thugen na tel/cian hiam? Kikhopna ah na tel hiam cih loh ding; Na kihel hiam cih ding.

Kik/Nawn: Jesuh hong pai kik ding hi. Hong pai nawn o.(‘nong pai kik  peuhmah leh’ cihna hi. Ka kiangah hong pai kik ke’n kici lo a, hong pai nawn ke’n, kici hi. Hong pai kik nawn in, cih loh ding hi.(Hong pai kik peumah ke’n cihna hi).Hong pai kik in cih ziau ding

Lawhcing/Tuahpha: Na laihuan na lawhcing hiam? Na laihuan na tuahpha hiam kici lo hi.
Gamvak, ngabeng sumbawl cihte ah tuahpha kizang leuleu hi.

Khah: ‘ Tua khah’ cih pen ‘Tua pen’ cih ding hi. Thangno in khah nei hi, kici kik bilbel hi.

Tuan/Tawm: Tukpeng tuanin mihing zong kituan leklek hi.Vasa le ganhingte tawm hi.

Kul/Ngai: A kisam, a kiphamawhte ‘ kul’ kici hi. Ngai kei kici loin kul kei kici zaw hi. Thangpu in   Cingnu ngai mahmah hi, kici thei hi. Ngaihzawng kici loin, zawl ngai, lawm ngai kici hi.

Gige: Ganhing ka sak leh mihing na hi gige mawk veh. Khial lo ka kisak leh a khial na hi gige khong ing !. Hong phawk gige in, cih ding hi lo a, hong phawk tawntung/den in cih ding hi zaw hi.

Gensia/Phun/Ko/dem:Mipite in makaite gensia/phunsan/kosia thei uh hi. Dem kizang lo hi.
Khangnote lapawl kidemin tai zong kidem uh hi.

Ne/Dawn: Ann kine, zu kine, Niangtui nekna, ahi zongin tui/theitui kine loin kidawn hi.

Pulak: Thu kipulak thei a, kipuang ngei lo hi. Niangtuisan pen bawngnawi tawh kipuangsak thei hi.

Dek: Koi a pai dek kici loin koi a pai ding, kici hi. Ann a min dek ta maw? Kici thei hi.

Petmah: Kong cihcih na tuak kha petmah ta ve vua! Lungdam petmah ci loin lungdam taktak/mahmah cih ding hizaw hi.

Ngaina: Kong ngaina mahmah ci loin kong ngai mahmah cih ziau ding hi.

Tho/Thotho: Ut tho veng e, ci loin ut sam veng e, cih ding; ut thotho na maw ? ci loin ut veve na maw, cih ding hi. Tutna panin kiding to a, lupna panin kitho to hi.

Ut/Nuam: ‘Pai ut ing’ ci loin ‘Pai nuam ingh’ ci zaw ding. Ahi zongin ‘na nuam leh pai ni’ ci loin ‘na ut leh pai ni’ cikik zaw ding.

Ngaihsun: “Na ngaihsun ngei maw ?”cih ding “ Na ngaihtuah ngei maw ?” ci lo ding. Ngaihtuahtuah pen ngaihsunsun cih zawk ding.

Upna/Muanna:Na upna/na muanna lian mahmah hi, ci ding. Na ginna ci lo ding. Tua thau ginna koi lam a le ? kici thei hi.

Pak/Zual: Hong pai pak o, ci ding, Hong pai zual in, ci lo ding. Beem kawm lakah zusa khat tai zualzual hi, kici thei hi. Khualakah mu zualzual veng aw kici thei a, mu pakpak veng aw kici thei lo hi. Ka na zon pen mu pak kei veng aw, kici hi.

Lel/Lellel: Nang leltak(kisimmawhna kammal hi). Hong pai lellel hi ci loin hong pai laitak hi.

Ummawh: Na thuzakte a takpi dingin na ummawh hiam ?( believed to be)

Muangmawh: Na van mangte tawh kisai kua na muangmawh hiam?(suspect)

Lamen : Tua na van mangte mu kik dingin na kilamen hiam ?(Hope/Expect)

At/Gelh/Sem: Sing ki-at a, Lai zong ki-at hi. Milim le mualsuang kigelh hi. Sa pen ki-at loin kisem hi. Innsung phamawh ah sasem kinei hi.

Kiangah/Nenah: Tedim kamah ‘kiangah’ pen tualpau hi a, ‘nenah’ pen la kam hi. Mizo kamah pen ‘kiangah’ la kammal hi a, nenah pen tualpau hi leuleu hi.

Kawlgam pana thukizakna tuamtuamte biakna hi-in leitungvai hitaleh India a Zomite’n i sim ciangin kawlkam le kawl laimal  tawh a kigen le a ki-at mal khat le nih a kihel khak ciangin tel haksa kisa hi. Gtn- Thangpu Lamzang khua ah piang hi. Kisuan a ci nuam gige hinapi, India lam te’n a pianna/suahna khua-in ngaihsun uh hi. Thangpu Lamzang khua-ah kisuan hi, ci le’ng kitel pah lian hi. Tua banah, kawllai mal tawh a ki-at kammal khat khawng a zeh ciangun a gennop thei lo ihih manin lunghimawh pipenin kinei leuleu hi. Tua mah bangin India a te’n zong Kala kam, Mangkam le Meitei kam i zat khak ciangin kawlgam lama sanggam te’n na theithei lo leuleu uh hi. Tua ahih manin, mailam hunah lai-at mite in saklam le khanglam enkawmin i at ding thupi hi. Ei pau a a om gigete pen kanin, zangin kemcing le’ng a, a om thei mahmah lote bek midangte a’ kawm le’ng hoih pen lo ding hiam, i ci hi. Hih thu i lungngaih khop laitakin, Sia Rev.ST Hau Go in Tedim lai tawh a at ciangin Kawlkam, Mangkam kihel kilkel loin at thei hi, cih hong phawksak hi.

Khanglam le saklam gamgi in hong khen hangin hong khen zawh loh pen Lai le pau ahi hi. Tedim Lai Siangtho le Tedim Labu i neihkhop theih manin  i kikawm ciangin  biakna hi-in pau ah ahi zongin haksatna kinei vet lo hi. Biakinn khat peuhah kikhawm le’ng zong i phatna late kisa khawm theipah ziau-in Lai Siangtho zong kisim khawm thei hi. India lama om Zomi pawlkhatte in a  Lai Siangtho neih masak pen uh Duhlian pau panin  na tei masa  uh ahih manin  Duhlian pau tampi mah a kihel hi.

 Kikup ding pawlkhat:
  1. Tedim kam ci ding maw, Tedim pau cizaw ding
  2. Tedim pau/kam ci ding maw, Zokam cizaw ding
  3. Tedim pau suakta zo ding maw, mangthang ding
  4. Kammal i kawmte zangzang ding maw, pia kik ding
  5. Hih bang Thusinna neih toh zel hoih i sa maw ?

( TCSA in Nov.1, 2016 ni ciang a Lai le Pau sinna neih a kisawmna ah Tedim pau tawh kisai kisinsakna hong neihpih ding a Siapi H. Pau Za Cin, MA;BT a kicial ciangin ama’n zong lawptakin hong mang pah hi. i phattuampih tek ding  i lamen hi-TCSA)

Source :
TCSA,
Tedimchin.in

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

Item Reviewed: TEDIM PAU LE PAU DANGTE. Agelh - H. Pau Za Cin Description: Rating: 5 Reviewed By: Cinpu Zomi
Scroll to Top