728x90 AdSpace

Hot
Menu
Zon-ol na Donate

Latest News

MAKAIH ZIA NAM 5 TE. Agelh - Rev. John T Hum, USA

MAKAIH ZIA NAM 5 TE.
Agelh - Rev. John T Hum, USA



Makai “A” namte pen Sunday School sia, veng makai cih bang pan kipan cih I gen hi. Hih bang makai namte pen sum kipia a sem te hi masa lo hi. Amau kipiak zawh zah a pawlpi ah hun-lang nasem te ahihi. Ih tel ding khat ah Pasian nasep pen kiphalna (volunteer work) nasep hi den hi. Pawlpi sungah a kiphal tawm thu-um mi pawl khat te’ nasep na hangin Pawlpi khangto ahi den hi. Pawlpi tangthu te ah, Khanlawhna  leh pawlpi khantoh na a-om simsim in, hih mi kiphal tawm/ki pumpiak mi pawl khat te hang hi zaw cih ih theih ding ki sam hi. Hih bang dan ki phal tawm nasem ih ngah theih na ding pawlpi makai siapa leh up ate in mawhpuak nei hi. Pawlpi sung nasep khempeuh siapa in a vek in sem khin zolo ahih man in volunteer mi ki sam hi. Tua mah bangin thu-um mi te zong Pasian pawlpi a ding nasem nuam vive a hihi.

Training Piak Ding Kisapna
Hih “A” makai namte pen hunlang tawh nasem te ahih man-in hunbit nasem te zah a hun tampi pia zolo hi. Tua ahih man Lai Siangtho sang kahte zah in theihna nei lo thei ding hi. Ahi zongin Pasian zat mahmah theih mite ahih lam manggilh loh ding ki sam hi. Tua ahih man hih bang kipumpiak nasem nuam mite pen Siate in training kul hi. Siapa in a ngiimna kician, a deihzia tel tak a theih sak  ding ki sam hi. Pawlpi I cih pen Pasian in sia pa vision a piakna bang bek a pai ahih man-in ki-uk zia, ki makaih zia te sia pa deihzia tawh ki leh puak ngeilo ding hi.


Pawlpi khenkhat te ah sia te in hih “A” nam makaih nate kisapna tel lo a hihman nasep zia mazang thei lo hi. Kipumpiak sia te in zuih ding thulet kician ngah lo ahih man a ut bang ciatin sem ngeingai uh hi. Lai Siangtho a ut teng hilh in, hun ciangtan omlo, sum ki cing neilo cih bang ahih man-in pawlpi sungah khantoh na sangin, buaina piang zaw thei hi.

Hun piak zia: 
Hun piakzia nam 3 om hi. Pasian tawh hun piak zia, sia, makai te tawh hun piak zia leh, mi (na hilh ding naupang, veng mite) hun piak zia ki ci hi. 

Amasa in:  “A” nam makai te in Pasian mai ah nasep thupi mahmah sem ahihna tel ding kisam hi. Amahmah “D” makai te zah thupi ahih lam muh theih ding kisam hi. Tua ahih man Pasian tawh hun tuam la-a, thungetna, leh Pasian kammal sung mahmah ah kidiah na tampi neih ding ki sam hi.

Anihna :  Pawlpi sia (or) Supervisor pa tawh kimuh ngitnget ding ki sam hi. Nitumna lam pawlpi te ah, siapa taang a sem ding supervisor ki koih a siapa tawh kimuh tektek ngai lo in, supervisor pa tungah ih deihna ih haksatna, ih deihna teng ih sung thei hi. Hih kizop na in tung leh nuai kizopna hong nei sak na, lawhcin na hong ngah sak hi.

Athumna:  Ih mite (SS naupang te, veng kikhop pih mite) tawh hun zat zia thupi mahmah hi. Hunzat na mun ah, Sinna (lesson tawh paina) hunzat zia leh, hun ciangtan, zia ciangtan selo hun zat zia nih om hi. Lesson tawh pai a hun zat na ah, hun (nai) kiciangtan bang zuih theih ding kisam hi. Nisuahna lam gam te ah hun kithupi sak lo-a, mi kithupi sak hi. Nitum na lam ah kileh bulh hi. Anih tuakin thupi sak theih ding ki sam hi. Mite tawh hunla a, ki telna om masa lo in, ih tugen te mite sungah lutlo dinga, hun ciangtan tawh sem thei kei leeng zong sawtpi na kisem thei tuanlo hi.

Kiginkholna: 
Ih hunzatna buppi ah 75% pen kigin kholna in zangh ding a, 25% pen piakkhiatna hi ding hi. Kigin kholna cih ciangin: na ki-aapna, na lesson teltak theihna, na kam zat zia ding te teel na cih te ahihi. Mipil ten, thugen zia, kammal zatzia, luheek gamtat zia te, a kisin pilna hi ci hi.[ii] Paunak khat ah, “ aki ging khol galkap mangpa in gal ado ciangin zawh baih sa zaw hi”, ci hi. Kigin na thupi mahmah hi.

Mite' telbaih Thubul (Lesson): 
A khangto sa gam leh khangto lo gam te ah thu tel baihna ih kibat na khat om a, tua pen taangthu gen na tawh thuhilhna ahihi. Mihing in ih theih loh kal in ih et-the, thupi I sak mi na om den hi. Tua te thu kiza nuam a, ki thei nuam hi. Tua bang mite gualzawhna ki et-the nuam hi. Alang khat ah, mikhat I puukna zong ih tel sak man-in ih nuntakna hong puah pha zong om hi. Tua ahih man taagthu gen in la, a langnih pan in la le cin mite ki makaih siam hi cih, mipil te gen na hi.

Dotna tawh thugen theihna: 
Thudot siam mite sia siam kici hi. Thudotna I neih ciangin mikhat I ngaihsutna ih hon sak hi. Gentehna in, SS naupangte tungah, “ Pasian in bang hang mihing hong baw ahia? Ci in dong leeng, a ngaihsut ding uh thu pawlkhat lam ih hon sak hi.

Ciaptehna: 
Hih ciaptehna pen Journal ahih keh Spiritual Logging System zong ki ci hi. I khantohna, I kiam suakna, Pasian hong hopihna, I devotion te lai tawh ciapteh ding kisam hi. Bang ka cih ciangin kei khangto a, bang ka cih ciangin kiam a, Pasian in kua tung tawn in bang hong hopih cih te ciamtehna nei den leeng khalam khantohna hong pia hi. Salvation Army pan khiapa William Booth in zan a ihmut kal na ngawn in Pasian hopih ding lam-en ahih man alupna kiangah laibu gelh loh leh laikuang tawh ki gingsa in om den hi.

Mentor neihna: 
Nang hong it, na khantoh ding hong deihsak, hong huh nuam, zong hong gen ngam ding lawm, makai neih ding ki sam hi. Khantohna pen miten utlo (aa-na) pipi a hong gen sangin eimau va ki pulak tawm leng om zaw hi. Na nuntakna ah hong phat kehmpeuh, na cih bangbang he-he hong ci khempeuh lawm hoih hilo hi. Ki puah phat na pen mikim in ki sam den a, tua bang ih ngah na ding man kipia hi. Tua hi-a,hong ki taai ciang, hong ki nial ciang, heh lo in, tu hithiat in ngaihsun phapah ding ki sam hi. Tua bang dan mi na neih leh Pasian in na lampi a ding hong koihsak hi ding ahih man khahsuah ken la, thunget sak in.

Hun: 
Hun zat siamna I cih ciangin, nikhat nai 24 khen a, nai tuazah sung tua sem ding cih a delh teta na hi masa lo hi. Hun zang siam cih pen ei mahmah ki uk siam cihna hi. Leitung nate pen paipai hi bek lo in, a tai vangvang hi mai hi. Tua ahih man delh den akul na hihi. Mikhat in agen na ah, Pasian hun tampi pia leeng hun zat kisiam pen na ci hi. Pasian in hun kiciang mahmah hong pia hi. Nasep hun, ih mut hun, annek hun k icing tak a zat ding hong pia hi.

Ahi zong lungdamna tawh zat theihna pen Pasian thupha hi se hi. Billy Graham in, abei sa hunte ngah kik thei le cin bangci na zat nuam hiam” ci-a ki dot ciangin, “Thungetna leh Lai siangtho sim a Pasian aw ngaihna tawh hun tampi zangh nuam ingh. Thuhilhna tawm bek nei in, gualnopna tawm bek nei in Ka innkuan pih te tawh hun tampi zang nuam ingh,”na ci hi.

*******************************************************************************

Source :
Tongsan 2011.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MAKAIH ZIA NAM 5 TE. Agelh - Rev. John T Hum, USA Description: Rating: 5 Reviewed By: Cinpu Zomi
Scroll to Top