728x90 AdSpace

Hot
Menu
Zon-ol na Donate

Latest News

BANGHANG ZOGAM AH AN KIKHAMLO DING HIAM? Gelh - Pu Vum Son

BANGHANG ZOGAM AH AN KIKHAMLO DING HIAM? Gelh - Pu Vum Son

I Theih Ding Thu

            Mihing, ganhing, ngasa, singkung lopa, nuntakna anei khempeuh in amau an ciat nelo in, a nungtatheilo, a khangtheilo, a damtheilo vive i hi hi. Mihing in an nekeileng puksi ding hihang.
Tua mah bangin Nganhing, Lopa, Singkungte in annek ding neikei leh siding uh hi. Mihing, Ganhing, Singkung lopate in tui dawnlo ann nelo-in a nungta thei omlo hihang. Mihingte leh Ganhingte in bang anne i hiam cihpen gen kikkik kullo-in tampi theikhin hihang. Ahihang bang an pen ei ading a hoih hiam cihpen a theilo tampi om hihang. Tua pen hih lai sungah hong atkei ning.

Hih lai ii ngiimna a bulpi pen Singkung-lopate Zogamah bang ci-in khangthei, hoihthei ding hiam cih ngaihsutna hong pianuam hi-ing.


            Gamdang, Mikangte gam ka omna pen kum 40 valta hi. Tua sungah, na sungpan napiangte zonna leh Leitungah innlamna, Lambawlna lam ah na ka semzel hi. Hih innbawl- lambawlna-ah na ka sepciang, gam khangtote in a gam bangcipuah hiam cih ka mu hi. Gam puahna dingin, a lei uh puahkul hi. Leipuah i cih ciangin, Leitung-a po Singkung leh Lopate bangci-in ciingleng hoih ding hiam cihna amau theihzahin bawl uh hi.

            Zogam pen mualsang leh guamthuk vive ahih manin, Singkung, ankung, lopa ciinna dingin a haksana mun hi. Hih Singkung leh lopate neek ding a leihoihte pen tui-in taaipahpah ahih ciangin, Zomite-in an a khamna ding haksa hi. Kawlgam-zaanggam ah, mualtunga om, leihoihteng tui-in taimanga, Zaanggam ah ngasuk,  koihsuk ahih manin zaanggam ah, leipha leihoihteng kikhol hi. Tua hangin zaanggam ah an ciinte hoihtakin piangthei hi. I Zomite nuntakdan leh gamtatdan pen, Mikanggam gam khangto nate nuntakna lokhawhna tawh i etkak ciangin, an khamlo hinapi hanghin, i gam i lei i puahlohna hong kilang hi. Gamhoihte zong puahkul ahih ciangin ei adingin, i gam i lei i puah ding thupilua hi.

Bangci A Gam Puah Ding

            Gam puah ding ka cih ciangin, lam bawlding, sang bawlding, zato bawlding cihna pen i theihkim ahih ciangin, tua thu hih lai sungah kong gelhkei ding hi. Gampuah i cih ciangin bangci-in, i gam sungpan annek ding piangsak thei dinga, i anhuanna ding sing, meikhulna ding sing bangci-in neiding cihthu hi. I pu i pa te’n pen munkhat ah khuasat in tuamun kiangkapteng lo a khawhkhit uh ciangin, a gamla na-ah lokhonuamlo ahih uh manun mundangah na taaikhia hi. Tu in pen i mi lah tamciatciat, i innte lah hoihciatciat ahih manin, khuakhat ah sawtpi i om hong kulta hi. Hih khuakhat ah i om ciangin, i lokhawhna hong gamla tektek a, innlamna ding sing i lakna hong gamlata hi. Tua bekhiloin singkung aliante phuk i hih ciangin, a gamla ciatciat namun leh guamthuk luithuk sung bekah innlamna ding a kizangthei ding sing hong omta hi. Tua ahih ciangin innlamna ding gam khuala panin i puak hong kul hi. Hih pen i pu i pate ii khua ana ngaihsutlohhang ahi hi.

            Hih pen banghanghiam i cihleh ei Zomite in, singkung attan ding phukding cihbek i theihman ahi hi. Gam khangtona aom mite in, singbei ding lau mahmah uh ahih ciangin, mundang pan lakawikawilo in, munkhat mualdungkhat ah, cihbangin singat, singphuk in, sing kungkhat aphuk uh ciangin tua singnamte mah singno suankik hamtang uh hi. Eimite in tua banga, sing ciingkik cih i thei ngeikei hi. Tua hangin i gamah sing hong kolhta-in anhuanna ding zong sing i nei nawnkei hi.  A thupi pen ah SING CIIN DING AHI HI.

Bangci A Lokho Ding

            Kum 600 pan kum 700 bang tulai a i teenna gamah i omta hi. Tua sungah, i lokhawhdan i khek ngeikei hi. Tuabek domloin, i ciinngei, i neekngei teng bek mah tawh i lungkim den hi. Na a thakkhat sinding pen i ut kei hi. An thakkhat a ciingnuamte in, koi lai-ah ciingleeng hoihding hiam, koilai ah hih ankung hoihding hiam cih ngaihsutna leh theihcianna neilopi-in i ciingmawkmawk hi. Mi-in Coffee tawh hong nungta theileh Coffee kung i huan sungah i ciing hi. Lingmaw tawh hong hau uhleh i lo sungah lingmaw i ciing hi. Coffee in avot deuhna mualtunglam ah hoih thei a, lingmaw in a lum deuhna gam ah hoih thei hi cihpen i en nawnkei hi. Tua bek domloin, singkung-lopa i ciin ciangin bang-an duh hiam, bang-an pialeng hih singkung hih lopa, hih an nungta, khangto thei, a gah bangci kine thei ding cih i ngaihsun ngeikei hi.

            Singkung leh Lopa ankungte in a neek pen uhpen, singteh muat, singmuat leh ganhing muat, ganhing-ek leh zunte ne pen uh hi. Hite i ngaihsun ngeikei hi. I gam pen a tunga ka gensa mah bangin, mualkawm guamkawm ahih manin guahzu leh leihoihteng taaimang pahpah ahih manin, leitungtham letmatkhat letmatnih bangbek ankungte annek theih ding om hi.  Hih anuai a leisan leh suangte pen singkung, ankung in ne theilo ahih manin, hih leisan, suang sungah, ankung singkung hoih zolo hi.

            Gam khangto na gamah, hih singteh, singmuat, ganhing-ek leh zun tawh kibawl leiphate, ciliap in, innbang lam ding cileng, tua leiphateng tawmphot in, munkhat ah kholphot hi. Leihoihtam aneite’n zuakin, leimawkmawk bang hiloin hih leite pen manpha thei mahmah hi. Innlam a mankhit uh ciangin, a inn kiangah paak ahizong lopa, singno ciinna ding tengah letmat 6 ciang bang zelhphot in tua sunga lopa, paakte ciing uh hi.  Singkung pen leitosukin pi 3 pi 4 ciang bang sungah, leihoih buasukphot in tua ciangin singkung ciingsuk pan uh hi.

            Ei Zomite’n lo i khawh ciangin, tumaneucik tawh leitawm tosukin tua sungah vaimim ahizong buhci ahizong phumsukziau in i ciin tawh i nuntak theih pen, lamdangliang kasa hi. Lo i hal ciangin akang singkeute sungah nitrogen acih uh leite om ahih manin kumkhat bang tua sungah an i ciing thei hi. Tua hilo in vaimim, buh ahizongin, i ciinna ding tengah leiphate phumsukin tualai-ah ciing lehang, kumkhatbek hiloin kum tampi an a kiciing thei ding hicih pen i ngaihsun ngeikei mawk hi. Eimite kicinlahna a thupi pen in, i anciin i ankungte in bang-an duh hiam cih i theihloh hangleh an i piakloh hangin an khamlo i hi hi. Buh leh Vaimim zongin amau deihna gam citciat in, Buh in a lumzawdeuh nadeih in, Vaimim pen alumna zong avotna zongah khangthei kawikawi hi. Coffee, Lingmaw leh seek ciingte inzong Coffee in bang-an duh hiam bawng-ek duhmaw, vok-ek duhmaw, zun duhmaw cih i ngaihsut ding kisam hi. Lingmaw ciingte in, banghang a lingmaw gah pen thukhiam khumhiam cih i ngaihsun ngeikei a, lingmaw, apple, hitaleh seekte zong bang-an pialeng khum ding hiam cih i theihkul hi. I ciinkhit ciang kumsim in, a anneek ding piakthakden ding zong i ngaihsun ngeikei hi. Leisunga aom, a khumna ding apia, datte leh akhanna ding dat apiate pen kicingtak a i piakzawk ding kisam bekdomloin bangmah pia nawnlo i hih ciangin, i singkungte zong sizel hi.

            Gam khangto gamah leengah, seek, lingmaw khawngte pen bangci, bangzahin khum thei ding ahiam cih tuatin ciing uh a, eklei ahizong leipha ahizongin pia uh in tua ciangin a deih bangun a khumna zong bawl uh hi. Eklei khawng i cihciang fertiliser cihbang zong hipahlo hi. Gam khangto na-ah tua bang ommah hi ahih hangin tuate pen zong singmuat, singtehmuat sungpan mah a laak uh hilel in , tuazah in thupisalo uh hi.

            Eklei adeih uh ciangin, nganhing-ek bekhiloin, mihing-ek khawng zong keupitawh ekdum sungpan lakhia in, a lo ah poi uh hi. Tua bekhiloin, gamsung singteh kumsim a, a kiate tawmin, dumpi sungah leitawhhel in umcip a, kumkhat kumnih amuatkhitzawh ciangin, an ciinna ding dumneu abawlte sungah hih thiamthiam in sungsukin tua sungah, singno ahizong, ankam leh annek theih ding a ciinte uhpen tua bangin ciingpan uh hi.   Ei gam banga mual leh guam om nate ah, terrace agriculture (leicial/leilet) ci-in lampi bangin kawmto in, tuate pen Kawlte lobawl cianga, kawm abawl uh bangin kawmbawl in, tua kawmte sungah, singnah, singluangte muatsakin, alei ahoih ciangin, annek theih ding ciingpan uh hi.

            Gam khangto gamte i et ciangin, ei gam pen a hampha hihang cih khatveivei ka ngaihsunzel hi. Eigam pen i khuahunvot lah votlualo, sa lah salualo in, omnuam mahmah hi. Gam dangah pen khal ciangin samahmah in, phalbi ciangin votmahmah ahih ciangin, innpua zong kipusuak theilo hi.      

           Gankhawite’n ganan dingin lopakeu sakin kemin tutawh vaatmai uh hi.
Pasian in i gamah neektheih ding tampi hong bawlsak hi. Gam sungah, thei cihbang, sinkhau cihbang a namnamin pomawkmawk a, tuate pen ei’n zanghloin, a gahteng i muatsak hi. I gam sungah, a pomawkmawk nektheih ding aomte pen ciinthuahzawk cihthadah i phuktan a, i nuntakna in i zangkei hi. Gamdangte in, ei ii i muatsak theigah khawng lo ah ciing uh a, tuate a gahkeu sakin ahikei aleh bung sungah koihin zuakuh hi.  Singzungkhum (thanksing zung) cihkhawngte zong ciingin, anah pan azung ciang avui a abawl uhtawh, bung sungah akoih uhtawh sum ngahtheihna dingin bawlin zuakuh ahih manin nungta thei uh hi.

            Eimite in lingmaw, apple, seek leh annektheih a dangdangte i ciin ciangin, a minkhit ciang a, nek simloh i theikei hi. Midangte in tua pen atui abawl cihbang ahih keileh atuite huankeu-in, avui ah koihin zuak cihbang a namnamin bawluh hi. Nahtangkhawng zong cileng, nahtangkeukhawng in zuakin, nahtangtui-in zuakuh hi. Leitung ka vakna-ah eimi simloh midang khempeuh in, sa pen a muatlo a koih theihna ding theiciat uh hi. Eimi pen tuabang i thei ngeikei mawk hi. Hih pen banghanghiam i cihleh, i haihang hiloin, khua i ngaihsutloh hang himawk hi.

            Tedim khua khawngah sing mahmah omnawnkei i gam hoihlo ahih ciang gamdangah taikhiatna ding hong zongin cihpeuh mi-in thu hong gen hi. Kei muhna-ah, gamkhangto i cihte in a gam uh puahin, a gam uh ahoihna ding, singte abeitheilohna ding hanciam uh hi. Inn alam uh ciangin  singkung nih leh thum ciin ding inn ngei-ah, cihkhawng, tua ahih keileh singkhat naphuk leh adangkhat ciinkik ding cihkhawng upadi nei in, singkhawng pen kumpi permitlo tawh phuktheilo ding cihkhawng upadi in nei uh ahih manleh, a gam uh a siatlohna ding uh hanciam ahihman gamhoih suak hi.  Eite in i gam puahnuamloin gam dangte in gampuah a, tua gamte iva luahnop pen maizumhuailua sa-ing ci-in ka dawngkik hi.

            I gam ah singphuk mangkhin i hih manin zong guah hong tawmzukzaw ding cihpen i theih ding zong kisam hi. Sing phukphuk a, singciing kiklo i hih ciangin, nikhat ni ciangin, i tuite hong kang dinga, i khua i tui pan mundangah i taaikul ding hi. Tua ahih ciangin, mualtung khempeuh ah, singphuktheilo ding, lo a kibawlna-ah zong akiim-apaam singsuan ding cihte upadi in neihding kisam ding hi. Kumsim a lokhawhna ding lovatkulna zong bang ci-in, kumsimin lovatlo-in, munkhat ah, kumsimin leiphabawlna tawh lo kikhothei ding cih ngaihsutna neilehang i gam hong hoihzaw toto ding a, nikhat ni ciang migam bangmahin, i gam i lei mi duhngawhte hong suak ding hi.

Dr. Vumson (late)




Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: BANGHANG ZOGAM AH AN KIKHAMLO DING HIAM? Gelh - Pu Vum Son Description: Rating: 5 Reviewed By: Cinpu Zomi
Scroll to Top