728x90 AdSpace

Hot
Menu
Zon-ol na Donate

Latest News

Lungdam Bawl (Christmas) Thu. By - Pastor Nung Khan Mang .

Christmas ih cih bang hiam?


Thu Masa:
Thu khat peuhpeuh gen ding hong kisawlciang leh Laisiangtho thu lungngaih ding hun ka ngah simin, ‘kammal kancianna’ (word study) mah nuam kasa bel hi. Kammal khat hoihtak ih tel masiah thukhat peuh ii deihna kitheilo a, ki suplawh hi. Tua ahihman in, Christmas cih kammal te en in, kikum dih ning.

Leitungah zong gam khat leh gamkhat ngeina kibanglo a, gamthumna pai dingte bangin apaima un, apaina ding gamte’ nuntak khuasak zia sinmasa den uh hi. Tuamah bangin Zeisu Khazih in zong amin puakzia mahmah tungah hongpai na ding gam ii zia zuipah hi.

Christ :  Mikangte’n Christ cih kammal pen Hebrews te’n Messiah ci uh a, eipau in Khazih cih kammal hi a, Pasian sathau nilhpa cihna hi. Tuhun Pasian sathau nilhte’ nuntakna tawh kituak kasa mahmah hi. Mitampi tak in Topa hongzangin, sathau hong nilh in’ a cih uh hangin sathau nilhna ii vaipuak thei leh a sathau asiaktha kiknuam tampi om kha ding hi. Samuel in David sathau anilh laitak in nuamhuai pak ding hi mah ta leh, Davidsep ding tampi vaipuak om a, tuamah bangin Zeisu zong Christ cih min a ngahna hangin singlamteh bek thamloh hong suah mahmah pan haksatna vaipuak tampi hong nei hi. Tuhun biakna sia te  zong Pasian sathau nilhna sung ah enhuai pawlkhat om kha mah ding hi ta leh vaipuak tampi nei uh a, a haksatna uh Pasian tungah apthei ahihman in midangten theih pih khol lo uhi. Ahizongin pahtawina ngahni, nipi hunzatnate ah mipi mai ah dingin thu ngen, thugen in, midangte’ hehpihna ngah uh ahihmanin tuamun bek amute’ aa dingin Siate’ sepbangmah omlo hi. Biakna Siate’ nasep thupi mantaktak pen a lupna tung or a zing thunget pan kipan uh hizaw hi.

Mas :Mas cih kammal pen manglai hi a, mipi, mibup cihna hi. Hih Lungdambawl (Christmas) ah Hehpihna kuang hong tawi Zeisu leh leitung mite’ ki muhthuah khopna hihman in, lungdam huai thu vantung mite’n hong tangko masa uh hi. Pasian maipha (favour) sung pan hong piangkhia Pasian hong bawlsak lungdampawi ahihman in, piangthak, piangthaklo cih omlo in, mithempeuh in aki muak ngeingai ahihi. Pasian vaihawm hi kei henla, milian khat peuh, thunei khatpeuh vaihawm hi leh, minam lungsim nei in, kuamah’n sangzo kimlo ding hi. Adiakdiak in ei milimbia gamte bangin sangzo lel uh a, leitung bup zeelzo hi.

Eleos = Hehpihna leh Charis= Hehpihna Kammal Nihte’ Kilamdan Zia:
Pasian in mihingte’ tung a hong neih hehpihna pen Eleos kici a, hih Charis=Grace pen Zeisu in leitungah nasep hong kipat lai in Pasian hihna (divine being) tawh nasem lo-in mihing hihna(human being) tawh a nasepna hangin, Zeisu in mihing leh mihing kizopna bangkeek a zat Charis, Grace bulphuh in, hong pawlbawl hi. Hehpihna kammal pualo in, Charis=Grace (Mihingte khat leh kizopna aa ih neih Hehpihna kammal)apua nahi zaw hi. Keizong note khatbang ka hi lel hi, a cinuam ahihi. Tuabangin mihing hihna 100% hong puakzawh na hangin mihing ta Zeisu a um thempeuh in Pasian ta hihna 100% angahthei a hihi.

Eimuhzia ah Pasian pen lianmahmah a, mawhna ih bawlbawl zongin hong HEHPIH niloh nak leh hon maisak ding cihdan ahihi. Hehpih cih kammal ih paunak leh eisang a, lianzaw,thunei zaw khat in, hong hehpih leh… cih dan in kisang ngei hi. Ahizongin Zeisu hong puak Pasian tawh kizopna pen Zeisu ih sanzawh ciangin ‘zum aa thukhente’n mimawhpa hehpih in suakta sak’ cih dan a, (Superior Being) hilo zaw in, Pa leh Ta, Lawmta, innkuan, sanggam kizopna ahihman in(Zawhang 15:15), Zeisu Khazih a na kici ahihi.  Ahizongin mihingte’n Pasian sutna lam ah ih khantoh loh cialcial ciangin Pasian kikih ta in, kineh ngamlo hi.  Leitung pai vanglak leng, biakinn na ngawn ih galmuh ciangin ih dipkua hi. Hih thu kansemsem in theisemsem leng Pasian hong itzia, hongmuanzia leh hong kiphalnate kitel semsem ding a, ih tahuan aliatmahmah lamzong ki phawk ding hi.

Zeisu in eitung a ahongneih hehpihna pen Charis kici a, Pasian in eitunga hongneih hehpihna pen Dorwn ki ci hi. Hih thute’ hangin thu-um mimal kim in Zeisu si leh sa taktak suakthei a, Pasian innkuan mantaktak ih hi thei ta hi. Pasian in AMA hihna thempeuh leitung mihing suahna tawh hong theek na ah, hih pianzia nih (Pasian pianzia leh mihingte’ pianzia) kilamdanglua, ki khai lua ahihman in Singlamteh tungah Zeisu in sihlawh dongin lul-kik hi. Zeisu in sihna pan hong thokik ahih man in, Pasian sung aa ih ngah dik-kisakna leh hamphatnate leitung vantungah kuamah in thubawlkik theilo hi.

Zeisu Hong Pianzia A lamdan na
Ka neulai in, Singlamteh aa Zeisu sihna thu, Zeisu nalamdang bawlte ka ngaihsut sim in ka lungsim tawng ah “Amah Pasian tapa hiven, ahih zo mah kei diam” cih tawh ka tuat ngei hi. Ahizongin Zeisu in mihing bang in hong piang in, Pasian sawlna bangbang aman (obeyed) na pen Pasian ta khami (divine) ahihman hilo zaw in mihing taktak ahihna tawh asem, a thuak ahihi. Pasian hihna tawh hongpai hi leh lauthei khollo ding a, a gilzong kial theikhol lo ding, zong hehthei lo thei ding hi. Ahizong kei leh nang gum ding ahihman in eite khat bang keek in hong pai a, thukhaamsawm zong hoihtak in zui hi. Tuaman in eite’n mihing pumpi ih hih laimah in Zeisu sepsang a lianzaw asem dingin ih mihing hihna sungah hangsanna, upngamna leh khamuanna ihneih zawh na dingin Zeisu’ mi hihna ih sansiam ding leh ih ih muhkhiat theih ding thupi hi.

Ei thu-um Mite Zeisu Lungsim Neite
Zeisu neih lungsim, Zeisu neih nuntakzia  ei thu-ummi te’n neih theih ding a hihi (Phi 2:5). Zeisu anei taktak te’n Zeisu lungsim puakzia nei in hehpihna nei in, deihsakna nei a, piakkhiatnopna nei in, lungdam uh hi.  Minuamsa taktak dingte’n   amau sangin midangte khualzaw uh a, ngah dingsangin piak khiat ding tumzaw tontung uh hi. Leitungah ih piakkhiat teng kipbek hi, banghang hiamcih leh ih piak khiatteng midangte’n simthei a, ngahna lamsang pen midangte’n hong theihpih lo uhi. Tua hangin Zeisu mahmah zong a pumpi bei zah dongin hong kipia khia a, a galte’ sat laitak mah in, thungetsak zawhna ding lungsim nopna ngah hi. Piak khiatna ii gah pen lungsimnopna ahihi. Minuamsate’n vantung thute ngaihsunsun ahihmanin vantung’ huzaapna in zo a, leitung na, sum leh paiite sila in nei in, midangte Zeisu aa dingin ngahlawh hi. Angsungbek athei, ngahding bek a ngaihsunsun mite’n bangmah ngahlo in sihlawh zawsop thei hi. Ama nuntakna hunuamte anuntakna uh mangthang ding’ ci hi.

Agape Itna/Piakkhiat Itna:
Leitung mite’n itna (love) acih pen feeling, nopsakna in ngaihsun uh hi. Ahizongin ei Thu-zui mite’ neih agape itna pen feeling bek hilo in piak khiat itna a hihi. Itna ngah na kisak kei leh itna a zeek khia ngeilo na hizaw ding hi. Tua bangmah in, agape itna zong Pasian kiangpan ih ngah itna hi a, hih itna ih ngah pen Pasian tungah thuk kikna in midangte ih piakkik ding itna ahihi. Ei’ kiang hong tun khit nak leh piakkhiat itna hipah hi. Ngah ding itna pen Zeisu tungtawnin ih ngah zo hi. Zeisu sung pan itna picing a ngah zolo/theilote’n midang, mundang pan itna picing ngah ding haksa hi. Banghang hiam cih leh mihing a muang, asuangten Pasian hamsiatna thuak ding hi.

Mihingte’ lungsim sungah Pasian letsong lianpi ahi Zeisu ih neih khitciangin midangte itna, deihsakna hong ompah a, ih neih itna ih piak khiat na tawh kilak khia in, tua bang piakkhiatna in ih lungsimtawng ah hong kipaaksak hi.   Hih lungdambawl sungah lungdamna kipaakna mantaktak ih neih nop leh ngah ding lam ah pangzaw lo in piakkhiat ding lam ah pangzaw leng, ih lungdamna maanthei pan ding hi. Ih neih hetloh laitak in hanciamtentan in pia teitei leng a neih mahmah apia khiate’ sangin ih lungdamna lianzaw ding hi.   A piakhia tontung Pasian pen a lungdam pen Pasian hi  a, a pia khiatontungte’ nuntakna sungah a gen ki zolo lungnopna om a, tua kipaakna pen Greek te’n Chara na ci hi. Pasian in zing nisuah sim in hehpihna thak hong piathuah thuah tontung hi.Leitung miten lungdamna (Chara) angah theihna dingin Christ mihing pumpi pua in hong pai masa a, Mas (leitung mi)te’ kiang hong tung hi.

Tua ahihman in Leitung vantung ah Zeisu neilo in gupna bukim, picing nuntakna kingah theilo a, Zeisu nei a, a mantaktak Christmas amuak thei dingin Topa’n laisim mimal thupha hongpia ta hen.

Laigelh,
Nung Khan Mang
Grace International Church
Yangon.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Lungdam Bawl (Christmas) Thu. By - Pastor Nung Khan Mang . Description: Rating: 5 Reviewed By: Cinpu Zomi
Scroll to Top