728x90 AdSpace

Hot
Menu
Zon-ol na Donate

Latest News

A THEIH HUAI ZOMI TE TANG THU

Zogam (Chin Hills) pen a leitang tai patle 13,902 hi a, mihing pen 1974 kumin 354,000 pha dingin ki-ummawh hi. A gam buppi pen township 9 kisuah a, Tiddim, Tonzang, Falam, Thlantlang, Haka, Matupi, Paletwa, Mindat leh Kanpetlet kici a, Township Officer khat ta in uk hi.

Thangmual (Fortwhite), Inbuk, Bawipa, Lunmual, Awtaraw leh Khonu kicite mual minthangte hi a, lui min nei deuh pen, Gun, Ciau, Bawinu, Lemro, Mata leh Mong kicite hi. Lih pen bual lian pen hi.

Ki-ukna:
Tang laiin Zogam pen kuama khut nuaiah om loin Zomite amau leh amau ki-uk hi. 1896 kumin Mikang kumpi in ana tawh la-in, India leh Kawlgam pen gam khatin uk khawm uh hi. 1948 kum a Kawlgam in suahtakna a ngah ciangin Zogam pen Chin Special Division kici-in a uk Zumpi pen Chin Affairs Council kici hi. 1974 kumin Zomite in State ngah uh a, Zogam pen Chin State kici a, Zo Zumpi pen Chin States People’s Council kici Zo Zumpi pen amasa in Rangoon ah om hi. Tua panin Kawlpi (Kalemyo) ah kisuan a, tua pan tawl khat khit ciangin Haka khua ah kikhin kik a, tu takin tua lai munah om hi.

Biakna:

  1. Khanglui Biakna: Ni dang laiin Zomite in dawi leh kau, sing leh suang bia uh hi. Mual leh guamte kihta in vokno akno tawh kithoi uh hi. Dawi nam tampi inn dawi, gam dawi a bia uh hi. Hih bang biakna pen Mikang pau-in Animism kici a, leitung mi khempeuh phial in tanglai in tua bang upna leh biakna a nei uh hi. Kawlte in zong Buddha biakna a zuih ma un hih bang khanglui biakna mah zui hi dingin ki-ummawh hi.
  2. Pau Cin Hau Biakna: 1900 pawl ciangin gan tawh kithoih dawi biakna phiatin Pasian khat om hi ci-in upna biakna thak khat Pau Cin Hau in phuan hi. Tua biakna thak pen kibawl phain tu-a Zogam sung bekah hi loin Manipur leh Aizawl gam Zomite tenna dong in kizel man hi. Pau Cin Hau pen Tedim khua Khan Lian leh Cing Zam’ tapa hi a, 1859 kumin suak a, 1948 Dec. 28 ni-in Mualbem khua-ah si hi. Zolai zong phuan ahih manin “Laipian Biakna” zong kici thei hi.
Khristian Biakna:
(a) American Baptist Pawlpi : Zogam Lai Siangtho thu hong puak masa pen American Baptist Pawlpi hi. March 15, 1849 kumin Rev. A. `Carson-te nupa Zogam tung hi. March 21, 1902 ciangin zato siam Dr. H. East-te nupa Zogam hong tung uh hi. Missionary masa pen Rev. A. Carson April 1, 1908 kum a sih ciangin Dec. 21, 1908 ciangin Dr. J.H. Cope te nupa hong tung hi. Dr. East pen a gam tawh kituak lo-a dam thei lo ahih manin sawt om loin America ciah kik pah a, a laih dingin zato Dr. J.G. Woodin te nupa Nov. 11, 1910 ciangin hong tung uh hi. Dr. Woodin te 1915 kumin Bhamo-an kisuan uh ahih manin Zogam nasem dingin Dr. C.V. Strait te nupa Oct. 2, 1925 ni-in hong tung uh hi. June 11, 1938 ni-in Dr. Cope a sih ciangin Dr. F.O. Nelson-te 1940 kumin hong tung uh hi. A nunung penin Rev. R.G. Johnson-te nupa February 2, 1946 ni-in hong pai uh a, 1966 kumin ciah kik uh hi. Amau nupa pen American Baptist Missionary Zogam pan a ciah nunung pen ahi uh hi. Hi bangin Zogam ah Khristian Pawlpi hong kipan a, 1940 kumin R.C.M. Pawlpi, 1948 ciangin S.D.A. Pawlpi hong tung uh a, tu ciangin Khristian Pawlpi tuamtuam tampi Zogam ah piang hi.

(b) Khristian Khantohna: Zogam ah tui kiphum masa pen Thuam Hang leh Pau Suan hi a, April 4, 1904 ni-in Rev. Carson in tuiphum hi. Missionary-te leh Zomi Khristian masate in haksatna tampi tawh na hong sep ciangun hi bang tuiphum mihing khan’tohna kimu hi:
1915 – 150
1930 – 1,591
1940 – 5,514
1950 – 19,655
1960 – 37,705
1970 – kithei lo
1980 – 69,191

Hih pen Zomi Baptist Convention (ZBC) ciaptehna bangin tuiphum sa teng bek hi a, Pawl huam milip hi lo hi. Tua ciangin ZBC pen Zogam sung bek hi lo Kale Valley, Tamu Valley leh Upper Chindwin sung Zomi Baptist kipawlna ahih manin Zogam sung Baptist Pawlpi ahi lo Khristian Pawlpi dangte tawh kigawm lai leh Zogam bup Khristian pha zah pen kithei pan ding hi.

(c) ZBC Tangthu Tawm: Zogam Khristiante pen tawm lai ahih manin 1905 a kipanin pawlpi khat bangin vai pai lai uh hi. 1948 ciangin Tiddim, Falam leh Haka ci-in Association 3 kisuah uh hi. 1953 ciangin hih Association thum tengin Zomi Baptist Convention ci-in kipawl khopna phuan uh hi. Tu ciangin ZBC pen Association tuamtuam 14 kipawlna hi a, Zogam sung Baptist bek hi loin a kiima Zomi Baptist te zong kipawl uh a, Tiddim, Falam, Haka, Kale Valley, Tamu Valley, Kalemyo, Thantlang, Matu, Tonzang, Kuki, Siyin, Zo, Thado leh Zotung ci-in Pasian nasep khopna hi. Tu-in ZBC pen Burma Baptist Convention sungah Karen zomin Convention thahat pen a nihna ahi hi. ZBC General Secretary masa pen Sia Hau Go hi a, tu laitak a sem pen sia Hrang Tin Khum hi. ZBC in Kawlgam bup BBC sungah pan mun a tuamtuam len ngei a, tu laitak BBC President zong Zomi Sia Tial Dum ahi hi.

Lai Thu
I gen sa bangin Tedim gam panin Pau Cin Hau in lai bawlin Zomite pen lai nei minam khat suak hi. Tua lai pen a tungin laimal 1053 bang hi. Tua pen kipuah phain laimal 37 kisuak sak hi. Hih laimal tawh biakna thu, tangthu leh late kikhumin Tedim gam bek hi loin Manipur gam dong kizang ngei hi. Hih Zolai tawh 1931 kumin British and Foreign Bible Society kici Lai Siangtho Khen Pawlpi in zong Mualtung Thuhilhna teng bu 500 khen ngei uh hi. (Tua Laibu pen India Bible Society in London Bible Society tung panin ngah ding a hanciam laitak hi). Kumpi lam panin Census of India, 1931 Volume XI; Part 1 laimai 194-5 sungah “Pau Cin Hau Script” ci-in kikhum hi. 1917 kuma Zomi French gam paite in hih Zolai zangin inn lamte tawh lai kikhak thei uh hi. Tu-a a kizang Mikang laimal bang loin Zopau pen hih Zolai tawh a awsuah a man lianlianin kigelh thei hi, kici hi. Tangthu a kigen savun tunga kigelh lai, uipi in a nek mang bang hi nawn lo ahih ciangin hih lai pen Zogam in a ngaihsut phat mahmah dingin kilawm hi.

Mikang laimal tawh 1915 Dr. Cope in Mattiu bu Tedim pau-a a khet pen Zogama laibu kibawl masa pen hi. 1932 kumin Thuciam Thak bu kikhen a, 1977 ciangin Lai Siangtho buppi kikhen hi. 1932 kuma kikhen Thuciam Thak bu pen Zogam ah muh ding om nawn lo hi. Burma Bible Society ah bu khat kikhen hi ci-in Sia Kam Khaw Thang in gen a, London University library ah bu khat mah om hi ci-in “Tiddim Chin” kici laibu bawl Prof. Henderson in gen hi.

Haka pau tawh 1920 kumin Lungdamna Thute leh Sawltakte Tangthu a kikhet cil kum hi a, 1940 in Thuciam Thak bu kikhen a, 1933 kumin Lai Siangtho bupi kikhen a, Falam tawh 1933 kumin Lungdamna Thu bute, 1937 kumin Thuciam Thak kikhen a, Lai Siangtho buppi pen a kibawl laitak hi. Zotung leh Ngawn pau tawh zong Lai Siangtho bu nono kibawl hi.

Sang laibu tawh kisai-in Dr. Cope in Tedim, Falam leh Haka pau tawh Class IV dong 1925 in na bawl khin hi. Dr. Cope in missionary ahih hangin Kumpi ah Sang Mang (Inspector-of-Schools – Chin Hills), na sem ahih manin Sang Mang a sem lo missionary te nangawn tu dongin “Sang Mang” kicihlawh hi.

Ni dang lai-in Zogam ah kikawmna haksa-a, khua muhna lah toi ahih ciangin gam khat leh nam khat ahih hangun kampau tuamtuam na piang hi. Tu hun leuleu ciangin kikawmna kiphakna tam, pilna siamna zong khang ahih manin khat leh khat pau leh ham kitheihna zong khang hi.

Minam Min
Tu-a hih lai gelhna sung ah kizang mah bangin Zomi leh Zogam cih pen a tunga kipanin a kizang tawntung hi a, Mikangte leh a pualam mi nam dangte in Chin leh Chin Hills ci-in ciamteh uh hi. Tedim gam pana lal Aizawl gam leh Manipur gam a tung mi pawl khatte i kilawh i kisapna khat Paite kici Zogam gen loh Tedim gamsung mahmah a zong a kizat loh pen mi tam pi-in lamdang sa in a hang kithei nuam ciat kha ding hi. Tua tawh kisai-in Census of India 1931, Vol. XI, Part 1, laimai 184 sungah: gamsung minam ciaptehna sungah Paite cih pen kiphiat hi. Bang hang hiam cih leh Zogam Mangpi (Deputy Commissioner of Chin Hills) in a genna ah Paite cih min pen Falam gam mite in Zogam sak lam (Northern Chin Hills) a teeng Zomite pen Thahdo hitaleh Zote hitaleh, Sukte hitaleh mi namte a cihna uh kampau hi a, amau minam min, amau kilawhna min hi lo hi ci hi.

Thukhupna
Zogam tangthu, Pawlpi tangthu leh minam tangthu cih bang a kicinga gelhna laibu omlo a, a om sunte zong Mikangte gelh ahih manin ei theih nop leh deih lam thu tuang kim lo hi. Missionary te hong paina thu a kigelhna laibu thum ka et leh a ni a kha a tuam ciatin kikhum a, Rev. Nelson hong tun ni leh kha a kikhumna om lo hi. Zogam sazian (statistics) a kikan hangin kingah zo lo hi. Zogam lai sim thei en thei (Literacy percentage) ahi zongin, Kawlgam bupa Zomi pha zah ahi zongin a thei om lo hi. I gam i lei sazian thei kei leeng a khang a kiam i hih bangci kitheih ding hiam? Tua ahih manin 1981 gambup kisimna (census) pen lim taka theih sawm ding ahi hi. Mai lam hunah thu a kicing zaw a kan, a gelh hong om pah ding lamen hang. Bang hang hiam cih leh Pasian in a bawl sa na khat peupeuh kep loh don loin a mawkna in nusia ngei lo hi. Leitung leh a bawl sa na khempeuh a uk ding, a keem dingin mihing bawl hi. A bawl sa Eden huan a keem ding a hah ding, a puah dingin mipa koih hi. Tua ahih ciangin minamte Topa ahi Pasian in a bawlsa, a piansak Zomite leh Zogam zong Ama deihna tawh kituakin, Ama vangliatna dingin a keem ding, a cing ding, a zun ding mipa koih peuhmah ding hi. Tua mipa pen nang leh kei hi hang.

By - Rev Khup Za Go

Zogam Lui a om hiam? Zogam Thak a om hiam? Zogam a om hiam? Tu laitak i tenna pen Zogam hi kici hia le? I ci hia le? Mi hong cih sak hia le? Kumpi te hong ciaptehsak hizaw hia le? Zogam Thak om theilo takpi ding maw le? I pianna, khanna, i bulpi bek mah Zogam kici thei ding ahih leh tulaitaka i tenna pen Zogam kici thei takpi ding maw?

Khangthu kante in tu laitaka Zomi kici te pen Sen gam pan hong pai hi ci uh a, tua a takpi ahih leh tuni a Zomi kicite pianna gam, tenna gam masa pen Zogam icih kul ding hilo hiam? Tuni a itenna pen Zogam kici thei ding maw? Ei sanga masazaw Zomi pupate pianna gam pen Zogam hizaw lo ding maw? Ei, a tu a tate uh pianna gam pen Zogam kici theilo ding maw? Khangthakte zuat gam thakte Zogam Thak kici theilo ding ahih leh pupate’n Sen gam pan hong zuat uh gamthak Ciimnuai leh Khamtung leh Indo-Burma kiim teng Zogam kici thei tuanlo ding hi. Tua sang itenna masa zaw gam om a, tua pen Zogam icih kul dinga, zanni maha itenna teng Zogam cih theih loh kha ding hi.

Sen gam pan pupate leitaw lam zuana Kabaw Valley, Chindwin leh a khanglam khawng hong paisuk suk lai un Kawlgam, India, Europe khengin tu leh tate America pek tung in paisuak ding cih ngaihsun kha khollo maithei uh hi, theisam kei hang. I paikhiatna mun ah hun hoih hong tung kik leh kilehkik ding cih zong na ngaihsun kha maithei uh hi. A pemsuak, a taamsuak dingin hong paikhia lo maithei uh hi. A thei om tuan khang. Ahi zongin pupate in i pusuahna Sen gam ah hong kik pih nawnlo uh hi. Pupa kipatna hi ciin ei zong a kiiksawm kuamah om tuanlo hi hang. A kik zong kithei tuanlo hi. America, Europe, Australia cih bang a tungte khang nih khang thum hong om le uh a tu atate uh ‘pupate kipatna khamtungah kikta ni’ ci a hong kilehkik vangvang ding ka um khol kei hi (upna neu mi ka hih leh hong maisak unla).

Tu laitak i tenna ah i pai ding laiin; i khua i tui, nu leh pa u leh nau, meltheihte i nusiat laitakin omsuak ding, tengsuak ding, taam suak ding ciin ngaihsun kha khollo maithei tak hi hang. Ahi zongin taamsuak lo ding, ciahkik teitei ding cih zong kiciamna om hituanlo hi. Taam suak hilecin na ten lohna khua pen ‘ka khua hi’ na ci thei kei ding a, na tenlohna gam pen ‘ka gam hi’ na ci thei kei ding hi. Na neihsa inn leh lo na nusiat khit, na pemsan khit ciangin ‘nanga’ hi nawnlo a, a luahpa a hita hi. Na ciahkik a na va luahkik mateng a luahpa a hi. Chindwin leh Kabaw Valley pupate tenna luite Zogam hi, Zomi te a hi cihnop leh iva tenkik, iva luahkik kul dinga, tu laitak i omna pan ‘ko a hi ei’ iva cici thei nawn khol kei ding hi.

Tua ahih manin nusiat khit khamtung gam pen a nusiate adingin ka gam hi, ka khua hi cih theih nawnloh kha ding hi. Nusiat khit Sen gam pen Zogam hi va kicici thei nawn mello hi. Zomi pianna bul sut ciangin abulpi hi mahleh ei-a, kei-a, Zomi a, Zogam kici thei mello hi. Ka khualui hi, ka pianna gam hi, ka nu ka pa pianna hi, ka pu ka pa pianna hi, etc cih bangin kigen thei bek ding hi.

New England, New York, New Jerusalem (LS sungah) cih bang zong na omsam ahih teh, Zogam Thak (New Zoland) zong om thei samlo ding hiam ka ci a!

Hau Za Cin
Phuitong Liim


ZOMI NAMTE GAM
A mun: India mal-sak leh Burma mal-khang kici, sim leh mal zuiin Himalaya mualdung pan kipanin sim lamah Bay of Bengal tuipi pha dek in, sak leh khang zuiin Kawlzang leh India zanggam kikal sung, mualtung gam teng pen Tibeto-Burman kici khamtung minam tuamtuam in luah uh hi. Tibeto-Burman hiang khat ‘Zo minam’ ten pen Imphal zanggam pana sim lam Chittagong mualtung gam kiang dong luah in, tua pen Zogam ahi hi.

Zo minamte pen hih lai munah a saklam Kawlzang panin kum zalom 12-na khawng panin tung in, minam khata a kipian cila kipanin Pasian in Zotate adinga a kamciam hih gam pen a luahpih leh a neihpih namdang kuamah om loin Zotate in Zo ukgam a phuhna hi a, Zogam hong piangkhia ahi hi. A gamvengte tawh lim taka gamgi khung om ngei loin, mal lamah Manipur leh Cachar gam, sim lamah Arakan leh Chittagong mualtung gam, khang lamah Tripura gam leh sak lamah Kawl-zanggam cih ten umcih hi.

Zogam pen namdang kuamah tawh kiciau loin Zo minam tuamtuamte gam ahi hi. British ten 1890 kum pana a awp-a kipanin Ciau lui tawh khenin sak lam teng pen Chin hills vawh a, khang lam teng pen Lushai hills vawh in, mal lam teng pen Churachandpur District vawh hi. Ahi zongin hih thum ten Zogam teng huam kim zolo hi. Chin hills-ah Zomi leh Lai (Pawi) namte lian pen in, Lushai hills-ah Luseite lian pen hi. Tu-in Lushai hills-ah mihing 900,000 pawl om in, Chin hills-ah mihing 500,000 khawng leh Lamka (Churachandpur) District-ah mihing 200,000 kiim om hi. Zogam sunga khawpite pen Kawlgamah – Tedim, Tonzang, Thuklai, Kawlpi, Gunkhawm, Khampat, Tamu, Homalin, Halkha, Falam, Thantlang, Matupi, Kanpelet, Paletwa leh Mindat khuate hi. Mizoramah – Aizawl, Lunglei, Saiha, Lawngtlai, Chawngte, Champhai, Kolasib, Serchhip leh Mamit khuate hi. Lamka District-ah – Lamka, Thanlon, Singngat, Parbung (Tipaimukh) leh Henglep khuate ahi hi.

A zaina: Zogam pen sim leh mal teha a dung lam pen Equator mal lamah latitude 21.56 degree leh 24.30 degree kikala om hi a, tai (mile) 250 khawnga sau-in kituat hi. Sak leh khang teha a vai pen longitude 92.16 degree leh 94.20 degree kikal hi-in, tai (mile) 220 khawnga zai-in kituat hi. Mual leh guam tawh kidim, a kantan lampi kician om lo ahih manin mile in ahi zongin, kilometre in ahi zongin a zaina teh ding haksa mahmah hi. Lushai hills pen 21,087 sq kms in zai in, Chin hills pen 14,000 sq miles in zai in, Lamka District pen 4,570 sq. km. in zai ahi hi. Hih thum in a huam khak loh Zogam zaipi om lai hi. Zo minamte luah gam teng khempeuh zaina pen sq. km. 1,24,500 pawl hi ding hi.

A leitang: Dr. Vum Son, Geologist muhna panin, Zogam leitang pen moi mahmah lai hi. A suangte pen Mikang pau-a ‘sandstone leh slate’ nam pian vive hi in, guahtui leh hawktui in a nawt`mai theih namte hi. Leitangte zong kip lo a, guahtui lut thei in, men cim baih mahmah hi. Leitang uham dan tehna-ah Lushai hills leitang pen Corezoic Era hun kici tu-ma kum then (million) 10-15 lai khawnga piang danin kituat hi. Lushai hills sangin Chin hills leitang pen taak zawin ham zaw pek hi, kici hi. Zogam leitang leh Switzerland- a Alps mual leitang ‘flysch’ tawh kisun mahmah ahih manin pawlkhat in Zogam leitang pen ‘Zo flysch’ ci uh hi. Zogam leitang sungah ninerals tampi tak a om ding ki-um hi. Kawlzang tawh kidepna Gullu Mual-ah Chromate leh Nickel tampi omin kimu hi. Linestone leh suangphek (slate) zong tampi mah om hi, kici hi.

A lim amel: Zogam pen a vekpi phialin mual leh guam vive tawh kidimin singkung lopa namcin in bawmin hing dildial hi. Mualsang dawnte mei in bawm dimdem zel ahih manin lunglenhuai mahmah hi. Mualsang dawnte pan ciktui phul in, mualdung leh mualdung kikalah luino luipi in luang sialsial hi. Zogamah mun zang tam loin mual leh mual kikala mun zang tawmtawm omte buh ciinna in kizang in, Zogam bupah Champhai zanglei zai pen hi. Mual leh guam kawmkalah tuili no cikcik om kawikawi in, a gol pen Ciau lui tunga ‘Lih’ leh Chhimtuipui- a ‘Palak’ li ahi hi. Mizo tual biakna-ah misi khua lampi in Lihli tawn hi, ci-in ki-um hi. Zogam bup sunga mun nuam pen Tedim uksunga om ‘Len Nupa’ hi in, Mizo ten ‘Buannel’ ci hi.

Khua hun: Zogam pen leitung bupa khawhun hoihna pen pawl ahi hi. Equator leh Tropic of Cancer totna sana om hi in, Mikang pau a ‘Sub-Tropical’ gam a cihte ahih hangin ‘Tropical Gam’ kici ziau zaw hi. Nitang leh guahtui hoih muh in, a singkung a lopate tawh kilem mahmah hi. Khua lum lua loin vot zong vot lua lo ahih manin sing leh khai ciin theih loh om lo hi. Phalbi hun sung pen November kha leh February kha kikal hi in, khawkhal hun sung pen March kha leh May kha kikal hi hi. Tuk sung sawt penin June kha panin October kha dong awh hi. A pongpi in Zogam khawhun pen Phalbi laiin 1 degree C leh 15 degree C kikal pawl hi in, khal laiin 20 degree C leh 30 degree C kikal pawl ahi hi. Guahtui hoih mahmah in, a pongpi in kum khat sungin guahtui kia zah inche 200 khawng pha hi.

Mualte: Zogam sungah mualsang tampi tak om a, a minthang diak nih pen khang tangthu panin Thangmual leh Lentang ahi hi. Zogam bupa mual sang teng pen Chin hills-ah om in, a sanna pen Khawnu Vum/Mt. Victoria (Feet 10,400) leh a nihna Tedim uksunga om Thuam Vum/Kenedy Peak (feet 9,000) ahi hi. Lushai hills-a mual sannna pen Chhimtuipui District-a om Phawngpui Vum (feet 7,100/ 2157 m.) leh a nihna Sialkaltanga om Lengteng Vum (feet 7,050) ahi hi. Lamka District-a mual sang pen Thangching Vum (1999m) ahi hi. Tua lo, mualsang minthang dangte in Chin hills-ah -Thangmual, Innbuk mual, Lunmual, Bawipa mual, Awtaraw mual, Lentang, Takmual, Suangvum mual leh Khumvum mual ahi hi. Lushai hills-ah – Surtlang, Lurhtlang, Zopui Tlang, Sialkaltang, Sakawrhmuituaitlang , Reiek Tlang leh Dahpa mual ahi hi. Lamka District-ah – Lentang, Hiangkot Tang, Lungthul Tang, Kaihlam Tang leh Vangai Tangte ahi hi.

Luite: Zogam mualkuam teng lui tawh kidim in, Gun lui minthang pen hi. Meitei Gun a ci zong om hi. Gun lui pen Manipur gam pan kipanin Tedim uksung tengah sim lam manawhin luang in, Pawite gam panin sak lam nanawhin Mitta luipi tawh kimat in, tua panin Tuikang gun (Chindwin) sungah lut hi. Lui minthangte pen Chin hills ah – Gun, Kaladan, Bawinu, Ciau, Sialtang, Mitta leh Lemro-te ahi hi. Lushai hills ah – Tlawng, Chhimtuipui (Koladyne), Khawthlangtuipui, Tuirial, Tuipui, Tuivai, Tuirini, Serlui, Tuichang, Mat luite minthang mahmah hi. Lamka District sungah Tuivai, Tuivel, Tuitha, Tuilak, Tuisa, Tuili, Tuizang, Tuikui, Tuilian, Ngazam lui, Tuipi, Lanva luite luang hi.

Sing leh sa: Zogam khawhun pen hoih mahmah ahih manin singkung lopa leh nuntaakna a nei ganhing nam tuamtuam tawh kidim hi. Zogam ah taaksing, neisok kung leh gua tuamtuam tam mahmah hi. Tua lo Dol, Hiang, Tei, Mawng, Vau leh Vong singkungte zong pha mahmah hi. Paak nam tuamtuam – Neisok, Palpi, Heisa, Zozam, Tuntai, Phuitong, Lingpaak tuamtuamte a hunhunin paakin Zogam etlawmsak mahmah hi. Sahang tuamtuam, Vom, Gamsial, Ngal, Sazuk leh Zawng nam tuamtuamte teenna gam hi a, vasa nam tuamtuam – Vaphual, Tawlawk, Mu, Gamak, Vagik, Va-ak, Vaki, Simbu, Baibek, Phengphelepte tam mahmahna ahi hi.

Hih bangin Pasian in Zogamah Zomite nuntaak nadinga kisap teng a kicingin koih ahih manin Zo minamte pen minam hampha mahmah ahi hi. Tua ahih manin hih gam pen itna leh zahtaakna tawh a kep ding Zo minamte mawhpuakna ahi hi.

ZOMI NAMTE

Zomite in ‘Zosuante’ i cih, Mizo ten ‘Zo hnahthlak’ a cih teng pen British kumpi in hong awp-ma in amau hong ciaptehna-ah ‘wild hill tribes’ ci-in, i gam pen ‘un-administered area’, ci uh hi. Zosuan laka nitumna lam a tung masate pen Bengali leh Assamese ten ‘Kuki’ ci-in na ciamteh uh a, hih pen Mikang lai tawh a kiciaptehna 1792 kum hi ding hi. British kumpi in 1872 kuma Mizoram lak a kipat ciangin, tua lai taka Lusei kampau tam pen a hihna tawh a gam pen ‘Lushai Hills’ vawh pah hi. Kawlgam lamah ahih leh ‘Chin’ ci-in hong ciamteh hi. Ahi zongin ‘Chin’ cih kammal pen bang cihna, koi pan hong kipan, bang huna hong piang cih pen kankhiatna taktak om nai lo hi. Lam khat panin Zo minamte Chin hong kicihna pen Kawlte hong lawhna a kikawm maw? ahih kei leh Mikang galkap ten Chin hills-a Hausa a tuak masak pen uh Pu Khaw Cin min tapsaka ‘Khaw Cin hills/ Cin hills’ a ci zong hi zaw kha thei hi. Bang teng hi ta leh, Chin pen tu huna Myanmar a kici gam lama om teng hong kitangsak zaw deuh in, India gam lama om teng pen Lushai ahih kei leh Kuki, cih kitangsak zaw deuh hi. Mikangte in Zo minam teng pen mi khat sa khata hong muhna tawh lom khata hong lawhnop uh ciangin ‘Chin-Kuki’ cih bang, ‘Chin-Lushai’ cih bang, ‘Chin-Lushai- Kuki’ cih bang zang uh hi. Tua ahih manin British kumpi in Zo minamte tenna teng uk nadinga 1896 kuma a bawl thukhun zong ‘Chin Hills Regulation Act’ vawh ziau hi. Hih thukhun pen Chin hills baanah Lushaite, Kukite leh Nagate teenna teng huamsak in kizang hi.

Mikangte in Chin, Kuki, Lushai ci-a hong ciapteh uh hangin amau mah in, “Amau pen Chin hiam, Kuki hiam kici het lo mah uh hi ven,” hong ci kik veve uh hi. J.G Scott in a laibu, ‘Burma’ cihah, “The names Kuki and Chin are not national, and like others, the people do not accept the name given to them by the Burmese and ourselves; they do not call themselves Chins and they equally flout the name of Kuki which their Assamese and Bengali neighbours use. They call themselves Zhou or Shu, and in other parts Yo (Zo) or Lai” ci-in, Dr. G.A. Grierson leh midangte muhna mah tawh kituakin na gelh hi. Bertram S. Carey leh H.N. Tuck ten zong Zote, Thadote leh Guite thu a gelhkhopna-ah “These Zos, Thados and Guites are called by the Manipuri’s Kuki or Khongjais, who only made their acquaintance after they had migrated north, but the people call themselves by the name of Zo (Yo)” ci-in na ciamteh uh hi. Guite Innpipa Pu Go Khaw Thang zong, “Go Khaw Thang, who, as already related, was seized by the Manipuris in the course of the Lushai expedition of 1871-72, was the Zo Chief of Mualpi,” ci-in Zo hausa mah na ci uh hi. Mikangte in Chin, Kuki in hong ciapteh uh hangin amau mahin ei le ei pen Chin peuh, Kuki peuh i kicih loh lam hong tel mahmah uh hi. Mikangte in Chin-Lushai- Kuki hong cih hang, amau mahin ei-le-ei pen ‘Zo’ kici uh hong cih mah bangin, tu panin hih sungah ‘Zo minam’ ci-in kizang ta ding hi.

Zo minamte pen minam thu kante in Mongolian mite suan… Tibeto-Burman laka mi…” hiin gen uh a, hih pen kipom kim thei tek hi leh kilawm hi. ‘Mongol’ pen minam min hi in, ‘Mongolian’ pen zepna kammal (adjective) hi a, ‘Mongolia’ cih pen a gam min genna in kizang hi. ‘Mongoloid’ cih leuleu pen ‘Mongol’ minam suan leh khak teng genna in kizang hi. Tua hi a, Zo minamte pen mel leh sa tawh kizuiin Leitung minam lompi thum om laka Mongoloid minam hiang khat hi in, kampau tawh kizuia Mongoloid minam lompi thum laka Tibeto-Burman hiang khat i hi hi.


Zo minamte pen i bul i phung taktak (ethnic origin) a kikankhia nai lo ahih hangin ei pen Tibet gam tawnin Sengam pan Kawlzangah tungin, tua panin tu-a i omna tengah a kizeel hi hang, cih pen i pom thei tek hi. Pu Vum Son’ muhna-ah i minam min ‘Zo’ cih pen ‘Zo’ kici mi khat’ suante i hih man hi, ci hi. Tua i pu i pate gam pen Sengam ah ei tawh i kibatpih Tibet mite, Kawl, Naga, Meitei, Bodo, Kachin, Lahute tawh teengkhawm hi. Sengam panin Jesuh suahma pekin sim lamah kitaikhia in, Jesuh suah khit kum za khawng ciangin Chindwin gam kuam tengah kiteeng ta hi, ci hi.

Kawlzang panin Zo minamte pen AD 1000 kum pawl panin nitumna lam khamtung gamah tai kipan ta dingin kituat hi. Khamtung gama a tai, pawlkhatte in Ciimnuai khua sat uh a, tuate pen tulai taka ‘Zomi’ a kici Tedim gam, Tonzang gam, Manipur gam leh Mizoram donga teeng, Ciimnuai-a piang a kici teng hi. Ciimnuai khua mun pen tulai taka Saizang khua khang ahi hi. Pawl khatte in Sunthla khua kiangah Lailun khua sat uh a, tuate pen tulai taka ‘Lai’ a kici- Falam, Haka leh Thantlang mite hi-in, Lailuna piang zong kici uh hi. Pawl khatte in Sumpui munah Bochung khua sat uh a, tuate pen Lusei suan minam tuamtuamte hi-in, tua panin tulai taka Mizoram kici-ah kizeel uh hi.

A tai lote Zo minam pawlkhatte Yaw gamah thaam suak uh a, Kawlte tawh kiciau uh ahih manin Kawl bang buang, Zo bang buang kha suak uh hi. Kawlte in ‘Zo’ pen ‘Yaw’ ci-in gelh uh ahih manin ‘Yaw mi’ a suak uh hi. Zo minamte khamtung lamah a lomin a tai-ma in khamtung gamah Khumi/Khamite na tung zo uh hih tuak hi. Asho-te pen khamtung kah loin Kawlzang leh Arakan zang lam zuan uh hi. Cho-te pen bangci lal uh hiam cih kithei lo hi.

Hih bangin Zo minamte pen namdangte in a tuamtuama hong ciaptehna uh hang ahi zongin, i lalna lampi zawi kibat lohna hangin ahi zongin, tu-in lom tuamtuamin kikhenin nam tampi i kisuah hi. Hih banga lom tuamtuama i omna pen nidanga minam khat hi napi damdama a kikhenkhen maw, ahih kei leh nidanga minam tuam tek kihi napi damdama a kigawmgawm maw? cih pen ngaihsuthuaipi khat suak hi.

by J Thang Lian Pau



Zomi te pen tuma kumtampilai pek pa’n in Kawlngam saklam mualtung leh Zongam sung a teeng te i hihi. Mualtung keendang teng ah teengkawikawi-in kikawm kihawhna hamsa a hihmah in ipau pawlkhat tawmtawm in hong ki lamdang hi.

Tedim, Tonzang a om Zomi te’n, “Zo” “Yo” “Yao”  cih kammal te tawh tenna mun zui-in Zomi ci-in khat leh khat kisam uh hi. Falam, Hakha leh Thantlang a om Zomi te’n “Lai” “Laizo” ci-in Laimi kici uh hi.  Mindat leh Kanpalet te’n “Choo” “Chou” “Chaw” ki-ci uh a,  Paletwa te pen “Khu” “Khumi” leh Khami cihbang in a kinai mahmah kammal te na zangtek uh hi. India ngamlam a Zomi te’n bel “Mizo” cih kammal khatbek na zang uh a, Assam leh Manipur gam  Zomi te “Paite” ki ci uh hi. Asho ci a kisam Zomite pen zangngam Kawlngam sung ah Thayet, Thantwient, Aunglan, Minbu, Taungdwingyi, Natmauk, Pyinmana, cihbang teng ah om hi. “Yaw” “Chaw” “Kyaw” “Saw”  Zomi aki cite pen Gangaw, Thinli, Saw, Ngaphea  cihbang tenga ah teeng uh hi.

Nagate’n a mau leh amau “Ozo” kici-in Grierson laigelh Linguistic Survey Laimai-291 na ah kigelh hi. “Ei” (we) a cih angennopna hi. Tu a Lai- Laimi akici te’n zong “ZOMI” mah hihang ci hi, ci-in FK Lehman, the structure of Chin Society cih laimai-30 na ah na gelh ngei hi.  Mirams (Laskher) te’n zong “Zao” mah ki ci hi, ci-in Garierson in Linguistic survey laimai -126 na-ah nagelh hi.  Falam a Zahau te’n zong kapu-uh “Zo” mah hi ci a, tua minpa’n Zahau ci a akilo hi ung ci-in Garierson in Linguistic survey laimai- 5 na ah nagelh hi. “Dzo” cih pen Tipra ( amau leh amau tuikuk) te’n zang a Chittagong Mualdung ah teeng uh hi.
Kawlte’n Zomi te pen “Chin” “Khyang” “Chyin” cih bang ahongsap na uh pen AD1300 Pagan suanglaigelh te’ tung ah ki muthei hi. Shan leh Kachin te’n Zomite pen “Chang” “Khang,”  Rakhine te’n “Chaw” hong ci hi. Mon te’n bel “Chieng” hong ci uh hi.

Min khiatna te
Zo, Zuo, Yo, Yao, A-Sho,Khul leh Yaw cih te pen taangpu min alo vive hiding in ka lamen hi. (Dr. Vum Kho Hau, ST.Hau Go, Sing Khaw Khai te laigelh te pan in) i et ciangin “Chin” aki ci pen Kawlkam a hi. A Chin-Chin, Thungei Chin (Comrades, Fellow) cih kammal pa’n hongpiang hiding hi ci-in Dr. Luce in nangen hi. Dr. Emil Forchammer in zong “Chin” kammal pen unau upen leh anautumpen kisapna hi, naci hi. Judson in Myanmar-English Abihdan sang ah Kawlte’n “Rakhinete U ci-in Zomite pen nautumpen ci hi.” ci-in ngen hi.

Zomite’ thu akan pawlkhat in Zomite Khul (Khul Theory) pan’ paikhia hi hong cileuleu uh hi. Sente’ kumpi ahi Hsia, Shang, Choute’ hun lai hidinghi ci uh hi. Hih “Chou” acih kammal pen nungciang in “Zhou” “Zo” “Yo” in hong ciamteh uh a, mina khat, kumpigam khat hiding in hongciamteh uh a, minam khat, kumpigam khat hiding in ngaihsun uh hi. Chou (Zhou,Zo, Jo) kumpi-in BC1122 pan 256 dong uk hi, kici hi. BC11 hongtun takteh Chin Dynasty hong kipan a, kumpi Shi Huangti kici-in kum 14 kumpi sem hi. BC207 pan AD220 dong Han-Dynasty hong kahto in midangte bawlsia lua ahih man in Kawlngam lam ah hongtaikhia uha, Zomite Kawlngam itun hipan in a kipan aci zong omzel hi.  Senngam a Khul (Cave) min pen Chou-Kou-Tien cave (Kawlhawm/Kawlbuuk) aci zong omlai hi.

Rev. Dr. JH. Cope leh Elizabeth Cope te 21/12/1908 in Rev. AE. Carson laihding in hongtung a, April 19, 1910 ciang’Hakha pan Tedim Headquarters ah hong kilaih (Transfer) in kum 30 vilvel na hongsem hi. Rev. Dr. Cope in no Zomite pen Tibet ngam a Mo-nget (Mongoloid) minam tawh sam hendan, samkoihdan akipan nangamtat khuahei dan khempeuh uh kibang uhteh hong cingei hi.

Zomite’ Kawlngam tunzia

Kawlngam ah (1) Negrito, (2) Mon Kherma, (3) Shan-Karan, (4) Tibet-Burma te hong tungmasa hi.
Historian (Khangthusuut mi/pawl) a hi U Bashin, Maj.Bashin, Daw Thein, Mr.Hervey leh Dr. Htin Aung Tibet Myanmar minamte hih anuai abang in na khensuklai hi.
1) Seuh’uan minam; Hih minamte pen Yunan ngampan a hongpaisuk Pyu minamte hi-in Kawlngam ah
Bitano leh Thazi Khettaya khuapite lam in buaina hongtuak hi. AD 1st Century hunpawlin Pasan ngam
hongzuante hi.  (Tawsengku laimai 9na)
2) Kamyan (Kanayan) te’n wathali leh Myo-Oo khua te hong lamkhit hun Rakina a kiciamteh te hi.
3) Thet (Set) zong adangte tawh kibang in AD 1st Century in Prome pan Pasan lam azuantote mah hi.
(Tawsengku laimai 22na)
Khangthusuut mi atamzaw in Zomi, Kachi, Kaduu, Kanan Tamgtaa, Naga, cih mite pen hih (THET) pan hongpiang uhhi ci uh hi. Tua ahih man in:
* BC 600-   Tibet pa’n Hohit Lui/Ngun (river) zui-in Hukang Phaizang (Velley) kantan suk in  Chindwin ngun suk tengah, tuapan’ Kawlngam ah Takang Khuapi tengah ki om hi.  Pawlkhat  Irrawady ngun leh Chindwin ngun kituntuahna kiimteng ah om uh hi. Thirawadi ngun kiim a teengte min kitap in Chindwin kici hi. (The Home of Chin).
* AD 100-   Zomite pen Pagan kiangah om Phayagyi cih mun ah teeng hi. (Salai Hanlin).
* AD 600-   Sagaing, Mintangpin, Monywa, Dibeyin, Paleih, cihte ah om hi. (May Bashin).
* AD 835-   Chindwin kuam ahom Shou khuapi pen Zomite omna hia, Nancho (SEN) te’n  hong simkhia hi. (Capt. Sing Khaw Khai)
* AD 842-   Thayet, Aunglan, Minbu, Mintoung, Taungdwingyi, Tandwet, Popataung cihte ah om hi.
* AD 849-   Pagan (Pyu)(Pu)ngam ah om in Dahpa leh Penglam te’ hun hiding in kiciamteh hi.
* AD 1300-  Kawlkumpi te nguallel a hong kisiat ciang in Shan te tawh Pinyah, Ava,  Sagaing cih khuate ah om hi. Hih hunpen Lengtonghoih hun hiding in kiciamteh hi.
* AD 1300- Yasagyo,Khawlin leh Kawlpi te ah om kipan  in AD 1402-1423 Kyitaung Ngo: Shan ukpite’ ukdong ki omlai hi.
Khamtungngam i luutzia
AD 1420 kiimpan in Kawlpi Phaizang pan Khamtunglam kizuan hi. A hang akikan teh Shan te ukna nuai nuamsa lo-in kulhpi lamding in akuanlote a khutme uh tansak a, nikhat in Lawhpi dimkhatbang ngahhi kici hi. Zangpitam, Khawlmun Ciimnuai ah AD1650 dong, kum 200 pan 250 ciangdong bang om in khang 8 sungbang hi naci uh hi.  Hih hunsung ah Thangho leh Liando, Cingkhup leh Ngambawm, Ngalngam leh Hangsai cihte’ hun a hihi. Tapa khat neileh behkhat piang ahihman in Beh 237 bang Zomi (Tedim, Tonzang) sung ah omhi.
Leitawlam/thanglam azui te’n Lailun, Seipi, Zothang, khuate ana kicipah uh hi. (Falam-Lailun History)
a) Eiteng khawlkhawm atuam omlo, Khul a piangin kileelle’ng,
Tun sung khatpa’n piang hi ngeingei hang ee,
b) Tun sung khatpa’n piang hi ngeingei hang ee,
Suahpih sanggam laigui zawngkhawmte hi ngeingei ee.
* AD 1550        – Guite beh Guimang in Tedim khua hongsat. (CSHS II Golden Jubilee)
* AD 1800        – Pu Khan Thuam chief teen seem hi.
* AD 1820        – Makau kua (9) te’n Tedim a nihveina a dingin hongsat leuleu uh hi.
(Col. Khen Za Moong)
* AD 1840-1868- Pu Kam Hau in Tedim gam uk hi.
* AD 1870        – Tonzang khua kisat
* AD 1877-1878- Guite teng avek phial in saklam/ leilulam ah tai uh hi.
* AD 1895        – September kha in Zogam pen Kawlngam khutnuai ah tunghi.
* AD 1896        – Chin Hills regulation Act piang hi.
* AD 1948        – Kawlngam in suahtaakna ngah in, Chin We Thi Tha Tiang kici hi.
* AD 1974        – Chin State ci-in kilaih hi.

Omna tawh kizui-in kampau 12 bang i nei hi
1) Teizang                 7) Khuano
2) Saizang                  Hualngo
3) Sizang                   9) Guite (Vangteh pau)
4) Zo                        10) Paite
5) Thahdo                 11) Phaileeng
6) Dim                      12) Losau

ZO GAMAH CHRISTIAN BIAKNA HONG TUN DAN
       Khristian biakna England gamah AD 597 kumin St. Augustine in Khristian biakna tun pan hi. Tua ma-in Zomite mah bangin English ten zong sing bul suang bul, dawi namkim mah bia uh hi. Laimal zong nei lo-in thu pen la vive mah tawh ciamteh uh hi. Venarable Bede (AD 672-735) in Latin laimalte tawh English laimal bawlsak hi. England Kumpipa Alfred the Great (AD 849-900) in lai lam nakpi takin tha pia-in, Hebrew, Greek leh Roman lai tei theih tei mawh teng English-in teisak khin hi. John Wycliffe (AD 1324-1400) in Latin pan English-in Pasian’ thu bu(Lai Siangtho) teikhia hi. Kumpinu Victoria (AD 1819-1901) hun panin English te’n ni tum lo leimong dong gam tampi uk hi. Hih hangin, singlamteh in Coloniel flag nung zui-in leitungah Khristian biakna leh English pau leh lai hong kizeelin tudong biakna leh pau taangzai pen leh minthang pen suak hi. Zogam hong tung mikang missionary-te Zogamah zong Mikang galkapte nungzui-in coloniel flag mah tawh Khristian biakna hong tonkhawm ahi hi. Zogamah mikang missionary mi sagih (7) hong pai uh a, 1899 kum a kipan 1966 kum dong hong khoi uh hi. Hong tung masa pen Rev. A.E. Carsonte nupa hi a, 1899, March 15 ni-in hong tungin, 1908 kumin gilpeng natna tawh Carson si-in, Halkha khua-ah kivui hi. A zi ciah tuan lo-in 1922 kum dong hong om hi. Carson in cidamna lam kisam sa-in, a ngetna hang tawh Dr. E.H. East, M.D. pen 1902 kumin hong tung hi. A mah pen mi piangthak mahmah khat hi a, “Mi kuama pai nop lohna penpen munah hong sawl un,” a cihna tawh kituakin Zogam hong kipuak hi. Zogam dung leh vai-ah khualzin kawikawi-in, ha na leh gawl/tawl bawk at hi. Zomite in lamdang sa lua uh ahih manin Dawi tawh kipawl hi in teh, ci-in ngai zawsop uh hi. Dr. East 1908 kumin ciah hi. Dr. John G. Woodinte nupa 1910, December kha-in Zogam hong tung uh a, cidamna lam mah seem in, 1915 kumin ciah kik uh hi. Rev. C.U. Straits-te nupa 1926 kumin hong tung leuleu uh a, Lai Siangtho Sang hong bawl uh hi. Rev. Joseph Herbert Cope-te nupa Tedim khua-ah kiphual dingin 1908 kumin hong tung uh a, ahi zongin Rev. Carson a sih manin Halkha khua-ah a om phot kul a, 1910, November ni 1 ni-in Tedim khua hong zuan thei pan hi. Amah Zogam missionary-te lakah na a seem pen ahi hi. 1938 kumin Mizogam missionary-te tawh gamgi-ah kimu dinga a paina lamkalah nattunin June 11 ni-in a zi leh a tate muh lohin si hi. Halkha khua-a Carson topa’ haan tawh kizomin kivui hi. 1939, December 2 ni-in Rev. Frabklin O. Nelson hong tun behlapin, a ma’n Zomite’ lakah a lian mahmah thu thum(three giants) – haina (ignorance), natna (sickness) leh launa (fear) om hi, ci hi. 1951 kumin a innkuanun ciah kik uh hi. 1995 kumin Minnesota khua-ah hong nusia hi. A zi Phileda Nelson dam lai hi. 1946 kumin Rev. R.C. Johnsonte nupa hong tungin Halkha khua-ah kiphual uh hi. Kum 20 sung hong om uh a, Lai Siangtho tei leh Lai Siangtho Sang lam seem pen uh hi. Kawl kumpi in, “Kawlgamah gamdangmite om thei nawn lo ding,” ci-in thu hong bawlna hangin Zomite nutsiathuai nai het lopi-in 1966, May 28 ni-in America-ah hong ciahsan a, mikang missionary dang hong tung nawn lo hi. Hih mikang missioanry sagihte lakah, Rev. J.H. Copete nupa leh Rev. Franklin O. Nelsonte innkuan pen Tedim khua-ah kiphual uh hi. Rev. Carson in Sang hong phutin, Rev. Cope in laimal hong bawlsak hi. Dr. East leh Dr. Woodin ten cidamna lam seem uh a, Rev. Straits, Nelson leh Johnson ten Lai Siangtho lam hong hilh uh hi. 

CARSON TONU MAH THUPI SA ING 
Zogamah mikang Khristian missionary-te hong tun zawh kum Za (Evangel Centenary) a cin theihna bulpi khat pen Carson tonu’ vang ahi hi. Bang hangin Carson tonu mah thupi sa ka hiam, cih leh, Zogam hong tun zawh kum 9-na, 1908, April 7 ni-in a pasal Carson topa in gilpeng natna hangin sihsanin Halkha khua-ah kivui hi. Tua hangin, Rangoon, phualpi-a a nei Women’s Baptist Foreign Mission Society of the West in Carson tonu’ kiangah, “Na pasal in hong nusia ta a, na Pasian nasepna uh lah mainawt thei lo ahih si tawh hong ciahkik mai in; midang zong hong puak nawn kei nung,” ci-in lai khak hi. Carson tonu in “Kei hong khek ding nong puak mateng uh Zogam nusia ngeilo ding hi ing; nong puak kei uh leh Zomite’ lakah ka lu ka phum mai ding hi,” ci-in dawnna lai thuk hi. Hih bangin Carson tonu a pasal in a nusiat zawh ciangin zong 1922 kum dong maban zomin Zomite hong ompih hi. Carson tonu kici, Mrs. Laura Hardin Carson pen America Baptist Foreign Society of Missionary-in Zogamah Lungdamna Thu puak dinga a sawl Rev. Anthur E. Carson tawh Rangoon-ah kimu tawmin hong kiteenna uh hangin Zogam hong tung hi zaw hi. A nupa-un Zogamah 1899, March 15 ni-in hong tung uh a, Khristian Missionary masa pen hi pah uh hi. Rev. Carsonte nupa pen kammal khat tawh zong a hopih theih loh a hi a kulite tawh taangham nisa vuikai nuai-ah gilkial dangtaak thuakin, hoi dengdengin Zogam hong manawh uh a, haksatna tampi hong nawk to ngiatngiat uh hi. Zogam hong tun uh ciangin, a mite a etet uh leh amau gam tawh kikhaisa lua mahmahin, “Hih lai mualdawn gamkeu munah bang ci nuntaak ding a, Pasian’ na koi ci kisep theih ding a hiam?” ci-in lungkia-in Carson tonu kapkap mai hi. Carson topa in, “Tua bangin pau kei in; hih banga minam kep loh it lohte it leh keem dingin, ei hong thahatsak Khris hangin na khempeuh kinawk zo ding hi,” ci-in Phil. 4:13 sunga Lai Siangtho kammal tawh hehnemin khamuan hi. Tua hun lai-in Zomite niin lua kisa-in, a nuih uh ciangin a mailam uh kithei thei bek hi. Nuntaakzia niam lai lua mahmahin, kisil namel zong kithei nailo a, kihhuai-in, namsia thei mahmah uh hi. Carson tonu in niikbawksiing teeng thei zel a, tua pen Zomi te’n a muh uh ciangin lamdang sa mahmah a, lawn(khoih) hamtang sawm den uh hi. A lawnna uh hangin Carson tonu’ niikbawk sawt siang man lo-in niin khin pahpah hi. A kisilna uh satpiang zong Zomite in a muh uh ciangin bang cih thei lo-in, pawl khatin neksak sawm thei zel uh hi. Tua bek tham lo-in, Carson tonu’ ha pen kham(gold) tawh kiphop ahih manin Carson tonu’ kham hapaak lamdang leh muhnop sa mahmah uh hi. A mu nuam mi tawlnga lo-in ni thapai-in a muuk/kam lisakin ki-en liang zel hi. Hih pen Carson tonu in hun lem zatna-in nei a, Zomite Pasian thu mopna-in zang hi. Carsonte nupa in inn hoih tak khat lam uh a, a zawh uh ciangin Zomite in, “Mikangte inn leh Vantung koi a hoih zaw tam,” cici zen uh hi. Zogal hong suah ciangin, Mikang teng thah ding vai hong om a, Carsonte nupa zong thah kisawm hi. Upa khat in Carsonte hehpih ahih manin, “Na kihem un, thah ding hong kisawm hi,” ci-in hilh hi. Ahi zongin Carson in, “Pasian pen ka belh suangpi hi,” ci-in tai nuam lo hi. A cih bangin, Carsonte nupa thah a sawmte a inn uh a tun ciangin, lainat kikin khoih lo-in hawi kik takpi uh hi. Tua ciangin, 1917 kum khawng dong Khristian a suak nuam Zomite in Innpipa’ kiangah phalna a nget/lak masak uh kul hi. Tua banga a gamta lote dangka peek sawm(Rs. 10) ta kigaam zel hi. Zogamah Khristian biakna hong kizelhna leh Zomite khawphawkna bulpi khat pen Carson tonu’ Pasian muanna leh cihtakna hang ahi hi. A pasal in a nusiat khit ciang zong lungkia lo-in a mabante zom to suak a, kum 20 vaal hong ompih sungin Lai Siangtho tampi teikhia-in, dictionary bute dong hong bawlsak a, hong lim pattah mahmah hi. 1922 kumin Carson tonu in dam lohna hang tawh a pasal kiphumna Zogam leh a it Zomite nusia-in, America gamah hong ciahsan a, 1942, July 19 ni-in Honolulu khawpi-ah a na a sepsak a Topa kiang zuanin hih leitung nusia hi. (Hih thului pen Aizawl ZBC pawlpi in Zogam Evangel Centenary (1899-1999) phawk nanga a bawl Magazine bu sunga J. Thang Lian Pau’ gelh hong kiteikhia ahi hi.) 

           Zo minamte Lai Siangtho neih kipat dan hih a nuaia bang hi. (Source: A critical Historial Study of Bible Translations Among the Zo People in North East India by Rev. Khup Za Go) Portions NT Bible
Lusei 1898 1917 1959
Mara 1912 1928 1956
Tedim 1914 1932 1977
Vaiphei 1917 1957 1979
Haka 1920 1940 1978
Hmar 1920 1946 1968
Asho 1921 1954 -
Kuki/ Thadou 1924 1942 1971
Falam 1933 1952 1991
Khumi 1935 1957 -
Paite 1940 1951 1971
Baite 1949 1985 -
Zotung 1951 – -
Gangte 1952 1959 1991
Kom Kem 1954 1976 -
Simte 1957 1975 1993
Hallam(Chorei) 1960 – -
Bawm 1961 1977 1989
Zou 1967 1984 -

Darlong – 1987 – //

Source ; Lungdamna Aw, Lom 5 Hawm 11 leh 12, Nov-Dec. 1980, laimai 1, Lom 6, Hawm 1 January 1981 laimai 1 pan a kiteikhia)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: A THEIH HUAI ZOMI TE TANG THU Description: Rating: 5 Reviewed By: Cinpu Zomi
Scroll to Top