728x90 AdSpace

Hot
Menu
Zon-ol na Donate

Latest News

Nang A’ ding LUNGNOPNA Laibu. By - John Piper

Nang A’ ding LUNGNOPNA
John Piper

Desiring God
Minneapolis, Minnesota

A Sung a’ om Thute
  1. Thupatna
  2. Bang hangin Jesu sih kul sese hiam?
  3. Pasian in keimah koici bang in hong it thei?
  4. Pasian it keileng bang kacizen ding?
  5. Siatna tampi lakah Pasian koici bangin it thei ding ka hiam?
  6. Pasian thu I cih bang hang maw?
  7. Hihte khempeuh kei adingin bang acih nopna hiam?
  8. Bang ka Seem ding hiam?
  9. Deihsak huai simbehding pawlkhat
  10. Pasian Lunggulhna
  11. Na hanciam zawh dandan
  12. Laigelh pa’ tangthu

Thupatna

Abeisa kum 2000 hunlai in Jesu leh a lawm te thuthang pawlkhat kikum in holim na a neih laitak un, miten “Mihing Tapa kua hi ci uh hiam?” cih Jesu in dongh hi. Amau zakna bangtek in dawng kik uh hi. Ahizong Jesu in thu kawnghek in amaute en kawmsa in a dotna ah: “Kei kua ka hiam?” cih dongh leuleu hi.

Midang te thudotna dawn kik ding hamsalo himah leh Jesu thudotna dawnkik ding thu hamsa khat ahi hi. Tua ahih leh JESU KUA HI NA CI HIAM? Mitamzaw te muh na ah Jesu pen mihoih, mipil, mi hehpih thei, a etteh huai makai khat bang lel in mu uh hi. Ahi zong in, British laigelh minthang C.S.Lewis in The Lion (humpi), the Witch (Bum & ai) the Wardrobe (Thangsiahna) cih thulu tawh laibu agelhna sung ah mihingte khuak ngaihsutna tawh Jesu pen theihbat zawh ding hilo hi cin na gen hi.

Ama thu tawh ki sai ahaihuai mahmah midangte genna thute puah leh zun huai kasa hi. Amah kua hiam? cih dotna thupi pen nang mahmah kidong inla, kua hiam cih zong na dawn kik ding thupi mahmah hi. Jesu tawh kisai dotna tuamtuamte pen John Piter in hih laibu sungah kician takin hong hilh hi. Jesu in kua hi a, banghang leitung ah hongpai, leh bang teng hong sepsak a, bang hang in ei ading in thupi cihte zong hong hilhcian lai hi.
Hih akilamdang lo dotna te kidongtawm in la, dawnkik sawm lecin, mihing ngaihsut tawm leh ci le sa lungsim te hemkhia in Pasian’ kammal tung ah nadinsawm leh NANGMA ADING NOPSAK NA a ngah ding in kong zawn uh hi.


Bang Hang in Jesu Sih Kul se Hiam?

“Ama hong sihna hangin mawhna a kimaisak theihna dingin Pasian in Jesu hong pia a, amah a um te in mawh maisakna a ngah uh hi. Amah tawh i kipawl theihna ding zia hong lahna-in hih bangin Pasian a hong gamta ahi hi. Pasian a lungduaina hangin a beisa hunah i mawhnate hong en khong phot hi ” Rom 3:25

“Hih ka gen itna pen eite in Pasian in eite hong itin, i mawhna a mai theihna dingin a Tapa a hong pai- sakna thu ahi hi ” 1 John 4:10

“Sing tungah a kikhai mi peuhmah Pasian’ samsiat mi a hi hi ” Gal 3:13


Pasian thutang lo hi leh a Tapa gimthuak in hong sihding kisam lo a, itna anei lo Pasian hizenzen leh a Tapa gimthuak in hong si nuamlo ding hi. Tua ahihman Pasian pen thutang leh itna ahi hi. Pasian hong itna in thuman thu tak hong kilang sak hi.

Thukham hong kalh ahih leh, “TOPA note’ Pasian, na lungsim khempeuh uh, na nuntakna khempeuh uh leh na thahatna khempeuh uh tawh na it ding uh hi ”(Deut 6:5). Ahizong Pasian sangin abawlsa leitung nate thupisak zaw leh ih it zawkna pen mawhna ahi hi.

Tua ahiman Laisiangtho in hong gen na ah, Mi khempeuh mawh ciat uh a, a hong honkhia Pasian tawh kigam la uh hi ”(Rom 3:23). Nop ih sak penpen mah kipahtawi hi. Tua pen Pasian hilo in abawlsa nate hizaw zel hi. Mawhna cih pen thuneu hilo hi. Simlei vanpi abawl a piangsak Pasian pen mong beilo ciangtan omlo in zahtak pah tawi ding ahi hi. Tua hi a, Amah it khak loh pen khialhna mawkmawk hiloin, ciampelna leh langpan na nam ahi hi. Tua bek thamloin Pasian simmawh na leh mihing te nopsakna suksiatna ahi hi. A thuman a thutang Pasian in mihingte tung ah ahehna mawkmaisak lo hi. Tua hi a, amah pen mawhna bangin thukhen Pasian ahi hi. “Bang hang cih leh mawhna in thaman hong piak pen sihna hi a, ahi zongin i Topa Jesu Khrish tawh i kipawl manin Pasian’ hong piakkhong pen nuntak tawntungna ahi hi ”(Heb. 6:23). “Mi khempeuh keima aa hi a, pate ahi a, tate ahi zongin keima aa ahi hi. Amawh mipa bek si ding hi ” (Ezek. 18:14).

Mawhna khempeuh in samsiatna ngah ahih man, thaman omlo mawhna peuhmah thumanlo ahi hi. “ Thukham laibu sunga kigelh khempeuh a vekpi-in a zui khin tawntung lote in Pasian’ samsiatna thuak hi ”(Gal 3:10).
Ahizong samsiat thuak mawhnei mihing tetungah Pasian’ itna atun theihna dingin Tapa khat bek aneihsun hong sawl in, a um mi khempeuh tua samsiatna tawh kipelh hi. “ Sing tungah a kikhai mi peuhmah Pasian’ samsiat mi ahi hi; na ci ahih manin eite’ adingin Khrish in samsiatna a thuak manin Thukham zuih lahna hangin samsiat na panin eite a hong tankhia hi ” (Gal.3:13).

Jesu hong paina pen ‘hehdamsakna’ Pasian’ hehna daihsakna hi in, ei mihingte thuak tang ding a hong thuak ahi hi. Pasian mahmah in eite tang’ ding in hong thuaktawm hi a, Pasian hehna leh samsiatna khempeuh Tapa tungah akibua ahi hi.

Tua ahihman hizahtak a Pasian hong itna pen neusek leh pawng bawl ding hilo hi. “Hih ka gen itna pen eite in Pasian i itna thu hilo a, Pasian in eite hong itin, i mawhna a mai theihna dingin a Tapa ahong paisakna thu ahi hi ”(1 Jn. 4:10).


Pasian in Keimah Koici Bangin Hongit Thei?

“Khris hong sihna hangin eite in suahtakna ngah in, i mawh nate hong kimaisak ahi hi. Tua zah dongin Pasian’ hong hehpihna thu bangzah takin lian ahi hiam? Eph 1:7

“Pasian in leitung mite hong it mahmah ahih manin ama Tapa a um mi khempeuh si nawnloin a hin tawntung theihna dingin a Tapa neihsun a hong piak dongin a hong itna a hong lak hi”  Jn. 3:16

“Mi hoih khat adingin a si ngam a om kha ahi zongin thukham zui lo mipa adingin sih ngamna ding a thu haksa mahmah khat ahi hi. Ahi zongin eite mawh nei ihih lai takin eite adingin Khris hong si ahihmanin Pasian in eite hong it mahmah na thu hong lak khin hi.” Rom 5:7-8

Pasian in eite hong itna thu namnih tawh hong lak hi. Amasa in, mawhna thaman ahi sihna pan hong gupkhiatna, anihna in ki lawmlo pipi mahin hong tat khiatna ahi hi. “Khat bek aneihsun a Tapa hong pia” (Jn 3:16). Khris cih kammal pen Greek pau hi a, Christo, Sathau kinilh, Messiah” cihna ahi hi. Messiah pen Israel te kumpi ding a kisehsa ahi hi. A gal uh ahi Roman mite zo in Israel mite lemna leh daihna a piak ban ah gal leh sa sungpan lungmuan khamuan na guan ding cihna ahi hi. Tomkim in cileng, mawhnei mihing te gum khia ding a Pasian hong sawl Jesu pen khat bek a neihsun a Tapa, sathau kinilh Israel te kumpi leh leitungbup kumpi ahi hi (Isa 9:6-7).

Cikziat huai leh lipkhap huai, mulkim huai zah donga Khris hong thuakna te i ngaihsutciang Pa Pasian hong itna leh Tapa hong kipiak khiatna tehpih theihding omlo zah dong in lianlua mahmah hi. Hih pen eiten gupna i ngah theihna dingin Pasian mahmah hong kiphal hong ki piak khiatna ahi hi. Eite ki lawmlohna te i ngaihsut ciang Pasian’ hong itna pen lian lua mahmah hi. Ih mawhna bangin thukhenna thuak ding in a kilawmte i hi hi. Tua hi ta leh mawh nei i hih laitak mah in “Eite tang ding in Khris hongsi hi”(Rom 5:7-8).
Ukeng te tangding in Pasian hong si loin mawhnei mihing te adingin hong si hi. Mihing te pen ukeng te sang sia zaw kanlai hi, bang hang cih leh ukeng ten mawhna bawl lo uh a, langpang lo uh hu. Ih mawhna thaman pen lian lua mahmah ahih man sisan bua lo in maizolo hi.

Pasian hong tat khiat na pen thu namkhat bek om hi. Eima hoihna leh kilawmna hang hi peuh mah lo in, “A KICING HONG HEHPIH NA”(Eph. 1:7) hang bek ahi hi. Tua in man ngenlo a KHAWNKHONG ahi hi.

Pasian it keileng bang Kaci zen Diam?

“ Tua ahihmanin Tapa a um mi peuhmah nungta tawntung ding a, Tapa’ thu a mang lote in
nuntak mulo ding a, amaute tungah Pasian’ heh tawntung ding hi” Jn. 3:36

Ama mite khempeuh leh thu um mite khempeuh hangin minthan’na leh pahtawina a ngah dingin Topa hong pai ni ciangin a noptuak mahmah Topa’ minthan’na huam sung panin amaute kihawlkhia ding a, tawntung gim thuakna a ngah ding uh hi. Ahi zongin note in ka hong gen uh thute um na hih man un tua nopna sungah na om ding uh hi” 2 Thes. 1:9

Ih cih theih nopsak laitak in mihing a si nuam ki omlo hi. Thuak haksa lua genthei beidong dinmun tunhun ciang bek sih ding kilung gulhpan hi. Gimlua haksa lua ih sak hun in sihna kilung gulh masa zaw loin, noptuam damtuam zawkna ki lung gulh ciat hi. Nat leh sat pan suak ta in, hun nuam hunpha zaw ngah kik ding ki lung gulh ciat hi. Tua bek tham loin, hankhuk tungsa ih it te hong hingkik thei leh ki lung gulh ciat a, a kua maciat in nuntak nuam leh lung nopna ki deih ciat hi.

Si leng nuam zaw ding in mihing ten ki deih bawl kha thei mawk mawk hi, ahizong sihding ngaihsutna pen gallian pi khat ahi hi. Hih leitung nopsak leh hamphatna khempeuh pan sihna in kikhen na hong piang sak hi. Sihna cih kammal pen kamsiam zat tangzang khat in ih zangh kha zel hi. Sihna pen deih kicin na hinai loin, lam etna teng tawpna ahi hi. Mihingte lung gulh bulpi in lung nuam sin nuam a nuntakna ahi hi.

Tua bangtek mah in Pasian in eite hong bawl hi. “ Amah in na khempeuh ama hun tawh a kituak dingin bawl hi. Amah in mai lam thu theih nopna lungsim eite sungah hong guan’ a, ahi zongin ama sepnate a cing-a theih zawhna ding hong guan lo hi”(Eccle 3:11).

Pasian’ lim leh mel sun in hong kibawl te ih hihman Amah in nuntakna leh ih nuntakna hong it tawntung hi. Tua mah bangin, eite a nungta tawntung ding ihi hi. Nuntak tawntung na gal in sihna /muatcipna ahi hi. Tua pen MEILI (hell) zong kici hi. Hih thu mah Jesu in genbel in na nei a, man ngenlo a hongpiak nuntak tawntungna anial peuh mah in Pasian sinso na leh heh na thuak ding hi. “Tua ahih manin Tapa a um mi peuhmah nungta tawntung ding a, Topa’ thu a manglo te in nuntak mu lo ding a, amaute tungah Pasian heh tawntung ding hi”(Jn 3:36).

Tua hehna pen om tawntung ding hi. Jesu gen na ah, “Tua ahih ciangin tawntung gim thuakna sungah amaute pai ding uh a, mi hoihte ahih leh nuntak tawntungna sungah lut ding uh hi” (Matt 25:46). Hih pen kam tawh genzawh loh gimna lianpi hongpiang takpi ding Pasian’ alangpan mite thuak ding ahi hi. Tua hi a Jesu hong hilh kholh na ah, “Na mit in hong khialhsak leh khelkhia in. Mit kim tawh hell khuk sungah hong kikhiat sangin mit lang khat taw-in Pasian ukna sungah om lecin nang adingin hoih zaw hi. Tua hell khuk sungah thante si ngei lo a, mei zong mit ngei lohi” (Mark 9:47-48).

Tua ahih man hih nuntak tawntungna icih pen akho lo leitung nopsakna leh gentheihna tawh tehkak theih ding hi lo hi. Hell in asia penpen ahih mah bangin NUNTAK TAWNTUNGNA in zong ahoih penpen ahi hi. Tua mun pen mongneilo ciangtan neilo a nop sakna hi a, mawhna leh dahna khempeuh abeina mun ahi hi. Siat theihna leh latheihna khempeuh abeina mun ahi hi. Tua mun pen hoihna, thumanthutan na, tawntung nopsakna, dikna leh siantho na tawh kidim na mun ahi hi.

A muat thei a sia thei ih pumpi pen amuat theilo asia theilo pumpi tawh hong kikhek zawhciang tua tawntung nopsakna mun ah amang tawntung dingte ihi hi. “Kua mah in amuh ngei loh, a zak ngei loh, piang thei dingin zong a ngaihsut loh uh thu pen Pasian in amah a it mite adingin a bawl kholhsaksa ahi hi” (1 Cor 2:9). Khris a um a muang mite ading in a hoih penpen nate hongpiang ding ahih lam kician takin hong hilh zo hi. Lungkim huai takin Pasian vangliat minthanna ih mu takpi ding hi. “Nang bek a man Pasian na hihna thu leh nangmah in na hong sawl Jesu Khris hong theih na pen amaute’ adingin nuntak tawntung ngahna ding lampi ahi hi” (Jn. 17:3). Khris in gim hong thuak in hong si hi; bang hang in amah pom in nuntakpih lo ding i hiam?


Siatna Tampi Piangding Phalna Apia Pa Pasian Koici bangin It Thei ding ka Hiam?

Note in ahih leh, kei’ tungah a sia dingin na ngaihsun uh hi. Ahih hangin Pasian in tu hun-a mah bangin mi tampite a nuntak theihna a pian’ na dingin a hoih dingin a ngaihsut ahi hi. Piancil 50:20

Herod leh Pontias Pilat in hih khuapi sung teek mahah Gentail mite leh Israel mite tawh kikupna nei uh a, nangmah in Khris dingin na bawl, a siangtho na nasempa Jesu thahna dingin a vaihawm uh hi. Nangmah in na deihna bangin a piang dingin na vangliatna tawh na khensatna thu khempeuh a sem dingin amaute kikhawm uh hi. Sawltak 4:27-28
“Topa i Pasian in hong lahkhiat loh thusim om a, ahih hangin hih thukham sunga thute khempeuh i zuih theihna dingin hong lakkhia a, eite leh i suan i khakte’ zuih tawntung ding ahi hi” Thuhilhkikna 29:29

Ahoih zawkna dingin Jesu Khris sungah Pasian in siatna leh gimna atunsakna thu pen alamdang mahmah leh thuthuk mahmah mihingte tel bat zawhloh thusim ahi hi. Siatna (mawhna) bulpi pen thusim cih tawh hong kipan khawm hi. “Suahtakna” (free will) cih kammal pen “thusim/thutak” cih tawh deihna kibang ahi hi. Kicingtak sa a Pasian bawlna in banghangin mawhna sungah tumthei cih Laisiangtho in hong hilhcianlo hi. “Thuthuk/thu laigil” cih kammal pen “Pasian’ ukna/thuneihna” cih kammal inzong kizang thei hi. Hih thuthuk dotna te pen “thusim” cin Deut 29:29 sungah kimu thei hi.

Siatna/mawhna koipan hong kipan masa cih Laisiangtho tangthu leh biakna tangthu in hilhcian na hong pia lo a, mawhna sungah Pasian ukna hong koici tum a, tawntung thuman na leh nopsakna hongpiak zia bek hong hilhcian hi. Kum 17 sung tawntung ki pampaih in, Egypt gam ah sila dinga kizuak Jacob tapa Joseph pen Messiah hicin Laisiangtho siam pawlkhat in gen uh hi. Ahizong sila Joseph pen Egypt kumpi ding Pasian in lamsang in amah azuak a pianpih sanggam te kialgentheihna pan gumkhia kik hi. A sanggam te tunga hibangin Joseph in thugen hi: “Note in ahih leh, kei’ tungah a sia dingin na ngaihsun uh hi. Ahih hangin Pasian in tu hun-a mah bangin mi tampi te a nuntak theihna a pian’na dingin a hoih dingin a ngaihsut ahi hi” (Gen 50:20). Jesu Khris hong tat khiat ziading Joseph nuntakna ah hong lak khin zo hi.

Khris khang tangthu en kik dinh ni. Hun khat lai in Israel ten Pasian bek kumpi in nei uh hi. Ahizong amauten mihing kumpi ngen uh hi: “Ahih hangin mite in Samuel thu ngai nuam lo uh hi. Amaute in, “Hilo! kote tungah kumpi khat ka nei ding uh hi”.(1 Sam 8:19). Khuanung ciangin amaute khial kici uh a: “Kote ka sih lohna dingun na nasemte’ adingin TOPA’ tungah thu ngen in; bang hang hiam cih leh ka khialhnasate uh bang kote’ adingin kumpi khat ngenin ka khialhnate uh banah hih siatna ka behlap lailai uh hi” (1 Sam 12:19). A hizong Pasian in nusia lo hi. Hih kumpi namte sungpan Pasian in khris hong paisak hi. Mawhnei mite tankhia dingin mawhneilo Gumpa in mawhnei mite mah bangin dimun hongla hi.

 A thuak dinga kisehsa gimna leh siatna tunga gualzawhna anei khris pen lamdang mah mah hi. Mulkim huai leh cikziat lipkhap huai taka khris phut khakte in gimna leh mawhna ahi hi. Ahizong Pasian in nusia loin ompih hi. Laisiangtho in agen na ah: “ Pasian in thu a ma theihkholhna leh ama geelna tawh kizui-in note khut sungah tua Jesu a hong piak ding a ngaihsutsa hi a, note in singlamteh tungah khai-in mi gilote khut tawh amah na that uh hi” (Acts 2:23). “Heroh leh Pontias Pilat in hih khuapi sung teek mahah Gentail mite leh Israel mite tawh kikupna nei uh a, nangmah in khris dingin na bawl, a siangtho na nasempa Jesu thahna dingin a vaihawm uh hi.Nangmah in na deihna bangin a piang dingin na vangliatna tawh na khensatsa thu khempeuh a sem dingin amaute kikhawm uh hi” (Acts 4:27- 28).

Pasian’ Tapa mudah simmawh leh thahna sanga alianzaw mawhna omlo hi. Genbanna leh mawh neilo khris hongthuakna leh hongsihna sanga lian gimna omlo hi. Hita se leh Pasian in nusia loin ompih hi. “Ahih hangin amah a kisatnim ding pen TOPA’ deihna ahi hi. Amah in natna thuak sak hi. Mawhna hangin ama pumpi a kipiak ciangin amah in a suan-le-khakte mu ding a, ama khan a sau ding hi. TOPA’ deihna ama khut sungah pung ding hi” (Isa 53:10). Mawhna leh siatna omlo, khris sih kulsese loin, tawntung thuman na leh nopsakna Pasian in leitung ah pia thei lo hiam? A taktak in cileng, ih thuak gimnate hangin tatkhiat lametna kingah hi. “Ahi zongin Jesu in, “Pa aw, amaute in bang hih ihi hiam, cih theilo uh ahih manin a mawhna uh na mai sak in,” a ci hi (Luka 23:34)

Pasian thu I cih bang hang maw?

Mi hoihte kihonkhia zo liailiai bek ahih leh Pasian a umlo, mawh nei mite bang suak ding ahi hiam?’’ 1 Pet. 3:18

Ahi zongin a gamlapi-ah a om ngei hi napi-in tu-in Khris Jesu tawh na kipawlna hangun ama sihna in Pasian kiang hong tun pih hi. Eph. 2:13

Tua ciangin Pasian biakna tau-ah ahi zongin, ka lung hong damsak Pasian kiangah ahi zongin kong pai ding a, laiza khausai la sakna tawh nang kong phat ding hi Late 43:4

Pasian in agensa thute akisep zawhciang “Lungdamna Thu” kici hi. Biakna icih pen Pasian thu himasa zawloin, “Thuthang/thuthak” hiphot hi. Hih pen bang tawh kibang hiam cih leh amaute a honkhia ding galkapte hongtungzo hi cih Radio gensiam na thuthak aza galte mat thongkia te lungdam kipahna tawh kibang hi. Bang hang hiam cih leh amaute ahonkhia ding hong tungzo a, suakta ding uh ahihman lungdam uh hi.

Tua ahih leh “Lungdamna Thu” ahoihna leh athupina in bang hiam? Adang hiloin, PASIAN MAHMAH ahihman hizaw hi. Gentehna in; Tatkhiatna pen hell pan suah takna bek hileh lungdamna hi theilo a; Diktanna pen Pasian tawh kilawmtatna a om kei leh lungdamna hithei lo a; Saltanna pan hong suakta sak Hotkhiatna pen Pasian kiang hong tunpih kei leh lungdamna thu hilo a; Pa Pasian angpom loh innkuan misuahna pen lungdamna hilo a; hih thute pen ngaihsut huai mahmah hi. Tua ahihman mitampi in Pasian pom loin, lungdamna Thu bek apom ki om ta a, lau huai mahmah dinmun kitung ta hi. Hell tawh kipelh theihnang, mawhmai ngah nang, Pasian hehna tawh kipelh theihnang leh Pasian thupha san theihnang ngah nang in lungdamna thu kipom mahmah hi. Hih thute pen kuama nuntakna ki puahphat kulloin a piangthei thute ahi hi. Hih thupha te ngah theihna ding in PIANTHAK sese kullo hi; bang hang hiam cih leh Dawimangpan zong tua te lunggulh hi.

Hih natuamtuam te deihna in khialh luatna omlo hi. A taktak a haihuai thuzong hilo hi. Jesu hong sihna ahang thulianpen in hi thute hang ahi hi. “Khris mahmah zong note’ adingin si a, Pasian kiangah note hong tun’ pih theihna dingin mi hoih khat in mi hoih lote’ mawhna hangin khatvei a si hi. Mite in ama leitung pumpi that a, ahi zongin Pasian in kha nuntakna a pia hi”(1 Pet. 3:18).

Bang hangin lungdamna thu pelmawh in kisam? Eite pen tawntung nopsakna ngah ding leh Pasian hong hotkhiatna minthan na amu ding in hong ki piangsakte ih hi hi. Pasian kiang panlo nopsakna pen Pasian zahtak lohna leh neusakna ahi hi. Eima nopsakna tung tawn in Pasian minthan na kilangsak ding in eite hong ki piangsak ahi hi. Tapa in ama nuntakna tawh hong lei a hongpiak lungdamna thu i cih pen eite adingin tawntung nopsakna Pasian hong sepsak thute ahi hi.

Khris hong pai ma hun saupi lai in, akicing tawntung nopsakna ih ngah theihna dingin Pasian mahmah hong kilangh khinzo hi. “Nangmah in nuntakna lampi keimah nong lak hi. Nangma omna-ah lungdamna lian om a, na tak lamah nop tawntungnate om hi” (Ps. 16:11). Tua ciangin Amah in gim thuak dingin Khris hong sawl a, “Pasian kiang hong tunpih hi”. Tomno sung mawhna sungah nuam takin omna sangin Pasian mite tawh gimna thuak khawm ding a ut zaw hi (Heb. 11:25). Tomno nopsaknate nusia in khris kiang zuan ni.

Hihte khempeuh kei a dingin bang aa cihnop na hiam? Pasian’ Tapa a um mite in nuntak tawntungna a nei na hih lam tak uh na theihna dingun hih lai a hong gelh ka hi hi. I Jn. 5:13 Aman takin kong genin-ah: Ka thugennate za-in kei hong sawlpa a um khempeuh a nungta pai suak ding hi ta hi. Mawhsakna thukhenna ngah nawnloin, sihna panin a hingkik ta ahi hi. Jn. 5:24

I Topa Jesu Khris in a hehpihna tawh nuntak tawntungna hong piak ding na ngak kawm un Pasian thu-ah na kip un. Judah 1:21

Ama minthanna dingin Pasian in Eite hong piangsak

Keimah in leilu lam kiangah, piakhia un; leitaw lam kiangah, len nawn kei un; keima pian’ sak ka bawlsa, keima minthan’na dinga ka pian’sak, keima mintawh a kilote khempeuh ahi, ka tapate a gamlapi panin, ka tanute leimong panin hong paipih un, ka ci ding hi,” Isa. 43:6-7

Vantung lam etna in aksi te agolsemsem in hong muhsak bangin, ama liatna leh thupi na agol semsem a muthei ding in Pasian in eite hong bawl ihi hi. Ama hoihna, thumanna, cimna pilna leh adikna te a pulak leh aki langkhia sak dingin eite hong kipiangsak ahi hi. Pasian ih phat ih pahtawi leh a phatphat dingin Pasian in eite hong piangsak hi. Ama Minthanna dingbekin Mihing khempeuh Nuntak ding kisam. “Tua ahih manin keima in ka hong gen nop thu in: Na hihna khempeuh uh, nekna dawn” na-ah ahi zongin Pasian” minthan’na dingin na hih un” 1 Cor. 10:31 

Ama minthan nadingin Pasian in eite hong bawl ahih leh ama minthanna ding bekmah in ih nuntak pah ding ahi hi. Ama hong sehna ombangciat in ih sepding ahi hi. Eite adding hongsepsak nate tungah lungkimzawhna tawh Pasian a liatna kilatsak ding a masa pen ahi hi.

Tua te in Pasian ih itna (Matt. 22:37); ih muan ih suan na (1 Jn. 5:3-4); lungdam kohna (Ps. 100:2-4); midangte ih itna (Col. 1:4-5), hibang sepna in Pasian deih thumanna zungpi te ahi hi. 

Pasian aminthan nazah in kiphat zolo hi. 

“Mi khempeuh mawh ciat uh a, a hong honkhia Pasian tawh kigam la uh hi” Rom. 3:23

Mi khempeuh mawh ciat uh “ bang adeihna ahi diam? Ih phat ding, pahtawi ding, muan zah ding, leh piak zah ding kilawm bangin kisem zolo cihna ahi hi. Ama lampi bang zui loin a liatna zah tawh ki lungkim zolo hi. “Amaute in Pasian thei napi- in a zahtak dingun a kilawm bangin zahtak loin, a tungah a lungdam dingun a kilawm bangin lungdam lo uh hi. Amaute in thu hoih ngaihsun nuam lo uh a, a ngaihsutnate uh a mawknapi a suak hi. Amaute pil a kisak mahmah uh hangin a hai mahmah uh ahi hi. A hing tawntung Pasian bia loin, mi, vasa, ganhing, ahih kei leh a bokvak ganhingte tawh a kibang limte a bia zawsop uh hi” (Rom. 1:21-23). “A tak takin eite khempeuh zong amaute mah i bang ngei a, i pian pih lungsim zui-in nungta-in, i pumpi leh i lungsim deihna bangin i gamta hi. Tua ahih manin eite khempeuh zong Pasian hehna hangin gim a thuak dingte ihi hi” (Eph. 2:3). “Tua thu phawk un la lau un: vantungte aw, dah mahmah un la liing un, TOPA in kong ci hi. Bang hang hiam cih leh ka mite in mawhna nam nih a bawl zo uh hi: Nuntakna ciktui ahi keimah a hong tai san zo uh hi. Tuikhuk to tawm uh a, a tuikhuk tawh uh keh-in tui a vung thei kei hi” (Jer. 2:12-13).

Ih vekpi mah in Pasian’ mawhsakna a thuak ding te ihi hi.

“Bang hang hiam cih leh mawhna in thaman hong piak pen sihna hi a, a hi zongin i Topa Jesu Khris tawh i kipawl manin Pasian’ hong piakkhong pen nuntak tawntungna ahi hi” Rom. 6:23

Eiten Pasian minthan na neusek hihang. Koici bangin maw? Ama sangin nadangdangte ih thupisak zaw hi; ih lungdam theihlohna, ih muanlahna leh ama thupiakna bangin zuih zawh lohna cih te ahi hi. Ama tawntung nopsakna leh aminthan na sangdingin hong khaktanpen Pasian a thuman hizaw hi. “Ama mite khempeuh leh thu um mite khempeuh hangin minthan’ na leh pahtawina angah dingin Topa hongpai Ni ciangin a noptuak mahmah Topa’ minthan’ na nuam sung panin amaute kihawlkhia ding a, tawntung gim thuakna a ngah ding uh hi. Ahi zongin note in ka hong gen uh thute um na hih manun tua nopna sungah na om ding uh hi” (2 Thess. 1:9).

Hell cih kammal pen Thuciamthak sungah 12 vei a kigen na sungpan 11 veipen Jesu kammal mahmah sungpan hong gingkhia ahi hi. “Hell” cih kammal pen tangthu sungpan lah hilo, mi kamcidam khat peuh in a phuah tawmzong hizenzen lo hi. Samsiatna pan mimawh te hong tankhia Pasian’ Tapa mahmah in deihsakna sangpen tawh hong hilh kholhsa a hi hi. Ih thudon loh mawkpen dipkuat huai tak ei.

Laisiangtho in mihingte dinmun ciantak in hong gen pha pha hi kei zen leh lamet bei dinmun leh khimbangzing mailam a manawh te ihi hi. Ahizong lametna omlai ……………..

Nuntak Tawntungna leh Nopsakna Pia ding  in A tapa khat Neihsun Pasian in hong sawl

“Khris Jesu, mawh neite a honkhia dingin leitungah hong pai hi, cihna thu a man hi a, a up-huai a sanhuai thu ahi hi. Keimah zong tua mawh nei mite lakah a mawh pha bel ka hi hi” 1 Tim 1:15

Mihing bangmah in mimawh te tankhia dingin Jesu Khris hongsihna pen lungdamna sangpen ahi hi. “A hi zongin a thuman taktak ci lehang, a sisa mite zong hingkik takpi ding hi cih a kitel theihna dingin sihna panin Khris kihingkik sak khin zo hi” (1 Cor 15:20). “Ama hong sihna hangin mawhna a kimaisak theihna dingin Pasian in Jesu hongpia a, amah a umte in mawh maisakna a ngah uh hi. Amah tawh i kipawl theihna ding zia hong lahna in hih bangin Pasian a hong gamta ahi hi. Pasian a lungduaina hangin a beisa hunah i mawhnate hong en khong phot hi. Ahi zongin tu hun ciangin Jesu a um mi khempeuh Pasian tawh a kipawl theih na ding leh aman thumanm ahihna a kilatsakna ding in mihingte mawhna tawh kisai-in na hong sem hi” (Rom. 3:25-26). “Khris mahmah zong note’ adingin si a, Pasian kiangah note hong tun’ pih theihna dingin mi hoih khat in mi hoih lote mawhna hangin khat vei a si hi.Mite in ama leitung pumpi that a, ahi zongin Pasian in kha nuntakna a pia hi” (1 Pet. 3:18).Tawntung lungkimna ngah theihna dingin Pasian inn ah zuan ni.

A kisik, A muangten sihna tawh Khris hang Leihamphatna sang uh hi.

“Topa Jesu um in, tua hi leh nang leh na innkuanpihte in hotkhiatna na ngah ding uh hi,” Sawltak 16:31

Kisik, kikhel cih kammal pen hong khem mawhna te pelhna ahihi. “Upna” icih Jesu sunga Pasian hong kamciam te ah lungkim lungmuan zawhna ahi hi. “Kei pen a nungtasak thei an ka hi hi. Ka kiangah hong paite gilkial ngei nawn lo ding a, kei hong umte a dang taak ngei nawn lo ding hi” (Jn. 6:35). Tat khiatna pen thalawh theih hilo hi: kilawmlo pipi mah in eite hongki tankhia hi (Rom. 4:4-5), hehpihna hangin upna bek tawh gupna kingah hi (Eph. 2:8-9) hipen mannget loh hong kipia khong ahi hi (Rom. 3:24). “Vantung ki-ukna pen lo lai-ah a kiseel sumtawh kibang hi. Mikhat in amuh khak ciangin lim takin a seel pha hi. Amah lungdam mahmah in a inn-ah ciah pah a, a neih khempeuh a zuak khit ciangin tua lo a lei hi” (Matt. 13:44). Tua bang danin i sep ciangin Pasian gel hong piansakna te tangtung a, eite i lungkim in, eite sunga ama minthan na hong kilangh hi.

Bang kasem ding Hiam?

“A dik siapa aw, nuntak tawntungna ka ngahna dingin bang hih ding ka hi hiam?” a ci hi. Mark 10:17

“Thongcingpa in zong meivak a la dingin mi khat sawl a, thong sungah tai-in lau kawm liing kawmin Pawl leh Silas khe kiang va kiden na-in a va bok suk hi. Tua ciangin amaute pusuahpih a, “Tote aw, hotkhiatna ka ngahna dingin bangci gamtat ding ka hi hiam?” ci-in a dong hi, amaute in “Topa Jesu um in. Tua hi leh nang leh na innkuanpihte in hotkhiatna na ngah ding uh hi,” ci-in a dawng uh hi. Sawltak 16:29-31

• Hong khem hongzol mawhnate pel in.

• Mawhna kol, hunkhenna leh kisuan na pan na suah tak theihna dingin Jesu zuan in. “Topa a sam khempeuh in hot khiatna ngah ding uh hi” (Rom 10:13)

• Nang adingin Jesu sungah Pasian hong koihsak nahoih tetungah na lametna khempeuh ngain.

• Mawhna vangliatna khempeuh upna tawh sumai inla, Pasian hong kamciamna tungah lungkim khamuang in.

• Ama minthan’na leh a hoihnate a bei khawm dingin a hong sampa i theihna hangin Pasian’ deih bangin i nuntak theihna dingin ama vangliatna in eite’ kisap na khempeuh a hong pia hi. (2 Pet. 1:3-4).

• Laisiangtho abulphuh pawlpi bel inla, Khris a bulphuh thuzui mite tawh kilawmta in bia khawm in (Phil. 3:7)

Pasian in a lungdam ngiat dingin hong thupiak na thei hiam?

 “Lungdamna tawh TOPA’ na sem un” Late 100:2

“TOPA sungah lungkim in, amah in na diehna hong pia ding hi” Late 37:4

Na lungdam theihna asangpen leh a singtho Pasian’ kicin na lamkhat in atonkhop theihna leitung adingin thuthang hoihpen ahi hi. Pasian hong piak Jesu tungtawn a kingah a sangpen alianpen tawntung lungdam kipahna in leitungah lungkimna akici nadangdang te sangin lianzaw zaizaw hi. “Nangmah in nuntakna lampi keimah nong lak hi. Nangma omna-ah lungdamna lian om a, na tak lamah nop tawntungnate om hi” Late 16:11

John Piper’ Laibute lak pan Simding hoihsakte

The Passion of Jesus Christ
Seeing and Savoring Jesus Christ
Don’t Waste Your Life
Desiring God
When I Don’t Desire God
Taste and See
God Is the Gospel
Future Grace

Desiring God

PASIAN LUNGGULHNA (Desiring God) cih kipawlna pen, na khempeuh tungah nopsakna dingin Jesu Khris tungtawn a kingah mi khempeuh tungah Pasian hongpiak lungdam thu tangko na ahi hi. Ama sungah lungkim nahangin kote tungah Pasian minthanna hong kilangh a hihman koten note nopsak lungkim na dingin nungta in na kasem uh hi. Pasian thu tawh kisai thu hoihnono man-ol nono leh akhong in Pastor John Piper tungtawn in aki ngah theih ban ah, hehpihna tawh ka Website ah hong hawh un. Akingah thei vante in, laibu tuamtuam, CDs, DVDs, thugenna, thulu.

 Na Hanciam Zawh dandan

“NA HANCIAM ZAWH DANDAN” cih paidan kanei uh hi. Man ciangtan omselo mite hong lpiak zawh zahzah kasang uh hi, bangmah hong kipiak zawh kei leh zong akisap vante ka pia veve ding uh hi. Eite tungah man ngenlo nuntakna Jesu hongpiakna te ka ngaihsut uh ciang a khonkhong in midangte piak khiatna pen nuamsa lungdam in ka angtang mahmah uh hi(Matt. 10:6). Dangka hangin Khris lungdamna kizelh ding a khak tan ahih lohna dingin ka hanciam uh hi. (1 Cor. 9:12). :Tua hi a, dangka tawmlua in na laibu/audio deih khat hongkhak tan thei mai hi, ahizong maizum kisuan dingin ngaihsun keizaw in. Kote tawh hong kizom in, na kisapna bang ka thei nuam uh hi, nongngetna bang ko piakzawh ding uh kote lunggulh leh ka lungkim na uh a hi hi.

Laigelh pa Tangthu

John Piper in Bethlehem Baptist Chruch, Minneapolis, USA ah Pastor sem hi. Amah pen Greenville, South Carolina, USA ah khangkhia a, Wheaton College, ah pilna sin hi. Pasian sapna azak ciangin biakna nasep hong kipan hi. Fullrer Theological Seminary ah Bachelor of Divinity (BD) sin a, University of Munich, Germany ah Doctor of Theology (D.Theol) zo hi. Bethel College, St.Paul, Minneasota ah kum guk sung laihilh a, 1980 kum ciangin Bethlehem pawlpi ah Pastor sem hi. Amah in laibu tampi zong agelh ban ah, Desiring God min tawh nisim in Radio sung ah lungdamna thu tangkona nei hi. A zi Noel tawh tapa li leh tanu khat nei a, tu in suan leh khak tampi neita uh hi.


For a complete list of available titles, please visit www.desiringgod.org .
Crossway Books, a ministry of Good News Publishers, graciously allowed the use, in this booklet, of selections from What Jesus Demands from the World by John Piper. Please visit them at www.crossway.com

Nang A’ ding Lungnopna
Copyright © 2010
Published by permission with Desiring God

Logos Baptist Bible College & Seminary
Pinlong 8/A – 55, Kalaymyo
Myanmar


(AGualkik - Cinpu Zomi. )


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Nang A’ ding LUNGNOPNA Laibu. By - John Piper Description: Rating: 5 Reviewed By: Cinpu Zomi
Scroll to Top