728x90 AdSpace

Hot
Menu
Zon-ol na Donate

Latest News

Leitung Buppi Mihingte Mihing Hihna tawh Ngahding kilawm Hamphatnate Pulaak khiatna

Bottom of Form

(Universal Delaration Of Human Rights)

Hih pen leitung gam tuamtuamte kipawlkhopna lian (United nations) ii kikhawppi (General Assembly) thukhensatna 217(III), 1948 kum December kha ni (10) ni-a hong taangko khiatna thu ahi hi.


KICIAMNA
  • Leitung mihing khata a piang mikhempeuhte in amau pianpih mihing thupina (inherent dignity), tan kibang liana hihna ngahna (equality) leh, a ki paikhia theilo mihing hihna limlim tawh ngahding kilawm hihna hamphatnate (inalienable rights) i neih limlimna in, leitung buppi ii suahtakna, dikna leh thumaanna leh, ki-it kilemna daihna hong piankhiatna bulpi hi cih um in;
  •  Mihingte’n mihing hihna tawh ngahding kilawm hihna hamphatnate (human rights) thusim lohna leh neubawl/simmawhna in, mihingte lungsim ngaihsutna lungtang sungah hehna apiangsak thei namniam namtom namgilo hihna, lungsim thukhuallohna, thagum hatna suanga ngongtatna piangsak thei aa, hici banga pankhawma nasepna-in hong pailai ding mailam mihingte nuntakna ah suakta taka thugen theihna (freedom of speech) upna zuihtheihna (freedom of believe) leh lungsim patauhna launa pan suahtakna (freedom of fear) deihnate ngahkim theihna ding leh mipi taangpi taangta te (common people) ii ngaihsutna tupna ngiimna sangpen hihna dinga deihna pulaak khiatna hi cih phawkin,

  • Mi khat nguak deihna banga hupi tawh mipi ukcipna (tyranny) leh midangte tunga humcipna tawh ukcipnate ( oppression) aana tawh sawlngawpna thuneihna (compelled) cihte zanglo a, tuate do ding kikhelsak ding (recourse) i sawmna ah, a tawpna leh asang penpen-a ih vanzat dingin mihingte mihing hihna leh ngahding hamphatnate huutna kepcinna ding a ki sam pen vanzat ahihna zong thei kawm in,
  • Gam tuamtuamte ii khat leh khat kilawmta taka kizop khawmna (friendly relations) picin sakding leh khantoh khancin sakding a kisapna phawkin;
  • Gam tuamtuamte kipawlna sunga om leitung mipite in kilemna (Charter) sungah amaute upna muanna ahi  mihingte mihing hihna tawh ngahding hamphatna kisap bulpite (fundamental human rights), mihing thupitna (dignity), mihing hihna ii manphatna (worth of human person), numei leh pasal ten ngah/tanh kibang neihna, mipi taangpi taangtate khantohna lapsangna dinga khel themthum lohding thu ciangtanh khensatna bawlin, nuntak suahtakna lianpi leh zaipi sungah mihing ten nuntakzia dinmun hoihzaw sangzawte ngahtheihna te kipsak kikin,
  • A kipawl gamte in deihna tupna te hong picin nading amau leh amau-a, gam tuamtuam kipawlkhawpna (UN) tawh nasep khawp ding, leitung vannuai (universal) ah a sangzaw in kizahtakna khangsak ding leh mihingte mihing hihna tawh ngahding kilawm hamphatnate (human rights) leh mihingte nuntak suahtakna dinga kisam bulpite (fundamental freedoms) etcikna leh zuihding bangtaka zui dingin upna kiciamna ki thukim takin bawl aa,
  • Tua mihingte ii mihing hihna tawh ngahding kilawm hamphatnate leh mihing hihna tawh nuntak suahtaknate  theihtelkiimna in hih kiciamna telsiangna dingin a lianpen a sangpen leh a thupi pen hi cih thei-in,

Kikhawppina (General Assembly) in, hih leitung vannuai buppi mihingte ii mihing hihna tawh ngahding hamphatnate pen, mi khempeuh gam khempeuhte ading, mipi taangpi taangta te sunga om mimal kiim, kipawlkhopna kiim ii thu tut theihna tawp hi ding hi cih lungsim ngaihsutna ah kemcing tawntungin, nakpi takin hilhcianna leh pilna piakna tawh tua mihing hihna tawh ngahding kilawm hamphatnate leh suahtaknate kizahtaksakna khangsak ding aa, gamkhat dinmun leh leitung buppi nuntakna dinmun te kiamzaw lo-a a mainawt zawkna dingin tehna lamtuamtuam tawh tehin, leitung vannuai (universal) bitna ding, ki theihpihna/ki pompihna kiciantak (effective recognition) leh ki etcianna a omtheihna dingin, a kipawl gam leh gammite sungah leh ukna gamkhen/gamke te (territories) sungah a om gammite in amau zuihding thukhenna dinga a kibawl dan thukhenna nuai-ah a bit kiim theihna ding deihna tawh anuaia bangin hong kibawlkhia in ki taangkokhia ahi hi.

Khen khatna (Article 1)
Leitung mihing khempeuhin ama mimal thupina leh hihna ciat tawh suakta tak leh kibang kiim takin suak tek uh aa, amau pianpih siamna hoihna tek tawh ahang nei in leh lungsim sia leh pha theihna nei in, ki unau-na tawh nuntakna kha khat sungah khat leh khat kihuh-a nungtakhawm dingin piang uh hi.

Khen nihna (Article 2)
Mikhat kim in hih kilemna sunga om mihingte mihing hihna tawh ngahding kilawm hamphatnate leh nuntak suahtakna khempeuh ngahkiim dinga, minam, vunmel, numei-pasal hihna, pau, biakna, gam leh minam vai ahih kei leh adang ngaihsutna, gammi hihna ahih kei leh mipi kipawlna, neih leh lam, suahna mun ahih kei leh adang hihna thukhat peuhpeuh tawh ki deidan kikhentuamna omtheilo ding hi.
Tua banah, gam leh minam vai, thuneihna huamsung ahih kei leh leitung buppi tawh kisai gamkhat ii gamke khat sungpana mihing hihna ah, a suakta, kimuan ngamna, amah-a ki ukna neihlohna ahih kei leh kuama thunuai-aa omlo ukpi hihna nuaiah ciangtanh nei-a kikoih mihing hihna cihtuamtuamte tungtawn-a ki deidanna kikhentuamna zong omlo ding hi.

Khen thumna (Article 3)
Mikhat  kiim-in nuntak theihna, kuama ukcipna nuaia omlo-a suahtakna leh mihing khat hihna tawh lungsim khalauna neilo-a suahtakna cihdan mihingte mihing hihna tawh hamphatna nei/ngahkiim hi.

Khen li-na (Article 4)
Mi khat kiim in sal, sila hi theilo dinga, sal leh sila kizuak kileina te khaam-in zanglo ding hi.

Khen nga-na (Article 5)
Mikhat kiim-in pumpi taksa tungah ngawtna bawlsiatna ahih kei leh hehpihna khualna neilo-a kibawlsiatna, mihing banga kibawllo-a ganhing banga kibawlsiatna ahih kei leh, nuntak khawsak dinmun niamkiatna minsiattheih nadinga kibawlna ahih kei leh, daan kipiakna (punishment) thuaktheih nading ukcipna nuai-ah omlo ding hi.

Khen gukna (Article 6)
Mikhat kiim-in dan (law) mai ah dinga a om mihingkhat hihna tawhin koimun koimun ah ki ciaptehna ngah/nei thei ding hi.

Khen sagihna (Article 7)
Mi khempeuh in dan (law) nuaiah kikim aa, dan ii huutna kepcinna kibang a ngahtheihna dingin ki deidanna kikhentuamna cihte om lo-in min kipiakna nei kiim ding hi. Hih pulaak khiatna palsat aa, ki deidanna ki khentuamna khatpeuh hiam ahih kei leh, tuabang ki deidanna kikhentuamna hong om theihna dinga tawsawnna ki-hahawlhna hiam khatpeuh hangah haksatna atuak mi peuhpeuhin dan tawh kituakin huutna keepcinna kibang kiimtakin ngahthei ding uh hi.   

Khen ngiatna (Article 8)
Mikhat kiim-in mihing kisap pen ahi zuihding dan leh thukhunpi (Constitution & by law) tawh kituaka a kipia mihing hihna tawh ngahding hamphatna te, kisuksiat sakna, kikhaktan sakna cihte akipan, tuabang suksiat-khaktanna hong om theihna dinga nasepna gamtatna tawsawnna a omna mun/gamte ah gambup thukhenna zumpi nuaipan panpihna kician tak ngahthei ding hi.

Khen kuana (Article 9)
Mi kuamapeuh in zuihding thupaipi thukhun guipi neilo leh deih dandan-a thukhenna ki-ukna nuaiah kimatna, thongkiatna ahih kei leh teenna gamsung pan taikhiat theihtheihna dinga kibawlnate pumthuak miikmeek theilo ding hi.

Khen sawmna (Article 10)
Mikhat kiim-in ama mihing hihna tawh ngahding kilawm hamphatnate, hih loh theih loh ama mawhpuaknate, ama tungah dan leh thukhun palsatna nei hi ci-a thu kibawl thubuai khat peuhpeuh tungah ama khensatna dikna lahkhiatna a kulna munte ah, siangtho tak leh mipi zak dingin suakta tak in leh thukhenna zumpi pan guptuam paihtuam omlo takin ki lakkhia/ki pulaakkhia thei dingin tanh/ngah kikim ngah kiim takin min kipia thei ding hi.

Khen sawm-leh-khatna (Article 11)
(1)Mikhat kiim-in amah tungah mawhna khialhna nei hi ci-a a ki mawhsak leh ama kidalna ding a kisam teci dinga a neih thu leh nate tawh mipi mai-ah dan tawh kituak-in ding dinga, mawh takpi hi, khial takpi hi ci-a kician sinsen guptuan paihtuam omlo thukhenna a om masiah, a mawhlohna leh ama dikna thumaanna a kilatna ding pulaak/genkhiat theihna nei ding hi.
(2)Mi kuamapeuh in, gamkhat ii dan a hih kei leh leitung buppi dan nuai ah mawhna khialhna neilopi in, na khatpeuhpeuh thu khatpeuhpeuh kantana a nawk a sep hun laitak-in mawh hi khial hi ci-a mawhsakna athuak leh, khial hi ci-a pawhsakna pumthuak miikmeek lo ding hi. Tua banga na a sepkhiat laitaka mawhna khialhna nei hi ci-a a kigawhna sanga a gikzaw/a uangzaw thukhenna zong ama tungah om/tung theilo ding hi.

Khen sawm-leh-nihna (Article 12)
Mi kuama peuhin ama mimal suahtakna (privacy), innkuan, omna inn ahih kei leh, kizopna ding thutuamtuamte ah zuihding thupaipi thukhun guipi zuilo pi-a deih dandana ki thulawlh/ki uiphumna cihte pumthuak miikmeek lo dinga, ama zahtakhuaina (honour) leh minhoih minphatna (reputation) te suksiat nopna mindaisak nopna tawh langbawlna/dona-buaisakna zong pumthuak miikmeek lo ding hi. Mikhat kiim-in tua banga thumaanlopi tawh siatsakna, ki minsiatsak nopna tawh ki thulawlhna leh langbawlna/dona- buaisakna te ah, dan tawh kituak-in ki dalna kihuutna ding nei/ngah ding hi.

Khen sawm-leh-thumna (Article 13)
(1)Mikhat kiim-in ama tenna gam ii gamgi huam sungah suakta taka paisuk paitoh zinsuk zintoh theihna leh omtheih tentheihna nei/ngah ding hi.
(2)Mikhat kiim-in ama tenna gam leh a neihsate paisan in nusia thei dinga, ama gam mahah ciahkik theihna zong ngah/nei kik thei ding hi.

Khen sawm-leh-lina (Article 14)
(1)Mikhat kiim-in zawhthawh bawlsiatna atuahna panin a kipelh theihna dingin gamdang khat peuhpeuhte ah taikhia-in kibukna (asylum) ngen in om thei, buktheihna ngah/nei thei ding hi.
(2)Hih hamphatna ngahna thu-ah, gam leh minam vai tawh khial hi ci-a mawhsakna ahi lo lampi dang pan kancianna leh suulzuihna kician tak-a bawlna ahih kei leh, gam tuamtuamte kipawlkhawpna UN ii tupna leh sepna lampi tawh kipelh-a nasepnate ah hehsuah, thangpaih, sinso-na cihte omthei lo ding hi.

Khen sawm-leh ngana (Article 15)
(1)Mikhat kiim-in gammi khat hihna nei/ngah ding hi.
(2)Mi kuamapeuh in ama gammi khat hihna ah, danzuih thukhun zuihna kician omlo pi tawh ama ngahding kilawm hamphatnate ki ngahsak lo-a khaktan sakna, suksiat sakna, phiatsakna ahih kei leh, ama gammi hihna khek theihna dinga ama ngahding kilawm hamphatnate thusim saklohna te pumthuak miikmeek lo ding hi.

Khen sawm-leh gukna (Article 16)
(1)Kumcing khinsa pasal leh numei te in, minam hihna, gammi hihna ahih kei leh, biakna thu-a ciangtanhna ki deidanna cihbang omlo-in, kiteen theihna leh innkuan dintheihna hamphatna ngah/nei ding hi. Amau a kiteen theih ding mahbang un, a kiteen laihun sung khempeuh leh a kikhen siangna a om hun dongin, ngahna tanh kibang ngah dingin min kikhum dinguh hi.
(2)Nupa kiteenna thu-ah a kiteeng dingte ii suakta tak leh lungsim ngaihsutna tak tawh deihteelna bek a picing kiteenna hi ding hi.
(3)Tua innkuan in gamsung mipi taangpi taangta kipawlkhawm (society) ii a kipatna bul leh akhen no khat/kipawlna no khat suak ahih manin, gammite kipawlna (society) leh a gam in huutna leh dalna kepcingna bawl/pia ding hi.

Khen sawm-leh sagihna (Article 17)
(1)Mikhat kiim-in amah bekin zong neihsa vanngil, gamhte nei theiding aa, midangte tawh zong kipawlkhawm-in zong nei thei veve ding hi.
(2)Kua mapeuh in ama neihsa vanngil, gamhte pen danzuih thukhun zuihna kician tak nei lopi-in kuama khaktan sakna suksiat sakna pumthuak miikmeek lo ding hi.

Khen sawm-leh giatna (Article 18)
Mikhat kiim-in suakta taka ngaihsut theihna(freedom of thought), sia leh pha khentel theihna (conscience) leh, biakna (religion) zuihtheihna nei ding hi; hih hamphatna ngahna in ama biakna (religion) ahih kei leh ama upna (belief) te suakta taka khel/laih theihna zong huam dinga, mimal khat bek in ahih kei leh veeng leh paam midangte tawh, mipi sungah leh mimal in, ama biakna, upna thute hilhcianna, zatkhiatna te akipan phatna biakna piakna leh etcianna, pulaakkhiatna, teci panna,… suahtakna tuamtuamte nei thei ding hi.

Khen sawm-leh kuana (Article 19)
Mikhat kiim-in suakta taka ngaihsut piakna leh gencianna nei thei ding aa; buaisakna, thusia ki-lawlhna ki hahawlh- kisuktuahna cihte omlo taka ngaihsut piaknate suakta takin zangkhia thei leh, zawngthei, ngahthei ding bektham lo-in, thu leh la-vai tuamtuamte leh ngaihsutna lungsim geelnate zong, media khat peuhpeuh leh gamgi kikhenna omlo nasepnate tungtawn-in thu kizaktuah theihna, lai tawh kihilhna, kisin sakna, cihte zong nei/ngah thei ding hi.

Khen sawmnih-na (Article 20)
(1)Mikhat kiim-in suakta takin buaina omlo kimuhkhopna khawmpi (assembly) leh kipawl khawpna (association) cihte ah kihel thei ding hi.
(2)Kua mahin kipawlna (association) sungah a kihel mi hihna dingin, mikhat peuhpeuh tungah aana tawh pum zawtngawp theilo ding hi.

Khen sawmnih leh khatna (Article 21)
(1)Mikhat kiim-in, direct in ahih kei leh, suakta taka a kiteel taangmi palai tungtawn-in ahi zongin, ama pianna gam kumpi sungah panlakna nei-in kihel thei ding hi.
(2)Mikhat kiim-in ama teenna gam mipi ading nasepna te ah kihelna lutna nei thei ding hi.
(3)Gam mipi buppite deihna in kumpi thuneihna bulpi hi dinga, tua mipi buppi deihna a kilat theihna dingin ahun ahun in kiteelna siangtho takte kibawl ding hi. Tua in leitung buppi san/pomtheih hongsuah theihna dingin, kibang kiim takin mipite in suakta tak-a amau deihteelna tawh vote piaktheihna nei dinga, ama mimal bek ii theih secret ballot vote piakna dan ahi kei leh a kibang veve suakta taka vote piakna dan dang khat peuhpeuh tawh kiteelna hi ding hi.

Khen sawmnih leh nihna (Article 22)
Mikhat kiim-in, amah mipite sunga khat ahih mah bangin, gamsung mipi taangpi taangtate bitna ding thute ah leh, gam ii hanciamna leh leitung buppi kipawlnate ii panpihna tungtawn-in, ama teenna gam ii nuntak nekzonna (economics), mipi kipawlna (social) leh minam ngeina (cultural) te hanga mihing hihna tawh ngahding kilawm hamphatnate, ama mihing hihna thupina, suahtakna tak tawh mimal nuntak khantohna ding thute leh nasepna te ah amah a ki mawkkoih theihlohna leh amah lo tawh apiang theilo (indispensable) thu ahih lam theitel mahmah ding hi.

Khen sawmnih leh thumna (Article 23)
(1)Mikhat kiim-in nasem thei dinga, ama sepding nasep ah suakta tak-a deihteel theihna, diktak maantak leh deihsakna bangteng cihte akipan, nasep neilo a kikoih theihna pan kihuut kidal kikepna cihte theihtheihna hamphatna ngah ding hi.
(2)Mikhat kiim-in, ki deidanna kideihsak tuamna omlo leh, ama nasep tawh kilawm kituak thaman midangte tawh a ki bangin ngahthei ding hi.
(3)Mikhat kiim-in ama mimal ah, ama innkuan sungah, ama ii mihing hihna thupina pungsak khangsak dinga, diktak, maantak, deihsakna tak tawh kician takin thaman, liau sum, lungdam kohna cihte zong panpih thei ding hi. A kisap leh mipi taangpite lam pan-in ama hihna lampi tuamtuam panin kepna huutna panpihnate zong ngahthei lai ding hi.
(4)Mikhat kiim-in ama nuntakna ding nasepna ah mettuamna a neih theihna ding, kihuutna ki dalkholhna-in sumbawl-vanlei vanzuakna mimal takin dinthei dinga, kipawlkhawmna ah zong kizom khawm thei ding hi.

Khen sawmnih leh li-na (Article 24)
Mikhat kiim-in, ama nasepna pan tawlngak hun, hun-awl, a kilawm a kituak-a ki ciangtanh nasep hun leh, thaman kaat lo-a piakdinga ki ciangtanh nasep khawlni cihbangte zong ngah thei ding hi.

Khen sawmnih leh nga-na (Article 25)
(1)Mikhat kiim-in cidamna, a kilawm kituak khomding mimal leh innkuan nuntakna aneih theihna dingin, neek ding an, puansilh niikten, omna ding inn, kikepna ding zatui zaha, mipi tawh nuntak nasep khopna ah a ki tangsampi dingteng ngah hamtang dinga, tuate banah nasep theihloh hun, cidamloh hun, nasem thei nonlo ding dinmun a tun hun, meingong a suah hun, tek hun ahih kei leh, amah leh amah ki kem ki khawpha zo nonlo ding khawpa nuntakna ah dinmun haksatna a tuah hun sung cihte ah kikep ki huutna ngah ding hi.
(2)Nu leh naupang hihna dinmun ah atuam vilvel-a kikep kikhoi-na leh panpihna ngah ding hi. Naupang khempeuhte in, a piang tungpan nupi pasal neithei ding khin dinmun (wedlock) ahi zongin, mipi kepcinna huutna ngah ding uh hi.

Khen sawmnih leh gukna (Article 26)
(1)Mikhat kiim-in pilna sinding hi. Pilna sinna sangah a tawmpen in manglai tan 10 ciang (elementary stage) ciang leh aki sampi dinmun (fundamental atages) ciang peuhmah a khawnkhongin sinthei ding hi. Manglai sang ciang pilna (elementary education) sinna pen sinloh theihloh hi ding hi. A tungsiah nesep dan (technical) leh neekzon theih nading pilna siamna (professional education) sin-nate pen a ki ngahthei taangpi hi dinga, tua ii tungsiah pilna sangzaw (higher education) te pen ama mimal hihna, siamtheihna leh dinmun tungtawnin ki en-in, mikhempeuh a kibang in sin theihna ngah/nei ding hi.
(2)Pilna sinna in mihing mimal ii mihing hihna lapsangna ding hi aa, mihing hihna tawh ngahding kilawm hamphatnate (human rights) leh mihingte kitaangsap bulpi suahtakna te (fundamental freedoms) zahtak bawla thapiakna (strengthening of respect) lam hi ding hi. Tua-in theihtelna (understanding), ki sansiam theihna (tolerance), leh ki lawmtakna (friendship) cihte, gamtuamtuam (nations), minam tuamtuam (racial) ahih kei leh biakna kipawlna tuamtuam (religious groups) te kikal ah khangsak dinga, gam tuamtuamte kipawlkhopna (United Nations) ii a tup leh a sep leitungah kilemna daihna a omtheih nading nasep maalakna te picin sakna hong suak ding ahi hi.
(3)Ta te tungah bangci bang pilna leh sinna a hoih pena pia ding cih thu deihteelna tawh kisai-in, nu leh pa te ngaihsut pihna tungah ki-nga masa pen ding hi.

Khen sawmnih leh sagihna (Article 27)
(1)Mikhat kiim-in, ngeina tawh a nungta dingamipi nuntak khopna sungah suakta takin kihel thei dingah nuntak khuasak, gamtat luheek, kampau mukpau, khutsiamna…tuamtuamte (arts) sungah nuamsa aa, tua bang nuntak khawpna a khantoh theihna dingin leh mihingte met zawkna a om theihna dingin, khangthak pilna tawh muhkholhnate (scientific advancement) zong hawm/piathuah thei lai ding hi.
(2)Mikhat kiim-in ama gelhkhiat suaga om lungsim ngaihsutna zia (moral) leh muhtheiha phattuamna metna a piangsak thei thute pen, tuhun khangthak pilna tawh suttelna (scientific), lailam (literary) ahih kei leh, khutsiamna zanga sepkhiatna (artistic production) khat peuhpeuh pan kepcinna, huutna dalna ngah ding hi.

Khen sawmnih leh ngiatna (Article 28)
Mikhat kiim-in, hih taangkona sunga kigelhkhia mihing hihna tawh ngahding kilawm hamphatnate leh mihingte suahtakna ding thute telcian taka theihna in mipi kipawlkhawma nuntak khopna (social) sungah leh leitung buppi ading hi cih theitel mahmah ding hi.

Khen sawmnih leh kua-na (Article 29)
(1)Mikhat kiim-in ama mimal suahtakna leh mimal mihin-nate lapsangna khantohna cingkiim taka angah theihna dingin, mipi taangpi taangtate nuntakkhawpna (community) sungah mawhpuakna la/nei thei ding hi.
(2)Ama mihing hihna tawh ngahding kilawm hamphatna-suahtaknate aki zatkhiatna ah, mikhat kiim-in amah bekmah ahuam a genna ahih lam kithei in, midangte ngahding kilawm hamphatnate leh suahtaknate zong zahtak sak ngaihsut sak ding hi. Lungsim sunglam dikna leh thumaanna, taangpi mipite deihna leh mipi thuneihna (democratic society) sungah, mipite ii pangkhawm-a nuntakkhopna taangpi (general welfare) muhtheih nadingin, danin phal hi, genkhia hi cihthu sangthei tek ding hi.
(3)Hih mihing hihna tawh ngahding kilawm hamphatnate leh mihing suahtaknate thu khempeuhte-in, gamtuamtuamte kipawlkhawpna (United Nations) ii tupna ngiimnate leh thukhunte tawh a kilehbulh a kituak lo-in kuamah-in zangkhial theilo ding hi.

Khen sawmthum-na (Article 30)
Hih thu pulaakkhiatnate pen gam (State), mihingte kipawlkhawm (group), mimal (person) khat peuhpeuh in, a kigelhkhia mihingte ii mihing hihna tawh ngahding kilawm hamphatnate leh mihing suahtaknate susia/do-dal/khaktan theihna ding tupna ngiimna tawh a lehlam-in pangin letkhia theilo ding hi.           
  
Note: WZC-HR department ah a hunzui-in Zomite haksatna kipuak thei aa,Zogam ah Galkap kumpite in Bawlsiatna tuamtuam hong neihna te uh na kan beh nop leh zong WZC-HR ah ki dong thei den a hihi.

By.WZC-HR
      Co-ordinator
      Pu Thang Khan Thawn
      tktsuante@yahoo.comThis e-mail address is being protected from spambots. You need JavaScript enabled to view it
      wzchumanrights@gmail.comThis e-mail address is being protected from spambots. You need JavaScript enabled to view it
      Ph;47+72600520


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Leitung Buppi Mihingte Mihing Hihna tawh Ngahding kilawm Hamphatnate Pulaak khiatna Description: Rating: 5 Reviewed By: Cinpu Zomi
Scroll to Top