728x90 AdSpace

Hot
Menu
Zon-ol na Donate

Latest News

Kikhalna leh hanciamna tawh gualtung tuang Zomi tuukpeng siam Tg. Suan Lam Mang.

Kikhalna leh hanciamna tawh gualtung tuang Zomi tuukpeng siam Tg. Suan Lam Mang.



2010 kum tan (9) sangnaupang kum (15) a pha Suan Lam Mang, Chin United Club ah tuukpeng kimawl dingin kisam hi. Tuathu a zaak ciang, paidingmaw a hih kei leh sang mah zomsuak ding cih Suan Lam Mang te innkuan sung ah thu khensat ding vai lianpi khat a hi hi. Nu leh pa, sanggam te-in pilna mah deih sak-in sangmah zopsuak dingin hanthawn uh hi.

Mangno a hihleh kuaman a sam keizong a ki mawlmawl ding hi-in hi sapna pen a ma a dingin lamet khakloh lungdam na lianpi a hi hi. Tua hi a, Mangno in a inn kuanpih te deihsakna sang’in a ma uk a hi tuukpeng kimawl dingin, sangtawp dingpen a ma lungsim sungah khensat sa a hi hi.

Tua sapna thu Mangno in a zakciang in a Pate kiang a gen kammal in ,“Ka paiding kua man hong kham kei vo sangkah vetkei ning ei sum beisak bek bawhlung (tuukpeng) mah sui ning ei” hongci mawkin khamzawh ding hilo hi ci-in a Pa’n gen hi.

Tua zah in a uk lam a theih ciangin a pa Dal Lian Khup zong tuukpeng a uk khat a hih natawh awipha keimah ta leh khaktan ding haksa sa mahmah kawmin “bawhlung ( tuukpeng) pen ei tepawl a dingin ki vaak zawh nang’ hi kei veh aw” ci kawmsa in phal ding in khensat hi. A Pa tuukpeng ukna in Mangpi kimawl theihna ding lampi tampi hon sak hi. A Nu leh sanggam te-in bel a Pa cih nial nawnlo in thukim pih uh hi.


Tua ciangin a Pa’n Chin United FC pan a sam a hi, Vice-President a sem Sia Do Khan Khup kiang ah “Do Khup aw a maban khempeuh hong-ap hi mai-ing ei! A siat leh no a kamsia a hoih leh lah no a kampha” ci in ka paisak mai hi ci hi.

Tua a-ap laitakin Sia Do Khup in a dawn kikna ah “Kum (4) sung in ေဘာလံုးသမား ahih dingleh hihloh ding kithei ding hi tua kum (4) a lem kei aa hongciah kik leh nakisik ding uh hiam? Ka cih hi’n kisik kei nung hongcih ciang ka lakngam pat hi” ci-in gen hi.

A hizong in ZOFA ah a kimawlzia a muhciang a kipan tah theiding a hihlam mu a hihmanin a sap a hi hi.Hi mah taleh Sia Khup zong a sap hangin sangkah kipelh ding a, gualzawhna a ngahloh dingpen a lungsim sungah ki suang veve hi.

Tua hun lai tak in kei zong kasap pong hang bel ka deih man bek hi-in lungsim khat bel hi giauguau suak ta hetlo, tuukpeng kimawl cihpen minthang ding cih I muh kholhsa hilo mawkin liamna, baina hongnei lai leh cihpen ki dah mahmah veve hi” ci-in kipaak nuikawm sa-in Sia Do Khup in gen hi.
Gualzawhna ding muh kholh theih a hih lohhang hanciamna tawh Suan Lam Mang in gualzawhna hong ngahto hi.

Tu-in Suan Lam Mang ahih leh Chin United bekah hilo in gualzawh ngah in 2014 kum Myanmar gam ai-awh ding in (လက္ေရြးစင္) 23 kiteelna ah a kihhel Zomi khat hong suak hi.

Kawlgambup ai-awh dingin a kiteel lam a zak tungin “Ka theih tung in bel kalaisai…! kamang bang hiven lawm! Sia Khup in nang zong mi 30 a kitel na lak ah kihelcei na hanciam suakleh hong kitelsuak thei vaak ei hongci in kei bang um zo lo hilai..” ci in awling gelhgelh kawm in Mangpi in lawpgen hi.

Myanmar gam ai-awh ding in (လက္ ေရြးစင္) a kiteelzawh tuni ciangdong gam dang mun (10) val ah tuukpeng kimawl ding in a zin kawikawi a hi hi.

2016, September kha (13) ni-in Germany ah Suzuki Club aa dingin Training a pai a hi uh hi. Mangpi in tuukpeng kimawlna pen uukna pan kivaak zawh na hi cih kivaak nading lampi khat hi cih a umzolo a innkuan pihte leh Zomi te tung a hanciam naleh cihtakna tawh a lak khia zo a hi hi.

A ma utpen TV ah suakding leh (လက္ေရြးစင္) ah kihelzawh nang’ cih hi. A hi zong in tuaciang tunding bel ki lam en ngam taktak zo-ngei lo a hi hi. A hizong tu-in a ma ngimna a tang tung taktak ta a hi hi.

Myanmar gam ai -awh ding in mi 23 kiteel ding hi-in mi 30 kiteel masa in tuapan 23 ciang kikhiam suksukin a mah a kihel toto a hi hi.

A mah bek hilo a Nu le Pa’n zong lam en ngamlo in a theih ciang in lungdam na khitui nul uh ci in a Nu leh Pa in zong kipaak nuih hiuhiau kawmsa in gen hi.

A Pa’n a zaktungin “kalai!.. lungdam lua diip van aa.. khai a bang hi ei! Ko Chin United Club ah a kimawl zawh zong nasia a sa khinlua! hithei hileh min hongthei ding hileh Mangpi pa hing ci-in mikiang va ki gengen nuam liang hang ee..”ci hi.

A Nu’n bel “Kazak ni uh pen Cin Khan Lian in (Kawlpi Suan Lam Mang te pawl pi ah) nithum kikhop na ah hong gen in tuani pen a Pa hunzat ni hi-in hunman ciang kogelbel ka khitui uh a luang ngelh ngelh hi mai ei!” ci hi.

Hih ciang dinmun tun theih nading a hih leh olno tak in a ngah hih tuak hetlo hi. A uuk na bek hilo in a han ciamtoto a hi hi. Uuk mahmah khat himah taseleh a hanciam zah in gualzawh na a ngah pakloh ciang pen a lungkia mahmah ngei khat a hi hi.


Chin United Club ah a lutzawh nading bekin a kisin nate a haksat zia hibang in gen hi. “Zingsang phalvaak naak leh gal kap te bangin tualpi ah taiden aa, kimawl pen a baihlo nasep pi khat hi. Cina in pailo cihlah omlo ngapta keileng hong kipai sak veve hi” ci hi.

Chin United Club ah a kisap hang kidemna te ah a suikhapah hilo in kisin thapai phot hi. Kisin hangin zong a kihel khapah hilo in (Coah) nipiah te in a muan uhciang bek a kisui sak pan a hi hi.

Tua bek thamloh a lungkiat ngeina te hong gen beh lai hi. A inn kuanpih tetawh kikhen in a tun ngeiloh na ah ngimna khat tawh a uukna a hi tuukpeng kimawl ding in Zangkong ah paisuk hi. “ Khual lah kizin ngeilo kinaupang lai in lungleng peuhmah” ci-in nui kawmsa in gen hi.

Tua kawmkal ah lamet bangin a suihkhak pahloh ciangin lungkia in innlam ciahding dong ngaihsun ngei hi.

Tuntung bel haksa peuhmah kum khat sung Training paipai Chin United Club ah lah suikha pahlo mi a sui te I muhciang lah ki englua ..tua hun lai, a neu (20 nuai) cih lah omlo in lungkia man peuhmah ing” ci hi.

Gim lah kigim a hihteh a tawpna ah innlam ciah ding pen honglunggulh hi. Sia Khup in a theih ciangin “Sangkah tezong lukhuneelkai ngahnading kum (4) bang a kah hi ven! nangtun kumkhat khawng hipan aa lungkia le cin bangcih mawkding” cih kammal tawh Sia Khup in thahong pia kawm aa hong kho pha kik kik in tuahang in kahanciam kik a hi hi ci hi.

Tuabek thamloh, hihciang a tun nadingin a neu lai a, a hanciam zia a genna zong lunglut huaileh zaknop simtham hi. “kaneu lai in ka kitheih loh hang tun kangaih sut kik ciang a hanciam veve hing. Nitaak sangkituak peuhleh kuama sawlloh pi khe ngawng ah sikkual koih kawmsa in katai den” ci-in aneu lai kimawlzia lungngai in zum nuih kawmsa in gen hi.
A pa in bel “Mangpi bawllung ukkdan bel plastic bawllung te sui den in khamzawh di bang hi kei e sangpai leh bawllung puasak nuamlo kaihciang a taai leng a puanten kawm ah selkawm in a na pua sim pahpah hi” ci hi.

A u ten bel Mangpi a itna in nakhut nakhe liamna khat nei lecin banglawh ding nahiam? khawl lel in ci zel in a man bel mang het kei ci-in a Pa’n gen ngaungu hi.

Hihciang tuntheihna dingin hanciam na bektawh kingah zong hi khin tuak tuanlo hi. Pumpi kikep siamna in zong a ma gual zawh na dingin a thupi mah mah khat ahih na thuzong honggen beh lai hi. Tuukpeng siam khempeuh zong zu leh sa, kham theih guihtheih a zangh hamtang hilo hi cih honglak khia hi.

Eimi te pen keimuhna ah maw... themkhat min neipian leh zu ah maw a hih keh numei ah ki deekzolo min pualah I cidiam ..” ci-in Mangpi in gen hi.

A ma gamtatna tawh kisai Sia Do Khup gen na ah “Mangpi pen apai nana ah kipaakta…banghang? A man guihtheih/khamtheih khatzong zangvet lo hiven” ci in gen hi.

A hi zong amah zongh mihing khat a hih natawh kicin lohna na om veve hi. A ma thanemna a hih leh lungtom na hi ci hi. bawhlung suihpen luangduai kisam peuh mah eilah ki lungduai khollo…haahahaa..” ci-in nuikha kawmin gen hi.

A lungtom natawh kisai a tuahkhak thu a hih leh Salin te bawlung kuanah လည္ဆည္ tetawh suihlai takin a lawmte khat a langte in nako sak a hih manin tuapa tumphei in Red Card a ngah ngei hi.

I lelh ciang I hehsuak baih phadeuh tuani lah lelh sise tawh hehsuak peuhmah aihciang aa..ki tumphei khagawp ” ci hi.

Chin United Club mintawh 50 val kimawl khin in (လက္ေရြးစင္) mintawh 20 val a suihna lakah Red Card khat leh Yellow card 10 val ngah hi.

Mangpi zong maikum lamah Chin United pan taikhiat ding sawm hi. Nop leh noploh man hilo in khasum ki khai a hih man in a taikhiat sawm a hi hi. “Koi ah kituah ding cihbel kigen theinai kei.. sum tam ngahzawk khakleh cihman hi.. Sia Khup in hongphal kei leh bel taikhak tentan sawm keng a hiang kikum leng bel hongphal in um ing” ci hi.

Sia Khup inbel “ken samkei leng Zangkong a tunna ding thuzong omkei cimawk leng maw.. a hiang kei kongpat tahsa hi စာခ်ဳပ္ခ်ဳပ္ sa hi va cih ding lah a ma mailam a khaktan tawh kibang ding.. banghang hiam cihleh bawllung pen thahat laisung bek sumkingah hi-in kum10 kan hilo hi. Tuasung ah ama mailam dingleh khasum ka tuatciang bel khaktan ngam keng.. en hilah teng 5 pia mite'n 10 bangpia ding hiven en tualah piazo lo ding a..” ci-in gen hi.

A Pa’n bel hihtawh kisai in “Sia Khup dong lo peuhmah in thuna khensat kei-in hihciang I tun na pen Pasian leh Sia Khup hang hi” ci in kavai thu kavai khak ci hi.

Tulai tak amah khasum pen teng nga hi in kumpi khasum pen teng 2 pan teng 3 kikal ah om hi. Asean gam a tuukpeng kimawl te khasum pen teng 10 kim a om hi ci-in Tuukpeng uuk khangno khat in gen hi.

Hih tawh kisai in Mangpi in zong a ma tuahkhak nathu te tungtawn in khangnote thapia nuam ing ci hi. “A uuk a om leh bel thapia peuhmah ingh.. mailam ah khasum tam semsem laiding. Tuapan a neu (kum20) nuai zong om in အခြင့္အေရး tampeuh mahta” ci hi.

Tuukpeng a hih leh sawtvei kisui zolo in thahatin suihzawh laiteng bek hi-in a huampi in kum 30 ciang khawng bek hi. Mangpi zong kum 30 a cin khitciang in khasum sang nawnlo ding a hih manin a ma kivaak nading sumngah theihna lampi zon kulding hi ci hi. A hizong kumpi sungah lai-at nasem khat-in kum 60 sung a ngahzah sang a mau kimawl sung aa, angah uh tamzaw lai hi.

A ma mailam kivaak nading tawh kisai leh a ma utna pen sumzon ding a hi hi.

“နည္းျပ khawnglah ki-ut khollo, ka uuknam hi khollo cileng Business khat (sumzon) kipat kullo dia”…] the End

4/12/2016 (Fri)
Yangon
Laigelh - Tha Tuang
Edited By - CS Mung

Photo credit - MyanmarFootball Federeation facebook page and Suan Lam Mang facebook.

Source :
Zingsol (Facebook page).

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Kikhalna leh hanciamna tawh gualtung tuang Zomi tuukpeng siam Tg. Suan Lam Mang. Description: Rating: 5 Reviewed By: Cinpu Zomi
Scroll to Top