728x90 AdSpace

Hot
Menu
Zon-ol na Donate

Latest News

THUKLAI KHUA TAANGTHU

Asung a-om thute in,
1.Thuklai Khua tangthu.2. Thuklai Khuami Christian upna a -um masa Pupi (5) te Thu le
3. Thuklai Hight School tangthu.


Thuklai Khua Thu
Thuantak le Vomhzang pan Lophei pawl le Limkhai pawl inn a tuan zawkciang Khuasak pawl le Thuklai pawl teng ki om khawm lai hi.
1720 kum pawl in Pu Suum Seal lampui in Thuk Lai suan teng in Muipi khua sat uh hi. Hi bangin Muipi khua sat a, a teenna mun taw kizui in Muitung, Muinuai, Muikhua, Muidam, Muisaang ci in hawng minte zongh hong piang hi. Ahizong khat vei ciang Pu Thuk Lai min law natu ngaisutna taw Muipi min bo sak in Thuklai khua kici zaw hi. Mikaang ngamkeau ngalte Khuasak hong thet ciang Khuasak a kipan Sizang mite in Thuklai khua buhna in kinei a, Phaipi, Zo, Beallei cina mun teng ah kiteang ngei hi.

Thuklai khua ah 1946 kumin mawtaw theng hi. 1950 kum ciang Buanman khua taw telephone khau kithung a, Buanman le Sialtuuzang telephone taw kipaupui thei hi. 1928 kum in Vernacular School kiphuan hi. 1944 kum ciang Post Primary School kihong hi. 1945 kum ciang Private High School kihong a, 1947 kum ciang kumpi te in State High School hong nga sak hi. 1953 kum ciang kumpi te in Rural Health Center nga sak hi. 1962 kum ciang Zato Station Hospital nga a, tua zawk hun khat ciang Rural Health Center sia Mualbem ah kitua hi. 1963 kum ciang kumpi te in Post Office koi a, 1964 kum in Telegraph zongh Thuklai koi thua hi. 1964 kumin Sub-Township nga hi kasap kumpi thu paizia taw kizui in 1972 kum ciang kiphiat kik hi. Police Station sia 1965 kum in kumpi te om sak hi. 1985 kum ciang Unicef Water Supply kivawt hi. 2002 kum ciang kumpi te in Auto Telephone nga sak a, leitung mun theampo telephone taw kipaupui thei hi.



Biakna taw kisai in Thuklai khua ah khua sat pan kipan Lawki ngeina kibia hi. 1911 kum in Pu Kim Lian le a zi Pi Cing Huai te Tuiphum Tapidaw suak hi. 1911 kum sung ma in Laipian biakna theng a hun khat ciang bo kik hi. 1956 kum ciang R.C. biakna theng hi. 1958 kum in SDA theng hi. 1977 kumin AG pawlpi kiphut hi.


2.Thuklai pan Tapidaw, Asuakcil Ih Pu (5) te Omzia Atom

Thuklai khua pan tapidaw suak masa bel teng ii tapidaw suak kum 100 cinh poaipi 2013 April tuibuak poai sung ki vawt tu hi. Khamtung ngam bup pan tapidaw suak masa bel sia Pu Pau Suan le Pu Thuam Hang te nupa hi aa, Haka pan kua, Falam pan kua teng ci in ki ciamte ki son ahihang, Thuklai pan tapidaw suak masa teng ii kum 100 cinh jubilee theng tu hi peetma zo aa, akua tatak teng ci sia a son thei vaset a om bua hi. Tua ahikom, 2010 Thuklai Tuiphum Pawlpi ii kum cinh thu zaaksakna report sung pan anuai a thu teng kong kai khawm hi.

1. Pu Kim Lian :
Pu Mangzong belephung sungpan hi a, Pa Thang Ko Ngin ii apu, Pu En Ko Thang taw ki unau hi. Pu Lam Thuam in, tapa 3 le tanu 2 nei a,
Pu Kham Ngo
Pu En Ko Thang
Pi Uap Cing
Pi On Dim
Pu Kim Lian ahi hi.

Pu Kim Lian sia, Pu Mangzong belephung sungpanma ahi, Sialto baangkua pan Pi Cingh Huai taw kiteang a, tanu Ciang Khua Cing nei bek hi, ci in, kiciamte hi. Kawl, Tuimui khua ah tai a, tualai ah thi, ci hi.

2. Pu Son Lam:
Ngawn ngam pan hi a, Khautaan belephung sungpan piang hi . Apu sia, Pu Thang Bel hi a, Pu Hautong te Pu Vum Kam inn pan khang khia hi. Zi nei a, Pu Huat Vum ni te khat taw kiteang ki ci hive, a min kikat saan lai hi. Suanlepaal nei ngawl ci in kiciamte hi. Kawl, Tuimui khua ah tai a, tualai ah thi, ci hi.

Asuapui sealte sia:-
Pu Vum Cin, Pathein ah Laithiangtho saang ka a, tualaima ah zi nei in thi, ci hi. (Zomite sungpan Laithiangtho sang ka phit, ci in kiciamte hi)
Pu Thang Kam (Suapui Kam Nang’ tappa hi)
Pu Seal Vum (Innmong)
Pi Ngin Cingh (Syapi Lam Za Tinh’ nu hi)
Pi Cing Cingh

3. Pu Son Suan:
Saizaang pan hi a, Neinguup belephung sungpan piang hi. A pu, Pu Kip Neek hi a, a khua pan Kawl ah aki zuaksuk tu in, aki paipuilai in, Pu Tunngo belephung sungpan Pu Lun Vum in tanh a, Pu Lun Vum’ inn pan khangkhia hi. Pu Son Suan’ ta, Pu Thuam Khai hi a, Pu Thuam Khai’ ta, Pa Suan Za Pum hi. Pu Son Suan, atapteng :
Pa Suan Za Pum
Pa Suan Thang
Pa Suan Ko Cin
Nu Suan Ko Cing
Pa Suan Cin Thang

4. Pu Am Suak:
Kawlte hi a, Pu Za Khup’ innpan khangkhia hi. A zi sia, Zuung khua, Samte belephung pan hi. Tapa 2 le tanu 1 nei a, Pu Thuk Kham’ inn ah om, ci hi. A zi min, Pi Cingh Luan hi.
A tanu : Pi Vung Zam (Ngoai)
A tapa : Pu Vum Ngo ( Thingtom thei, tuitha thei lalel, ci.)
A tapa: Pu Khup Khua Thang (Pu Za Khup atap hi) pil mama. Japan ngal sung siphu levi seam a, tua hun sungma in, TB natna nga in, thi ci hi. Pu Vum Ngo sia a tui thakna pan Japan ngalkapte 5 taw ki si a, a naam toai sia taw Japan ngalkapte vau thathong nial hituak a, Japan ngalkapte in, mawngpheang ah that, ci hi. Pi Vung Zam te nuta sia, Saknuung ateenna ah Bomb tang in kha a, thi ci hi. Pu Am Suak sia acina in thi hi.

5. Pu Zong Thuam:
Saizaang pan hi a, Pu Nei Lut suanh Hau Ngiak belephung pan piang hi. Apa Pu Song Thang hunlaipan Sizang ngam sung ah hong theng a, Suanthuk belephung pan ukpi Pu Kam Lam inn pan khangkhia hi ci in ki ciamte hi. A zi sia Pi Son Dom hi a, tanu Pi Dim Cing bek nei hi. Pu Zong Thuam sia, atha hat angalpal pasal khat hi a, khua sung ah inn mun pha le lo ngam, thinghak pha nano nei hi. Thuklai khua pan a piang Sizang ngaknu mealhoi a aminthang Lia Neam Mang hong thi luilam a, tangval akisim peuma khuangai tek ahikom Lia Neam Mang’ thivui ni, tangvalte in tatsat peu ngawl thaukap tawntung a, thau puansia mithite innkhum tung ah tu, ahikom inn kaang a, inn 12 kangtum pai ci hi. Pu Zong Thuam in, ama inn pan nasiatak in mei phel a, ama inn pan mei kuang thimsak hi. Ahihang meisa in ataksa kang up ahikom tua tawma in thi hi. Tulaitak, Pa Kham Do Cin te Pu hi. Zong Thuam Khai, Zong Thuam Cin, Zong Thuam Do Pau te in tap hi. Atanu Pi Dim Cing sia tanu 4 le tapa 1 hing hi.
Pi Zaang Cing
Pi Vung Huai
Pi Cingh Nuam
Pu Thuam Khai
Pi Son Nuam cite hi.
Pu Thuam Khai’ tapa sia Pa Suan Za Pum hi.

Note: Thuklai Tuiphum Pawlpi, kumcin thu zaksakna (2010) sungpan ka lakkik ahihi.
Posted by :- Thawngno



3.Thuklai High School Tangthu

I. Thupatna
Nidang in, Khamtung, Khuasak khua ah, Middle School khat ki hong ngei hi. Ahi hang, Khamtung ah, Kawllai sin kul bo ci in,Mangkang Kumpi te in 1925 kum ciang, Zolai bek sin sak ahi ciang, Tan li dong in ki khiam suk kik hi.

Japan ngal ma in, Khamtung ah, Ngal Kap Mangpi , Major Moore in Chin Hills Battalion ah , Commanding Officer ( Tatyinhmu) hongseam a, Thuson Mangpi sia, Mr. Naylor in seam hi. Moore Mangpa sia, Scotish te hi a, Zomi-te hong it mama hi. Chin Hills Battalion a ngalkap seam ngei peu ma pilna khat tek he a, thiam sak hi. Lettama, thing-at, ngankhoai,lothaw ci bang hilh a, pension a lak ciang, a mate le a mate, nuntak theina tu ngaisutna hi.

Ngalkap Mangpa, Moore leh Thuson Mangpipa Naylor sia a thinsung khat ah ki lem ngawl tawntung hi. Ni khat, Moore Mangpa in, Khuasak khua ukpipa, Chief Lian Thawng mun ah, Mangpipa mun ah sanginn hong piaknatu ngen in ci a sawl ku hi.

II. Sanginn Nganatu Thu Vaihawmna
Chief Pu Lian Thawng zongh, Naylor Mangpipa tawh ki mu hi. Pu Lian Thawng in:
“ Nidang in, Khuasak khua ah, Kawllai sang tan sali dong om a, tampitak phattuamna kinei hi. Khamtung ah Kawllai kisin nawnngawl ahiman, pilna sia khangto ngawl ahi ciang Khuasak khua ah, Middle School khat hong hon sak kik le te, ci a hong ngen nuam kahi hi” ci.

Naylor: “ Primary School teciang sia no Zomi-te a tu kicing zo hi. Lothaw na tupo , Zolai tanli ciang he po leu te pha zo hi. Laikung laite kul ngawl hi. Subedar Major Pau Cin, en vele , Zolai tanli zongh sin na zia? Tu Subedar Major bang nga ih ve.”

Pu Lian Thawng: "Tasia hang ma hi ve aw, Middle School ka dei sia, Ka Pano Pau Cin bang Middle School ahibua le High School ciang nana theng le tu sang a zalian zaw, a sang zaw, khang to tu a General dong zong suak thei lai tu ve."

Naylor: “ Tua le nang High School ciang sin le te bang seam tuni?”

Pu Lian Thawng: “ Bang hang maw, High School ka onh zawk ciang, College pai tu , B.A degree ka nga zawk ciang, Nang ma bang ma Mangpi ( District Commissioner) seam tu khi nga.”

Naylor “ Nang, kei ma bangh a Mangpi ( D.C) suak tu maw?" ci in ngau ngengu hi.

Pu Lian Thawng: "Bang hang seam thei ngawl tu k'hi? Nang zong seam thei ih vete, ka pilna, ka laisinna tawh kizui a seam thei lel ngawl tu k'hi? Kei zong seam thei mama lel tu khi ze!”

Pu Lian Thawng sia, Tedim Vuandokte, (Sub-division Commissioner) ih nasep a ki laih ciang, Confidential Report sung ah, Chief Lian Thawng sia, pil hi, a kitakhuai chief khat hi. A minamte a tu deisak a, a ngam khantona tu a hanciam pasal khat hi, ci in report ki pia hi.

III. Khuasak Khua ah Middle School Honna Thu
Japan ngalkapte India simtu in hong pai to ma in, Tiddim khua Vuandok pa Kelley sia, Levy te vai in buai mama hi. Thangdung ah lam ki zik hi.Tua laitak Chief Lian Thawng in Laihilh Saya Khai Khaw Lian(Khuasak), Saya Khai Khaw Thang(Thuklai), Saya Sein Lian(Limkhai) te sia Levy sung ah, hunciamte(Time keeper) naseam in om sia mu hi. Pu Lian Thawng in hi bang a laihilh thei te, a ma te pilna zangh ngawl a mundang a sep sia pammaih sa mama hi.

Sizangkual, Ukpite le, Hausa Upa, Sang Saya te le, thu he zaw hiat tu peuhmah Khuasak khua, a inn ah sam in kikhopna nei hi: “Maisang ih Sizang minamte a tu ka ngaisut ciang, High School khat ih nei tu sia, kul mama sa k'hi hi. Tu in laihilh thei tu Sangsaya om tinghtengh hi. Sangpatang tu zong om hi. Tua ahi ciang, tu laitak in, High School khat hong leang pha ngawl tu ziam" ci in, ama ngaisutna pulak hi.

Tua ni in, “Siyin Education Board" ci in Sizang sung sang nga theina tu ki vaihawm hi. Tua Siyin Education Board te in, sang hon theinatu in, Tedim Vuandokpa Kelly tawh kimutu in Pu Lian Thawng ma sawl a, a ma zong a zing sang ciangin, peang in Tedim pai suak paih hi. Tedim pan Vuandok pa Kelley mun ah, Khamtung ah Sanginn kisapna, Sizang minamte ii pilna deina, Khuasak khua ah High School khat honna tu thu son puih hi. Vuandokpa zong thukim a bang teng ki sam tu n'u ziam? ci in dong a, laisimbu-textbook, laibu-notebook, laikung cite sazian hong ngen paih a, a kisamteng India ah hong vaithaksak paih hi. Pu Lian Thawng, Khuasak athetpo ciang, Vuandokpa tawh a kimuna teng le, Vuandokpa ih, private sang khat hon theinatu a thungana teng a inn-ah, Sizang Upate mun-ah son kik hi.

1st June 1943, ni in Khuasak khua ah Siyin Education Board te in Private High School khat hong hi. Tua sung ah laihilh teng:
(1) Saya U Khai Khaw Lian, Khuasak, Headmaster,( Nung sang ciang Deputy Inspector of Schools)
(2) Saya U Khai Khaw Thang, Thuklai,( Dr. Suang Za Pau ih pa,)(Nungsang ciang J.A,T)
(3) Saya U E, Pau Za Kam, Khuasak, (Nung Sang ciang, State Education Officer)

Preparatory IV Standard Class, V Standard Class le VI Standard Class ciang ki hong zo bek hi. Tua hun lai in, Tan 6 ong sa, sangpatang om ngawl hi. Tua sang hon phit lai a sangkahte sung pan, Major General Tuang Za Khai, Colonel Son Khaw Vum, Major Cin Khaw Mang, State Law Officer Grade I. U On Za Nang, Law Officer Grade I U Lian Za Nang te kihel hi. Japan ngal hong theng paih ahi ciang, tawmvei sang kikhak hi. Japan ngal ma India ah, Kelly Mangpa in Khuasak High School a tu hong vaithak sak sia ngal sung teng India ngam Aijal Post Office ah kikeam a ngal zawk ciang Khuasak hong theng pheang hi. Laihilh Saya U Pau Za Kam sia India ngam Shillong College ah pai hi.

IV. Thuklai High School Hong Pianna Thu
Sizang sung a laisanbeltu in, Thuklai khua ah tua High School sia ki tua kik hi. Panglong Conference ah Bogyoke Aung San tawh a kimu Pu Vum Khaw Hau in Khamtung ah, High School kisapna thu nasiatak son hi.Thuklai khua ah Private High School khat Sizangte ih honna thu zong son hi. Bogyoke Aung San in Mangkang te ii vawt zawk ngawl sia kei kum nih sung hong vawt tu kahi hi, ci in kamciam pia hi. Kawlngam suatakna nga ma, 1947 kum in, “Khamtung, Thuklai khua ah State High School khat sanction ki pia hi" ci in Radio sung pan hong kizasak a, a kuamapo ki lungdam tek hi. State High School Thuklai ah, Tedim ngam sung pan kuama sangkah tu hong pai ngawl ahi hang, Haka, Falam pan in hong kah hon hi. Mundang te in, High School ngen ahi hang, sanginn om ngawl, sang patang om ngawl sia High School ki pia thei ngawl hi ci in, kipia paih ngawl a, dadam in Myone sim High School khat tek ki koih pheang hi.

V. Thukhupna
Yangon Siyin Baptist Church , Silver Jubilee Magazine (2005) sung ah Sayapi U E. Pau Za Kam ih at "OPENING A MIDDLE SCHOOL AT KHUASAK” sia bulphu in kong suak sak kik hi. Original a dei te in a tuam in vaitha ta un.

A tung ah, ki-at-na sung telngawl om le a tuam in hong dong leu te maw.

Hang Za Pome.

Source ; Pu Thuklai Suanlepaal.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: THUKLAI KHUA TAANGTHU Description: Rating: 5 Reviewed By: Cinpu Zomi
Scroll to Top