728x90 AdSpace

Hot
Menu
Zon-ol na Donate

Latest News

ZOGAM CHRISTIAN TANGTHU.

By - Sia Lang Khan Mang.
1899 kumin America gam panin nupa khat Kham tung gam Hakha khua manawh in Thayetmyo panin hong dingkhia uh hi. Thayetmyo panin Chindwin Gun zui in Gunkhawm (Kalewa) khua hong tung uh aa tua panin Tuikaang (Myittha)Gun naak lam zui in haksatna tampi thuak in Kawlpi khua gei Hai Khua (Pyinda Seik) dong gunkuang hong tuangto uh hi.

Kawlpi khua panin tai 120 val a gamlatna mun Hakha khua zuan dingin mualtung lam hong manawh uh hi. Mualtung gam lokho mite in lothak zuanin, a lo halna uh meikhu in mun khempeuh tuamin khuamui kai zilzial hi. Thayetmyo panin hong kipat khiat khit uh kha nih dektak ciangin bii-inn vive 300 bang ding apha khua - Hakha khua hong tungto uh hi.

Tua nupate in ih Zogam a Pasian thu lungdamna thu hong puak masa America sangmang (missionary) Arthur Carson le Laura Carson te ahi uh hi. Amau nupa tawh Kayin mi sangsia Thra San Win hong tonpih uh hi. Hakha khua ah British te galkap bu thum in na dawn uh a tua zan Hakha khua sung suang-inn awng khat sungah giak uh hi.

Tua zan (March 15) ciangin Mrs. Laura Carson pen gim lua le lungkia lua kisa- in hong kap khia depdap hi "Hih lai mun peuhmah ah kei ka khantawn koici om thei peuhmah ding," a cih ciangin a pasal Arthur Carson in hehneem aa, "Laura aw, lungkia ke'n. Ih thu bulphuh: Kei hong thahatsak Khazih hangin na khempeuh ka hih thei hi, cih thu phawk in." ci hi. Tua a kipan in Carsonte nupa in Zomite Topa' lamah a ngah theih nadingun lungkip tak le lungkho takin nasep hong kipan uh hi. Thra San Win in Hakha gam sungah nasep hong kipanin, a dang Kayin sia ahi Thra Shwe Zan in Sihzang gam Khuasak khua ah lai hilh le Gupkhiatna thu gen hong thuah hi. Tua nasepna hangin Khuasak khua Pu Thuam Hang le Pu Pau Suan le a zite uh Zogam panin Christian suak masa-in kiciamteh hi.

Tua hun sung mahin Thra Po Ku in Tedim gamah, Maung Gone in Falam gam Laizo khua ah Pasian thu gen kawm le lai hilh thuahin Topa' na hong sem uh hi. Tuate zomin Kayin Sia pawl khat hong tun behin Thra Po Aye in Lumbang khua ah, Maung Lun in Zokhua, Maung Kya in Thantlang le Thra Kyi Ghine in Haka khuate ah hong sem uh hi.

1902 kumin Zato Mang (Medical Missionary) Dr. East hong tungin a kisam mahmah ahi cidamna lam Zato Siavuan a sep khawmin Lungdamna thu tangko in Zogam mun khempeuh ah hong zin kawikawi hi. Dr. East in a cidam lohna hangin a sau veilo in America gamah va ciahkik pak aa, 1904 kum ciangin aneih thak a zi tawh hong tungkik in Hakha khua a thak a zi tawh hong tungkik in Hakha khua ah lupna 20 (20 -beded) Zato khat hong lam uh hi. Dr. East in Zogam sung a Christian suak masa Pu Thuam Hang le Pu Pau Suan a zite tek uh tawh tuiphumna pia hi.

1905 kumin Hakha sangnaupang Sia Khaw in Khazih a ding khensatna nei in Christian hong suak hi. Kumthak zing sangin Sangmang huang sung bual neu khat sungah tui kiphum hi. 1906 kum ciangin Zanniat mite lak panin Thang Tson le a kum kik ciangin Ngawn mite lak panin Tsong Khan te ki tuiphum uh hi. Tedim, Falam le Hakha gamte panin a zomzom in mi tampi hong ki tuiphum uh hi. Ahi zongin Zogam khanglam Matupi, Kanpetlet le Paletwa gamte ah bangmah kisem nai lohi.

Tua bangin Topa' nasepna lawhcing dingin hong kipat laitakin 1908 kum April kha ni 1 ni in Arthur Carson pen gil-peeng natna tawh thakhat thu-in hong sivat aa, Hakha khua ah kivui hi. Carson in a sep sungin mihing 100 val Topa' lamah hong kihei in tuiphumna nei uh hi. Arthur Carson a sih khit ciangin a zi Laura Carson in kum 12 sung a pasal nasep zom to in cidam lohna hangin 1920 kumin a gam zuankik hi.

1908 kum Christmas khitdeuhin Dr. Herbert Cope le a zi hong tung to uh a Carsonte nasep hong zom uh hi. Cope te hong tun madeuh in Dr. East' zi pen America gamah ciahin, kum khat khit ciangin a pasal Dr. East zong dam lohna huhau mahin ciah leuleu hi. 1901 kum ciangin Zato nasem dingin Dr. J.G.Woodin le a zi hong tung hi. Cope zong Hakha panin Tedim ah hong kituah hi. 

Tua bangin a om sung teng hong kikhen uh a, Cope te nupa Tedim ah, Woodin te nupa zato lam le Mrs. Carson in lai hilh lam tawh thuah in na hong sem uh a Topa' Lungdamna Thu Zogam bupah hong kizeel hi. Hih bangin Tuiphum Pawlpite' nasepna tawh pawlpi thak
tampi hong kibehlap in 1924 kum ciangin pawlpite amau le amau ding khop zo dingin hong pawl cing zawdeuh ta hi.

1915 kum in Christian mimal 150, tua khit kum 3 khit ciangin Hakha gam bekbek ah mi 600 val pawlpi 8 hong phato hi. Mrs. Carson in Lungdamna Thu Bu li le la dawng 26 kihel Biakna Labu ding Hakha Kam-in hong teikhia hi. Dr. Woodin in a cidam lohna hangin Biakna Zato kizomto zo lo suak hi.

Kayin Sang siate panpihna tawh Biakna Sang mun tuamtuam ah kiphuan in,
Siate in lai hilh kawmkawm in Pasian Lungdamna Thu tangko kawikawi uh hi. Dr.
Cope in Sanga zat ding laibu (Text Books) te hong bawl banah sang lam nasep tawh
hong thuahto ahih manin Britist Kumpi in Sangmang (Inspector of Schools) tavuan na
piakbeh hi.

Tua a kipanin Biakna thuhilh sia (Missionary) te tuni dongin "Sangmang" ci in kilo suak hi. Tua bang a min phatna tazeih "Kaisaer Hind Medal" pia in, a khual zinna sum bei teng zong sik uh hi. Tua banah a masa pen tadensa "Thu kizakna" zong na hawmkhia hi. 1922 kum ciangin kumpite tawh thu kimna kinei in Biakna Sang khempeuh Kumpi Sang kisuak sak hi. Biakna Sang a sem Kayin Sia teng zong Kumpi Sang sia suakin kumpite in khasumin guai uh hi.

1925 kumin Dr. Chester U. Strait te nupa Hakha khua hong tung uh a 1928 kumin Lai Siangtho Sang hong pankhia uh hi. Lai Siangtho Thak zong Hakha lai in hong teikhia uh hi. Dr. Cope in Hakha lamah khual a zin laitakin a cina-in June 11, 1938 ni in Topa' kiangah hong zuatsan hi. Amah in Zogam a dingin a hun kum 30 val hong zang khia hi. Dr. Cope a sih khit ciangin ama nasep zom dingin Franklin O. Nelson te nupa 1939 kumin hong tungto uh hi. Leitung Galpi Nihna hong tun manin 1942 kumin va ciahkik uh a 1944 kumin hong tungkik uh hi. 1951 kum ciangin America gamah a khuan ciahin a pai kal un Kawl gam kumpi in lutkik theihna visa pia lo ahih manin America gamah om suak uh hi.

1946 kumin Robert Johnson te innkuan Hakha khua ah nasep hong kipan uh hi. Nasep hong zom suak uh a, 1964 kum ciangin Kawl gam kumpi in gamdang biakna nasemte om sak thei nawnlo ahih manin amau zong America gamah ciahkik uh hi. 1949 kumin Zogam Pasian thu tun zawh kum 50 a phakna Golden Jubilee Hakha khua ah kibawlin mi 5,000 valin pawi siim uh hi.

Tua hun-in tuiphumsa mi 18,647 pha khin hi ci in kiciamteh hi. 1953 kumin Rev. S.T. Hau Go makaihna tawh Zogam Tuiphum khempeuh kipawlna Zomi Baptist Covention ki phuankhia in Rev. S.T. Hau Go in General Secretary tavuan la hi. Zogam Christian suak masa gel Pu Thuam Hang le Pu Pau Suante kum 50 a phakna Golden Jubilee Khuasak khua ah kibawl hi.

Zogam sung Lungdamna thu hilh ding hong kipat laitak un thuhilh sangmangte in thukimna khat nei in Kawl gam sung a mun a gamin hawm tek uh hi. Tuiphum (Baptists) te in Zogam Saklam ngah uh ahih manin Tuiphumte in Zogam Saklam mahah nasep hong kipan pah uh hi. Khang lam gamah Anglicante le Wesleyante, Lusei gamah Methodistte le Presbyteriante, cih bangin a gam a gam ah Gupkhiatna thu hong taangko uh hi.

Biakna Dangte Hong Lutna
Kawlgam sung Lungdamna thu tangkona ah a gam a gamin a hawm uh ciangin Zogam Saklam pen Tuiphumte' gam (mission field) hong suak hi. Tua bangin Tuiphumte in na hong sep uh ciangin lawhcing mahmah in 1963 kumin Tuiphum Pawlpi mi 25,000 bang om hi. Zogam Saklam le Khanglam gamteng ah Tuiphum Pawlpi longal Christian pawlpi dang om nailo hi.

1931 kumin Zomi kim khat Maymyo khua ah va hawhin Wesleyan Pawlpite kiangah Zogam sung Pasian thu tangkona na hong sep nading un vasam uh hi. Tuiphum (Baptist) te peuhmah in zu neek phallo ahih manin, Christian lah hi veve, zu lah ne thei ding cih ahi hi. Ahi zongin Wesleyan Pawlpite in Baptistte gam sung a nasep theihna ding Baptistte tawh a kikup uh ciangin, khat in a dang khat gamsung a sepsak ding 'tuute kiguk sak ding kilawm lo' cihna tawh hong sem nawnlo uh hi.

1939 kumin Kam Hau ukpipa Pum Za Mang in a gam sung sang le zato a pia zo dingin Baptistte nasepna hawmthawh ahih manin a masa in Anglicante zol hi. Anglicante ahih theih loh uh ciangin Tedim khua Vuandok a seem, Catholic Biakna zui Thomson tungtawn in Roman Catholic pawlpi samin RC te nasep hong kipan uh hi. RC te in zu neek phal uh ahih manin mi tampite Tapidaw lah hi veve, zu lah ne thei veve cihna tawh RC hong suak uh hi. RC pawlpi pen a bul pan in nasep hahkat uh a sang le zato zong mun tuamtuam ah pankhia zo takpi uh ahih manin lawhcing mahmah uh a, tu ni ciang dong mahin Baptistte zomin a tam pen hong suak uh hi.

Galpi Nihna khit ciangin Zogam ah Christian Pawlpi dang tuamtuam hong khangto hi. Methodist, Presbyterian, Evangelical Free Churchte banah Seventh Day Adventists, Jehovah's Witnesses te zong nasep hong kipan uh hi. 

Tedim Gam Tuiphum Pawlpi Sung Buaina 
Zogam sung Christian upna hong puak masa Sangmangte in Zo ngeina dawi biaknate panin Christian lam a kihei nading tawh hong zol uh a Vantung gam le Hell gam omdante hong genna uh panin mi tampite Christian suak uh hi.

Ahi zongin Christiante thu bulphuh upna laigil ahi Gupkhiatna Thu "Hehpihna hang bek tawh upna hangin gupna ngahna" (salvation by grace and through faith) hong nak gen kha nawn lo uh hi. Zu neek loh ding le Zo ngeina tampi paih khiatna hangin Christian suakte in u le nau, beh le phungte tawh hong kikaak tektekin Zomi Christiante aa dingin nakpi-in haksatna hong om hi. Mun khatkhat ah bawlsiatna bang thuak uh hi.

Ahi zongin Zomi Christiante in gupkhiatna ngahna kitel cianna (Assurance of salvation) nei kha lo in, Pasian deihna bangin ih hoih zawh a ih nuntak zawh leh vantung gam, ih hoih zawh kei leh Hell gam cih bangin kikalsuan hi. Christian suak masate in Pianthak lungnopna nei napi-in thu tel lohna hangin upna hang bek tawh gupna kingah, sepna hang ahih lohna kitel lo in Thukham nakpi-in kibulphuh hi.

Tuiphum Pawlpi sungah zu neek loh ding kibulphuh ahih manin Christian hi napi a zu ne kha a om leh amah le amah Lawki suakin kingaihsun liang hi. Christian a suaksa u le nau khat a khoh nop uh leh zong zu piak zawh ciamin zu a neek sak zawh leh a kho zo suak pahpah hi. Tua bangin Christian Biakna zui mi hong khang toto in a tate khang, khang nihna dong hong tun suk ciangin Tuiphum Pawlpi in a lian pen Pawlpi hong suak hi.

1960 kumin Tedim khua ah Christian Biakna a tun zawh kum 50 cinna Golden Jubilee kibawl hi. Tua hunin Tedim le Tonzang gam sung khua 179 ah inn 12,902 sung panin Tuiphum pawlpi mi 24, 771 om in 8,954 in tuiphum sa ahi hi. Tua hun in TBA (Tedim Baptist Association) gam sungah Huhpa Sia a sem ngei Sia Thang Za Kam pawlte kihawl khia ahih manin TBC kici Thang Za Kam Baptist Church ci in pawlpi thak khatin ding uhhi.

Tedim, Leilum, Ngennung, Anlang, Laitui khuate panin Thang Za Kam pawlpi thak hong piang hi. Sia Thang Za Kam pen pawlpi puah nopna lungsim tawh a zin kawikawina panin a omsa pawlpi sia pawl khat tawh kitel khialhna panin hong piangkhia hi in, upna lam panin naakpi kilamdan luatna cih om meel lo hi. Tua hun sung teng mahin Gamngai Tuiphum Pawlpi siapa Sia Kham Za Mang makaihna tawh Zo Baptist Church hong piangkhia-in tua pawlpite zong Zo Baptist Association min tawh Zomi Baptist Convention sungah kihel hi.

Tedim Singlamteh Mual
Photo Credit : Cinpu Zomi

Tedim Gam Kha Khanlawhna Hong Piang
A tunga kigensa bangin Tuiphum Pawlpi naakpi-in hong khantoh hangin upna dinmun (Doctrine) lam a thei leh kihilh cianna cih om meel lo in Pawlpi mi a mimalin hong khangto hi. Mun tampite ah, mi dang a tam zaw na suak khin ahih manin 'sih khat nat khat tuak leng hong vui ding omlo ding' cihna tawh pawlpi ah 'kipawl' uh hi. 1970 kum pawlin Tedim gam sungah Gupkhiatna Thu gencianna nakpi in hong om hi. "Hehpihna hangin gupna kingah; Sepna hang hi lo" cih thu a kigen ciangin Pawlpi mite bek hi lo, Pawlpi makai, Pawlpi Upa le Pawlpi Siate in naakpi-in zadahin langpan uh hi. Piangthak cih thu kammal hong kilawh mun ciangin mi tampite in tua kammal nangawn zadah uh hi.

Tedim Tuiphum Pawlpi sau veipi sung sia nei lo in a om na panin Insein Lai Siangtho Sang pan a zo Sia Hau Lian Kham le Sia Gin Khaw Thawngte Tedim Tuiphum Pawlpi ah sia dingin nasep hong kipan uh hi. Amau gel in pianthakna thu nakpi-in hong gen uh ciangin, pawlpi sungah a zadah tampi hong om hi. Leilum Tuiphum Pawlpi panin zong Sia Go Za Kham te pawl in pianthakna thu na gen uh a, sau veilo in Leilum panin piangthakte in kikhopna na tuam neih uh hi.

Tedim Tuiphum Pawlpi panin zong kilem zo nawn lo ahih manin 1975 March kha ni 9 ni-in Sia Hau Lian Kham le piangthak teng paikhia in Evangel Baptist Church kici pawlpi thak khat hong piang hi. Tedim gam sung mun tampi hong kilawh ahih manin Gamngai, Kapteel, Thalmual le adang khuate ah pawlpi thak hong piang hi.

April 15, 1975 in kikup masakna khat kinei aa, pawlpi thak teng kikhawm tuah-in kipawlna thak Evangelical Baptist Conference kiphuan khia a tu-in Kawl gam mun tuamtuam ah Pawlpi 150 val kipawl hi.

Piang Thak Pawlpi Sung Buaina
Pianthakna in Zogam Tedim gam bek hi lo in Kawl gam mun tuamtuam hong lawh hi. Tua hun laitakin Kawl gam buppi ah gupkhiatna thu gen Yangon aa AG Pawlpi le Brethren Pawlpi bang bek ahi uh hi. Siate sung panin zong upna laigil (fundamental) upna tawh Lai Siangtho Sang a zo om nai lo-in, Piangthakte sungah limsaang (Pentecostal) upna nakpi-in hong lut hi. Tua banah Yangon aa AG Pawlpi makai Sia Myo Chit in EBC Pawlpite hong nak zol mahmahin AG Pawlpi a suak nuam le a suak nuam lo khen nihin omin buaina hong kipan hi. Tua bang buaina kawmkal ah Pasian in nakpi in thupha pia-in EBC te EC kikhop nitak nih sung kinei a, sau veipi kikupna a om khit ciangin EBC Pawlpi in AG suahloh ding khensatna kinei hi. Mun tuamtuam aa EBC Pawlpite zong tua thu khensatna Sia Go Za Kham le Rev. Hau Lian Kham min tawh kizasak kawikawi hi. Hih thu a zak ciangin March kha sungin Sia Myo Chit le a pawlte hong paito in EBC Pawlpi khen nihin hong khenkham hi.

Siate sung panin Rev. Hau Lian Kham in AG lam pawl in a dang sia teng EBC ah kip uh hi. Tua bangin kum nih a pha pan piangthak pawlpi mite khitui naptui tawh khen nih in kikhen kham hi. A pial khia AG Pawlpi zong picing mahmah le thahat mahmahin Tedim gam sungah AG Pawlpi mi tampi kibehlap hi. Tua laitakin Pawlpi sungah Pentecostal upna bang tektek a zui nuam le a zui nuamlo buaina hong om leuleu aa, makaipa Sia Myo Chit khat vei hong paito leuleu hi. Tua lai panin laamna a deih pawlte pawl khat AG Pawlpi pua ah kikoihkhia hi.

Khanlawhna Gah
Tedim gam Khanlawhna hong tun manin Pasian thu lamah naakpi tak lawpna le khantohna hong om hi. A paikhia piangthakte bek hi lo a om lai Pawlpite zong kisatsuah thakna nei in Kawl gam mun tuamtuam ah Gupkhiatna thu kizeel kawikawi hi. Khangno tampite zong Lai Siangtho thumaan bang a kihilhna gam tuam tuam ah va sinin Lai Siangtho Sang le nasepna (ministry) tuamtuam hong nei uhhi. Zomite Topa in hong lamto-in Kawl gam khuapi Yangon khua ah laizang dongin Zomite makaihna tawh pawlpi tampi kiphutin, Pasian hong Gupkhiatna thu kitangko ziahziah hi.

Topa in Ama min than nadingin Ama mi Ei Zomi te hong zang ta hen. Amen.

By - Sia Lang Khan Mang.

(Hih thu ZOGAM CHRISTIAN TANGTHU pen EBC Gambup kumcin Khawmpi 30 cinna
Paerl Junbilee Magazine (1975-2005) sung pan a ki la khia a hihi. UPNA LAIGIL VOL. 13. NO 6. Editor.)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOGAM CHRISTIAN TANGTHU. Description: Rating: 5 Reviewed By: Cinpu Zomi
Scroll to Top