728x90 AdSpace

Hot
Menu
Zon-ol na Donate

Latest News

VAPHUAL By - Kham Zen.

Leitung a Gam minthang a hi, The United States of America (USA) sungah, Gamke (50)te in Gam Vasa, “State Bird” nei ciat uh hi. A gam vasate uh, koi ci banga teel uh hiam,cih i theihpih kei hi.

Taang-a tuan-a, i pu i pate in VAPHUAL mah na thupisak uh ahih lam, mikhempeuh in i thei ciat zo hi. Leitung Galpi nihna a ven,  Kawlgam  in  suahtakna  ingah   khit a   kipan   ei Zomi te ‘ kiciaptehna VAPHUAL hi pah a, Kumpi in zong hong theihpih hi. Lailam tawh kisai, thukizakna tuamtuam,  Magazine tuamtuamte ah zong i  nak zat mahmah hi. Tua hi a, VAPHUAL lim khat peuh i muh ciangin ei ZOMI tawh kisai thu hi peelmawh ding hi, ci-in i lungsim sungah hong lut pah lian hi.

VAPHUAL te a tuikuan ciangin, sing kawhawm omsa khat peuh ahi zongin, bu tom tawmin ahi  zongin,   siangtho  tak  leh  a muanhuaina mun teelmasa uh hi. Api in, tui dingin a bu sungah a lut  khit   ciangin,  a bu  sung a nuam theithei dingin puah sitset masa-in tua khit ciangin, ama mul teng botsiang kiuhkeuh in, a busungah phah sitset hi.

A pi,a bu sung ah   a lutkhit pheta kipan,apa in a bu kim kot ah   buan   tawh   maih dik dek in,a pi ‘muk   thawl na ding mun   khat   bek   vang sak siuseu hi. Api tui-in, a note a keuh   khit  mateng, apa in   an zongin an va puak den hi. Apa in an a puak ciangin, anu in tua a bu-a, a vang kiukiau pan, a muk na dawksakin, kamka in, apa in a an puak teng, tua anu kam sungah guang suk hi. Apa in an zonga, a vak hun sung lo buang, koimah ah vaksan het loin, a bu kiangah sun tawh zan tawh cingcip den hi.

VAPHUAL note keuh in, a mul uh a po hun le a nu uh mulpo, kituak linlian hi. A note a lentheih hun ciangin, apa in abu kiimkota buante susia vek in,a vekun leeng khia khawm liai-liai uh hi.
Apa in anu le anote an a va puak ciangin, a bu sunga om anu, na dei dide in, a muk a na dawksak keileh, ciampeel, it nawn lo, ci-in khasia in, amah l e  amah ki that  dingin  sawm pah lian a, van lamah leeng toto in, hun a sak teh, amah le amah kikia suksak hi. A awm tawh leitung kitusuksak in, a awm kitamin si hi. Tua mah bangin anu zong in apa’ an puak hun napi‘n a tuntheih kei leh , ciampeel,it nawn lo,ci–in khasia leuleu a,a   busung mahah, amah le amah kithat lian leuleu hi. Kisihpih ngam uh hi.  Thitsa   a neih dan uh lam dang hi.

VAPHUAL te,mun khat pan mun khatah a lal uh ciangun, tuam len, cih bang om lo in,   kimat   tinten, alom in lengkhawm uh hi. Hih banga VAPHUAL te lal a, a len khop uh teh, ging hiauhiau a, tua aging hiauhiau akizak teh, Vaphual lal hi, ci-in kimu nuam mahmah hi.

ZOGAM bup, ZOMI khempeuh in VAPHUAL i thupisimzia kibang kim ciat hi. Tua man in, VAPHUAL pen lailam tawh kisai mun khempeuh, cihtheih phial ah kizang kim ciat hi. “The Chin State Emblem”, “The Chin State Seal” pi suak ta hi. Hih thu ah Zomi bup in Minam ciaptehnain zang ding, cih kikupna a om ngei het lopi, Pasian’ geel hi ding hi.

VAPHUAL te citawm mah mah hi. Leitung bupah zong kimu kim lo hi. Africa Continent sunga om gam neu khat sung le Asia Continent sung, South-East Asia, Kawlgam sung, Kawlgam sungah zong, ei Zogam sung bekah om hi. Zogam sungah tam a kimuhtheihna munte: Tonzang gam, Hausapi kiim, Tongciin, Bualtal le Paangmual, Kanpetlet gam, Victoria Mual kiim, Paletwa gamah zong om hi. Ei Zomite in, VAPHUAL te mihing zahin kituat ahih manin, kithat ngam lo hi. A that a omleh, tual that, mihing that zahin kingaihsun hi. Khatvei, Kumpi naseem khat, Kanpetlet gam, Victoria mual gei khua neu khat ah va piangin, gam vavak a, VAPHUAL khat man hi. Inn a tun teh, khuapihte in bang hanga hih  VAPHUAL va kaap lum na hiam? Ko, mihing banga kangaihsut uh hi a, ka that ngam kei uh hi, ci-in khuapih nupi pawlkhat bang kap ngekngek uh hi.

I gensa mah bangin VAPHUAL te, Leitungbup gam nih, Africa Continent, sung gamneu khat sung le Asia Continent ah Kawlgam sung, Zogam bekah kimu thei hi. Leitung Ganhing khawina tuamtuamte bekah kimu thei hi. A citawm mahmah nam ahi hi. Hun khat lai-a ei ZOMIte Kawlgam vaigam ah, minam kician, a zahtakhuai, ciampel ngei lo, zuau gen ngei lo, khat le khat kisihpih ngam, mi citak, ci-a hong kiciamtehnate zom suak in, i Gam Vasa, VAPHUAL te gamtatziate i lungsim sungah vomciat ni.

Source ; Zomi Khristian Aw (ZOMKA) Lom 16, Hawm 120, August, 2011 .

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: VAPHUAL By - Kham Zen. Description: Rating: 5 Reviewed By: Cinpu Zomi
Scroll to Top