728x90 AdSpace

Hot
Menu
Zon-ol na Donate

Latest News

Kumthak Leh Lawhcinna ~ Rev. Dr. J.M. Ngul Khan Pau


Kumthak Leh Lawhcinna
Agelh ~ Rev. Dr. J.M. Ngul Khan Pau


(Joshua 1:1-9)

Kum hong kihei ciangin i lungsimah hong tung ding kumthak - kum manpha, mavanna, lamzanna, daupaina, tuahphatna hileh cih i lunggulh uh hi.

Edith Lovejoy Pierce in kumthak tawh kisai hih bangin na gen hi, “Laibu i phen ding a, laidal bangmah kigelh nailo i mu ding hi. Tua laibu min in hun hoih hunpha kici hi. Bangmah a kigelh nailo tungah i tangthu i gelh ciat ding hi. I gelh masak ni pen Kumthak kici hi,” ci hi. Laigelh mi Louise Fletcher Tarkington in, “Kipat thak theihna kici gam nuam mahmah om hileh tua lai panin ka kipan kik nuam hi. Mawhna, dahna leh ka angsung khualna puansia bangin ka pai dinga, ka tawm kik nawn kei ding hi,” ci hi. Khristiante adingin, i Pasian, i kipat thak theihna mun hoih penpen hi. Banghang hiam cih leh “i nuntakna tha hong dim kikkik hi” (Late 23:3).

Israel mite Jordan gun kiang hong tung uh a, gamciam Kanaan tung ding hita uh hi. Tua laiah a makaipa uh Moses si a Joshua in ama mun luah hi. Gamciam a luah theihna dingun Pasian in Joshua tungah thu pawlkhat pia hi. Tua thukhunte tuni in en zong zui peuh leng lawhcinna i nei ding hi. Israel mite adingin a pai ngei lohna gam, a ten ngei lohna gam ahih bangin kumthak zong na pai ngei lohna gam ahi hi. I pai ngei lohna gamah i gamtatzia ding hong lamlak thei a om leh i van zaang tuampah hi. Joshua a ompih Pasian in 2011 kum sungah Amah om khin zo hi. A bei ding tukum zong mihingte adingin kisam kik theilo ahih hangin Pasian adingin bei tuanlo hi. Tua hangin “Tawntung Pa” kici hi. “Mi lawhcing hih ding na ut hiam?” hong kici leh a utlo kuamah i om ding ka um kei hi. Hong lawhcing sak thei Pasian in lawhcinna ding thukhun nam guk hong pia hi. Tuate khat khit khat in en ni:

Ngen ngam in (Claiming) (Aneu 1-4):
Pasian in Joshua kiangah, “Ka nasempa Moses si ta ahih ciangin tu-in ding in la, nang leh hih mite khempeuh hih Jordan kantanin Israel mite tungah ka piak gam sungah pai un. Moses tungah ka ciamsa bangin na khe in a totna mun khempeuh nang tungah kong pia hi,” aci hi (Aneu 2-3). A piak ging gam a om sa hi. Amau luah ngam dingin upna a neih uh leh amau aa hi ding a, luah ngamlo dingin uplahna a neih uh leh sehnel gam amau gam suak ding hi. Tua hangin a gamciam a tun nailoh uh hangin upna tawh nget ngam ding, upna tawh sik ngam ding amau tavuan hi. Upna tawh i muh nailoh, i neih nailoh Pasian in hong ciamsa a omte khempeuh ngen ngam, tuan ngam, luah ngam leng ei a nei kisuak ding hi. Kanaan gam luah dingin hong pai lai-un a gam a lei-ah mite teng uh hi. Pasian in a piak hangin luah ngam kei le-uh a teng mi om veve ding hi.


Muang ngam in (Confidence) (Aneu 5):
“Na nuntak sung tawntung kuamah in na mai hong khak zolo ding hi. Moses tawh ka om mah bangin nang tawh zong kong om ding hi. Nang kong tamasak kei ding a, kong nusia kei ding hi.” Hih thuciampa Pasian muang ngam leh Joshua lawhcing dinga, a muan ngam kei leh a lawhsam sa hi mai hi. Joshua kiangah a thuciam lian mahmah thum i phawk ding deihhuai hi. Khatna, “kuamah in khak zo lo ding” ci hi. Kei muhna ah mite hong khak bek hiloin ei leh ei kikhak tawntungzaw hileng kilawm kasa hi. Lawhcinna midangte ading bekin ngaihsunin nang mahmah a lawhcing dingin na kikoih kei leh nang leh nang a kikhak den nahi hi. Nihna, “nang tawh zong ka om ding” hi. Joshua in a dam sungin Pasian in Moses a ompihna tel mahmah hi. Tua hangin amah tawh omkhawm ding Pasian a muan ngam kisam hi. Jesu in, “Leitung a bei dongin note tawh kong omkhawm ding hi,” ci-in hong ciam hi (Mat 28:20). Thumna, “nang kong tamasak kei ding hi” hi. Hih bang thuciam muang ngam ding maw, na ci kha ding hi. A ciampa Pasian ahih manin lunghihmawhhuai lo hi. Pasian in, “Note ka hong nusia ngei kei ding a, ka hong tamasak ngei kei ding hi” (Hebru 13: 5). Hong nusia ngei lo, hong ompih den Pasian muang ngam leteh lawhcinna lampi tawn na hi ding hi.

Hangsan in (Courage) (Aneu 6,7,9):
“Thahat in la, hang in; banghang hiam cih leh amaute piak dingin a pu a pate uh tungah ka ciam leitang hih mite na luahsak ding hi.” “Hang in” cih thumvei Pasian in Joshua tungah gen hi. Tua ciangin Israel mipite'n zong, “Na thupiakna leh na thute, na thupiak peuhpeuh hong langpangin a manglo mipa kithat ding hi. Thahat in la hang in,” aci uh hi (Aneu 18). Hangsan i cih ciangin lauh neilo cihna hi khinlo hi. Lauhna a neih hangin muan ngamna tawh gamtang cihna lam kawk hi. Joshua in lauh neilo hi leh Pasian in “hang in” thumvei tak cilo ding hi. Pasian na muan manin bang sem ngam ding na hiam?

Thumang in (Obedience) (Aneu 7):
“Thahatin hang in la, ka nasem Moses in nang hong piak thukhamte khempeuh tawh kizui-in na gamtat ding limtakin ngaihsun in. Na paina peuhah hoihtakin na lamzan' theihna dingin tuate khat zong pelh kei in.” Pasian in kumpi Saul in siampite bekin a sep theih uh meihal biakna a piak leh Amalek mite a vekpi un thah ding a thu piak thu a manloh ciangin, hih bangin ci hi: “Topa in meihal biaknate leh biakpiaknate Topa' thu man' ding zahin deih ahi hiam? En in, biakpiakna sangin thu man' ding hoihzaw a, tuutal thaute sangin thu ngaih ding hoihzaw hi (I Sam 15:22). I biakpiaknate hangin Topa a lungdam mahmah ding hi loin i thuman manin a lungdam ding hizaw hi.

Zui Tawntung in (Consistency) (Aneu 7-8):
“Na paina peuhah hoihtakin na lamzan' theihna dingin tuate khat zong pelh kei in. Hih thukham laibu na mangngilh ngei kei ding hi. A sunga kigelh thute khempeuh tawh kizui-in na gamtat theihna dingin sunlezanin na lungngaingai ding hi.” Pasian thu in “thukhamte khat zong pelh kei in, mangngilh kei in, sun leh zan na lung ngaingai ding hi” ci hi. Pasian thu zui tawntung ding, nisim-a thumanna in lawhcinna kizom paisuak ding hi. Topa Jesu in lenggui hiangte gah pha hih theih na dingin a bulpi tawh kizom paisuak ding, ci hi (John 15:4-6). Kizom tawntunglo hiangte gahlo ding hi. Tua mah bangin nget ngamna, muan ngamna, hangsanna leh thumannate a tawntung a neih ngitnget ding hi.

Kipumpiak in (Dedication) (Aneu 8-9):
Lawhcing dingin kipumpiak ngam kisam hi. Olympic a kimawlna ah kidemte kipumpiakna sang mahmah hi. America Olympic team in Colorado Springs ah kisinna mun nei uh a, kum li zawh ciang kimawl dingte tu'n zong kisinna nei toto uh hi. Tua banga kipumpiak zawhna hangin gualzawh pahtawina medal ngah uh hi. Sawltak Paul in, “Kimawlna sungah a kihel mi khempeuh in thu khempeuhah a pumpi uh uk ciat uh hi. Amaute pen a kisiathei pak a ngahna dingun a hanciam uh hi a, eite pen a kisia theilo i ngahna dingin a hanciam ihi hi,” (I Korin 9:25). Kisia thei pak pahtawina lukhu ngahna dingin mite kidem uh ahih leh eite'n a kisia theilo lukhu i ngahna dingin bangzahta in i hanciam kisam hiam? Tua mah bangin leitung galkapte in amau nuntakna kipumpiak in gal mai ah pang uh hi. Khris galkapte adingin bangzah takin kipumpiak kisam hiam?

Pasian in zon tawm ding gam ci loin “ka piak gam” ci hi. Tukum lawhcinna na neihna dingin ngen ngam in, piak dingin hong ciamsa hi. A piaksa gam liatna zong Pasian in pulak tektek hi. “Sehnel gam leh hih Lebanon panin gun lianpi Eufratis gun dong, ni a tumna lama Tuipi Lian lam, Hit mite' leitang khempeuh nangma gam hi ding hi,” ci hi (Aneu 4). Pasian in a piak gam nisuahna lamah Iraq gam, nitumna lamah Mediterranean tuipi, leilu lamah Lebanon dong ci hi. Israelte'n Pasian ciam gam khempeuh luah kha ngeilo uh hi. Jesu Khris ah hong ciamsa thuphate ngen ngam leng ei a hampha kihi dinga, ngen ngam kei leng ei a sumh kihi ding hi.

Lawhcinna thu kigelhna laibu ah “khuaivah” thu hih bangin kigelh hi. “Vanleng lam saite etna panin khuaivah pumpi leh a kha kibukkimlo hi. A pumpi adingin a kha tom lua hi. Tua hangin amau tuatna panin “khuaivah leng theilo ding hi,” ci uh hi. Ahi zongin khuaivah in tua bang thu thei se lo ahih manin khuaizu tampi bawl hi, ci-in kiciamteh hi. Mite'n nang bang ci hong gen uh hiam cih ngaihsutna tawh na hun beisak kei in. Mi hangsan i cihte in amau tawh kilawmlo ding na tampi semkhia uh hi.

Thumanna in lawhcinna bulpi ahihna Pasian in Moses kam zangin hih bangin gen hi. “En un, tuni-in na mai uhah thupha khat leh hamsia khat ka koih hi. Tuni-a kong gen, Topa na Pasian uh thupiaknate na zuih uh leh thupha hi a, Topa na Pasian uh thupiaknate mangloin na theih nailoh uh pasian dangte nungzui dingin tuni-a no kong thupiakna panin na kiheikhiat uh leh hamsia ahi hi” (Thuhilh 11:26-28). Thumanna hanga hamphatna nam sagihte en ni.
(i). Jesu i itna pulakna hi (John 14:15).
(ii). Pasian pahtawina na ngah ding hi (John 12:26).
(iii). Ama itna sunga na om ding hi (John 15:10).
(iv). Pasian in hong sang ding hi (Sawl 10:34-35).
(v). Pasian thupha na ngah ding hi (James 1:25).
(vi). Khansauna leh nopsakna na ngah ding hi (Job 36:11).
(vii). Nang leh na tate in na nuntak sung uh nopsakna na ngah ding uh hi (Thuhilh 12:28).

Kipumpiakna i gen ciangin Kumpinu Esther a mipihte adingin “ka sih leh a si ka hi-zaw ding hi” acih leh Daniel lawmte thum milim maiah a ku'n loh manun “mei phualpi sungah khiatna” a thuak uh i phawk hi. Pasian gam i cih ciangin kipumpiak ngam ding zong hingiat hi. Tua banga a kipumpiak mite Topa'n lawhcinglo in omsak ngeilo hi. Leitung adingin a kipumpiak mite'n zong minphatna a ngah uh leh vantung ading a kipumpiak mite in bangzahtakin pahtawina ngah ding uh ahi hiam!

Thukhupna
Laibu khat ka simna ah Pasian thu hanga mi lawhcing dingte'n thu li lim ngaihsut mahmah uh hi kici hi. Khatna, Pasian thu sungah amau nuntakna nga. Nihna, Pasian thu limtakin ngaihsut ngeungau den uh hi. Thumna, Pasian thu in hong hilhna bangin gamta uh hi. Lina, Pasian thuciam bangin a gah lo dingin lametna nei uh hi. “Lai Siangtho Pasian thubu, ka neih manpha penna hi” cih la ka sak simin Pasian thubu Lai Siangtho ka neih manpha pen hi takpi hiam cih ka ngaihsun thei hi. Ka neih manpha pen ahih leh ka sim tawntung ding hi. Ka sim tawntung hiam? Ka sim tawntung leh a thute ka zui tawntung hiam? Mavan daupaina, gualzawhna, lamzanna, matutzawhna, leh lawhcinna na neihna dingin “Lai Siangtho” ah ciahkik ni.

Kumthak thupha note khempeuh tungah hong tung kim ciatta hen.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Kumthak Leh Lawhcinna ~ Rev. Dr. J.M. Ngul Khan Pau Description: Rating: 5 Reviewed By: Cinpu Zomi
Scroll to Top