728x90 AdSpace

Hot
Menu
Zon-ol na Donate

Latest News

KAPTEEL KHUASAATNA TAANGTHU.

Kapteel khuasat na
Kapteel Khua

1. Thuamthawng in a zi’ tungah khutkhial kha: 
Gawhpau’ Tapa Thuamthawng in a behte khat zi-in la hi. Tua hun laitak- in a khua sung vuah nungak mel hoih mahmah Thangning a kici khat om hi. Tua Thangning pen Thuamthawng in iplah pian den hi. Tua bang a a iplah pian denna thu a zi in a theih ciangin zan khat a lupna tung vuah ki tawng uh a, a zi in apasal’ tuktum bawh khiatsak hi. Thuamthawng zong heh mahmah a, “Bang hangin ka tuktum hong bawh khatsak na hiam ka that ka mat, ka sim ka tawhna, galmang samang ka sim ka tawhna hi,” ci-in a lukham dokkhia-in a zi  alukhawm tawh a sat leh, alu sat kha ahih manin si hi. (Khanglui lai lukhuam pen meilah cim sitset zol hilhial a kisui a hi hi.) Tua banga azi hong thak khak ciangin, “E, khutkhialhi khong venge,” ci-in zanin tho khia a, a upatpih a meltheih teng samin azan azanin thu kikupna khat hong nei khawm uh hi.


A hih leh hih thu pen ih sungte in hong thei kha along uh kim hetlo ding uh ahih manin ngian khat ih bawl kul ding hi, ci-in hi bangin vaihawm uh hi. Vokno khat go-in khuanawl kenkilah a vok si taksak uh hi. Tua ciangin a sung a pu’ kiangah hih bangin gen uh a, “Tu zanin ka zi tawh kam ka kinial uh leh, ka ciah ding ci-in tai a, kei zong phallo a ka hih manin, delhin ka phak ciangin, ka lehkaih kik leh, utlo a hih manin hih kenah tuakin si hi.” ci-in a sungte khem hi.  Tua bang a cih hangin a sungte in zong umzo taktak lo uh hi. Amah zong kisuangtak a hih manin a sivui ni bangin zong Thuamthawng in atanaute’ kiangah, “Sihthau lawnte in na kam sung vuah thautang muam kawm un, ih sungte heh a hong kap leh ih thuh loh phamawh ding hi,” ci-in gensim hi. Amah zong ui misi sa nekin kisuang den a hih manin, a sungte tawh tutkhawp, khawlkhop nuam sa nawn lo-in, mun dangah ki hem nuam a hih manin, Falam Ukpipa’ tungah Saiha khat tawh, Khuangleng khua asim lai a sal ngaknu a mat nungak mel hoih mahmah Vansiing a kici tawh, Thau lawng 3, Dakbu 1, Khipi gui 3, Zangsial a nungta 2, leh Saiha 3 tawh Falam Ukpi Conbik’ kiangah 1847 kumin Kaptel gam na ngen hi.

2. Ih pute in Kumpi na do: 
Ih gensa mah bangin Kaptel khua pen Kum 1847 kumin Saizaang panin, Sukte-te Khanthuam’ tupa Thuamthawng in na sat hi. Tua zawh kum 9, 1883 kumin, Maangkaang kumpi in, Khuasak, Thuklai, Vangteh, Saizaang leh Thangkhal, honghal khit ciangin, Thangkhal khua panin Thangpi zuanin ciah kik uh hi. Kum 1884 kum a masa kidona pen Tulsuk No. 1.Stockde hi a, Tua khit ciangin Leisanah kikap leuleu hi. Bang hangin hi bangin ih pute in Kumpi na do uh hiam cih leh, Meite in Tedim gam hong simna sunga ih gensa om bangin pute in Meiteite’ tung panin Thau tawm khat hong ngah uh ciangin, papi te’n ki khuata muan, a cih mah bangun hong kimuang kha uh a, Tua thaute tawh Kumpi hong do sawm uh hi. Tua hun laitak pen Maangkaang kumpi’ hong uk hun laitak a hi hi. Tulsukah gamgi ki bawlin a khang siah teng Kumpi in hong uk a, asak siah teng Khamtung mite, ei leh ei hong ki uk sak hi. Ih pute in Thau tua zah peuh tawh hong kimuangin kumpi hong do sawm tak ciangin, Kumpi in galkap tampi hong kuanto sak a, 1885 kumin Thangdungah Camp hong bawl uh hi. Tua lai-ah Myo-ok khat hong koih to pah hi. Tedim mite in, Kawlpi pan a na nan uh, Phatzaang leh Aicik ciang kikal, Leisan mualdung tengah pangin na kap uh a, kum 2 sung na do zo uh hi. Tua hun laitakin Kamhau si khin hi.


Tua hun laitak in Sihzaang lamte mah na hancianin, Khuasak khua Boo Maangpum’ inn ga vaihawmna-in na zang uh hi. Tua ahih manin, Boo Maangpum’ inn pen Galphuakte’ inn ci-in tu dongin amin na mang nailo hi. Tua khit ciangin 1889 Febuary 4, ni-in Khuasak khua-ah Maangkaangte hong tung uh hi. 1889 March kha sungin Tedim khua hong hal uh hi.  1891 Febuary 11, ni-in Tedim pan kuankhia-in ni 12 ni-in Tonzaang tung uh a, ni 13, zingsang nai 4 hunin Tonzang umcih uh hi. Galkapte in akap gawl ban vuah, anuai a mi om teng manin, Tedim panin Kaleymyo lamah paipih suk uh a,  numei teng Kaleymyo panin ciah kik sakin, pasal teng teng Yangon lamah paipah suk uh hi. Apaipih suk uh mite in:-
  1. Hau Cinkhup   Kamhau Ukpipa          Tonzaang  Sukte
  2. Thang Khaw Hau                                Tonzang   Sukte
  3. Thang Sa Vung                                   Tonzaang  Hatzaw
  4. Gin Za Thang                                      Tonzaang  Hatzaw
  5. Niang Za Vung                                    Tonzaang  Hatzaw
  6. Vung Maang                                       Tonzaang  Hatzaw
  7. Dim Maang                                         Tonzaang  Hatzaw
  8. Zel Cing                                               Tonzaang  Hatzaw
  9. Ciin Huai                                             Tonzaang  Hatzaw
  10. Thang Gen                                          Tonzaang  Hatzaw
  11. Thang Luan  Akhe kaptan uh              Tonzaang  Hatlang

3. Maangkaangte tawh kiciamna bawl: 
Tua ciangin kum 1889 January 23 ni-in, Thangmualah hong om uh a, Tua lai-ah Phokla kici Maangkaang vuandok khat hong paito-in, Phokla zong Kaptel khua-ah va pai-in Thuamthawng tawh thu kikupna va nei khawm uh hi. Phokla in, “Thuamthawng aw, ko tawh vaihawm khawm ni in, nang pen gungal to-ah vai hawm lian penin hong om in, tu a kipanin kua mah a ki that a kiman om kei ni,” ci-in kilemna bawl uh hi. Tua ciangin Khamtung ngeina bangin thuciamna khat hong nei uh a:-

Gal nei sa nei ih om leh ki huh ni,
Gilkial dangtak ih om leh ki vak ni.
Thu nei la nei ih om leh ki huh ni,
Unau pata khat bang ni.
ci-in kiciamna nei uh hi. Tua ciangin Maangkaang Kumpite in, gungal langsiah ukpi dingin, Thuamthawng ciamteh uh hi. Tua zawh asawt lo-in, Maangkaangte in nasem a aneih uh, Mehthang kici Kawl mi khat Thuamthawng in kaplum hi. Hih thu Kumpi in a theih ciangin, Thuamthawng’ kiangah, “Thuamthawng aw bang hangin hih bangin gamta na hiam ci-in thusitna va nei uh a, Thuamthawng in, “Hihpa pen ki phasak lua mahmah a hih manin, ka sal ka ui hi ci a ka thah mah ahi hi,” a cih ciangin, Maangkaang te in, “Thuamthawng aw na gamtat hoih hetlo hi, mai lamah hih bangin na ta lai ding hiam?” ci-in dong kik a, Thuamthawng in, “topa aw, hoih salo takpi na hih leh, nidang  ciangin hih nawn peuh mah kei ning,” ci-in dawng hi. Tua ciangin, “Tu a na mawhna hong maisak lai ning in, nidang ciangin hih bangin gamta thei nawn lo ding hi teh,” ci hi. Tua ciangin Phokla in zong, “Kisik takpi na hih leh kiciamna thak khat na bawl nuam hiam ?” ci a adot kik ciangin, “Ut mah ing,” ci-in dawng a, kiciamna lianpi bawl dingin Tedimah hong pai uh hi.

“Tua ahih leh, bangci bangin kiciamna bawl leng ut na hiam? Ko, ngeina zang ding maw, Khamtung ngeina zang ding,?” ci-in dong a, “Khamtung ngeina zang leng ut ing,” ci a adawn ciangin, Khamtung ngeina om bangin, sagil tat a kiciamna nei dingin, hong kithawi uh hi. Khamtung ngeina om bangin Tedim khua Vansaang dimah sial khat hong paipih uh a, Phokla in a Pistol tawh tua sial a tal hong kap leh tuk pah hi. Tua banga thau neuno khat tawh sial khat a sihsak zawh lamdang sa mahmah uh hi. Tua ciangin a sialsa huanin a min ciangin asin la uh a, Khamtung ngeina om bangin taiteh kinilhin, a si lakah sialmei diahin, sialmei tawh ki vat uh hi. A masa a a kiciamna sa uh mah bangin sialmei tawh a kivat kawm vua phuisam a aki ciamna uh in hih bang a hi hi.

Tu akipanin luumsan teisan tawh kithat kiman nawnlo ding hi hang,
Simmi malmi’ ta, Maangkaang, Maangvom’ta, a ki that a kiman om
thei nawnlo ding hi hang, Tua bang a aki that, a kiman ih om leh,
Sasin muat, taiteh muatin muat ding hi hang, Ni hong kiat leh a kido,
tui hong to luan leh a kido hi pan bek ding hi hang”.
ci-in 1890 September 1, ni-in Kiciamna hong nei uh hi. Tua ahih manin, 1891 October 12, ni-in, “Khamtung gamah gal bei siang hi,” ci-in Yangon panin News sungah hong tangko khia uh hi. Tua khit akipan Kumpi in zong, Thuamthawng muangin a thu gen khempeuh um pah uh hi. Tua ciangin Kumpite in Thuamthawng gungal langsiah Ciaupi ka-ah, Bapi-ah, Lunglenah, Meitei gamgi dong a uk dingin Thuamthawng kikoih hi, cih thu midangte in a theih ciangun thuamthawng eng mahmah uh a, a haza mahmah zong pawlkhat na om uh hi.

4. Myo-ok Suamna: 
Khamtung Ukpi a hong om ding, mipil pawl khat in a theih ciangun haza mahmah uh a hih manin, Ukpi a ngah zawh a sawt lo-in Thangkai lam pan mipil thum Kaptel khua-ah va hawh uh a,  hi bangin thu va kuppih uh hi:-
“Pu Thuamthawng aw, tu’n ei. Kumpi tawh kilem khin khong ci leng, gal a bei ding hi ta a, na tapa Paudal in lah gal man nailo, Mi’ thah, mi’ mat gal et bek a om ding, nang’ Ukpi’ ta buang dingin kilawm sa na hiam? Tua a hih manin, na tapa in gal a mat theih nadingin vaihwm theih bangin vaihawm khawm leng hoih ding hi, ci a deihsakna tak tawh hong hawh hi ung. Tu-in Thangpi-ah Myo-okte om a, amaute tam hetlo-in tawm khat bek hi lel uh hi. Va pai-in va thatin a van teng uh va lak sak lel leng, Tedim gamah ei a ahau pen ih suah ding banah galman saman suak ding hi hang,” ci-in va zol thapai uh hi. Tua bangin azolzol uh hangin Thuamthawng in Kumpi tawh a kiciamna uh phawk gige a hih manin utlo hi.

Sau veipi a zolzol khit uh ciangin, a zolte siam lua mahmah uh a hih manin,  hong ut dektak hi. Nisimin zu lehsa  tawh zol den uh a, a tawpna-ah a zi Thangning zong hong thukim hi. Numei in zawh lah neilo ih cih mah bangin, Thuamthawng in zong Kumpi tawh a kiciamna uh mangngilh kha-in, atawpna-ah a nupa-un hong thukim uh hi.

Tua bangin a nupa-un hong thukim uh ciangin, A zolte in zong, ih ngimna tangtung ding hi ci-in tha ngah mahmah uh a, “A hih leh va mawk kuan peuh mah kei ni in, Ih pu ih pate in na khat peuhpeuh a hih ding ciangun, mang ai mah na san khol tangtang uh a hih manun, tu zan ih mang ai san phot dih ni in, ih mang a hoih leh va kuan bek ni, mang hoih ih mat kei leh khawlkik mai ni,” ci-in hong lum uh hi. A zingsang ciangin hong tho uh a, “Tu zan bang mang man nei vua leh, namang uh a hoih na? Ih kuan ngam dia,?” ci-in ki dong uh hi. Khatpa in, “Ke’n mang khat mang khat man takpi ing, khia dih un, Tu zan kamangin, Thangmualpi panin zaangva honpi hong lengto-in, Kaptel khuakhung ciangpi a khup ding ciangin musan hon khat in leh nawh sukkikin mual khum uh hi.” Ci-in a gen ciangin, “Tua bang a hih leh ih ngimna tangtung thei kha ding hi,” ci-in a lawmte’ phuahtawm a hih lamtak theilo-in Thuamthawngte nupa in zong tha hong ngah mahmah uh hi. Tua ciangin a zolte zong ih ngimna tang tung  thei kha ding hi, ci-in tha ngah takin ciah pah vingveng uh hi. Tua ciangin Myo-okpa in bang deih hiam ci-in kansim phot uh a, Saha ka khat deih pen hi cih a thei uh ciangin, Kaptel khua a om Thuamthawng in Sahaka khat nei-in Myo-ok pa pia nuam ing hong hawh hen, ci-in gen sak uh  hi. Myo-ok pa zong gam sung en kawm ding leh Saiha la dingin a galkap 30 tawh Kaptel lam zuan dingin hong kithawi uh hi. Tua bang a apai khiat ma-un Myo-ok pa a zol ding a aki seh, Thuamgo tawh hi bangin thu hong kipia sim uh hi.

Thuklai lam hong tawn unla, Ko Nal mualah napang nung, lampi pen sawl them khat tawh na khak ningniang nung in, tua mun nong tun ciangun tha khatin na mai lam manawhin tai vingveng in,” ci-in thu kipia sim uh hi. Tua ciangin, Thuamthawng, Paudal, Kaituah, Hangthual, Ginthang leh gal hang akisa pasal cingteng 145 tawh va kuanin khuasak khua-ah salam hong en masa uh hi. Thuamthawngte Kaptel panin hong kuan ma-un Kaptel khua-ah sa hong go masa phot uh hi. Myo-okpa zong a galkapte tawh Kaptel lamah zin dingin hong paikhia takpi a, akiciamna ,mun uh hong tun uh ciangin Thuamgo in thautang kuangkhat a puak, a nung lamah khia vat-in tai a, Myo-okpa sakol tung a tuang Thuamthawng in hong kap khia pah lianin, a dangte in zong galkapte nakap pah uh hi. galkap 30 lak panin 10 si pahin 7 liam a, Thuamthawng in Myo-okpa akap khit ciangin Kaituah in Myo-okpa’ lu tannin khat kap lum leuleu a, a thau gel la-in singphung khat bel hi. Galkap hinglaite a kap leh alawmte in a thau na selsimsak sawnsawn a hih manin, pawl khat tai uh a, avekin that khin zolo uh hi. Tua Myo-ok suamna-ah Kaituah in gal 3 that in thau a lak sak tawh kisai-in la khat na phuak hi:-

(a) Ka do khuai bang hang lawmlawm e, ka ngial manin ka tawi lentualah khia’nge,
(b)   Tun aw suihlung na zuang lo aw, namtem ka tawi ka thah lentualah sua’nge, na ci hi.

Bang hangin Kaituah in, hih bangin la na phuak hiam cih leh, galsim dingin hongpai ma-un, hih bangin kiciamna bawl masa uh hi. “Thuamthawng in Myo-okpa hong kap phot ding a, tua khit a om laite in lawng khat tekin ih kap khit phetin, ih namsau ciat dokin thatlum khin ding hi hang, Ih luang kipham ngamlo a ataimang ih om leh, ih zite’ nik kitengsak ni,” ci-in kiciam uh hi. Tua bang hinapi Kaituah lobuang in, namsau tawh a delh ngam omlo uh hi. Kaituah in ama thau zat kimlai lei lakah khia-in, a namsau dokin gal 3 va that hi. Tua ciangin galkapte’ thau lawng 2 laksakin, ama thau a va kankik leh alawmte in na guksak sawnsawn uh ahih manin a thau mukik zo nawnlo hi. Ih zite’ nik kiteng sak ding ci a akiciam uh hangin kimu kik nawnlo uh hi. Zu leh sa a nek lai-un kei a hang pen hi ning, a cih tek uh hangin, a taktakin Kaituah bek in a kiciamna uh a atangtungsak zo suak hi.

5. Myo-ok suam teng Kumpi’n man: 
Myo-ok suam zawh a kumkik 1893 January 10 ni-in, Maangkaang galkap Muslim galkapte Kaptel sim dingin hong kuanto uh hi. Gun pen ki ngap zo nailo a hih manin, Sihzaangte’ gam Kuivum kici mual dawnah giahphual satin guntui la tawh pua uh hi. Saizaang gam leh Phaileeng gama om guate, phongin bawl uh a, tua ciangin Kaptel hong galkah zo uh hi. Hih thu Kaptel in a zak ciangin, natai kek uh a, Galkapte in a khua uh hong ten den pah uh hi. Galkap maangpa in, “ Thuamthawng aw, hong ki-ap lel in hong that hong manlo ding hi ung, nongki-ap nop kei leh, na omomna hong delhin kong sulzuih ding uh a, kong bawl theih bangin hong bawl ding uh hi,”ci-in zol uh hi. Kaptel pawl khatte in gal gukin mun tuamtuamah a thah uh hangin, thusim lo-in Thuamthawngte pata mat ding tum cinten uh hi.


Gam sungah kha 10 sung bang ding hong om khit uh ciangin, inn a om a sanggamte in,  “Hong ciah mai un, Kumpi zong a hehna dam ta buang ding a hih manin, zu leh sa zong nuamtakin ki ne theilo hi.”Ci-in sam uh hi. Tua ciangin amau zong ciah pahin khua atun uh ciangin gal ai-in sa ai-in a om laitakun, amau a haza pawlte in, Kumpite’ kiangah va puak pah vingveng uh a, “Tu-in man nuam a na zonzonte uh khua-ah hong ciah kikin zu leh sa ne-in nuam takin om uh hi. Na mat nop vua leh hong pai ta un,” ci-in va hilh sim uh hi. Tua ciangin Kumpite zong paipah vingvengin, 1893 October kha-in Thuamthawng, Paudal, Kaituah, Benate manin Kawl lamah ciah pih suk pah uh hi. Paudal zong amat taktak hilo napi a nu in, “Paudal, nang, napa’ sihna mun ding thei kei lawmlawm lecin zi zong nei ngam ding na hiam?” a cih ciangin a zui a hi hi. Khuasak khua Khaikam zong Kumpi in ummawh a hih manin, a khua sung vuah om ngam lo-in, a khua panin taikhia a, Sialthawtawte’ khawtaw Voktaang sak suang ken kawl in a umcihna munah bu-in tu dongin Khaikam an huanna thuk zong om lai, kici hi. Amah pen galhang khat ahi hi. Tua khit ciangin Kumpite in hong uk paisuak hi.

Kawlpi a tun suk uh ciangin, a gal thatte’ zite in a velh theih nadingun Kumpi’ tungah ngen uh a, Kumpite in pia lo uh hi. Phim beek tawh hong dawtsak un ci-in ngen teitei uh a, tua ciangin phim tawh dawt khuan pia uh hi. Nupite zong heh thei mahmah a hih manun phim tawh dawt cihtakin dawt gawp uh hi. Amau zong nasa-in a kol uh tawh kitom uh a, “Hong hi cih bawl kei un, na paalte uh khenzu, khensa a ka nek ding uh,” ci-in hanla sa-in min sial uh hi. Tua bang a akampaute uh Kumpi in a theih ciangin Mawlaih-ah puak suk leuleu uh hi.


6. Thuamthawngte pata’ sihna: 
Kaituah kum 6 sung Thongah a om khit ciangin hong ciahto kik a, Kaituah’ genna-ah:-
“Hong paipih suk vingvengin Adaman tuikulhah hongpuak uh hi. Tua mun pen khua khat hi a, zi nei nuamte in zong nei thei uh hi. Thuamthawngte pata a ci uh hong na-in Uisa duh ung a cih uh ciangin, gawh sakin tua uisa ne khial hi ding uh hiam, gilsan vei-in hong si uh hi.” ci-in gen hi. Tua ahih manin Thuamthawng in, ta, Dotual, Paumaang, Cinmaang, leh tanumei Ngul Khawhau, Hehcing, leh a zi Thangning nusia-in si hi. Tua bangin Thuamthawngte pata hong sih uh ciangin, Kaituah in, “Kumpi tawh tuisia ne a kiciamna om hi ven maw, en ih thuciamna palsat ih hih manin ih si mah kei diam,” ci-in hi bangin la na phuak hi.
(a) Lunmaang tawh tongciam hang aw e, damtui luang tong ciam hang e,
(b) Damtui luang tong ciam hang aw e, sun ni tualkiat ciam hange,
(a) Gil bawhal tuam a khum bang, dotan tuam a khum aw e,
(b) Pupa’ theihloh thangvan siakah zangpeh sik henkol khai inge,

Thong sungah hih la gel phuakin, kum 7 degree kipia hinapi, Thuamthawngte pata hong sih uh ciangin, kum 1 dawhsakin, kum 6 sung thongah khum uh hi.

Thong sung panin amah bek suakta a hong ciah toh ciangin, Thuamthawng’ sanggamte hehin thangpai uh a, Kaptel khua-ah a ten theih loh nadingin vaihawm uh hi. Kaituah a khemna-in, “Ma Gal Kaituah’ lo zaang Panghawk zaangah teng ni,” ci-in vaihawm khem uh a, Kaituah zong a khuapihte’ khemna theilo-in, Ei’ mun ei’ gamah tua bangin mi teng ding a hih leh en, ahoih na mun pen beek tel leng hoihlo ding a hiam, ci-in inn mun zik pahin azawh ciangin a inn kituah hi. A inn alam khit dikdek ciangin a khuapihte in tai nawn dah ni, ci-in khawl kik uh hi. Tua banga a khawl ciangun akhuapihte in amah a hawlkhiat nopna ahih lam thei a, thangpai mahmah a hih manin, a tu a ta, a sung apu, aphung anamte tawh ki nilkhia hithetin, 1909 kumin, ZAMPI khua hong sat hi.

Source : 
Sukte Khang Tangthu
Cimnuai Magazine. 1964-No.17 (Ngullang’ genna)
Pu. Phaiza khua Pu. Khualsuan, Pa. Khai Khanthang’ genna pan kila hi.
Collection by Rev Thang Siam Lian

**************************************************************

KAPTEEL KHUASAATNA TAANGTHU.


Khuamin leh khuamun.



1867-kumin Pu Thuam Thawng in mi-30 tawh Kapteel khua saat hi. Tua munah Kapteel a kici mikhat teeng khin hi. Tua ahih ciangin " Kapteel khua cipah ni," ci-in thukim uh hi. Khuathak saat ding pen Pu Thual Tun in awilo ahihciangin, lakhat tawh Pu Thuam Thawng nakha hi.



a. Limbelh in mabang pan e vangkhua khon e, Saitui vangkhua lailen ding ka-awilo e.
b. Ningzu aisa siah bang niang naphung lai-ah solsa deihluat hawm ih taan kha ding hi e..



Pu Thuam Thawng lungkimzo tuanlo ahihmanin gungaal nitumnalam veel sak hi. "Mual in um aa gaaldai hoih hi. A gam zong sabenna dingin hoih hi" acih ciangin Pu Thuam Thawng thukimin gamsaat uh hi.



Kapteel pen Dawi maw, mihing maw???



Hihmun aa teengpa in, "Kapteel hing," ci-in, hualsing golpipi hualvanvan hi, ci-in kigen hi. Kapteel in lovaat thacial a, a nu kiangah, " Taangngaan beelsagih nahuan inla, zu beelsagih naluup in, " ci hi. A ciah ciangin amahguakin hong tungaa, " nalawmte ee" acih ciangin, " kacih bangin ankuang sagih leh meh kuangsagih lui in," acih ciangin tua bangin hih hi. Annete a kimuhloh hangin an kinegai hi. Kapteel in Pawlhpii a kici gamkuampi khat nikhat sungin zomai lel hi.



Kapteel sihna.



Tua laitakin Suangpheigam kiiltungzaang khat om hi. Bualtung kici hi. Tua laiah minam tuamkhat teeng hi. Kulh tawh ki-um ahih ciangin kuamah a simzo omlo hi. Kapteel a kicipa in, " ken simzo ning" ci-in a sim dingin kuan hi. Kulhpua panin a ngiim bek zong, laulua in puukzaizai hi, ci uh hi. Mitampi a thah khit ciangin, kulhsung aate luhkhia dingin, zusa-in kibawl a, kulhvangah lut hi. Kulhvangah a lut ciangin vaithaangah awkin si hi. Hilai-ah Kapteel a kicipa taangthu bei hi. Amah pen Dawilawmnei bek hilo-in dawi hidingin ki um hi. Bang hang hiam cihleh mihing kimlai zusa suak thei ahihmanin.



Taanglai-in taangthu tuamtuamte ah Dawinumei a tenpih zong om hi, ci-in kigen hi. Piangthei takpi ding hi. Taangngaan beelsagih leh zu beelsagih gai hi. Nikhat sungin Pawlhpii gamkuam khat vaatzo hi. HUalsing luangte adeihdeihin hualzo hi. Leitung aa mihaatpente kicial leh zong mi-10 inzong taangngaan beelkhat gaizo nailo kha ding hi.



Kapteelgam kingahna.



Kapteelgam pen Falam khua Pu Con Bik gam ahi hi. Pu Con Bik kiangah siah kipia peuhleh khua kisaat thei ci ahih ciangin, Taangpuate Pu En Ngaih in Suangzaang Hausapa, Gualnamte ahi, Pu Zil KIl kamphenin la a, gamngen dingin pai uh hi. Pu Con Bik in sial 120 nangen hi. Behiangkum simin sial zabo khatta siah piak dingin thukim uh hi.



Tua laitakin Pu Thuam Thawng in Khuangleeng Hausapa tanu sal-a amat Vanchingi a keplaitak ahi hi. Khuangleeng Hausapa in hihthu a theih ciangin Pu Con Bik kiang napai a, " hong matsak katanu Vanchingi nakal hamtang in," ci hi. Kapteelgam leina lakah Vanchingi kipiakhia hi. Vanchingi pen sial-100 taangin sang a, hih a nuai aa teng pen sial-20 tangin saang hi.



Sial-100 ... ... ... ... VanChingi.
Sial-20 ... ... ... ... Saiha kopkhat.
Zangsial suan sialkhat.
Thau lawngkhat.
Zam khat leh daakbukhat.
Sialkhat.



Kapteelgam dingaa kipia.



Nisuahna lamah meiteigun dung.
* Saklamah Musil mualdung.
* Nutumna lamah Innbuuk leh Lennupa.
* Khanglamah Lualui paisuk gunsun dongin napia hi.



A ciah ciangin Sialtei khat leh Thallupdak kici daktal khat puasak hi. Launa naneih uleh patauko nadingin daktal tum un, ci-in vaikhak hi.



Vanchingi a ngahna.



Saizaang ah Pu Thuam Thawng a khanlaitakin a salkhawi Vaipheite taisuah a, Khuangleeng dongin vakan hi. " Thuam Thawng aw, nasaltaai kan aa nong pai namaizum lo hiam? Khuasilgam Leisante Hau Pum kathah nathei hiam, " cihleh minsialin kogawp hi. " Tuate nathah takpi mah hiam" acih ciangin, " that mah ingh." cikik hi.



Tua khit ciangin, Pu Thuam Thawng in, " Hing kha kabeisak diam? Dai veel un," ci-in sawl hi. Daiveelte hong ciah ciangin galsim dingin kuankik uh hi. Hausapa tanu Vanchingi man a, hong ciah uh hi.



Pu Con Bik tungah sutpom.



Kapteel lungnuam mahmah aa omlaitakin kilemlohna hong piang a, mikhat in gaal vala hi. Tua laitakin Kapteel khua-ah kulhpi thum om hi. Khuamun sungah Haat Langte Pu Gen Sut kulh, khualai-ah Sukte Pu Thuam Thawng kulh, a niamlah Gualnamte Pu Vum Khup kulh kici hi. Khualulam Sihsiipveeng phei teng ah Vaipheeite inn-60 teeng hi. Hualngo-gaal ci-in hong sim a, mi-59 si hi. Tampi hingmat uh hi. Gaal lapa in innpi saksiah bek simin sawl hi. Tua mah bangin innpi saksiah bek sim uh hi. 



Tua gaallapa taangthu hibang ahi hi. Logam ciing-3 deih a, Pu Thuam Thawng in tanzo kei niteh, Gen Suut in tan hen, a cih ciangin Gen Suut in tan hi. Tua teng lungkim lo-in galla ahi hi. Hausa upa theihloh-in zankhatthu in nataimang uh hi. Hibangin gaallauna hong tam ciangin, Pu Thuam Thawng in Suutpom dingin, Songpuutte Pu Neek Lut leh Kamphen dingin Simzaangkhua Kip Thuam te Pu Con Bik kiangah paisak hi. A paite-nih tungah Pu Con Bik in thupha tampi napia hi.



Amaute hong ciahkik ciangin Kapteel khua hong simlai a, a hingmat a sanggamte uh Seipi khua ah om ahihmanin, Seipi hong baang uh hi. Seipi Hausapa Dal Chung Nung in natawng gawp a, " ih gaalte hong pai hi," ci-in man a, taangcilciangin khuh uh a, a tungah aakngawngsi taakhin a zun uh peekin khum uh hi. Seipi pan hong ciah u ciangin, amau inn tunglo-in Pu Thuam Thawng inn tungmasa hi. A thu khempeuh a gen ciangin Pu Thuam Thawng in aakluisan khattawh lingaat hi.



Seipi ah bumtuak ahih ciangin Pu Gim Thang lungkimlo-in sialzabo khattawh sialsung-aih sak a, hinglapna bawl uh hi. A hinglapni taangsuah nitaak ciangin , bikhalaap a suah phetin lakhat tawh hong pusuak hi.



a. Mun-inn ngaihman sawnte ngaihman dota kankong hong ing e.
b. Ningzu aisa buan bang niang e, lawhciang khuklu in nei ing e, hente sang lah thang zawng e.



Sutpom hong tunzawh kha-7 a cin ciangin Pu Neek Lut si hi. Sutpom dingaa a sawllai-in, " na sihleh sialpi khat tawh hong gui ning," ci-in kamciam pia hi. Sialpi sangin Taamcip leitang deihzaw ahih ciangin, tudongmah in a taten neilai uh hi.



Myo-uk suam.



Kapteel khua pen 1867 kumin kisaat hi. 1880 kumin Mang Cin tapa Am Thang in Nuamkhua saat hi. Tu-in Muizawl kici hi. Pu Thuam Thawng sanggamnu Zaang Ciin zong Muizawl ah teeng hi. 1888 kumin mikaangte hong khang a, Tulsuk panin Phatzaang hong nawkto-in Leisan ah Thaang ah kido uh hi. January 23, 1889 kumin Gen. Founce leh Major Raikes makai a, galkap honkhat tawh Thuamvum ah giahphual saat uh hi. Tua kum February kha ni-4 ni-in Khuasak la hi. Ni-13 ni ciangin Buanman, Thuklai, Saizaang la a, Meiteigun nisuahna lam khempeuh Mikaangte khutsung tung khin hi.



Meitei gungal nitumnalam nawt dingin kipan uh hi. Tuahun in Khamtunggam ah inn-100 a pha khua tawm mahmah lai hi. Kapteel khua inn-300 mpha khin hi. Kulpi zong thum om hi. Mikaang kumpite pen Kapteel innpipa Pu Thuam Thawng tawh kilemna bawlin sialmei-in kivaat uh hi. Thukimna kamciam bawl ahi hi. Kapteel ah Mikaangten zumphut dingaa Pu Thuam Thawng in a ngeina bangin siahkai dingin thukim uh hi.



Pu Thuam Thawng zi pen Sihzangmi Khua Vung ahi hi. Tanih aneih khit ciangin Thang Ning in heek hi. Khua Vung in atheih ciangin hehlua a, a tanihte tawh kentuakin kisihbawl uh hi. Hihthu tawh kisai Sihzangte in nasa mahmah uh hi.



Gungal Kapteel khua ah Myo-ukzum koih ding cihthu leh Pu Thuam Thawng in siahkai ding cihthu, mikaang kumpi tawh kithukimna a zak ciangin Sihzanglamte patau uh hi. Tua bang hi thong leh Kapteel kizo nawnlo ding hi, ci-in hih geelna buaisak ding ngaihsun uh hi. Tua laitakin kamphenpa pen Sihzangte Khai am ahi hi.



Mikaang kumpite leh Pu Thuam Thawng sutuah dingin kamphenpa vapai hi. " Kumpite in nang lianpen ding hong cihpen hong khemna ahi hi, um ken" ci hi. Nangzaa suankhia dinga Myo-uk hong koih ding hizaw hi. Nata Pau Dal in gaal mannailo hilo hiam, lampi ah nasuaam lecin galman hipah ding hiteh," ci hi. " Pu Thuam Thawng in, " Mikaang kumpi tawh kiciamna nei khinzo ing," ci-in nial hi. Thang Niing in kamphenpa thugen um mahmah a, " Pau Dal gaalmat nang hihthulo a dang om kei, " ci-in a pasal nakpi-in tawsawn hi. A zi'n phuphu ahihmanin a sawt ciangin lungkimlo pipi-in mang hi. Pu Thuam Thawng a kuan khiatni zingsangin, Thang Niing in aniik ciangdawnah pei a, " Na Pu uh gaalsim dingin kuankhia hi,a zui ngamlo ten kaniik teng un," ci-in kiko hi.



Pu Thuam Thawng a zawh khit ciangin kamphenpa Kawlpi zumah taisuk a, Myo-ukpa kiangah, " Thuam Thawng in saiha leh cinghpi kingo hong pia nuam hi, hong lahen," ci hi, acih ciangin, Myo-ukpa lungdam mahmah a, lungdam thuhna dingin dangka Ks 3000/- puato pah hi.



October8, 1892 ni-in Myo-uk dingin Rakhine te U Tun Win paisak hi. Kamphen dingin Aung Kyi leh nungzui-28 hong tonpih hi. Sihzaang Khup Pau leh a tapa Khai Kam in Myo-ukpa sakolkhau kaihsak a, hong mapi uh hi. Pu Thuam Thawng leh a tapa Pau Dal leh Kapteel pan pasal thahaat teng tawh Thuklai leh Pumva kikaal Suangvum or Naalmual ah napang uh hi. A kiciamnamun a tun ciangin Khai Kam in dangka-kuang khelin aman pua a, " Kanungsiah teng vawt ta vo," ci-in dangka kuang tawh taai hi. Pau Dal in Myo-ukpa kaptuukin a nagawngtan pah hi.



Mikaang kumpite hongpai a, Kapteel khua haal hi. Pu Thuam Thawng te pata manin thong ah khum uh hi. 1893 kumin Pu Thuam Thawng si hi. 1894 kumin a tapa Pau Dal sileuleu hi. Kawl kumpite maivilna dingin mikaaang kado ci-in taangthu tuamtuam tampi a kigelh hangin mikaang kumpi ngawng tanngam pen Khamtungah Pu Thuam Thawngte pata bek om hi. Khai Kamte pata in dangkabawm tuah uh a, mikaang dolo uh hi. Hampha bilbel suak hi. Pu Thuam Thawng in laphuak a,



a. Thahtheih kathah thahmawh kathah thahminthang bel kei hing e.
b. Tuanglam lai-ah a lian bel zong taang in siam bang meet ing e..



Khamtung khuasaat dan leh thupiang tuamtuam sut leng a zaknop tampi omlai ding hi. Kei ciamtehna bangin kicinglopi-in hiteng hong suaksak kahi hi.




Thangsiangh. zogampalpi@yahoo.com

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KAPTEEL KHUASAATNA TAANGTHU. Description: Rating: 5 Reviewed By: Cinpu Zomi
Scroll to Top