728x90 AdSpace

Hot
Menu
Zon-ol na Donate

Latest News

LAWI GIAT PIANNA THU.

LAWI GIAT PIANNA THU.

Pimpih khua, Hatlang beh Pu Kim Eng in auih thei khempeuh tangcing khatin pua-a Namtawng khua-ah pai-in a zawlpa’ sialkongkhak tungah, a vanpuakte khai-in, “Zawl aw ka na zuak khipitang hi, auih thei khempeuh tawh ka gawm hi kei leh kang ding hi. A uih thei tawh ka gawm ahih manin ui in hong nek sak lohna dingin taang va ko in,” ci-in ngian bawl hi.

A zawlpa zong khualu khuataw-ah taangko-in pai kawikawi-a, ka zawlpa van ui in neksak leh kiloh zolo ding hi. Na uite uh khihtek ta un ci-in a taangko hi. A zan ciangin Pu Kim Eng inn lim-ah a temta tawh lumin ui khihna khau khempeuh a atsat hi. Uite in a uih za-in Pu Kim Eng tanghciing neksak hi. A zingciang a thawh teh, “Zawl aw taangko lo na hiam? Ka tanghciing ui in ong gaihsak hi. Taang va ko pha kik in.” ci-in a sawl teh ui nei khempeuh hong kikhawm uh hi. Pu Kim Eng in thu gen a, “Ka khipi man zong hi zolo, ka tanghciing man beek ui nei tengin Lawikhat tek hong pia un.” ci-in a ngen hi. Ui neite in, “Ko ka uite uh ko sawl kei ung, nang’ na van na kep ding hi,” ci-in nial uh hi. “Ong loh nuamlo na hih uh leh ka zawlpa in taangko lo hi ding hi,” ci-in kihehsaka, a zawlpa a khut lehhenin a ciahpih hi. Tua ciangin ui neitengin hih bang lawmlawm ahihleh Lawi khat tek tawh tan ni ci-in a tan kik uh hi.


Pu Kim Eng in a zawlpa kitatna Lawi teng hawlin Pimpih khua-ah hong ciah hi. Tua ni zanin Pimpih khua Kawlte’n na sim a, Pu Kim Eng tapa manin ciahpih uh hi. A pa Kim Eng tawh lampi-ah kituak uh-a, “Ka ta hong tansak un,” ci-in a ngen hi. Kawlte in zong, “Bang tawh hong tan ding na hi hiam?” ci-in a dawt ciangin, “hih ka Lawi kaih tengtawh kong tan ding hi.” ci-in dawng hi. Kawlte in zong a Lawi teng veel a, “Hih na lawi teng lakah giat hoihsa ung, hih teng nong piak leh na tapa hong piakik nung,” a cih ciangin a lawigiat tawh a tapa a tanh hi. Tua thu hangin Khamtung gam vaihawmpi khua makai mi khuate in, ‘Kim Eng in a tapa lawi giat tawh tan ahih manin ei zong nidang teh zi kisut, ta kisut leh sin-muat lung-muat a omleh lawi giat in kitan ding hihang,’ ci-in thukim hong nei uh hi. Tua hunin sum peek cih kizang lo-in gual bek kizang hi. Dangka om nailo a, Lawitek omlo ding ahih teh Lawi sawmthum teh gual khat kici ding hi. Gual sawmthum a giat vei a phak ciangin gualgiat kici ding hi.

Lawigiat liaute in innsian sasat tawh thuah lawi khat pen innsian in kila dinga, lawi khat sasatin kila ding hi. Tua ahih manin Lawigiat ngah dingte in lawi tang ding uh hi. Innsian Lawi khat pen Hausapa in ngah ding a, sasat ih cih in tua mun a om tengin go-in ne ding uh hi.

Daan a kipiak ciangin tukthum khat a kipiak leh gualguk liausak dinga, tukthum nih ahih leh gual sawm leh tukthum thum a hih leh gual sawm le giat kiliausak ding hi. Zawlgaii a om leh tau khat kiliausak dinga, tua tau khat man dingin gual sawmnih leh gual giat kiseh ding hi. Tau takpi a kipiak leh tau khat bek mah kipia ding hi, ci-in upadi bawl uh hi. Tedim khuapi-ah Pu Kam Hau leh Pu Khoi Lam leh Pu Mang Ginte a vaihawm ciangun hih upadite hong lenkip suak uh ahih manun “Pu Kam Hau ngeina Upadi” ci-in tudong kinei hi.

Ref: 
Pu Zel Khup' Tangthu Ciapteh sung pan.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: LAWI GIAT PIANNA THU. Description: Rating: 5 Reviewed By: Cinpu Zomi
Scroll to Top