728x90 AdSpace

Hot
Menu
Zon-ol na Donate

Latest News

A (7) VEINA ZOMI NAMNI TEDIM KHUAPI AH CAPT. MANG TUNG NUNG’ THUGENNA

A Ni: Feb. 20, 1957

Hun ukpa leh hong pai mipite khempeuh aw.....

Tuni in-ah Zomi te ii a (7) veina Zomi Nam Ni in thugen na hun kangah man in nakpitak in lungdam in ka angtang mah mah hi cihthu lungdam na kongpulak nuam hi.

Hong kikhawm U Lian te leh mipi khempeuh te aw.....

Eite in Zomi namni Nithupi pen hih bangin nopcitak leh manphatak in ih bawltheih nathu te bulphuh in thu kong gen nuam hi. Zomi namni ih cih pen thudang hilo hi. Kawlgam sung ah Zogam leh Zominam cih pen kilangh tak in om hi cih thu a kip semsem nading in kum sim kum sim in pholaak khia in ih pahtawina a hi hi. Banghang in Zominam Ni ci in taangko khia in pahtawi ih hiam cih leh Zominam ih cih in Kawlgam taangthu ah a minthang minam a hihna, Zominam te in gam leh leitang a neihna, Zominam te ii Zongeina, Zolai, Zopau cihte a tuam vilvel in a omna te hang in Zominam te ih hih na te hang a hi hi. Hih thubulpi te zui-in ZOMINAM NI PEN a bawlhuai a bawltaak Zominam bup ii Nithupi Nimanpha a hi hi.

Hih bang aa, a lamdang, a manpha Zominam ni pen pianngeina bang aa, a piangziau hi lo hi. Zominam bup in kumtampi sung nuntakna neih le lam suukkhia piakhia in a hanciam na uh tawh a piangkhia Nithupi a hih man in “Tu ni” pen Zomi khempeuh, Zominam lungsim a neikhempeuh, Zominam omhi cih ciamteh in a zahtaak khempeuh in a kip a kho nading in thupilaak in hanciam ding uh hi cih pen upkhialhna lunghianna a omhuai hetlo thu a hi hi.


Mipi khempeuh te aw…..

Zomite in Zominam ni zahtaak tak in a bawl na pen kuakua minamdang khat peuh zahtak bawllohna hilo hi. Hih bangdan Minam Ni bawlna in Zominam te in Zominam te a zahtaak na a muanna bek zong hilo hi. Zominam te in minamdang te a zahtakna thu a lahkhiatna mah tawh a kibang a hi hi. Minamkim kilem kithutuak kipumkhat nazong kiptak aa lamh nading bulphuhna zong a hi hi. Eite ii Minam ni pen eite mah in zahtaak lo hi le hang  minamdang te a zahtak hi hang cih zong kicithei tuanlo hi. Minamkim kithukhat kilungtuak na cihzong a omthei tuanding a hi kei hi. Tua hang in Minam kim te ii kithukhat kilungtuak nading a deihmi khempeuh in a maute ii “Minam ni” ciat zong a bawlding uh a hi hi. Minamdang te zong a mau’minam ciat tawh a kisai Nithupi te manphatak in a bawl nading un hanthotna pen thupi kasa mahmah hi.

Mipite khempeuh aw….

Zomi te in Zominam ni thupitak in ih bawl man in ih gambuppi (Pyay Htaung Suh) a sukha a nawngkai sakding dankhat in a gen, a um mite a om na thu ih thei hi. Tua pen upkhialhna genkhialhna taktak a hi hi. Ih gambuppi kilemna kithutuahna a sukhading thute zongni cileng Minam lungsimbeina, gambup lungsim/mipi lungsim beina, minam khat le khat kituam khenna, kithutuak kitangkimna a om lohna cihthute in gambuppi a sukha ding hibek hi cih pen eite in kiptak in ih um ih sang hi. A sawt nailo taangthu khenkhat en kik leng, Zominam te in minam lungsim tak tawh a kizawn(a kisiizung) ih hi hi. Hih ki siizung na tawh gamkeek Mangkangte lehdona, Japante lehdona, gamsuahtakna, gambuppi(pyay htaung suh gyi) kilamh kip nate leh gambuppi kikhenkhap loh nading cih thute aa ding adang minam(tai yin tha) te tawh akibang in nuntakna neih leh lamh te suukkhia in kilom khat in a kihanciam khawm a kipiakhia khawm a hi hi. Ki suukkhia in kihanciamkhawm hi ih cihciang in a kilangh a kitel hipah hilo hiam? Tua in minam itna lungsim ii tawsawnna te pan akipan khia, a kibul phuh a hih na thu kitel mahmah hi.

Mipite khempeuh aw…..

Zominam ni ih bawlna in minamkim kipumkhat kilomkhat na leh gambuppi a kip nading a hi hi cihthu ih gen khit ciang in Zomi namni hong piankhiat na thu te zong ka gen nuam hi. A beisa 1948 kum Jan. ni 4 ni, zingsang nai 4:20 Am hun in ih Gambuppi in Mangkang kumpi khut sung pan in ki-ukna suahtakna a ngah (Tamadah Naingaan) gamkhat ih hih nathu a kitaangko khitna, mipi khempeuh in ih theihsa tek ahi hi. Hihbang in ih Gambuppi in suahtakna ih ngah khitlian leh Zogam aa om Ukpite in a maute ii sawltakte pawlkhat Yangon khuapi ah sawl in Gambuppi’tung ah a maute’ii thuneihna (a khuanh a yay) pen ngen uh hi. Bangcidan in ngenhiam cih leh a maute ii ngahsa thuneihna/Aana leh siahkaihna te mipi in a nial na thutawh kisai-in a maute’ii hamphatna (a khuanh a yay) a sup/a taan loh nading un “kumpi in mipi tung ah thupiakna khat ong neihsak un” cih thu ahi hi. Hih bang in a nget uh ciang in ih kumpi in eite gam pen Democracy gam a hih man in Democracy paizia ngeina tawh kizui in nakhempeuh mipi’thuneihna bek tawh sepkhuan a om a hi hi. Mipi’deihna nialnading thu tuamtuam bawlnading kilawm lo hi cih tawh na dawng kik uh hi. Tua ciang in Zogam ah thukan(Commission) pawlkhat thu a kan(sungsaan) nading in ngen thuah teitei uh hi. Tua thu kumpi in thukim in sang uh hi.

Kumpi in VuamHtuMaung – Zo Vuanzi(Chin Minister), U Thein Maung – Menzi (TainnMinzi), U Soe Win – Pilnalam U Lian (Educational Officer) cihte a kihel a hi, Commission khat phuaih in sawl aa, a masa in Tedim gam ah hong pai in thudotna/thukanna hong nei uh hi. Tua ciang in Mipi buppi in Ukpite in Aana a neihna, siah a kaihna thu te a thukim vetlohna thu uh nasiatak in hong genkhia in hong nial uh hi. Tua khitciang in Falam gam, Hakha gam te ah thu kanna/dotna va nei kawikawi uh aa, Mipite in Tedim aa bang mah in Ukpite a nialna thu uh nasiatak in hong genkhia leuleu uh hi. Tuabang in thu a kankhit uh teh Commission te in Zogam khuapi Falam ah a kibawl a hi, Gambuppi Ni Kikhoppi Zawhna Pawipi (Pyay Htaungsuh Nayh A Khaan A Naa Aungpuei Taben) ah hong kah lai uh hi. Gambup President (Nainn Ngaandaw Tamadah) Sat Swe Taih leh Kumpi ulian pawl zong kikhoppi ah hong kah uh hi. Hih pawipi ah Falam, Tedim, Hakha, Kanpalet, Matupi, Paletwa gam te pan in Taangmi vekpi gawm 5000 te hong kikhawm uh hi.

Hih pawipi a beikuan lam, Taangmi khempeuh thukikupna/meeting ah Gamkeek Mangkangte’khutnuai pan a suakta a hi, Kawlgam ah Zominam bup ii kitaangsapna te  Gambup kumpi tung ah  puak (Tinpiah) ding kikupna thukimna te hong neito leuleu uh hi. Hih thukikup thukimna in Aana neihna leh siahkaihna thute leh ki-ukna lui ongpuahphat sak nading mipi buppi ii lunggulhna leh ngetna zui aa, thukimpih aa, khensatna a hi hi. Hih hun in thusungg(A Sotuen) pen hong nusiasa a hi, Subedar Thang Za Kai - Tuithang khua, Tedim gam pan ahi hi. Thusunna thukimna a pulaak(A thauhkhaan) pen U Hang Vum Thang -Kanpalet gam (Hlutdaw Ahmat Laungg) leh U Con Mang – Laizo khua, Falam gam te a hi uh hi. Hih thusun na kipsaknading in Vote a kilak ciang in mipi 5000 sungpan mi 17 bek in nial (kankuat) aa, mi 4983 te in kithutuak tak in thauhkhaan in kipsak uh hi. Hih bang in a tamzaw thukimna tawh Ukpi hun ki-ukna phiat nading in a kisepna pen Zomi buppi in Democracy thu a kitheihcilna hongsuak hi.

Hih bang in Mipi deihna a kilah khiatkhit nung ah thukan Commission te in Ukpite’ ii hamphatna (akhuanh a yay) te pen a kilawm bang in a ngah nading in Commission in Gambup kumpi’tung ah tamvei pi a ngetsak kikkik ciang in Siatvatna (Kayuhnadaw Kyi) in kumpi in sum Ks. 500,000/-(5 lakhs) pia hi. Hih siatvatna pen Ukpite, Hausate in a hawmciang in pawlkhat in Ks. 70000, pawlkhat 20000-5000-1000 pan in a tawmpen pen Ks. 100 /- dong in ngah uh hi. Hih hun aa kipan in kumtampi sung a ngahkhak uh Aana/thuneihna leh siahkaihna ki-ukna/ngeina pan in Mipi buppi a suakta a hi hi.

 Tua a hih man in February 20 ni ih ciang in kumtampi sung hong uk hong ne, a meet hongla, Ukpi-ki ukna pen mipi’deihna zui in kiphiat in Democrary ki-ukna Zogam ah a kiphuhcilna Nimanpha Nithupi a hihna, Kawlgambup bek hilo in Leitung in hong theih nading in 1950 kum pan in Falam khuapi ah Zominam ni thupi tak in a kibawl a hi hi. Tua ban ah kumsim kumsim in Zominam ni pen Tedim – Falam – Hakha – Kanpalet – Matupi – Paletwa leh Yangon khuapi te ah hunkikhat in kumpi’huhna tawh kibawl hi. Hih thu Zominam Ni hongpiankhiatna, taangthu kikheelna lianpi khat ahi hi.

Hih taangthu ah a kilangh ding in Zominam bup in hanciam in ih phuh ahi, Zominam Ni pen a beisa 1956 kum Oct kha in a kibawl Zogam Council Ulian te in a phiatna thu a khensatna thu ih thei hi. Hih thukhensat na in taangthu ah a siahuai a lipkhaphuai mahmah kisuamna khat a hi hi. Hih in thumawkmawk hilo hi. Gamkeek khutnuaipan suahtakna, Ukpi-siahkaihna thu phiatna, Democracy ki ukna phuhna, gamsuahtak na, Gambuppi (Pyay Htaung Suh Gyi) a kip nading cihthute ih hanciam na ah a kilangh a hi, Zominam Ni pen phiatding nasiatak in thukhensatna in-ah Gamkeek khutnuaipan suahtakna, Ukpi-siahkaih phiatna, Democracy phuhna, gambup suahtakna, Gambuppi kip nading cihthu khempeuh nialna tawh a kibang ahi hi. Tua in mihing vailo mihing lungsim neilo kisuamna lianpi a hih na thu ih telding thupi hi.

Minamni te bang ci bang in thupi bawl uh hiam? cih thu Leitung taangthu tawh zong teci kalak nuam hi. Leitung ah a gualtungtuang gamlianpi te a hi, America bang ah ci lehang, minam zui, mun le gam (state) zui, Nithupi te pen zahtaak tak in bawl uh hi. Soviet Russia ah ci leng, Minam zui, Soviet te tawh kituak minam nite thupi tak a  bawlna pen zahtaak bawl in thapia uh hi. Eite tawh a kinai pen Sengam (China) bek zong en un. Minam nite thupitak aa bawl nading nakpitak in thapia in semkhia uh hi. Hih thumaan a hi Nithupite bawl na, hanciamtak aa sepkhiatna te hang in USA, Soviet Russia, Seen (China) gamlian te in sinthukhat lungkihual, gualtung tuang gamlianpi te in hong om in tuni leitung ah a minthang te hilo ahi hiam?

Kawlgam beek en un! Shan, Kachin, Kayin, Kayah, Mon cih minam kim te in a maute’ii minam nite zahtaak tak in a bawlna uh kilangh hilo a hiam? Hih bang in Minamni te bawlna thupisak uh a hih man in Pyay Htaung Suh ih cih kilomkhat/kipumkhatna lian pi kingah in a kip a kho suak hi. Hih minamni omlo hileh Pyay Htaung Suh cih zong a om nawnlo ding a hi hi. Tua bang mah in Zominam ni ih bawlna in Gambuppi (Pyay Htaung Suh Gyi) a kipna mah a hi hi. Hih bang nithupi nimanpha lahkhiatding saangsik in phiatding khensatna in Zomite’lungtang sung nakpitak in hong lok hi. Gambup laan (Pyay Htaung Suh a Laandaw) Aksi 5 pan in aksi khat a mial/mit nading in nasepna a hi hi. Tua in Pyay Htaung Suh cih lungsim mah zong hong sukha hong khalau sak in hong lungkham sak hi.

Hih Zominam ni manpha suksiatding a khensat Zomi Council Ahmat te (Chin Yeya Council Ahmat Myaa) ken ka dong nuam hi.
(1)   Chin Yeya Council Ahmat te in bang minam na hi uh hiam?
(2)   Hih Ahmat te in Zominam ni phiat ding nakhensat na vuah ei’minam zahtak nawnlo kua’minam zahtak nuamlai ding na hi uh hiam?
(3)   Pyay Htaung Suh Alaan ah Aksipi khat aksi 5 in a uumcihna pan in aksi khat pen Zominam te ii Ciaptehna a hi hi. Hih aksi phiatkhiat nading  sepna hilo a hiam?
(4)   Tua in Zominam te minamdangte’khutnuai ah sila ahidingin makaihna hilo a hiam?
(5)   Pyay Htaung Suh sung ah kilanghtak in a omkip a hi, Zogam/Zomi a minsiat nading sepna hi lo a hi hiam?
(6)   Ei Zomite bang a suakding in bawlsawm na hi uh hiam? Minam beinading aa sepkaltangna/septeekteek na a hihiam?
(7)   Zomi mipi 5000 te in akhensat a hi, Zominam ni pen phiatding a khensat Zomi ulian 13(Chin Ahmat 13 u) te in mipite’taangmi hithei nawnding a hi hiam? Democracy kumpite ii sepzia ngeina hinawnlo hilo a hiam? Zomi Council pen bang council min piading ih hiam?

Hih thute bulphuhna tawh Zominam ni pen Zomite in kua ma’suamna suksiatna thusimlo awlmawhlo in Khuazui, gamzui in Zominam ni pen kumsim kumsim in bawlna tawh Zominam a kipnading , Gambuppi(PyayHtaungSuh) akip nading thute ih hanciam nading in keimah in nakpitak in kong hanthawn hi.

Mipite khempeuh aw….

Kum sim aa ihbawl, Zominam ni ahi, Feb. 20 ni in Kumpi zumte saangte pen Zogam ah a kikhak a hi hi. Zogam Council in Zominamni phiatding a khensat khit tukum Zominam Ni in Zumte, Saangte hong khak sak lo a hi hi.Tua in bang hong lak hiam cih leh Zomi Council aa kihel Ahmat te in  Zominam bup ii deihna pen zawhthawh thu tawh nasiatak in a langpang/anial ahi hi. Tua pen Zomi te in gumhthuak ding hilo hi. Zominam ni pen bawlloh phamawh sak in ih bawlteitei ding a thumaan a hi hi. Democracy gam ih cih in minam/mipi te ii deihna a zahtaak ding ahi hi. Tua hi in bangthu(Amainh) tawh zum, saangte a kikhak kei zong in Zum , Saang aa om Zomite in tu ni in kithu tuak tak in zumkahlo, saangkahlo in lungphona(Sandahpyah) in Zominam ni a bawl hi lehang tua in a thumaan sepkhiatna ahi hi. Kuaman thumaan lo hi ci in gen ngam loding hi. Kuan ong mawhmat zoding hiam? Hih nasepna pen minamdang te in thupitak in ong thauhkhaan ding hi cihpen ken lunghian om hetlo in ka um hi.

Mipikhempeuh te aw….

Zominam ni phiat ding in a khensat Chin Minister – U Za Hre Lian, Falam khuapi ah Gambup laankhaina aa, a thugenna ah – Zominam ni tuambawlna in khiatna neilo hi.PyayHtaungSuh lungsim khansakna hilo hi – cihthu hel aa, a genkhiat kammal in nakpitak in zumhuai hi. Nuihzakhuai mahmah hi. Gam le Minam thu a theilo tawh kibang hi. Thudang khat in gen leeng Pyay Htaung Suh lungsim ci in a gen a mahmah in Pyay Taung Suh suksiat ding a semnuam tawh kibang hi. Hih ciang lel tawh gam le minam tung ah a ciampel midang kua om ding hiam? Hih bang minam te in a ma’minam zahtak lo a hih leh kua’minam zahtak nawnding a hi hiam? Pyay Taung Suh zong a zahtak nawn ding hiam?

Thukhupna ah kong gen nop in Zogam ah Nainngaanzi(Politics) muh zia bangbang in a kilamdang phial zong in Zominam tawh kisai in  Zomi te in lungkituak tak in kalsuan ding hi cih ken ka um hi. Leitung taangthu ah ih en zong in Ngeina lui pen Mipi deihna zui in kiphiat in hunthak aa a khangto ngeina thak khat ih phuh ciang in  ngeina lui tawh phattuam na a ngah mi pawlkhat in lungkim ngeilo in tua ngeina lui pen hong thun kik zawh nading lampi tuamtuam tawh hong hanciam ding cih pen a kitel a hi hi. Tua pen eite’n ih theihsa a hi hi. Hih Zominam ni phiatna ii sungthu ah ngeina luipen a deih Ukpi te in a lu uh hong phot kik na uh a hi hi. A maute’aa ding aa, a sepkhiat na uh ahi hi. Mipi’deihna tawh kilehbulh linlian hi. Mipite’deihna a phiat uh a hi hi. Democracy a umlo tawh kibang hi. Tuni in Ukpi- ngeina phiat hang ih cih hang in Ukpi te pen Zominam te in Gamkhen Council, Khuata Council te ah Makaipi/Lutangpi in a tamzaw kikoih hi. Tua in Zomite ii lungsim liatna a kilatna ahi hi. Tua bekzong hilo hi. Zominam taangmi (Chin Amyotha ahmat mya) nangawn in kikoih to lai hi. Hih te pen a hunhoih in la in Zominam ni a phiat uh a hi hi. Thudang khat in gen leng, Aana leh siahkaihna ngeina pen a phuhkik zawhnading un a hanciam na uh ahi hi. Hih bang dan ta a hih leh Ukpite pen Zominam te in a thupi ngaihsut nawnloh dinmun tung thei hi cih thu a kisaimite ka phawk sak nuam hi.

Zomite ii kithutuah na, khantohna, Minamkim (Taiyintha) te ii ki-it kilem na, Gambuppi (Pyay htaung suh gyi) a kipna, Democracy ngeina hong kizelhna cihthu te aa ding in Zomite’aading aa athupi pen a manpha pen a hi, Zominam ni pen Kumsim in hoihtak hanciam na tawh thahattak in minam bup in kihelkim na tawh pelhlo in ih bawl nading in kong hanthawn aa, thu kong hial bawl hi. Zominam ni kip khoden ta hen!!!

Zogam kipden ta hen!!!
Pyay htaung suh gyi kip denta hen!!!


                                                                           By – Mang Tung Nung

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

2 comments:

  1. This comment has been removed by the author.

    ReplyDelete
  2. Zomi Namni thusung Pu Thang Za Kai, ahih zawk lam kician hi. Pu Thang Kaw Kai hilo. Pu Mang Tung Nung sang a theizaw- telzaw kua mah omlo ding hi.

    ReplyDelete

Item Reviewed: A (7) VEINA ZOMI NAMNI TEDIM KHUAPI AH CAPT. MANG TUNG NUNG’ THUGENNA Description: Rating: 5 Reviewed By: Cinpu Zomi
Scroll to Top