728x90 AdSpace

Hot
Menu
Zon-ol na Donate

Latest News

SAIZANG KHUA THU






SAIZANG KHUA THU


INTRODUCTION
Saizang khua pen Tedim khuapi leitawlam a om khuapi khat hi. Tedim khuapi tawh Tai (7)(miles) bang kilamna hi. Geographical coordinates tawh gen leng 23° 18' 0" North leh, 93° 39' 0" East te kituahna ah om in, Tuipi maitang pan (Sea level) Pi 3000 sang hi. Tedim Township sung a om khua teng lak pan khualian khat in kihel a, 2009 kum in inn (420) val, pasal (1385) le numei (1455), milip avekipi (2840) teengna khuapi khat hi. Saizang khuapi leilulam-ah Phaileng, Sezang le Tedim khua-te, leitawlam-ah Mualbem le Vangteh khua-te om uhhi. Saizang khuapi nisuahnalam-ah Dimpi le Suangpi khua-te, nitumnalam-ah Paakzang le Kaptel khua-te om uhhi.

Kizopna
Saizang le Leitawhtan(Tedim) kikal tuuk le khal in mawtawpi pai theih ding lampi khat nei a, Tedim-Kalaymyo (Kawlpi) mawtaw lampi tawh pailet suak thei hi. 1944 kum pawl a Mikang kumpi te ziksa Tedim-Saizang-Mualbem lampi pen akipuah toto hi. Saizang khuapi pan Ngatan lei kantan in Mualbeem khua tawh mawtawneu(jeep) paitheihna lampi in kihongzo lai bek a, khuakhal sung bek in kizang thei hi. Hih lampi tawh akizom in Meitei gun pen Liivei lei pan kantan khit ciangin Paakzang, Heilei khua te dong mawtaw lampi pailet suak hi. Saizang-Vangteh lampi zong geelna kinei a, Saizang khuapi pan Sialtang lui, Innkhang lei kikal mawtawneu paitheina lampi 70% bang kizik khin hi. Saizang khuapi leh Kaptel khua kikal pen Mikang kumpi hun, Galpi nihna(WW II) lai in, Kaptel lei dong mawtawneu pai nading lampi aki bawlkhit hangin, kipuah kik zo nawn lo hi. 1995 kum Pu Zel Za Langh Hausak lai in kumpi tung pan huhna tawh Saizang-Tedim kikal mawtaw lamthak kizong thuah hi. Tua kum mah in mawtawneu(jeep) pai theihna lampi in kihong zo hi.

2005 kum in khua-nu khua-pa hanciamna tawh kumpi tung pan in auto telephone line khat kingah hi. Exchange zumpi khat dingsak in khuasung mun 30 val ah kikhenkhia kik hi. 2009 kum in Hausa pawl hanciamna tawh kumpi tung pan Sub-Post Office(Laito zum) hon theihna ngah hi. Oct 13, 2009 ni-in Laito zum honpawi nopcitakin kibawl hi.

Galpi nihna hunlai in Saizang khuapi pan leitawlam tai (4)na om Ngalzang kicihna pen Mikang kumpi in vangleng tual in zang ngei hi. Khamtunggam(Chin) sung a vangleng tual akibawl theih nading mun atam het lo lak pan khat in kihel hi.

Pilna
Saizang khuapi pilna lam tawh kisai amasa penpen Zolai sang(Anglovenacular 4th Standard School) khat June 1, 1941 ni-in kihong hi. Burma Socialist Program Party(BSPP) hun sung July 10, 1977 ni-in tan (8) ciang kahtheihna Sang(Basic Education Middle School) khat kingah leuleu hi. Tu in Saizang khuapi-ah Tan (8) ciang kahtheihna sang khat, 1986 kum a akingah Tan (4) ciang kahtheihna sang khat, avekpi in kumpi sang (2) om hi. Tua ban-ah sangkah thei nai lo naupangte adingin Ciimnuai Development Center, Saizang innpi le St. Joseph Convent-te ah naukepna le naupang pattahna sang(Pre-school)te kihong hi.

Cidamna
1971 kum in Sub-Health Center kumpi tung pan kingah a, tangpi cidamna nading in nausuak khutsiam(mid-wife)khat zong hong koihsak pah hi. Tuma in Saizang Catholic Pawlpi deihsakna tawh 1956 kum a kipan in St.Joseph Convent a om nungaksiangtho te'n kua mah deidan lo in cina lunate hong bawl hong khoi uh hi. Zato inn ding singinn khat 1995 kum in kilam a, 2002 kum ciangin taihinn hoih mahmah khat in kikhan zo hi.

Nidang lai pek in Khuasung a om lui tuinak teng in Saizang khuabup neek le dawn ding hon cing zolo hi. Feb 15, 1927 ni-in Pu Pum Tual le PU Thawng Za Kham-te hanciamna tawh Phaileng khua le Saizang khua kikal Zozang pan tui kila hi. Tui akilak masakpen in kiciamteh hi. Ahizong kithuthuah lohna tuamtuam tawh kipuah zo nawn lo in, mangthang kik hi. Tua khit ciangin zong Vatuinak pan tuilak ding kipan ngei napi', kizom suak zo tuam lo hi. 1947 khit ciangin Zalui(Tedim) tuilakna a kizang siktuizawn-te pawlkhat kingah hi. Tua teng kitawphah in tangpi tangta hanciamna tawh Aug 12, 1950 ni-in Zozang tui kila a, Mualtung le Singzang veeng teng nuamtakin kizang zo hi. 1980 khit pawl in Tedim gamsung ah UNICEF huhna hong tung a, khuasung vaihawm maikai-te hanciamna tawh 1983 kum in Zawmtui kila hi. Inn kibehlapna le tuinaak kipuahzawh lohna tuamtuam tawh hong kicing zo nawn lo leuleu a, 2005 kum in gamdang huhna tawh Lamzang khuakhung Kengtang tuinaak pan tui kila thuah leuleu hi.

Biakna
Saizang khuapi ah Christian upna pen 1920 khit pawl in hong tung a, tangkhua ahih mah bangin atuma in pupa ngeina Dawi biakna leh Laipian Pau Cin Hau upna te na sang uh hi. Tu in Saizang khuapi ah Roman Catholic, Tuiphum(ABM), E.B.C, Siangsawn (Pau Cin Hau), Full Gospel, A.G, Z.B.C, S.D.A leh Buddhist cih bangin biakna pawlpi (9) om hi. Tua teng lak panin RC tampen a, 65% bang pha hi.

Ki-ukna
Kawlgam Suahtakna ngah zawh Hausa seem ngei teng
1. Pu Thawng Za Khup     1928 - 1951        (Sukte)
2. Pu Gen Pum    1951 - 1956        (Hatlangh)
3. Pu Thawng Za Khup     1956 - 1961        (Sukte)
4. Pu Gen Pum    1961 - 1966        (Hatlangh)
5. Pu Khan Nenh Pau        1966 - 1972        (Gualnam)
6. Pu Song Cin Pau            1972 - 1974        (Songput)
7. Pu Vungh Za Kham       1974 - 1981        (Munsuang)
8. Pu Song Cin Pau            1981 - 1985        (Songput)
9. Pu Hen Pau     1985 - 1988        (Gualnam)
10. Pu Vai Kho Thang       1988 - 1989        (Songput)
11. Pu Zam Do Lian          1989 - 1991        (Tawmging)
12. Pu Langh Khan Thang               1991 - 1994        (Tawmging)
13. Pu Zel Za Langh          1994 - 1996        (Gualnam)
14. Pu Suan Kam               1997 - 1998        (Gualnam)
15. Pa Lian Kho Thang     1998 - 1999        (Songput)
16. Pa Gin Do Langh         1999 - 2000        (Tawmging)
17. Pa Lian Kho Thang     2000 - 2002        (Songput)
18. Pa Tual En Pau            2002 - 2006        (Songlam)
19. Pa Suang Zam Thang 2007 -   (Hatlangh)

Etkak;
Saizang Tuiphum Pawlpi, Diamond Jubilee (2003)
Saizang khua tui lakna thu - Pa Awn Sian Pau; Saizang Tuiphum Pawlpi, Diamond Jubilee (2003)
Muanding Laitai (Lom 2, Hawm 3); July-September 2008
Muanding Laitai (Lom 3, Hawm 3); July-September 2009
Muanding Laitai (Lom 3, Hawm 4); October - December 2010


EDUCATION
Saizang khuapi ah Tan(8) ciang akikah theihna Basic Education Middle School khat leh Tan (4) ciang akikah theihna Basic Education Primary School khat, kumpi sang avekpi (2) om hi. Tua ban-ah sangkah thei nai lo naupangte ading in Ciimnuai Development Center, Saizang Innpi leh St. Joseph Convent-te ah naukeepna leh naupang pattahna Sang-te kihong hi.

Contents
1.Thumasa
2.Laithei Masa teng
3. Anglovenacular 4th Standard School, Saizang
3.1. Zolai Sang Headmaster seem ngei teng
4.Basic Education Middle School, Saizang
4.1.B.E.M.S Headmaster seem ngei teng
5.High School Sangke Ding Hanciamna
5.1. Tan (9), Tan (10) hilhding kicial ngei teng
6.Basic Education Primary School, Saizang
6.1.Primary School Headmaster seem ngei teng
7. Pahtawina
7.1 Siapi Tun Khan Nang (T.E.O)
Siapi Tuang Do Kham (T.E.O)
Saizang' ta Distinction tawh High School zo teng

Thumasa
Saizang khuapi pen 1889 kum in Mikang kumpi uksung kitung hi. Tua hun laitak in Saizang khuapi hausa pen Pu Do Tual (Sukte) hi a, mikang kumpite in zong Kawllai leh Mikang lai hong hilh ahih manin laithei pawlkhat ki om khin hi. 1917 kum in Piantit (France) kipai in, hong ciah kik uh ciangin Lushei aw tawh A, Aw, C, Caw, cih a kipan khuasung ah Zolai sim hong kipan hi.

1936 kum in India kumpi khutsung panin Kawlgam atuam vilvel in hong kha khia a, Mikang kumpi in 1937 kum in Saizang khuapi-ah Anglovenacular 4th Standard hong pia hi. Ahizong tua laitak a hausa seem Pu Thawng Za Khup (Pu Do Tual’ tapa) leh khuasung vaihawm te’n haksakna tuamtuam tawh na sang ngam pak lo a, June 1, 1941 ciangin Mikang kumpi deihsakna mah tawh Saizang khuapi ah Anglovenacular 4th Standard Sang kihong zo hi.

Laithei masa teng
Hih bangin Saizang khuapi-ah sang ki neihzawhma pek in, anuai-a teng in lai nathei khin uh hi.
(A) Kawllai ana siam mahmah Pi Tel Za Kai (Ukpi Thawng Za Khup’ zi)

(B) Kawllai Tan (2) ciang azo –
(1) Pa Gen Pum
(2) Pu Neng Zam
(3) Pu Suah Cin

(C) Kawllai Tan (4) ciang azo –
(1) Pu Son Tual
(2) Pu Zen Kam
(3) Pu Dal Do Zen
(4) Pu Thawng Za Lian
(5) Pu Theu Thang

(D) Mikang lai Tan (5) ciang azo –
(1) Pu Thual Za Tun
(2) Pu Son Ki Thang

(E) Mikang lai Tan (6) ciang azo –
(1) Pu Son Zam
(2) Pu Thang Za Kham
(3) Pu Khan Nen Pau
(4) Pu Lian Tual
(5) Pu Hen Pau
(6) Pu Thuam Cin Pau
(7) Pu Neng Kho Kam
(8) Pu Song Khan

(F) Mikang lai Tan (7) ciang azo –
(1) Pu Thawng Za Khup
(2) Pu Dal Za Kam

(G) Mikang lai Tan (8) ciang azo –
(1) Pu Tual Khen Pau

(H) Tan (10) ciang azo –
(1) Pu Thawng Cin Thang
(2) Pu Neng Khen Thang
(3) Pu Mang Kho Nang

Anglovenacular 4th Standard School, Saizang
Saizang khuapi ah Sang kihoncil June 1, 1941 ni-in Zolai Tan (4) sinding Saizang khuapi pan om zolo a, Pu Thang Kam (Suangpi), Pu Gen Nang (Phaileng), Pu Thang Heh Cin (Phaileng) leh Pu Tual Khan Dai te bei hi uh hi. Saizang khuapi pan Tan (3) sin Pu Tun Khan Lang, Pu Thuam Za Nang, Pu Zel Za Lang leh Dimlo khua pan (3) bek hi uh hi.

Siapi Phut Thang (Suangpi) in sang kihoncil pan 1942 kum dong Siapi hong seem a, ahuh dingin Sia Dal Do hi. Siapi Thawng Kho Hau (Thuklai) in June 1, 1942 kum pan March 31, 1943 kum dong Siapi hong seem a, ahuh zong Sia Dal Do bek mah hi. Siapi Thawng Kho Hau pen 7th Standard azosa khat ahih manin lai hilhdan kicing ban-ah, sangpan paikhiat khit teh akizang thei ding kimawlna (Sports) hita leh, lokhawhdan lam hita leh, Pasianthu biakna lam hita leh abulpi tawmtek zong na theisak ahih manin sangnaupang te adingin muhna leh theihna khangzaw semsem a, Saizang khuapi-ah lai theihnopna leh pilna deihna hong khang hi. Janpangal hong hat ciangin sang kikhak phot a, June 1, 1946 ciangin kihong kik zo pan in, Siapi Son Khan En Do Pau (Vangteh) hong tung hi. Aman tawmvei bek hong sem a, Normal Teachers’ Training Course sinding apaikal in Sia Neng Kho Kam (Saizang) in kumkhat sung Siapi hong seem hi.

Zolai sang Headmaster seem ngei teng
Saizang khuapi, Anglovenacular 4th Standard School, Siapi aseem ngei teng anuai-a bang hi.
1. Pu Phut Thang               (1941 – 1942)    Suangpi
2. Pu Thawng Khaw Hau 1942 -1943         Thuklai
3. Pu Son Khan En Do Pau              1946 – 1946       Vengteh
4. Pu Neng Kho Kam        1947 – 1948       Saizang
5. Pu Son Khan En Do Pau              1948-1955          Vangteh
6. Pu Nugl Za Mang          1955-1957          Sezang
7. Pu Tun Khan Pau           1958 – 1960       Tuipi
8. Pu Pau Hen Thang        1960 – 1961       Ngennung
9. Pu Khum Dal Thang      1961 – 1962       Vangteh
10. Pu Tun Khaw Pau       1962 – 1968       Saizang
11. Pu En Tual Zam           1968 – 1968       Vangteh
12. Pu Kam Za Dal             1968 – 1970       Mualbeem
13. Pu Khup Do Thang     1970 – 1977       Lailo

Basic Education Middle School, Saizang
Sang neihzawh kum tampi khit ciangin, Middle School, Tan (8) sang kideih ahih manin vaihawmna kinei a, makaite taangpi hanciamna tawh May 15, 1972 ni-in B.E.M.S Sangke kihong hi. Tua hunlai in anuai-a teng in deihsakna tawh lai hong hilh uh hi.

(a) Siapi Pa Thang Do Pau
(b) Ahuh – Pa Giak Zam Thang
(c) Ahuh – Pa Pum Cin Thang
(d) Ahuh – Pa Kim Za Hang

1977 kum ciangin Saizang khuagei beel in tualgal hong om a, Hausa Pu Vungh Za Kham, Upa Pu Vungh Ki Thang leh Saizang khua tangpi tangta kithukim diamdiam in kumpi galkapte na huh uh ahih manin Col. Myo Myint leh Lt. Col. Mya Maung-te thukimna zui in, July 10, 1977 ni-in Basic Education Middle School hong pia hi.           BEMS_lim
B.E.M.S Headmaster seem ngei teng
1. Siapi Thang Za Suan     1977 – 1978       Lailui
2. Siapi Mang Za Suan      1978 – 1980       Mualbeem
3. Siapi Thang Khaw Lian               1981 – 1990       Taklam
4. Siapi Tuang Do Kham  1990 – 1997       Saizang
5. Siapi Gin Khan Khual    1998 – 2005       Dimzang
6. Siapi Aung Myint Swe  2005 – 2008        
7. Siapi Thein Maung       June 2008 – Aug 2008      
8. Siapi Bo Than 2008 – Seemlai   

Siapi Thang Khaw Lian hunsung in Saizang Tan(8) Sang in Tedim Township sung, kumpi Tan (8) laihuan-ah kumsim phial mah in, ahoihpen lam ah kihel zoden hi. Tua ban-ah Tedim Township sung Tuukpeng kimawlna ah zong gualzo thei zel hi. 1996 kum Siapi Tuang Do Kham hun in a omsa 'U' building khang ah singinn khat kilamthak hi.

High School Sangke ding hanciamna
Saipi Tuang Do Kham’ deihsakna leh sangnaupang’ nu le pate hanciamna tawh kizui in, June 1, 1997 ni-in Tan (9) kihong beh hi. Siapi Tuang Do Kham tawh mapangkhawm dingin Sia Nang Sian Thang (Sezang) kicial hi. Tan (9) akihong cil in Saizang khuapi pan pasal (3) leh numei (3), Buan leh Tuithang pan numei khat tuak, avekpi (8) kipha hi.

Haksakna tuamtuam tawh 2004 kum ciangin Tan (9), Tan (10) kihong zo nawn lo hi. June 1, 2008 ni-in hong tungthak Saipi U Thein Maung’ deihsakna leh Hausa upa hanciamna tawh High School Sangke kihong kik hi. Tuahsiatna tawh Siapi U Thein Maung in hong nusiat ciangin Siapi Bo Than hong tung a, akum kik ciangin Tan (9), Tan (10) kihong zo nawn lo leuleu hi.

Tan(9), Tan (10) laihilh ding akicial ngei teng
1. Sia Nang Sian Thang (1996-97)
2. Sia Lam Za Pau
3. Sia Thang En Hen(2001-02)
4. Sia Thawng Cin Kham
5. Sia Langh Gin Kham
6. Sia Thang Deih Piang

Basic Education Primary School, Saizang
August 18, 1966 ni ciangin Kawlgam Revolution of Council kumpi in Saizang khua ah No 2. Basic Education Primary School hong pia hinapi in, thu tuamtuam tawh June 1, 1977 ciangin tua No 2 sang pen Phaileng khua-ah Burma Socialist Progamme Party (BSPP) kumpite in hong khinsak hi. June 1, 1986 kum ciangin BSPP kumpi mah in No 2, BEPS sang hong pia kik leuleu hi.
Saang akingah a kipan building dingin Awnghng veeng a akilam Village Health Center pen kizang toto hi. Kum tampi khit ciangin UNDP leh kumpi tung pan huhna tawh Pangphung veeng ah Saizang Innpipa Pu Tual Khaw Mang’ leitang tungah amah hong phalna tawh, building thak kilam a, 2006-07 laisim kum in kihong hi.

Primary School Headmaster seem ngei teng

1. Siapi Uap Za Gin           1972 – 1974       Mualbeem
2. Siapi Niang Za Thang   1974 – 1976       Suangpi
3. Siapi Zam Khan Thang 1976 – 1977       Vangteh
4. Siapi Pum Za Kham       1986 – 1992       Saizang
5. Siapi Kam Lam Cing     1992 – 1995       Saizang
6. Siapi Khup Lun Cing      1995 – 1999       Saizang
7. Siapi Zam Lian Thang   1999 – Seemlai  Saizang


RELIGION
Saizang khuapi ah Christian upna pen 1920 khit pawl in hong tung a, tangkhua ahih mah bangin atuma in pupa ngeina Dawi biakna leh Laipian Pau Cin Hau upna te na sang uh hi. Kum 2000 a kipan in Saizang khuapi ah khanglui Dawi biakna bei hi.

Tu in Saizang khuapi ah Roman Catholic, Tuiphum (ABM), E.B.C, Siangsawn (Pau Cin Hau), Full Gospel, A.G, AZBC, S.D.A cih bangin biakna pawlpi (8) om hi. Tua teng lak panin RC tampen a, 65% bang pha hi.

Content
1. Khanglui Pupa Ngeina (Dawi Biakna)
1.1 Saizang Khua Tuulpi seem ngei teng
1.2 Saizang Khua Dawisa Siampu seem ngei teng
2. Laipian(Pau cin Hau) Biakna hong tunna
2.1 Laipian suakmasa teng
2.2 Laisang seem ngei teng
2.3 Paaina Sanginn
3. Suahtaak Biakna Beltawng hong omna thu
4. Siangsawn(Pau Cin Hau) Pawlpi tangthu
5. Saizang Tuiphum Pawlpi Tangthu
5.1 Saizang Tuiphum Pawlpi keem Siate Tangthu
6. Saizang Roman Catholic Pawlpi Tangthu
6.1 Saizang ta Catholic Siampi leh Nungak Siangtho teng
7. Saizang E.B.C Pawlpi Tangthu
8. Saizang Full Gospel Pawlpi Tangthu
9. Pahtawina
Dr. Zam Len Mang tangthu


Khanglui Pupa Ngeina (Dawi Biakna)
Saizang khua asat masa teng, ateeng masa teng in dawi na bia uh hi. Saizang khua bup tawh kisai in Khul or Keel-ip leh Tual khua biakna ci-in mun thupi nih biakpiakna in na nei uh hi.

Biakpiakna pen kumsim in khatvei ta nei hamtang hi. Khul (or) Keel-ip pen keeltal in khai/bia a, Tual pen vok tanei khin tawh kibia/khai hi. Khul or Keel-ip pen Pu Thawmte makaihna tawh kibia hi a, Saizang khua-ah akhai ding (abia ding) Pu Thawmte a teeng nawn loh a kipan biakpiakna kibawl nawn lo hi.

Tual (khua) biakna ahih leh khua sung mi khempeuh tawh akisai hi a, beh khat in munkhat tek ah biakpiakna nei ciat uh a, khuasung ah Tual biakna mun (7) bang om ngei hi. Pu Kai Phung in Saizang khua-ah Hausa asep laitak in, atapa Vial Pau gul tukin si a, khuazangin phu la dingin gul beng ngeingai uh hi. Gulpivom (khuasiam) that uh a, gualzawh in suangsaupi khat phut uh hi. Tua suang kiphutna pen Saizang khua cianlai cihna mun-ah om in, Gulmual zong kici a, Pu Kai Phung in Gulmual aphut khit a kipan khuazangbup in tua mun ah Tual biakna nei khawm uh hi. Hih Tual biakna pen khua sung a teeng mi khempeuh in cidamna, nopsakna angah theih nading leh mailam thupiang ding nget kholhna ahih manin biakpiakna a, abei khempeuh khuazangbup in kidong hi.

Hih Khuul leh Tual biakna te nidang in Dota kha in kibawl a, anung ciangin Dopi kha in kilbawl hi. Tual biakna hun pen Sialsawm zong kici hi. Hih sialsawm pen Zomi khempeuh in neikim lo biakpiakna khat hi.

Hih teng ban-ah sumtawng, innsungpi, pusa dawi, huan dawi cih bangin dawi minlawh tampi zong bangkua tek pan in na bia lai uh hi.

Saizang khua tuulpi seem ngei teng
Dawisa Siampu seem ngei teng

Laipian (Pau Cin Hau’ thu) hong tunna
Saizang khua ah Laipian thu 1915 kum pawl in hong tun hangin kizom suak zolo hi. Tua bang a om laitakin Pu Tuah Hau, Pu Lut Suang, Pu Cin Langh leh Pu Vial Za Thang, hih teng (4) in dawi biakna sungah ih om sangin a olzaw Pasian thu kanleng ci-in Pasian thukan dingin Thangzang khua Laisang Pu Zing Khai tung Pasian thuzuihzia dong dingin pai uh hi.

Pu Zing Khai in zong “Pasian thu zuihna pen manpha mahmah in vokno aknote tawh bia a phuisam nate omlo in kam guak tawh Pasian tungah paaina kizang hi,” na ci a, “Pasian paai nading Sanginn na lam un, na zawh ciang Sanginn hong ding leh innphiat dingin hong pai ning,” ci-in na vaikhak hi.

Acih mah bangin sanginn lamkhit ciangin Laisang Pu Zing Khai anungzui Pu Tual Za Langh leh Pu Vial Khan Do te tawh Saizang ah hong pai uh a, Marh 18, 1933 ni-in anuai-a teng innphiatsak hi.

Laipian Suak masa teng
A. Pu Cin Langh (Munsuang)
B. Pu Lut Suang (Vangaw)
C. Pu Thang Za Suan (Thawmte)
D. Pu Tuah Hau (Munsuang)
E. Pu Vial Za Thang (Munsuang)

Laipian Pu Pau Cin Hau in ama khut nuai-a amah tawh Pasian thu asepkhoppih dingin gambup huam ahizong, gamkhen khawl ahizongin anuai-a bangin zamin na vawh hi.
1. Laimang
2. Laito mang
3. Lai-at mang
4. Khawk Laisang
5. Khua laisang

Laisang seem ngei teng
Saizang khua Laisang dingin anuai-a teng in azomzom in na seem uh hi.
1. Laisang Pu Tuah Hau (1933 – 38)
2. Laisang Pu Vial Za Thang (1938-39)
3. Laisang Pu Lut Suang (1939-60)
4. Laisang Pu Vungh Khua Hau (1960-69)
5. Laisang Pu Cin Lian (1969 - )

Laisang Pu Lut Suang makaih hun ciangin inn leh mi kikhangto amahmah in inn 90 val bang kipha hi.

Paaina Sanginn
Laisang Pu Tuah Hau in amasa penpen paaina Sanginn ahuankhang zang-ah na lam uh hi. Laisang Pu Lut Suang hun ciang tua mun pan kituah in Khanpi vumnuai-ah lam hi. Hih akilamna mun pen Pu Luai Langh tung pan Pu Vung Kam in alei kik hi a, huankhang lam teng Pawlpi’n lei a, 1954 kum in Sanginn lam kizo hi.
Laisang Pu Cin Lian hun ciangin Pu Cin Za Vungh teenna aleitang leh inn Jan 31, 1983 ni-in lei a, tu mun ah kikhawm hi. Pawlpimi hong khantoh ciang kihawm thawh a 1996 kumin Pawlpi vaihawmna tawh Sanginnthak kilam kik hi.

Suahtaak Biakna Beltawng hong omna thu

Suahtaak biakna Beltawng a pianna in Laizang Pu Vungh Khua Hau sephun sung hi a, Phungpin in Pasian thu zuih nading agen pen pawlkhat in deih gen lua ahih manin kitelkhial in, upate in zong phungpi te’n tubang gen ahih leh Suahtaak biakna ci-in min phuak a, Beltawng tawh zom in 1963 kum sungin pawlpi khat a dingkhiat ding hong kipan hi. Ahizong upate ngaihsutna tawh 1969 kum dong kipawl theihtheih nadingin thu kigenpih hi. Khanglui hun abullet nuam te’n phungpi tawh kizop nading ngaihsun thei nawn lo ahih manin Oct 5, 1969 ni-in Suahtaak biakna Beltawng cih zopsuak ding thukimpih uh hi.

Saizang Full Gospel Pawlpi

April 1998 sung Saizang khua Tuiphum Biakinn-ah akibawl crusade tungtawn in Yangon a om Nu Cing Lian Dim, USA a om Pa Lian Khan Mung-te panpihna tawh Sia Kham Suan Hang (Laitui) in Saizang khua-ah March 16, 1999 ni-in mission nasep hong pan hi.

Biakinn neih masiah Pu Kham Suan Pau’ innnuai kisap in, mun tuamtuam pan panpih na leh pawlpi mite hanciamna tawh biakinn kilam a, May 5, 2006 ni-in Rev. Dr. Dam Suan Mung in biakinn honna hong neihsak hi.

Tu in Saizang FGA pawlpi ah mi 228 val, innlip inn (30) val kipha hi.

Saizang Tuiphum Pawlpi Tangthu

Contents
1. Hong tuncilna
2. Pawlpi kipatna
3. Hamsatna tuamtuam
4. Biakinn ding hanciamna
5. Pawlpi keem Sia-te tangthu
5.1 Rev. Cin Pau
5.2 Rev. Vum Lian Thang
5.3 Rev. Thang En Hen
5.4 Sia Zam Khan Mung


Hong tuncilna
Saizang khua-ah Christian thu khaici pen 1928 kum in sangnaupangte ahi Tg. Suan Gin leh Tg Son Tual-te tungah na kituh masa a, ahizong kizomsuak zolo in, tuzawh ciang Tg Lian Tual tapidaw hong suak a, 1933 kumin Sihuang khua-ah Rev Strait in tui na phum hi. Amah zong na zomsuak zolo leuleu in mundang ah na tai zel hi. Tua kawmkal pan in Tg Dal Za Kam (Col. Dal Za Kam) in kum 5 sung bang a ngaihsutna tungtawn in, 1932 kum beikuan in Rev. Lian Zam tung pan Gawng khua’ lui-ah tuiphumna ngah hi. Amah ahih leh upna kipsuak napi’n, sangpilna angah khit a kipan nuntakna zongin mun dang tung kawikawi a, Saizang khua-ah om hun nei lo leuleu hi.

Pawlpi kipatna
1937 kum in Pu Neng Suan Pau (Si; April 3, 1980) te apa uh Pu Thawn Kham dam lo in, kithoih zel cihbangin lungkham in a omlaitak, tua hunlaitak a Saizang khua-ah Siapi hong seem Sia Phut Thang in zong nipini sial in thungetsak in napai zel a, Pasian’ thu genpih thei zel hi. Asawt ciangin Pasian thu hong sang thei uh a, 1937 sung mah in Rev. Nelson leh Sia Sein Htwe, Tedim Pawlpi upa Pu Ngul Lang, Pu Gin Thual, Pu Neng Thawng, Pu Pau Za Kam-te samin innphiat uh a, Tapidaw na suak uh hi. Tua laitak in anuai-a tengin zong na tangsuah uh hi.
1. Pu Gin Thuam (1922 – March 25, 1987)
2. Pu Suah Vum
3. Pu Vum Cin
4. Pu Neng Khen Thang
5. Pu Vungh Lian Nang
6. Pu Kham Do Thang (1920 – May 1992)
7. Pu Pum Khen Thang
8. Pu Pau Khai
9. Pu Kai Kho Tual
10. Pu Thawng Ngul
11. Pu Tel Do
12. Pu Khai Za Nang
13. Pu Luan Do Thang
Amau teng tawh Biak piakna kipan a, Tapidaw Pawlpi hong kipan thei hi.
Sep 7, 1946 ni-in Pu Kham Do Thang leh Pu Khup Thuam’ te inn Rev Nelson leh upate mah in inn naphiatsak uh hi. Nov 6, 1946 ni-in Pu Gin Thuam’ te leh Pu Neng Cin’ te inn, Jan 26 1947 ni-in Pu Neng Khen Thang’ te inn, 1948 kum in Pu Gen Za Hang’ te leh Pu Kham Thiau-te inn cih bangin abanban in inn naphit uh hi.

Hamsatna tuamtuam
Tua hun lai Tapidaw asuak masate pen khua leh tui, u leh nau te’n nakpi takin na el bawl in na langpan uh hi. Topa Zeisu in damlote damna ngahsak, mihai zulung veite pilna ngahsak ahih amanin mihai biakna ci-in na lipkhap ngaihsut mahmah lai uh hi. Atawpna ah Tuiphum Tapidaw suak lo ei teng kipawl ni ci-in, bawng go saban in kamciam nabawl lai uh hi.

Hibang kawmkal ah Pu Neng Cin’ pa Pu Go Song hong sih ciangin asanggam te’n leisungah phum ding phalloh na a kipan, akap amat, agawh alup ko mau simsak nung, ko gui nung ci-in pawlpite na tawng uh hi. Pu Go Song silung om sung mah in Pawlpi te’n hi bangin thukhun nabawl uh hi.
(1) Khanken golo ding
(2) Zu zanglo ding
(3) Kuangbawl khultawh pawlpi’n seem ding ci-in kithukim uh hi.

Asanggam teng in zong na langbawl uh a, siguina-ah kua man huh nuam lo ahih manin RC pan Pu Song Cin Pau leh asunghpa Pu Gen Do bekin huh ci’n kigen hi. Sigui ciangin Tedim pan Rev. Nelson hong paisuk a, Tuiphum Pawlpi’ khan-ah akigui masapen na zong hi pah hi.

Tua kipan in Tapidaw te leh midangte kiton khawm thei nawn lo in, ki elna leh kilangbawlna zong hong khang semsem hi. Ahizong hi bang huhau in Pawlpi sungah kipumkhatna leh thangahna hong piangsak zaw hi.

Biakinn ding hanciamna
Saizang Tuiphum Pawlpi phut masa teng in tulaitak a RC biakinn kong san teng ah (30 X 12) azai, atung suangpeek khuh biakinn khat na lam uh hi. A umna singpek teng ding Pu Neng Khen Thang in sik a, akisam dang teng khempeuh tuhun lai a Tapidaw suakmasa-te hanciamna vive hi. Kongkhak ding zong nei zolo ahih manin thangkhau ippite nakhai uh a, 1952 kum in Rev. Cin Kho Gin’ thuphapiakna tawh kikhopna kizangsuak hi.

Hun hong pai tohtoh ciangin Pawlpi zong hong khang semsem in inn(18) bang kipha a, kikhopna mun zong hong zatcing nawn lo hi. Tua hih manin biakinn zong RC biakinn kong pan in dawi biakna akizang gampi sazawn thoihna mun Dawitaizang ah kikhin to hi. Biakinn pen (40 X 20) zai in leisek tawh akilam, taihinn hoih mahmah khat hi. Hih biakinn lamna ah zong pawlpi inn(18) te’n aneihsa uh leh athagui athatang uh sit lo in, kipia khia uh a, Pu Vial Do Pau, Pu Neng Khen Thang- te leh khuasung le khual pan huhna tuamtuam tawh akilam hi. Hih biakinn toplai in Tapidaw suakmasa Pu Khup Thuam leh Pu Neng Cin te zong sehnel pua, leisek nawn in mapang zolai uh a, Pu Suah Vum in zong lettama khat in apatna pan atawp dong mapang khawm uh hi.1964 kum in Rev. Cin Pau’ thuphapiakna tawh kikhopna in kizang hi.

1994 kum ciangin pawlpi inn zong (50) val bang kipha a, pawlpimi kibehlap toto ahih manin biakinn pen hong hawmthawh leuleu in, agolzaw khat neih zawh nading ki lunggulh leuleu hi. Building Fund Committee zong kinei a, 1999 kum in T.B.A General Secretary Rev. Hau Za Cin in foundation hong ciansakna tawh biakinnlam kipan hi. Biakinn lamna ah Pawlpimi tawh aki bangin Pu Awn Za Pau, Maj. Zel Za Lang, Pa Vum Do Lian-te zong hanciampih uh a, mundang khual tuamtuam pan deihsakna tawh hong piak huhna tuamtuam tawh Feb 27, 2003 ni-in Biakinn honpawi kibawl zo hi. Biakinn pen (80 X 40) azai, leisek dawlnih innpi khat hi a, Pev. Cin Sian Pau (Pu Gan Thuam’ tapa) in thuphapiakna hong neihsak hi.

Pawlpi keem Siate
1. Rev. Cin Pau
2. Rev. Vum Lian Thang (Dip. Th, B. Th)
3. Rev. Thang En Hen (Dip. Th, B.D, LLB)
4. Sia Zam Khan Mung (BA, M.Th)


Saizang Khua, R.C Pawlpi tangthu

Contents
1. Hong Tuncilna
2. Khaici masa
3. Pawlpi kipatna
4. Siampi masa leh hamsatna tuamtuam
5. Biakinnpi leh St. Joseph convent
6. Pahtawina
6.1 Saizang' ta RC Siampi suak teng
6.2 Saizang' ta RC Nungak siantho suak teng

Hong tuncilna
1939 kum sungin khamtung gam-ah Topa Zeisu hong gupna thu puak dingin Mandalay pan sawltak Siampi Fr. Falein leh Fr. Maineir tegel hong pai to uh hi. Kawlpi pan Tedim, Tonzang teng ah va pai uh a, Tonzang pan aciah kik ciangin Saizang khua hong nawk in, Ukpi Pu Thawng Za Khup’ phalna tawh amah innpi-ah Pasian thu genna nei uh hi. Amau thugen teng zong Pu Thawng Za Khup in zokam in gen kha kik hi.

Khaici masa
Tua hun laitak in Pu Neng Zam in Tedim Laito-ah naseem in om a, biakna thu zong akan kawikawi hi. Tuiphum Pawlpi te’n zu taang ahih main Pawlpi Siate kiangah tua thu ava dot ciangin, “Psian in zu neek ding khaam lo hi. Zatsiam ding kisam hi. Meigit zat ih siam leh an neekna ih siam kei leh, inn leh lo supna hi. Zu zong kiim khat adingin zatui hi napi kimkhat adingin gu hi. Cidamna a aneite in zu tawmtawm ne ding a, anei lo te’n tang leh hoih zaw hi” ana cih ciangin Pu Neng Zam in hih biakna pen mi khempeuh zuih theih ding hi ci-in amin napia pah a, Saizang khuap pan amah bek Catholic a na tangsuah hi.

Pawlpi kipatna
Pu Song Cin Pau in zong Pu Thawng Za Khup inn a, biakna thu kigen azak a kipan lunglut pah hi. Tua bangin Pu Neng Zam Catholic suahna thu azak ciangin amah tawh kikum thei zel hi. Pu Neng Zam in zong asanggamte Pasian thu azakna leh amuhna genpih in zolbawl hi. 1942 kum ciangin Pu Neng Zam, Pu Song Cin Pau, Pu Theu Thang leh Pu Tun Lam te Pasian khuavaak mu uh a, Laitui khua a om Siampi Bilivet leh Sia Ba Maung sam dingin Pu Song Cin Pau paisak in, Saizang khua pan amau teng innli Catholic suah uh hi.

Siampi masa leh haksakna tuamtuam
Biakinn neih zawt mateng in Tuilang leh Lailui khua-ah nipi va tang thei zel uh a, 1946 ciangin thuzuimi inn 26 hong pha hi. Biakinn ding zong adung pi 36, avai 18 apha, atung lopa kikhuh in, thangkhau ippi-te tawk aki um khat kinei zo hi. Sual kidawh zolo ahih manin khuk dinna lei kom tengtang hi. Tua kum sung mah in Siampi Fr. Dixneuf Saizang hong tung a, thuzuimi zong khang semsem a, 1948 kum ciangin inn 60 kipha a, thuzuite leh siampipa hanciamna tawh biakinn thak hoih mahmah khat zong kinei zo hi.

Fr. Dixneuf om tung lai in tui neek ding hamsa lua mahmah, missa biakna azat ding na ngawn haksa hi. Tua hun laitak in Sia Thuam Khan Cin tangvalno laitak hi a, kum tampi sung siampipa tawh kithuah in, siampi nasep huh den hi. Saizang khua pen tangkhuapi khat ahih mah bangin biakna lui sung a omte simmawh mahmah uh a, Fr. Dixneuf hong om ciangin hong dai zaw deuh hi. Tu ma in Fr. Bilivet in “Biakinn ah thu na nget uh ciangin Pasian mah-ah thu ngen na hi uh hi. No khamtungmite thu na nget uh ciangin na niksing uh tawh kilawm lo hi. Kawl mite bangin niktuak teng leu cin kilawm hi,” acih ciangin numite in niktual ateng pah uh hi. Tua pen thuzui lote in zahpihna in “A tenniik in kam kei dung sun, Pupa khua mual ih suak ngam ciam maw” ci’n la na ngawn phuak uh hi. Tangval pawl khat in zong RC nungak peuh mah tawh teng thei lo di cih kamciamna sa aban uh hi. Tua ban-ah misi huhau in mitampi ngaihsut theih lo thukhat om hi. Biakna thak tungtawn in misi pen nithum val koih thei lo ding cih leh, misi leng sungah Kiphum ding cih thu hi.

Biakinnpi leh St. Joseph Convent
1954 kum ciangin Fr. Dixneuf Falam ah piang in akithuahpih Sia Thawng Khan Nang nusia hi. Asawt lo in Mualpi khua pan in Fr. Ruellen hong tung a, Sia Thawng Khan Nang tawh 1958 kum dong khuakiim khuapaam ah va zin kawikawi uh hi. Fr Ruellen hanciamna tawh khangno pattah nadingin St. Joseph nungak siangtho-te (4) hong tung hi. Amaute in khangnote leitung pilna leh Pasian thu akhan khop theih nang hong pantah uh hi. Bek tham lo in, khuasung mite cidam nading zong M.B.B.S zosa Mikang Sister khat in kua mah deidan lo in, aliam abai, kep leh khoi hong thuah lai hi. Hibangin hong picing semsem ciangin biakinn pen sanginn ding a, akizat theih ding ngimna tawh mun tuamtuam ah huhna ngen hi. Tua huhna leh pawlpi huhnate tawphah in 1959 kum in leisak tawh kibawl biakinn lianpi khat lam zo uh hi. April 10, 1959 ni-in biakinn thak honna kinei hi. Fr. Ruellen in sia Gin Lam kawlgambup thuhilhisia sinna muh ah 1956 kum in puak a, 1965 kum a kipan amah tawh naseem khawm pah hi.

EBC Pawlpi Tangthu

Contents
1. Pawlpi Hong piankhiatna
2. Biakinn neihna
3. Pawlpi sia seem ngei teng
4. Pawlpi sung pan Laisiangtho sang zo teng


Pawlpi hong piankhiatna
1970 khit in Tedim gam sungah khanlawhna lianpi hong tung a, Saizang khua-ah zong hotkhiatna thu hong kitangko hangin a omsa pawlpi te’n na sangthei pak lo uh hi. 1979 kum ciangin Tedim EBC pawlpi pan Rev. Gin Khan Hau hong sawl uh a, Siapi Tuang Do Kham’ inn-ah taam in gupkhiatna thu tangko kawikawi hi. Tedim EBC pawlpi keem sia khat ahi Bo Gen Za Thang leh khango pawlkhat zong Saizang khua ah hong pai uh a, Bo Gen Za Thang in alawmte Major Tual Khen Pau leh Capt Khan Nenh Pau’ te lungsim va phawngsak hi. Oct 28, 1979 ni-in alunglut khangno pawl khat tawh Saizang khua-ah EBC pawlpi hong kiphut hi. Pawlpi kiphut tungin inn(8) leh mimal (44) kipha hi.

Pawlpi kiphut tung in anuai-a teng in hong makai uh hi.

1. Major Tual Khen Pau
2. Capt Khan Nenh Pau
3. Tg. Zam Suan Mung
4. Pa Hen Do Pau
5.Tg Pum Khan Pau
6.Tg Do Za Nang
7.Tg Cin Do Langh
8.Tg Pau Suan Langh
9.Tg Thawng Kam
10.Pa Pau Za Kham
11.Pa Sing Khaw Thang

Biakinn neihna
Pawlpi hong pian ciangin biakinn kinei zo pak lo in, biakinn neih masiah Pa Neng Do Kap-te inn asap la lo in hong zangsak hi. Biakinn mun ding Capt Khan Nenh Pau in ama huang asaklam 52 X 34 apha khat hong piak ciangin pawlpi mite zong hanciam pha mahmah a, 1983 kum in 30 X 18 apha suanginn khat lam kipan hi. 1985 kum in Rev. Vial Khaw Hau in honna hong neihsak hi. Biakinn pen suanginn hi a, hong sia baih bek tham lo in pawlpimi zong inn (20) val hong pha ahih manin biakinn thakkhat kitawm kik leuleu hi. Pawlpi mite hanciamna, Pawlpi pan huhna leh mun tuamtuam pan huhna kingah teng tawh sikkang inn khat kilam a, 1995 kum in Gambup Associate Secretary Rev. Lian Khup in hong honsak hi.

Pawlpi sia sem ngei tEng
1.            Rev. Gin Khan Hau (1979-82)
2.            Rev. Lian Do Nang (1990)
3.            Rev. Lian Khan Pau (1991-92)
4.            Rev. Zam Hen Thang (1993-96)
5.            Sia Langh En Pau (1997)
6.            Sia Go Lian Pau (1998)
7.            Sia Kai Khan Mung (1999-2002)
8.            Sia Kam Dongh Mang (2003)
9.            Sia Kai Khan Mung (2004- )

Pahtawina
Pawpi sung pan Laisiangtho sang zo teng
1.            Rev. Lian Do Nang (BABS, MA (Theology)
2.            Sia Kam Dong Mang (BABS, M.Div)
3.            Sianu Ning Lam Cing (BRE)
4.            Sianu Man Gin Cing (BRE)
5.            Sianu Ciin Do Zen (BRE)
6.            Sianu Cing Sawm Lun (BRE)


SAIZAANG KHUA AH SIANGSAWN PAWLPI HONG TUNNATHU Leh SIANGSAWN PAWLPI TANGTHU

Pasian in ka thu siangtho leh thu manpha te phatak pi in zui un, ci-in taktak ki zuizo nailo hi, ci hi. Tua mah bangin ki patcil hun in dawi biakna eh Pasian thu helkhawm na hunkhat, kamtam tawh paaina leh beeltung zatna hunkhat, kamtam bektawh paaina hunkhat hi-in, Pasian Kamsang lianpipa deihna tawh Laipianpa Pu Pau Cin Hau in Laitopa Pu Vum Khaw Thang kiangah, “Lung himawh ken. Leitung na nusiat hun ciangin na lupna tungah na sikei dinghi. Na luang lupna ngunkhuk khamkhuk asuak dinghi. Kei leh nang suan leh khak sungpan Pasian nasem khattuak hongpiang dinghi. Tuategel kithuah in Pasian na hongsep ciangin ka Pasian thu hongkhang dinghi, aci hi.

Ahun ahun in Pasian in thu hongpiak mah bangin 29-11-1993 ni aa kipan ni (3) sung in Pasian honghilh kholhna ahi Lailui khua aa, Laipian signboard aa Teipi a taang hi. Pasian Kamsang lianpipa Pu Pau Cin Hau deih bangzo nailo hi. Kum 1953 aa kipan in Valvum khua ah a (5) veina khawmpi pan in pawlpi min dingin, “LAIPIAN” ki kipsak hi.

Keimah Pau Zen Thang in, Lailui khua ah Thang Sian Khai siansuah in ka zawhni nithum nizan in vantungmi khat in, “Hih baangkua sungah a sawtlo-in Pasian in mikhat zangh dinghi, na ciamteh in,” ci-in thu hongpia hi. Tuazawh nili ni ciangin Pasian in Sia Kam Suan Mang hong zanghpah hi.

Pasian in Sia Kam Suan Mang tungah thu a piakte in misiangtho kaihkhop na,khaa kihual sakna, ki zopna bawlna, hotkhiat na leh deih lohte paihkhiat na ahi hi. Tua aa kipan in a mah in Pawlpi upate tawh hih thute sem in a khua a khua, a gam a gam ah zinkhia uhhi. Anih veina ah Laimangpipa Pu Sian Khan Thang thukim pihna tawh a maute in khualzin khiakik in, Pasian thupiak na thute a zom uhhi.

Tuakhit ciangin Pasian thupiakna bangin Lailui khua ah phualpi phutin pumpi natsia, veisia te, lungsim vangik, thu haksa thuak te Pasian mintawh honkhia sutkhia uh aa, tuate lungdam mahmah in a khua ah a ciahkik uhhi. Tua ciangin Pasian thupiakna bangin Teeklui khua ah phualpi kiphut hi. Teeklui khua ah Pasian thupha a saang tampi hong om hi. Tua ciangin Pasian Tapa Pau Cin Hau deihna bangin 18-12-2004 ni-in Teeklui khua- ah, “PAUCINHAU PASIAN SIANGSAWN PAWLPI” cih ki piangkhia sak hi.

Tua khit ciangin vantung kumpipa Pasian in, Kamsang KamSuanMang tungah vantung khaa siangtho nasep na phualmun puah nading, a khaa mittawh muhkholh sakna bangin sakhaukhai ( Bualzang ) mun ah 2006 kum sungin Siangsawn Pawlpi kiphut hi. Hih mun ah pawlpi inn(8), Naipi tausang (1), pawlpi mite aituam inn (40) kiphut in gah leh teh sepna tawh Pasian minphat na a pian nadingin ma kipang in ki kalsuan hi.

Hih upna thumaan kalsuan na kinun takpih ahih man in Laipian pawlpi panin Siangsawn pawlpi ah kilut hi. Tua hun pan kipan in Saizaang khua ah Siangsawn pawlpi ah kiphut hongsuak hi.

Source : Saizang Center.

Saizang Khua ah Cinpu Zomi (Zomi eLubrary / Laibusaal)


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: SAIZANG KHUA THU Description: Rating: 5 Reviewed By: Cinpu Zomi
Scroll to Top