728x90 AdSpace

Hot
Menu
Zon-ol na Donate

Latest News

Hong nusia khinsa Rev. Go Khen Thang' ciamnuih kam, pil kammal leh article tuamtuam Laibu.

Hong nusia khinsa

Rev. Go Khen Thang'

ciamnuih kam, pil kammal leh article

Rev. Job Nang Khaw Thawng in a bawlkhiat laibu apat lakkhiat ahi. A laibu min "Hong nusia khinsa Rev. Go Khen Thang' ciamnuih kam, pil kammal leh article tuamtuam." A thu ki gelhte hoih a hihman in tulai vai tak in tangpi tangta theih ding in hong kisuah khia hi.

Sia Thawngno in a gen na ah, Ciamnui cih pen ciap khat I neih khit ciang a nuih pen ciamnui hi. Gentehna in "zingsangin Bawng I khah ciangin bawngpiten zuntha a, a talten a zun ciapsakin nui se hi." Tua zong ciamnui himawk hi. Gen khat omlo, ciap khat omlo in kinui theilo hi. A minthang Rev Go Khen ABC ciamnuihna pen zong gen khat nei banah kammal kizom laimal kibang ahihman in kinui diak hi, ci hi. Ngaihsun taktak leng pilna kam, laisiamna kam hi in pilvai, teivai lua mahmah hi. Zomi mipil  Rev. Khup Za Go bangin pilvai, laisiamvai sa lua ahih manin, "Lai in hong khak un, cassettee khui in hong khak un" ci in ngen ngei hi.

Ama ciamnuih, pil kammal 100 in pan ni.

1. Sia Go Khen in biakinn sunga lususu ihmumu pawlkhat a muh ciangin “Biakinn sunga ihmute phong se kei un, ka Pa inn hi, ci-in ki-innteeksak lua a, ihmut kawm a biakinn cinghte hi,” ci se hi.

2. Mi khat in Sia Go Khen kiang ah “Sia aw, no Pastor pawlkhat kamtuam lah pau theilo, dawi lah hawlkhia theilo na hih uh teh Kha Siangtho neilo hi mawk lo ding na uh hiam?” ci hi. Sia Go Khen in “Ko ka muhtheih uh Vok leh Aakte bek hawlkhia thei mah ung, dawl leh kau bel mu theilo, a kampau uh zong theilo ka hih manun hawlkhia thei kei mah ung, no kimu thei kihawlkhia thei a, a phazah na ngawn kithei zen na hih uh leh anam kibang (dawi nam) mah himawk lo ding na hi uh hiam?” cih san ziau hi.

3. Mikhat in Sia Go Khen kiangah “Vantung gam ah khamlukhu a om diam?” Sia Go Khen in “Lukhu i cih bel guahzuk ciang leh nisat cianga kizang hi ven, Vantung gam innsung ding ahih banah guahzu lo nisa lo ding ahih teh lukhu zong kisam khol ding ai maw, innsunga lukhu zong om khollo hi. Tua banah cipeek innsungah naanglukhu khu nuam tuan lo a, singinn sungah zong singlukhu kideih tuan lo hi. Leiseek(brick) innsungah leiseek lukhu kikhu nuam tuan lo ding ahih teh Kham innsuangah zong khamlukhu kuamah in khu nuam(thupi ngaihsut) in um tuan kei veng aw, cihsan ziau hi.”

4. Mi khat in Sia Go Khen kiangah  “Nang Gupna bucing lungdam na bucing ahi Full Salvation, Full Gospel na sang nai hiam?” a cih leh sia Go Khen in “Thei khang ei! Tulai-in full cih bel nam nih om ven, full sang in fool tam kingah zaw sa mai veng aw,” cih san ziau hi. (Full cih pen ‘dim’, kicing cihna hi-in  fool pen hai, mihai cihna)

5. Sia Go Khen in a taltang tung ah meima tum vei-in na asak mahmah laitak thusuaknei pupi khat va hawh in “Sawm-ah-khat kimtak na piak loh man vua meimatum vei hi uh teh! ” va ci hi. Sia Go Khen hehpian ahih manin “Ka sumpi piaksa uh hong tuatpha pha nung in manlo kicing lo ahih leh zong biakinn ah na piak kik mai nu’ng, Pasian in ko inn ah a sik dingin hong sawl ahih teekteek khol kei leh zong va ciah kik mai in” cihsan hi.

6. Kikhopna khatah Sia Go Khen kiangah mikhat tu in “Pasian minthang ta hen!” ci thapai hi. Sia Go Khen in, “Lawm aw, Pasian’ min pen a thang denden hi. Pasian’ minsia ngeilo hi. A minsia zelzel bei ei mihingte hizaw hang. Tua manlin nang Pasian’ min siasak loin a siatna dingin gamta kei peuh leteh Pasian’ min a thang den ding hilel hi,” ci ziau hi.

7 Tuhun Pawlpi sung thukikupnate ah Upa makaite kitawng kilaii thei phial cih a muh ciangin Sia Go Khen in tuhun Pastor dingte hi bang hileh hoih ding hi, ci hi.
(a)Lai Siangtho sang panin sinna cing tawh ongte hi ding.
(b)A piangthak kei phial zongin a thatang hoih in a cidam mahmah hi ding.
(c)Karate, Judo, Kungfu khat teitei siamna nei-in, Upate akitok teh nih leh thum a khenzo lianliante bek hi leh hoih ding hi, ci hi.

8. Mi khatin, Sia Go Khen kiangah, “Haleluijah! Heleluijah!” a cihcih leh Sia Go Khen in, “Lawm nang a luisung bek tung pan maw? Kei a gal khat lam na tung ta ing ei.” ci ziau se hi.

9. Mi khat in khamangthang vei veng aw, a cihcih leh Sia Go Khen in “Vei ing ci se ken, vei taktak le cin, meimatum vei, gilsan vei nasa mahmah in na omkhongh theihloh bangin om khong theilo ding zah hi teh. Kua mah a vei zong om khang, vei taktak leng khua lam ah anne kimlai Vokpi tai mu leng kiko khia in delh huan hihang. Vokpi tai lunghimawh zah leh akigil kah lo lunghimawh zahin kha mangthang kuamah in lunghimawh zo tuan lo hihang”, cih belh lai hi.

10. Tu hun thungen pawlkhatte napitakin awngin, lei tuanin, sabuai tum geugeu om khawng Sia Go Khen in a muh ciangin “tu hun i thungetzia bel leibasik, a kitawng mah bang keei hangin, Pasian na ngawn sawl ziauziau ngam ta hang. 1988 kum akipan i biakdan leh i thunget, hunzat suak khin keei ta ei”, ci hiat-hiat se hi.

11. Sia Go Khen in Jesuh hong pai kik nawnlo ding ci-in a kiminsiatsak laitak Lai Siangtho sangkah lo khat in hunzangin, “Tuhun Laisiangtho sangkahte lau huai mahmah hi, kidawm mahmah un” ci hi. Sia Go Khen in hun awng ngenin ding to a, nam nih bek hong gen ning ci-in.
(a) “Lai Siangtho sangkahte lau huai ahih leh a kahlote lau huai zaw kan ding hi.”
(b) “Beel a hawmte a gin ngaih zaw hi,” ci in thuk kik ziau hi.

12. Mi khatin Sia Go Khen kiangah, “Vantung gam a cingin hong gen in” ci hi.  Sia Go Khen in “Kei zong zanni a Vantung pan a hong ciah hi sam lo inga, Van gam tung sa i dot theih ding lah kua mah omlo a, ih gengen hangin i upmawh i lamet ciat mah a gengen i hih manin, Vantung gam pen a mu omlo, a tungsate lah kidong kik theilo, i upmawh ciat gam hi-in upmawhte lakah upmawh huai pen cih ding hi.” ci ziau hi.

13. Pawlpi sung thukikupna ah a atamzaw thukima kithupisak lua mahmah cih a muh teh Sia Go Khen in “Mangkang gam khawngah bel a tamzaw mipil ahih manin atamzaw thukimna hoih mah ven, ei gamah a tamzaw tham mihai hi zaw mawk i hih teh, atawm zaw thukimna zong hoih zawk hun om hi veh aw”, ci hi.

14. Pawpi sungah thukikupnate ah a honhon a kisel kitawng thei ding cih amuh teh Sia Go Khen in “Hon tunget om ven, hon kitot om ngei buang kei veh aw,” ci hiat-hiat hi.

15. Nungak khat in Sia Go Khen kiangah, “Ko lawp mahmah a pulpit tung diang ziahziah lam ziahziah a, nang lawp lo kisa na khut zong na bet nop loh” a cih leh Sia Go Khen in, “No banga ka lawp theihloh ka dian theihloh hang nong neu-et tuan kei un, ka puanteen kawm a, ka khutpi ka sai kekkek zong no banga a diangdiang a lamlam zah a lawp a kingaihsun hi’ng,” ci hi.

16. Mi khat in Sia Go Khen kiangah Tuiphum Pawlpi leh Pawldangte kilamdanna hong gen pak in, a cih leh Sia Go Khen in, Thuphumten la a sak teh labu en, pawldangte’n labu enlo khutbeng, Tuiphumte’n thu a ngetteh lukun in mitsi, pawldangte vandak to in hak gige, a khut uh lamto in a kia masa penpen kei a ngah ding ci bangin dawn to uh,” cihsan ziau hi.

17. Mi khat in Sia Go Khen na tal nakkolh zen si! a va cih leh  Sia Go Khen in, “A kolh hi kei, a siang hi zaw”, cihsan ziau lel in, heh hetlo lel hi.

18. Mi khat in Sia Go Khen na mel hoih kei si! a va cih khak leh Sia Go Khen in “Nong muhcilna ahih man a hoih hong sa lo hi teh, kei ka neutunga kipan a hi ci hingin kisek lel ing. Mel hoihloh meima tum nat a na hilopi, mel hoih leng ze-etna tam, hoih kei leng ze-etna tawm zaw”,  cihsan ziau hi.

19. Sia Go Khen leh mi khat kiho.
Mi khat -Sia Go Khen, na zi a mel hoih vial ei.
Sia Go Khen- Hoih buang mah lo dia, Kansauzang inn 7 sungpana i teelteel hisam hi ven, zanggam a teeng ding kisa leng a vakzaw deuh khat  kingaihsun mah ding hi ven.
Go Khen’ zi-Eh! Tua zong kong hehpihna tawh kong teenpih hi. Melhoihte’n na khasum teng uh tanakha in bei khin in teh.

20. Mi khat in Sia Go Khen na zi a melhoih napi a tun tom zek, a cih leh Sia Go Khen in, “Phamawh kei! Nupa i cih pen i tunsanna kitehteh ding hi khol kei, a kiteh lo lam tawh kiteeng ding hizaw hang, kituak lel inteh!” cihsan ziau hi.

21. Sia Go Khen tano sih nitakin amahmah in inntek thupulakna nei a, “No innkuan sungah khat teitei sih loh phamawh hong kici leh kei leh kei kiphal nai keng, ka zi in zong hong phal nai ken teh, ka zi lah amah leh amah lah kiphal ken teh, kei zong zi kik deih veve ding ka hih teh phal nai keng. Tua manin tu a sipa mah kilawm kituak sa penpen ung,” ci in gen a, mipi nui ziahziah hi.  Thuaksiamna nei hi.

22. Khatvei Sia Go Khen in Sia dang khat ann nekpih in ann kuang uumkhawm uh a, a lawmnu in ann tehkan tuamtuam lui hi. Sia Go Khen in, “Mandalay khawng ate’ bawlte bel lim mahmah ven, i zite’ bawl taktak bel limtakin tui buak leng hing thei lai mai ding hi veh aw,” ci-in nui uh hi.

23. Nupi khat in Sia Go Khente’ inn ah anntang ngen a, hai 5 pia uh hi. A ngennu in a picing kei ven teh cimawk hi. Sia Go Khen in, “na lei sa nai maw? Picing lo ding na cihcih, hong kilet song hi. Ih leite bek pi(measurement) kiteh hi, Pi cinglo deihlo na cih leh picing dingte kiangah va ngen in”, cihsan hi.

24. Vanman kiam thei loin khang hi den keei cih a muh teh Sia Go Khen in,”van man pawh, teek hak ngel in teh, a khanglam hi den lawmlawm”, ci hiat lel hi.

25. Mi khat in Sia Go Khen kiangah, “Hau mahmah in, annkhing kham leng na ut hia?” a cih leh, Sia Go Khen in, “Ut mahmah keng, ken annkhing duh keng, anna bek duh ing, hau a annkhing kham sangin, zawng a annsa kham ut zaw’ng”, cih san ziau hi.

26. Sia Go Khen thongkia in a suahtak cianga a pau masak penpen in “Ka thongkiat hoih mahmah hi, hong khiate lungkim mahmah ding ahih teh”, ci ziau in thuaksiamna tawh pau hi.
27. Mopina pawi khat ah Sia Go Khen in hun zanga, “Nidanga mo kideih penpen Ni nungzui hi, tu hun in bel nungak ten, ni taang sa lua ta in, ni nungzui ut nawn lo in Kha nungzui bek ut ta uh hi”, ci-in mipi nuisak ziahziah hi.

28. Sia Go Khen leh galkap san thum lai-at pension lasa khat thukisel uh a, tuapa in “Hong simmawh ken, san thum pension hing, lai-at tentan ka kah lai un, a khat na ngah ing” ci hi. Sia Go Khen in “Nang a khatna ngah na hih teh a dangte nak hai ngei in teh maw?”, cihsan ziau hi.

29. Motor lambawl Lambo khat kiangah Sia Go Khen in, “Bo pa aw na lambawl uh alkatara(tar) tawm salua veng aw, annkamtui buak banga na taipih liang uh, tawm tamsak lai le uh teh hoih in teh” a va cih khak mawh leh Lambopa in “Sia na Pastor sinna vuah alkatara(tar) bangzah ding ci ahia?” na cih mawk manin Sia Go Khen pau thei nawn loin nui mawk hi.

30. Kumcin siwe khat ah Sia Go Khen in lawmte khat sam in, “Pai aw, niangtuisai-ah niangtui hawp ni, niangtui a taihte hong suaksuak nuam ing”, ci hi. A lawmpa in niangtui kitaih ding sain zui a, ann nek khit uh teh sia Go Khen in, “Niangtui a taihte kong suaksak ding kong ci ve leh”, ci-in a lawmpa kitaihsak hi.

31. Mualpi Siwe ah Sial tampi kigo cih amuh teh Sia Go Khen in a hunzatna ah Mualpi kong tun teh Liasiangtho mun khat pawk ing. “Sialsa bei mateng note tawh ka omkhawm tawntung ding hi”, ciziau se hi.

32. Nau ngekno khat sihna-ah sia Go Khen in hunzanga, “Ute naute mihing leh ganhing i kilamdanna i sihna mah zong hi. Ganhingte a sih ciangin kihuai kikah cih omloin Vokpi leh Zawhngeu bangin atano site ne kik mawk hi.” Mihingte kine samlo a, i kivui a kikah theih pen ganhing hileng i tano vui se loin kituh kawm a i nek lingling ding himawk hi, a cih leh mipi nak nuih ahmah uh a, tawpna thungen ding pa heh pian ahih manin ‘Topa tu mahmah in, dawi mangpa kammal za ung’, ci hi. Sia Go Khen in, “Pasian kiangah kinai khiat ngel hang ei”, ci ziau se hi.

33. Mikhat in Sia Go Khen kiangah, “Zanggam na tun zawh uh teh Khamtunggam hong kah zo nawn het kei mawk uh ciai, nuamsa ngei hi nuteh”,a cih leh Sia Go Khen in, “Suangtum tuk bel suktukin totuk kik zo kei mah ve aw”, ci ziau se hi.

34. Mi khat in Sia Go Khen zanggam a nuam mahmah hia, a cih leh Sia Go Khen in, “ Ni sa mahmah mawk in. Thopuan sung na ngawn ah i lawmnute tawh kisukha leng kimudah zo phial i hih teh nuam cih om thei sam ding ahia”,  ci hi.

35. Mi khatin Sia Go Khen, “No tuni ZCLS zum hong maw, nidangin lah na hong ngei het kei vua”, a cih leh Sia Go Khen in, “Nang tuni hong vak thei bilbel maw, nisim zum ka hon un hang lah hong mu ngeilo ung aa”, cikik ziau hi.

36. Sia Go Khen in, ZCLS ah a sep lai-in laibu kikhawng lua lo, kilei nuam lua lo cih a muh teh, “Lai gelh a, a bu a bawlna in bei hun nei ngeilo”, Laisiangtho in a cih man’ mahmah mawk ei, a tawi in zuak kul phial mawk” ci hiat-hiat hi.

37. Tangvalno khat in, Sia Go Khen kiangah, Pastorpipa a pyaka en maw, a cih leh Sia Go Khen in, “No a zang nailoten zong en hi ve uh cin, ko a zang dingten en mah lo ding maw, Pastorte’ etloh dinga kibawl hi tuan lo pi”, cihsan ziau hi.

38. Mopawi khat ah Sia Go Khen ciamnui dingin kisam a, puanten hual kuah in, nansetko khat tawh diang thiangthiang in siamna a tuamtuam lak hi. Khual ul ziat leh vei ah kaikeei ahih manin, “Ordination ngahsa Pastor lote peuhmah i sep zawh ding hi kei ei,” cih in mipite nuisak hi.

39. Sia Go Khen lai uuk mahmah ahih manin Sia dang khat in khamangthang vei kei teh a cih leh Sia Go Khen in, “Sia dangten khamangthang vei, Go Khen in typewriter (laikhetna) vei”, cihsan ziau hi.

40. Mi khat in Sia Go Khen kiangah, “Sia aw, mo na letthat(gawm) lam mu ngei mel keng, letthat(kitengsak) ngei mahmah lo na hiam?”, a cih leh Sia Go Khen  in, “Tulai nungak tangvalten Pastorte’ letthat ding ut se lopi, amau leh amau kithatthat lel uh hilo maw”, cihsan ziau hi.
41. Mi khat in Sia Go Khen kiangah, “Sia aw, Topa Jesu in ataklama pa’ kiangah, tuni-in Paradise ah i omkhawm ding hi. A cih pen, koilammun ai tam?”, a cih leh Sia Go Khen in, “Topa Jesu in tua a cih pen Paradise hi, cih ding lah hithei samlo ahih manin Jesu tawh om khawmkhawmna mun pen Paradise hi, cih himai lo diam”, a cih leh a dongpa in um mahmah keng! sang thei keng! ci hi. Sia Go Khen in, “ thei nuamin hong dong cin a, kong gen lah um tuan lo na hih teh na theihnop taktak leh nang zong ataklam a pa mah bangin sisuk leteh thei pah lello ding na hiam?”, cihsan ziau hi.

42. Sia Go Khen in nupa cih mawk pen pumkhat, sakhat i cihcih hangin lupna tung na ngawn ah kilem kei leng Kawl nambat ... bang in kilum hi in, kilem vanglak leng lah Kawl nambat ... a bang in zen ve hang aw’ ci hi.

43. Mi khat in Sia Go Khen kiangah vaimin na duh hiam, a cih leh Sia Go Khen in, “Vaimim ka duh taak in laisin kei ning, pilna zong kei ning, zanggam ah teeng kei ning”, ci-in dawng ziau hi.

44. Pasian’ nasem damlo a poi pawlkhat pen tulai thusuak nei pawl khat in mawhna hang hi. Pasian dantat thuak hi, cih bangin gen gawp thei uh hi. Sia Go Khen kiangah a kidot ciangin Sia Go Khen in, “Mawhna hangin kinungta zo tuan dingin zong um keng, mawhna hangin cina pah, sipah ding hileng kua mah teek sih zo tuan kei mawk ni” ci ziau lel hi.

45. Sia Go Khen in hunzangin thuumna a neih teh, “Ka mawhna hong maisak un, nong maisak kei uh leh note mawhna zong Topa’n hong maisak tuan lo ding ahih manin maisak zawh loh mawhna thuak veve ding hi uh teh, meet tuan lo ding hi uh teh”, ci masa se hi.

46. Kumcin siwe khatah inntekten ‘hoih takin zin hong do ung, Siate zong hong limbawl ung’, ci pianin thupulakna nei hi. Sia Go Khen in, “Innteek pawlpi te hong vaakna lungdam mahmah ung, nuam mahmah ung, ahi zongin nong vaak nong tahna khempeuh uh ko zong ka khua ka tui ciat vuah pua tuan loin, inn nunglam ciat mah ah hong kholsak ciat ung, ahawm mah a ciahkik ding hi ung”, cihsan ziau hi.  (Ekbuk agenna hi)

47. Inn tawm apha Pawlpi kem Sia pa khat kiangah Sia Go Khen in, “Na biakinn mai vuah bang suang nai vua”, a cih leh Siapa in, “Ka kiangah hong pia mite ka hawlkhia ngei kei ding”, cih suang ung, ci hi. Sia Go Khen in, “Bang hawlkhial mah ding nai vua, no kiangah kuamah hong pai lohpi”, cih sanziau hi.

48. Sia Go Khen in cina gimsim mahmah khat veh a, mai ngap mahmah khat zong ahih manin a muh phetin, “Kalai! Vantunggam tawh na kinai ngel mawk ve cia” ci masa hi. Tua cina tuni dong nungta in amah vangam tung masa zaw suak kik hi.
49. Sia Go Khen in daipam misite leh agina lua khollote, “misi nengneng”, ci-in  milian, mi thupi kilim uap piante pawl pen, “misi limci” ci se hi.

50. Kum 83 pha puteek khat si a, Sia Go Khen in a huam thu ngen hi. “Topa aw Late sungah mihing nuntakna kum 70 bang hi in cidam mahmah le ung, kum 80 bang hing nong ci hi. Ka pu uh kum 83, cing ahih manin na cihna zah val hi. Kawlgam nalemuh gam ahih bangin nalemuh tawh kum 3 nong nuntaksak manin ka nuam uh hi.” ci hi.  Mipi bel nak nuih mahmah tuak hi.

51. Mi khat in Sia Go Khen, “nang antan thunget nei ngei mel kei ve teh aw” a va cih leh Sia Go Khen in, “kalaisai! ann i tan khak ding lau a, na a kisemsem hi. Jesu in zong ‘nisim kham khop ann hong pia in’ ci-in thu ngen dingin hong sawl hi. Ken na nakpi’n ka sep nop teh ann tampi ka nek ban ah sun-ann pua lai hi zen veng aw.” cihsan ziau hi.

52. Mi khat in, “Sia Go Khen aw, nau- ap teh Vantung na tuno laibupi sung ah a min na khum in, i cih pen Vantungah laibupi om takpi ding hiam?” ci in a dot leh Sia Go Khen in, “Mangmuhna sung khawngah Tuno laibupi cih khawng om mah in, nau- ap teh zong ci thei zel mah hang. Ahi zongin laibu i cih pen i khuak ciapteh theiloh teng ciaptehna hi-in Pasian hilai mawk ahih teh, Pasian in zong mangngilh lo ding hi”, ci lel leteh lungmuanhuai zaw hi. Laibu zong kisia thei, mit thei, tuikawt thei lai hi”, ci-in gen beh hi.
53. Kawlpi inn khatah misi om in, Sia Go Khen in hunzanga inntekte Sihzang kampau ahih manin Sia Go Khen in, “Sihzang kamin bo cih pen bei, om nawnlo, bei taktak cihna hi. Ahi zong in bo bo bo ci-in nih gawmleng beilo, omkik cihna hi zel hi. Tua mah bangin si cih pen si taktak mah, om nawnlo mah hi. Sisi ci le’ng zong nungta kik theilua hi”, ci-in hanthawn hi.
54. Sia Go Khen a neulai-in a lawmte tawh aktui gu ngei uh hi. Aktui neipa in, “Ka aktui uh gu uh teh!” ci hi. Amau, “gu kei ung” ci hi. “Gu kei ung na cih teitei na ang ip sung uah om hilo maw?” a cih leh Sia Go Khen in, “Tua ahih leh no aktui bangci ciapteh?”, a cih leh a ngawhte’n ngawh ngam nawnlo lian uh hi.

55. Sia Go Khen aneu lai-in midang ngawidawh khat va laksak ngei hi. Tua laitakin a ngawi neite tawh kituak lian se uh hi.
Ngawidawhpa     -Hei!! Go Khen, bang dinga ngasa gu?
Go Khen-A gu hi keng, a golte a en hi’ng.
Ngawidawhpa     -A en na hih leh a tung pan ensuk ve, but khiat kul sese maw?
Go Khen-A tung pan en leng a nuai lam teng kimu lo hi ven.

56. Khatvei Sia Go Khen kawlte’ motor tungah tuangin, motor nuai lam sik gingging ahih manin kawlkam in bang gingging hiam? ci nuam in batantanle? ci hi. Kawlpa in dawng thei pak lo in, sikging hi ci nuam ahih manin tantanlitan ci-in nui tuak uh hi.

57. Sia Go Khen in tentan(training) pia ding, hunzang ding khawng akipat ding teh kua mah a ihmut a lusuk ding deihlo ahih manin, “Thu ngetna tawh ki-ap khin hi’ng, kuamah in thu hong ngetsak nawn kei un la, mang mu zong na om kei un, sunkim lai hi.” ci tawh pan se hi.

58. Sia Go Khen in Chairman sem leh sumpi don ding teh, “Kigap hun hisak ni” ci se hi.

59. Kumcin siwe khat ah nungaknote in lasa in, action tawh nikbawk teengin kilawm mahmah uh a, Sia Go Khen in, “Kilawm mawk mah ei, nikbawk bang siing pian zawzen in, buh suan ding sa phial hang”, ci-in nui veva hi.

60. Kikhopna khat ah latomno kisasa, khawl thei mahmah lo amuh teh Sia Go Khen in, “No lah la tomno cimawk uh cin, sa kikik zom kikkik na hih manun ken latomno sa hetken, vialnih vialthum zomzom mawk uh teh, ken bel taang 3 tun ding angak lah mahmah hi’ng” ci-in mipi nuisak hi.

61. Sia Go Khen in misi inn khat ah hunzang in inn kidei bialbual ahih manin mipi kimu khin theilo hi. Sia Go Khen in, “I mel i kimuh loh hangin i aw kiza ding ihih manin lungkim ciat ni. Lai i kikhak ciangin zong mel kimulo, aw kiza lo hinapi hangin a lungdam dingte lungdam, aheh dingte heh zo veve hihang”, ci phot se a, mipi in hi sa mahmah hi.

62. ZCLS EC kikhopna khat ah Sia Go Khen in a sep lai-in a khasum kikhangsaka amah lungdam in (......)tawh vaakin am pilpialin nui ngeingai uh hi. Sia Go Khen in, “Topa Jesu in zong khomun 5 leh ngasa tawh 2 tawh mpi 5000 a vaak, tampi val lai a, Cana mopawi ah lenggahtui bei pah cimawk ahih teh amau hun lai mah in zong a ha lam sangin a tuilam mah na kiva zaw pian uh hi.” ci-in mipi nuisak ziahziah hi.

63. Khamtung tangval khatin Sia Go Khen kiangah, “Khamtunga dingin bang ci nungak la leng hoih ding hiam?” ci hi. Sia Go Khen in, “Khamtung  a dingin  a melhoih a model kul kei, zingsang thawh tungin maitaii sa a tho, lokuan hat mahmah dingin lokhung panin mangthom sate a lotteh lotaw tusuk zo peuh leh hoih lel in teh” cih san ziau hi.

64. Sia Go Khen leh nungak ham kiho.
Go Khen - Tu laitak vantung kah lian leteh Topa Jesu kiang ah bang na gen masa pen tam?
Nungak - Ka gen pak ding thei tuan keng.
Go Khen- Lawmlawm! Topa nong piaksa vante zat lohin kekseu dek liangin hong puak kik ing, na ci kei ding maw.
Nungak-Tua zatloh van na cihte bang aa?
Go Khen -Theilo hetlo maw na van zatlohte? Ngaih sunsun le teh thei
ni teh.

65. Sia Go Khen leh nupi khat kiho.
Nupi -Sia na zi nausuak maw?
Go Khen-He, zan nitakin suak ung.
Nupi-Zato maw? Inn ah maw? at maw atlo?
Go Khen-At kei ung, suah ngeina munpan mahin suak, ka lawmna a
hin khiat lam hat bilbel aive.

66. Mi khatin thugen a, “Dawimangpa leh a pawlte ka hawlkhia hi. Kawlgam pua lam ah ka koih hi. Tuipi taw ka denna hi. Hong kileh kik nawnloh nangin Kha Siangtho tem tawh ka bansat hi.” a cih leh Sia Go Khen in, “Tua zah a hih thei na hih leh thatlum khin vet ve! Hong paikik nawn lo ding hiven,” cihsan ziau hi.

67. Khatvei mopawi khatah la kisa in Tedim Labu – 229, “Ki-it tawntungna hai kidawn ding hi, tum un, tum um” cih kisa hi. Sia Go Khen in, i ki-it ta zongin hai bel dawn ngap mahmah keng ei,” ci-in mipi nui ziahziah hi.

68. Sia Go Khen in tulai Upa pawlkhat bel zasan thak sangin kihta zaw ing. Hong ko ekek thei khawng lakah Sia ka sep sangin ka ngapngap in tawpat liangin bicycle bang a sik(ride) nuam zaw hi’ng, cihsan hi.

69. Sia Go Khen in ZCLS ah a sep lai-in lai cih pen haksa mahmah hi. Kawllai a (...................) cih zong a khiatna mitampi kikhawm uh hi, i cih hang in adang khat in cileng mi haite kikhawm uh hi, cih himawk lo hiam? Late 23:1 cih zong, ei kam in Topa Pasian pen eimau’ tuucing i sawltak, ei a tuu nei zong suak thei mawk hi. Tua manin lai cih pen baih lo hi, ci in gen hi.

70. Khangno pawlkhat in Tedim Labu – 218, ‘Ka lutung aksi taang a om diam?’ cih sa in nuam a sak mahmah laitak Sia Go Khen in, “Hih la phuakte in aksi a gol lam thei nailoin  a neu mahmah, lukhu tunga kisuang thei ding sa uh hi ding hi ven, aksi neu pen zong leitung sanin golzaw hiven,” ci hiathiat hi.

71. Pawlpi kikhen in nam nih a pha Pawlpi kem Siapa kiang Sia Go Khen in (............) Pastor kei mawk cin (...............) Pastor himawk ciai,” ci ziau se hi.

72. Sia Go Khen in zanggam teen bel nuam lua in, i zi i tate nasep omloin thadah semsem mawk uhi. I tate bang huansung ekbuk pai ding motorcycle bang zang naum zen uh hi veh aw, khe a pai ding ut hetlo zen uh hi ven,” ci hi.

73. Sia Go Khen leh Sia dang khat kiho: 1995
Go Khen -ZBCM ah nong lut mengmeng kei uh leh nidangte “Mawhneite Jesu’n ngai hi” cih tawh nong lut hun uh om ding hi. Tun bel, “Jesu galkapte galsim ding kuan un” cih tawh a kipaikhia lenlen hi mawk hi.
Sia khat -Gi kei leng bel galsim ding om den mah ding ai ve. U Dai Liante’ inn
himawkin  a sawt loin nong dai lian mai uh hiam, ci veng ee.
Go Khen-Dai Lian bek hisam kei Pau zong hi laisam hong paupau sam nung ee
Sia Khat -Paupau lel bel na kam om kei leh va-ak in cih khat paunak nei hilo i
hia? nui veva kawmin khawl tuak uh hi.

74. Sia Go Khen leh mipi kiho.
Go Khen-Ka mel hoih nong sa uh hiam?
Mipi-Hoih sa lo.
Go Khen -Hoih nong sak kei uh leh Pasian a simmawh, Pasian in ama’ melsuun
a kei hong bawl hi.
Mipi -Hoihsa kik leuleu.
Go Suan- Ka hoihna hangin na mawhna uh hong maisak ing.

75. Sia Go Khen in, “tulai nungak melhoih i cihte bel mindangte’n zong hoih na sa tek mawkin(............) hi pahpah mawk ve aw,” ci hi. (mipi’ vanzat suakthei mawk cihna)
76. Kawlpi Tuiphum Pawlpi a Secretary sem Bo Vungh Khai pen Sia Go Khen teh hawh a, kahlei a kahtoh laitakin Sia Go Khen in Sihzang kam tawh to to to a cih leh Bopa in ko zong ka zat ngei mengmeng loh uh a khelkhel zang thei se na hiam,” ci-in nuikawmin kiho uh hi.

77. Sia Go Khen pen TV et uuk mahmah a, mi’ innah a etteh innteekten khak(sumit) zel uh hi. Kineisak si ci-in a hehsuakin khat lei a, innsungah mi dim den ahih manin nawngkaisa in aman zong sumit(khak) zel hi. Nidanga TV neite kineisak ka cih ahi ding mah hi ei,” cikik hi.

78. Sia Go Khen World cup et uuk mahmah in zanhak liang hi. Upa khatin a zingteh kilakkik lel hilo maw, zanhah liang sangin a zingteh enkik lel ve... a cih leh Sia Go Khen in, “A zo alel kitheih ma bek muhnop, a kitheih khit teh a en dingin ka nakphen in nong kai zongin ut keng,” ci hi.

79. Sia Go Khen a neulai-in thadah mahmah danin om a, a Uten hizah a na thadah lawmlawm a cih leh kivaak zolo ding ka hih teh sang nong kahsaksak ding uh ahi ve, ci-in nui veve in dawng kik hi.

80. Khatvei mihon khat sabeng dingin kuan a, i mat bangbang hawm ding ci-in kiciam uh hi. Tampi mah mahin hawm ciat uh hi. Khatpa in a tuamin pawlkhat na selsim ahih manin alawmte lungkim loin i hawm ding hi, ci ci ta leh piakhia nuam tuan lo hi. A tawpna ah Sia Go Khen thukhen sak dingin pai uh a, Sia Go Khen in thukhen sak hi.
Go Khen -Na kiciam nasa bangun na sa matte uh hawm naivua hawmlo
Sabengte-Hawm khin ung, lawmpa in pawlkhat na gusim mawk hi.
Go Khen -Na kiciamna vuah a gusim a om leh tua a guksimte zong hawm ding ci nai vua, ci kha lo?
Sabengte-Guk cih limlim bel gen kei ung.
Go Khen -Tua ahih leh a gupa in hong hop nop leh hong hawmin, hong hop
leh hong hawmin, hong hop nop keileh ama’ thuthu hi. Nget theih
hilo hi.

81. Sia Go Khente teenna pen luigei ahih manin suang kiciang hi. Suang kilak ding phal loin kumsim a cian behbeh hi. Nupi khat in Suangsi sek nangin gusim den mawk hi. Lakhia ken cita leh laden hi.
Go Khen-Nihvei thumvei kong gensa la teitei kei ve, lau ding hong sa maw,
a zumin zong zum mahmah lo maw?
Nupinu - Pastorpipi tua bangin pau se kei aw...
Go Khen-Pastorpipi ci se ke’n, Laisiangtho deihna bang hileh guta suang mah
tawh kong denlup ding hi teh...

82. Khuapih sabengte in sa manin Sia Go Khente sa tan hi. A nu pau manlang leh a khial thei khat hi-in tua satan a ngahte uh ui khat in ne a,
A nu-Go Khen Thang na pam a uisa ne!
Go Khen-Nu, a sial hilo maw, a min hilopi.
A nu-Min leh min ta keh ne..(na pam a sa ui in ne a ci nuam hi.)

83. Mi khat in Sia Go Khen hun na zat simin ciamnuih bekbek na gen a, mi na nuihsaksak a bangci mawk na hia? a cih leh Sia Go Khen in “Thu manpha, thuthuk i gen hangin lah kuamah in thei zolo a, ciamnuihna tawh thuah leng amau zaknop sa zaw uh hilo maw,” cihsan ziau hi.

84. Mi khat in Sia Go Khen kiangah “Na laibu bawlte a malkhial tampi om, puahpha mawk ve, a cih leh Sia Go Khen in, khial hi ci a, a khialna na muh na theih nak leh a khial nawn lo hi pah hi. A khialh lam kuamah in mulo, theilo hileh a khial suak hi ding hi,” cihsan ziau hi.

85. Sia Go Khen in Pastorte khasum tam hetlo cih a muh ciangin “Pawlpi miten siate hong it mahmah in, sikhang natna ngah zawh na ding, zunkhum natna ngah zawh nading in khasum hong piangam lo hi, i khasum tawh natna kingah zolo ding hi,” cihsan ziau hi.

86. Sia Go Khen in ann nek teh meh tui pian hi, cih amuh teh, “Tuiphum Pawlpi hihang ei, i sikkeute mehtui sungah phum ziahziah, baptize ziahziah ni” ci ziau se hi.

87. Sia Go Khen in,  “Pastor innkuan tengin anteh meh khawng aloo meh khawng sameh bang a muhtheihna mitlimlangh nei-in annek kuan teh bulh tek leng hoih ding hi veh aw, ” ci hi.

88. Khatvei Sia Go Khen in hunzangin sawtlua ahih manin a mailam a tu numei khatin, “Sia ko na koici om ding” ci hi. Siapa in tutnop leh tu, lupnop leh lum, cihsan ziau hi.

89. Palwpi khatin Sia Go Khen ciamnui dingin sam a, nitak pan kipan ciamnui in zingsang nai 2 pawlteh a ngaite lususu uh hi. Siapa in a ngaih na ngawn taak kei uh cin, ciah mawk vou,” cihsan ziau hi.

90. Pawlpi kilemlo lemtuah dingin Sia Go Khen pai a, tutung thugen ding hilo, (.............) sun dinga hongpai hing, ci hi.

91. Mi khatin Sia Go Khen lampi na paikawm a na nuih veva den bang himawk hiam? ci hi. Siapa in Leitung nuntak thu tampi ka lungngaih teh ka nuihza den mai hi veh aw,” ci hi.

92. Sia Go Khen Ordination akipiak dingin kipa pak loin kum khat enlai ni, a kicih zel teh Sia Go Khen heh lua in, “tua banga hong enen nuamte thupbunuai gawp ding ka cih phial hi-in, ka ngaihsut kik leh Eh, zenzen! tua Ordination nitak meh zingmeh a nektheih zattheih lah hilo ban a mang ding ka hiam? ka cih theih teh ka lung hong nuam” ci hi.

93. Sia Go Khen in “nitak khuamial cianga lamdung khawnga nungak nui ziahziah i cihte bel a pa ding na om uh leh ko a nu ding ngap lua ung, ci a kikoko uh hi in; khiatna nei a nuilualuate hi,”  ci hi.

94. Sia Go Khen in, “Khasum sangten lah khacing haksa, innsapten lah khacing baihsa ahih teh khasum sangta dingin nipi khat khakhat hi henla, innsap ta dingin khanih khakhat hileh hoih ding hi ven” ci hi.

95. Mi khatin Sia Go Khen kiangah, “Pastor ci-in mihaute inn bekah hawh nuam uh teh, ko a zawng daipamte kiang ah hong hawh nuam uh teh”, a cih leh Sia Go Khen in, “Mihauten a hauhna uh Pasian hong piak hi ci in lungdam ko ding in hong sam zel in, no zawn mahmah leh Pasian uploh, gitloh tawh kithuah lai zen mawk na hih uh teh, kong hawh ding uh haksa mahmah hi. Ganhing in zong a ngaite mah ngai bek hi,” ci hi.

96. Sia Go Khen thong akiat laitak thongah ah mi khat hawh a, niangtui leh moh a nekhawm uhi. A ciah ding ciangin inn ate vaikhak ding a om hiam? a cih leh, “Thongsung ahih hangin i Presidentpa tawh lum khawm ung, Pastor leh President thongkia khawm ding zong haksa, tawl khat hong om lai nung, bangmah na lunghimawh kei uh hen,” na ci in vaikhak hi.

97. Sia Go Khen hong nutsiat in mikhat in Siapa hong thokik vat leh bang a ci tam? ci hi. Midang khat mah in, “Hong thokik himawk leh, Pasian in khamangthang man dingin hong sawl napi, ngamangthang ka mat zawk leh nga in kei hong leh mat mawkin a si kihi ziau lel ei, ci-in teh” ci hi.

98. Mi khatin, “Sia Go Khen hankuang sungah a koici om tam?” ci hi. A dawngpa in, “nui veva in teh” cih san hi.

99. Khris leh Khrih a kituhtuh a kiselsel laitak a Sia Go Khen si ahih manin,a hankhuk tungah, “Kei a ka nuntakna in Khris hi. – Fil. 1:21 ” cih ki-at hi. Pawl khatin hankuang sung ah lungkim mahmah i nui veva ding hi,” ci hi.

100. Sia Go Khen hong nutsiat laitak mikhat in Sia Go Khen in hih a kapkapte mu leh bang a ci tam? ci hi. Khatpa in, “Na kah uh kituak sak un, a un a eu omsak kei un, a tawp hak a tawp baih zong om se kei un,” ci-in nui veve kawmin gen in teh, ci hi.

Dip.Th ciang bek hi napi Pasian thuthuk thei mahmah ahih man in, Sia Thang Khan Pau in, ‘Sia Go Khen pen a theih dinga kilawm zah val a thei pawl hi’, ci hi. Mikang te mahmah mai ah zong ciamnuih English in a gen ngam a Thugenna leh training a piak ding ciang in a outline pen English tawh gelh se hi. Lai Siangtho siapi te toh zong Theology kikum ngam mihing khat ahi. Evan. Lang Do Khup in, ‘Rev. Go Khen te pawl in ka neu lai-in limlahna, laphuahna, lasakna tawh limtakin hong pattah uh ahih man in “Ngaih anglai ah, Ngaih anglai mah, Ngaih anglai VDO te hong piangkhia hi,’ a ci hi.

Dotna a dawn bangzah hiam sim ni.

1.Dotna: Tuiphum pawlpi in biakpiakbna ah khuangtum ding i phal mah ahi hiam? Ko khua ah mi pawlkhat in Late 150 bulphuh in khuangpi, khuangno tum uhi.
Dawnna: I ngeina-ah khuangtum ding i phalloh mah ahi zaw hi. Ahi zongin i thu-up nambat 5na-ah “A phualphual a om pawlpite amau ki-uk tawm thei uh hi”, cih om zel hi. Tua ahihmanin khuang a zang pawlpi khat pen va kham (va uk) cih hi thei lo hi. Ahi zongin tua khua pawlpi ah zong kithukimna a omlo veve ahihleh khuang zatna pen khawl zaw le hang a hoih ding hi.

Late 150 bulphuhin khuangpi, khuangno i tum ding hi, cih tawh kisai Late Lai Siangtho pen kikhop biakpiakna tawh kisai laigelh nam ahi kei a Topa phatna tawh kisai, la tawh phatna nam ahi hi. Hi bang i cih ciangin late a phuak David mahmah nangawnin tumtheih kuang tawh biakinah Pasian phat cih omlo hi. Judah mite tangthu mahmah ah zong tumtheihte tawh biakin (temple) sungah kikhopna nei cih i mu ngei kei hi. Tua ahih manin ei Tuiphuam pawlpite in biak kikhopna sungah khuang i tum kei hi.
Kim khatin latah (beat) hong mansak hi, a ci thei uh hi. Latah(vuak) man na dingin Solfa i siam ding kisam hi zaw a, khuang pen i tum ciang bek a ging ahi hi. Khuangin mihing hong makaih hi loin, mihing in khuang a makaih (uk) i hizaw hi. Tua hi a, lasak a nop nangin lamakai hoih zong i kisam hi. Khuang a kisam i hi tuan kei hi.

2. Dotna: Kha Siangtho ngah cih bang ci dan hiam?

Dawnna: Kha Siangtho thu tawh kisai laibu a kilawm zah khat ka simna sungah ka phawk thu khat in, Jesu Gumpa in sangin Topa in i neih khit teh bang ngah beh kisam ding hiam? Jesu nei-in Kha Siangtho nei kei cih bang om thei ding hiam cih hong musak hi. Jesu i up theihlohna, i san theihlohna hong hilh in i mawhna hong laksak pen Kha Siangtho ahi hi. Kha Siangtho huhna tawh Gupna a kisang thei ahih manin, Jesu kua hi a, Kha Siangtho kua hi tuan hiam? Khat i neih leh a nih mah a nei ki hi lel lo ding hiam, cih ka phawk khat om hi. John 16: 15-16 sim beh lai in. Neih ding hi loin hong neih ding a hihtuak zaw hi.
3. Dotna: Zunekna pen khialhna hi ding hiam? i nek hangin kuama heh na ding leh a hoih lo sem kei peuh le hang bang mawhna om ding hiam?

Dawnna: Kristiante pen eima pumpi a dingin a nungta i hi nawn kei hi. Midangte noptuam na ding, lungdam na ding a nungta ding i hi hi. Eite pen mite etteh ding i hi hi. Nang zunekna hangin nangma tungah siatna a tun le a tunloh a thupi hi loin, hong etteh midangte a dingin a siat leh a siat loh a thupi ahi hi. Keima muhna ah Cinema, Video et pen siatna omlo hi. Ahi zongin kimkhat ta dingin a lipkhaphuai na suak thei hi. Mikhempeuh in nang bangin zu ne leh nang mah bangin hoih kim lo ding hi. Tua man in Paul in “midangte in a puklawh theih annekna, zunekna leh na khat peuhpeuh i kikep ding aman pen hi,” na ci hi (Rom 14:21).

4. Dotna: Tuiphu pawlpi in Lai Siangtho ahi bangin na zui kei uh hong kicihcih bang himawk hiam? I zuih loh zuih khit ding hilo hiam?
Dawnna: I zuih loh tampi om mah ding hi. Bangteng hiam cih leh gen khin zo kei sam na ve hangin, tawm khat en leng:
Sawmah khat hong pia un ci napi i piazo tuan kei hi.
Khamtheih zu na tang un ci napi i tangzo tuan kei hi.
Na galte na it un, hong ci napi i lawmte nangawn i it zo kei hi.
Nang tung kibawl ding na deih bang mi’ tung na bawl in ci napi i bawl zo kei hi. Hihte pawl pen i zuihloh pawl hi.
Pawl dangten zong a zui khin khol tam maw? Lai Siangtho pen ahi banga kizang mah hi napi kizui zolo hi bek hi. A lamdang thu hilo hi.
Lai Siangtho a hi bang a sang cih sangin ahi bangin ka zui thei cih thupi zaw hi. Sanna hangin bangmah phatuam lo a, zuih loh manin siatna om hi zaw hi.

5. Dotna: Moses leh Isreal mite in santuipi kanlo hi cih pen hong sau gen dih ve.
Dawnna: I cihnopna ah Moses ten tuipi a kan kei cihna hi peuhmah lo hi. Tuipi khat bel kantan mah ding uhi. Ahi zongin tua lui (tuipi) in tulai san tuipi cih ahi thei kei ding cihna ahi hi. Tua ahih manin gamlim (map) tawh limtakin na enpha in. Gamlim zong nam tuamtuamin kisuai a, TEV hiLhna zui in en leteh kician mahmah hi.
A masa in a laimal bul (Hebru) ah san tuipi ci a, a kammal zat i khiatna lianpen pumpeng tuipi (reed sea) cihna hi zaw hi. Tua ahih manin laimal kikhial ahi thei ding cihna ahi hi. [Reed gelh ding pen Red gelh kha hi in ten ci in at uh hi].
Baal zefon panin a zingteh San tuipi tun man ding hilo a, tung phial le uh zong a nungsang a paina uh pen San tuipi gal taktak hi nawnlo, a niamsuk pen in Sinai mual ciang hi bek hi.
LST nial cih bang hilo hi. San tuipi a kan kei uh zong in Pasian panpihna tawh tui lianpi khat pen a kan teitei ding uh hi, cih ahi veve hi.

6. Dotna: Kha Siangtho na neih takpi leh Kha Siangtho letsong kamtuampau, cina damsakna, na lamdang piansakna na neih pah kul hi. Hihte neilo pen Kha Siangtho neilo hi, a cih uh bang dan aa?
Dawnna: Kamtuam, cina damsakna, na lamdang bawltheihna i ngah manin Kha Siangtho kinei hi hetlo hi. Hihte pen Pasian theilo Muslim, Hindu ten zong kamtuampau a ngah uh hi. Kha Siangtho piak i neih manin Kha Siangtho ngah i hi, ci-in i kisit nop leh Mark 16:18 enleng, Zu, sa, za cihte dawn/ne in gul gunei na kituksak lai in, tua hileh a letsong thupi zaw maw a Kha Siangtho koi thupi zaw cih na tel ding hi. Kha Siangtho piak ahih nak leh nget leh kisin kullo in hong piak leh a ngah leh a sang i hi hi.

7. Dotna: Sia aw, nang upna ah Jesu a hong paikik nawn hetlo dingin a um mah na hi hiam?
Dawnna: Jesu hong paikik lo ding ci-in zong genna ka nei ngei kei hi. Lai Siangtho sungah hong paikik ding ci ahih manin hong paikik ding mahin ka hilh a, zong ka um hi. Ahi zongin i sanggam kimkhat gen hunkhenna (Dispensationalist) bangin Jesu hong paikik ma kum 7 hunin laksimna (rapture) cih sese pen Lai Siangtho sungah zong ka muh loh banah zong ka um kei hi. Jesu bel hong paikik mah ding hi.

8. Dotna: Tuiphum pawlpi sungah tuiphumsa khat leh phumloh khat a kilamdanna bang hiam? Pawl huam leh pawlkip (full member) bang kilam dang hiam?
Dawnna: Tuiphumna a ngah khat pen pawlkip hi-in thu taktakin kiciamteh hi. Pawlpi sung vaihawmna khat peuhpeuh ah zong thu neithei (right voice) ahi hi. Ahi zongin tuiphum nailoh khat pen pawlpi sungah thunei thei hilo hi. Pulpit tungah hunzatna leh thungetna zong nei thei lo hi. Biakinnah kahin lapawl peuh asak ding loh buang bangmah thu nei thei lo hi. Khialhna a neih leh zong khalna kipia theilo hi. Tuiphumsate pen mi taktak in kisim hi a, phum nailoh pen mimal tamsakna hilel uh hi. Thuiphumsate in kipawlna khempeuhah thu nei thei hi.

9. Dotna: Sia aw, Pawlpi in lamna pen a sanglo i hiam? Lamna na bangci muh hiam?
Dawnna: Kei muhna hong dong na hih manin ka muhna leh ka sanzia bek tawh kong dawng ding hi. Thuciamlui sungah Pasian’ tungah lungdamna leh Pasian zahtakna in lamna na om kha ngeilo hi. Tua bangin a zat ngeiloh uh manin Pasian in zong a khamna om ngeilo pah hi. Ki zanglo ahih manin a kham ding omlo cihna hi. Ahi zongin Pasian thu a hi kha hetlo, bawng milim, milim biakna (Pai 32:19) tawh lamna, galte sihna hangin lungdamna (Pai 15:20) suahpawi bawlna ah lamna (Matt 14:6-8) cih bang na om hi. Pasian thu tawh kisai hetlo lamna ahih manin Pasian zahtakna tawh lamna na kizang hileh Pasian in a kham ding hiam? Tang a kipan a kizang ngeilo, bawltawm leng a hoih diam, cih pen ngaihsun siam ciat leng hoih kim pen dingin ka um hi. Kei ka hih leh a lam nuam ka hi kei hi. Ka up hang hi loin, ka lam noplohna hangin a utlo bek ka hi hi. Lamna piang thei hi, a thupi penpen in ‘Lungdamna’ hi.

10. Dotna: Siate in sawm-ah-khat piakna thu gen luat pen zumhuaisa ing.
Dawnna: Pasian neihsa a gu leh a buluhte zumhuai hi zaw lo hiam? Na guktakna uh hong gente a zumhuai hi zaw ding hiam? Gutapa sangin gutate a genpa koi zumhuai zaw ding hiam? Guktat loh ding ahilh ding Siate mah hilo ding hiam?

11. Dotna: Jesu ziatlam a kikhaipa in tuiphum man loin vangtunggam ngah ahih leh ei zong i ki tuiphum loh hangin bang phamawh hiam?
Dawnna: Singlamteh tunga kikhaipa in sihna thuak lian ta dingin khuamtungah kikhai ahi hi. Nang tu laitak in khuam tungah na kikhai hiam? Sihna thuak lian dingin mansa in na om hiam? Jesu na um hiam? Jesu ziatlam a kikhaipa bang lian na hihleh tui na kiphum kei in. Jesu’n hong sangzo ding hi. A suakta mi leh hunawng nei na hih leh Jesu’n hong sangzo thei hi. Na kibat uh leh pha hi. Na hun en in. Na upna ki-en in. Na suahtakna en in.

12. Dotna: Sia aw, ‘kitelcianna’ neih ding mah a hiam? Lai Siangtho in kitelcian un, hong ci hiam?
Dawnna: Kitelcianna om cih hi loin, telcian ding thu kisam om cihna hizaw thei hi. Jesu in nang hong gupna thu telcian in cihna hi-in, kitelcian lecin hong gum ding hi cihna hilo hi. Kitelcian manin hong gum hi loin, hong gupna i telcian (theician) ding cihna hizaw hi. Lai Siangtho buppi’ hong hilhnop pen tua gupna kitelcian ding bekbek ahi hi.

13. Dotna: I pianthak khit ciangin ze-etna hong kipanpah in i pianthak ma in dawimangpa in hong ze-et tham sa lo hi, kici hi. Gupna zong kitan theilo kici hi a, a kitan lo ding ahihleh satan zong thasum liangin bang ze-et kul se hiam?
Dawnna: Dawimangpa in Jesu a ze-et laitakin ka khemzo ding hi cih upna tawh a ze-et hi ding in na um hiam? A khem zawhloh ding bang hangin kipan veve hiam? Satan nasep pen supna leh lelhna vive hi ding hi cihna zong hi thei hi. Ze-etna cih kammal pen Greek lai i et ciangin puk na ding khialh na ding a thaang siahna cih bang hi loin, picin-na ding a kisinsakna cihna ahi hi. I pianthak khit ciangin Pasian in i picin zawk theih semsem nangin hong pantah semsem cihna pen ze-etna (greek-metanoia) a ki ci hi.

14. Dotna : Sia aw, ko gam a siate pianglui lua mahmah in sia piangthak deih lua ung?
Dawnna: A pianthak uh sauvei lua khin a, lui ta hizaw kha ding uh hi. A thakte etlawm mahmah hi. A luite pen a lui theih manin a to mahmah ahihna hong lak ahi hi. A luite sauvei a kizang thei hi in a thakte zong a lui kik ding mah ahi hi. I siatman sungmah a kimang ding vive ihi hi. A thak bekbek i deih leh itan omlo paalaam i suak ding hi.

15. Dotna: Bang hangin Pasian in amah langdo dingin satan bawl se hiam? Phiat lello hiam?
Dawnna: Thuciamlui ah satan in Pasian thei a nialna a langpanna cih om ngeilo hi. Pasian sawlnate amanloh zong om tuan lo hi. Job tunga satan nasep khempeuh Pasian phalna bang bekin a bawl ahi hi. Pasian phalna val a a sep khat zong omlo hi. Thuciamthak sungah Jesu thu dawimangpa nangawn in amanna na om veve hi. Tua manin dawimangpa pen picin na dinga Pasian vanzat khat banga man ding hi zaw hi, cih i san ding ahi hi. Ei thuaklah ding ze-etna hong thuaksak lo hi ( I Kor 10:13). Ei ngaihsut zah in Pasian leh Satan kilangneih (do) lua khollo zaw hi. I ci leh sa deihna leh Pasian deihna kilangdo zaw hileh kilawm kasa hi. Bang hangin a thu mang nuam lote hong that pahpah lo hiam, ka ci zaw hi.

16. Dotna: Bang hangin Tuiphum sungpan mimuan mahmah kim khat pen pawlpi dang ah tai thei zel hiam? Ei a ginalo lua i hiam?
Dawnna: Pawlpi sung ah maingal ngap nawnlohna a neih manun a tai zong om kha ding hi. Pawlpi muan ahih loh manin zong a tai om kha thei ding hi. Khasiatna hangin zong hong taisan om kha thei ding hi. Ei ginat leh ginatloh bel a cilin a theihsa uh ahi hi.

17. Dotna: Khamlukhu tampi i ngah theih nangin bang teng sem leng hoih ding hiam?
Dawnna: Khamlukhu na ngah sawm sangin kham innpi ah om ding ut zaw lo na hiam? Lukhu khat cing' ding a tam kham leh suangmanpha na neih sangin inn khat cinga om ding uthuai sa zaw lo na hiam? Kham innpi sunga teeng mite in khamlukhu khuktaak sa lo ding uh hi. Singinn sungah om in sing lukhu kikhulo hi. Leiseek innsungah om in leiseek lukhu kikhulo hi. Na lukhu ding sangin na inn ding lunghimawh zaw in. Upna tawh kham kongpite tawnin kham khuapi na lut thei hi. Lukhu maw na deih, inn?

18. Khatvei Full Gospel hon khat leh Tuiphum pastor khat kituntuah kha-in thu kinial uh hi.
Full Gospel: Sia aw ko bangin piangthak in la Full Gospel in hong vak thei le cin hoih inteh, ci hi.
Pastor: No kumpi nasep tawh a thuahte zong full kici na hih uh leh kei over full hilo ding ka hia? cih san.
Full Gospel: Sia aw nang bang pi pi in Pasian thu zangkhai ngaihsut ken!
Pastor: Na kumpi sum sazian sitna leh na nasepna uah Pasian min na zangkhai ngaihsut kei zaw mah vua! Full Gospel maw, fool gospel cih zong khen haksa sa ta ing ei! ki cihsan uh hi.

19. Dotna: Sia aw, piangthak mah hoih hilo hiam? hong piangthak le uteh i pawlpi mahmah hong khangto dingin mu ing.
Dawnna: Pianthak pen hoih mah hi. Zong etlawm hi. Luisuak man loin kisia pahpah a, to hetlo uh hi. Ken a hoih sangin a to mahmah, sau veipi a kimangte hoihsa zaw ing!

20. Dotna: Sia aw, antanna (anngawl) thunget pen vanglian a thupi mahmah ahih manin i gamah hih antan thunget hahzat le hang hoih lo ding a hiam? Tuiphum pawlpi leh Catholicte’n thupi saklo hi hang.
Dawnna: Ken nna ka nawh sep, ka kin ciangin thobaih-in an ka huan a, ka kipan baih hi. Nasep haksa, khual gamla ah zin na ding ahihleh meh lim mahmah ka bawl zaw hi. Gilkial a lungsim thahat sangin, gilvah a lungsim zah a nasep theih hoih sa ing. A kin huai nasep sem a anngawl hithiat cih mu ngeilo zaw hi veng aw.
Ankam lim mahmah leh bangmah awlmawh luat nei loin, antangin thungetna neih sawm pen a khiatna a tam phalo ahi hi. I thunget ding a thupi luatna leh i lainat i vei mahmah luatna tawh an ne zo loin, thu i nget ding ahi hi. Gilvah leh gilkial a thupi ahi kei a, a lainatna leh veina (passion) Topa deih ahi zaw hi. (Matt 9:14-15 limtak sim in). Antang in thungen ding hi loin, thungenin annek ding mangngilh zawh ding thupi zaw hi.

21. Dotna: Sia aw, ki-ap tawntung ding mah ahi hiam? Ki-ap zia ding hong gen in. Nisim a ki-ap den ding a thupi hiam?
Dawnna: Khatvei i vekpi (total) a i ki-ap theih kei leh a vekpi a suah dongin ki-ap kul ding hi. Khatvei piangthak a i pianthak khit zawh kei leh tam veipi piangthak thak leh a tawpna-ah hong piangthak pawng thei hi. I vekpi a kipiak khita piaklai ding i neih lailai leh a kipai khin lo i hi hi.

22. Dotna: Sia aw, Lai Siangtho sungah a tamzaw lungkimna tawh na kalsuan un, cihna om ahi hiam? a tamzaw lungkimna thupi mah ding hiam?
Dawnna: Mipil sangin mihai a kitam zawkna phawkhuai hi. Pawlpi ah theih ding thu nam nih om a; (1) Pawlpi sung thu vaihawm leh (2) Biakna ngeina na om hi. Pawlpi sung thu vaihawmna (Lai Siangtho thu ahi lo, khualzinna, huh piakna...) cihte ah tamzaw lungkimna kizang thei bekin Biakpiakna ah a tamzaw thukimna cih pen them zong zat ding hilo hi. Lai Siangtho in zong hilhna hong nei vetlo hi.

23. Dotna: Sia aw, nang pen thu leh la ngaihsun den tawh kibang teh. Khuak bek tawh a nungta hiteh. Pilna a suang hi cin, lauhuai lai teh.
Dawnna: A hoih taktakte pen i leh-et hangin hoih veve a, i mai-et ciangin zong hoih veve hi. Khuak ahihleh singkung lopa lo buang nuntakna a nei khempeuh in a zat ciat ahi hi. Tua ahih manin khuak leh pilna a zangte a lauhuai leh khuak leh pilna a zanglote lauhuai zaw kan ding hi. Lai Siangtho in na pilna khempeuh tawh... Pasian it in. Pilna tawh inn kilam a... cihte na gen hi. I pil zo kei a hi ven, pilna bel suan ding hi zaw hi.

24. Dotna: I lai zatdan ah ‘ong’ leh ‘hong’ koi zang leng hoihzaw na sa hiam?
Dawnna: I makai masa Rev. ST Hau Go in zong a kibang in na mu a, Xristian labu sungah a tom a deih ciangin ‘ong’ na cisak hi. A tom i zatnop man hi kei leh ‘hong’ mah zathuai sa zaw ing.

25. Dotna: Thunget sungah ‘Amen’ cihte pen ei Tuiphum pawlpi sungah i khaam man ahi hiam?
Dawnna: Tuiphum pawlpi in kikhaam hetlo hi. Ahi zongin tha kipialo cih hi bek hi. Tha a kipialopi khat sep veve theih ahi a, seploh ding ahi zongin a hi thei kawikawi hi. Hong kihuh lo ding cihna ahi kei tam?

26. Dotna: Pawlpi kimkhatin sa nekloh nei-in ei Tuiphum pawlpi in i nek khit hoih mawk ding hiam?
Dawnna: Lai Siangtho sanzia kibatlohna pan hong piang hi. Pasian mai ah kua dikzaw ding cih bel mihing kikup theih ahi kei hi. I nekna hangin an khempeuh nek dingin siangtho hi (Mark 7:19). Upna neu mi-in anteh bek ne ngam uh hi. (Rom 18:2) An khempeuh nek ding Paul in sawl veve (Rom 14:6). Pasian bawl an khempeuh tan ding omlo (I Tim 4:4). I nek hangin siatna a om loh bangin i nek loh manin siatna om tuanlo hi.

27. Dotna: Mangmuhna 14 sungah mi siangtho 144,000 a cih pen bang gen nuam hiam? Vantunggam tung ding zah a genna hiam?
Dawnna: Mangmuhna sungah a kicing tawh kisai-in nambat a zat 2 om hi. Khatin 7 hi-in, kicing a cih nak leh kicinna a gennuam den hi. A khat leuleu in sawm-leh-nih (12) ahi hi. 12 in a namkim cihna lim ahi hi. 12 tawh a kikhangsak (x) sawnsawnte pen namkim mahmah cihna ahi hi. Gentehna in upa 12 ka mu, upa 24 ka mu, 144,000 te ci-in (12x2-144) hi-in bemthum behlap lai ciangin tul nambat (1000) ahi kik a, bem (thum om) in bei hun neilo cihna lim ahi hi. Tua ahih manin, i khiat ciangin vantungah mi namkim thei tawpin kilut kim dinga cikmah hunin mangthang (bei) cih a om peuhmah kei ding cihna ahi hi. Vantunggam a lut ding mi phazah genna hiloin a nambat in khiatna nei hizaw hi. Tuazah bek lut hileh a ngahlo tam lua ding hi.

28. Dotna: Zawlta peuhmah Topa’ a ding kikhopna sungah lut lo ding hi (Thu 32:2) a cih pen bang gen nuam hi ding hiam?
Dawnna: Topa’ a ding kikhopna a cih in Jerusalem biakin leh Judah mite kikhopna gen nuam ahi hi. Tua biakin sungah namdangte lut theilo hi. Zawlta ( a nu/ a pa khatzaw Judah mi hi ding) cih in Judah taktak pan a piang lote zong zawlta ci veve uhi. (Samarian). Ahi zong in Jesu in hoihsa loin ka inn pen mi khempeuh thungetna inn kici ding hi, na ci hi. (Isai 56:6, Jer 7:11, Matt 21:13). Hi sungah zawlta a cih pen a tampi hi loin Ammon mite leh Moab mite hi-in mundangah Samaria zong ahi hi.

29. Dotna: Laimal ‘I’ zang zaw ding maw ‘IH’ zang ding? Min ah Vung ahk Vungh, Lang ahk Langh cihte ah H koih ciatciat ding maw?
Dawnna: Kei muhna leh zatna ah ‘IH’ pen hoih ka sak zawkna kiukiu om ai manin a zang ka hi hi. Tua teh H tawh a tawp laimal pen keima phuah hi tuan loin, Lai Siangtho a tei Rev. Kam Khaw Thang in a zatna na om hi. A cingh mite hau semsem ding, a pa’ gamh kituh uh hi. I minah zongh neih ding kim khat kisam hi.

30. Dotna: Matt 27:52 sungah Jesu sih laitakinah a hante kihongin a sisa Pasian’ misiangthote thokik in khua siangtho ah pai a cih pen kua bang mite hi ding hiam?
Dawnna: Hilhna nam nih om a nang koi zaw sang thei na hiam?
Khatna ah> Jesu in sihna hong tuah tak ciangin a that leh a bawlsia tampi in Jesu pen Pasian’ tapa ahihna phawkin a mawhna kisikin piangthak uh hi. Tua pen Matthai in mi sisa thokik bangin na genteh hi ci-in a khia mi kimkhat om hi. A piang takpi hi lo-in gentehna kampau (allegory) hi ci uh hi.

Nihna ah> Jesu sih leh thawhnkna tawh kisai-in tangthu phuahtawm tampi om a tua tangthu kiphuak tawmte Matthai in hong gelh(lut) kha hi ci-in hilhna om hi. Tua tangthu kiphuaktawm kimkhat i Lai Siangtho sungah hong lutna kimu thei kawikawi hi. ( 1Pet 3:18-22, Judah 1:9).


Theih ding => (Kamzalian in Laibu pan atei kik hi in, Zogamonline.com ah kikoih Cinpu Zomi in agawmtuah kik ahihi.)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

Item Reviewed: Hong nusia khinsa Rev. Go Khen Thang' ciamnuih kam, pil kammal leh article tuamtuam Laibu. Description: Rating: 5 Reviewed By: Cinpu Zomi
Scroll to Top