728x90 AdSpace

Hot
Menu
Zon-ol na Donate

Latest News

KHUANO MITE TANGTHU (A-tom in). A gelh - Ngin Khaw Mang

KHUANO MITE TANGTHU (A-tom in) 
A gelh - Ngin Khaw Mang

I pu ipa te in lai nanei nailo uh a hihman  in gensawnsawnna leh la tawh thu nana ciam teh uh hi. Ciim nuai (about 1450-1500) thu na ngawn zawng lai nana nei lo uh ahihman ciapteh na kician tak omlo hi.Manam dangte tangthu sungpan in kikaikhawm tawm ahihi.Hun khat lai in tangthu, thupi ki sa lo a, tu in lah tangthu thei teng in hong sih san khinta hi.Tangthu i cih pen athak omlo a,a ki theihbeh bek a hihi. Thu khat pe-peuh pen manhi icih theih nadingin atetti ilah theih ding thupi hi.Khanglui mi te in a tang thu uh lapi in nana kai-in naciam teh uh ahihman tangthu itheih na dingin tang lai lapi tampi itheih ikan kul hi.I zak itheih thu khat pepeuh tangthu kipin san huai lo hi. Tangthu kituha buai tam mahmah hi. Khinkhai siamding kisam hi. Up mawh thuleh deihbawl thupen tangthu hilo hi.Kei theih manpen hi zawng cihngam huai lohi.

Khuano mite tawh kisai tangthu a kigelhna laibu omlo phial hi. 1954 kum a Capt:Zel Khai gelh Zongeina bu pen Khuano mite tawh kisai laibu (book form) a ki nei masa pen ahih ka-um hi. Tuhun ciang in amau lamah alek dinga kideih kaih tangthutam hi. Ngeina thudawibanga-a ngaihsun phial,mipil pawlkhatte in adeihna san  uh la-in thupi a sakloh tenguh nusia in tangthu gelh uhhi. Tangthu i cihpen eideih-leh deih loh, hoih isak leh hoih isak loh tawh kisai lo in sia taleh  pha taleh apiang  khempeuh tang thu hi. A hoihlote zatloh ding hi. Khuano mite tangthu ciaptehna laibu gelh huai sa ing.

Khuano mi  min hongpian khiatna tawh kisai in genna tampi omhi. Khuano mi cihpen tungtuanna kiphatsak nading ahih lohhang heh nading kisimmawh nading zawng   hi tuanlo hi. Khuano mi min hong pian khiatna tawh kisai anuai abangin kigen hi.

1. Mualbem khua ah Sukte Pu Khan Thuam a khanlai in Dakdung khua khungpan in nitak in khuadak hi.Hua meitang lieiluai nakhuano te ah zawng vapai unla siah va khawn un ci a-a sawl napan in Khuanomi min hongpiang khia hi ci-a,aciam teh om hi.

2. Sihzang te in neu pen no cihi.Khuaneu cih pen amaupau in khuano ci hi.Tua pan in Khuanomi cih hong piangkhia hi ci-in aciam teh zawngom hi.Kaneu lai in Thuklai te in sanggam khuanomi te hongci lo-in "zinsaangte" hongci se hi.

3. Ciimnuai khuapan in Sasih kisat hi.Tua khuapen inn 7 bek pha in khangtheilo uh hi. Tua ahihman khuano kici hi.Tuakhua ateng mite khuano mi kici hi ci-in a ciamteh  zawng omhi. Sasih panin Bellei khua kisat in,Bellei panin Phunom khua kisat hi.


4. Zogam ah Pasian thu-um mi hongtam semsem hi. Sia Mang Kam in Phunom, Thangnuai, Zung, Suangpi, Dimlo, Dimpi, Laibung, Vangteh khua-a om,thu-um miteng gawmin 1934 kum February (16) ni-in Khuasak Tuiphum Pawlpi pan Khuano Tuiphum Pawlpi (Khuano Baptist Churches.KBC) ci-in,inn natuan pihhi. Tuapan in khuanomi min hongpiang khiahi ci-in aciam teh om hi. Khuano mi minpen banghun lian in hong piang khia hiam cih kikan zonawn  lohi.Nidang pekin na-om khin zawng hi thei hi.Hih pen khuanomi cih officialy a kiciaptehna masa penhi in ka um hi. Tua ahihman 1934 kum ma in khuano mi cih omkhin ahihman KBC min ana ki phuak thei na hihi.

Carey leh Tuck gelh The Chin Hills vol. 1&II (1892-1910) sungah Khuano micih min kidawk nailo mahhi. Tu laitaka khuano mi kicite leh khuano khua kici te, Saizangmi, Teizang mite Sukte mi Sukte khua ci-in naciam tehhi. Tua hun lai-in tuna khuanomi kici te leh khuano khuate in Sukte leh Sihzang tungah siahtung siahphei napuak uh a hih man hi. Khuanomi cihpen ipu ipa te in deih a-ana phuak uh sangin mite in hong sapna hileh ki lawmzaw hi.Zankhat thu in gamkhat kiphutlo a,nikhat thu in minam khatpiang theilo hi.Tuma kum 120 ma-a piangte in khuanomi cih theilo khathei mahdinghi. Tei zangmi, Saizangmi cih minte tawh apianhun kikhan gual in ka um hi.

Mite in banghongci?
1. Mualpi khua tangthu thei Pu Thang Tuan in tulai taka khuano mi kici tepen Kalzangmi ki cileh manzaw dinghi cihi.

2. Phunom thukhen mangpi Pu Khual Cin Kang in tulai tak a khuanomi ki ci te pen Phunom mi ki cileh man zaw ding hi ci hi.

3. Rev Thang Kam in khuanomi cihpen minhoih, mindeih huailua hikei hongci ngeihi.

Khuano mi cih tawh kisai
Khuano ciha khiat napen inntam lo, inntawm, khuapi hilo cihna hipen hi. Tuma Kum 100 kim lai in pen khuakhat ah inn 100 apha tamlua lo dinghi.Khuakhat ah inn atawm te cih na hilel a bangmah ahoih lohna om kasa hetkei hi.Tua ciangin  khuano mi cihciang  bangmahthei lo ding,hai ding,zawng ding, mite sawl tak in omding mite nung zui in omding, namneute cih nahi peuhmah lohi.Minam dangte in bangmah theilo dina hong ngaihsut uhpen minam level dinmun atelloh man uhhi a eilehei-i kiniam koih iki neu ngiahsut denpen eima khialhna hi.Sihzang ,Saizang, Teizang cih tetawh adinmun kikim hi. Khuano mi cih minngaih kasa zaw laihi. Maizum ding hipeuh mahlo hi. Adeih huai lohna ,asiatna zawngom kasa hetkei hi.

Bang hangin Kalzangmi or Phunom  mi kici hiam?
Kalzang khua leh Phunom khua,a kisat kum aki batlian loh hangin ,akhan aliat hun uh a kibang ahihna khuathang lapan in ki theithei hi.Khuathang cihpen munzang cihtawh a kibang hi a, Kalzang khua a cihnop nahi.Khuathang lasung ah...

(a)Khuathang lia nu ciambanga paa-a,zawlteng ngaia lawibang a thange.

(b)Phuntui lianu liim banga bawia,honsing sia-a, lawi banga thang e.

Tulai taka khuano mite tenna khuate a tamzaw A.D. 1800-1900 kim a ki sat tampen hi. Khuapawl khat te a ki satna a sawt mahmah om hi. A hihhang in kiteng suaklo  bek thamlo in minam dangte sat zawng omhi.Nihvei thumvei akiten kikna, a teng minam te kikhel in tap kiluak kik zelna khua zawngom hi.Kalzang ah suante khang 9 pauhi kici hi.Kalzang khua pen A.D 1870  kim in kinu siasiang hi ki-cihi. Phunom khuapen A.D.1500 kim pawl in kisat hi ki-ci hi. Kalzang khua kisia in ki nusia a Phunom khua pen Pasian kepna hangin tuni ciang meimit lo-in kipsuaklaihi.Phunom khuamin masa pen Hiangzang kici a hih man pute pate ana ki min lawh uh ciang in Hiangzang ami ci- in naki minlawh uha tuni dong ciangin Phunom mi peuhmah Hiang- zang ami ci-in ki minlawh laihi.Khuano mite tangkhuapi aki ngaihsunpen Phunom khua leh Kalzang khua hipi pen ahihman Phunom mi or Kalzang mi a kici a hihi.

Nidangin Kalzang khua leh Phunom khua ah bangbeh teng nateng ngei hiam? Suante gimnam peuhmah Kalzang pan pianghi cileng tampi khialin kaki um kei hi.Naulak behpen Phunom naulak leh Dim naulak ci in khen 2 in kikhen hi.Tulai taka Khuano mi nualaktepen Phunom naulak tehi. Haunungbeh penPhunom haunung leh Lingngo haunung ci in kikhen hi. Hih Phunom haunung leh lingngo haunung te pen a 2 in hunkhat ciangin Phunom khua ah tengkhawm kik uh ahihman tualai taka Khuanomi sunga haunung te,hihte a hihi. Phunom khuapen haunung khuasat ci leng zawng ki khial  lo dinghi.Phunom khuasat pen Haunung,Buansing,Manghil(suante), Zo(Suanzo) behte na hi uhhi. Tulai tak in hih atunga te banah Suante,Namzo,Tomu, Naulak behte . . etc.teng uhhi. Buansing leh Zote inhong taisan khitna uhpen mikang kumpi hongkhan mahi khin hi. Nidangin Kalzang khua aphat lai in Khupmu, Suante, Tomu, Suangzawng, Suanman, Suanphut, Luahlang, Manghil, Buansing, Suankhup, Phaipi, Thawmte, Samte, Hatzaw, Hat langh   behte leh akhua asiat kuancing inNaulak behte tenghi ki ci hi.

Khuano mite koi ah teng

Khuano mite khuapen Phunom,Thangnuai, Zung, Suangpi, Laibung, Tuisau, Tuivial, Vando, Pimpih, Tampi, Ngalzang, Nalzang suangpi, Phaileng, Cingpikot, Lunmual, Mual lum, Sozang, Philnak , Tuilang, leh Tonzang gamah Khuabem leh Tuikhiang khua te a  hihi. Khuano mite tenna khua pen Tedim gam ah Tedim, Dimlo, Sezang, Tuicinlui, Singlei Ngalbual, New Suangpi, Dolluang. Thangsan, Tanzang, Zozang, Suahlim,...etc.te hi in  Tonzang gam ah Tonzang, Tuimang, Talek, Luangel...ect..khuate ah zawng khauno mi te teng hi. Kawlpi,Tamu leh agamsung khuaneu te Falam, Haka, Mandalay, Yangon leh kawlgam sung mun tuamtuam, India gamah Mizoram state, Manipur state leh mun dangdangah Malaysia, Austaria, U.S.A, Norway,..etc.,leh leitung mun tuam tuam ah Pasian thupha hangin khuano mite kizel in kitenghi.

Khuano mite khuate koipan kisat.

Khuano mite kipat khiatna,piankhiatna khuapilui khat ahi Kalzang khuapen Cimnuai  khuapan in Vangteh Botung,Vangteh Botung,Phiapi,panin Kalzang kisat hi. Phunom khua min masa Hiangzang khuapen Cimnuai panin Sasih khua, Sasih panin Beellei khua pana ki sat hi. Kalzang khua asiat kuan ciang Zungkhua, Khuangen khua (Phunom gam sung) Taakzang khuate ki sat hi. Kal-zang khua asiat kuan ciangin, pawlkhat in Vangteh Botung zuan kik uhhi. Kalzang panin leh Khuangen khua kigawm panin Suangpi khua kisat hi. Phunom leh Zungkhua panin Muizawl khua azuan tengin Muallum kici Mual- nuam khuasat uhhi. Phunom leh Zungkhua panin Laibung kisat hi. Taakzang pan-in Cingpikot  khua nasat uhhi. Suangpi Khua pan in Vando khua kisat hi .Zung khua pan in Ngalzang khua kisata Ngalzang khua pan in Ngalzang suangpi khua kisat hi. Ngal zang  suangpi pan in New Suangpi kisat hi. Phunom khuapi panin Tuisau, Tuivial, Pimpih kisat hi. Phunom khua leh Tuisau pan in Taampi kici Saino khua kisat hi. Kalzang pan in Zuangzang, Zuangzang pan in Khaukul kici Thangnuai khua kisat hi. Kalzang khuapi pan inleh Vangteh Botungpan in Phaileng khua kisat hi. Phaileng khua pan in Tuilang khua leh Lunmualkhua kisat hi.Lunmualkhua pan in Philnak,Khua bem kisat hi, Khuabem panin Tuikhiang khua kisat hi. Phunom khuapi pan in Sozang ki sat hi. (Kalzang khuapan akisat khua pawl khat omnawnlo hi). Hih khuate panin Khuano mite mun tuamtuam gamtuamtuam ah kizel in kitenghi.Tuhun ciangin Kalzang khua leh Phunom khua ah,apu apa te-uh ateng ngeilo beh tampi khuanomite khua ah hong teng uhhi. Khuano mite tawh sung leh pu in kiman inKhuanomi mah hi pahhi.Zawngkhua ah iten leh zawngan ki ne hi ci in Khanglui tein thucin nana nei uhhi.

Ipu ipa te Kalzang khua ah tengngei napi in, Phunom khua-ah ateng ngeilo leh Phun om khua ah tengngei napi-in Kalzang khua ah anatengngei lo-omhi.Kalzang leh Phunom ah ateng ngeilo zawng omhi.Tulai taka khuano mi kici a tamzaw i tangthu ih kanciang in nidangin apu apa te uh Phunom khua leh Kalzang khua ah ateng ngeipen 94% bang hiding hi.Hih khuate ah apu apa te-uh a naten ngeiloh uh hangin zawng hih mite tawh mundang khuadang ah natengkhawm ngei uhhi.Ukhat naukhat sungta putu, behkhat phungkhat nahi uh akuamah midang omlo hi.Unau khat hi .Tenna mun kibang lo bekhi. Khuano mi sitsit set, tui kihel lohi. Tua ahihman Kalzangmi leh Phunom mi ki gawm khawmpen" KHUANO MI" kici hi,cileeng 95% khial in ka ki umkeihi. Banghang hiam cih leh amau te sungta, putu,behkhat phungkhat, cikhat, namkhat, ngeina kibang, kampau awkaih kibang, Siampi, Tulpi zangkhawm te a hi uhhi.

Tedimgam (Kam Hau uksung) ah Minam khen 10 omhi ci-in 1947 Chin Special Division Regulation Act ah kiciam tehhi. Tedim, Khuano, Sihzang, Teizang, Guite, Zo, Saizang, Dim, Hualngo leh Thahdo tehi. Kum 2006 kumin Rev. Son Khaw Kham in "Suangpi mi cih leh Phailengmi cih khat omsak solnawn ve uhcin", hong ci ngei hi. A taktak in hih tepen amau kituam gentawm nahi a Khuano mite zungpi,Khuano bulpite  ahihi.

Bang hun,bangni,bangkum lian in koilaimun pan in khuano mi min kipua lian cih pen kanhak mahmah tahi.Ka thei hi a cite zawngin a tetti alah ding omtuan lo hi. A manpen hi cihding haksahi. 1971-72,Mandalay University,Chin Magazine sungahKhuano mite khua 19 phasak uhhi.Carey leh Tuck tegelh "The Chinhills volumn 1&II sungah Khuano mi cia officially a record na omlohi. Bang hang hiam cih leh Khuanomi, Saizang mileh Teizang mite pen Sukte mi ci-in hongciam teh ahih manhi. Hih hun in zongkhua nomi cih omkhin dinghi.Bang hanghiam cih leh Mualbem ukpi Pu,Khan Thuam, tapa Kam Hau ukpi, Sukte hunhia,a uk na gamsung mite Suktemi ci-in naciamteh a hihi.

Tua ahihman in Saizangmi, Teizangmi leh Khuanomi cih minam kilawhna minte apian hun kikhangual dingin ka umhi.

Thukhupna

Kawlte tangthu pen Pungtawng Pungnia pan in akipat mah bangin Khuano  mite tangthu zawng Cimnuai pan,Kalzang leh Phunom pan inkipan hi cile hang tampi ki khial loding hi. Khuanomi te in pau kician ,gam(leitang) kician,lai kician,ngeina kician, biakna kician leh tangtawn khanggui kizom kician nei ih manin Minam kician ih hihi. Mitein Khuanomi tepen atha nuam,acitak,athuman,nasep azo, zumkawng,mang kawng ah thusia a nei mengmeng lo,atungsiah anuai siah uhtawh akilem theite , kholh -pih nuammi ci-in hongciam tehhi.

Khuano mite ki-it, kihuai, ki angvan in kitelsiam a pumkhat lungsim nei-in iki lap sang iki pah tawisiam ding thupi hi. Khuano misung ah pumkhat hihang.I khuanomi te tangthu dingpen eimau tek in agelh ding ihi ta hi. Kigensiat,ki hazat,ki langpan nate nusia in mapangkhawma khuanomite tangthu hoih gelh kidem ding hun hita hi.Sisan in thugen hi.Mite in hongsim mawh nate ahoihlam in lasiam in kiphuahphat na han ciamna a i neih theihding thupi hi.

By. Ngin Khaw Mang
Tedim. (Phunom).

N T B ....  Hih khuano mite tangthu pen atom theipen dinga kila hi. Ciap teh nakituak lo a om leh hongmaisak un. Kicing lopi in itheia, kicing lopi mah in agelh hihang. Akicing zawathei te in amanzaw nonggen ding uh hongthuming. Akikal thute kumtam pipi aki gam la leh thutampi a kinusia omhi cih nongtelsiam ding uhhong lamen ing.Hih khuano mite tangthu asim khempeuh te tungah ka lungdam hi. Hih khuano mite tangthu (atom) pen atheinuam velvel te adingakaikhawm a  konggelh hi. Thu hoihzaw akicingzaw ilam en hi.Ih minamleh itang thu(atom) in thei kim leng hoih dingcih ka deih na hi )     .


Thudotte: 
1. Pa Ngin Dai Thang (Laibung),
2. Pu Tun Sing(Phunom),
3. Pu Neng Khual (Phunom),
4. Pu.Lam Za Dal (Phunom),
5. Pu Lam Tual(Tuisau),
6. Pu Son Khaw Kham (Phunom), 
7. Rev. Thang Kam (Suangpi),
8. Rev. Son KhawKham( Keizang),
9. Rev. Lam Suan Thang (Phunom),
10. Rev. Thang Suan Mung (Tuilang),
11. Pa Ngo Kam (Tuimang),
12. Pu Ro Lut (Bapi),
13. Pa Ngin Ngaih Lian (Tuisau).      
                                                                               
Etkak laibu te:
1. Kalzang suante beh khang tangthu bu.1978. By. Ngin Suan.
2. Zongeina bu.1954,By.Capt. Zel Khai.
3. Phunom khua tangthu. By. Rev. Lam Suan Thang. (Unpublished )
4. Suangpi mualsuang bu. By. Capt: Sing Khaw Khai.
5. The Chin Hills.Vol.I&II By. Carey &Tuck.
6. Tedim Innkuan. By. J.Gin Za Tuang.
7. Headman Register.Falam District. Falam.
8. Zo History by. Vum Son leh 

9. Aituam ciapteh na ( Ngin Khaw Mang).



********************************

Lai gelh Pa Sia Gin Khaw Mang in Zomi eLibrary / Laibusaal ading in phalna ahong piak ahi hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KHUANO MITE TANGTHU (A-tom in). A gelh - Ngin Khaw Mang Description: Rating: 5 Reviewed By: Cinpu Zomi
Scroll to Top