728x90 AdSpace

Hot
Menu
Zon-ol na Donate

Latest News

Zomi Thanksgiving Day.

Zomi Thanksgiving Day.

Thumasa: 
Zomite i piankhiatna bulpi, gui le zaamte a khangkhang in kikan toto in, mualdawn kenkawm a teeng minamte ci-in, tangthu sulkan mipil tuamtuam in mukhia uh hi. I minam min mahmah zong -Zomi-Zou-Zhou,China-Chin ..etc cih bangin muhna le ciamtehna om hi. Tangthu sulkan mipil Carey kicipa in a kanna khatah " Zo" cih pen Mualdawn- gammang tulak (Forest) ci-in, "Mi " pen (People) ci-in ciamteh hi. Tua ahih manin, Mualdawn gammangtulak a om mite (Zomi) cih suaksak cih kigen hi.

Hih bangin gammangtulak a teeng minam i hih mah bangin, i biak i paii ding zong i kim i paam a om, singpi suangpi, gunpi le luipi cihte mah kibiasuk pah hi le kilawm hi. Tua bang dinmun pan kinungta toto in ahun a cin ciangin Pasian in ama khuavak lungdamna (Gospel) thupha Zomite sungah hong puak zawh kum 100 val hong cing kik ta hi. Pasian thupha (Gospel) hang mah tawh hih kum 100 lom sungah Zomite khantohna tampi i nei hi. Khrist lungdamna thupha bekbek hangin hih ciang a kitung ahihna kuama nial theih thu hi lo hi. Tua ahih manin, tuni ciang Zomite i thuphate a sim ding hi le hang, genzawhloh zah dongin kikhangto ahih manin, hong lamto le thupha hong pia Topa tungah lungdamkoh ding cihloh i gen ding mahmah thudang om lo ding ahi hi. 

Zomite i khantohna tawh kizui-in, i gam le i nam puah le zuun nopna lungsim zong Pasian hong guanin, mapang khawm a nasepkhop ding lunggulhna tawh leitungbup Zomi Kipawlna cihte ahi; LZI, GZA, ZIUSA,WZC,Zomi Association min tawh ZAUS,ZAM,ZAA cih bangin kipawlna tampi mah i nei hi. Hihte pen asia lam ngaihsut ding hi loin, i khantohna le gam le minam puahnopna vive hipen dingin i lamen hi. Thukizakna le kizopnate zong khuahun khantohna tawh kizui mahin manlang mahmah bek tham loin, kihuh/ kipanpihnate zongah kitheibaih khangtohna tampi kineihlawh hi. Hih bangin i khantohna te khempeuh pen i theihloh kal a Pasian hong laptohna taktak ahih manin, thupha cih kammal pen mipite' lungsim le a kampan gingkhia mun mahmah hi. Tua hi-in minam le gam khangtote in lungdamkohna  Ni thupikhat nei ciat uh i.

Abeisa 2006 kum akipan in Dr. H. Gin En Cin le Rev. Dr. Dam Suan Mungte makai in Zomi Christian Alliance min tawh Zomibup Lungdamkohna Nipi ci-in kumsim Novemeber Nipi nunung sung neih ding hongpulak ngei uha, tuni ciang ahithei zahzah in kizangh ciat hi. Tua banah 2011 GZA-Khawmpi,Kawlpi panin zong hong kivaihawm leuleu in November Nipi nunung sung mah hong kipsak uh a, pulakna kinei khin hi. Hih Zomibup Lungdamkohna ni te hong kinaihuai tuak ahih manin i zattheih ciat ding athupi mahmah ahi hi. Hih bangin Zomibup min tawh Lungdamkoh Ni khat i neihna zong i khantohna le Pasian i phawkna taktak ahihna kilang kasa hi. America gambup in zong November nipi nunung Nili ni( Thursday) nisim in thupitak nei uh hi.


Thupha le Minam:
Thupha cih kammal pen beisa tawlkhat lai akipan Zomite sungah thupha ngah minam cih kammal hong laang mahmah hi. “Thupha “ cih kammal pen kammal hoih khat ahimanin, i gennop khat peuhpeuh a sia lua om theilo hi. Pasian in a bawlsa mihingte khempeuh thupha ngahin a nungta paisuak ding a hong deih ahi hi. Mi khempeuh in thupha mah kideihin, thusia a deih ki omlo hi.  Thupha cih le lungdamkohna cih kammal kikhen theilo in, akizom den ahi hi. Tua manin thupha ngah minam i cihte pen Lungdamko siam minamte ahi uhi. Laisiangtho sungah  mimal thupha, innkuan thupha, minam thupha le gambup thupha cih bangin kicing tak om dimdiam hi.

Tuate sung pan minam buppi thupha ngah nading lampi nih om-a, (1) Topa pen Pasian aa anei minam (2) Ama luah dinga, teel ngah minamte thupha ngah minam (Late.33:12) kici hi. Minam bup khatin thupha ngah theihna dingin Pasian teelna ngah masak kul hi.  Leitung ah minam tampi om-a, tuate sung pan Israel mite bek mah Pasian teel ahi hi. (Isaiah 42:6, Matt.1:21) Tua hi in Israelte pen Pasian  teel tuam ngiat ahimanin, minam dangte tawh kibang theilo hi.  Leitung mun khempeuh ah mipil, misiam le mihau cihte pen Israelte ahi uhi.  America gam nangawn ah mipil, misiam  le mihau khempeuh pen Israel (Jews) te vive mah ahi hi.

Leitungah biakna khempeuh in lungdamkoh pawi nei ciat uhi.  Pawlkhatte in Anlak pawi (Feast of Thanskgiving Day) ci in nei uha, amau ngeina ciat tawh thupi tak-a abawl zong om hi.  Tua mah bangin ei Zomite'n zong Zomi ngeina Khuado pawi (or) anlak pawi lungdamkohna khat mah ahi hi.  Zomite hih ciang dinmun i tunna i thuphate en kikkik leng Topa tungah i lungdamkoh ding tampi om ding hi. Tukum zong November, Nipi nunung mah tawh kituak ahimanin, mimal, innkuan le pawlpi ciatah i zatkim ding kisam mahmah hi.

US ah lungdamkohni a piankhiat zia:
Lai Siangtho sungah lungdamkohna tampi kimu-a, adiakdiakin Late sungah, ‘‘lungdamko un !!!! bang hang hiam cih leh Topa hoihin hehpihna tawh kidim…’’ cih vive muntampi ah kimu hi.  Hih Lungdamkoh Ni (Thanksgiving Day) tawh kisai hong piankhiatna thu i genloh phamawh hi.  Leitung ah  Pasian min suang/paulap-a kiphuan gam khat bek om-a, tua gamin America ahi hi.  Columbus in 1492 kumin America gam na mukhia hi.  Ahizongin America gam taktak hong pian khiatna dingin, tuma kum 400 hun lai 7th Century 1600 kimin England kumpi  King James in (The Church of England) upna azuilote nakpi takin bawlsia hi.

Tua bawlsiatna thuak-a, atuam om pawl “Separatists” kici Khristian Khualzinte (Pilgrims) in suakta taka Pasian a biak theih nading ngaihsutna  tawh 1607/1608 kumin Holland gam ah galtai uhi.  Holland gamah tawmvei aom khitciangun Pasian um mello le pau le ham kibanglo lua ahimanin, England gam ah ciahkik uhi.  England gam pan America leitang zuankik dingin May Flower gunkuangpi tawh mi 106 kim hong paikhia uhi.  Atlantic Ocean kantan in haksatna tampi a phut khit uh November 11, 1620 kumin America gam Wampanoag Indians kici mivomte tenna tuhun Massachusetts State, Plymounth khua hong tung uhi.

America leitang a tun phetun May Flower Compact ci in kiciamna laikhat hong gelhkhia uha tua lai apatna ah, “Pasian min tawh Amen (In the name of God, Amen) ci-in gelh uhi.  Khuakhal gamkeu hun laitakin tung uh ahimanin neek le dawn ding haksatna hang le natna tuamtuam tawh mi 106 sung pan 46 si uhi.  Aomsa Wampanoag Indians-te tawh pau kitellohna le lokhawh khaicituh zia ding akipan sin tawmtawm uha haksa sa uhi.  Nuntakna dingin ngasa mat zia le gamsa bet ziate Indians-te tung pan limsin mahmah uhi.  A kum kik 1621 kum ciangin lo pan vaimim, mangbuh, mai gah le begap namte kilatheita hi.

Governnor Mr. William Bradford vaihawmna tawh khua hausa pa  Mr. Massasoit (Indians Chief), Mr. Squanto (Translator) le khua sung makaite mi 90 samin  amau lam pan mi 52 tawh amasapen Anlak pawi Topa tungah Lungdamkohna thupi takin bawl uhi.  Hih pen America leitang a tun zawh uh amasapen lungdamkohna hi pah hi. Lungdamkohna pawi sungah Indiante in Sai Ak hankeu le gamsa hankeu cihte tawi-in vaimin tui tawh huan khawmin pilgrim-te tawh pawi an nekhawm uhi.  Tua kum akipan phalbi anlak khit simin lo ma tung pan thupha apia Topa tungah lungdamkohna nei den uhi.

England kumpi khut nuaiah (Colony) bawlsiatna kum 100 val thuakin a om khit uh ciangin, England tawh gal hong kido uhi.  Galzawhna dingin a makaipa uh Georg Washington in vuuk lak khuadampi nuai ah khukdinin thungen hi.  Galzoin suahtakna a pulak ciang un (1) Pasian pen mihing  apiangsak pa ahihna, (Almighty God), (2) Mihingte suahtakna (Human Right) tawh hong piangsak  Pasian ahihnate pulak masa uhi.

Tua banah gam kiukzia ding Thukhunpi (Constitutions) hong geel uha, Lai Siangtho mah tawh thungen in kipan uhi.  Hih Thukhunpi a bawl ciangin adeihna uh kituaklo ahimanin, a cihna ding theiloin om uhi.  Tua bang laitakin Benjamin Franklin in, “Pasian dong ni” ci-in a vekpi mahin thungenkhawm pah uhi.  Pasian in a thungetna uh dawng takpi in, Lai Siangtho bulphuh-a kigelh America Constitution pen tuni dong kum 400 bang akip suakin, a khek zo om nawnlo phial dingin kiciamteh hi.

America gam ah tuni dong kumpi thak khat a kiteel simin Lai Siangtho tawh kiciamna nei sak uha, Congress thu vaihawmna khempeuh thungetna tawh pan den uhi.  US sum (Dollar) tungah  Lai Siangtho mun, “Eite’n Topa i Muang hi” (In God We Trust), Late.31:6 gelh uhi.  US pen Pasian min tawh bawlsiatna thuak khualzin mite khuasat ahimanin, tuni dong thupha ngah gam minthang pen suakin leitung vangam (Earthly Paradise) kici zawzen hi.

Hun hong paitoto in America gamin suahtakna (Independent) hong ngah khitciangin, US Congress in kum simin Lungdamkoh Ni neih ding thukimna nei hi.  US President masa George Washington in November 26, 1789 ni pen US gambup Lungdamkohn Ni (US Thanksgiving Day) a zat dingin pulak hi.  Ahizongin a ma khit-a Kumpi sem President Thomas Jefferson, le Andrew Jackson-te in thukimpihlo uhi.  Tua banah US tualgal (Civil War) bei khit October 3, 1863 ni in US President Abraham Lincoln in America mi khempeuh dongkik-a, November nipi nunung, Nili Ni (The last week of November Thursday) pen National Holiday dingin kipsakkik hi. 1939 kum ciangin US President Franklin D. Roosevelt in zum nasemte le vanzuak vanleite in Christmas ma tawlkhat sung vanlei theihna ding ngaihsutsakna tawh nipi khat amanlangzaw dingin geel leuleu hi.  1990 kum ciangin President George Bush in hih ni mah hong zangto hi.

Lungdamkohna le Sai Ak:
Hih  US Thanksgiving Day  kibawl ciangin  Sai Aksa le Vaimim tui huan hamtang uhi.  Tua Sai Ak tuihuan le vaimim a deihna bulpi pen abeisa hun khat lai-a khualzin (pilgrims) hun lai a pu, a pate phawkna ahi hi. Tua banah Sai Ak lim, vaimim gau lim le singgah lim tuamtuamte inn zepna in nei uha, letsong in zong kipia uhi.  Khristian Khualzinte tangthu (The Pilgrim Story) pen US tangthu sungah abeisa 17th, 18th, 19th, 20th, 21st Century le mailam hun sawtpi ah a mang ngei nawnlo dingin kiciamteh hi.  Tua bekthamloin Pilgrimte phawkna dingin, Pilgrim Hall Meseum, American Meseum of Pilgrim Possesions kici No. 25 Court Street, Plymouth, MA, USA ah Inn lianpi khat  kilam hi.  Tua innpi sungah “Tanglai Pate upna’’ cih laimal kigelh asimkha khempeuh cimul thosak mahmah hi.

Zomite le Lungdamkohna:
Zomite zong abeisa i nuntakna le i piankhiatnate enkik leng minam neu khat le ui le vok tawh anne khawm, silh le ten neilo, lai zong neiloin zu le sa tawh kidiah i om laitak America gam pan sangmang Carson, Nelson, East, Johnson le Cope topa-te'n lungdamna khuavak hong puak uhi.  Cope topa in Jesu Khrist lungdamna thu tawh kitonin Zomi lai hong bawlsaka, hong tung ding 2010 November sungah Cope topa hong tunzawh kum (100) cinna le Zomi lai neihzawh kum (100) cinna pawipi Tedim khuapi ah thupitak kibawl khin ta hi.

Zomite sungah mipil, misiam, mihau, milian tampi i oma, khuapi khuaneu ah i teng zihziah hi.  Khuapi khuaneu ah kizopna mawtaw lampite i bawl zoa, mawtaw le neih le lam tampi i nei hi. Tua Jesu lungdamna khuavak in i mit hong hon sak, hong vak sakin, tuni in Zomite leitung bup ah i kizel hi.  I tuntunna ah Zomi Innkuan, Zomi Christian Fellowship, Zomi Association cih bangin kipawlna i nei hi.  Tua bekthamloin Leitung Bup Zomi Innkuan Kipawlna (Zomi Innkuan International) nangawn i neita hi.  Zogam, Kawl-gam le leimong dongah lungdamna thu tangko dingin Pasian in hong zang hi. Hihte khempeuh i etkik ciangin Pasian pen Zomite Pasian ding mahin teel taktak i himanin thupha ngah Zomite i kici hi.

Thukhupna:
Tua ahimanin Zomite Pasian in thupha tampitak hong piaknate hangin Topa tungah lungdam i ko ding hi.  Thupha ngah minam i cihte pen lungdamko siam minamte ahi hi. Pasian pen Lungdamkoh a deih Pasian ahi hi. Na thuphate khat khit khat simsim lecin, Topa in a tampi hong pia na thei ding hi.  Topa pen keima luah dinga ka teel, kei ma muanpi na hi a, keima ngah ding khempeuh na khut sungah om hi. (Late.16:5) ci-in, tukum Zomi Bup Lungdamkoh Ni (Zomi Thanksgiving Day) 2012, ah Pasian hong piaksa thuphate sim siam peuh leng a maban ding lunghimawh kullo hi. Lungdam koh biakpiakna tawh Pasian pahtawi ciat ni (Late 50:23) ci-in i kihanthawn hi. Thupha sim siam le Lungdamko siam minam ahi dingin Lai sim mimal kim Topan thupha hong pia hen. Happy Thanksgiving Day 2012.!!!

By: Sia Khampeek (Tongsan Pu)

Source :
Tongsan

Friday, 23 November 2012 17:58

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi Thanksgiving Day. Description: Rating: 5 Reviewed By: Cinpu Zomi
Scroll to Top