728x90 AdSpace

Hot
Menu
Zon-ol na Donate

Latest News

Muvanlai Tangthu leh Laisiangtho sungah Muvanlai cih kammalte.

Lai Siangtho simna: "Ahih hangin Topa a muang mite a tha uh dimkik ding a, muvanlai bangin kha tawh leengto-in, amaute tai napi-un tawllo ding uh a, amaute lam pai napi-un gimlo ding uh hi. (Isa.40:31)

Muvanlai Tangthu:
A khan sau penpen vasa: Vasa nam khempeuh sung pan in, a khansau penpen Muvanlai ahi hi. Kum 70 bang nungta thei hi. Ahizong in, kum 70 sung a nuntak theihna ding in kum 40 a cinciang in, thuhaksa lian mahmah khat phul kha hi.

Khensat ding nam nih: Kum 40 hong phak ciangin, an zong ding in hong hatzo taktak nawn lo hi. Bang hang hiam cih leh, a khecin leh a mukte hong hiamzo nawnlo a, hong nem mahmah ta hi. A kha (feather) dawnte ah a multe a deih bangin hong phalhkhia thei nawn lo in, giksa gawpta hi. Tua a hih man in, khensat ding nam nih anuai ah hong phulkha hi:
  1. Mulnel, kha (wing, feather) thak a neih kisam a, bang mah ngaihsun kei leh kum 40 ah a siding hita hi. Sih ding khensat zaw mai ding maw? Or bang cih ding!
  2. A thak nuntakna hong ngah theihna dingin, a nuntak sung ah a haksa penpen a muk, a khecin, leh a kha teng leh a mul teng khempeuh hong beisiang kisam a, tua pen ni 150 sung haksatna thuak ding a, ahizong in kum 30 nuntakna ngah behlai ding cih thu ahi hi.

Khansau ding khensat zaw: Kum 40 acin ciangin, bangbang haksatna ka thuakzongin nosuah kik theihna ding lampi a om leh ci in hong khensat zaw hi.

Mun muanhuai hong bel masa: Zingsang khat mualsang dawn penpen ah a thaneih khempeuh tawh hong lengto velval hi. Tua mun san ah, amah a nethei ding gul or gamsa gilote a omlohna mun hong zong masa hi.

Ni 150 sung haksatna: Mualdawn a tunciangin, suangpi tungah munhoih hong la hi. A mul khempeuh ama muk ngiat tawh hong tukhia hi. A mul leh a kha khempeuh a ma muk ngiat tawh hong tukhia a, na sa ngaungau hi mah leh kum 30 sung a nuntak beh theihna ding lampi dang omlo hi. A mul leh kha teng a bei khit ciang in, a khecin khempeuh amuk tawh hong tukhia siang kiuhkeuh leuleu hi. Tua a man khit ciangin, a mukcin khempeuh a kiatsiang mateng tu niloh in, nasa mahmah a, ahizong in, a sawtna ciangin hong beisiang theisam hi. A mul, kha, khecin, mukcin khempeuh a beisiang na ding in, ni 15 pan in ni 30 ciang hunsawt hi. Hih sungteng pen an nelo in, om a, haksatna hih sangin ama khang sungah a thuak zawk hun om ngeilo hi. A mul, kha, khecin, leh mukcinte hong picing theihna ding in, ni 150 (5 months) sung hong sawt hi. Kha 4 hong bei khit ciangin, a mul, kha, leh cinte pen hong picingto ding hong hita a, an ngawl thapai ahih man in, thanei hetlo in hong om hi. Tha a neih kik theihna ding in, an lah zong zo nai tuanlo a, tua ban ah an a puak ding kua ah lawm zong a nei tuan kei hi. Zingsang nisuak cil pan kipan in nitum dong mitphia hetlo (ama hanciam theih tawp ciang) in ni bekbek en gega in hong om, kha khat khit ciangin, a khangmoi lai a sangin tha hong hat kik zaw in, a hat mahmah Muvanlai hongsuak kik hi.

Kum 30 khang kibehlapna: a khang masa kum 40 sungsangin, a khang nihna kum 30 sung a tha hat zaw in, nidang in a mat zawh mengmeng loh gulpite hong manzo kik in, a tha hong hat mahmah kik thei hi. Bang zah in a sang vantung ah lento mah ta leh thabei cih bang nei nawn lo hi. Km 1 bang a sang mahmah vantung ah a len laitak nangawn in, lei lak a, gul ngawnsan tai maimai zong muzo zah dong in, a thatang bek hat hilo in, a mit tha mahmah zong hong hat kik hi.

Laisiangtho tawh enkik ni: Lai Siangtho sungah Muvanlai cih tawh kisai mun 30 (Exo. 19:4, Lev.11:13; Det.14:12; 28:49; 32:11; 2Sam.1:23; Job 9:26; 39:27; Ps.103:5; Prov.23:5; Is.40:31; Jer.4:13; Jer.48:40; 49:16, 22; Ezek.1:10; 10:14; 17:3,6,7,9; Dan.4:33; 7:4;Hosea 8:1; Oba.1:4; Hab.1:8; Rev.4:7; 8:13; 12:14) sungah kimu hi. Pasian leh LST gelhte in, muvanlai tangthu nak tel lua mahmah uh hi cih thu a tung a, mun 30 te tungtawn in ih mu thei hi.

Thu khupna: Hun leh kumte pen Pasian misiangthote adingin, a hoih lam in thaksuah or upna: hat semsem thei a, ahizongin khuamial sungah hong makaih thei Satan nasepna pen a lauh huai mahmah ih galpa a hi hi. Pasian a muang mite adingin, Muvanlai bangin ih tha hong hatsak kik thei pen Kha Siangtho hi a, taitai napi tawllo, sem sem napi gimlo cih bangin hong omthei hi. Topa a muangmite pen linglo in a om Zion mual tawh zong kibang hi ci in Psalmist in na gen lai hi. Topa in amah a muang mite tungah muvanlai mah bangin thathak hong guan tawntung ta hen. Amen.

Upna sungah na sanggam uh,
Suan Za Khup


Tedim Laisiangtho sung ah Muvanlai kammal om te in;
Paikhiatna Alian 19:4
Egypt mite tungah ka bawlna leh Muvanlai in a kha tawh a note a puak bangin note hong pua-in keima kiangah kong paipihna na mu khin uh hi.

Siampi Laibu Alian 11:13
"Vasate lak panin note in na kih ding uh, a kinelo ding, a kihhuaite: Muvanlai, mupi, luimu,

Thu Hilhkikna Alian 14:12
Ahih hangin na nekloh dingte uh: Muvanlai, musane, luimu,
Alian 28:49
Topa in a gamlapi leimong panin Muvanlai leeng bangin a manlang, amau' pau na theihloh uh minam, thukhualna a neilo minam, khangham mite a zahtaklo, khangno mite tungah maipha zong a lak tuanlo minam khat, note' langkhatah hong paipih ding a,
Alian 32:11
A bu a vil, a note tungah a kha a zap, a khate zakin a note a man, a kha tawh a note a pua Muvanlai bangin

Samuel Nihna
Alian 1:23
"Saul leh Jonathan, ki-it uh a, it-huai uh! A sih a hin'in amaute kikhenlo a, Muvanlai sangin zaptel zaw uh a, humpinelkai sangin thahat zaw uh hi.

Job
Alian 9:26
Pumpeeng gunkuang bangin ka hun nawhpai a, Muvanlai sa bawh bangin a nawhlen' hi.

Alian 39:27
Muvanlai in sang leen'in mualtungah bu a tomna ding nang' thupiakna hong ngak ahi hiam?

Late
Alian 103:5
Muvanlai bangin ka tha a hat theihna dingin thupha namkim hong pia hi.

Paunak
Alian 23:5
Na ngahsa uh sumte mitphiat kalin beimang thei a, Muvanlai bangin thakhatin lengmang thei hi.

Isaiah
Alian 40:31
Ahih hangin Topa a muang mite a tha uh dimkik ding a, Muvanlai bangin kha tawh leengto-in, amaute tai napi-un tawllo ding uh a, amaute lam pai napi-un gimlo ding uh hi.

Jeremiah
Alian 4:13
En un, meii bangin i galpa hong pai a, a sakol leengte pingpei tawh kibang a, a sakolte Muvanlai sangin manlang zaw hi. Gimna i thuak ding hi; bang hang hiam cih leh gal lel ding ihi ta hi.
Alian 48:40
Topa in kong cihin-ah: En in, Muvanlai leeng bangin manlang takin gam khat hong leeng ding a, Moab gam a sim dingin a kha hong zal ding hi.
Alian 49:16
Na kisaktheihna in nang hong khem a, na ngaihsut bangin mite in nang hong kihtalo hi. Suangkeen dawnah na teng a, mualsang tungah na teng hi. Muvanlai bu zahin sangpi-in na ten' hangin tua lai mun panin kong lakhiasuk veve ding hi, Topa in kong ci hi.
22
En un, Muvanlai bangin manlang takin galte hong leengin Bozrah khua a sim dingin tua khua tungah a kha hong zal ding uh hi. Tua ni ciangin Edom galkapte pen nupi nausuak dingte bangin a lau ding uh hi," a ci hi.

Ezekiel
Alian 1:10
Tua ganhingte in maitang li ciat nei uh hi. Maitang ngeina lamah mihing mai, taklam pangah humpinelkai mai, veilam pangah bawngtal mai, a dek lamah Muvanlai mai nei ciat uh hi.
Alian 10:14
Tua kherub-te in maitang li ciat nei uh hi. A maitang khatna bawngtal maitang, a nihna mihing maitang, a thumna humpinelkai maitang, a lina Muvanlai maitang tawh kibang hi.
Alian 17:3
Topa Pasian in hih bangin ci hi, ci-in gen in: Muvanlai a gol mahmah, a khate zong golin a kizal deda khat om hi. Tua Muvanlai in khaveng hoih mahmah nei hi. Lebanon Mual tungah va leengin taamtak kung khat a dawn va kuaitan a,
6
Tua leengguino hong khangin a hiangpha leengguipi hong suak hi. A hiangte pen Muvanlai lamah zam a, a zungte in leisung thukpi-ah zung kha hi. Tua leenggui in hiang leh teh tampi tak nei hi.
7
"Tua ciangin a gol mahmah, a khate golin a mul a pha mahmah Muvanlai dang khat a om hi. Tua ahih manin tua leenggui in, ama kisuannasa muna tui a ngah sangin tui a tamzaw piazo ding, ci-in lametna tawh tuaMuvanlai lamah a zung kha-in a tehte zong tua lam mah a ngasak hi.
9
"Tua ahih ciangin Topa Pasian ahi keimah in ka dotnop thu pen: 'Hih leenggui hingin hoihtakin khangzo ding ahi hiam? Muvanlai masa pen in zungbawhin, a gahte zutkhia-in, a hiangte kuaitanin, keutumsak ding hilo ahi hiam?' cihna ahi hi. Tua leenggui bawhkhiatna dingin thahatna ahi a, minam lianpi ahi zongin kisamlo hi.

Daniel
Alian 4:33
Tua hun lianin Nebukhadnezzar' tungah tua thukhenna a hong tung hi. Mite lak panin Nebukhadnezzar kihawlkhia a, bawngtal bangin lopa a ne takpi hi. A pumpi tungah daitui kia a, a pumpi tunga a multe keelmul bangin sau a, a khutcinte Muvanlai khecin bangin a hong sau hi.
Alian 7:4
A masa pen humpinelkai tawh kibang a, ahi zongin Muvanlai kha tawh a kibang kha a nei hi. Ka et laitakin a khate gel a hong kibotkhia hi. Leitung panin tua ganhing kidomkaang to-in, mihing bangin a khe nihin kidingsak a, mihing lungsim ama tungah a kipia hi.

Hosea
Alian 8:1
Pataukohna peengkul tum in. Galte in Muvanlai bangin ka gam a len'lak dingin hong kithawi uh hi. Bang hang hiam cih leh ka mite in ka thuciamna uh pelhin, ka thuhilhnate hong nial uh hi.

Obadiah
Alian 1:4
Muvanlai bangin sangpi-ah leengin, aksite lakah bu na bawl hangun no kong khiasuk veve ding hi, Topa in a ci hi.

Habakkuk
Alian 1:8
"A sakolte uh kamkei sangin tai hatzaw a, keivom gilkial sangin kihtakhuai zaw hi. Gamlapi pek panin a sakol tung tuangte hong kipan uh a, a sakolte un lei-ah a khe phut uh hi. Muvanlai in sa a bawh bangin a galte a leen'lak uh hi.

Maangmuhna
Alian 4:7
A ganhing a khatna pen humpinelkai tawh kibang a, a nihna bawngtal tawh kibang a, a thumna in mihing maitang nei a, a lina pen Muvanlai a leeng lai tawh kibang hi.
Alian 8:13
Tua ciangin ka khuadak leh vankim lai-ah Muvanlai khat a leen'kawmin nakpi-in ham a, "Vantung mi adang thumte in a hong tum lai ding peengkulte hangin leitungah a teng mi tungah gimna, gimna, gimna lianpi hong tung ding hi," a cihna ka za hi.
Alian 12:14
Ahi zongin tua gulpi in a sukkhak theihlohna dingin kum thum leh alang sung gamlakah a kikepna ding munah a leen'theihna dingin Muvanlai gol mahmahte' kha tawh a kibang kha nih tua numei a kiguan' hi.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Muvanlai Tangthu leh Laisiangtho sungah Muvanlai cih kammalte. Description: Rating: 5 Reviewed By: Cinpu Zomi
Scroll to Top