728x90 AdSpace

Hot
Menu
Zon-ol na Donate

Latest News

BANG PILNA LEH SIAMNA LAM SIN DING HOIH HIAM?

University/ Institute ah Sang kahna ahaang

High School man khin-in Tan 10 zawh khit the ih nuntakna taktak ah ih zat theih ding leh ih septheih ding kiginkholh theih na ding lungulh ciatna tawh a sang zaw pilna leh siamna sin to ding in University leh Institute te ah kah zawh ding kihanciam ciat hi.
A tawm pen in tuhun in Degree khat ngah na ding kum thum sawt in sum zong tampi tak bei ding hi. Tua a hih leh ih sum bei leh ih hun bei zah tawh ki tuak in bang pilna leh siamna sin huai ahiam, bang pilna siamna in nuntak na hong pia zo ding ahi hiam cih sangnaupang te leh Nu leh Pa in zong kilung hi mawh sim ciat hi. A hi zong in a teel kisiam khin lo hi.

Kingap penpen sin theih hun lai leh Tuhun

1964 kum masiah ah University ih lut ciangin ei uuk pen leh ei ki ngap penpen ki siau-in ki sin thei hi. Graduates ciangin zong tua ih sin tawh ki tuak ding nasep na om pah in nasepna ah zong ki lawh cing zaw deuh tawh ki bang hi. Tua hun khit zawh ciang Matriculation ah mat ngah zah tawh kituak in Professional leh majoring subjects ngah zawh nading kiciangtan ciang in tawlpi sung khat bang ei Zomi sangnaupang te Professional ahi Medical leh Engineering subjects te sin kha thei ding a kikhaat mahmah hi. Kum 2000 khit nung lam ciang bek in tawm tawm hong om kiaukiau thei pan hi.


1964 pan 2000 kum kikal ah ei Zomi a tamzaw in University ah ngah bangbang sin in Degree khat ki ngah pongin, muh bangbang sem lel ih hih man hiam ih lungkim na leh lawhcin taktakna om thei pha lo hi. Tua hang zong a hi ding hiam ah 1970 zawh ah University Graduates te nasep lian leh zalian ngahzo zong ih tam non hetloh na khat hi phial ding in ka muang mawh sim hi. Tua ban ah 1990 nung sang in University kah nuam sang in Laisiangtho sinna lam ah ei Zomi a buuk a baak in ih tam lut pha mahmah aa, University ah sang kah te sangin Theology sinna lam a sin kitam zaw ta hi. Kumpi nasem nuam zong kikiam hiaihiai hi. Tua in Zomite kilatna(Identity) leh kihelkhaakna hong kheel pha mahmah ding hi. Ih dinmun zong hong ki laih sak ding hi.

Kawlgam ah a kithupisak phadiak masate


Kawlgam University neih cil 1920 kum a kipan in leitung galpi nihna hong tun dong ciang ah Arts Subjects kithupi sakin a diakdiak in Law tawh Degree ngah te bang ki tung et pha mahmah ci uh hi. Galpi nihna khit leh Kawlgam suahtakna ngah khit ciangin Professional ahi Medical leh Engineering lam ahau leh a neite tate in sin ngam bek in Science Subjects ki thupi sak leuleu hi. A diakdiak in New Education System hong kipat zawh 1964 kum nungsang ah Science Subjects ki thupi sak in University lut zawhna ding zong Marks tawh hong kiciantan ta hi. Tan 8 zawh khitphet in High School ah Science combination a ngah zolo te bang lungkia thei zawzen uh hi. Tua a kipan in Medical sin theih na ding Nu leh Pa te’n zong ki hanciam pih in Marks a sangnak leh tate ut thu hi khin khol lo in Medical ki lasak tentan hi. MBBS tawh Degree ngah napi’n siavuan sem nuam lo zong diil veve hi. Ama kivakna leh uukna lam hilo kha hi ding hi.

Hun leh Thupisak Kikhelta

Leitung a khangtosa gamte ah Kumzalom 19 leh 20 sung in Science Subjects kithupi sak mahmah in Khapi tungah 1969 kum in kitung zawzen ta hi. Tua tawh kizawitawnin Cybernetics Science a kici Computer Science khat 1948 kumin hong piang in 1951 kumin UNIVAC1 a kici Computer zat theih ding hong kizuak khiat tatak ciang in nasepna khempeuh ah Computer hong kinak zah pha mahmah hi. A khangto sa gam te mah in masa pah lian uh hi. Tua Computer a piangmasate First Generation ci-a khangmasa Computer hi-in, a hoih zawzaw, a neu zawzaw, hong ki bawl in tu-in Fifth Generation Computer, Computer khang nga nahun hong tung zawzen hi. Mikim leh zum kim ah Computer kizang ta a hih manin zumnasepna, sumzuakna thukizaksakna hong baih ziauziau hi. 1993 pan ki pan in World Wide Web kici in leitung khempeuh ngenphan bangin huihsungah kimu theilo napi’n kizom ditdet in Internet leh e-mail tawh thu kizaksak ziauziau hung hong tung hi. Gamgi neilo zah dong hong hih ciang in Pilna hun(Knowledge Age) a hih keh Thu kizakbaih hun(Information Age) kici zawzen hi. Tua a mailam kum zalom 21sung pen tua Computer zat theih ding pilna pen a thupi pen leh a kisam pen hong suak ta hi.

Banghang Pilna sin ih hi hiam?

A hang pen tu in hong ki kheel thakna ah mailam ah ih tuahkhak ding a phamawh te ahi theihloh, siamloh, zatloh phamawh te ih kiginkholh theih na ding leh ih phut zawh nading a pilna sin ih hi hi. Tua a phamawh te pen a tom in cileng:

Thei loh phamawh, siamloh phamawh, sep loh phamawh, kizeh loh phamawh, mite tawh kipawl loh phamawh leh nuntakna ding vaihawm ngaihsut loh phamawh te a hih manin, Pilna sinna hang zong-

Thei nuam a sin
Siam nuam a sin
Sem nuam a sin
Kizen nuam a sin
Kipawl thei nuam a sin
Nungta nuam a sin
ci-in a tom in genpak leng Pilna ih sin na a hang leh ih sin ding thu te kiginkholh, kiteel thei siam pah ding hi.


Bang Hoih pen Ding hiam?

Tua hi-in Pilna sangzaw ding pen a hoihlo, a kimang thei lo cih om lo hi. A hi zong in ih Gam ih Lei ah mailam a ding in bang thu ki geel hiam? Leitungah bang ki thangsak in bang hong kizang thupi ding hiam? Bangdan pilna nei leh siamna nei te hong ki mang thei pen ding hiam? Cih ngaihsun kawm in ei ki vakna leh siamna uukna tawh kinai thei penpen sin ding hilo ding hiam, cih kong kikup pihna hi.

Mi a tamzaw te in pen a muhna uah Information and Communication Technology ah Thu kizaksak baih hun hong tang a hih manin Computer a zatsiam loh kipha mawh ding hi. Tua Computer zatna mun hong tamin 50% in tua tawh nasepna mun hong sem ding uh hi, ci-in ngaihsut kholhna nei uh hi. Mu khol uh hi. Tua ahih man in ei Kawlgam Pilna lam ah zong Computer siam ding ki thupi sak in sanginn khempeuh ah Multi-media Classroom ci-in tuma lam a Science Laboratory ih neih bangin kiguanta hi. Tua banah ei Kawlgam bangah Mikang lai(English) pen leitung bup zah ahih man leh ih siamsa, ih sinsa ahih man in English zong ahon khop khat siamna ih neih kul ding hi ci-in ki thupi sak hi. Computer leh English siam te in Nasep neel sepna ahhong lut kul dinga, asiam nailo te in a hih leh nasep hamzaw deuh mah hong sep kul ding hong hi ding hi.


Tua ban ah Leitungah sumzuakna(Trades), kizopna(Communication), nasep khopna(Cooperation)leh ki-angvaanna(Coordination) te ah ki vakna a hih keh siamna(Talent & Skills) cih te zong neih loh a pha mawh vive hong hi ding hi.

Nang leh nang kidong zaw-in kitel in.

Atung a thu te ngaihsun inla, ken bang lam uuk ka hihiam? Bang lam kiva kahiam? Mailam ah bang nasep hongki sam pen ding ahi hiam? Cih ki dong in Nu leh Pate hong deihsak na bek leh mip paizia luite sang in nang hoih nasak, na khentat na lamlam sin lecin, nasin toh Pilna olsa in, na siam deuh pah ding a, tua Pilna na sin tawh kizawitawn nasepna zong na ciimtaak kei ding hi. Na tha lawpin, na kizen mahmah ding a, lawhcin na leh neihna, nuntak nopsakna leh lungkimna hong pia zo pen ding hi.


Tua bek thamlo in midang te’n sin tase kei leh nang uuk khinkhian leh na kivakna Subjects sin lecin tua in na nuntakna hong nuamtuam sak zaw ding hi. Midangte hih theih loh leh Ngaitsut khakloh a kisam gigete zong thupi hi.

Thukhupna

Midangte Computer siamin a kizatna mun ahi zuminnte, Hotels te, Banks te, Sumzuakna te leh khuazin gamvakna mun ah hong sem in hileh ei a sinkha lo te in mun hoih lo zaw deuha I tun kul in, midang te sep noploh tata ih sep kul kha thei ding hi. Pasian thu ih cita zong in en zong gelsiam zek kisam ding in ka tuat hi. Mikang paunak khat ah zong “Pasian in amau a geelsiam te mah panpih hi”(God helps those who help themselves) ci uh hi. Ei geel siam ding leh ngaihsut siam ding ki sam kha ding hi. Pasian hong deih nana cih bek tawh ih kingak khit kiuhkeuh zawzen ciangin midangte’n lamdang hong sa kik bilbel uh hi. Pasian deihna omlo in a piang thei lo a hih hangin ei ngaihsut zek kigin kholh zek, hanciam zek mah kisam veve ding ka tuat a, no zong hong ki mang mawh lo ding hi bilbel tuak cikha ngeel nuteh cih kong lam en hi.

A geelsiam, a taangtung leh a khuahpai mahmah Zomi namte hong hisak ciat tahen!

Prof. C. Thang Za Tuan



Zolus No. 9, 2005 sungpan kila kik hi.



Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: BANG PILNA LEH SIAMNA LAM SIN DING HOIH HIAM? Description: Rating: 5 Reviewed By: Cinpu Zomi
Scroll to Top