728x90 AdSpace

Hot
Menu
Zon-ol na Donate

Latest News

THALMUAL KHUA TANGTHU.

THALMUAL KHUA TANGTHU.
Thal Mual Khua.
Photo Credit : Youtube

Thalmual Khuasatna Introduction
THALMUAL KHUASAT MATHU
Thalmualkhua a kisat ma-in Thalmual khuatungzang acihna teng ah, Meiteigam lam pan ong pai Vaipheite natengngei zo a , bang hunin, bang tanvei, koipan ongpai, koilam zuanin lal khiakik uh cih kithei lo hi. A hih hangin Vaiphei te’n Thalmual khua anusiat na uh, ahausapa’ inn ah Thalmual sawmlen’ ci-in giak khawm uh a, sawmgiak teng gal te’n that khin ahih manin, teeng zo nawn lo uh hi. Tua thu tawh kisai la na phuak uh a :

“Khamtaang agiak maimit sing,
zuang thomawh e, a tu’n siang zong man lo-in, khai mu’n tuah ee” ki-ci hi. 

Ref : (KNACK Golden Jubilee Thalmual 1980)

THALMUAL GAM SAT NADINGIN GAM TUAMTUAM TUNG MASA
Thalmualkhua aki sat theih nadingin Pu le Pa te’n gam tuamtuam ah valal kawikawi masa uha, atawpna ah anuai a thu 3 te siksan in gam le lei nazong kawikawi uha tua ciangin Thalmualkhua satin nateeng thei pan uh hi.


1. PU ZUAN LAM KHAN LAI THU: Pu Zuan Lam khanlai a agam tatna thute panin, Gualnamte liana ,aom laitak, vaihawm lian ahi Vung Vial le Hen Mang te na hi uh hi. Tua tegelin amau ut thutawh khua mite zawhthawh bawlin vokno dawng le nau zuha zong to in amawk nek nek sak uh hi.
Tua hun laitak Zuan Lam lo khomi annek tuidawn pataulo, khawhsa kham mahmah khat ahi hi. Tua ciangin Saizang khua Vaipi galin sim hi. Tua asim ciangin Zuan Lam in, “nau zuha-um natup bangun tumun, Vokno gual nadawh bangun dokun, Vung Vial aw, Hen khua Mang aw, tu in i khua gal-in ong sim gawp hi,” ci-in a kiko hi. Tua ciangin Saizang galin simgawp a, mihing sisan, Sialtang lui ban hi. Mihing ngawng kitan na bekbek Tualtungte kongkan suang khut tal tanding kuaksuk hi. Tua ciangin Pu Zuan Lam suakta a, Mualbeem beel dingin a pai hi. A pailai takin Mualbeem khuataw a tun ciangin tawkpi nuai khatah Teizang papi khattawh kituakin thu a dot leh, tuapa in Khan Thuam pilpen in, Kaih Mang haupen hi a ci hi. A cih ciangin Pu Zuan Lam in,” Kei, sum le pai lamsang a lung mang hilo a, apil pen thu ngaih sun penin kei honggumzo ding a hihteh,” ci-in Khan Thuam kiangah pai hi.
Tua ciangin Teizang Vai pi’n sima, Khan Thuam zong galte delh dingin akuan hi. Pu Zuan Lam pen numei naupang te keem ding in inn angak sak hi. Khan Thuam galdelh ong tun’ ciangin Zuan Lam in nadawn a ,Khan Thuam in thu adong hi. Zuan Lam in,” Kapi pen dak pi kenheng ah na bukpih ingin nau na suak zo ung, nau pen pasal hi, i dak pen Zangzawl khautaw linghiang ah naseel ing pu aw,” acih ciangin Khan Thuam nuam luain ” adak nuam dak hen la, napi nasuah taksak nuam mahmah hang,” a ci hi.
Tua khit ciangin Khan Thuam Gui te’n asawm leuleu hi. Tua ciangin Phaileng ah Vokpi khat ban uha, thu aciam uh hi.
A thu ciampihte:
1). Khan Thuam
2). Khan Lam
3). Zuan Lam
4). Kaih Lun tua teng tawh thu khotakin aciam uh hi.


Guite in Khan Thuam athah ding lau ahih manin Khan Thuam in Darlang bel hi. Zuan Lam leh Kaih Lun in Maalgam beel hi. A thu ciamna in,” A pau zo zawzaw i omleh ki en ni, ci-in thu ciam uh hi. Darlang te-in Khan Thuam leh Khan Lam na hi’n zo-uh ahih manin Mualbeem khua sat sak kik hi. Asat khit ciangin Zuan Lam leh Kaih Lun in kamei khutna mulo hiam, ci-in Sing lutawng a khak to hi. Tua ciangin Zuan Lam leh Kaih Lun in i ciamsa hi-ci in Simtual ah a ciah uh hi. Kaih Lun Mualbeem tung a , Zuan Lam Saizang a tung hi.
2. SAIZANG PAN PU ZUAN LAM VALVUM KHUA TUNG
Pu Zuan Lam Saizang khua ong tu’n khit ciangin Khan Thuam tapa in Zuan Lam Valvuum khua AD 1880 kumin sat sak hi. Zuan Lam in Valvuum khua asaat khit ciangin Kaih Lun ta Khup Pau (Sukte) kongliang nang dingin ala hi. Tua bang a, alak buang ci-in Pu Zuan Lam leh Pu Sut Pau in Vai ahawm sak uh hi.


Tua lai takin Guite Kam Pau in Za Tual lawmkawi a , Khup Pau sila dingin atup ciangin Za Tual tungah khasiain Khup Pau Kapteel a Thuam Thawng beel-in a pai hi.
3. VALVUM LEH KAPTEEL KHUA AH PU GO DAM ATUNNA LE “PU GO DAM TANGTHU TOMKIM”: Valvuum khua Pu Zuan Lam tapa Pu Go Dam te ong khang uha, innmun logam khawh le tuk, khawi le gulhte hau mahmah in a om laiun, nuamsa, cithei, kiveek leh pil mahmah ahih manin Khaanglui sum, beel, khibah, taubulh te zong hau mahmah uh hi. Pu Go Dam pen mi cimawhte ahuh akhual mahmah nuam khat a citak mahmah khat ahih manin mun tuamtuam a sal ( or) Gualte (Slave) a kikhawi, a kizuakte, heh pih huai sa-in apai pai na a lallal na peuh ah tua Gualte (Alients) lei kawikawi in akhawi peekpaak hi
KAPTEL KHUA AH PU GO DAM TUNG
Pu Go Dam pen tua hun laitakin nuam sa mahmah in om hi a annek tuidawn asap sial a atai detna hi napi in, Tedim Pa Khua Cin in Pu Go Dam khasia sak kha ahih manin Khua Cin tai sanin Kapteel khua ah alal hi.


Pu Go Dam Kapteel khua atun ciangin Khup Pau tawh Kapteel khua Upa vaihawm suaksak uh a, tua hunlai kapteel khuapen Falam Ukpi te Uk na sung ahih manin Behiang kum a, Falam Ukpite Sial khat ta a kilut denpen, Pu Go Dam vaihawm siam natawh Vok tuk 3 khatin ana maivil zo hi. Pu Go Damte Kapteel khua ah Upa vaihawm lian in kum tampi sung nateng uh hi.

THALMUAL KHUASATNA
(Naulakbehte tangthusungpan U Sian Za Nang ong puak na banghi)
1. Pu Gualnam suan Pu Eng Ngul le anaupa Pu Lam Phung te Unau makai in, Kaptel, Hiangawn, Valvum, khua te tawn in, a Muallum khua ah alawmte ahi, Pu Lam Nek, Pu Vum Pau, Pu Lam Phung, Pu Dam Tun te ki kuppih in Thalmual gam Pu ConBik Falam Ukpi pa tung ah Dangka Rs. 590/- bei ngiatin va lei uh a, na tengthei uh hi.


Thalmual ten’ khit Pu Eng Ngul in zong gamthak leithak ahih ban ah gal le sa dal nading, ci-in thaulawng 10 bawlin zang hi. Ukpi ten’ zong thau aneih lam, mipawl khatten ‘ heksim ahih manin Ukpi ConBik in samsak a, Falam apai ciangin atu pa Pu Dam Tun lung himawhin zui hi. Mi tampi zuih ding Ukpi pan khaam ta leh Pu Dam Tun in Pu Eng Ngul thahdan ngah kha ding patau mahmah a it lua ahih manin zui sim veve hi.
ALA PHUAHTE:
1.(aa).Puvon sanggah khua ka tuah nan, Vaimang kankong hong ing e,
(bb).Vaimang kankong ka honna zualam teng aw, hamtaang bang khot zo ing e,

2.(aa).Sonmom tawh pai bangkop ing e, melmak vaimang va biang e,
(bb).Melmak vaimang ka biak lai-in, simlei muikhua zing bang e, 
(A tupa Pu Dam Tun aphuah na:)


Falam Ukpi ten’ thu sitta, “Bang ding a thau lawng 10 nei napi ci’n lawng 8 bek ong ap na hia? a cih ciangin, Pu Eng Ngul in, “Topa aw, Thalmual khua sat khuan ong pia hilo na hiam? Lungdam mahmah hiung. Gam thak, leithak, khua satthak ahih manin, kiim le paam ah gal le sa, tual le gal ki tel kei leh, hih ka khuasat pih, kakhua katuite, thau tawh tei tawh huut loh pahmawhding ahih manin, thau lawng 10 lak ah lawng 2 ong ap kei mah ing,” acih ciangin, Ukpi pan’ pil mahmah teh siam mahmah teh, khuasat khua phut makai cih ciangin lum le tei thau lawng te ineih kulmah hi, ci-in a Ukpipa lungdam mahmah a,” Eng Ngul aw ci-in khuasat ciaptehna dingin Khanglui van Dakbu, daktalte,Zamte, letsong in pia zawlai hi. “Hamtang bang khot zo ing a cih na ahi hi.”
2. Pu Dam Tun, Hiangawn khua Pu Eng Ngul in asat cil lai in “Valzang” acih na ah tengsak uh hi. Tua Hiangawn khua ah aten’ lai un Pu Eng Ngul in Sa lian bet sawm a, atu te teng Dam Tun, Sun Mang, Dam Zuan, Lam Phung, zawn a, Kaile zang acih na ah atun uh ciangin an huan sak hi. Pu Eng Ngul te tua munpan Salian sapel ding in vakuan khia uh a, Pu Dam Tun le tu te tengin zui khin ahih manin, Pu Lam Phung giahphual ngak kawm an huan kawm aom laitak, agiah phual geiah Saikhaat pikhat ong pai laizang in, amuh ciangin, “Ka U Eng Ngul hih sai kapsak nuam siing”, acih leh amah om lopi nang kapve ci in Sun Mang in sawl a, Pu Lam Phung in zong tua sai kapkap ta leh taituan lo banah guah zuk acih in zungek ngek laizang hi. Banghang hiam cih le tua sai in vaang neilua hi. Asawtna ciangin tua sai ong tuksam in tua ciangin atupa Pu Dam Tun in sai hanla sa in, thaulawn in nuam mahmah uh hi. Tua saipen akhaat hi in saiha na sau mahmah hi. Tua hun laipen Thalmual khuasat mapek hi a, Kaptel gamsung suak ci, hiding hi-ven, Kaptel Thuam Thawng in atheih ciangin, siah le kaih tangin ci-in lak sak mikmek hi. Pu Lam Phung zi Pi Ning Khawk zong khasia lua ahih manin, kapkap liang a, laa khat naphuak hi:
(aa). Phung tawh ciam lo, son tawh ciam ing, Huisai ka siang, ah mung e,
(bb). Son sinlai khuai, hang hiam aw, Von banzal tawi ding hiam aw,
(hih lapen Hiangawn khua a om laiuh ahi hi.)


3. Hun te ong pai toto, Kaptel te’n tua saiha ‘Mangte’ ong piading hi ung ci-in Kawlzang pan ong paito Thangmual ah Mangvom na kaplum uh a, To Kumpi te in heh mahmah ahih manin Kaptel khua mei tawh haltum gawpsak hi. Tua thusia te huhau Kaptel gam, Hiangawn gam sung khongteng launa atuam tuam atam laitak tawh, atung a Pu Eng Ngul te Unau hong ki kumin Hiangawn pan Muallum, Muallum pan Thalmual gam a muh ciangin hoih lua an kihau ding cih upna tawh, Falam Ukpi te tung ah lutngiat in Dangka Rs.690/- tawh alei ngiat uh ciangin tuni dongin Thalmual khuami tangpi tangta nuamtak a ki tengthei ahih na Pu te tungah ko a atu te ongkhual na te tuni dongin atu ata sawnsawn te dongin ka ciapteh, ka khang tangthu uh ahi hi.
(Laipuak Pa Sian Za Nang ong puak bang aki at hi)
PU ENG NGUL, HIANGAWN KHUA PAN, MUALLUM KHUA A TU'N NA LEH “THALMUAL KHUA” SATNA TANGTHU

HIANGAWN KHUA TUN NA:

Pu Go Dam tapa Pu Eng Ngul te Unau ong khan ciangin Kapteel Khua Hausa Pu Thuam Thawng kiangah HiangAwn Khua saat a, teentheih nading anget ciangin pia hi. HiangAwn khuaah ong teengin kum khat bang tuuk atu'n khit ciangin, Pu Eng Ngul in Khup Pau ta Vum Pau pen amau teenna Hiangawn khua ah apii hi.

Hiangawn khua ah kum 5 sungbang tuuk a tu'n khit ciangin, tua hun laitak Kaptel Khua Pu Thuam Thawng in Myo-Uk Mangvompa  vasuam lup na hangin To ‘Mangkang Kumpite heh a Kaptelkhua kum 1887 kum-in meitawh hal a , Kaptel gamsung le, Hiangawn gam sungteng gal launa tuamtuam hu hau in launa atam hun laitak ahi hi.

MUALLUM KHUA TU'NNA:
Tua hun laitak Kaptel gam sungteng aki suksiat ciangin Hiangawn khua nangawn gal launa a tuamtuam atam tawh om thei nawn lo-in a U anau te tawh ahi zongin atu atate tawh ahi zongin kikum uh a, Muallum khua te'n theih nading anget uh ciangin kipia a, tua khua ah nateeng phei pah uh hi.

Tua hun sungin Muizawl khua Hausa Pau Khen hi-in amau khua le Muallum khua ki nailua sa-in deih lo a, asim ding leh a nawh khia dingin Falam Ukpi te kiangah anget ciangin Ukpi pan zong gal makai te sawl pah hi. Falam gal makaite Muallum  khua  ah tung  masa hi. Tua ciangin Pu Eng Ngul in Falam gal makaite na maivil in Vok tuuk 3 khat ban-in kileem thu ciamna bawlpih thei masa ahih manin, asim ding le anawtkhia ding galkapte ong tun ciangin  tua gal makai te-in Muallum khua a teengte galte hi zenzen kei, ei ma mite hi-ci in, sim nuamlo uha gal makai te lungkim uh ahih manin ciah san uh hi. Falam te’n Pu Eng Ngul Daktal bukhat (memorable Milestone) dingin pia uh  hi.

Tua bang thu tengtawh Hausa Pau Khen  zong ama deihna tangtung lo-in lung kia a, tua khitzawh bangmah buaina om nawn lo hi.

THALMUAL KHUA SAT NATHU: ( AD-1896 ) SEPTEMBER
Pu Eng Ngulte Muallum khua ah kum tawmvei khop aten khit uh ciangin Muallum gampen alei mahmah hoih zolo leh Kapteel, Hiang awn , Muallum gam sung nangawn gal launa tuamtuam aven'nai loh tawh Pu Eng Ngul zong lung nuam lo-in, alal nading, ate'n nading a unau’un va-en kawikawi, va vak kawikawi uh a, tua hun lai pen Falam Ukpi te gam sung mah ahi veve anim dildial, thalsing tampi apona gam hoih mahmah khat galmuh a , tua gam leitangah lal-in teeng leeng i U i nau i beh iphung ilawm igual lungnuamin ki om thei zaw dinghi cih ngaihsun hi. Ni khat tua angaih sutna teng alawm, athu kikuppih te ahi, Pu Lam Phung ( Pu Eng Ngul naupa), Pu Dam Tun (atu pa pa ), Pu Vum Pau ( Hiangawn khua a api' apu), Pu Lam Neek ( Buansingbeh), hih teng 4 tawh nakpi takin gamthak sat nang thu kikum uh hi. Pu Eng Ngul gen’ na Thalmual gampen alei zong hoihin gamhoih leihoih nagam ahih manin Pu Eng Ngul muhna leh gennate avekun thukim uh a, tua gam pen Falam Ukpi gam a  hih manin Ukpipa tungah siau in sum le paai, van tuamtuam te tawh lutin aphal natawh AD 1896 kumin Pu Eng Ngul makai in navaihawm uha,na sat uh hi.

1. THALMUALKHUA SATNA LEH SUM LE VAN BEI NATE:
Hih Thalmual khua pen, Gualnam Maang Pu Hal Kik suan Pu Go Dam tapa Pu Eng Ngul makiah natawh AD 1896 kum September kha in Falam Ukpi Pu Con Bik tung,Dangka,Rs.650/- (Van/Sumtang/Ganhing kigawm) tawh va lutin a na phuhngiat khua ahi hi. Kam Hau Ukpi te phuh khua hi lo hi.

Pu Eng Ngul in Thalmual khua adeih mana Falam Ukpite tunga alutna Van, Ganhing, Sumtang abei te anuai a bangin ki ciam teh hi.

1). PU ENG NGUL' Piakkhiat te:
a). Dangka sumtang in                       - Rs. 250/-
b). Sialtal Zabo Tongsu khat man       - Rs.100/-
c). Vok tuk 3 (Falam Gal makaite  Muallum khua a kigawh a, amau Daktal bu 1 ongpia)         - Rs.   6/- -Rs. 366/-
2). PU VUM PAU' Piakkhiat te:
a). Dangka sumtang aseh,Sial gualno     1 man ------                                 - Rs. 100/-
b). Ciingpheek 1 man ----                                                                            - Rs.     6/-
c). Namsau 1 man ----                                                                                 - Rs.     8/-    
- Rs. 144/-

1). Pu Lam Phung piak----      -Rs.   40/-
2). Pu Lam Neek piak ----       -Rs.   40/-
3). Pu Dam Tun piak ----        -Rs.   40/-                      
- Rs. 650/-
( Amount the sum of Rs. Six hundred & Fifty only)

Khuasat Pupi Pu Eng Ngul makai-in Falam Ukpite tungah Thalmual gam adeihna tawh Dangka Rs. 650/- bei in avalut avanget khit uh ciangin Hamsatna, kilang panna, ki ko, kihekna, khitui tampi aluan khit ciangin Thalmual khua te'n theih nading a kingah zo pan ahi hi. Tua hun lai takin Thalmualkhua inn 17 phapan uha, taangpi inn 12 te'n zong inn khat Rs.5/- ciat apiak uh banah, Maalgam a Dam Hau le Vung Tual te’n zong khipi tang 3 tawh huhin Thal mual khua ong lutpih uh hi.

2. THALMUAL KHUA SATKHIT UPA VAIHAWM KISEHNA
Hih atung a bang tengtawh Thalmual khua te'n theih nading a kingah khit ciangin, Khuasung Upa Vaihawm ding zong kisam ahih natawh ci-in a Behbeh ciat pan in Upa 8 kiteel khia uh a,
1). Pu Pau Dong
2). Pu Lam Neek
3). Pu Suah Awn
4). Pu Hong Cin
5). Pu Gawih Luai
6). Pu Gen Cin
7). Pu Sut Khual
8). Pu Awn Cin
Tuateng Thalmual khua te'n khit ciangin Upa Vaihawm dingin nateel khia uh hi.

3. UPA 8 TENG VAIHAWM THU KHEN SATTE:
Hih atung a Upa 8 teengin, Thalmual gam ideih mana, Pu Eng Ngul sum le Van tampi bei teng, kuan din kik zo ding ihi hiam? Tua ahih ciangin Pu Eng Ngul le Pu Vum Pau in aki kim in tuuktha Khaaltha hawm uhhen, " ci-in thu khensatna nei uh hi. Tua ciang in avai hawmna uh Pu Eng Ngul in azak ciangin Upa 8 te kiang ah dawng kik a, " Ka Pu Vum Pau pen Sima Maala, tuilu tuitawa ka taaipih kawikawi, Saliang thatang , ah duhgawh man hi- Hau Kho Thang leh Pum Thangin hong cikha inteh, thatang, Saliang Pu Vum Pau in tang hen, Logam innmun kei hong Upa ning, kadeih nana, kadeih bangbang in ke'n hong khoning, Iianlua Hoihlua kuaman ong ci-keiun, acih ciangin Pu Eng Ngul genna Khua Upa Vai hawm 8 teng zong thukim in mang uh hi. Tua mah bangin Siah le Kaih peuhmah Vum Pau in akaih khit ciangub Pu Eng Ngul in Thalmual gamsung adeih nana, adeih ciacia innmun logam khoa , tuni dongin Pu Vial Za Do, Pa Pum Za Lian khaang dongin kip a , kua ma hazat pih theih om lo hi.

Note: (Hih Thalmual khua satna pen ahamsa mahmah thu hia mipawlkhat kikum a Thalmual khua avasatziau thei ding cihbang hilo banah akumkum, akhaangkhaang in alal kawikawi khit uh cianga aphutkhak thu leh latungtawn a kisattheipan ahihna itel siamdingin kong thei phasak uh hi)

4. THALMUAL GAM SATCIL GAMGI  KHENNA:
Thalmual khua pen Falam Ukpi te tunga kilut, kilei ngiat gam ahih zah khatin, Pu Eng Ngul in khua le tuite ading akhualna tawh gamgi khen Falam Palai te tawh kopin, Thalmual khua panin akiim singkham ding ahi zongin, logam ding ahi zongin, kikhual mahmah a Palaite tawh adeih zahzah  adeih ciacia gamgi dingin ngenin anuai a bangin gamgi phut uh hi.

a) Tuitaw lam panin, Phillui leh tuimi kituahna, Philkaa panin nitum na lam a paisuak to in, Khuamial lui (or) tuimilui ah Guasing tawh ki gamgi a, leentang mualdung dong ah     
b) Lentaang mual panin, Leilu lamahpai suak to in, Dampi le Bualli kikaal ciang.
c) Thalmual ki gamgitna Buangpitu mual 3 kituahna ciang dong ahi hi.
d) Tua laipan nisuahna lamah paisuk in, Buanli tawh ki gamgi suk a, Phillui man suk hi. Phillui te Tuimi kituahna Philka ah ki tuah kik, tua kikaal sung teng ahi hi.

Hih atunga Thalmual gamgi khensate iet ciangin, simlam leh Zolam kigawm gam ahih manin, Siman, Zoan ki ciingin ki phamat den ding cihna ahi hi. Tua hi a Pu Eng Ngul in munhoih gamhoih Khua le tui khangsawn sawnte a dingin nateel thei mahmah in, an khing kikhamna khua aphuh manin, Ko atu atate khaang dongin Pasian kiangah lungdam kakoh det thu uh ahi hi.

5. UKPI KAMHAU HUN THALMUAL GAMGI KHEN KIKNA:
Thalmual khuasat ciil Pu Eng Ngul tetawh aton khawm suksuk beh dangdang tampi aom mah bangin khuakiim khua paam panin ong nung tu'n beh dang tezong tampi mah oma, khua kipkhit zawh kum 3 kum 4 khit ciangin Pu  Thawng Gin ( Hatzawbeh) makaih natawh Phaiza khua, Tonzang Ukpite tung panin siauin khuasat khuan, teen khuan ngahuh hi. Phaiza khua Hausa sem dingin  zong Pu Thawng Gin mah sehpah uh hi. Bang hang, hiam cih leh Mualnuam khuaah  Siahtung Siahphei puak dingin, vaikhak pah nuam ahi hi. Thalmual gam sungah Phaiza khua onglut ciangin, Falam Ukpi te ong khensak nasa gam leh mun azaapi ong khenkhiat sak uh hi.

Thalmual Phaiza gamgi khen ma-in tu laitak a, Phaiza khuanawl Phaiza zaang acih kuamsuk khempeuh bang Pu Eng Ngul logam vive ahihna Pupa tangthu te ah ki ciamteh lai hi. A hi zong in Pasian in Ukna zaa apiak aana nei te khenna gamgi mah ahih veve manin akuakua logam kuakua in kho ta leh Pasian deihna hizaw, ci-in Ko Pu Eng Ngul suan tuu le ta te'n kasaang siam lel uh hi.

THALMUAL LE PHAIZA GAMGI KHENNA:
Thalmual Hausa Pu Dam Pum sepsung (25/5/1927) ni-in anuai a bangin Tonzang Ukpi te'n Thalmual /Phaiza gamgi ong khenkik sak hi.
a) Leitaw lampanin:- Tuimilui le Phaiza lui  pan paito, sihta lui (Suangphuh) mual dungah, lungsial mual zum apai suak. 
b) Lungsial mual ah paito suak in Luaivawh zaang ciang.
c) Lentaang mual dung dong ciang.
d) Suangphuh mual dung a pai suksuak Phaiza lui dong.

THALMUAL KHUA SAT KHIT BEHDANG ONG NUNG LUT TE:
Hih Thalmual khua a kisat ciillai in, khuasat pupi te inn 5 leh, nautang inn 12 aki gawmin inn 17 pha uh aa, khuasat, akipzawh ciangin mundang, gamdang panin, ong nung tu'n behdangte anuai a bangin kiciam teh hi.
1. Tangpua beh         - Kaptel pan
2. Milun beh              - Hiangawn pan
3. Bawmkhai beh      - Mualnuam pan
4. Hatzaw beh           - Hiangawn pan
5. Munvung beh        - Valvum pan
6. Zilom beh              - Valvum pan
7. Munluah beh         - Valvum pan
8. Thangom beh        - Valvum pan
9. Thangniang beh    - Leilum pan
10. Bawitung beh      - Hiangawn pan
11. Thangeu beh       - Leilum pan
12. Thangngen beh   - Leilum pan& etc..

6. THALMUAL KHUA SATNA “LA”
Thalmual khua akisat maleh aki sat khit ciang dongin Pu Eng Ngul in aphut khak, hamsatnate, alawm agualte hazat langpannate, khuakiim khua paam te elnate bek tham lo-in abeh aphung sung mah mah ah elna, ukpi zumkong mangkong ah kikhiat a sihdan thuak zah dong ding a kihekna, aki genkhin zolo hamsat buaina tuamtuam te athu bekbek kigen khin zolo a ala bekbek zong dawng 40 val te lakah taangpi taangta tawh kisai zawdeuh 40 lak panin dawng 10 ding gelhin anuai ah ong ki-at hi. Hih la te pen Khuasat pu mah ahi Nau Lak beh leh Buansing beh te tangthu sung ah zong om tek ding hi.

PU ENG NGUL KHUASAT  LATE:
1.
a) Pu Von sanggah khua katuah na'n Vaimang kankong hong ing e,
b) Vaimang kankong ka honna zualam teng aw, hamtaang bang bot, zo ing e.
(Vum Pau acihna) 
2.
a) Khuakiim in gi bang hong neek e, Zua lamin Vai, Mang biang e,
b) Zua lam tuibang kiam lawmlawm e, momno suih lung, pil ve aw, 
(Thalmual/Phaiza gamgi Ukpi te khenna).
3.
a) Sawn  mom tawh paai, bang kop ing e, melmak Vaimang vabiang e,
b) Melmak Vaimang, ka biak lai-in, simlei muikhua, zing bang e, pham le hing mel amang e, (Falam Ukpi te'n thusit dingin sam a, a tupa Pu Dam Tun in azuihna) 
4.
a) Zualam Haibang kangak lai-in, Mimva bang thum tam ta e,
b) Zualam tangbang, katheh nua dah, in tam  e, nau bang ka kah, na hie, 
(Aki elna aphuah)  
5.
a)Puvon sawlsang ngalliam hing e, Dolai khuaibang, tum ing e,
b) Dolai khuaibang, tum hi veng e, mang citeng sin lai zawt ing e, Lakmai kaluan khin zeel e, 
(Ukpi zum ah a phuah na la ) kisapna thu a
6.
a) Ciin tawh paibang, kakop lai-in , Huisai mah min lian sang e,
b) Ciin min lian hen, kacih manin,  Sinlai phuh bang kho sak inge, lungtup phung siang a tute, 
(Pu Eng Ngul Sai matding adeih sakna la).
7.
a) Gualin Mangbang hong neke, Vaimang kiang an, siim inge, 
b) Ciampih tangphung, bang hong khia e, Mun inn gam lo, mel theih loh ah , zaal ing e, 
(Beh le Phung te'hazatna hanga Ukpi zum ah thusit thuakna la).
8.
a) Zualam Haibang, kangak lai henkol bulh lai, beltui bang so, om lo e,
b) Meei bang athen'nunge, U le Nau aw, The bang khuang nuam, tamtah e,
( Ukpi zum thusit thah thuak ding sa-in khukheukhau uh a, thu ven ciangin ki mai en in om).
9.
a) Sangkap Sawmsial, a tuang e, Sanglian sawmsial a tuange, 
b) Sanglian Sawmsial a katuan zang, Huisai aw, lung natai hiam, nua le nama zaw in.
10.
a) Pupa Gualgen, Kamkei Minlian, Sau ah hong tuang tuang ta e,
b) Sau ahong tuang, tung ta e, Sawmsial tawh lawm ka sa e, 
(huasat ciangbek hi lo-in Gualtung tuanna ding ki demna ahi, Salian minthang Pu Khup mat a, Pi Vung Za Niang in, Khuasat pupite aphuah la hi.


Thalmual Khua Geography

Thalmual Khua omna:
Zogam saklam Tedim Myone sungah omhi. Tuipi maitang (sea level) pan asana 5463′ ah oma, galkap gamlim (target) RT-9699 ah omhi. Khuasatcil a, akiteen masaknamunpen KHUAPI kicihi. Hunkhat ciangin ateenmasakna uh Khuapi ah kitazo nawnlo ahihmanin, vengthak nasat uha, BUALLAM naci uhhi. Vengnih ah teenguha, Khuapi le Buallam kici-in bangmah buaina omhetlo hi.

Khuahun:
Khuahunthum oma, Tuk, Khuakhal, Phalbi hunte ahihi. Khuallumpenhun laitakin 33’C ciangbang hi a, khuahunnop mahmahhi. Phalbi khuavotpen hunin 2’C ciang phathei a, zokuam lamah vuukkhal theihi. Ahizongin kumkhatle kumkhat kibanglohi. Khualum khuadam zui-in sim leh zo kikhenhi. Teenna khuatung saksiahpen zolam kici-in, khuanuaisiah simlam kicihi. Zolamah guahtui tamzawdiakin khuavot hi. Phalbi ciangin vuk kiatheihi. Simlam pen guahtui tawmin khualum hi.

Sim le Zo omahihmanin tuk an, khal an tampipiangin khawhsa kikhamin nuamkisa mahmahhi. Leitang hoihmahmah ahihmanin akituh akisuan khempeuh hoihhi. Lokhawhnading khenpithum kisuahthei a, khenkhat kumlibang kikhothei hi. Lokhawhnading akhenkhatna akikhawhkik hunciangin kum 12 sawtta ahihmanin lokhawhphatin anpiang hoihmahmahhi. Lokhawhlohna munkhempeuh gankhawina hipahlel hi.
Thalmual gam Zokuam Lentaang mualdungah leitungpiancil akipan akiphuakngeilo singkungkhangham tampi omhi. Tua singkungkhanghamte tungah Pasianin paankaai tawh zemin etlawm mahmahhi. December khaciangin Phuitong le Thuang pakte vasa in bawmin hamngeingai hi. January, February khasungtengin Zolampaina lamlianpi dungtengah Neisokkungte pakzihziahin etlawm mahmahhi. Tuathamlo in April Sialsawm khaciangin Zogam singkung khanghamte tungah singpipak, luailengpak, paksungvom, palpipak, saheipak, heisapak cihte akipan a etlawm ahoihmahmah paknamtuamtuam tampi oma, etlawmpha mahmahhi. Dota akipan Dopi khasungteng pengpelepte hongham leuleu a, lopawihun hongphawksak hi. Gamkha pan Tangsihkhadong vakawlkap zanhakliangin hamleuleu a, lunglenhuai mahmah hi. Khuakhal hunsungin Zogam singkungpite lakah tangawm (tawlawk) ahihkeileh zolawkta akici vasate suntawntung hamngeungeu uha, lungzuanhuai mahmahhi. Tuabangin vasatezong ahunzui-in kikheel uhhi. Khuakhal hunciangin gamsungah vaukungte leh khuakim luidungah suangkuate pakleuleu hi. Tuabangin Pasian in ahunzui-in gamsung a etlawmdingin ongzepsak hi.
Kizoppih khuate:
Thalmual khua nisuahna lamah Tuithang, Tungzang khuate omhi. Leilu lamah Buanli khua oma, nitumna lamah Dampi khua omhi. Leitaw lamah Phaiza, Muallum, Cingpikot khuate omhi.

Gamsung aom mualminte:
Lungsialmual, Buangpitumual, Humvummual, Khuatamual, Sialbumual, Takheuhmual, Zuangluimual, Thalmualtaang leh Thawngnemmual cihte ahihhi.

Gamsung aom luiminte:
Phillui, Tuimilui, Phaizalui, Zuanglui, Mitdaklui, Khuatawlui, Konglui, Phaitamlui, Leisanglui, Humvumlui leh Gamgiluite ahihhi.

Gamsung aom ciktui(sih) minleh aomna:
Songzelsih pen songzelah, Khawtawsih (Haitasih) pen khuataw lamah, sialbusih (Nek Kam losih) pen sialbu lamah, Khuatasih pen khuata mahah, Khuallosih (Pumpeengsih) pen Ngalbual tawh gamgi ah, Cingzosih pen Humvumlui leh Meiteizaanglui kituahna khangdiakah cihbangin omdimdiamhi.

Innpite losih akicipen Zolamlianpi geiah oma, Ngakhuk zong kicihi. Zosihpi pen Mualmetvum (lankikhaina) nuaiah omhi. Hiangtamsih, Nelkangsih, Ngalzaangsih tepen tulaitak a Takzaang ateengtetawh kinai mahmahhi.
Gamsung munlehgam minte:
Khuapam, Leikiat, Haidam, Phazalui, Thalmual, Songzel, Khuataw, Daiduak, Buhleizaang, Dainuai, Khuata, Khuaikeen, Thaukap, Humvum niam leh sang, Siakcin, Khuallo, Mualkaai, Hiangtam, Kawhpum, Meiteizaang, Nelkang, Khuamun, Sialbu, Awmpeek, Malsuang, Takkheuhnuai, Belsanzaang, Zuanglui, Vomgiahbuk cihte ahihi.
Dr.Thawng Khan Pau
GPO Box 418
Yangon, Union of Myanmar

Source ;
 www.thalmual.com .




Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: THALMUAL KHUA TANGTHU. Description: Rating: 5 Reviewed By: Cinpu Zomi
Scroll to Top