728x90 AdSpace

Hot
Menu
Zon-ol na Donate

Latest News

KACHIN (Behte) GALTAI TE ZOMI TEN UNAU HIHNA ILAKNA

LAIZOM KACHIN GALTAITE HUHNA DING TANGKONA
( Kachin Refugees Relief Fund - KRRF)
(Kachin Refugees Relief Fund - KRRF Tangkona 26 November, 2011)
Leitung kiuli a om laizom Zomi khempeuh na dam kim uh hiam ci in, na khut taklam ciat kong len masa uh hi. Cidam in i maban ciat azom thei zel ding i kilamen a, tuni ciang hong kem hong makaih i biak Pasian min i phat khawm hi. Topa kiang pan hong luang thupha namkimte i mimal tungah hong tung ciat dingin WZC in deihsakna tawh thupha kong puak uh hi.

I theihsa ciat mah bangin abeisa June 9,2011 ni akipan Myanmar Army buluhna le nenniamna hangin tangtawng pek akipan i sanggam/ i mipih Kachin minamte numei, naupang leh ateek akhang tulsawm a sim in, inn le lo nusia in singnuai gammual ah haksatna lianpi thuakin galtai uh hi. Tua bang a Kawlte le Kachin minamte kikal kidona pen tuni ciang dong khawl nai lo bek tham loin, khauhpai semsem a tu'n kha 5 sung bang hong lut ta ahi hi. 

Tua bang a dongtuak i sanggam Kachin minamte pen KIO khuapi ahi Laiza kiim a om khuaneu tuamtuam pan hi uh a, Sengam khuaneu pawl khatah zuanin pawl khat uh a, a tam zaw thamtham numei naupang tampi takin belh le bukna ding nei loin, sing nuai gammual guahnuai khuadam lakah gilkial dangtaak in asi amang tampi om khin ta hi. Hih i sanggam galtai dongtuakte' thu leitungbup ah kizel bek tham loin, gam sung gampua a om minam tuamtuam kipawlnate pan huhna kipia ziahziah hi. Tua bangin huhna akipiak hangin tulaitak adinmun uh gentheih lua uh ahih manin nek le dawn, silh le teen, zatui zaha tampi tak mah akisam lai cih thu WZC phualpi ah thupuak kingah hi.

Tua ahih manin, hih i sanggam Kachin galtaite dinmun lungngai khawm le hang, bang zah takin khasiat huai in lainat huai hiam? I sanggam (Behte) huh kei leng Zomite i Pasian thu upna a mawkna hi lo ding hiam cih huai ta hi. Ei Zomite sungah hih bang dongtuahna nei kha zenzen hi le hang, i sanggam Kachinte in hong mawkkoih peuh mah lo ding cih siangtak i gen ngam hi. Leitung gam tuamtuam a om Zosuan mah ahi Chin kici zawdeuh i sanggam Hakha, Thantlang, Falam etc.. in huhna kaikhawm in Sang 500 val bang puakkhin ta uh hi. Tua banah sanggam Mon minamte in zong huhna pia dingin hanciamsan laitak uh hi. Tua bang kawmkal ah ei (Tedim kampau) Zomite sung pan tuni ciang dong huhna ding vaihawmna bang mah hong omloh ciangin, Zomibup aitangin WZC in tanu semin panlak ding hong kipankhia ta ahi hi.

Hih bangin Zomibup min tawh WZC in malakna i neih theihna pen Zomi sung pan ahuh nuam tampi om cih thu kiza hi.Ahi zongin aphukhia (Organized) leh innteek sem ding omlo banah, mipi lam pan ngetna tampi kingah ahih manin November 20, 2011 ni akinei a (65) veina WZC-EC Meeting thukhensat EC 05/2011 tungtawn in Zomibup sungah "Laizom Kachin Galtaite Huhna Sumbul Zonna " (Kachin Refugees Relief Fund- KRRF) neih dingin khensatna kinei thei ahi hi. Tua ahih manin Zomi akua maciat in galtai dongtuak i sanggamte i lungsim mitkha pan galmuh a, veiina le lainat tawh i hihzawh zahzah ciat gawmin mapang khawm dih ni! ci in Zomite' biak Pasian min paulap in itna tawh kong zawn uh hi.

Nasep zia le kizop zia dingte akipan akisam bangbang WZC-EC Committee in a munmun ah mi muanhuai Palai kikoih ahih manin, nang tawh kinai penpen or na piaknopna peuhpeuh ah kipia thei hi. Huhna kaihkhopna pan kingah sum le paite Kachin galtai dongtuakte phualpi atun dongin WZC in vaipuakna kinei ding hi. Huhna kaihkhopna pen 2011 kum bei dong kikaikhawm dinga kum thakah kipuak khia ding hi. Hih nasepna tawh kisai a theibeh nuamte in a nuai a vaipua makaite tungah suakta tak kidongthei den ding hi. Nasepna le vai kisamte ahunhun in hong kizasak toto ding hi. Zomite kipumkhatna tawh midangte' le Pasian ading nahoih asem zo tawntung dingin Topa'n thupha hong pia hen.!

Note: Hih huhna pen Kachin galkap KIA te thauvui thautang huhna ding hi zenzen loin, galkidona hang a dongtuak galtai Kachin minamte huhna ding bek ahi hi.

World Zomi Congress tangin,


KRRF Tanupi te:


Pu Sian Kip Cin @ Cinpu Zomi
(International Co-ordinator)
Mob: 001- 918851-9036,
Tulsa, OK., USA
Email: cinpuzomi@gmail.com 

Pu Kham Peek
(Secretary & Information)
Mob: 0047-46824269
Email: khampeek@gmail.com
Norway

Pu Zam King Mang
(Treasurer & Spokesman)
Mob: 001- 971-506-7560
Email: kingmangzo@yahoo.com
Portland,USA

KACHIN GALTAITE HUHNA (KRRF) PIAKHIATNA VAI PULAKNA


A tung a thulu tawh kizui-in, abeisa June 7,2011 ni akipan Kawl galkapte le Kachin galkap (KIA) te’ kikapna hangin Kachin mipi 60000 kim inn le lo nusia in, singnuai gammual ah galtai/ dongtuak in om cih i theihsa ahi hi. Tua i sanggam dongtuakte Zomi min tawh huh zawhna ding ngaihsutna kinei-in, Zomi bup aitangin World Zomi Congress pan Kachin Refugees Relief Fund Committee kiphuankhia in Innteek semin leitungbup ah tangkona i nei hi. Hih KRRF huhna piakkhiatna tawh kisai anuai abangin tomkim le limlakna (Photo) pawl khat navawh (Attach File) ah muhtheih/ simtheih dingin kong koih uh hi. Zomi min U leh nau akua maciat in itna le lainatpihna takpi tawh i piakkhiat sum kingah vekpi US$ 13013.95 pen January 28,2012, Saturday ( 6:30PM-8:00PM) sungin Vickery Baptist Church, Dallas, USA ah WZC makaite le KRRF Committee te in Kachin kipawlna makaipite’ khut ah piakkhiatna hunpi nuamtak kinei thei hi. Hih bangin mihing genthei, cimawh le dongtuakte huhna ah neihsa sum le paii, tha le ngal akipan lungsim pumpi mahmah tawh mapang Zomite khempeuh WZC pan KRRF Committee min tawh lungdamna lianpi kong pulak uh hi.

Hih bangin Zomite i mapankhop ciangin Pasian hong piak thuphate i zeeksiamna le i kipumkhatna hong kilangkhia ahih manin, tu le atawntung in midangte le i biak Pasian ading nasem khawm zo semsem dingin Topa’n thupha hong pia ciat hen!  Tua bek tham loin, tutung a i mapankhopna tungtawn in namdangte in ZOMI min athak in hong theihpih semsem bek tham loin, i biak Pasian zong lungkim semsem dinga, Zomite thupha ngah minam hong kici semsem ding hi. Minam dangte tung pan huhna a ngenngen minam hi nawn loin, minam dangte tungah huhna a pia zo tawntung dingin Pasian in thupha hong pia behbeh lai ding hi. Nasep hoih sep ding cimtak ngei kei ni.!


KRRF Fund apna leh piakkhiatna Melmuh tongsan in.



KRRF huhna piakkhiat (ap-na) hun sungah WZC pan maikaite le KRRF Committee ahithei teng banah Dallas Zomi pawl khat zong kihelthei hi. I sanggam Kachin Kipawlna lam pan zong a zahtak huai makai thupi vive hong kihelthei uh hi. Sia Mungtawng ( Lasa siam) in hun hong kem (Chair person) semin Zomi apai teng leh Kachin lam pan hong pai teng tawh, KRRF sumte kipiakkhia ( Ki-ap) ta hi ci in, pulakkhia in khutbetna tawh hun honna kinei hi. Pu Thang Lian (WZC-GS) in WZC dinmun (political stand), KRRF mapanna leh Kachin te leh Kawlte kikal ah Zomite ngaihsutnate a tomkim cing takin pulakna nei in tha kingah mahmah hi.

Tua banah Pu Thang Lian in WZC i dinpih, ngimna le tup bulpite le maban kalsuan zia ding pawl khat anuai a bangin pulakna nei hi.
(a) WZC in Zomite’n a bukim suahtakna ngahtheihna ding hangsan tak le citak takin ka phu ding uh hi.
(b) WZC in Zomite lamsang/ domsang, cing leh kemin, Zomite ngahhuai (rights), kitualvaihawmna leh,mimal tanvo( Rights) ngahna ding kasem ding uh hi.
(c) WZC in Galtai dongtuakte don leh kem in ka honkhia/ panpih ding uh hi.
(d) WZC in Zomite khantoh nang, hauhna , daihna le nopsakna dingin ka sem ding uh hi.

Tua banah KRRF nasepna tawh kisai a genna ah, ” sanggam Kachin numei, naupang, pitek, putek dongin Kawl kumpite in cikzia lo takin abawlsiatna le a thahna, inn leh lo suhsiatsakna ,Kachin numeite buanna cihte khempeuh Zomite in Kachin mipite tawh kibangin kong lainatpih, kong thuakpih uh hi. Hih bang a gamtatsia Kawl gamkeekte Zomibup in nasiatak in ka mawhpaih uh hi. Na haksatna uh ka zak uh ciang in WZC in Meeting kinei-in, leitung bup a om Zomite khempeuh kiangah thuzasak in, KRRF min tawh nasep kipankhia hi. Tua banah Kachin te leh Zomite Unau khat hihna thute hangin minam dang bangin ngaihsutna nei loin, sanggam laizom taktak in ngaihsutna kong nei uh hi ” cih thute genkhiatna nei hi.

A tawpna ah Kawlgam Union of Burman pen Kachin, Shan, Chin leh Kawlte in,Panglong khawmpi pan kithukimna belpawl gamin dinkhop ding lungkimna hong om ciangin,Union of Burma hong piangkhia ahihna thute gen hi. Tua masiah,ei leh ei ki-uk,kivaihawm thei ziau minamte i hi hi. Tua ahih manin hih Panglong lungsim pua in, minam le gam itna takpi tawh gentheih/ haksatna na thuaknate uh kong lainatpih mahmah uh hi. Tua mah bangin mai lamah ko, Zomite in zong tu aa mah bangin mapankhop theihna khempeuh ah thasial het loin,i ngah ding aa kilawm ngahhuai (Rights) muhmatan no tawh a kibang in kong panpih ding uh hi ” ci in gen hi.

KRRF Committee pan Pu Cinpu Zomi (International Co-ordinator) in thugenna aneih khit ciangin KRRF sumte Dallas pan Lia Lalun tawh piakkhiatna nei suak pah uh a,Kachin lam pan Cultural and Traditional Committee pan makaipi huh Sia Htingnan La Sam leh Secretary Sia David Lahtaw te in zong thugenna nei ciat uh hi. Kachin Lam pan Sia David in Kachin galtaite’ haksatna leh gamvai a genna ah, ” Kachin  dongtuakte pen khawl ding lam manawh nai het loin, tam lam manawh semsem zaw ahih manin, mailam ah zong hahsatna a phu toto lai ding ka hi uh hi. Tutung laizom Zomite in nong huhnate uh dongtuakte ka zaksak uh ciangin lungdamin, thangah mahmah ding uh hi ” ci in a thangahna le lungdamkohna thugen hi.

Kachin lam pan Vice President Sia Htingnan La Sam in zong thugenna tomno nei a, ” Kachin te in hih banga Kawlgamkek gal ka do uh pen, Kachin mite ading bek hilo in, Kawlgam mualtung mi khempeuh tangin galdo ka hi uh hi. Kawlgam ah Panglong thukimna om ma in ei leh ei asuakta i hi hi. Tua Panglong thukimnate Kawlte in hong awlmawhsak nawn lohna hangin, hih bangin haksatna le buaina kithuak a hihi. Tua ahih manin hih i ngahhuai (rights) te i ngah masiah Kidona tawh kisai kikhawllo ding hi ci in gen hi. Tutung Kachin galtaite vai ah Zomite in nong panpihnate uh Kachin leh Zomite tangthu ah a bei ngei nawnlo dinga, kiphawk tawntung ding ahi hi ci in gen hi. Atawpna ah Dallas khuapi sunga om Vikery Baptist Church ah Pastor Jimmy Gallagner in hunzawhthungetna nei-in, a paikhawm teng khukdinin Kawlgam hoihna ding le Kachin gamah kilemna hong tunna dingin thungetna kinei hi.

Hun man khit ciangin Pu Thanglian te inn, Dallas ah Behte tawh thu tuamtuam holimna leh tutkhopna hun nuamtak neikhawm kik uh hi. Kachin makai lamte in a genna khatah Gam sung a om ka mipihte uh lungdam mahmah hi. Dollor pek khat nangawn mannei mahmah in mikhat zing leh nitak an ding hong lungmuang sak hi ci-in,a lungdamna uh leh i huhna sumte manpha asakna thute gen phapha uh hi. Tua ahih manin, tutung laizom Kachin galtaite i huhna hangin Zomite thupha ngah kipatna le kipumkhat kipatna hi dingin WZC lametna le thungetna ahi hi. Zomite khempeuh Topan hong makaih hen.

Zomi khempeuh tangin,
KRRF Committee,
World Zomi Congress
Headquaters,
Portland, USA

Photos (Lim laak) Pawlkhat.









Lai thusuah te.







Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: KACHIN (Behte) GALTAI TE ZOMI TEN UNAU HIHNA ILAKNA Description: Rating: 5 Reviewed By: Cinpu Zomi
Scroll to Top