728x90 AdSpace

Hot
Menu
Zon-ol na Donate

Latest News

Zomi Siamsin Kipawlna, Universities-Myanmar Tangthu a Tom

Motto: "Sinin, Semin, Mainawt ni"

Kawlgam ah 1948 kum suahtakna ngah khit akipan Khamtungmi Universities sangnaupang kipawlna a khang a khang in na om toto  hi. 1948-1962 sungteng khamtungmi Siamsin Kipawlna, Hill Chin Student Union min tawh Rangoon University ah  kipawlna om hi. Zosuan Siamsinte kipawlkhawm in minam khantohna ding  kikumkhawm thei a, minamdangte lakah khat le khat kikhualna bekthamlo ngeinate kemcing in University huam ah unau sanggam khat mah bangin na kithuah uh hi. Tua kithuahnate  University kahsung bekhilo, sangman khit ciang nasep tuamtuam ah a lut  uh hang, ki-itna kiamlo, gam le  minam ading  kisapnate ah Siamsin hunlai ki-itna te mah bulphuh in ma na pang khawm thei uh hi.

1961 kum in Shan gam khuapi Taungyi ah kibawl Mualtungmiteng Kimuhkhopna Pawipi ah tua hun lai-in Hill Chin Student Union pan President ahi Mr Chin Sian Thang (Law Major) in Siamsinte palai-in nakihel a,1948 Kawlgam Thukhunpi puahphatna ding tawh  kisai-in Zomite tangin thu nasung thei hi. Hih thupen Siamsin tangthu ah gamvai tawh kisai a kimuthei Siamsinte thuneihna atawpna  hong hita hi.
1962 khit General Naywin makai in galkapte in Kawlgam kumpi hong sep akipan kipawlna tuamtuamte hong kiphiat in Socialist upna tawh ki-kalsuan hi. Siamsin kipawlnate zong  Union kici nawnlo a, Chin Literature and Culture Committee cih min tawh kilaih ahimanin sangnaupangte thuneihna tampi hong kiam in Minam khantohna ding thute pan  ngeina le laivai kibatlohna thu tawh Zosuan Siamsinte sungah thu kituahlohna hong tam tetek hi.
1964-65 kum kim ciangin Rangoon ah  University sangkah Siamsinte in Zomi Siamsin Tang Sum cihtawh fund paulap in kipawlna khat na nei uh hi. Tua munpan Tedim kampau Zomite kipawlna dingin Zomi Siamsin Kipawlna ci-in hong kho tektek  hi. Tua hun lai-in Yangon, Mandalay cihbek phial ah University om ahimanin  khamtung khua tek pan University kah a kihihna le Zomi Saimsin Kipawlna sungah kihelnate tawh  Zosuante  khat le khat kithei in gam le minam khantoh nadingte ah na kithuah thei uh hi.
1988 khit SLORC leh 1997 SPDC galkapte gam uk hun akipan Kawlgam mun tuamtuam  akigawm 115 phial ah University le College hong hong thak uh ahimanin Zosuan Siamsinte zong kikhenthangin sanggam unau laizom takpi nangawn kitheihna hong om nawnlo hi. Tua banah nidanglai danin khamtung ah kitengcip zo nawnlo a,  lo no na lam manawhin Zosuante  kikhenthangna hang' khua khat tui khat hihna le sangkah khopnate pan hong piang khia ki-itnate Zosuan khangthakte sungah hong om nawnlo hi. Gam le minam khantohna ding asem abawl khawm ding teng sungah kimeltheihna, ki-itna hong bei thei zah dong dingin patauhhuai dinmun ah kitung ta hi.
2004 kum in gamdang pan huhna tawh Chin Literature and Culture Committee omna ahi Yangon, Madalay, Magwe,Monywa, Pakoku, Kalay pan Siamsin makaite Yangon ah  kituah in CLCC Central, Myanmar hong phuan khia uh hi. 1962 khit khua tuamtuam panin mun tuamtuam ah sangkah in a kikhenthang Zosuante kikaihkhopkikna masa pen hong hita hi.  
2005 kum ciangin CLCC, Central Myanmar min tawh Hakha khuapi ah akhatveina Develpoment Seminar kibawl hi. Tuamunah Seminar kahin apaite sungpan Tedim kampau Zomi Siamsin makaite pen  amau sangkahna CLCC sung tek pan makai dinmun tawh hong kihelthei uh hi. CLCC-Yangon pan Dr Pau Sian Lian, CLCC-Mandalay pan Tg Ignatius Thang Sut Mung, CLCC-Magwe pan Dr Nung Mun Thawn, CLCC-Monywa pan Tg Yin Sian Mung, CLCC-Kalay panTg Michael Suan Lian Pau cih bangin Tedim kampau Zomi Siamsin makaite kituahkhopna pan Kawlgambup Zomi Siamsin Kipawlna phuatkhiat ding vision hong nei uh hi.
Tua Hakha Seminar pan hong piang vision pen 2006 November 20-23 sungin Tedim Khuapi Khaudo Hall ah amasa pen Kawlgambup Zomi Siamsin Seminar mitmuhin hong piang khia hi. Kawlgam sungpan mun tuamtuam ahi Zangkong, Mandalay, Monywa, Kawlpi, Magwe khuapite a om Zomi Siamsin makaite hanciamna tawh kipankhia in hong lawhcing mahmah hi. Hih pawipi pan Kawlgambup Siamsin  Kipawlna kipsak ding hoih kisa a, Zomi Siamsin Kipawlna, Universities- Myanmar (ZSK-UM) cih ding kithukim hi. Kipawlna ah panmunlen ding kitel a, Gambup Siamsin EC kinei hi. Hih pan in Seminar II Kawlpi ah neihkik dingin kithukim hi. Siamsinte Motto dingin zong India gam a om sanggam Siamsin Pawlpite tawh athu kihualthei dingin “Sinin, Semin, Mainawt ni” cih ding kilungkim hi.
2007 kum sung  hamsatna tuamtuam le gambuaina hangin tua kum Seminar piang zolo hi. Siamsin makai  Central EC teng zong salfron revolution ah kihel  uh ahimanin hong kikhen thang uh hi. Malaysia a tungkhin sa  Pawllutang kiangpan 2008 August kha ciangin gamsung ah a om lai Siamsinte tungah panmun le thuneihna  hong ap thei pan hi.
2008 kum ciang, gambup thuzekpi ( tualaitak) tungpan phalna tawh Kawlpi Siamsinte in vaipuak la in Seminar II bawlkik ding kigeel phakik hi. Mun tuamtuam a om Siamsinte kimutuahin 2008 November 25-30 sung Kalay Baptist Church biakinn ah kinei hi. Tua mun pan Zomi Siamsin Kipawlna, Universities-Myanmar panmun len thak kitel a, tulaitakciang Central EC in hong dingsuak uh hi.
Seminar II pen Siamsin motto, “Sinin, Semin, Mainawt ni,” cih thubulphuh in kinei-in kibawl hi. Siamsin Seminar III tawh kisai  2010 kitelna tawh a kizomthei thulu hih ding EC meeting masa ah kikupna a om bangin, siapite hong piak ngaihsutna tawh "Post 2010" cih kibulphuh in Tedim khuapi ah kibawl hi. State level pan in Seminar bawl ding hong kinawngkaisak a, State khuapi Hakha ah delh in pawi a kipelhloh nadig kihanciam hi. Kawlpi pan a kahto Siamsinte Lawibual Gate pan khak in thusin ngawp hi. Pu Chin Sian Thang le Prof Dr Thang Za Tuante tuanna mawtaw pen deihtak in khaktan in thusit uh hi. Pu Thang pen Seminar lamah pai khuan pia lo in cingcip suak pah uh hi.Hamsatna tampi sungpan  Siapi  Dr Thang Za Tuan le Pu Zo Zam Cin Paute in thusinpihna hoihtak hong neih theih pih uh hang  Pu Chin Sian Thang pen thuneite in Seminar lam kalkhat a suan ding zong hong phallo hi. Hi bang teng tawh Seminar III nuamtak kizo to thei hi.
2010 ciangin “ FuturisticThinking” cih thulu tawh Tonzang khuapi ah kibawl hi. 2011 ciangin Pyidawtha khua ah “Moral Rearmament” cih thulu tawh kibawl hi. 2012 kum in “Challenging Hope” cih thulu tawh Tuithang khua ah kibawl hi.
Tukum, 2013 kum in “My Rights & My Responsibilities” cih thulu tawh Kawlpi ah November 18-24 sung kibawl ding hi.
2010 kum May kha in a masa pen Siamsin Summit Madalay ah kinei thei a, tua mun ah Siamsin Seminar III lai a khensatna tawh kizui in thukhunpi kibawl a, tua mun mah ah kipsakna kinei hi. 2011 kum in Yangon khuapi ah a nih veina Siamsin Summit kinei thei hi. 2012 kum in a thumveina Kawlpi ah le 2013 kumin a liveina Hakha ah kinei thei hi.
Kawl kumthak tuibuak pawi hun sung  in Medical Trip kipai den hi. 2011 kum in Siamsin Medical Trip to Buanli, 2012 kum in Siamsin Medical Trip to Suanghoih le 2013 kum Siamsin Medical Trip to Saalzang cihte bangin singtang khuate ah nasepna kinei hi.
Midangte tawh nasepna le kizopna zong kinei a tuate pen hih sung kigelh nailo hi.


Zomi Siamsin Kipawlna
Myanmar

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi Siamsin Kipawlna, Universities-Myanmar Tangthu a Tom Description: Rating: 5 Reviewed By: Cinpu Zomi
Scroll to Top