728x90 AdSpace

Hot
Menu
Zon-ol na Donate

Latest News

EI ZOMI-TE MIN PHUAH DAN . By - Dr. Sian Za Kham (M.B.,B.S.,D.A.,M.A.(Theo)


Hih tawh kisai in gentehna hoih khat hiah kong pulaak hi. Nidang hun lai a Tedim gam ukpipa ahi Pu Kam Hau tapa Hau Pum hi. Hau Pum innluah a tapa Hau Cin Khup hi a,  a Pu Kam Hau  ki tap hi. Hau Cin Khup tapa a innluah Pum Za Mang hi a, apu Hau Pum kitap hi.Pum Za Mang inn luah Khup Khen Kham hi a, a pu Hau Cin Khup kitap ahi hi. Khup Khen Kham innluah Mang Lian Sum hi a, a pu Pum Za Mang ki tap hi. Mang Lian Sum tapa ah innluah Kham Mun Mang hi a, ah pu Khup Khen Kham ki tap ahi hi.

Tua banga hi a hih khang kizopna en pak le hang Kam Hau pan in Kham Mun Mang ciang khang sagih a ki zom in kimu thei hi.

Hih Tedim ngeina min phuah dan pen Tedim leh Tonzang Myone sung a tuni dong kikhah suah loin kizui tinten hi. Ahi zongin Zogam Myone dang te ah tua bang om lo hi. Falam, Haka leh Matupi Myone ah 1962 pan 1983 ciang Zato siavuan ka sem kha hi. Amau ngeina zong ka va thei kha a, a diakdiak in NAUMIN PHUAH DAN zong teltak in ka thei kha hi.

Haka Towhship medical Officer ka sep sungin duty in ka paina “Sihmuh” kici khua khat ah 1964 kum September 27 ni in ka va tung hi. Tua khua mi U Thang Sum leh Daw Hnem Cin te nupa in ta numei khat ka tun nitak in ong nei uh a, a nau min kei ong tam sak uh hi. Bang hang hiam cih leh tua nau pen suak thei pak lo-in, kei ong sam uh a zatui sun in ka va lakkhiat sak teh nau leh a nu cidam tak om uh hi. A zingciang ni khat ong kho uh a, vok tuk li khat in nau min phuak leh lungdam kohna in an ong nek pih uh hi.

Nau min nang tan ding hi, ong ci uh a a mau ngeina bang hi leh ken ka ut pepeuh nau min ci-in gen dinga, tua pen  kei tam hi pong ding hi. Gentehna in nau min pen SUI DIM ci mai leng zong kei ong kitap hi veve hi. Tua bang ong cih uh teh kei zong ei Tedim ngeina NAUMIN phuah dan a tel tak in ka gen a, hih nau numei pen kei tu ding a hih leh ko Tedim ngeina in ka phuah ding na thukim uh hiam ka cih leh thu kim lua ung ong ci uh a, kei zong KHAM ZAM CING ka phuak hi. Kham pen ka min tawpna hi a, Zam Cing pen ka khualzinna ka pai kawikawina lam in tu khat ka neihna ka cih nopna hi. Ka tu masa pen hi a, a mau innkuan laibu sungah limtak ciamteh uh hi.

Min phuah dan tawh kisai in ka gen nopna ah, ih Kawlgam sungah Tedim ngeina min phuahdan koi mah ah omlo hi. Leitung gam khempeuh ah zong ei a dan a min ki phuak omlo hi. Isreal te nau min phuah dan leh ei a, a khiatna ki-va-lak pian na pi, ei a bang tektek in pu leh pi tapsak cih omlo hi.

Hih min kitap na tawh kizom in a lamdang khat ah ih ki tap pihte sisan tawh ki naina om het lo te nangawn zong ngaihsut, gamtat lu hek pen ih kitap nu ahih kei leh  pa te kisun mawk hi. “Nang na pu sun, na pi sun a migi, gilo, ciing, ciinglo” cih bangin a nu leh a pate in a tanu a tapa te tungah kam zat in kinei thei hi. Bang hang a ki sun cih pen teltak a kan nading haksa hi.

Thukhupna: Hih ih Tedim ngeina ahi “NAU MIN PHUAH DAN” pen a hoih mahmah hi a zuih tinten ding hi ci-in ka gen nuam hi. Tu hun ciangin ih gam guak ah ki om cip nawn lo, mi gam mun tuamtuam ki tung kawikawi ta ahih manin ei min ahi khollo Kawl Min, Mang Min cih bang zong ki phuak ki nei thei ta hi. Tua banga ih deih leh zong ih Zomin mah tawh a kilo khawm dingin koih leng hoih pen hi. Tua hi kei leh Zomi ih hih na bei zah dong tawh ki banga, kua tu, kua ta cih zong a sau vei teh ki kan thei nawn lo kha ding hi. Tua ahih manin hih lai a sim kha akua mapeuh tu nei ta nei ding zong om ding ihih manin NAUMIN phuahna, ih neih leh ei Tedim ngeina a phuah ding, ih khahsuah loh dingin kong hanthawn nuam hi.

Dr. Sian Za Kham (M.B.,B.S.,D.A.,M.A.(Theo)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: EI ZOMI-TE MIN PHUAH DAN . By - Dr. Sian Za Kham (M.B.,B.S.,D.A.,M.A.(Theo) Description: Rating: 5 Reviewed By: Cinpu Zomi
Scroll to Top