728x90 AdSpace

Hot
Menu
Zon-ol na Donate

Latest News

NUNTAK MANPHAZAW TAWH LAWHCINNA (Meaningful Life Leads To Success) Gelh - T. Sawm Lian .

Lawh cinna lunggulh a  haksatna , buaina , natna , launa , lawhsapna , lunggimna  leh  lung kiat nate in  a  buai sak  mit e   tha  thak  lakna a  suak  theih nading leh Kum 2011 a Munlai, Klaymyo pan a hong nusia Pu Sing Khaw Zam Phawkden nading in hih laibu ka ap hi.







Koh Masak Thu
Kum 2011 a Zolai tawh kisai Seminar ka kahna-ah thu tuamtuam a kigen zawh ciangin a paikhawm mipite laka a ut peuhpeuh thugenna hun hong uh a, tua hunah papi khat hong dingkhia-a, “Taan sawm a zo khin tengin khut laam un” hong ci hi. Seminar a pai mipi a tamzaw tham in khut kilaam a, amah’n, “Taan sawm tunglam teng in laibu khat beek bawl zawh ding hanciam ding hi. Tua hi leh Zolai tawh kigelh laibu tampi hong kibehlap ding hi” ciin thapiakna leh laibu bawlkhiat a kisapna thu tampi hong pulak hi.

Ka ngaihsutna hong sukha mahmah hi. Zolai tawh kigelh laibu a tamloh dan pen ‘a veite adingin vei taak mahmah’ hi. Ka lungsim sungah, ‘khatvei piankhiat sunsun, laibu khat beek bawl ning e,’ ka cih pen hong thalawpsak semsem a, tha thak hong guan hi.

Kum 2012 kum bul lamin leitung mun tuamtuam a om Zomite ciamnuih gen kaikhawmin bu 500 ka bawl demdam hi. Tua ka laibu bawlna pana ka theihkhiat khat pen, ‘Zomite in koikoiah i om zongin, Zolai khantoh nading ahih leh tha le zung, ngaihsutna leh hun le nite siit het loin kipia nuam hi,’ cih ahi hi.

Laibu tuamtuam lakah mihing nuntakna a khoihkha phadiak, tuhun mahmaha zat leh zuihpah theih ding kigelhna laibute pen Lai Siangtho nuai liana ka koih den ahi hi. Tua bangte laka khat, hih laibu ka bawl laitakin ka ngaihsutna-ah, laibu hoih (ka sak) mahmah bawl dinga cing kisaklohna lian mahmah hi. Ahih hangin, a sunga thute ka etet, ka velvel, ka lep tohtoh ciangin, lawhcinna pen keimah mahmah in zong ‘theician taktak lo’ ka hihna leh, ‘mite hong gen(siat) ding dan’ peuh buaipih a na hoih sem ngam lo ding zahin tua ngaihsutna maan lo in ka lungsim nesia man dek tak hi!

Tuhun mihingte in sunglam sangin pualam kithupingaihsutzaw hi. A kidawk pak thei pumpi ci le sate kibuaipih lua mahmah a, a siat ding leh a etlawmloh ding bekbek kilau hi. Tuhun Khristian tampite’ nuntakna zong tua bang mah! Sunglam damna, ngaihsutna maan, leh sunglam pana hong siasak thei ding thute kingaihsun lo hi. Lawhcinna pen tua pualam hoihna leh etlawmna tawh kingah thei hi lo a, sunglam pana lawpna, sepnopna lungsim, cihtakna, sepkhopna, muhkholhna leh geelna kician tak tawh kalsuanna-ah omzaw hi.

Pualam bek kingaihsun ahih manin lungsim ngaihsutna maan kinei thei lo a, na thak, vai thak, ngaihsutna thak kivaihawm thei lo hi. Tua in nuntak hun sung tomcik pen launa, lunggimna leh lungkiatna tawh hong zangsak thei hi. Sunglam damna lo tawh nasep khatpeuh sem ngam dingin hangsanna om lo a, nasep khatpeuh lawhcin theih taktak loin, a manpha nuntakna mi tungah bangmah kilakkhia thei lo hi.

Na hoih mahmah zong sem ngam dingin hangsanna om lo ahih manin, tua na hoih ii hoihna leh manphatna lam sangin a haksatna lam bekbek kingaihsun a, sep taktak ding kilau hi. Tua manin mite muhdah leh pampaihin kiom-in, tua-in hong lunggimsak thei hi. Tua ‘launa’ hangin bangmah kisem taktak ngam lo a, sep sunsunte zong lau kawm pipi-in kisem ahih manin ‘kilawhsam’ zel hi. Tua lawhsapna hangin ‘lunggimna’ hong om a, tuate in mihingte kammal laka a zakdahhuaipen laka khat ahi ‘lungkiatna’ a piansak ciangin kizang khial thei ahih manin lauhuai mahmah hi. Thugelhpa khat in, ‘Lungkiatna pen kigui-awkna khauhual tawh kinai mahmah ahih manin lauhuai hi’ ci hi.

Lawhcinna pen amah in tungtawm lo hi. Sepgimna leh cihtakna bekbek panin zong kingah thei lo hi. Tua ahih manin hih laibu sungah lawhcin nadingin - ngaihsutna maan a kisapna, ngaihsutna maan lo hoihlohna, launa, lawhsapna, lungkiatna, lunggimna, leh a zawh ding dan, lawhcin nadingin muhkholhna hoih tak nei a, tua mun tung dingin geelkholhna hoih leh, haksatna leh buaina, hong buaisak thei dingte lak pan kidop a kisapna, hun manphatna leh zatsiam a kisapna, midang tawh kizopna hoih neih pen lawhcinna ahihna, kizopna hoih neih nadinga thugen manphatna, thalawpna pen mihing lawhcinna khat ahihna thu, makai dinmun, makai hoih hih nading, makai tawh kisai thu tuamtuam, leh thu dang tampi kigelh hi. A thulu tuamtuama a kikhen hangin a gennop pen lawhcin nading thu vive hi a, tua manin a nambat kigual to suak hi.

Lawhcinna pen a neu a lian cih om lo a, lawhcin a sawm mite’ lawhcin sawmna a tangtunna pen ‘lawhcinna thupi’ ahi hi. Lai siam lo khat pen gan khawi, huan bawl, sumbawl adg.ah lawhcing mahmah thei a, lai simna lama lawhcing mahmah khat pen lo kho dingin zattak het lo thei hi. Mi te’n lawhcing dinga hong deihna zong thupi mahmah napi’n, ei’ lawhcin sawmna leh lunglutna mah thupizaw a, hong buaisak thei ding thu panin bil hepkhiat zong a kisap hun om hi.

Lawhcinna thu i gen ciangin nuntak manphatna tawh kigenkhawm hi. Lawhcinna pen midangte ading siatna a tun hi lo a, midangte adingin zong a manpha ahih theih nading pen i gensawm ahi hi. Tua ahih manin, lawhcin i sawmna zong hoih taka ngaihsut ding ahi hi. ‘Rat Race’ kici, maan lo taka kitaitehna, dik lo taka lawhcin sawmna pen i gensawm hi lo hi.

Hih laibu pen laigelhsiam ka sakte laka khat ahi Vanneihtluanga in Mikang laibu khat a tei, tampi a behlap khit ciang laibu-a a bawl pansana kibawl ahi hi. Tua laibu pen teikik ziau leng zong (mi te’n hoih a sa kei zongin) laibu manpha mahmah ding a ka ngaihsut hi a, ahih hangin a thu pawlkhat pen Zomite nuntakzia tawh a kituak lian lo leh, gelh dinga kisam ka sak luatloh honkhat om ahih manin, tampi paai-in, kisam ka sak tampi mah ka behlap zawsop hi. Tua bang ahih manin, a laibu pen ka tei ka cih a, ama min ka gelh dingin lah kisuanglah-in, kisuanlah pipi-in kei min ka koih a, laibu min zong hoih ka sak danin ka koih mai hi. Mi lawhcingte’ thugelh kaikhawmin, kei’ sep zawhlohpi a gen ka suak a, mi tuibuaksa khat a gah a lo tawh ka kibang hi. Ahih hangin hih laibu a piankhiatna pen kei adingin lawhcinna khat in ka tuat veve hi.

Hih laibu hong piankhiat theih nadinga hun hoih hong ngahsak Pasian tung ka lungdam hi. Tua banah laibu bawl nading sum ka haksatna thei a sum tul sawmkhat tak tawh hong huh Vapar khua-a om Pa Z. L Thangte’ innkuan tungah ka lungdam mahmah hi. Pa Z. L Thang pen laibu bawl ding hong thalawppih mahmahte laka khat hi a, laibu bawl ding vai zong ka tam genpihpen khat ahi hi. Shillong pan M.A a zawh khit ciang nasep kician nei loin kum sauvei pi a om, tukum a high school sia ngah thak pan ahih manin sum tawh hong huh dingin zong ka lamen ngam ngei kei hi!

Ahih hangin ama ngaihsutna leh kei’ ngaihsutna kilehngat hi.

Tua banga laibu bawl ding ka ngaihsutna thu a theih ciangin nidang pek pana a lunggulhna omsa, lawhcinna khatpeuh a neih hun ciang Pasian tungah lungdamkohna leh minam ading phattuamna nasep a sawmna leh, kum 2011 a Munlai, Kalaymyo pana hong nusia a mintappa (ama min a phuakpa) Pu Sing Khaw Zam’ phawkden nadingin a vaihawmna ‘thupha’ kei’ tungah hong tung ahih manin hampha ka kisa hi. Hi zaha a kipia khia nuam ngiat ‘pa’ ka neih hampha ka kisa a, ama liaha om a zi (Nu B. Lam Niang) thusiamna zong thupi mahmah hi.

Zomite lakah mihau tampi om a, mipil tampi omin, thu thei tampi om a, thu nei zong tampi om hi. Tua bang kawmkalah kei’ tung panin lamet kikna nei het lo a hih banga hong huh mawk uh pen lamdang ka sa a, thupi sa-in, kei’ piak theihloh a pia thei Pasian in a manpha nasep a sem zo zel dingin thupha tampi a piak ding ka deihsak hi.

Tua bang lamet kikna om het lo a hong piak manin lungdamna lian lua mahmah ahih manin (laibu bawl dangte cihdan ahi kei zongin) ‘publisher’ ciin ka koih hi.

Tua banah hong kithuahpih, hong huh, hong hanthawn-a tha hong pia lawm le gualte tungah nakpi’n lungdam hi. A diakin lungdampihna hong gelhsak ding a ka deih tuam ZOLUS Journal Chief Editor - Prof. Dr. C. Thang Za Tuan, Yangon leh Mikang kama a laibu min hong phuaksak Pu Lian (Dr. Neng Ngaih Lian) tungah zong lungdam ka ko hi.

Hih laibu ka bawl cil pan kipan a simnop ding leh a zaknopna lam bekbek sangin, a manphat nading ka lungsimah lianzaw a, tua-in hong thalawpsak mahmah hi. Tua ahih manin, a sim mimal kimin hih laibu tungtawnin meetna khat beek a neih ding pen ka deih, ka lunggulh, leh ka ki-apna ahi hi.

T. Sawm Lian

Lungdampihna

Tulai takin leitungah lawhcinna nam tuamtuam om hi. Thukizakna vanzat hoih nonote ahi Computer, Smartphone, iPad, iPod leh social media ahi email, facebook, YouTube, Ustream cihbangte a thakthak nisim phialin piangin kizang ziahziah hi. Hauhna leh neihna dan zong kilumlet vekin a hau thei hong tam mahmah hi. Pilsinna-ah zong a nam tuamtuamin hong omin i lung hong buaisakin i maban ding bangci zop ding cih mangbang liangin lungngaih haksatna a tam kawmkalah pusuah theih nading leh lawhcin nadingin hih “Nuntak Manphazaw Tawh Lawhcinna (Meaningful Life Leads To Success)” cih lamlak laibu khat T. Sawm Lian in hong bawlkhiat theih zenzen manin Lungdampihna Lai at ding ka kilawp mahmah hi. Kei hong sawlkhak kekkek ka angtang sawnsawn hi. A laibu geelna ka simsim a, hoih ka sakna tampi a om sungah a hang a tom thei penin hih anuaia bangin lungdampihna thu kong pulak nuam hi
1. A diakdiakin khangthakte in Lawhcin nading lunggulhin a neih ciat theih nading un a tangtungsak thute theicianin zuiin, a buaisak theite hemkhia, palsat, kantanin thathak a lak zawh nading uh deihsakna lianpi tawh T. Sawm Lian in gelhin a ap ngiat laibu hi.
2. Tua a apna dung zui-in lawhcin nading a kisam lianteng kalsuanna khen kua in khen lian in, a telnop leh zuihtheih zattheih pah lian dingin genciatna a thulu nono 43 in pulak behin gentelna nei hi.
3. A thu pulakna ah lunglut leh telnop sawn nadingin mi thupite tuahkhak thute tawh pholak ahihman sim thanop huaise in kiciamteh thei pah lianlian hi.
4. Lawhcinna maan in ngaihsutna maan, sepna maan, muhkholhna neihna, tupna leh ngimna kician neihna, hunzat siamna, midangte tawh kipawlkhop siamna, thugen siamna, thalawpna leh makaih siamnate ahi hi cih pulakin sepzia ding tawh thuah pahpah hi.
5. Lawhcinna hong nawngkaisak leh hong puksak thute a pulak banah, tuate nelhsiahzawh nading zong lampi hong lak hi.
6. Lawhcinna in a pualam pan mite hong muhna sangin, ei sunglam pan-a, lawpna leh lungkimna tawh kalsuan thalawpna hizaw gige cih tel gen hi.
7. Lawhsapna in lungkiat baihna, lauthawngna, lunggimna leh ngaihsut siamlohnate hi a, tuate bangci in hong piang thei cih leh bangdanin palsat zawh ding cih zong gencian hi.
8. Mikang pau tawh ki-at laibu khat, Vanneihtluanga ii teikhiat pan a teikhiatsawn hi-in, Zomite omzia leh nuntakzia tawh kituak dingin a behlap tohtoh hi ci-in lungsim siangtho takin hong pulakna zong ama diktatna ahihman ka pakta semsem hi.
9. Hih bangin nuntakna lamlak dingin a ki-at laibu minthang a at-te ahi, Napoleon Hill, Dale Carnegie, Dr. Norman Vincent Peale, Juan Enriquez, Howard Gardner, Denis Waitley, Steve Coley cih bang tampite at zah-in telnop hi.
10. Ei Zomite Lai leh Pau tawh a kician sinsen a ki-at laibu tawm mahmah kawmkalah hih in khangthakte adingin gamh lianpi (heritage) khat a nutsiat ahihman ka pakta ngiat hi.
Hih laibu in, tuhunah zat leh zuihpah lian theih ding-a kigelh sinsen ahih manin a simkha khempeuh te’n meetlawh ding uh hi. A nuntakna uah zong thathak lakna, kibawlphatna leh lawhcinna tungsak takpi ding hi, ci-in ka up ngiat manin hih laibu hong bawlkhiat theih ka pakta a, ka lungdampih gige hi
Prof. C.Thang Za Tuan, Ph.D.


1. A Manpha Lawhcinna
Lawhcinna pen a lawhcingsakte tawh kizui-in kibang kim lo hi. Pawlkhat adingin cidam taka om pen lawhcinna ahih lai-in, neih le lam a hauh kei leh a lawhcing lo-a a kingaihsun mi om hi. Mi pawlkhat in minphatna pen lawhcin a sawmna uh ahih lai-in, mi pawlkhat pen innkuan nuam bawl a sawm cinten hi thei uh hi. Sum a hauhloh hangin lawhcing lo dana na ngaihsut mi khat pen innkuan nuam a piansakna hanga lawhcing a kisa mahmah om thei hi. Tua hi a, lawhcin i sawmna leh i lawhcin nopna pen kibang lo cihna hi. A mihing tawh kizuiin kilamdang thei cihna hi. Tua ahih manin lawhcinna pen i tupna, i sawmna khatpeuh sepzawhna hi, ci leng kikhial lua lo ding hi.

Lawhcinna pen nasep khatpeuh a beina hi lo a, nasep khat pan nasepna dang khat a kahtoh nading ahi hi. Lawhcinna-ah lungkimna om a, lungnopna leh thalawpna zong om ahih manin manpha mahmah hi.

Tai kidemna muna khatnate in a kidempih mite sangin a zah 4/5 in hatzaw tuan lo uh hi. A hatna uh pen neucik, tomcik bek zong hi thei a, khepi cia bek a kigamlatna zong hi thei hi. Tua mah bangin, mi lawhcingte pen midangte sangin nak takpi’n a pilzaw leh a siamzaw hi tuan lo uh hi. Mite a lungkiatna mun leh lawhsapna-ah zong kuhkal taka a sem tantante ahi hi.

Lawhcinna pen bangbang ahi zongin, baih taka neih theih lawhcinna pen manpha taktak lo hi. Lawhcinna thupi leh leitung tangthu a mi lawhcing tamzaw pen baih taka lawhcing hi loin, haksatna leh gensiatna, thuakna tampi kawmkal pana a khuasuak, mi sep nop nawnloh zawh, mi lungkiat zawh cianga zong a sem tantante ahi uh hi.

‘Lawhcing dinga sep’ leh ‘lawhsam lo dinga sep’ pen kibang het lo hi. Lawhcin sawma sepna in thalawpna leh kipiakzawhna tonpih a, lawhsam lo dinga sepna-ah hangsanna taktak om thei lo hi. Lawhsap laulohna bek tawh sep sangin lawhcing lo thei lo dinga sepna pen manpha zaw hi. Ahih hangin lawhsapna a om khak zenzen leh zong thathak lak nading a zat siam kisam hi. Italian Renaissance hun laia mi thupi Michaelangelo in, “Ka siamna nei dingin bangci bangin sem ka hiam cih mite in thei leh, tu-a ka dinmuna ka tun theihna pen lamdang sa lo ding uh hi” ci hi.

Leitung nuntakna pen haksatna leh buaina bek tawh kidim lo a, nopsakna leh lungnopna hun zong tampi om hi. Khuasuak (survive) dingin haksatna tampi phutsuak kisam a, tua bang lo-a baih taka lawhcin sawmna pen lungsim maan lo leh hoih lo ahi hi. Pengpelep nuntakzia pan sin ding thupi mahmah om hi.

Biology sangnaupangte in pengpelep piankhiatdan sin uh hi. A tui (cocoon) sung panin hong suakkhia ding ahihna leh lungduai taka ngak dingin siapa in naupangte hilh hi.
A tui sung pana pengpelep hong piangkhia ding pen ngaklah takin naupangte in en uh hi. Tua banga a et laitak un haksa sapipi leh thasan in pengpelep piang dingin hong kithawi hi. A siapa un khoih lo-a en ding bekin a hilh hangin, sangnaupang khat in tua banga haksa sa mahmah a pengpelep suak ding pen hehpihhuai sa lua ahih manin va panpih a, baih taka hong piankhiat theih nadingin cocoon pen va honsak hi. Ahih hangin pengpelep pen si mawk hi!

Siapa hong kileh kikin, pengpelep si a muh ciangin theisiam pah hi. A hatna khempeuh tawh haksa sapipi-a piangkhia dingin a kibawl ahih manin panpih kisam lo a, tua banga haksa taka a piankhiatna pen thahatna a neih nadinga kisam ahi hi. Tua pen a khuasuak theih nadinga leitung ngeina ahi hi.

Tua mah bang ahi hi. Leitung nuntakna sungah haksatna leh lawhsapna khawng pen mihingte hoih nading leh thahatzawk sem nadinga kikoih ahi hi. Tua hi lo-a baih taka nuntak khuasuak sawmna pen lungkiatna leh nuntak manpha lo taka zat theihna ahi hi.
Na lawhcin sawmna tektekah lawhcing khin lo ding hi teh. Tua hangin thanem leh lungkia-in om kei in. Alexander Graham Bell in a zi bil/beng hoih lo a zat ding van bawl a sawmna lamah telephone, kiho theih nading mukhia a, a tupna takah a lawhcinloh hangin, ama ading leh mi tampite phattuam nading bawlkhia a, tuhun ciangin tua a muhkhiatna tungtawnin leitung mi a tamzaw tham in meetna leh noptuamna tampi ngah hi. Lawhcin na sawmna hanga na sepna mun san takah na lawhcinloh hangin, a manpha dang khatah lawhcing thei veve hi teh.

Hih munah lawhcinna i gen ding pen a neu leh a lian cih om lo a, a meetna pen sum bek tawh kiteh lo a, nasep (service) i manphatna (value) pen a sepkhiat (output) lamah kiteh zaw hi. Muhkholhna (vision) leh tupna mun (goal) kician nei a, tua mun tun theih nadingin geelna hoih neih theih nading leh, tua lawhcin nading a nawngkaisak thei thu tuamtuam - launa, lungkiatna, lunggimna leh haksatna tuamtuam zawh theih nading leh, lawhcin nadinga kisam tuamtuamte pen i gen sawm ahi hi. Maan lo taka gualzawhna lam hi loin, manpha taka lawhcinna lam pen i gensawm ahihna mangngilh kei ni.

A Tungsakte

Lawhcinna pen amah in tungtawm lo hi. Misiamte in lawhcinna omzia kancian uh a, mi lawhcing tuamtuamte’ tangthu leh nuntakziate kician takin sittelin, tua pan a muhkhiat uh pen - lawhcinna pen i ngaihsutdan (attitude) maan leh maanloh-ah nakpi’n kinga hi, cih ahi hi. Tua ahih manin, na lawhsap zelzelna hang pen na muhdan leh ngaihsutna a maan lianlohna hang ahi thei ding hiam? I ngaihsutzia tawh kituakin kilawhcingin kilawhsam thei hi. Hong lawhcingsak thei ding thu pawlkhat gen ni.

Na hun manpha lai pen ngaihsun den in
Na ngaihsutna a san leh a niam tawh kizuiin na nuntak sangin niam hi. Lawhcinna pen na kiang naicikah om a, mi lawhcingte leh lawhsamte kikal pen tong tan bek hi, kici hi! Mi lawhcingte nuntakna a vaihawm lianpen in, ‘a gamtat hoih laitak ua a ngaihsutna uh’ ahi hi. Bang hun bang hunin a lungnoppen hun, a gamtat hoih lai pen hun, thaman thupi a san lai hun pen a ngaihsutna i teenna mun hi a, a nuntakna uah tuate in vaihawmin, makai dingin zang siam uh hi. Haksatna, buaina, lungkhamnate zong thuak veve uh hi. Ahih hangin, tua bang nuntakna niam leh hoih lo in a ngaihsutna uah vaihawm ngei lo hi. A lawhsam mite in a nuntakna uah a lawhsap lai hun uh kitehnain zang uh hi.

Hoih hi-a na theih bangin nungta in
Na kiim na kiangah mi tampi om a, na nuntakna hong makaih, na dinmun hong genciansak, a deihdan uh leh na nuntakzia a kituak bangzah hiam om ding hi. Ahih hangin, na nuntakzia pen amau a hi loin, nangma a ahi hi. Na nuntakzia-ah na kianga hong gengen khat in bangmah mawhpuakna nei lo a, a mawhpua taktak pen nangmah na hi hi. Tua manin, midangte in, ‘Tua bangin nungta lecin hoih ding hi’ hong cih bang a nuntak sangin nangmah in, ‘Tua bangin nungta leng hoihzaw ding hi’ na cih banga nuntak pen hoihzaw hi.

Lawhcinna pen i lungsim pan hi
Mi tamzawte in theihkhialh lianpi kinei a, lawhcinna pen i neih nailoh, sum tampi man leh lamdangpi taka hong tung hi-in kithei hi. Lawhcinna pen a man tam kha thei hi, ahih hangin, sum le pai tawh lei theih hi lo a, ngaihsutna leh lungsim puakzia tawh kisai hizaw hi.

Ei le ei kingaihsut tawmna-in i lungsim leh pumpi-ah na lianpi-in sem hi. Na lianpi sem thei dinga i kingaihsut leh kisem thei takpi a, bangmah sem taak lo hi a i kitheih leh tua bang lianin kinungta hi.

USA President 42-na Bill Clinton pen a nu in a paai lai, kha thum mi ahih in a pa in car accident hangin sihsan hi. Kum li (4) mi ahih in a nu in tu-a a pa Mr. Roy Clinton tenpih hi. Tu-a a pa thak min la-in Bill Clinton ciin a min hong kiphuak hi. High School a kah lai-in ni khat Americate vaihawmna innpi, White House ah tua hunlaia USA President John F. Kennedy tawh kinohset kha uh hi. Kennedy pen thupi sa lua mahmah ahih manin tua bang mi hih a sawmna in a nuntakna nakpi’n bawl hoih hi. Tua hun pan kipan US President hih ding lunggulhna nei a, a nung ciangin US President hi takpi mawk hi.

Hih lai-ah i ngaihsut ding thupi mahmah khat om a, i tupna pen tangtung kim thei lo, i sawmna bang tektekin tangtung thei lo, cih ahi hi. Mi khempeuh in i omna gam President hih sawm tek mawk leng a piang thei lo ding thu hi a, tua manin i tupna leh lawhcin i sawmna zong hoih taka ngaihsut kisam hi.

Ngaihsutna maan leh hoih i neihna hang leltak tawh lawhcing ding cihna hi tuan lo leuleu hi. Tua ngaihsutna hoihin na nuntakna pen makaih hoih kha ding a, na deih peuhpeuh lawhcing ding cihna hi tuan lo hi. Ahi zong, hih thu a langlamin koih leng maan mahmah hi. Na ngaihsutna a maan kei leh na lawhcing ngei kei ding hi!

Na nu leh na pa zahtak in
Lai Siangtho sung i et ciangin nu leh pate thumanlohna pen samsiatna leh sihna ahihna thu kimu hi. Absalom in a pa David thu a manlohna hangin khansih a, siampi Eli tate in a pa leh Pasian thu a manlohna uh hangin amau bek zong hi lo a innkuanpihte nadongin mulkimhuai takin sihna thuakin, Samson in a nu leh pa thumang loin Filistia nungak kiang nop a sak luatna hangin sihna thuak hi.

Tuate tawh a kilehngat lian, nu leh pa thumang Timoti, D. L Moody, Joseph, Mahatma Gandhi leh midang tampi pen a nasepna uah lawhcingin, mite phawkden leh mithupi a leitung tangthu sunga kiciamteh den dingte ahi uh hi.

3. Ngaihsutna Maan

Lungsim ngaihsutna maan pen kumpi David in zong a kisapna leh manphatna theician mahmah hi ding hi, “Pasian aw, keima sungah lungsim siangtho hong piangsak inla, a thak a maan ngaihsutna ka sungah hong guan in” (Late 51:10) ci hi.

Robert Hastings in, “Panmun hoihna leh omna munin lungnopna hong tun lo hi. Nangma lungsim tawng pana lungnopna na deih leh deihlohna zaw-in lungnopna hong tun hi. Lungnopna na deih taktak leh deih taktakloh nangmah ki-encian masa inla, na deihna na theihcet zawh ciangin lungnopna pen nang tungah hong tung ding hi” ciin gen hi. Lungnopna pen tuabang leltak tawh ngah theih ahi ding hiam?

Lungnopna a pianpih tawh a kibang mi tampi om a, tua mah bangin lungkhamna tawh a piangkhawm hi a kithei mi bangzah hiam om veve hi. Bang ciang hiamah maan kha ding hi. Ahih hangin, i pianzia pen i kum tawh kituakin kikhek zel hi. Tua ahih manin, hih munah sin ding thupi mahmah khat om a, i pianzia-ah - gitlohna, sinsiatna, leh khankhiatna hoih lo pana khangkhia i hi zongin, ngaihsutna maan leh hoih nei dingin ei le ei kibawltawm theih ahi hi, cih thu hi.

David in Goliath a zawhna tawh kisai hih bang lamin na ngaihsun ngei hiam? Goliath pen mi ngeina tung lam, gal hang leh gal siam, kuama zawh theihloh hi-a mite theih ahi hi. Tua bang mi pen David in a muh ciangin, “Bang hangin huapa galkhat panin en leltak na hi uh hiam?” ciin dong a, a ute in, “Kote bangin zawh theihloh ding a lian ahihna mu lo na hi hiam?” ciin dawng uh hi. David in, “Zawh theihloh dinga lian hi loin, suangtang tawh khialh theihloh dinga lian hizaw lo hiam?” ci hi. Tua panin, muh kibang tektek, a etdan leh ngaihsutdan tawh kituakin a siatna lam leh a hoihna lam kimu thei cih kician mahmah hi. Ngaihsutna maan leh hoih, nuntak nuam leh manpha neih theih nading lampi om hi.

Na hoih leh lawhcing ngaihsunden in
US a om, dollar mak tampi a semkhia industrialist minthang Andrew Carnegie in, “Lawhcing dinga ama ngaihsutna a ukcip theite in, a hun hoih neih khempeuh pen lawhcin theih nadingin ukcip thei khin hi” ci hi. A lawhcing thei dinga kingaihsutna-in lawhcing hi-a kitheihna piangsak a, lawhcinna lampi a zui pah cihna hi.
Lawhcinna pen lo khote nuntakzia tawh genteh baih mahmah hi. Lawhcinna ci (seeds) pen tuhin, khutzepin ngak leltak leng bangmahpi i ngahkik kei ding hi. Lawhcinna ci i tuh pen tui buakin, lei hoih tawh vaak kul a, puahin a hihsia theite lak panin i kep kul hi. Tuate i khawlsan hunhunin kiak leh lopa in deepin, i taimangsan lailai leh lawhsapna kiakin deep mang ding hi.
Lawhcin nading leh a hoih lama lametna tawh na ngaihsutna khangsak in. Filippi 4:8 sungah mihing nuntak nading a gen, ‘.... a hoih leh a phattaak thute tawh na lungsim uh na kidimsak un. Tuate in : A maan, a dik, a tang, a siangtho, a deihhuai, leh a pahtakhuai thute ahi hi’ a cih pen maan mahmah hi.

A phattuam ding nuntak manpha kilangkhiasak in
Tua banga a hoih lam tawh na ngaihsutna na uk theih ciangin, mite adingin ngaihsutna leh nasep hoih neih sawm in. Nang le nang na kimuanlahna hong kiam semsem ding hi. Mah le mah kimuanna (self confidence) in nuntak khiatlahna, laigil nuntak manpha taka zat nopna hong neisak ding hi. Tua bang nuntakna na neih ciangin mite in na kianga om nuamsa ding uh hi. Lamdang mahmah, a sia lam a ngaihsunden mi kiang sangin, a hoih lam a ngaihsun theite kiangah mi te’n om nuamsazaw uh hi! Tua bang ngaihsutna maan, phatuam ding, leh nuntak manpha na neih leh, na kianga om peuhpeuhin a hoih lam ngaihsutna tawh thu hong kuppih pah ding uh hi.

Ngaihsutna neu lak panin kidawm in
Ngaihsutna leh ngaihsutdan neu, a kihong lo, midangte kitatloh nadinga a kikhakcip mite lawhcing mawh mahmah uh hi. Sum le pai, neih le lam a hauh uh hangin leitung manphatna leh nopna ciam kha taktak lo uh hi. Tua hangin tua bang mite lak panin kidawm in. Ngaihsutna neu lua-in a hoih lo a sep theih dan en leng :
Nidang lai China gamah niangtui hai kitapsakna hangin kumpi nih kalah kidona piang hi, kici hi. Kum 1325 a The Battle of Zappolino kici Italy gama khuapi nih Bologna and Modena kidona pen tuikhuk a tui khaikhiatna kituhna hang hi leltak a, Europe gam mi in taimangsan khin dektak hi.

Eite in kidona ding liang thu hoih lo i bawl kei ding a, ahih hangin a thuak pen kuamah dang hi loin eimah mahmah i hi hi. Lawhsapna a tunte lakah zong kihel pelmawh ding hi.

Na thak ngaihsun zelzel in
A hoih lama ngaihsutna a zang mite in ngaihsutna thak leh thupi deihin zongden uh hi. Tua in lawhcin theih nadinga amau sunga kiphumsim ‘hatna’ pen thaksuaksak zel hi.

Mi pawlkhat in ngaihsutna thak pen mi pil tungtuangte bekin a neih dingin ngaihsun uh hi. Tua bang hi lo a, a hoih lam a ngaihsun, lungsim a kihong mahmah mi khatpeuh in tua bang nuntakzia tawh, a muh nate tung panin na thak muhkhiat ding pen a nuntakzia uah ngeinaseh (habits) uh hi. Midang in gitlohna leh siatna a muhna munah tua bang mite in a bawl hoih ding dan ngaihsutna nei thei uh hi. ‘Leitung a mi thupi Thomas Edison in a muhkhiat na a tamzawte pen, a nasep/bawl khialh a etkikna/a senhoihna pana a muhkhiat hi’ kici hi.

‘Hoih hi’ na cih mi bangin nungta sin in
Mi pawlkhat in na khatpeuh maan taka a sep phot kei uh leh ngaihsutna maan nei thei lo danin kituat uh hi. Hih pen ngaihsutna maan lo ahi hi. Maan taka sem thei dingin kingaihsun masa phot lecin hong maan lel ding hi! Ngaihsutna maan in na khat peuhpeuh etdan hoih leh maan hong neisak hi. Tua bang sep theih nadingin mi lawhcing leh na hoih semsa hi-a na theih, ‘mi hoih hi’ ci-a na theih khat ‘hi’ sin phot in.

Piakkhiatna in man nei hi
Africa gama missionary Albert Schweitzer in, “Midangte na sepsak a, i itna lahkhiat leh panpih nopna lungsim pen mihing nuntakna a kem thupipen ahi hi” ci hi. Midangte adinga nasep leh kipiakkhiat nopna lungsim pen manpha mahmah hi.

General Mills board chairman khat ahi Harry Bullis in a company salesmante kiangah, “Na van zuak sawm uh pen mangngilh kei unla, midangte adinga na hoih na sepsak ding lam uh thupingaihsutzaw un” ciin kam vaikhak hi.

Sum na bawl ciangin a meet bekbek lametna sangin, na van zuak zanga midang na panpih nopna lianzaw hen, tua hi leh na lawhsam ngei kei ding hi. ‘Tuni in bangzah kikhawng ka hiam?’ cih sangin, ‘Tuni ka sai pana ‘service’ ka piakkhiat zangin mi bangzah panpih ka hiam?’ cih kidong zaw lecin na nuntakna in sum bek simsiam loin, midangte panpih manphatna zong sim siam ding hi.

4. Ngaihsutna Maan Tawh Mi Maingat

Kum 1900 kiim a United States a mi hau minthang Andrew Carnegie in tua hun laiin mihau (millionaire) bekbek 43 tak nasem dingin zang thei hi. Tua banga a zat theihna hang pen bang dang hi loin, a maia om mi pen maingat siamin, lungkimsak thei a, nasep khoppih theih ding zah dongin kinaina neihpih hi. Tua banga mite a zat siamna hang a dot uh ciangin, “Mite maingat (dealing with people) pen suangmanpha khuk tawh tawh kibang hi. Khutpi cia suangmanpha tokhia dingin lei tampi i tawh kul a, lei kizong lo a, suangmanpha kizong ahih manin lei tampi i tawhkhiat hangin i lawhcin maloh kisem tantan hi” ci hi. Tua ahih manin lawhcin nadingin anuaiate bangin mite maingat siam kisam mahmah hi.

Leitunga mi thupipen bangin mi maingat in
I teenna leitung nutakzia pen manlang mahmah ta a, kihopih ziau-in, them cik bek kihilhin, kimuh khit phetin i kimangngilh pah ziau uh hi. I sum hong batsakte bek a kiphawkden tawh kibang! I maia omte pen mihing banga maingat loin, sum bawlna set bangin kimaingat kha thei hi.

Mihing khatpeuh na maia om pen leitunga mi khempeuh laka a thupipen bangin hopih/kholhpih inla, nangmah banga nuntakna nei ahih lam mangngilh loin zahtak in. TV na limet luat leh mi tawh na kikholh ciangin deih hunhuna channel laih ziauziau a, ut hunhun ciang a on leh off theih bangin na ngaihsun kha ding hi. Tua bangin Pasian bawlsa mihingte kholhpih ngei kei in. Na lungsim takpi tawh na mihingpih hopih inla, a hoih leh kilawm banah na mai khuhna phelkhiain, na nuntakzia pholhkhia in. Tua hi leh na kholhpihte na phawkden ding a, amau in zong hong mangngilh ngei lo ding hi. Tua in na nuntakna-ah pahtawina laipi thupi mahmah sanga manphazaw leh hoihzaw, gah limci gahkhia ding hi.

Na kisap leh a zahtakhuai mahmah bangin mi maingat in
Mi khempeuh in mite adingin manpha hih i ut uh a, mite kisap hih ki-ut-in, koi hiam khat beekah mite zahtak kiut ciat hi. Tua bang manphatna na muhkhiatsak theih naak leh, nangma ading bek hi loin ama adingin zong nang pen a manpha mahmah na suak ding hi. “Mah le mah kipanpihna kihel loin midang panpih theihloh hi” ci-in kum zalom 19 pekin philosopher Ralph Waldo Emerson in gen khin hi.

Midang thupisimna in manphatna tampi nei hi. Mi na thupisim leh tua mi in zong nang hong thupisim pah ding hi. ‘Mi na maingat bang lianin mi te’n hong maingat ding uh hi’ cih thumanpha hong tangtung ding hi.

Na maia om mi pen a hoihna penpen muhsak in
I gensawm pen nuntakna maan leh hoih, nuntak nuam leh manpha neih theih nading ahih lam mangngilh kei ni. Maan (photo) i kizaih ciangin (eimah tektekah) i hoih deuh hun om a, i hoihloh deuh hun zong omin, hoihzawk ding lametna tawh i nuihna hanga i hoihzawk tuanloh hun zong om hi. Mi khempeuh in i melpuakzia bekah zong hoih tuamna i neih ciat bangin, hoihlohna zong kinei ciat hi.

Innkuan, lawmta, khuapih-tuipih deihhuai pipi i neihte pen Pasian hong piak ahi hi. Mi khatpeuh, a hoihna san tak uh en lehang, hoih mahmahna nei ciat uh a, tua tak pen muhkhiatsak siam leng, i kiangah a om uh ciangin hoihin, manpha mahmah ding uh hi.

Na cidamlohna thu gengen kei in
Genloh theihloh ahih kei leh na cidamlohna thu gengen kei in. Na kianga omte na cidamlohna thu na genpihden leh, sihna limkuamah a tonpihden tawh a kibang na hi hi! Damlohna thu pen zak nuam lo hi. Hong hehpih kha thei uh hi. Ahi zongin tua bang hun ciangin khantoh nading thu genkhop nuam nawn lo a, ngaihsutna nuam lo pah thei hi. Lawm hoih leh innkuan sunga teenkhoppihte kiangah ahih kei buang leh cidamlohna thu gengen kei in. Lungkiatna piangsak thei hi.

5. Ngaihsutna Maan Manphatna

Ngaihsutdan a maan leh nuntakzia kilamdang khin thei hi. Sep ding khatpeuh a lawhcin theih nadinga kingakna poimawh mahmah pen ‘ngaihsutkholhdan’ hi mawk hi. Ngaihsutna maan neih theih nading pawlkhat i genkhinta hi. Tua banah ngaihsutna maan in mihing nuntakna-ah a hoih lamin na tampi piangsak thei a, manphatna tampi nei hi.

Toronto khuapi ah unau tangval nih om hi. Unau laigui zom ahih uh hangin a uzaw pen guihtheih-khamtheih tawh a kidiah tawntung hi a, a nauzaw pen tangval hoih leh lawhcing mahmah ahi hi. Khatpa pen genthei taka zu khama a om maimai lai-in, a sanggampa in limtakin na sem a, sumbawl mi hau mahmah suak hi. Bang hangin tua banga inn khat pan a piangkhawm unaute’ nuntakzia kilamdang thei ahi hiam?

A uzawpa kiangah, “Bang hangin zu lungvei a, genthei takin om na hiam?” ci-a dotna a kidot leh, ama’n “Ka pa hang hi. Ka pa hang bekbek hi. Ka pa pen zu lungvei mah hi a, zu a kham ciangin hong tawngden, hong vua/satden a, tua bang innkuan pana khangkhia ka hih manin bangci banga hoih thei dingin hong lamen na hi uh hiam? Ka khankhiatna mun tawh kituaka nungta ka hi hi” ciin dawng hi.

A nauzawpa kiangah, “Hizahta a na lawhcinna bang hang hiam?” a cih uh leh, ama’n, “Ka pa hang hi. Ka pa hang bekbek hi. Ka naupan lai-in zu lungvei ahih manin zu khamden a, zu a kham simin a nuntak a hoihloh dan leh a nasep hoihloh dan thei ka hih manin tua banga om sawm lo ka hih manin tu-a ka dinmun a tung thei hi’ng” ci hi.

Hih unaute nuntakzia panin lungsim ngaihsutna in mihing nuntakna-ah na a sepdan kimu thei hi. Muh kibang, muhdan kibang hi a, a ngaihsutna uh kibang loin, tua ngaihsutna in amau sunga na a sep dan kibang lo cihna hi.

Ngaihsutna maan lo tawh si taak-a a kingaihsun mi pen kigui-awkin si ziau a, dam taak-a a kingaihsunte in sih theih nading tuamtuam - gilkialna, gentheihna, migi lo khut sung leh na lamdangpi panin zong khuasuak nading ngaihsun uh a, tua dingin semin khuasuak takpi uh hi. Tua manin ngaihsutna maan pen i neih kisam mahmah hi.

Mah le mah kimuanna hi
Na tungah na hoih leh cihtheihna (potential) tampi om a, thei lo thei hi teh! Mi lungsim a thuzawh thei, mi a lungdamsak thei, lungsim hangsan mahmah zong na hi kha ding hi. Ahih hangin, tua bang mi hi-in kithei kha lo thei na hi. Ngaihsutna maan na neih leh tua in mah le mah kimuanna (self confidence) hong neisak ding a, tua-in tua na sungtawng a om hatna leh cihtheihna pen a meet theipen dingin hong pholhkhiatsak thei hi. Sepna khat peuhpeuhah lawhsapna leh sepkhialhna a om ciangin mah le mah kimuanna a om leh, ‘try try again’ cih thupil hangsan takin kizui thei hi. Tua-in lawhcing dingin a sem masa ngam hihna piangsak hi.

Sepkhiat ngamna hi
Lawmte tawh sep ding genkhop hun cianga, ‘Ama’n hong vaihawm hen’ ci-a na min a lawh hun uh a om ngei hiam? Ngaihsutna maan neite in kimuanngamna nei uh a, tua pen mite in muhpihin, amah bek hi loin, midangte zong makaih a, amaute tungah vaihawm a, bul a pan masa dingin muangngam uh hi. Tua bang mite, mite muan bangin omin, mite muan bangin sem thei takpi uh hi.

Mainawtna tawh khantohna hi
A masa lama i gen khempeuh banga mi a nuntak ciangin mainawtin khangto lo thei lo hi. Tua bang nuntakna tawh na maiah hamphatna leh lawhcinna kongkhak tampi na hon zawh ciangin zong hon beh zel ding tampi tak om lai hi-in na thei ding hi. Na nuntakna in tua lampi a lunggulhna hangin a bucingzaw dingin nang-le-nang na kihek-lem thei ding hi.

Lungkiat pahpahlohna hi
Pawlkhatte pen i lungkia baih mahmah hi. A cil panin a lawhsam hi-in kithei-in, i lungsim puakzia maan lo hi. Lungsim puakzia a maan leh, mah le mah kimuanna leh a taka sepkhiat ngamna piang a, tua in cihtakna leh a lungsim kho piangsak hi. Nekzonna leh sumbawlna khat peuhpeuhah khatvei lawhsapna om khin hi. Tua bang hun ciangin mi pawlkhatte a lawhsamin kingaihsunin tawpsan pah uh a, a lungkia pahpah lote in sem kik uh a, lawhcing uh hi. Sep khialh pen a kinei thei mah hi. Ahih hangin mibang lote bekin a sep khialhnasa uah semkhial kikkik uh hi. Sepkhialh i neih a, tua hanga i lawhsap leh tua i sepkhialna pen lungkiat nadinga zang loin, a hoihzaw lampi hong lak danin tuat ding hizaw hi.

Na thak ngaihsutkhiat theihna hi
Na ngaihsutdan a maan kei leh na thak na ngaihsunkhia thei kei ding a, na thak vaihawmin na semkhia thei kei ding hi. Albert Einstein in, “Ngaihsutna lungsim a dam kei leh a hoih ngaihsut khiat theih hi lo hi” ci liang hi. A hoih lamah i ngaihsutna i paisak leh na thak mu-in, pai sin nopna, sepsin nopna, leh a manphatna muhkhiat nopna lungsim tawh na kisem pah thei ding hi.

Makai hih theihna hi
Mi hangsan i cihte, makai hoih i cihte pen a hoih lama ngaihsutna a zang, ngaihsutna maan a neite na hiden uh hi. Lungdam thei uh a, a kiang uah om nuamin, muanngam dingin nungta uh hi. Muhkholna (vision) nei uh a, mi in muangngam pah uh hi. ‘Makai’ cih thumal pen ngaihsun kik dih ve. Leitungah nangmah bek om hi lecin makai hih a kisapna om lo ding hi. Makai cih pen amah bekin om thei lo a, midang tawh kizopna thu ahi hi. Midangte muanngam nuntakna neih nadingin mah le mah kimuanna (self confidence) neih kisam hi.

Napoleon Bonaparte in, “Makai in a kiim a kianga mipite lungsimah lawhcinna leh mah le mah kimuanngamna tuh a, a nasep nop a tangtun theih nadingin a nungzuite sungah cihtheihna/nasep theihna koih masa hi” ci hi.

Lawhcin nopna lungsim piangsak hi
I gen pen ngaihsutna maan manphatna ahih lam phawk gige ni. W.W Ziege in, “Ngaihsutna maan neite’ tupna pen kuama’n lawhsamsak thei lo a, ngaihsutna maan lo neite ahih leh kuamah in a lawhcin nadingin panpih thei lo hi” ci hi. Mi pawlkhatte nisim hun zatdan pen - mi hong gensiatnaah kitat nadinga ei hoihna genna, ei le ei kihehpihna, eima dikna leh ei le ei kikepbit nading genna in kizang bei hi. Tuate pen a kisap hun om mah hi. Tua sangin, lawhcinna lampi tawnin, a lawhcing thei ding bang hiam sep sawmin lungsim ngaihsutna zang le’ng, i buaina thu dang tuamtuamte pen hong veng pah ziau ding hi. Benjamin Franklin in, “Paulap bawl a siamte in siam dang nei khol lo uh hi” ci hi.

Lawhcinna lam gen ding ciangin, mihing pen a gihna (weight), a hih-theihna (ability), a hauhna (wealth) leh a innkuan thupina (family background) pan kiteh thei lo a, a ngaihsutna neu leh liat, toi leh zai thu-ah kingazaw hi. I ngaihsutna ciacia-in kinungta cih theih hi. A kisam lopi a ngaihsutna zaisak lam sin a sawm i hi kei a, a manpha leh lawhcing thei ding ngaihsutna lam pen i gensawm ahi hi. Tua ngaihsutnazia pen hih bangin kigen thei hi : Tuipi-ah puanzak a zang tembaw na hawl a, huih hong nungin, tua huih pen na uk theih hi lo hi. Ahih hangin, huih nundan tawh kituakin, leh zangsiam thei dingin tembaw puanzak na heklem thei hi. Tua bangin, na kiim na kianga na uk theilohte pen manpha taka zangin, na hatna hong suak thei hi. Tua hi lo a, paulap zong a, na ngaihsutna a maan kei leh tuate sanga nang hong siasakzaw ding dang om tuan lo hi. Tua ahih manin :
* Na ngaihsutna in na nuntakna nakpi’n makaih thei ahih lam neu ngaihsut kei in.
* A zungpi pen sung lamah kiphum a, a gah pen a pua lamah kidawkhia hi.
* Thugenna sangin muanhuaina in lungsim zo zaw hi.

A hoih lama ngaihsutna a nei mi na hih hangin lawhcing pelmawh ding cihna hi tuan lo hi. Ahih hangin, tuabang a ngaihsutna a nei mi na hih leh lawhcinna lampi na tawn lo thei kei ding a, lawhcin leh lawhcinloh pen tua lampi a na pai laitaka na nasepna tungah kinga ding hi.

6. Ngaihsutna Maan Lo Hoihlohna

Tu-a na omna muna na omna hang leh, tu-a na dinmun na hihna hang pen na lungsim a luahden ngaihsutna-in nang hong ukdan tawh kituak ahi hi. H. Banks in, “Lawhcin nadingin siamna leh cihtheihna zah mahin lungsim puakzia poimawh hi” ci a, Albert Einstein in, “Ngaihsutna lungsim a dam kei leh a hoih ngaihsut khiat theih hi lo hi” ci hi.

A kim a kiang-a thu hoih lo a ki-uksak mi in na khempeuh a haksa lamin ngaihsun a, tu ding kim lai, a tut khialh ding lau ahih manin tu loin dingden hi. Misi tamzawte pen lupna tungah si cih thei ahih manin lupna tungah ihmu ngam lo mi om thei hi. A haksa lama ngaihsutna zat hoihlohna tampi om hi.

Thukhensatna hoih bawl haksa
Na khempeuh a haksa lam bekbek-a a ngaihsun mi in ngeinaseh/zongsat (habit) in neiin, taikhiatsan haksa sa mahmah hi. Nasep nading mun leh hun hoih hong tun ciangin zong a haksatna lam bekbek ngaihsun a, hun hoih/lem pen haksatna a behlap danin ngaihsun zawsop hi.

Midangte adinga hun lem leh meet theihna pen, a hoih lo leh a haksa lama a ngaihsun mite adingin lawhsapna leh minsiatna a ngahsak ding danin tuatin, lawhcin sawmna leh hih theihna zah a sep sawmna om lo pah hi. Lawhcinna pen bang hi mawk a le? US President minthang Abraham Lincoln in, “Lawhcinna pen thalawpna kiam het lo a lawhsapna pana lawhsapna dang phutsuak ngamna-ah om hi” ci hi.

A hoih lam leh a baih lama a ngaihsun mi in lawhcin theihdan ngaihsun a, lawhcin nading haksatna phutsuak a kisamte kician takin mu thei hi. Tua manin, hun haksa hong tun ciangin hangsan takin maingat ngamin, hun maan takah thu khensatna hoih bawl thei hi. Ngaihsutna maan lo a neite in lawhcin nading kongkhak kikiukiu pen thalawp taka hon sangin, bengngong leh haksatna a tun ding bekbekin ngaihsun uh a, siatna a tun ding leh manphatna nei lo dingin ngaihsun uh hi. Ngaihsutdan maan lo pan kidophuai mahmah hi.

Ngaihsutna hoih lo kilawh theih
Ngaihsutna kibangte in kikholhkhop nuamsa uh hi. Tua banah, na khatpeuh a haksatna lam bekbek a ngaihsun mi in midangte tungah tua bang ngaihsutna hoih lo lawh nuam mahmah hi. Nupa kilem mahmah, kum tampi a kiteng khinsate pen a gamtatzia uh, deihdan, duhdan leh a mel mahmah zong kibatna nei uh hi. Tua bang mahin, mi gi lo mahmah khat in nuntak hoih lo hong lawh thei hi. Tua bang mi kiangah na omden leh, thu hoih sangin thusia na bil in tam zazaw ding a, mi hoih sangin mi gi lo tam theizaw-in, leitung pen tua bang mite gen banga a siacip dana tuatin, na hoih sep ding na lungkia ding hi.

Haksatna theihtel haksa
Inn tung vang neucik zong a haksa lam-a a ngaihsun mi adingin midangte sanga kaamsiazaw dana kingaihsut theih hi. A bawlphat ding zong na val, tawlhuai leh cimtakhuai suak lel hi. Mi pawlkhat te’n nuntakna pen haksatna leh mangbatna bekbek tawh a kidim danin ngaihsunin, thuciin khat, “Na khempeuh pen a kimuhna sangin haksazaw a, a bawlhoih nadingin ngaihsut pakna sangin hun tam beizawin, buaina khempeuh a hun loin hong tungden hi” cih ahi hi. Hih banga a ngaihsun mite in thukhensatna maan bawl thei lo uh hi. Bang hang hiam cih leh, a maan khempeuh neucikin mu uh a, a maan lo leh a hoih lo khempeuh lianpi in mu uh hi. Bawlphat a baih laiin bawlpha pah loin koihkoih uh ahih manin hong lian semsem hi.

Lametna beisak hi
Mai lam hunah lametna nei lo hi-a a kithei mi in thahatna nei lo hi. A sia lam a ngaihsun mi in a upna siasak a, a lametna beisak hi. Tua in tawlnga loin damdamin a lungsim ne sia a, a tawpnaah bangmah sem zo lo leh sem thei lo dingin puksak hi. Sep ding leh tupna (goal) a neih sam hangin, a lawhcin hun cianga lungdam nading leh manphatna sangin, a lampia haksatna leh buaina tuamtuam om dingte thupingaihsutzaw ahih manin, a nasepna-ah lawp lo a, lawhcing dinga lametna neu semsemin, lawhcing lo takpi hi.
Khualaka suangneu sawm lakkhop ding pen a sia lamin ngaihsun leng - suangneu hoih lo tawmkha leng, a tawm dinga ka kunsukna lamah ka kawng heksak kha leng, sawm mu zo kei kha leng.... ci mawk lehang, i lawhsapna pen khualaka suangneu sawm om leh omloh lam hi lo ding a, eima ngaihsutna lamah hizaw hi.

Mikangte in, “Possibility or impossibility does not depend on the size of your goal, but, its depends on the size of your faith. Keep faith to make everything possible” cih kammal hoih nei uh a, i tupna pen a neu leh liat lam hi loin, i lungsim i ngaihsutna pen a kisamzaw ahihna thu na mucian mahmah uh hi.

Tun nading mun tun theihlohna hi
A sia lama ngaihsutna a nei mi in a kim le pam muhdan hoih lo nei a, a sawt ciangin amah leh amah zong bangmah lo danin kingaihsun hi. Na hoih a lamet tam lo mawk ahih manin a ngah zong tam lo hi. Na thak leh ngaihsutna thak kihilh leh a dawnna pen :
* Lawhcing tuan kei ning.
* Tua bangin kuama’n sem ngei kei.
* Amah loin zong sem thei lel ing.
* Nei zo ke’ng, sem zo ke’ng, man siang nai lo hi’ng.
* Kei bek i sep ding hi tuan kei.... cihte ahi hi.
Lam khat lamin gen leng, mihingte pen i kingaihsutdan pen i hihna na hi hi. I sawm kei leh a mun kitung thei lo hi. A sia lam a ngaihsun mi na hih leh na gal lauhuai pen nangmah na hi a, nang le nang a kiniamsak na hi hi.

Nuntak nuam ngei lo hi
Mihing nuntakna pen khualzinna lampi bang hi a, a sia lama a ngaihsun mi pen a nuntak khualzinna-ah mawtaw a gui/ kham bang ahi hi. A mailam hun pen lungkiathuai hiin thei ahih manin tuhun panin haksatna thuak khol hi. ‘Na khempeuh a hoih khin a na ngaihsut leh muhloh a nei na hi hi’ cih ngaihsutzia nei a, hun haksa hong tun ciangin vensak ding dan ngaihsun loin, bawlphat theih vetloh hong tung danin ngaihsunin, vensak sawm lo hi. Tua banah hun hoih ciangin zong a lungnuam tuan lo hi.

A ngaihsutna pen haksatna lam ngah a, haksatna mah a piakhia ding bekin kigingkhol mawk ahih manin a laigil nuntakna-ah haksatna om tawntung a, tua in nuntak nuamsak thei lo hi. Mualsang tunga a kahzel naupang in zing a thawh ciangin a ging ngaih mahmah vuuk cim za a, a omna mun a vukcip ding bekbekin ngaihsun ahih manin sih ding lau mahmah hi. Ahih hangin a makainu in, “Ni suak in galkhat lama vuuk tuisak a, tua in vuuk kicimsak ahih manin tua vuuk kicim ging hi. ‘Na sih nading ni’ hong theisak hi loin, nang adingin ‘ni thak’ hong suak hi, cih hong theisak hizaw hi” ciin hilh hi.

Billy Graham in, “Nopsakna leh hamphatna in haksatna zahin mi seek taktak lo hi” ci hi. Haksatna pen hong tungden a, ahih hangin a tawldamhuai lamin ngaihsunin, leitungah i om sung teng a om ding ahihna leh vensak theih leh zawh theih zong om hi, cih ngaihsun siamin zawh theih nading zong ngaihsun leng (i zo khin kei zongin) nuntak nuam takin i nungta thei ding hi.

Khen - II : Launa, Lawhsapna, Lungkiatna Leh Lunggimna

7. Launa Bang Hiam?
Mihingte’ lawhcinna leh lawhsapna a sai mahmah khat pen launa a phutsuak/maingat danah kinga hi. Lawhcin na ut leh launa kizosak loin, vanzat a na zat zawk ding ahi hi! Tua banga na hih theih kei leh lawhsapna hong tun ciangin na lungkia-in, tua in nang hong zo ding hi. Tua ahih manin launa pen bang hi hiam? cih sin taak mahmah hi.

Khuai in khuaizu khum mahmah bawl cih simloh deihtel ding nei lo hi. Eite in ahih leh deihtel ding kinei a, tua pen i kibatlohna hi. Khuaizu khum mahmah la ding kimlai khuai deh lau-in tai ding maw, ‘hong deh lezong deh’ ciin khuaizu laksawm ding. Naungek pai kisin ciil pen i mu zel ding hi. Khatveivei puuk lauhuai hun zong om a, tua bang pipi a pai a sin uh ciangin hat takin tai thei pan uh hi. Puuk ding lauin tuden, ahih kei leh lumden leh mibang lo lianpi hi lel ding hi.

Lawhsapna pen a min bek zong zak nuam lo hi. Mihingte kammal lakah ‘sihna’ cih zomah ‘lawpsapna’ cih kammal pen a zaknuam lopente laka khat hi ding hi. Mi khat in a lawm pen, “Lawhsam mahmah mawk ei” a cih ziau leh, gencian sese ta kei leh na lungsim sungah gentheihna, a huh ding om lo, siam nei lo, mapai lo, mai lam kalsuan ding dan maan lo leh lamet neihlohna hong kidawk pah ding hi. Tua launa tuamtuam hangin a lawhcing ding tampi lawhsam uh hi.

Mite gensiat ding launa
Mite gensiat i launa hangin i sep ding tampi i seploh om a, i seploh ding tampi i sep om hi. Mi lawhcing, mi thupi, history a min kidai ngei nawn lote pen nakpi taka gensiatna a thuak uh hangin zong a sem tantante ahi uh hi. Tua bang gensiatna lak pana lawhcing, mite theihden khat pen British Evangelist George Whitefield ahi hi. Mite in nakpi’n langpan uh a, thah sawmin a that dingin mi sum tawh guai/cial man liang uh hi. A pawlpi u’n a khal uh hangin pusuak nuam tuan lo a, pawlpi nasepna khatpeuhah kihel teitei hi. A khua uh panin kihawlkhia a, paikhia nuam tuan lo hi. Tua banga khalna pia a, biakinn sung a lut theih nawnloh ciang khualakah thu gen a, migi lo pipite in ciamnuih bawlna-in zangin, satan banga kizem lamdangin a kiim a kiangah nuihsuak bawl nadingin zang uh hi. Tamveipi suang, aktui, leh a tuamtuam tawh deng uh a, sisan suaka migi lote in suang tawh a den laiun zong a thugen tawpsan tuan lo hi.

Whitefield hun lai a mi thupi - Dr. Samuel Johnson, Oliver Goldsmith leh Duchess of Buckingham-te mahmah in zong ciamnuih bawl nadingin zang uh hi.

Ahih hangin thugen veve a, khuapi sung mun thupi-ah thugen a phalloh uh ciangin khua pua lamah paikhia-in, London khuanawla mi gentheite, Wales leh Scotland gama suangmanpha a zongte kiangah thugen hi. Thu hoih a za ngei lo mi genthei tul tampi te’n a Pasian thugen ngai-in, tua migentheite piakkhop sumte tawh nidang pek pana a lunggulh mahmah ‘tagah sang’ phuan liang hi.

Whitefield in zong eite thuak bang lawhsapna leh haksatna tampi thuak a, ahih hangin lungkiat nadingin zang loin, amah a thahatsak dingin zangzaw hi. Midangte adingin thupha lianpi a bawl ciin history in ciamtehden zaw hi.

Na tup na ngim khat mite in a gensiat mana lungkia a lawhsam zel mi na hih leh, midang te’n na sep le bawl ding a genna uh thudon nuam kei inla, tua bang ngaihkhiat nadingin na hun zang kei in. Na tupna theician inla, tua lam bekah na lungsim pia in. Ahih hangin hih thu mangngilh kei in : Na tupna pen a hoih leh maan takpi mah ahi hiam? A hoih ahih naak leh gensiatna lak pan na bil hemkhia in. Lampi geia inn lam bang hi a, Esopa tangthu a pata laa zuak tawh kibang ding hi. Ciklai peuhin gensiatna na ngahden ding a, amau deih bang lianliana nuntak na sawm hangin hong gensia veve ding uh hi. Tua sangin, maan leh hoih hi-a na theih lamah tang takin kalsuan in. Llyod Cory in, “Na thak khat bawlkhiat sangin, mi bawlkhiatsa gensiat pen a zah zakhat in baihzaw hi” ci a, maan mahmah hi.

Risk lak ngamlohna/launa
Risk pen Zopau zat banga kizang kammal khat ahih manin gencian nawn kei ni. Risk nading mun pen meetna leh supna a kikim lianna-ah lakloh ding ahi hi. Phe kap khawng pen meet theihna leh sup theihna chance kikim lian a, tua bang muna kimawl/lawhcin sawm pen haihuai mahmah hi.

Walt Disney pen kum zalom 20 sunga mailam kalsuanzia ding a nei hoih leh na ngaihsutkhiat a siampente lakah kihelsak uh a, aman, “Sepna khatpeuh lawhcinsak i sawm pen lawhcingsak dingin ‘hangsanna’ i neih naak leh lawhcing thei khin hi” ci hi. Na hoih leh manpha ding hi a i theih tek uh pen a taktakin semkhia ngam khin lehang i teenna leitung pen tu sangin nakpi’n khangtozaw ding hi. Ahih hangin, Pasian in tua bang semkhia zo dingin hatna hong piak pen zangkhia ngam loin, ki-koihcip maimai thei hi.

Lo kho mi khat kiangah bang hanga a lo vatna sa-ah buh tuh lo hiam, cih dong uh hi. Ama’n, “Guah hong zu kei leh lei hong keu-in, buh hoih lo ding a, buh lak ding om lo ding hi” ci hi. “Tua ahih leh vaimim beek tuh lo maw?” ci-a dotna pen, “Vasate in hong neek beisak ding hi” ciin dawng kik hi. “Ahih leh na lo vatna-ah bang khai tuh na hiam?” ci a dotna pen, “Bangmah tuh kei mai ing. Khai tuh leng a siasak ding tam lua hi” ciin dawng kik hi. A lawhcin nading zong risk ngam lo a, a nuntakna pen launa tawh kidimin, na hoih leh manpha sem ngam dingin hangsanna nei lo ahih manin lawhsam zong hi loin, a lawhsam baan lo ahi hi.

Lawhcing dingin risk kul a, hun lem zong kisam hi. Kician taka muhkholhna a omlohna-ah zong lametna leh upna tawh kalsuan kul hi. Tua munah a gah limci leh khuaizu banga khum a kiselsim om hamtang hi.

Kimuanngamna taan launa
Norman Vincent Peale in, “Zawh a om hi-in kithei sin dih ve, sauveipi na kingaihsut leh a taktak hong bang ding hi” ci hi. Mi pawlkhat in a lau uh pen lawhsapna bek hi loin,‘.. hih ka sep ding pen lawhsam leng, mah le mah kimuanna ka nei nawn kei ding a, kei adingin hoih lo ding hi’ ci bang kekin lungsim sungah ngaihsutna nei thei uh hi. Tua manin, lawhsapna thang a awk ding launa hangin tua thang tawh kipelh sawm uh hi. Ahih hangin kalsuan khiat sawmin a khe uh khai uh a, thang sik khak ding lau uh ahih manin khiasuk ngam nawn lo uh hi! Tua bang nuntakzia a nei mite kianga om pen tawlhuaiin haksa hi. Na hoih sep ding tampi thei uh a, gengenin, ahih hangin a taktakin sem ngam lo uh hi. Picingsak dingin amau kimuangzo lo uh ahih manin.

Na ngaihsutna-a lawhcin na utdan bang lianin lawhcing sese lo ding hi teh. Ahih hangin, na lametna bang lianliana lawhcing lo dinga na kitheih simin na sepsawm na sep kei ding leh bangmah taktak sem kei mai in!

Lawhsap ding launa hanga na nasep kei leh, a lawhsam zong hi lo, a lawhsam ban lo na hi hi. ‘Lawhcing dingin lawhsap kisam’ cih paunak bangin, lawhcinna pen lawhsap ngamna-ah kiphumsim hi, cih phawkden in. Ahih hangin, lawhsap ngamna pen lawhsapna hi tuan lo a, kingapna genna hizaw hi.

Hun hoih muhloh launa
Khatvei lawhsapna hangin lawhcin kik nading hun lem (chance) neih kik nawnloh ding launa in mi tampi kalsuanna hong khaktan hi.

Henry Ford in ngaihsutdan tuampi nei a, “Lawhsapna pen pilzaw leh ciimzaw a bul pat phat kik theih nadinga hun hoih ahi hi” ci hi. Henry Ford pen lawhsam mun mahmah a, lawhsapna tawh kilim thuah mahmah hi. Mawtaw bawl nading munpi bawl sawmin na sem a, nihvei lawhsamin, a thumveina-ah lawhcing pan hi. Tua banga a sepna hangin Ford Motor Company pen tudongin leitungah mawtaw bawlkhia company liante lakah kihelden hi.

‘Lawhsapna’ pan ‘lawhcinna’ a ngah tangthu zaknop dang khat pen United States Military Academy a kigelhcin a sawm khangno khat i nuntakna ahi hi. Paltan lut sawmin nihvei ngen a, amah zong en loin a ngetna tawh nihvei tak kinial hi. A thumveina taktak ciangin sang uh a, tua khangno pen Douglas Mac Arthur ahi hi. A hun nunung lamah United States a general minthangpente lakah kihel a, Galpi nihna a Pacific simkhanglam, Panghuan Pawl (Allies Force) in a do lai uha ‘chief’ ahihna pen leitung in mangngilh a sawm hangin history in phal ngei lo ding hi. Ford bangin nihvei a lawhsap zawh ciangin lawhcing pan hi.

Leitung mihing kuamah in lawhsapna pen kipelh thei lo, kibuksan thei lo hi. ‘Lamdang zen si e’ na ci kha ding hi. Kician takin genkik ni. Leitung mihing kuamah in lawhsapna pelh thei lo, buksan thei lo hi. Mihing i hihna tawh kizuia i tuakkhak hi lel hi. ‘Lawhsam kei in’ ciin kuamah kigenpih thei lo a, kisawl theih zong hi lo hi. Tua sangin, hih lawhsapna in i nuntakna kongkhak hong kiuh simin i maingatdan ding theih kisamzaw hi.

Launa lau-in hangsan in!
Na lawhsap hun ciangin kumpite leh Pasian ngeina a palsat na hi kei a, mi gi lo hi tuan loin, neu-et theih na hi tuan kei a, midangte kiangah nopmawhsak nading zong om tuan lo hi. Lawhsapna hanga lungkiatna hong piang in hong lunggimsak kei hen. ‘Bang ci bangin hih lawhsapna ‘thatang’ pen ka nuntakna bawl hoih nadingin zang ding ka hiam?’ cih ngaihsunzaw inla, lawhsapna pen nang adingin kuamah in a sin phakloh sinlai thupi tak hong hi ding hi. Launa lauin hangsan in.

Kua hiamte thugenna hangin a lawhcing ding zong lawhsam thei hi. Tua manin, mi thugen khempeuh um kei in. ‘Hi teh’ hong kicihna khempeuh zong hi khin tuan lo hi teh. Amau sunga thahatna sangpen zang man lo a, lungkiate totcil leitungah mi tampite thang awk bangin ki-awkcip hi.

Tua laitakin, ei adingin a ciamtehhuai misinphate tangthu honpi mah history in na ciamteh hi. Polist pianist Ignace Pederewiski in piano sin a sawm laiin a sinsakpa in, “Na khut bom neu lua, piano sin thei kei ni teh” ciin nolh a, ahi hangin, pianist thupi mahmah hi veve hi. Italian lasiam tenor minthang Enrico Caruso zong, la sa dinga a ki-test masakpen ni-in a encikte in, “Na aw pen tawhleta dakkhia a saisit sangin zong hoih keizaw!” ciin nuihsan uh hi.

Tuate khempeuh sanga thupizaw pen England gama thugensiam minthang Benjamin Disraeli thu ahi hi. Parliament a thugen dinga a dinkhiat cilin a siamloh banah, a pauawk a, bangmahpi gen thei lo hi. A memberpihte in nakpi’n otsanin nuihsan uh a, ciamnuih a gen bangin ngaihsun uh hi. Bangmahpi gen thei lo ahih manin tusuk kik a, a tut kawmin, “Tuhunin ka tut hangin, ka thugen ngaihnop na sak hun uh hong om ding hi” ci hi. Tua kammal pen leitung in a mangngilh ngei nawnloh ding kammal suak mawk hi.

Baih taka neih theih a manpha tak om ngei lo hi. Paridise Lost gelh dingin John Milton pen zing nai 4 in tho den hi. Webster’s Dictionary gelh dingin Noah Webster in kum 36 sung tawntung hun manpha takin zang hi.

8. Lawhsapna Zawhna
Nidanglai pan tuhun ciang dongah mi lawhcingte pen a lawhsapna uh tungah tuanga, zawhna la a sate ahi uh hi. Thuakzawhna a nei mi hi phadiak uh hi. A cih cintenna un lawhcinna ah paipih hi. Lawhcin na ut leh, lawhsapna zawh nading a kalsuandan nang le nang na kibawl kul hi. Francis Chan in, “Lawhsapna pen kihtak masak pen ding hi lo a, kimanna a nei pha mel lo khawngah i lawhcin keei ding pen patauh ding hizaw hi” ci hi. Hih kalsuandante en dih ve :

Lawhsapna pen theician masa in
Lawhsapna pen i etdan poimawh mahmah hi. Na lawhsapna pen a tawpna (final) hi lo a, na teng khempeuh a bei khin leh a mong dong a tung na hi kei hi. Na khempeuh bei khin a, a mong dong a tunga na kingaihsut leh kuama’n hong panpih thei lo ding hi. Lawhsapna pen lawhcinna bul kipatna bangin ngaihsun den in. Khualzinna lampi-ah khatveivei lampi kihaih theih a, tua bang hun ciangin zong i gammanna ciang theihtheih nadingin ciamtehna koilai hiamah om veve hi. Gamla na manloh nading leh na kilehkik pah theih nadinga kiciamteh hi lel hi. Lawhsapna pen lampi i haih cianga lam kianga ciamtehna kiphut bang hi a, misi kuang kilhna siktukilh bang hi lo hi. Lawhsama na kingaihsut leh a lawhsam na hi a, lawhsam lo a na kingaihsut leh a lawhsam lo na hi hi.

Na lawhsapna enkik in
William A. Ward in, “Lawhsapna pen i hankhuk a to hi loin, hong sinsak sia hizaw hi. Lawhsapna in hong zo hi lo a, hong zekai sak hi bek lel hi. Car i hawl uh a, pai nading lampi om nawn lo a bingcip bang hi loin, lampi danga i pai kik nadinga i kilehna mun bang ahi hi” ci hi. Hih bang lama lawhsapna i ngaihsut theih leh, lawhsapna pen lawhcin theih nadinga hun manpha mahmah hong suak ding hi.

Mi lawhsam dingte nuntakzia na theinuam hiam? Bang hiam khat bul pan uh a, lawhsam hi-in kithei-in, a bulpat hoihsa uh pen taisanin na dang khat sepsan kik uh hi. A kingakna pen, ‘Nasepna a lawhcin pah kei leh na bulpatsa pen nusia cip inla, maimangsak in’ cih ahi hi. Mi lawhcing khempeuh in sem uh a, sem kikin, sem kikkik uh hi. A kisuih khak uh ciangin pilvan nading lampi mukhia uh a, a tawpnaah lawhcing uh hi. Churchill in, “Kibawlphatnaah mainawtna om a, bucinna zong kibawlphat kikkikna-ah om hi” ci hi.

Na lawhsap kik hun ciang hoih takin na lawhsapna hang enkik in. Hangsan takin sem kik inla, tua hi leh na sep masak hun sangin lawhsapna in haksa hong sazaw ding hi.

Na hatlohna theician in
Hih pen a haksa pen hi. Mi kim in hatlohna kinei hi. A piang thei lo ding mawk ngaihsut a, tua ngaihsutna i nopna hang bekbek a hun sauveipi zatna, kihihsakna, thadahna, sem taktak nuam lo a midang thatang tawh meet sawmna, a theician pen banga theihcet taktaklohna, zu le sa, guihtheihkhamtheih khawng pen lawhsapna hi nuam mahmah hi. Ahih hangin hihte pen mimal sunga om thusim ahih manin eimah mahmah in zong i sangzo kei a, paulap dang bawlin, midang i mawhsak thei zel hi. I hatlohna mukhia a kibawl hoih taktak dingin sittel ngam muanhuaina i nuntaknaah kidawkhiatsak kisam hi. Lungsim leh pumpi-ah a taktaka ki-ukzawhna zong kisam hi.

Hangsan taka ama hatlohna a zo pen kua dang hi loin English paltan tangthu a min dai nawn lo ding Lord Nelson ahi hi. A hunlaia galsiam leh hangsan minthang Nepoleon tembaw thupi tak a zopa pen mawtaw guitheite’ guihzah sanga nasiazawin tembaw gui zel a, tua bangpi mahin a hun tamzaw pen tui tungah zangbei hi. Eite hi lehang, “Ka nekzon nading hi ke’n teh..” ci kha ngel ding hi hang.

Hih kidona pen pualam kidona sangin sunglam kidona hizaw hi. Na zawh hangin kuamah in a tuamin pahtawina laipi hong pia lo ding hi. Ahih hangin, thaman pen a taktakin nangmah teekteek in na nuntakna-ah na phattuampihzaw ding hi. Tua pen a manphatna ahi hi.

Na sepdan laih in
Lawhsapna a zo dingin a poimawh mahmah khat pen, lawhcing ding a na sepdan laih kul hi, cih theihna ahi hi. ‘Thuakzawhna nei ing’ cih mana sepdan ngeina tawh lawhsapden pen mi pil lo nasep dan ahi hi. Tua pen mi tampi sepdan hi a, ‘lawhsapna’ sangin ‘haina’ hizaw hi. Na tatkhialhna munah na tatkhialh den a, lampi thak, sepdan thak na ngaihsut kei leh na ngaihsutna pen maan lian lo cihna hi.

Na tatkhialhna sa pen na lawhsapna a piangsak ahih manin thupi lo leh neucik ahi zongin a kigawmkhop ciangin lian mahmah cihna hi. Mopawi bawl hun cianga lungdamna, nuamna leh phawkden theihna a bawl tampi pen na neucikcik - zungbuh, niangtui, paak, maan kizaih, leh thuciam khawng hi leltak hi. A tuam tekin a thupiloh hangin, ni khata a veka a kigawmkhop ciang hun thupi leh ciamtehhuai hong suak hi. Tua bang mahin, na neucik in zong phawkden dinga nuam lo zah dongin lawhsapna munah hong lutpih thei hi. Tua manin, na sep kik ciangin na sepnasa a na khialhnate-ah sepdan thak ngaihsun inla, sepkhialhna hang, a kisam neu cikcikte mangngilh lo dingin kithawikhol in.

Sem inla, sem kik in
‘Sem inla, sem kik in’ cih thupil pen maan mahmah hi. Lawhcing pelmawh dingin na kitheih hangin na sep kei leh na lawhcing ngei kei ding hi. Fletcher L. Byrom in, “Ka sepkhialh pen kisin nadingin ka zang hi, a cih uh pen maan a, hih sanga thupizaw ka gennop pen : Semkhial loin bangmah na semsuak zo kei ding hi, cih zawzen ut ing” ci liang hi. Maan mahmah hi. Maths khawng i tuatdan maan pan hi loin, i tuatkhialhna pan a i siam tamzaw tham hi.

Kum khat sunga na nasep enkik lecin, ‘Bangmah sepkhialh nei ke’ng’ na cih leh kingaihsun pha in. Bangmah na thak sep a nei lozaw hi lo na hiam? Sepkhialh pen mihing ngeina hi a, sepkhialhna in maan taka sep manphatna leh maan taka sep siamna hong pia hi. Albert Einstein in, “Sepkhialh-bawlkhialh a nei kha nai lo mi pen, bangmah taktak a sem nai lo hi kha ding hi” ci hi.

Lungkiatna mahmah!
Lawhsapna cih thumal tawh a kinai mahmah, a zakdahhuai mahmah kammal pen ‘lungkiatna’ ahi hi. Lawhsapna leh sepkhialhna pen nisim a mihingte nasepna sunga a omden hi a, lungkiatna cih thumal pen mulkimhuaiin zakdahhuai mahmah pah hi. Guiawkna khauhual tawh kinai mahmah zaw lai! Kicianzaw a sin kisam hi.

9. Lungkiatna Bang Hang Hiam?

Lawhsapna pen pualama kidawkkhia thei hi a, midangte huhna tawh baih taka lametna thak tawh zawh theih hi. Lungkiatna pen sungtawnga mihing lungsim puakzia khat ahih manin tua lungsim a nei ahi lo midangte’ vensak theih hi lo hi. Mi lawhcing i cihte pen amau leh amau kidem uh a, midang tawh kiteh ngei lo uh hi. A sepnasate uh sangin mai a nawtzaw hiam? ciin amau leh amau kiteh uh hi.

Leitung mihingte lakah a lungkia ngei lo a om diam? Lungkiatna tawh a kimaingat kha ngei lo a om diam? Kuamah om lo ding hi! Mihing nuntakna-ah a kihel hi a, a neu leh liat pen thu tuampi ahi hi. A kisam penah, Bangci bangin tua lungkiatna pen maingat zel i hiam? cih ahi hi. H. Ross Perot in, “Mi tampite in a lawhcin dektak uh, bat phak mai a lawhcinna a nai hun ciangin tawpsan uh a, kal khat bek suan leh lawhcing ding kimlai lungkia in khawlsan uh hi” ci hi. Tua lungkiatna bang hang hiam?

Eimah bek kingaihsutna hang
Lungkiatna ci (seeds) posak a, mimal meetna leh dinmun hoihna bek pen lawhcinna hi-a na ngaihsut leh lungkiatna in na lungsim kongkhak hong kiu den ta hi, cih na theih kisam hi. Helen Keller in, “Ei-le-ei kihehpihna (self-pity) pen i gal lianpen hi. I kizawhsak khak leh bel na lianpi bangmah i semkhia kei ding hi” ci hi.

Sum hauh nop man beka sumbawl, thupina lunggulhna hang beka makai ut, mite zahtak leh phat utna hang bek a phatuamngaihnate pen a lawhsap hun ua lungkiatna ci a posak hi ut mahmah uh hi.

Huh hoih ngah lo a kitheihna
Mi pawlkhat pen mite sangin pil masazaw uh a, sumbawlna leh sep ding hoihte sem masa uh hi. Nang na kipat ciangin zekai ta ahih manin bangmah na meet thei kei hi, ahi hiam? Nasepna khat peuhah na zekai den hiam? Sum bei teng leh mi’ meetna teng theiin, na buai mahmah hangin meetna taktak ngah man lo lianlianin na nungta hiam? Tua na kingaihsutna pen a takpi mah ahi hiam?

A lamdang mahmah pen, hun hoih in hong nai laiin neucik bek hiin kithei a, hong paisan (hi a i theih) lian ciangin lianpi hiin kimu zel hi. Hong tung kik ding mu thei nawn lo ding zahin hun paisa in hong buaisak zel a, tua hanga lungkia kitam mahmah hi.

Hih pen nuntakna in mihing hong sittelna khat ahi hi. Hih bang ‘khemna’ na thuak hun simin hih thu ngaihsun in. Hun hoih, mualkhumsa hi a na ngaihsut pen mualkhum taktak lo thei hi. Na thadah man leh na telcianloh mana mualkhum a sa kha hi thei ding hi teh.
Hun hoih in hong paisan khin thei lo hi. A ngaihsun mite adingin hun hoih pen hong tung kik zel ding hi. Na hoih khatpeuh pen mite in hong sepsan, hong makhelhden thei lo hi. Eima tan ding zong omden a, i ngahsut nop naak leh kiam ngei lo hi.

Lawhcin pah sawmna
Mi tampi lawhsamsak-a a lungkiasak pen lawhcin pah sawmna ahi hi. A diakin Zomite banga minam khangto laitak, lungsim kician nei lote(!) lakah nasia mahmah hi. Zan khat thu-a a lawhcing zong om mah, ahih hangin a tamzaw pen tamveipi a puk zawh uh ciang leh, guam thukpi sungah a kiat zawh uh cianga lawhcingte ahi uh hi.

National Retail Dry Goods Association, USA in kantelna (research) bawl uh a, a muhkhiat uh pen, vanzuak a zin kawikawi letli-te (salesmans) lakah a kimkhat pen khatvei a zuakna uah a lawhsapna uh hangin lungkia uh hi, cih ahi hi. A muhkhiat uh pen : Letli 48% in khatvei semin khawlsan kik pah uh; 25% in nihvei semin khawlsan kik uh; 15% in thumvei semin khawlsan uh; 12% in thumvei a sep zawh uh ciang zong khawlsan tuan lo uh a, companyte vanzuakkhiat 80% pen hih letli 12%-te sepgimna hang hi, ciin gen uh hi.

George H. Mathason in, “Zawhna kici pen khatvei hoih taka sep/tat hoihna hi lo a, gim le tawl taka sawtpi sep zomnaah kinga hi” ciin gen hi.

Papi a lawhsam mahmah, a lungkhauh mahmah i thuaknate en dih ve. Veilama nambatte pen a kum zah ahi hi.
22 - Sumbawlna-ah lawhsam
23 - State legislature-ah ki-candidate a, lawhsam
24 - Sumbawlna-ah lawhsam kik
25 - State legislature-ah ki-candidate kik, lawhsam kik
26 - A lawmnu in sihsan
27 - Lunggimin si dektak (nervous breakdown)
29 - House Speaker hih sawm, a langpa zo lo
31 - Elector position hih sawm, a langpa zo lo
34 - Congress seat-ah ki-candidate, cing zo lo
37 - Congress seat-ah telcinin om
39 - Congress seat pan a langate in zo
46 - Senate seat-ah ki-candidate, cing zo lo
47 - Vice President hih sawm, cing zo lo
49 - Senate seat-ah ki-candidate, cing zo lo
51 - United States President dingin kitel cing.

Hih pa pen kua hiam cih i thei hiam? United States President 16-na Abraham Lincoln ahi hi. Lawhcinna pen damdamin hong tung thei hi. Na ngak nop kei leh lawhsam bek hi loin, na lungkia thei ding hi.

Tupna leh geelkholhna neiloh
Hih pen hoih het lo hi. Mi thanuam leh kiva mahmah, sauveipi sep nopna lungsim a nei na hi zongin, sep sawm kician nei lo leh na tupna mun tun theih nadingin geelna kician zong nei lo thei hi teh. Hih bang mite pen mibuai, lawhcing taktak lo, a tawpna-ah lungkia mahmah mi hi nuam uh hi.

Thomas Alva Edison pen i thei tek ding hi. Electric bulb, phonograph, leh na dang tampi mukhiapa ahi hi. Na khatpeuh muhkhiat nading a kisam nga gelhkhia a, tuate pen :
1) Lawhcinsak ding pen kician taka gencian theihna
2) Lawhcingsak dingin thatang, hatna, leh siamna om khempeuh gawmkhawm thei dinga kipiakzawhna leh hangsanna
3) Haksatna khempeuh phusuak a, lawhcing ding a sep theihna
4) Midang sepsa leh lawhsapnasa ahih upna hanga hoih taka sep noplohna lungsim pan kituamkoih theihna
5) Lawhcingsak ding a sep theih dan om takpi mah hi cih up cinten ngamna leh, zon ut naak leh mukhia pelmawh ding a kingaihsutna

Edison pen lungkiatna kizosak ngei lo hi. Khatvei a laboratory leh a sunga om nate khempeuh mei tawh kangsak a, a muhkhiatsa a gelhna laibute tawh vut le vai suakkhin hi. Mite in a tawpsan ziau dingin um uh a, ama’n, “A hoihzawin ka lam kik ding hi” ci teitei lai hi. Tua banga a kuhkal mihing khat in nuntakzia makai (principle) hoih tak nam nga nei a, tuate in mite theihden hi dingin seekkhia-in laamto hi.

10. Lungkiatna Zawhdan

Martin Luther King in, “Leng in, na len theih kei leh zong tai in. Na tai theih kei leh zong pai in. Na pai theih kei lai leh zong bawkvak lel in. A thupipen-in, mai i nawt ciat ding hi” ci hi. A mai lamah i gensa mah bangin lungkiatna pen i zatkhialh vanglak leh lauhuai mahmah a, kigui-awkna khauhual tawh kigamla het lo hi. Nang na hi a, na kianga mi khatpeuh ahi zongin, lungkiat mahmah hun om thei hi; Mihing nuntakzia ngeina khat ahih manin. Ahih hangin, lungkiatna panin lametna pakkhia kik thei a, a lampi om hi.

A hoih lamin ngaihsun in
Vasa in singtungah bu tom a, a kholohna/kiplohna leh muanhuailohzia thei veve hi. Huihpi hong nungin mut leh huang kawikawi a, a bu tomsa pen a letmang hun bang om hi. Tua hanga lungkia leh lungkham a kuncip vasa na mu ngei hiam? A haina tak pen a hatna ahi hi. A bu tom a siat ciangin tompha kik ziau a, thanuam takin sem kik ziau hi. Mihing hi lehang, i bu tom pen, ‘Sia kik kha in teh’ ciin i sep ma-in lungkia-in, bu tom ngam lo i hih manin suan le khak nei loin i maimang kha ding hi. Tua manin, hih a thupi het lo hi a i ngaihsut in a thupi mahmah thu hong sinsak hi.

Na nasepna-ah na lawhsap hangin lungkia pah kei in. Leitung pen a sia lam bekbekin ngaihsun loin, a sia a om leh a pha zong om ahihna mangngilh kei in. Zan a om manin sun om a, a vom a om leh a kang zong omin, khuazing a om leh khuavak zong om hi. Sepkhialh, ngaihsutkhialh pen a hoih lama lam hong lak ding a manpha suaksak in. Lai Siangtho sungah, “Ka galte aw, kei tungah lungdam kei un. Ka puk hangin kathokik veve ding hi. Khuamial sungah ka om hangin Topa in khuavak hong pia ding hi” (Mikah 7:8) ci hi.

Lungkia pahpah kei in
Paunak khat in, “A tawpsante lawhcing ngei lo a, mi lawhcingte pen a tawpsan ngei lote ahi hi” ci hi. Leitunga mi lawhcingte tangthu-ah mi lawhcingte pen a pilpen, a siampen, a haupen, a thahatpen hi tuan lo uh a, a citak, a kuhkal, a lungkia pahpah lote ahi uh hi. “Tawpsan ngei kei in, suangmanpha pen lei puathamah om ngei lo hi” a kici pen maan mahmah hi. Haksa taka sep tantanna-ah lawhcinna om hi.

Zan cianga nuam taka na om theihna electric bulb a mukhiapa Thomas Alva Edison pen kha thum sung bek sangkah a, tua hanga lungkia-in kuncip tuan lo hi. Electric bulb a muhkhiat nadingin tul bangzah vei hiam hihsinna (experiment) nei hi. History in a phawkden ding mi thupi Abraham Lincoln, Henry Ford, Winston Churchil, George Whitefield leh mi thupi dangte pen mi lungkia baih hi zenzen leh leitung in phawkden het lo ding hi.

Dakkhia inla, khua phawk in
Bang laibu a na sim zel? Nuntak hoihzaw na neih theih nading hi lo simna-in na hun na mawk beisak zel hiam? Leitunga mi thupi leh kuhkalte tangthu na sim ngei hiam? Hihte pen na nuntakna hong makaih dingin zang thei hi teh. Tua bang mahin, na lungkiat laipen in zong dakkhia inla, na kiim na kianga ganhing, ahih kei leh mihing khatpeuh, lungkia lo a tha a saan omden ahih lam na mu ding hi.

Kum zalom 14 a Mongol emperor minthang Tamerlane pen a thupi laitakin a thupi mahmah hangin thupi hetloh lai hun nei veve hi. Kidona munah a paltante galte in zo gawp uh a, galte lauin tai-in, a huh ding zong om loin kumpipa pen bawng buuk sunga bawng ann nekna sungah busim hi. Galte pen a kiim a kiangah kilehleh uh a, si dingin kingaihsun ahih manin a lunggim mahmah hi.

Tua banga lungkia taka a omlaiin, a buksimna bawng ann nekna banga miksi in amah sanga a zah tampi a lianzaw nek ding a to lamin puak sawm a thasan mu a, lawhsam zelzelin, hih kik zelzel hi. Kumpipa in limtakin en a, miksi in sawmguk-le-kua vei tak puak sawmin thasan a, a sawmsagihna-ah pua zo pan hi.

Tamerlane pen khanglo vat a, a taikhiat theih zenzen leh bul pat phat dingin a lungsim kiciam hi. A taikhiat zawh ciang a paltante samkhawmin thathak tawh na hong sem kik a, a kumpi gam pen Black Sea pan Ganges kikal teng hong suak mawk hi. Tua banga history a mi minthang khat tungah tha thak a guan pen miksi hi leltak hi.

Sem inla, sem kikkik in
Cihtakna pen mihing nuntakna-a kiphumsim a manpha mahmah ahi hi. Think and Grow Rich cih laibu gelhpa Napoleon Hill in America gama mi lawhcing 500 teelkhia-in a tangthu uh kancian a, a vek ua a neih uh khat pen ‘cihtakna’ ahi hi. Tuate in a nuntakna uah khatvei beek lungkiatna thuak tek uh a, a zawhna uh hang liapen ‘cihtakna’ leh ‘sep kik ngamna’ ahi hi. America mi inventor khat Booker T. Washington in zong hih bang lian mukhia a, “Lawhcinna pen mi in a tupna mun uh a tun zawh uh ciang-a a dinmun uah om loin, lawhcing dinga a sepdan leh thuakna-ah kingazaw hi” ciin gen hi.

Harold Sherman in, ‘Lawhsapna lawhcinna suaksak dan’ cih laibu gelh a, tua laia a thupi diakte pen hih anuaiate ahi hi:
1. ‘Dik hi ing’ ci-a ka kitheih sung tengin lungkia-in ka khawlsan kei ding hi.
2. Ka sep nop naak leh a tawpna-ah ka lawhcing pelmawh ding hi.
3. Et paka haksa dinga ka theih hun ciangin ka ngap bawl mahmah ding hi.
4. Ka tupna mun ka tun theih nadingin lampi-ah kuama’n hong thanemsak ka phal kei ding hi.
5. Ka hatlohna leh ka cinlohna khempeuh zawh ka sawm ding hi.
6. Ka tupna mun ka tun theih pah kei leh zong ka sem kikkik ding hi.
7. Ka kiim ka kiang pana theihna leh pilna ka ngah beh khempeuhte pen ka tupna a lawhcin nadingin ka zang ding hi.
8. Lungkiatna leh haksatna khatpeuh hong tung leh a lungkia masapen ka hi ngei kei ding hi.

Cihtakna tawh lungkiatna zo dinga nasep
Cihtakna pen pianpih hi tuan lo hi. Sin tawm leh mah le mah ki-ukzawhna pana piang hi thei hi. Misiamte in a manpha cihtakna, lawhcinpih theih ding a nei dingin hih anuaiate kisam hi-in gen uh hi :
1. A hang : Na tupna, na sawmna in hang khatpeuh nei hamtang ding hi. Banga zat ding hiam? Bang hanga sawm na hiam? Tua pen na theician hiam?
2. Deihna : Na tupna, na sawmna pen lawhcing dingin na deih takpi mah hiam? Minsiatna leh mite gensiatna om leh na deih veve ding hiam? Tua pen nangmah kidong masa in.
3. Tupna mun : Koi mun ciang tun sawm na hiam? Na goal na theician hiam? Na theih kei leh bel na tupna mun na tun leh tunloh zong na thei kei ding hi.
4. Theihna : Pilvang lo leh encian masa lo a tupna tangtunsak sawmna in hong lawhsamsak zel hi. A lampi, a tawpna leh a tawpdan dingte na theikhol khin hiam?
5. Sepkhopna : Mihing pen khat bekin kilawhcing thei taktak lo hi. Na sawm khat pen sawm taktak mah hi teh, cih na lawmte in a theih kei a, ahih kei leh a up kei a, a muanzawh kei leh na lawhsap theihna tampi tua laiah om hi.
6. Nuntakzia : Na nuntakziaah na tupna na liansak hiam? Laibu sah pipi gelhte in ni khat in tampi gelh tuan lo uh a, ni khatin naikal thum bang gelhden ding khawng hanciamin, ngeinaseh (habit) uh a, tua bangin kum khat bang a gelh uh ciangin tawldam takin laibu sah/lian pipi gelh thei uh hi.

Hih a tunga i gen nuntakzia a nei mite pen pua lamah mi kholhpih nuam tak hi khol lo kha ding uh hi. Ahih hangin amau nuntakna-ah ‘lungkimna’ nei uh hi. A nuntakna uah tupna kician tak nei uh ahih manin dam man manpha tak nei-in kithei uh a, kisap nei-a a kitheihna un nuntak tawldam ngahsak hi.

1490 kumin Spain kumpinu Isabella leh kumpipa Fardinand-te in tangthu a kigenzel Indies pen a lampi tom thei pena Christopher Columbus in a totsuak theih nadingin Royal Committee phuankhia uh hi. Tua committee in misiam teelkhia uh a, amau siamna tekah tua hun lai-a leitunga pil penpen tukhawmte in a muhkhiat uh pen, ‘Columbus sep sawm pen lawhcing thei lo hi’ cih ahi hi.

Kamphathuai takin Isabella, Fardinand leh amah Columbus in a lawhcin ding lamen uh a, tua lametna tawh Nina, Pinta leh Santa tembaw thumte kuankhia uh hi. Hi thei dinga upna/lametna in 1492 kumin America gam lian mahmah hong mukhiasak hi.

11. Lunggimna

Tulai leitung in haksatna a tuak lianpi pen nuclear galvan leh gentheihnate sangin mihing lungsim lama gim lua-a kitheihna hang a tawlna leh navaklohna (stress) ahi hi. Tua in mihing pen bit zo lo a kitheihna piangsak a, kisap sanga tamzaw lakkhop a, midang neihsa suhsak a, midang kithutuakpih theihlohna leh nuclear bomb zanga galte vatmai nopna lungsim piangsak hi-in lungsim lam a kanciante in gen uh hi.

Lunggimna pen tu kum 100 sunga USA in haksatna a tuak lianpen hi-in kingaihsun a, kum zalom 20 cil lamin kilawhtheih natna hanga sihna tampen hi mah leh, tuhun ciangin lungsim gimluatna hanga sihna tampen hi, ciin kigen hi. Joe Torress in, “Muh theihloh gal, sung lam pana hong buaisakte’ buaisakna pen napen a, thuhkik zong haksapen hi” ci hi.
Hih pen mihing tung a tung, a thuak mihing in a omzia a theihsiamloh pen hi a, HIV khawng sangin a damsak nading mukhiat haksazaw dingin misiamte in ngaihsun uh hi. Tua manin gensiam haksa mahmah a, genloh theih ahi kei hi. Tua ahih manin, tua lunggimna pen bang hi hiam, cih ngaihsut kisam hi.

Lunggimna pen mi khempeuh in thuak
Dotna masapenah, ‘Na lung a gim ngei hiam?’ cih ahi hi. A lunggim ngei lo mihing pen ‘mihai’ hi kha ding a, ‘mi hampha tungtuang’ zong hi thei hi. A kisam mahmah pen, ‘Na lunggimna in nang tungah bangci bangin na sem hiam?’ cih ahi hi. Lunggimna tampi pen kikhel theih ahih laitakin, pawlkhat pen taikhiatsan theih hetloh zong om hi.

A manpha lo lunggimna om
‘Ka lunggim’ ci-a i buaina tampi pen phatuam het lo hi! Hoih taka i ngaihsutlohna hang ahi hi.

Lunggimna 40% pen nuntakna in a phutkhak ngeiloh na thakte hang hi a, 30% pen lunggimna hanga kilamdansak theihloh ahi hi. Lunggimna 12% pen nangmah sanga niamzaw hi a na theih mi pawlkhat in hong elna leh hong gensiatna uh na theihkikna hanga lunggimna hi a, 10% pen cidamna lam tawh kisai ahi hi. Cidamna bawl hoih sawm tuan lo a, lunggimna leltaka zat pen a kisapna om loin, i cidamna in thuak behlap zawsop hi. Tua ban lunggimna 8% pen gimna taak, thu picing hi, ci uh hi.
Hih a sin mite tehna panin tuat sin lecin na lunggimna tampi pen a kisam het lo hi kha ding hi.

Lunggimna pen lungsim natna-ah a kileh leh lauhuai hi
Lunggimna pawlkhat pen a thuakte nuntak a thahatsak hi thei hi, cih i genkhin hi. Tua sanga nasiazaw pekin a sia lamin mihing tungah nasem thei hi! USA gama Johns Hopkins Hospital a Dr. G. Canby Robinson in a zato inn ua damlo 144 laka 140 pen lunggimna nei ahihna mukhia hi. Tua laka a kimkhat sanga tamzawte natna pen tua lunggimna in a piansak hi, cih mukhia sawnsawn hi.

Lunggimna a omden leh ci natna taktak suak thei hi. Doctorte in lunggimna pen thum in khen uh a - linglawng (alarm), lehdona (resistance), leh tawlna (exhaustion) ciin gen uh hi.
Mihing pumpi pen mailama hong tung ding hun tawh kizuiin khuak in uk hi. Gentehna in i heh a suak leh kilai ngam dingin sisan hong lum hi. Lunggimin linglawng (alarm) hun a tun laiin, kilai ding hiam, ahih kei leh teutuak/ kham sangpi ah tuakkhia ngam dingin na pumpi pen na khuak in bawllem hi. Khal sung panin hormone paikhiasak a, sisan a blood sugar level khawng, khua-ul kiatdan khawng, mittang tatdan khawng hong kilamdang a, gilsunga ann haizanna zekaisak hi. Na lamdangpi a maingat dingin na khuak in na pumpi kigingkholsak cihna hi.

Mihing ngeina-ah kitot-kilai hun ciangin na pumpi khatvei thu-in hong kikhelin, sisan luangin, na guhte kitan thei hi. Tua hun laitakin, lehdona hun (resistance) hong tung a, pumpi tungah siatna a om leh pumpi mahin ahih theih bangin damsak sawmin na lehdo hi.
Tua banga ahi ding bang ngeina sang a pumpi a lamdan gawp zawh ciangin pumpi in a omdan lamdanna hangin a sup (lost) te neihkik theih nadingin tawldam kisam a, tawlna hun (exhaustion) tung kik hi.
Lungsim a gim ciangin hih banga pumpi a kilamdan nadingin khuakin pumpi uk a, ahih hangin a taktak a maingat ding a om kei leh lunggimdenin, alarming stage ah pumpi omden cihna hi. Tua in pumpi sep ding tampi buaisakin, natna zong samkhia thei liang hi. Tua manin lunggimna zatui hoih mahmah pen a baih thei pena vensak a, lungsim tawldamsak ahi hi.

12. Lunggimna Pana Kidopna

A sia lamin gen leng, leitung pen lunggimna tawh kidim a, na khempeuhin lunggimsakin, maingatloh theihloh ahih manin nuntakna cimtakhuaisak hi. A hoih lamin ngaihsun leng, i lunggimna tampi pen mihing hong bawlhoih, thuakzawhna hong neisak, maban limci leh nuamzaw hong tunpih ding hun hoih hong bawlsak ahi hi. Na sim zel ding pen lunggimna hanga nuntak sia ding pan kidopna, lunggimna zatui ahi hi.

Etdan siam in
Ci uh hi, i lawmngaih i deihdan liante zong a etna mun a hoih kei leh hoihlohna bang hiam nei uh hi. Melsia mahmah zong a etna lam a hoih leh sia lua lo thei veve hi. Na i etkakna leh i tehna tawh kituakin i tuak thute pen kilamdang thei hi.

Khangmoi numei khat in college boarding panin a nu laikhak hi. “Nu aw, ka college nuntakzia hong hilh ning. College ka kah cilin cimtaak mahmah ing a, ka lawmte sum guksakin, tua tawh honda cycle kawmin ka taikhia hi. Telephone mung phukha in ka khe ka ciaksak a, doctor tangval khat in hong buaipihin a inn uah hong paipih hi. Hong khual mahmah ahih manin ka ki-it mahmah uh a, kiten zong ka sawm uh hi. Ahih hangin ka sisan testna-ah natna lauhuai nei cih kidawk a, bangbang hi leh nau paai khin ka hih manin hong ciah phot ning.

A taktakin nu aw, ka thugensate ka ciamnuihna hi. Kong gelhsa thute bangmah tung lo hi. Hoih takin lai ka sim thei a, haksa ka sa mahmah hi. Geometry-ah mark 5 mu ing a, geology ah zong fail demdam ing. Ahih hangin na khat peuhpeuh a etdan na siam nadingin hong kawi gen gawp hi ing!” ci hi.

Tua laikhak cil lam a sim ciangin a nu ngaihsutna pen vana khai bangin na mahmah ding hi. A sinlai ah a failna thu a zaksakpah sangin, tua bang a siahuaizaw a hilh masakna in a nu heh nading nakpi’n daisak ding hi. Lunggimna na neih leh tua sanga siazaw na tungah a hoih lo hong kibehlaplohna hangin lungdam inla, na hamphatna ngaihsun in. Tua in hong dawn tuam mahmah ding hi.

Risk ngamlohna hangin buai kei in
Tampi i genkhinta a, mihing a lunggimsak mahmah khat pen risk ngamlohna ahi hi. Sumbawlna, siamsinna, leh maban zawh a kulna khatpeuh-ah hih pen khangthakte buaina lianpi ahi hi. Charles Swindoll in hih bangin gen hi, “Mihing nuntakna pen risk tawh kidim a, lawhcing pelmawh ding a hong ciam thei khat beek om lo hi. Geelna khempeuh mawksuak thei a, na khempeuh a kigelh bang liana tangtunsak den ding lametna pen leitung ngeina tawh kilehngat hi”

I risk ngam kei leh bangmahpi i ngah kei ding hi. A leng thei khempeuh in kiattheihna risk uh a, a pai khempeuhin kisuih khak risk uh hi. A tomin gen leng, khawsuak dingin bang hiam khat beek risk kisam cihna hi.

Na nuih ciangin mihai banga kidawk risk na hi. Na kah ciangin a nehno banga kidawk risk na hi hi. Midang na zuat ciangin tua tawh kikholhkhopna hoih lo a om khak ding a risk na hi a, na lungtang sung a thusim na pholhkhiat ciangin mindai theih nading a pholhkhia risk na hi hi. Mi na it ciangin hong itkik kei khak uh leh lungsim natna tung thei a risk na hi a, lametna na neih ciangin lungkiatna risk na hi hi. Nasep na bulpat limlim ciangin lawhsap a risk na hi hi. Hihte pen a hoih lo lama i genna hi a, na khat peuhpeuh i sep ciangin lawhcinna nading a risk i hi hi.

Mi lawhsam leh zattak lo-a kibawlna baih pen na thei nuam hiam? Lunggim leh lau pipi in na hun zangden inla, bangmah hihsin (risk) ngam loin, na maban a hong tung ding pen a sia thei bang penin ngaihsunin, a sia thei pen lamenin bangmah sem ngam kei leteh, hun sawt lo cik sungin na sia khin ding hi.

Nuntakna limlim pen risk ahih manin na risk ciangin a kisam lopi’n na lungsim gimsak se kei in. Ngeina-in nei inla, a hoihpen a ngah dingin kigingkholin, a siapen hong tun khak zenzen leh zong a maingat ngam dingin kisakhol in.

Na sep ding sem lel in
Eima lunglutna, siamna, theihtelnate leh mite hong lametna mahah nekzongin, nasemin, mi theih hi-in, tua lamah na sem lehang, tua in kisam het lo a lunggimna tawmsak hi, ci uh hi. Pawlpi sungah lawp lo pipi-in, a kilawmsakna bek tawh panla mahmah lecin na cimtak pah ding a, tua in lunggimna hong tunin, phunciakin, midang gensiat ding tampi na nei pah ding hi.

Tua bang mahin, mite sep theih leh meetpih khempeuh sep na sawm leh, kisam het loin na lung hong gim lel ding hi. Tua sangin na mabana nangma cihtheihna (potential) lamah sem le cin nang le nang kimuanna hong neisak ding a, lungnopna hong pia ding hi.
Na lawhsap hun ciangin tua na nasep pen tona (challenge) banga na ngaihsut a, a hoihzaw a sep kik na lunggulh mahmah leh, tua pen na tot ding, na sep ding maan tak a sem cihna na hi hi. Na lawhsapna mangngilh pahin na taimangsan a, midang mawhsak ding na zonzon leh na sep ding lopi, na lunglut lam leh na kivakna lopi khat a sem na hi kha ding hi. Ahih hangin na lawhsapnasa-ah lawhsap kik ding cihna lam hi lo hi.

Kitheihsak luatna pan kidawm in
Tulai in sumbawlna lamah hatzaw hih utna hangin mun le munah kikhem a, tungnungzaw hih kituhna pen ‘Rat Race’ kici hi. Thupina pen neih le lam hauhna-ah kiteh a, van manphatna pen a sepkhiat tam lamah kituatin, lawhcinna pen mi tampi zawhna-ah kiteh a, tua dinmun tung dingin a maan lo bangzah phusuak hiam, cih lam kingaihsun nawn lo hi. Tua bang leitung in lunggimna piangsak a, kitheihsakna in natna bang liangin mihing ukcipin, pawlkhat bang zato inn lamah puak kul liang uh hi! Mihing nuntak manphatna sangin tungnun kituhna hizaw hi. A hoihlohdan pen ciamnuih gensiam minthang Lily Tomlin in, “Rat race ahih manin a gualzopen na hi zongin zusa mah na hi veve hi!” ciin genziau hi.

Nekzonna-ah mi in ama mailam ding hoih tak ngaihsun a, lawhcinsak sawma a sepna pen limci hi. Ahih hangin, ‘khantoh sawmna’ hanga midang khangto ding puksak sawm sese na lungtang pen lunggimna a piangsak lianpi hi a, leitung ngeina tawh kituak lo hi. I lungsim a gimsak tampi pen i neihsate hi loin, midangte’ neihsa peuh hi thei hi. Mi na hoih ngah, lawhcinna, neih le lam, leh thupina khawng hanga gimgawp pen a kisam lo leh leitung ngeina tawh kituak lo hi.

Ganhingte in nuntakzia maan hong musak zaw uh hi. Vasate in a kisap kaan uh bu tom ngei lo uh a, saguh kheuh ding a hauhloh mana ihmut lim lo ui om ngei lo hi.
Nakpi’n ngaihsun inla, na tupna mun tung thei dingin hanciam in. Ahih hangin Pasian, na innkuan, na cidamna, leh na lawmte mangngilh liangin thupingaihsut kei in. Maban khatpeuh nasep ding ciangin na sum neih leh na thatang in a citloh ding lamah lungkia kei inla, na lungsim in a cit leh citloh ngaihsunzaw in. Lungsim pen zat ding hi a, thathak lakzel ding, ngaihsutna pen a meet leh manpha thei bang pena zat ding ahi hi. Ahih hangin, mihing hong mihingsak, i go manpha tak i lungsim pen a kisam lopi’n gimsak kul sese lo hi.

Na kama ta lo valh sawm kei in
Na thupi sem khia thei dinga hong Bawlpa in hong bawl mihingte i hi hi. Siamna leh cihtheihna zong tampi nei-in, sin zelzel leng i damsungin na thak siamin, nuntakna manpha semsem ding hi. Ahih hangin, sep zawhloh, nuntakna a buaisak ding thu lianpiteah i kilimzat luat leh i siamna a tam zawh naknak leh i sulnung hoih lo ding a, tua in lunggimna hong tunin, i lunggimna in i cinna (efficiency) niamsak ding hi. Eima naseppi banah, pawlpi, khuasung, leh nadanga i kizatna in kisam lopiin hong lunggimsak thei hi. Kidawpsiam kisam mahmah hi.

Lungsim kingakna kician nei in
German philosopher Friedrich Nietzsche in, “Bang hangin sem ka hiam’ cih a theite sangin, ‘bangci banga sep ding hiam?’ cih a thei kitamzaw a, buaihuai hi” ci hi. Mihing kipil semsem a, nasepdan zong kisiam semsemin, i sepna hang zong kihilh man loin, a sepdan i kihilh leltak hi. Vanbawlkhiatna leh kumpi sunga nasem tampi in a sep uh a sep ding dan thei mahmah uh a, ahih hangin bang hang a sem uh hiam cih thei lo uh hi. A pute un sem dingin sawl a, a sepdan ding siam uh ahih manin sem lel uh hi.

Tua in nuntak manphatna theihlohna, nekzonna leh tua nasep cimtakna, leitung thupi lo hi a theihnate piangsak a, nekzonna hoih mahmah a nek a zong, bangmah sinkhamna nei lo dinga ngaihsutte lakah hih thute hangin nuntak cimtakna hanga kigui-awk hong tam mahmah ta hi.

Tua manin, na nasepna a hang theih sawm inla, tun sawmna, tun theih nadinga kilamet hun leh tun theih dan ding geelna leh maban kician takin bawl inla, tua pen ‘na lungsim kingak nadingin’ zang in. Tua hi leh, na nuntak nuamin, nuntak manphatna na thei ding hi. Tua bang na neih kei leh, lunggimna leh bangmah lo a kitheihna hangin gitloh gamtat, zu le sa tawh kidiahin, nuntak cimtakna leh sihna ciang dong hong tun thei hi.

Hih bang hun cianga lunggimna a dawn thei hoih mahmah pen, i lunggimna thu i muanngam mite kiangah genkhiat ahi hi. Councellor tamzawte in midang tungah thu tampi gen sese lo uh a, lungduai takin a zuan mite lunggimna ngaihkhiatsak zaw uh hi.

Na dikna leh ngah ding thupi ngaihsut lua kei in

United States pen a suakta gam hi napi’n ngeina thukham tawh ki-um ahih manin, thukham leh thumanna pen a taktakin mikim nuntaknaah zang uh hi. Ahih hangin hong limzat luat uh ciangin lunggimna tampi hong tun mawk hi. Mikim in eima dikna leh ngah ding khempeuh ahi ding bang lianlianin ngah sawm tek le’ng nuntak nuam het lo ding hi.
Na vengpa in sing a suan leh na khuahekna hong dal ding hi. Suah pawi a bawl uh ciangin bengngong mahmah ding uh a, suakta taka dai dide-a na omna buaisak ding hi. Vakhu khawi uh leh na huang sungah ek hong tha kha leh.. cih bekbek ngaihsunin leitung na zat leh nang tawh hong kinai peuhpeuh court a tut taak ding a gi lo vive hi khin ding a, lunggim denin hun na mawk zat ding hi.

A sing suan uh pen nang adingin khawlmun nuam, a suahni pawi bawl uh zong lungdampihhuai, a vakhu khawi uh pen nuntak a nuamsak banga na ngaihsut leh innveng hoih a nei na hiziau ding hi. A thuakden hi a na kingaihsut leh na lungsim buaiden ding a, nangma ngah ding, na dikna, na hun hoih nang ading beka zat na sawm leh lunggim bek thalawhin na buai mahmah ding hi. Midangte in na dikna leh nangma ngah ding leh hun hoih hong buaisakna uh sangin, midangte kianga na dikna, nangma ngahding leh hun hoih na piakkhiat tam nak leh na lunggimna kiam ding a, na lungdamna hong lian ding hi.

Thu hoih tawh nuntak nuam in
I ngaihsutna a makaih mahmah pen i muh leh theihte hi lel hi. Tulai leitungah i muh leh theih tamin, a kigamla pipi, a kibang het lo khawng ahi hi. Laibu sim ding, TV et ding, hekna lamlamah sin ding leh theih ding om a, mitkhap sung nangawnin zong kilamdang zel ahih manin hihte in i nuntakzia kilamdangsak mahmah hi.

Tangthu leh film na et ciangin, a lauhuai leh lunggimna lam bekbek na khuak sungah na thun leh, nuntak a nuamsak ding hi loin migi lo pana bit nading lametna tawh ui na khawi ding a, etlawmna lam hi loin migi lote kiangpan bit nadingin inn na um ding hi. Nuntak nopzawk lametna hang hi loin, mi tamlohna gamdaina mun na zuan ding a, na nuntakna pen launa tawh kidim tawntungin, tua pen nangma kibawltawm hi ding hi. “A maan, a dik, a tang, a siangtho, a deihhuai, leh pahtakhuai thute - a hoihna leh phattak thu tawh na lungsim uh kidimsak un” (Fil. 4:8) ciin Lai Siangtho in a gen pen maan mahmah hi.

A luangkhia lamin ngaihsutna zang in
I gensa bangin i ngaihsutna pen eima phattuam nading bekin i zat leh tawlhuai mahmah hi. Midang i panpih ciangin ei le ei a kipanpih i hi a, sum le pai leh a dang tuamtuamah meet lo tawh a kibat hangin lungnopna hong tun thei hi. Ei sanga dinmun siazaw, lametna tam nei lozawte, hong kileh kik ding lametna nei lo a i panpih ciangin, a gahsuah pen ei tungah na hoih sepna hangin hong kilangkhia veve mawk hi.

Thusim genpih theih ding lawm hoih nei in
Koppih nei lo a sawtpi a om ‘senior’ kicite in haksatna a tuak theih zel uh pen mah le mah kimuanlahna, bucing lo a kitheihna leh maban om loa theihna ahi hi. Nupa a kiten ciangin ta hoih tak, gam luah ding, Khristian innkuan.. cih lam bek ngaihsutna hi lo a, nuntakna ‘balance’ a bawldik ding hi, kici hi. Tua muna a poimawh mahmah pen lunggimna kihilhtuah theihna leh i kingakngamna ahi hi. Thusim khempeuh kihilh kisam khol lo hi. Ahih hangin, lunggim huna koppihte kianga thusim hilh ngam lo leh hilh taak lo nupa kikopte’ nuntak pen tawlhuai mahmah hi. Hauhna leh minphatna in vengsak thei lo a, gam khangto ah nupa kikhenna tamsak mahmah hi.

Kilungnuamsak in
A lunggim ngei lote pen mi ngeina nuai lam hi nuam uh a, lunggimna pen mi ngeinate neih ahi hi. Gensa bangin, na lunggim ciangin mi bang lo na hi pah kei a, a taimangsan nading na zon danah na pilvan kisam hi. Mikim in lunggimna taisan nading lampi kizong ciat hi. Eima nuntak a nuamsak lo, zahtakhuai lo, leh lunggim kibehlap nadinga lungnopna zon khak pen poi mahmah hi. Thangtatna leh nu le pa (sex) lama lungkimna zong pen dinmun lauhuai taka nuntak theihna ahi hi. Tua sangin kimawlna, exercise lak, ngaihsutna dang hong neisak thei ding lam ngaihsunin, zing thawh baih, khe tawh saupi pai, lawm thak bawl, pak leh ganhing buaipih, khualzin khiat, kimawlna mun a pai, naupang tawh kimawl, tumging lam lim zat..... cih khawng pen lungsim gimna a dawn theite ahi hi.

Lunggimna pen mawk taikhiatsan sawm kei in. Hong tung pelmawh dingin ngaihsun lel in. A ngah ding leh maingat dingin kigingkholzaw lecin tawldam ding hi. Pelh theih ahih leh pelh inla, pelh theihloh ahih leh buai gawp loin a vensak ding dan ngaihsun in. Na lunggimna pen nangmah hong puksak hi loin, na thanemna pen hong thahatsak vanzat hoih khat suaksak sawmin ‘hangsan’ takin maingatzaw in.

Khen - III : 13. Muhkholhna
Henry Ford in, “Mittawte sang a mi hehpihhuaizawte pen mit hoih napi a muhkholhna (vision) a nei lote hi” a cih pen maan mahmah hi. Lawhcinna pen bangbang hi leh, mi lawhcingte pen muhkholhna/geelkholhna saupi a nei mi hi hamtang uh hi. Na mukhia thakte, politics, science, leh economics lama mi lawhcingte pen mailam saupi a mukhol siamte ahi uh hi.

I gensawm tak pen Mikang pau a ‘vision’ kici pen ahi hi. Tua pen ‘muhkholhna’ ciin kikoih ziau hi. Lai Siangtho sungah Kha tawh kipawlna hanga mai lam hun pai ding a mukhol kamsang tampi kimu hi. Tua lam i gen kei ding a, mailama hong tung ding nate lungsim mit tawh a muciante gen i sawm ding hi.

Muhkholhna a nei lote in tuni a i batphak nate ciang bek kingaihsun hi. Tuni a i muhkhakte pen midangte piansak hi a, tuate tawh muhkholhna nei lote kibuai mahmah lel hi. Tua manin, tuni a i gentheihna pen i muhkholhna a hoihloh man hi leltak hi. Mailama hong tung ding pen kuama’n a taktakin uk nai lo uh ahih manin ‘vaihawmpa’ hih haksa lo a, hong pai kik ding mailam hun a theikhol mite adingin tuni a hong tung pen uk haksa lo hi.

Katherine Logan in, “Muhkholhna pen pawlkhat in guahzu ding bangin ngaihsun uh a, mopawi thupi taka kihel dinga cialna banga ngaihsut ding ahi hi” ci hi. Tua muhkholhna a thupina leh a kisapna pawlkhat en dih ni :

Nasep hong thalawpsak hi
Muhkholhna in i sungtawnga hatna hong zangkhiasak a, i zatsiam naak leh i sunglam pan hatna leh cihtheihna (potentials) pen hong lian semsem hi. Mi tampite lawhcinna pen loterry ticket mat bang lel a kaamphatna tawh, upmawhlohpi a hong tung bang ahi hi. Ahih hangin, muhkholhna a nei hoihte in ahih leh, pilvang takin ngaihsun bek hi loin, a geelna bang ua hong tun ciang lungdam dan ding a kilawm ciang thei uh a, a nuntakna uh kho/kip mahmah hi.

Tennis history a minthang penpente laka khat leh thaman thupi a ngah tampen Roger Federer in, tupna leh muhkholhna kician tak nei a, tua a muhkholhna in thaman a ngah dinglam theiciansakin, a ngah hun ciangin mite lungsim nasak het lo dinga lungdam siamsakin, a hatloh hun ciangin zong a thuak mahmah bangin om se lo hi. Nuntakna kip le kho nei ahih manin a kimawl et nuam mahmah hi.

Nasep manpha sak hi
Bangbang i sem zongin, a tawp nading i muhcian leh sep nuam mahmah a, kimazang hi. Kumpi nasem tampi pen pute in “Sem in” a cih bek sem uh a, a tawp ding dan, a manphatna, a lawhcinna leh a lawhsap theihdan ngaihsut siam nading lam lamlak lo uh ahih manin a nasep uh ciamtak gawpin, lawp tak a nasep ding sangin khasum bek lametna lungsim nei uh hi.

Muhkholhna tawh kizui-in maban om a, maban in a zo dingin hong hanthawn-in, nasep ding dan a vaihawm taktak pen muhkholhna ahi hi. Hih thu a thei lote in a leitung nuntak sung uh cimtak takin zangin, nuntakna hang nei lo hi-in kithei liang uh hi. Muhkholhna tawh a tawp nading, a lawhcin theih ding dan a theite in a nasep uh manpha sakna leh lawpna nei uh hi.

Hong tung ding a vaihawm hi
Khuaphat laiin damdamin i gamta uh a, guahpi hong zu vatin, buai cihtakin i buai gawp uh hi. Khuahun hoih laia a kigingkhol mite pen mipil ahi uh hi. Guah pen a zuk hun ding lian i theihloh hangin, zu kik ding hi, cih kithei a, tua manin kiginkholh pen pilhuai mahmah hi. Guah banga peel lo-a hong tung ding i theihciansa bangzah hiam om hi. Muhkholhna hoih nei dingin i kihanthot lai-in, nakpi taka nasep ding lam a gen i hi tuan kei hi. Hong tung ding hun ngaihsutkholna tawh nasep bulpat a, tua bang nuntakzia neih theih ahihna thu a gen i hizaw hi.

Muhkholhna meetna pen thu thak hi lo hi. Paunak 29:18 ah, “Pasian lamlahna (Kamsangte thu) a kizuihlohna gamah gamsung mite pheengtat gawp uh hi...” ciin na gelh khin hi. I minam lungsim kip lo tak kua piansak hiam? Kigawmkhop kisam sa mahmah napi-a a dawn i tun zawhlohna bang hang hiam? Pawlpi makaite kilem theihlohna bang hang? A dawnna tom cik pen, ‘Muhkholhna kician i neihloh man leh, a lampi tot ding i theihcianloh man’ hi kha ding hi.
14. Muhkholhna A Nawngkaisakte

Mai lam muhkholhna hoih nei dingin mi pil hih kul sese lo hi! Mikim hih theih leh nuntakna sunga guanlut theih ahi hi. Hih thei lo dinga hong ngaihsunsak pawlkhat om hi.

Hun paisa in hong buaisak
Hun paisa, lametna bang hi lo a piangte enkikin, tuate hangin hong tung kik ding kingaihsun ngam lo thei hi. Nunglama om nate mangngilh a, mai lam om nate lunggulh dingin Lai Siangtho in hong hanthot laitakin, mai lama om nate en man lo liangin nung lama om nate etkik pen nuam kisa sese hi. Tua pen khawlsanin hi leng, a kimkhat zawhsa bang ahi hi.

Mi khat in uili khawi a, tua uili pen sang pipi kipeek satsat thei hi. Ahih hangin a khawipa in limlang bawm sungah koih a, sangpi-a a kipeek ding ciangin limlang in dal zel hi. Tua banga sauveipi a kikoih zawh ciangin tua sanga sangzaw a kipeek sawm nawn lo a, limlang a lakkhiat uh ciangin zong sangpi kipeek nawn lo pah hi. A kipeekna a dal, a kikoihna masa tawh kituakin a hatna leh theihna kikhawlsak hi.

Tuma lama na sepsa ciang bekah na omden leh tua ciang bek mah na tunna ciang hi pah ding a, kuama’n hong panpih thei lo ding hi. Tua sanga zaizaw leh sangzaw-ah om thei cin-a, na mabanah tua hamphatna omin, kuama’n hong suhsak thei lo hi.

Gensiatna in hong buaisak
Esopa thupil kici sunga pata laa zuak tangthu i thei ngei hiam? Hun paisa in buaisak lo a, tuhuna a kiim-a amau tawh a omkhawm mite in hun hong pai lai ding ngaihsun thei lo ding zah dongin buaisak uh a, a tawpna-ah minsia takin om uh hi. I muhkholhna a buaisak lianpi pen hih thute ahi hi - gensiatna, kiphunsanna, meetpih ding hi het lo thu nisimin i za uh a, hihte pen theih zong phamawh kei, ahih hangin, mai lam kalsuan nading a buaisak lianga lam nawl lam et nadinga i zat leh i kalsuan hong buai-in, tang takin kipai thei lo ding hi.

Haksatna in hong buaisak
Haksatna pen haksatna hi a, mikim in i tuak kikim lo, kibang lo cih thu bek hi! ‘Haksatna tuak kei in!’ ciin kuamah kam kihilh thei lo a, ‘Haksatna in na muhkolhna buaisak kei hen’ kici zaw hi. Billy Graham in muhdan khat nei a, “Nopsakna leh hamphatnate in ‘haksatna’ zahin hong seek taktak lo hi” ci hi. Siktang sum (coins) zong a manpha hong suak theih nadingin mei-am ah tamveipi kikoih hi.

Demosthenes pen Greek hun laia leitunga thugen siam minthang khat ahi hi. A pau-awk cihtakin awk a, thugen dinga a dinkhiat masak penpenin ciamnuih a gen hi pen a, lungkia-in tukik tanghial hi. Ahih hangin Demosthenes muhkholhna pen thugen siam ahih manin, a sung lam tupna in hih thei a, a pau-awkna bekin a vision liah hi, cih thei hi. Tuipi geiah pai-a, pau-awk kawmkalah tuipi gei-a suangneute a kamsungah koihin, a aw neihzah tawh tuipi kiangah thugen hi. Tua bang a sauveipi a hih khit ciang a pau-awk bei-in, amau gam bek zong hi lo, Greek hun laia leitung bupa thugensiamte lakah history in ciamtehden hi.

Amah bek hi kei, Julius Ceasar pen sibub natna nei hi napi general minthang ahih zawh ciang kumpi (emperor) ciang dong tung hi. Napoleon pen innkuan genthei pan khangkhia ahih hangin kumpi sem lo tuan lo a, Beethoven’ tumging thupite pen a bil in bangmah a zak theihloh hangin thupi lo tuan lo hi. Charles Dickens pen khebai hi a, genthei innkuan pana piang leh khangkhia ahi hi. Ahih hangin thugelh siam hih ding pen muhkholhna kician takin nei a, mi hau leh lai siamte in a neihloh uh, a gentheihna pen a thugelh tangthu mungpi-ah zangin Victorian England hun lai-a tangthu gelh siam mingthang hong suak hi.

Haksatna tuak lo dingin kingaihsun ngei kei inla, na haksatna tuak pen na muhkholhna hong muciansak ahih theih nadingin na lungsim kigingkhol zaw in.

Muhkholh siamlohna in hong buaisak
Muhkholhna hoih i deih a, nei thei hi-in i kitheih hi. Ahih hangin kithei kha lo thei hi!

Khanlawhna a tunlai hunin mi khat in tua thu kim takin na gelh a, tua pa in, “Thupi lua mahmah ahih manin a mun pana et sangin galkhat panin en le’ng kidawkcian zaw a, galkhat panin enin, a kisam teng ka ciamteh thei hi” ci hi.

United States-ah van muhkhiat thakte ciamtehna Patent Office cih khat om a, kum 1800 kiimin, “Van muhkhiat tamlua ta, muhkhiat ding om nawn ke’n teh, office kikhak mai hen” ciin ngaihsutna om liang hi. Tua zawh cianga muhkhiat thak a tamzia leh ciamteh sese loh a, ciamteh maa zatpah (patent pending) tamdan i thei ciat ding hi.

Muhkholhna hoih nei dingin na tehkak (compare) thei dingin tampi theih kisam a, muhna mun maan kisamin, kinai taka et sangin galkhat pana et a hoihzawk hun zong om thei hi. ‘Hun hong pai ding mit’ zanga, ‘tuhun nuntakna’ a zangsiamte muhkholhna maan nuam mahmah hi. Frank Gaines in, “Muh theihloh mu theite bekin sep theihlohte sem thei hi” ci hi.

Maban nei lo hi-a kitheihna in hong buaisak
“Tu-a i omna mun ngaihsutsut sangin, koi lamah pai ding i hiam, cih thupizaw hi” ciin Oliver Wendell Holmes in gen hi. I piankhiatna thu-ah gen ding i nei kei a, i picin toh ciangin eima theihna bang ciatin, eima deihdan tawh kituakin leitung kibawltawm lel hi. I kum tawh kituakin tua in hong ukcip semsem hi.

Pawlkhat in a mailam hun a hong piang ding nate in tuhun nuntakna uk hi-in thei uh a, tua thangah awk-in, a maban uh pen amau deihtel theihloh bangin ngaihsun uh hi. Tua bang a ngaihsun mite pen ‘mi ngeina’ i cihte hi uh a, amau mailam hun ding kician taka a ngaihsunkhol theite pen, ‘Mi ngeina tung lam’ i cihte ahi uh hi.

Launa tawh a kidim tawntung nuntakzia a neite mi lawhcing hi ngei lo a, maban a haksatna mu a, zawhdan ding a ngaihsun ngamte pen mi lawhcing hi zel uh hi.

15. Muhkholhna A Taktak Suaksak

Thugen bek a siam, a taktaka nungta lo, nuntakzia hoih gen ding thei mahmah napi a nuntakna leh sepkhiatna-ah kilangkhiasak tuan lo na mu zel hiam? Tua bang mite nuntakna pen hehpihhuai mahmah hi. Nang zong tua bang mite lakah na kihel hun zong om kha ding hi.

Tua bang mahin, tu-a i gen ding zong muhkholhna (vision) hoih mahmah nei a, a taktak suaksak tuan lo mi om thei ahihna thu tam gen kul loin i thei ding hi. Tua manin geelkholhna bek tawh a kalsuan mi na hih leh lawhcing tuan lo ding cin a, tua manin tua muhkholhna pen a taktak suaksak dingin hih anuaia thute lim takin ngaihsun in.

Na gencian thei hiam?
Dotna kilawm lua lo hi. Gencian theihloh pen muhkholhna hithei ding hiam, na ci kha hiam? Mihing nuntakzai kibang het lo hi. Kha Siangtho ngah nadinga i kipiakna a kibatloh dan khawng na tuat ngei hiam? Mang a nei tektek i gensiamdan a kibatlohdante khawng zong e...

Muhkholhna kician na neih leh tua na muh pen gencian thei ding hi teh. Muhkholhna i gen ciangin lawhcinsak ding a gen i hi hi. Midangte lawhcinsak ding hi loin, nangmah mahmah in na lawhcinsak ding ahi hi. Midang’ muhkholhna hoih na lawppih laitakin, nang aa bangin a ngaihsun leltak na hi hiam? Tua pen maan mahmah lo hi. Muhkholhna maanah lawpna, zawhsawmna, leh tua lam heka kalsuan pahna om hi.

Tu-a na nuntakna encian in
Muhkholhna a taktak suaksak pen khatvei thu-a piangpah thei hi lo a, lampi saupi kisam hi. Khualzinna lampi bang hi a, kalsuan khiatna mun om hamtang hi. Muhkholhna na neih leh tu-a na omna mun theicianin, tua panin na tupna mun tung dingin sum, thatang, hun leh a kisam dangte na geelkhol thei ding hi.

Muhkholhna in man nei
Mukholhna (vision) leh mang/sunmang (dreams) kibang lo hi. Mang pen ngaihsutna pai kawikawi bang hi a, bei kik ziau hi. Lai Siangtho ah, “Mang tam man le’ng a mawkna mah tam...” (Thkna. 5:7) ci a, bangci bangin i gensiam zongin a meetna taktak om lo hi. Muhkholhna ahih leh lawhcinsak i ut mahmah i mabana kician taka hong om ahi hi. A lampi-ah supna, kipiakzawhna, leh haipih phial kisam a, tuate thuak dingin na kiging hiam?

Deihtel ding tam
Gam khantohna tawh kizui-in muhkholhna hoih neih theih nading hun hoih tam a, hun hoih a tamna tawh kizuiin deihtel ding zong tam pah hi. Mi pawlkhat in khatvei thu-a lawhcinsak nop, a kituak het lo nei thei uh hi. Deihteel ding a tamna mun peuhah teel khialh baih hi. Khualzin dinga khuanawl lampi tampi tak a kisuktuahna muna ding bang na hi a, na pai nopna mun na teel pah kisam hi. Sumbawl na ut thei a, tua na utna bek pen muhkholhna cing zo lo hi. Bangci bang lianin sumbawl ut na hiam? cih pen na theihtel masak kisam hi.

Hong kilamdangsak ding hi
Lawhcinna in nuntakna-ah kilamdanna leh nuntakzia kilaihte tonpih hi. Kilamdanna hong tung ding pen kigingkhol lopi-a na muhkholhna lawhcinsak na sawm pen maan lo a, kigingkhol a, ei le ei kizawh masak ding ahi hi. Nang bek hi loin, na lawmte leh na kiim na kianga mite zong hong kilamdang ding hi cih thei khol in.

Mi lawhcingte kiangah om tam in
Lawhcinna lampi khat pen mi lawhcingte kianga tam om ahi hi. Pawlkhatte pen i lawmte mahmah en le’ng i thukikup thupi het lo, cih kithei pah hi. Mi pawlkhat pen mi thanuam leh lawhcingte tawh kigamla den uh hi. Mi lawhcingte en inla, dotna dongin, a ngaihsutna uh theih sawmin tua ngaihsutna bang ngaihsun inla, ahih theih leh a hoihlohna leh hatlohna uh ciang dongin a nuntakzia uh zong theih sawm in.

Na nuntakzia-ah kilangkhiasak in
Na muhkholhna pen lawhcing dinga na upna pen bang hun peuhin na lungsim luahden ahih kisam hi. Na thugen leh na gamtatzia panin zong na kiim na kianga mite in lawhcinsak na sawmna thu a theih uh kisam hi. A guka lawhcinsak sawm pen haksa mahmah banah, a sia lam sep baih hi. Tua manin lawhcin na sawm leh, na kiangate na theihsak ngam ding ahi hi. Pua lama nang le nang na kimuanna in sung lamah kimuanna hong pia thei hi.

Hong buaisak dingte lak panin kigingkhol in
Ma muhkholhna in mi nuih suaksakin, hong buaisak ding uh hi. Piangthak lote adingin piangthakte theihsiam a haksat mah bangin, muhkholhna a nei ngei lo mite adingin theihsiam haksa mahmah ahih lam thei in. ‘Na hoih mahmah, lawhcinsak theih ding hi’ a cih uh hangin a lungsim sung uah, ‘Nang leltak pen lawhcing lo ding hi teh’ cih om thei a, phamawh sa sese kei in.

Na lawhsap theih nadingte pelh in
Kikholhkhop nuamsa mi na hih leh, na lawm ding na teel ciangin na pilvan mahmah kisam a, na lawhcin nading hong huh thei ding na teel kisam hi. Kikhawlkhawm diamdiamin, hun tampi kimaimangsakin, meetna om lopi in hun tampi kimawk beisak thei hi. Tua banga hun zat sangin, tua bang hun hong zatpihte tawh kihkholhloh ziau hoihzaw hi.

Hih bang i gen ciangin mi tawh kikholhloh ding cihna hi lo hi. Kiniamkhiatna leh deihsakna tak tawh kholhpih veve inla, ahih hangin na tupna a lawhsamsak ding ahih leh hong thu kikuppih uh, hong ngaihsutpiakna uh zang loin, a kiang uah tam omloh ding a gen i hizaw hi. Na muhkholhna a tangtung thei lo dinga a ngaihsun mi khat tawh na kikholhkholh leh tangtung lo takpi ding hi.

A lawhcingsak thei dingte ngaihsun in
Na tupna mun pen mitsuan den inla, ahih hangin lampi a na kisapte nei dingin kithawikhol in. Lai na sim ciangin, film na et ciangin, mi thugen na ngaih ciang, na tupna mun hong tunpih thei ding hiam cih ngaihsun in.

A ngeina sanga nasiazaw in sem in
‘Na hoih lo sem in’ cihna lam hi lo hi. Mite in nai 9 pan nai 4 kikal sung lawhcin nadingin a sep uh leh, nang tua sanga tamzaw, naikal khat le nih behlap in. Mi theih, mi sin, mi sep nop ngeina sanga nasiazaw sem ngam in. Tua pen lawhcinna lampi baihpen ahi hi. Hih laibu hong piankhiatna hang khat zong hih thu ahi hi.

Na muhkholhna bang a nei mi a om leh panpih in
Meetna a om kei phial zongin tua bang mite panpih in. Tua in na sepna-ah hangsanna hong pia-in, thuakzawhna hong neisak ding hi. ‘Septic tank hah sianga sum thalawh pen nekzon nadingin a hoih ding a lamen khat om a, tua bang nasep a lawhcinpih khat kiangah a sepzia ding thei nuam ahih manin a khawnkhongin huh ding ngen a, lawhcing takpi hi’ cih pen mite gen theih khat ahi hi. Tua bang zah donga kipiakna in lawhcinna samkhia hamtang hi.

Khen - IV : 16. Tupna Mun

Mi lawhcingte in muhkholhna hoih ciang bek nei-in, kithawikhol bek lo uh a, gen bek tawh lungkim loin, tupna mun (goal) kician nei-in tun sawm hi. Mechanic siam mahmah khat om a, a kipei thei khat bawlkhia ahih manin kithupingaihsut mahmah hi. Ahih hangin tua set pen a manphat nading om mahmah lo hi. Set pen bawlkhia thei a, manpha taka a kizat theih nading goal nei lo hi.

Ralph Waldo Emerson in, “Amau lampi a theite adingin leitungin lampi bawlsak hi” ci hi. Maan mahmah hi. Na tupna mun, na goal pen theician mahmah in.

Lawhcinna mualsuang masa hi
Lawhcinna thu i gen a, mi lawhcing sawm (10)te kiangah a goal uh dong lecin, dawnna sawm na ngah kik ding hi! Sum lama lawhcing mi hi a na theih khat in minthanna lama a tupna (goal) a tung ahihna thu hong hilh thei a, lawhcing lua lo a na theih khat in innkuan sung nuntakzia a makaihna-ah lawhcing ahihna thu hong hilh thei hi. A tangpi thu-in mi a tamzawte in lawhcinna pen sum tawh kiteh nuam mahmah hi. Ciamnuih in kigen thei zel a, “Mi practical-te pen a deih uh neih theihdan a theite hi uh a, philosopherte pen mi deih mahmah a theite hiin, mi lawhcingte pen amau deih taktak a neite ahi uh hi” kici hi.

Tupna mun tawh bul hoih tak pat a, a banbana sep tohtohna pen lawhcinna ahi hi. Tua ahih manin, tupna mun na neih kisam hi.

Tupna mun muhcetlohna in lawhsamsak
Lungsim ngaihsutna tawh muhkholhna kician neih bek zong hi loin, mit a muh theihna zong lawhcin nadingin kisam mahmah hi.

1952 July 9 ni-in California tuipi gei pen meii in khuhcip hi. Catalina tuikulh khanglam tai 21 ah nupi kum 34 mi khat, Pacific Ocean sungah California tuipi peeksuak sawm om hi. A lawhcin leh numei laka tua mun peeksuak thei masapen hi ding hi. A min pen Florence Chadwich hi a, hun khat laiin English Channel peeksuak khin ahih manin tu’n zong a lawhcin ding kilamen hi.

Tua zingsang sese in meii pen om bek zong hi loin, khua dam mahmah a, meii sah lua mahmah ahih manin a tupna mun California tuipi gei genloh, a kianga amah a cingte tembaw nangawn mu thei lo hi. Naikal tampi peek ta a, mi then bangzah hiam in TV pan en uh hi. Ngasa lauhuai shark tamin, tua bang ngasate in a neekloh nadingin amah a cingte in rifle puaksak dangdang uh hi. Pumpi thahatlohna pen tuisiamte haksatna hi loin, tuivot pen a galpi pen uh ahi hi.

Naikal 15 tak a peek khit ciangin khuadam sa lua mahmah ahih manin lakhia mai dingin ngen hi. A kiangciika tembaw panin a nu in lungkia lo dingin hanthawn a, tuipi gei piaunel mun zong gamla nawn lo ahihna thu hilh samsam hi. Ahih hangin Florence dakkhia a, a kiim a kiang a khuadak hangin meii sahlua mahmah ahih manin bangmah mu thei lo hi. A tui peeknu lungkia ahih manin cih nading dang om nawn lo a, naikal 15 leh minute 55 tak, a thatang neih khempeuh phial tawh a peek zawh ciangin a tupna lawhsamin tembaw ah lakhia uh hi.
Hih nu in thuthak lakhawmte kiangah, “En mah un, ka kaamsia hi. Piaunel mun pen meii in liah lo hi leh, mit a muh theih lametna ka nei ding a, peeksuak lua peuhmah ding hi’ng” ci hi. Tai 21 a peek dingah tai 20 peeksuak khin a, a tun dek ciangin meii hangin lawhsam hi.
Ahih hangin hih nupi pen a kuhkal mahmah khat bel hi. Kha nih zawh ciang peek kik a, lawhcing takpi hi. Numei laka Catalina Channel a peeksuak masapen ahih banah naikal 2 takin tua hun laia pasal record kheng/khum mawk hi.

Tua bang lianga nupi thupi leh kuhkal in zong a tun nading mun kician taka a muhlohna hangin lawhsam thei hi. Eite leltak pen tupna mun mu lo a mawk kalsuan gawp ding hi lo hi.

Tupna mun neih pen nuntakpih taak hi
Lawhcin sawmna hang bekbek tawh tupna mun (goal) neih ding hi lo a, mihing muntakzia ngeina ahih manin goal neih ding hizaw hi. Kigui-awkte, lungkiate, mibang lote in goal nei lo uh hi. Goal neihna in mihing ngeina hi cih hong kidawksak hi.

Lai simna-ah zong tupna mun neite mah citakin lawhcing uh hi. Tua bang mahin, sepna khat peuhpeuh - kimawlna, sumbawlna, siamsinna, lo khawhna, mawtaw bawl sinna adg. ah tupna mun nei lote pen a nasep uh ta tam semsem leh tua hanga lunggimna leh lungkiatna lian semsem mawk hi. Tupna muna lawhcinna in lungdamna, lungnopna leh tawldamna piangsak hi. Tua ahih manin, sepna khat peuhpeuhah tupna mun neih pen nuntak manpha kisak zawk nading ahih manin nuntakpih taak ahi hi.

Siavuan khat in mihingte lakah sawtdam diakte tangthu limtakin kan a, a sawt damna uh hang a kibang lianpi khat a muhkhiat om a, tua pen tep le muan, zu dawn, thathang hatna cih lam na hi het lo hi. ‘A khansau mite in tupna (goal) nei ciat uh hi’ ciin gen hi.

17. Tupna Mun Neih A Manphatna

Tupna mun nei lo a nasep pen cimtaak baih a, a manphatna om lo thei hi. Nasep ding khat peuhpeuhah a tawpna om khin a, lawhcin i sawmna leh i sepdan kilamdang hi lel hi. Tupna mun nei kei le’ng, i kipatna mun i thei kei ding a, i tunna ciang leh i maban bang hiam cih kithei lo ding ahih manin tupna neih pen manpha mahmah hi.

Nasep manphatna kilangsak hi
Na i sep ciangin i thupingaihsut leh i thupingaihsutlohna pen i tun sawmna in sai nuam mahmah hi. Kumpi nasem pawlkhat in a sep lai uh pen bang hangin sem uh a, bangci bangin tawp ding hiam? cih a theihloh manun nasep mazang thei lo hi kha thei hi. Company ah kilim hilh mahmah uh hi. Tua banga a goal uh a kihilhcian zawh uh ciang a sepdan mazang leh baihzaw thei uh a, thanuam-in, a tawpna pen a tawlhuai mahmah ding ahi zongin amau leh amau kizo khin uh hi.

A kisap dan hong ngaihsunsak
Kimawlna-ah goal khum dingin khauh taka khatvei suih bek thupi lo a, ball hawl, lang lamte khem, hat tai, dam tai, midangte kianga piaksawn leh midangte pana lakkhiatte kisam khin a, a hun taka zatsiam ding ahi hi. Mi pawlkhat in tuhuna a bawllung hawllai uh buaipih lua uh ahih manin a zawh cianga hong tung ding ngaihsun kha lo thei uh hi.
Na khat peuhpeuh i deih om a, mi in kisam a sak omin, a kisam taktak om hi. Tua ahih manin na khat peuhpeuh mite in kisam a sak man uh hiam, i deih man bek hiam a sem loin, kisam taktak ahih manin sem le’ng tua pen manphapen hi.

Thatang hong zangsiamsak
Hun khat laiin ngapi (whales) 300 tak pen tuipi gei piaunel lakah a gualin si cih thu kigelh hi. A hang a kancian uh ciangin hih ngapite in a ann uh nganeu, sardineste pen mat sawmin delh uh a, nganeute pen tuipi gei lam, tui thuklohna lamah taiin, ngapite in ngaihsutna nei loin mawk delh uh a, lianin gik lua uh ahih manin tui thuklohna mun a tun uh ciangin tang thei nawn lo uh hi. Nganeute baih taka a pai khiat theihna munah awkcip uh hi. Ngapite pen a thatang uh zong hatin, thupi uh a, a goal uh pen ann khatvei nek ahih hangin a ngaihsutna uh zang siam lo uh ahih manin a hatna uh pen sihna hong suak mawk hi. A goal uh pen amau adingin lauhuai ahihna thei lo uh ahih manin a hatna uh mawk zat uh a, sihlawh uh hi. Thatang hatna thu tawh hatpen hi sawmna pen sihna hi thei hi.

Ngaihsut siamna hong neisak
Kimawlna tawh tehkak kik leng, na goal omna mun, a gamlatna, midang pass ding dan leh a kisamte na theih kei leh nangmah kimuanngamna in hong taisan ding a, na ball pen na langlam te’n baih takin hong suhsak ding uh hi. Mi tampi in mailam maban i ngaihsun uh a, i sepkhialsate ngaihsun kikin, ‘tuhun’ i ngaihsun thei kei hi.

Thugensiamte, na genciansiamte, haksatna lianpi zong baih taka a genciansiamte in a gukin kibatna nei uh a, a goal uh theician uh hi. A thugenna uah tun nading kician tak tupna nei uh a, tua lam hekin hong paipih den uh hi. Nekzonna, siamsinna, leh nisim nuntakna-ah hih thu pen kisam mahmah hi.

Thalawpna hong neisak
Tang nasepnaah thalawp takin - pawlkhatin niangtui awmin, pawlkhat in sing at-nenin, pawlkhat in khuam kua to-in, pawlkhat in cement tokin a om pen a kibuai nainai tawh kibang a, a tupna uh pen inn lam ahi hi. Tupna mun kician tak i neihna thei-in kibuai lo hi. Ukcipna leh uniform tawh, khasum tam leh vanzat hoih pipi tawh na i sep hangin, i sepkhopna ii goal i theih kei leh i lawpna hong bei pah ding a, nasep mazang thei taktak lo ding hi.

Tunna ciang kitheithei hi
Goal na neih kei leh na mainawt dan, na maban leh tu laitaka na dinmun na thei kei ding a, na leitung pen nangma a hi loin, midang in hong bawlsak ding hi. Na nuntakna-ah vaihawm thei loin, nuntak na cimtak semsem ding hi.

Maban geelkhol dingin hong panpih
Maban a geelkhol ngei lo mi pen makai hi ngei lo hi. Lawhcinna lim (map) na gelh simin na lampi ding pen bangci banga kicianin na gelh hangin, na tun nading mun na gelh masiah na map gelh pen a zo lo cihna na hi hi. Kum zalom 18-ah thugensiam leh inventor minthang Benjamin Franklin in, “Mi khat bek in zong geelna hoihtak a neih naak leh leitung nuntakzia pen nakpi’n kilamdangsak thei ding hi cih ka um cinten hi” ciin gen ngei hi.

Nasep pen sepkhiat suaksak hi
Goal in nasep (activity) pen sepkhiat (output) suaksak hi. Kimawlna mah tawh tehkak kik leng. Ball kituh pen nasep hi a, goal a khum pen sepkhiat ahi hi. Goal nei loin kimawl leng activity pen nasia zaw ding a, ahih hangin kung i kipiak theih kei leh output kinei thei lo ding hi. Lawhcinna pen nasep (activity) ah teh ngei kei in. ‘Mibuai’ i cih mai, a buai mahmahden, ‘man ke’ng’ a ciden, sepkhiat gen ding a nei tam lote pen goal kician tak nei masa lo a ‘active’ pongmawk hi nuam mahmah uh hi.

18. Bangci Bangin Tupna Mun Nei Ding?

Kimawlna tawh i teh kakkak hangin i gen pen mihing nuntak ahi hi. Damsung nuntakna pen kimawlna tualpi sungah a zang bang i hi hi. Tupna mun neih pen damsung i nuntakzia-ah khahsuah ngeiloh ding hi a, nisimin a thak bawl denin, i lawhcinden ding ahi hi.

Na len ma-in na tuk nading mun theician masa in
Khualzin mi khat pen lampi kisuntuahna-ah papi khat tawh kituak hi. “Pu aw, hih lampi-in koi mun hong tun ding hiam?” ci-in a dot leh tuapa in, “Koi munah paisawm na hiam?” ciin dong kik hi. Khualzinpa in, “Ka pai nading lam zong thei tuan keng” ci hi. Tua leh tua papipa in, “Tua bang ahih leh koi lam peuh tawn lecin bang kilamdanna om hiam?” ciin dawng kik hi. Na lampi tot ding leh na tun nading mun, na tun sawmna theician mahmah in. Tuate na theihcet kei leh lauhuai mahmah hi. Mangthang kha ding hi teh.
Na sep sawm pen gelh sin dih ve

Gelh a koih ciangin sawm taktak i hihna kilangsak a, tua banah ngaihsutna siangthosak hi. Gelh siam kul lo. Na gelh siamloh man leh na gelh hoihloh manin lawhcing lo tuan lo ding hi teh. Tua sangin na sep ding leh sep sawmte a masa leh a nunung ding geelna na neih leh neihloh theih nading beka gelh na hihna kiphawk gige in.

Kician takin na tupna mun khen in
Etsak nadingin, pumpi thathak lakna lamah exercise lak, kha lamah kikhop, Lai Siangtho sim, thunget.. tua bang zelin, nekzonna, siamsinna, innsung buaina vensakna, sum zatdan, leh a tuamtuam ahih leh a tuam tekin khen inla, a kibuaisak thei leh a kihuh thei a om hiam cih cian takin tuat in. Tua banah, tu huna lawhcinsak pah ding, kum 5 khit cianga lawhcinsak ding, sum kisamte... cih bangin khen in.
Tua banah, na tup na sawm pen a lawhcing takpi dingin a hoih mah hiam? Na lawp lai hun tomcik sung beka hoihsa na hi kha hiam? Hoih takin ngaihsun kik inla, lawhcinsak takpi dingin a manpha taktak hiam, cih lim takin ngaihsun in.

Na sep taktak ciangin
Na ngaihsutna bangin bul na pan taktak ta hi. A hoih lo lai a om hiam? Upmawh sangin a baihzaw hiam? Na geelkholh hun sangin tung baihzaw maw tung hakzaw? Na upmawh hetlohna panin haksatna leh buaina hong om hiam? Enkik zelzel inla, na tupna pen a ngeina bang hiden thei leh hoih hi. Tua hi lo a na tupna mun na laihden leh, nang le nang zong kimuanlahna na neiden ding hi.

Lous Pasteur : Lous Pasteur pen amau hun laiin Chemisty subject-ah amah kaana minthang leitungah om lo phial dinga mipil khat ahi hi.

A lawmngaihnu tawh May 29, 1849 in kiteen sawm uh hi. Tua ni a tun ciangin Pasteur meel muh ding mahmah om lo hi. Kiteenna uap ding teng zong tung khin uh a, zipipa meel kimu nai lo ahih manin mipite sinkham uh a, a laboratory ah na semin, a kiteen ni uh mangngilh kha hi dingin um uh hi. Laboratory a et uh leh na om takpi a, biakinn lamah paipih pah uh hi. “Tuni pen na kiteen ni ding uh ahih lam thei lo na hiam?” ci-in a dot uh leh, “Tuni a experiment ka sep ma-in bel thei mah ing. Experiment ka hih ciangin mangngilh ing a, nong pai zenzen uh lungdam mahmah ei” ci ziau a, zui-in, kiteenna nei uh hi. Lawhcing dingin nasepna haipih phial zong kisam hi.

Khen - V : 19. Hun

Bank khat om a, tua bank in zingsang simin Rs. 86,400 hong piaden hi. Tua sum pen na deih leh zangbei theiin, na deih kei leh zatbeiloh theih a, zang vet loin zong na ihmut san thei hi. Ahih hangin ngeina kician leh hoih tak om a, tua sum pen na ngah ni-in na zanga na zang kei zongin bei veve hi. Zat val na neih hangin bangci mahin a zing a thai adingin na koihkhol kiphal lo hi. A beisa ni a na zatsiam leh siamloh ngaihsun het loin a zingsang ciang a thak sinsen Rs. 86,400 mah hong kipia kik hi.

Tua bang dinmunah om taktak lecin bangci bangin na om diam? Mi pil ngeina na hih leh ni khata na sum ngah pen siam taka zat ding dan na ngaihsun khia pah ding hi. Na kisap diak na lei masa phot dinga, tulsawmgiat nuai lam man na khat peuhpeuh baih takin na lei pahpah thei ding hi. Ahih hangin car, innmun leh inn hoih na deih a, tuate ni khata lei zawh lah hi lo, sum lah kikhol thei lo lai, bangcih ding?

Bank pen ‘hun’ hi lel a, nisimin second 86,400 hong piaden hi. Na deih bangbangin na zang thei a, zang siamin siam kei leteh bei veve hi.

Mi lawhcingte in theician mahmah uh hi. Inventor Thomas Edison kiangah, “Leitungah bang thumal poimawh pen hiam?” ciin dong uh a, a dawnna pen, “Hun” cih ahi hi. Benjamin Flanklin in zong, “Na nuntakna na it takpi mah hiam? Na it takpi leh hun mawk beisak kei in. Nuntakna a piangsak ahih manin” ci hi.

Pasian bawlsa bel kihi mah hi. Ahih hangin hun loin i nungta thei kei a, tua hun zong Pasian in a bawl ahi hi. Mihing nuntakna pen manpha i sa uh a, thupingaihsutin, sih zong i lau uh a, i sihloh nading leh i bit nadinga leitung in sum i limzat dan na ngaihsun ngei hiam? Tua bang kawmkalah, i hun zat dan i ngaihsut ciangin thupi het lo hi.

20. Hun Kimawk Beisak

I theihloh man leh i ngaihsut cetloh manin hun tampi a mawkna in kibeisak hi. Nasep ding gen cianga man mahmah lo a kigen napi, TV mai khawngah sun thapai a tu thei om veve a, sep ding a tamna thu gengen napi, sep khiat muh ding om lo zong om thei veve hi. Henrry Ford in, “Hoih takin khuadak le’ng, mi pawlkhat in hun a mawk zatbei maimai laiun, tua hun mah pen midang in lawhcinna hun hoihin na zang uh hi, cih ka mu hi” ci hi. Tua ahih manin hun a kimawk beisakna hang pawlkhat en dih ni.

Hun a uk thei hi a kitheihna
Kua thupi zaw hiam? Hun a zangte maw a kizang hun? Hun pen manpha taka i zat lian ciangin kizangin ki-uk cihna hi. I hoih zat kei leh hunin ei hong uk pah hi. Mi nih a kibang het lo om a, pua lamah a kibang lianin naikal 24 kipia tuak a, ahih hangin sung lamah a phattuampih dan uh pen a zatdan uh hi lel hi.

Lawhcin nadingin hun a tamlohna ngaihsun lo
America gama mi ngeina, kum 72 tunglam, mi tampi hun zatdan kaikhawm uh a, a hun zatdan uh tangpi a tuat uh pen hih bang ahi hi :
* Kum 21 sung ihmut na’n
* Kum 14 sung nasep na’n
* Kum 7 sung kipuah kizem na’n
* Kum 6 sung nek le dawnin
* Kum 6 sung khualzin na’n
* Kum 5 sung traffic jam, tui ngak, ticket lakna
* Kum 4 sung na sinthak na’n
* Kum 3 sung kikhop leh committee
* Kum 2 sung telephone tawh mi hopih
* Kum 1 sung van zong (telephone, pen, mitlimlang etc)
* Kum 3 sung na dangah...

I hun khempeuh gawmkhawmin mun nga-ah khen le’ng, tua lakah khat bang bek pen hanciamna taktak tawh lawhcing dinga sepna dingin mihingte in kinei bek hi. Mi buai mahmah, sep ding a hau mahmah a kigen Americante in zong nasep hun hizah bek a neih uh leh, ei a bel tawm mahmah zawlai ding hi.

Hun a mawkbei a tam lam thei lo
Mi tampi in nisima nasep ding ahih manin tuhuna i nasep pen thupingaihsut loin, kisem mawkmawk hi. Hoih takin kituat leh mi pawlkhat nasep pen mihing picing khat i nikhat sunga sep dingin nuihzakhuai liang hi. Tawmcik bek sepkhiat ngeina-in a nei, hun manphatna a thei lo kitam lai mahmah hi. Tua manin tampi a semkhia ding kimlai, tawmcik bek i semkhia uh hi.

Mabanah geelna nei lo
‘Hun pen na dang khempeuh sangin geelna kician lo leh hoih lo hanga mawkbei lianpen hi,’ kici hi. Charles G. Gibbons in, “Hun zat siam dan hoih pen in ngaihsutkholhna leh geelna kiciantak neih ahi hi. Kingaihsut nadingin minute nga na zatna hangin naikal khat sung tak hun mawkbeisak in, sep ding tampi na seploh lawh hi” ci hi.

21. Hun A Kimawk Beisakna Hang
Hun zatsiam pen sin theih hi. Ahih hangin, theory a pass theih hi loin, a taktaka zat pah ding ahih banah, kuama peuh adingin TUHUN panin a tak suaksak pah theih ahi hi. “Minutes pen manpha takin zang leng naikal pen amahin hong kihek manpha ziau hi” ciin Lord Chesterfield in gen hi. Hih anuaia thute pen hun a mawk beisak, khantoh nading a nawngkaisak leh nidang hun lai pek pan tuni ciang dong hong buaisak den thute ahi hi.

Van mang zonna in beisak
Wall Street Journal newspaper ah Albert R. Karr in research a bawlna thu gelh a, tua laiah company makaite in kum khat sungin Nipi kal guk (6) sung tawntung van mang zon nadingin hun mawk beisak uh hi, ciin gen hi. Mitlimlang, pen, note book, adg. koihna theih pakloh, na dang sepsan ding cianga sepsan theihlohte hangin leitunga company lianpenpen a makaite in kum khatin a hun uh sawma khat beimangsak liang uh hi.

Pianzia a lung-am diak bel om hi. Ahih hangin lung-am pen amahin hong tungtawm lo a, lung-am hi-a kitheihna, thupingaihsutlohna leh, hun tampi mawk beisak ahih lam theihlohna hanga om hiin gen uh hi. Mi thupi, hun manpha taka a zangte in mitlimlang a sai ding secretary cial leh meetpih zaw ding hi, kici hi. Laigelh mi khat in, “Van koihna theihkhiatloh tampi a omsak pen a kisam lua lo kep denna hang hi a, cialna laite zong a kisam nawn lo ahih leh pai pahpahin, a kisam laite file pah ziauziau leng lung-am bei tuam hi” ci hi.

Tawldam hithiat utna
Hun ciil i gen ciangin hun taktak pen ciil a, zatsiam taktak theih hi lo a, ei le ei ki-ukzawhna tawh i gamtat ciang hun a kiciil hilel hi. Ki-ukzawhna leh thalawpna i neihlohna hangin ni khat a i sep ding tampi kisem lo thei hi. Mi pawlkhat pen mainawt a kalsuan sangin tawldam hithiat ki-utzaw hi. Lamto pai a mualtung a kahtoh sangin lam suk lam zuih nuam kisa zaw ahih manin guam thukpi sung kitung hi. Hun hoih laia sep ding hoih seplohna hanga lawhsapna in a lawhcing ding tampi lungkiasak hi. Thadahna taimangsan nadingin a kisam mahmah thu thum (3) om hi :

(i) Mailam kalsuanna/geelna gelh nading note bu neih
(ii) Sepna mun ngeina leh lunglutna a siasak thei dingte lak pana kihepkhiat
(iii) Sep ding khat peuhpeuh a baih thei pena sep pahpah...

‘A kisam pak’ om
Gam makai leh senior officerte hun a beisak mahmah pen ‘kisam pak’ hi, kici hi. Geelna kician tak a neih uh hangin, sihna-manna, zite geeltawm programme tuamtuam, leh a kisam lua lo pawlkhat in a geelnasa uh susia hi. Amau bek zong hi loin, tangpi-tangta a buaisak pen hih thu ahi hi. Hih bang buaina a vengsak dingin secretary kician, mi hehsak het lo a pute programme geelsa a paisuak theih nading a geelsiam miliante in cial thei uh hi.

Tua banah hunciam khat neih a, tua hunah nasep khat neih ding zong kisinhuai mahmah hi. Hih in ngaihsutna kician neisakin, nasep mazang tuam hi. I nasep leh i sepna mun a kituak lo zong om thei lailai hi. Tua banah telephone pen nasep nading a vanzat hoih mahmah khat ahih laiin, sep ding sem man lo liangin telephone sila suak theih hi. Telephone tawh kiho ciangin a kisam lo tampi kigen thei a, kul lo hi. I gennop leh gensawm pen kician takin gen ziau leng hong hopihte in zong tua bangin hong hopih pah lel uh hi. Tua banah nasep pat baih pen nasep mazanna khat ahi hi.

Khat beka lawhcin sawmna
Hun tamzat het lo a nasep baih dan leh meet pen midang thatang zatsiam ahi hi. Hih pen thei gige napi’n mi tampi in midang thatang muang loin, na khempeuh sep kisawm hi. Mi lawhcingte pen midangte’ thatang a zangsiamte hi hamtang uh hi.

Hih pen leitung ngeina hi a, a sia hi tuan lo hi. Tua banah, midang thatang zat i sawm hangin, zang dingin sum i neih leltak hangin, siamna kician tak i neih kei leh kizang thei tuan lo hi. Tua manin a kisampen in, a manphat theihna mun pen uah a sep ding maan tak, a hun taka sepsak siamna ahi hi. Mikim in midangte sanga hoihzawkna leh hoihlohzawkna bang hiam kinei a, tua mukhia siam a, tua tawh kituaka nasem ding a guai/cial siamte mipil ahi uh hi.

Kum 2009 a Forbes Magazine in leitung mihau a tehna uh-a nihna Berkshire Hathaway company neipa Warren Buffett in leitung gam tuamtuama a company CEO mi 63-te tungah kum khatin khatvei bek laikhak hi. “Bang hanga tua CEOte khatvei bek lai khak na hi hiam?” cih dotna pen, “Company makaite pen amau siamna san tak, amau sep nading mun takah ka koih a, thu hilhhilh kisam lo hi” ci hi. Tua mite a zat siamna hangin a sumbawlna khangto mahmah hi.

Hih thusim a theite in hun zat kibang tektekah midang thatang a zang lote sangin a zah tampi-in na tampi semkhia thei uh hi.

Theihkholh theihloh zekaina
Vanleng / mawtaw tawh khual i zin ding ciangin a hun maan takah i tun hangin, hun maan takah i dinkhiat theihloh hun om thei hi. Lungsim nuam lo pipi-in i ngak uh a, nasep ding i hauh bang ciangin hehsain khual kizin thei hi. Tua banga upmawhloh hong zekaisak om thei ahih manin mipilte in tua bang hun cianga sep ding leh sep theih ngaihsun uh hi. Pen leh calculator bek tawh zong hih bang hun ciangin sep ding tampi kisem thei hi.

Hih bang hun na tuak a, cih nading a om nawnloh hun ciangin hehsuakin mawk om kei in. Tu inla, na hun-awng pen bangci bangin a manpha thei penin zang ding na hiam, cih ngaihsun in. Midang panpih nading, kim le pam theihtel nading, mithak tawh kimeltheih nading, laibu sim nading.. cih bangin inn lama hun-awng nei ngei lo na hih leh manpha takin na zang thei veve ding hi. Hih bang hun pen Henry Ford in hoih tak ngaihsunin, “.... pawlkhat in hun i mawk beisak maimai laiin, tua hun mah pen midangin lawhcinna hun lemin na zang uh hi, cih ka mu hi” ci ziau hi.

Kisam lopi a khuadak den
Pawlkhat in a dinna leitung kip leh kiploh ngaihsun man lo liangin tung lam bek enin, a bat phakloh vana meii omte etna’n a hun mawk beisak hi. Bang hiamin, bang cik hiam ciang a lawhcinna hong tunpih hun ding ngaihsunin hun mawk beisak hi. Lawhcing dingin kalsuan lo a, a lunggulh neih ding dan thei lo hi. ‘Lottery ngah kha leng..’ ciin ngaihsunsun a, a hun manpha mawk beisaksak hi.

A kisam het lo, a lawhcin hun cianga a nopsak ding dan khawng a ngaihsutna hanga hun mawk bei pen hong paikik lo a, sem lo ahih manin a lunggulh a ngah ding sangin a lunggulh nate in gamlatsan zaw hi. I sep ding, i thaman, leh i maban pen ‘hi laiah’ cih leh ‘tuhunah’ om khin hi. Ngaihsut gawp pong sangin tua mun tung dingin thasan hoihzaw a, hun paisa hanga mawh kisakna sangin, khial nawn lo ding a seppah meetzaw hi.

Sep hun ding kisottoto!
I gen sawm pen Mikangte in ‘pending’ a cih uh ahi hi. ZoDictionary.com in, ‘kihalto sak, a hun sotto, hemkhia phot’ ci hi. Hih kammal in mimal, innkuan, minam leh gam khantoh nading dongin nawngkaisak hi! Zum-ah, sanginnah, nasepna mun khatpeuhah tuni a sep ding zing cianga sep dingin i koihna hangin i laisiamna, i lungsim hatna, leh pilna manpha pipite pen nai kikhawng gingin mual khuppih hi. Misiamte in a vensakdan ding a muhkhiatte uh pen :
1) Na maban panin paaimang in : Na sepsawm napi, sem ngam lian lo, pammaih sa-a maban a koihden pen, hun khat cianga kisam ding lametna tawh a kisam lopi kaihkhop tawh kibang hi. Tua bangte in nuntak buaisakin maban sem zo lo danin hong ngaihsunsak hi. Paikhia vet-in, a manpha na khatpeuh sepsan lecin hoihzaw hi.
2) Midang semsak in : Maban sep zawhloh hang hiam, sep noploh hang hiam, sep ding dan theihloh man hiama pending den sangin, minsiat lau loin midang khutah ap ziau leng hoihzaw hi.
3) Maban theician in : Zo siang lo-a i koih kik zelna a hang khat pen a tawp nading i muh cianloh man ahi hi. Kumpi nasem pawlkhat in a nasep uh pen a tawp nading leh a kisapna leh meet nading thei lo uh ahih manin pending thei uh hi.
Lokhote in a nasep uh pen pending mawk uh leh, a khai/buhte pen lopa/kiak in deep mang ding a, a gah lak ding om lo ding hi. Tua manin pending ngam lo uh hi. Sepna hanga meetna ding leh nasep kituak lo sakna hangin zong pending om thei hi. Nasep ding maban theihcetna leh a tawp nading theihcetna pen hun mawkbeisaklohna hoih mahmah ahi hi.
4) Hun ciangtan nei in : Ni khat sunga sep ding, ni khat sungin zong naikal sep ding zah ciangtan neihna leh mah le mah ki-ukzawhna pen pending lohna ahi hi. Hun ciangtan i nei kei leh i nasep bek hi loin, i nuntakna mahmah zong pending ding hi.

Lungsim na
Hehsuak, lungzuang, mi huat leh deihgawh cih bangte in mihing nuntak hun tampi mawkbeisak hi. Hihte pen ‘na tungah tungsak kei in’ cih theih hi lo a, mihing nuntakna a kihel ahi hi. Mikim in kinei khin a, ahih hangin, i maingatdan kibang lo cih thu bek ahi hi. Hihte hanga sauveipi kibuaisak sangin, puakkham vet leng, kapkhia-in, i lunggimna khempeuh pen Pasian nasemte kiang hiam, i lawm hoih leh i mi muante kiangah kipholhkhia khin vetin, i nuntakna sunga kiphumsim tampi genkhia vet leng, tua in hong suaktasakin, nuntak ngeina hong neisak kik thei hi.

Sep masak ding leh nunun ding theihlohna
Mi tampi pen buai mahmah leh hun zeek mahmahin kinungta a, ahih hangin sep masak ding leh sep nunun ding kikhentel thei lo ahih manin kipumbuai gawp pongmawk hi. Mabana sep ding om peuhpeuh, a phamawh masa, zawh pah dinga kisam leh, a zekai thei deuhte khentelin, a sep hun, sep zawh nadinga hun kisam.... cih bangin khentel kisam hi. Sep ding khat peuhpeuh pen a meet thei pen huna zang/sem dingin a kisapdan, sep masak ding leh sep nunun ding khentel masak kisam mahmah hi.

Mi pawlkhat in sum le pai pen lawhcin nadinga kisam masapen hiin thei uh a, pawlkhat in hatna leh cihtheihna pen kisam sa uh hi. A kisam mahmah, sep ding masa leh nunung pen lawhcin nadingin kisam pen hi. Tua pen sum le pai, hatna leh cih theihna zong hi thei a, geelna hoih tak tawh bul pat siamna kisam mahmah hi.

22. Kisam Kisapna
Kisam cih kammal pen kisam mahmah hi. Ni khat sungin hih thumal bangzahvei tak i gen tam? I gen nawh zahin kisam i cih pen a kisam taktak hiam? Kisam hi le zong tuhunah a kisam takpi mah hiam? Kisam hi-a i theih maw, midangte in kisam a sak uh? Mi te’n kisam a sakna uh hang leltakin kisam a sa kha i hi hiam? Dotna tam mahmah kha ding hi.

French philosopher Blaise Pascal in, “Na a kisap dan a masa leh a nunung theihna sanga kisam dang tam lo hi” ci hi. I buai mahmah hun ciangin na tampi semin i kingaihsun thei a, ahih hangin a kisap dan tawh kizuia i seploh ciangin i sepsa kisiasak kik a, midang buaisakin, lungkiatna piangsak lailai hi.

Na nasep khempeuh in na sepna zah lian manphatna nei hi-in na ngaihsun a, na sepna hun le mun, leh na seppihte tawh kizuiin a manphatna niamin sang thei hi. Tuate pen siamna, hun hoih, geelkholhna, manphasakna leh tun sawmna munte hangin kilamdang thei hi. Na lawm hoih khat tawh nasep kibang na sem uh a, tua nasep pen ama adingin a damsunga a mangngilh ngei nawnloh ding na manpha leh meet hi kha thei hi. Ahih hang, nang’ adingin hun a mawkbeisak leltak hi thei hi!

Nasep ding a masa leh a nunung ding theihlohna hang leh, i sep leh i hun zat bei sung kituak lo ahih manin, “Committee sauvei lua ahih manin hong kihel man ke’ng” kici thei zel hi. Thu (gina lo) tampi kimawk gengen ahih manin committee pawlkhat in hun mawkbeisak hi. Kamkupna leh kikholhkhop nuam a sa pongmawkte adingin midangte ading leh eimah mahmah adingin hun mawk beisak baih mahmah ahih manin kidophuai mahmah hi.

Tua bang i gen ciangin, kamkup nading leh kikholhkhop nading nei lo lianga geelkholhna tawh damsung hun zat ding cihna hi lo hi. Tawldam hun pen a tuampi ahi hi. I tawldamna hangin midang i buaisak uh a, tua pen kietcian nading leh, mi hun hoih a mawk beisak i hih ding kidophuai ahihna i gennopna hizaw hi. Tua ahih manin kisam i cih a masa leh a nunung bangci bangin khentel ding, bang teng kisam masa cih nakpi’n ngaihsut kisam hi.

A kisam pen theitel in
Nangmah hi lo midang in a sep theihloh, nangmah tektek in na sep a kisamte pen na sep ding kisam masa hiden hi. Eimah mahmah in i sep ding, midang in a sep theihloh, a sep ngamloh, a sep noploh hang hiam a ‘kisam taktak lo’ banga ei le ei kingaihsutna in mi tampite nuntakna buaisak hi.

A manphapen ngaihsun in
Na hun, thatang, leh sum zanga nasep ding tuamtuamte manphatna na tuat ding ciangin, bangin nang tungah meetna hong piakik thei lianpen ding hiam? cih ngaihsun in. Mihing nuntakzia-ah mi tampi in ‘Pareto Principle’ kici kizang zel hi. Tua pen ‘80/20 principle’ zong kici hi. A omzia pen : Na pen 100 hi leh, na khat peuhpeuh na sep ciangin a meetna pen nangma’n 80 zang lecin, a ban 20 pen midang (khua, pawlpi, gam etc) adingin na zang thei ding hi. Hih pen mi ngeina khat i omdan ahi hi. Ahih hangin meetna pen suma meetna bek hi lo a, tu-a na omna mun lianah, nang adingin bang manpha pen hiam? cihna lel ahi hi. Gentehnain : Nasep pawlkhat pen sum hauh nading lama meetna hi lo hi. Ahih hangin tua munah lungnopna, lungkimna, leh maitaina thupi mahmah hong pia thei om a, nang adingin manpha mahmah thei veve hi.

Pawlkhat ki-khami sakin, meetna lam limlim ngaihsut pen Pasian tawh ‘kigamlatna’ a sa om hi. Hih bang ngaihsutna kigawmkhawm in minam khantoh nading buaisak thei hi. Mikim in ei adinga manpha leh meet nadingah nasep kithalawp a, tua thalawpna in thanuamna piangsakin, a thanuamte khutah sum lutin, gam le nam khangto lel hi.

Ngeinaseh
A kisam masa theihna pen khatvei thu-a theihtheih hi lo hi. Ni khat thu a hih dik theih hi lo hi. Zingthawh a nop ni a hih theih zong hi lo a, nuntak sung a ngeina a neih ding ahi hi. Tua banah, sintawm theih hi. Hih bang a ngaihsun siamte mi hat, mi hangsan, thukhensat siam mite hi uh a, suanhuai, pahtakhuai uh hi.

23. A Kisamte Seppah

Biakinn maiah, ‘Na thugen hoih mahmah hi’ ci-a kibansah/kinohset zawh cianga a thugen mangngilh pah bang hi a, i gensate zong i theihsa vive ahi hi. Tua ahih manin a kisam penin, i theihsa thute a tak suaksak dinga kalsuan ahi hi.

Harvard University a Prof. William James in, “Na nuntakna kikheel na ut leh tun pan pah in” ci hi. Nuntak hoihzaw, nuntakzia hoihzaw, ngaihsutdan leh lungsim puakzia hoihzaw neih nadingin tu pan seppah pen kisam mahmah hi.

Thu hoih pipite, a hoihna i theih hangin i seppah theihlohna hang lianpi pen - eimah mahmah in a masa leh a nunung ding i gualh sanga lianzaw, i kiim i kianga hong tungte in i geelkholhna hong laihna hang ahi hi. Mi tampi in hih pen ahi ding mah sa uh hi. Amau nuntakna-ah sep ding a masa leh a nunung pen amau hi loin, midangte vaihawm ding sa uh hi. Hih pen lawhcin theihlohna lianpi ahi hi.

Bethlehem Steel Company president Charles Schwab in haksatna tuak a, a haksatna pen i vekpi a haksatna i tuak tawh kibang hi. A steel company in vanzat hoih nei uh a, raw material nei-in, sum zong nei a, nasep ding leh a kisam khempeuh a kicingin neiin, nasep zong hahkat uh hi. Ahih hangin, company in a lametna bangin meet thei lo hi. A makaih dingin Ivy Lee cial a, president in Ivy Lee kiangah, “Ka haksatna nong vensak a, mainawt theihna nong neihpih theih leh a kilawm zah thaman kong pia ding hi” ci hi. Lee in hoih takin tua company nasepdan encian a, tua ciangin minute 20 sung bekin tua company in a sepkhiat ngeina zah lang a kibehlap theih nading lamlak hi.

President kiangah laidal neu khat pia a, “Hih lai tungah zing cianga na sep ding thupi diak guk gelh inla, a masak ding dan leh a nunung ding danin gualsuk in” ci hi. Charles Schwab in minute nga sungin gelh khin a, Lee in, “Tua laidal neu na ipsungah kuah inla, zing ciangin tua na laigelhna bekah na ngaihsutna pia in. A masapen na sep zawh uh ciangin na dang sem loin a nihna sem suak unla, a gukin ni khat sungin na sep zawh man kei leh zong phamawh sa kei in. Hih bangin nisimin hihden inla, na sep taktak ding ma-in a kisapdan, a masak dan leh a nunundan encian masa zel in” ci hi. Thupi het lo tawh kibang hi. Ahih hangin Lee in a thugen theician mahmah a, “Hih ka thugen bang lianin na sep a, na meetpih taktak leh kong ngaihsutpiakna tawh kituak na sak zah sum ‘cheque’ in hong khak in” ci hi.

A omkhop hun uh pen naikal lang zong hi lo hi. Nipi kal thum khit ciangin Lee in dollar 25,000 cheque ngah a, cheque tawh hong tungkhawm laikhak sungah Schwab in Lee ngaihsutpiakna pen manpha a sakna thu kigelh hi. Tua pana kum nga a bei ciangin nidanga kuama theih ngei meelloh steel company pen leitunga independent steel producer lianpente laka khat hong suak a, a neipa Charles Schwab in zong dollar then za tak bank account ah neih beh hi. Hoih hi, cih a theih, a kisam masapen sem pah ahih manin Schwab pen lawhcing hi.

Kisam i sak tampi pen a kisapna hanga sem i hi kei a, sep nuam i sakna hang, tawldamzaw, tua nasep i sepna hanga mite hong thupingaihsut ding ut man maimai khawng hizaw thei hi. A kisam taktak leh a kisam pen sem pah in. Kha khat sung tua banga na sep leh mite in, ‘Bangci bangin hih bang nuntak manpha nei thei na hi hiam?’ hong ci pah ding uh hi. Ahih hangin a taktakah, midang sangin gimzaw leh lim sepzaw na hi tuan kei ding hi. A kisamte bek na sep manin na sepkhiat manpha cihna hi lel hi. Mihing manphatna tampi pen i sepkhiat manphatna pan kiteh mawk ahih manin.

Khen - V : 19. Hun
Bank khat om a, tua bank in zingsang simin Rs. 86,400 hong piaden hi. Tua sum pen na deih leh zangbei theiin, na deih kei leh zatbeiloh theih a, zang vet loin zong na ihmut san thei hi. Ahih hangin ngeina kician leh hoih tak om a, tua sum pen na ngah ni-in na zanga na zang kei zongin bei veve hi. Zat val na neih hangin bangci mahin a zing a thai adingin na koihkhol kiphal lo hi. A beisa ni a na zatsiam leh siamloh ngaihsun het loin a zingsang ciang a thak sinsen Rs. 86,400 mah hong kipia kik hi.

Tua bang dinmunah om taktak lecin bangci bangin na om diam? Mi pil ngeina na hih leh ni khata na sum ngah pen siam taka zat ding dan na ngaihsun khia pah ding hi. Na kisap diak na lei masa phot dinga, tulsawmgiat nuai lam man na khat peuhpeuh baih takin na lei pahpah thei ding hi. Ahih hangin car, innmun leh inn hoih na deih a, tuate ni khata lei zawh lah hi lo, sum lah kikhol thei lo lai, bangcih ding?

Bank pen ‘hun’ hi lel a, nisimin second 86,400 hong piaden hi. Na deih bangbangin na zang thei a, zang siamin siam kei leteh bei veve hi.

Mi lawhcingte in theician mahmah uh hi. Inventor Thomas Edison kiangah, “Leitungah bang thumal poimawh pen hiam?” ciin dong uh a, a dawnna pen, “Hun” cih ahi hi. Benjamin Flanklin in zong, “Na nuntakna na it takpi mah hiam? Na it takpi leh hun mawk beisak kei in. Nuntakna a piangsak ahih manin” ci hi.

Pasian bawlsa bel kihi mah hi. Ahih hangin hun loin i nungta thei kei a, tua hun zong Pasian in a bawl ahi hi. Mihing nuntakna pen manpha i sa uh a, thupingaihsutin, sih zong i lau uh a, i sihloh nading leh i bit nadinga leitung in sum i limzat dan na ngaihsun ngei hiam? Tua bang kawmkalah, i hun zat dan i ngaihsut ciangin thupi het lo hi.
20. Hun Kimawk Beisak
I theihloh man leh i ngaihsut cetloh manin hun tampi a mawkna in kibeisak hi. Nasep ding gen cianga man mahmah lo a kigen napi, TV mai khawngah sun thapai a tu thei om veve a, sep ding a tamna thu gengen napi, sep khiat muh ding om lo zong om thei veve hi. Henrry Ford in, “Hoih takin khuadak le’ng, mi pawlkhat in hun a mawk zatbei maimai laiun, tua hun mah pen midang in lawhcinna hun hoihin na zang uh hi, cih ka mu hi” ci hi. Tua ahih manin hun a kimawk beisakna hang pawlkhat en dih ni.

Hun a uk thei hi a kitheihna
Kua thupi zaw hiam? Hun a zangte maw a kizang hun? Hun pen manpha taka i zat lian ciangin kizangin ki-uk cihna hi. I hoih zat kei leh hunin ei hong uk pah hi. Mi nih a kibang het lo om a, pua lamah a kibang lianin naikal 24 kipia tuak a, ahih hangin sung lamah a phattuampih dan uh pen a zatdan uh hi lel hi.

Lawhcin nadingin hun a tamlohna ngaihsun lo

America gama mi ngeina, kum 72 tunglam, mi tampi hun zatdan kaikhawm uh a, a hun zatdan uh tangpi a tuat uh pen hih bang ahi hi :
* Kum 21 sung ihmut na’n
* Kum 14 sung nasep na’n
* Kum 7 sung kipuah kizem na’n
* Kum 6 sung nek le dawnin
* Kum 6 sung khualzin na’n
* Kum 5 sung traffic jam, tui ngak, ticket lakna
* Kum 4 sung na sinthak na’n
* Kum 3 sung kikhop leh committee
* Kum 2 sung telephone tawh mi hopih
* Kum 1 sung van zong (telephone, pen, mitlimlang etc)
* Kum 3 sung na dangah...
I hun khempeuh gawmkhawmin mun nga-ah khen le’ng, tua lakah khat bang bek pen hanciamna taktak tawh lawhcing dinga sepna dingin mihingte in kinei bek hi. Mi buai mahmah, sep ding a hau mahmah a kigen Americante in zong nasep hun hizah bek a neih uh leh, ei a bel tawm mahmah zawlai ding hi.

Hun a mawkbei a tam lam thei lo
Mi tampi in nisima nasep ding ahih manin tuhuna i nasep pen thupingaihsut loin, kisem mawkmawk hi. Hoih takin kituat leh mi pawlkhat nasep pen mihing picing khat i nikhat sunga sep dingin nuihzakhuai liang hi. Tawmcik bek sepkhiat ngeina-in a nei, hun manphatna a thei lo kitam lai mahmah hi. Tua manin tampi a semkhia ding kimlai, tawmcik bek i semkhia uh hi.

Mabanah geelna nei lo
‘Hun pen na dang khempeuh sangin geelna kician lo leh hoih lo hanga mawkbei lianpen hi,’ kici hi. Charles G. Gibbons in, “Hun zat siam dan hoih pen in ngaihsutkholhna leh geelna kiciantak neih ahi hi. Kingaihsut nadingin minute nga na zatna hangin naikal khat sung tak hun mawkbeisak in, sep ding tampi na seploh lawh hi” ci hi.

21. Hun A Kimawk Beisakna Hang
Hun zatsiam pen sin theih hi. Ahih hangin, theory a pass theih hi loin, a taktaka zat pah ding ahih banah, kuama peuh adingin TUHUN panin a tak suaksak pah theih ahi hi. “Minutes pen manpha takin zang leng naikal pen amahin hong kihek manpha ziau hi” ciin Lord Chesterfield in gen hi. Hih anuaia thute pen hun a mawk beisak, khantoh nading a nawngkaisak leh nidang hun lai pek pan tuni ciang dong hong buaisak den thute ahi hi.

Van mang zonna in beisak
Wall Street Journal newspaper ah Albert R. Karr in research a bawlna thu gelh a, tua laiah company makaite in kum khat sungin Nipi kal guk (6) sung tawntung van mang zon nadingin hun mawk beisak uh hi, ciin gen hi. Mitlimlang, pen, note book, adg. koihna theih pakloh, na dang sepsan ding cianga sepsan theihlohte hangin leitunga company lianpenpen a makaite in kum khatin a hun uh sawma khat beimangsak liang uh hi.

Pianzia a lung-am diak bel om hi. Ahih hangin lung-am pen amahin hong tungtawm lo a, lung-am hi-a kitheihna, thupingaihsutlohna leh, hun tampi mawk beisak ahih lam theihlohna hanga om hiin gen uh hi. Mi thupi, hun manpha taka a zangte in mitlimlang a sai ding secretary cial leh meetpih zaw ding hi, kici hi. Laigelh mi khat in, “Van koihna theihkhiatloh tampi a omsak pen a kisam lua lo kep denna hang hi a, cialna laite zong a kisam nawn lo ahih leh pai pahpahin, a kisam laite file pah ziauziau leng lung-am bei tuam hi” ci hi.

Tawldam hithiat utna
Hun ciil i gen ciangin hun taktak pen ciil a, zatsiam taktak theih hi lo a, ei le ei ki-ukzawhna tawh i gamtat ciang hun a kiciil hilel hi. Ki-ukzawhna leh thalawpna i neihlohna hangin ni khat a i sep ding tampi kisem lo thei hi. Mi pawlkhat pen mainawt a kalsuan sangin tawldam hithiat ki-utzaw hi. Lamto pai a mualtung a kahtoh sangin lam suk lam zuih nuam kisa zaw ahih manin guam thukpi sung kitung hi. Hun hoih laia sep ding hoih seplohna hanga lawhsapna in a lawhcing ding tampi lungkiasak hi. Thadahna taimangsan nadingin a kisam mahmah thu thum (3) om hi :
(i) Mailam kalsuanna/geelna gelh nading note bu neih
(ii) Sepna mun ngeina leh lunglutna a siasak thei dingte lak pana kihepkhiat
(iii) Sep ding khat peuhpeuh a baih thei pena sep pahpah...

‘A kisam pak’ om
Gam makai leh senior officerte hun a beisak mahmah pen ‘kisam pak’ hi, kici hi. Geelna kician tak a neih uh hangin, sihna-manna, zite geeltawm programme tuamtuam, leh a kisam lua lo pawlkhat in a geelnasa uh susia hi. Amau bek zong hi loin, tangpi-tangta a buaisak pen hih thu ahi hi. Hih bang buaina a vengsak dingin secretary kician, mi hehsak het lo a pute programme geelsa a paisuak theih nading a geelsiam miliante in cial thei uh hi.
Tua banah hunciam khat neih a, tua hunah nasep khat neih ding zong kisinhuai mahmah hi. Hih in ngaihsutna kician neisakin, nasep mazang tuam hi. I nasep leh i sepna mun a kituak lo zong om thei lailai hi. Tua banah telephone pen nasep nading a vanzat hoih mahmah khat ahih laiin, sep ding sem man lo liangin telephone sila suak theih hi. Telephone tawh kiho ciangin a kisam lo tampi kigen thei a, kul lo hi. I gennop leh gensawm pen kician takin gen ziau leng hong hopihte in zong tua bangin hong hopih pah lel uh hi. Tua banah nasep pat baih pen nasep mazanna khat ahi hi.

Khat beka lawhcin sawmna
Hun tamzat het lo a nasep baih dan leh meet pen midang thatang zatsiam ahi hi. Hih pen thei gige napi’n mi tampi in midang thatang muang loin, na khempeuh sep kisawm hi. Mi lawhcingte pen midangte’ thatang a zangsiamte hi hamtang uh hi.

Hih pen leitung ngeina hi a, a sia hi tuan lo hi. Tua banah, midang thatang zat i sawm hangin, zang dingin sum i neih leltak hangin, siamna kician tak i neih kei leh kizang thei tuan lo hi. Tua manin a kisampen in, a manphat theihna mun pen uah a sep ding maan tak, a hun taka sepsak siamna ahi hi. Mikim in midangte sanga hoihzawkna leh hoihlohzawkna bang hiam kinei a, tua mukhia siam a, tua tawh kituaka nasem ding a guai/cial siamte mipil ahi uh hi.

Kum 2009 a Forbes Magazine in leitung mihau a tehna uh-a nihna Berkshire Hathaway company neipa Warren Buffett in leitung gam tuamtuama a company CEO mi 63-te tungah kum khatin khatvei bek laikhak hi. “Bang hanga tua CEOte khatvei bek lai khak na hi hiam?” cih dotna pen, “Company makaite pen amau siamna san tak, amau sep nading mun takah ka koih a, thu hilhhilh kisam lo hi” ci hi. Tua mite a zat siamna hangin a sumbawlna khangto mahmah hi.

Hih thusim a theite in hun zat kibang tektekah midang thatang a zang lote sangin a zah tampi-in na tampi semkhia thei uh hi.

Theihkholh theihloh zekaina
Vanleng / mawtaw tawh khual i zin ding ciangin a hun maan takah i tun hangin, hun maan takah i dinkhiat theihloh hun om thei hi. Lungsim nuam lo pipi-in i ngak uh a, nasep ding i hauh bang ciangin hehsain khual kizin thei hi. Tua banga upmawhloh hong zekaisak om thei ahih manin mipilte in tua bang hun cianga sep ding leh sep theih ngaihsun uh hi. Pen leh calculator bek tawh zong hih bang hun ciangin sep ding tampi kisem thei hi.

Hih bang hun na tuak a, cih nading a om nawnloh hun ciangin hehsuakin mawk om kei in. Tu inla, na hun-awng pen bangci bangin a manpha thei penin zang ding na hiam, cih ngaihsun in. Midang panpih nading, kim le pam theihtel nading, mithak tawh kimeltheih nading, laibu sim nading.. cih bangin inn lama hun-awng nei ngei lo na hih leh manpha takin na zang thei veve ding hi. Hih bang hun pen Henry Ford in hoih tak ngaihsunin, “.... pawlkhat in hun i mawk beisak maimai laiin, tua hun mah pen midangin lawhcinna hun lemin na zang uh hi, cih ka mu hi” ci ziau hi.

Kisam lopi a khuadak den
Pawlkhat in a dinna leitung kip leh kiploh ngaihsun man lo liangin tung lam bek enin, a bat phakloh vana meii omte etna’n a hun mawk beisak hi. Bang hiamin, bang cik hiam ciang a lawhcinna hong tunpih hun ding ngaihsunin hun mawk beisak hi. Lawhcing dingin kalsuan lo a, a lunggulh neih ding dan thei lo hi. ‘Lottery ngah kha leng..’ ciin ngaihsunsun a, a hun manpha mawk beisaksak hi.

A kisam het lo, a lawhcin hun cianga a nopsak ding dan khawng a ngaihsutna hanga hun mawk bei pen hong paikik lo a, sem lo ahih manin a lunggulh a ngah ding sangin a lunggulh nate in gamlatsan zaw hi. I sep ding, i thaman, leh i maban pen ‘hi laiah’ cih leh ‘tuhunah’ om khin hi. Ngaihsut gawp pong sangin tua mun tung dingin thasan hoihzaw a, hun paisa hanga mawh kisakna sangin, khial nawn lo ding a seppah meetzaw hi.

Sep hun ding kisottoto!
I gen sawm pen Mikangte in ‘pending’ a cih uh ahi hi. ZoDictionary.com in, ‘kihalto sak, a hun sotto, hemkhia phot’ ci hi. Hih kammal in mimal, innkuan, minam leh gam khantoh nading dongin nawngkaisak hi! Zum-ah, sanginnah, nasepna mun khatpeuhah tuni a sep ding zing cianga sep dingin i koihna hangin i laisiamna, i lungsim hatna, leh pilna manpha pipite pen nai kikhawng gingin mual khuppih hi. Misiamte in a vensakdan ding a muhkhiatte uh pen :
1) Na maban panin paaimang in : Na sepsawm napi, sem ngam lian lo, pammaih sa-a maban a koihden pen, hun khat cianga kisam ding lametna tawh a kisam lopi kaihkhop tawh kibang hi. Tua bangte in nuntak buaisakin maban sem zo lo danin hong ngaihsunsak hi. Paikhia vet-in, a manpha na khatpeuh sepsan lecin hoihzaw hi.
2) Midang semsak in : Maban sep zawhloh hang hiam, sep noploh hang hiam, sep ding dan theihloh man hiama pending den sangin, minsiat lau loin midang khutah ap ziau leng hoihzaw hi.
3) Maban theician in : Zo siang lo-a i koih kik zelna a hang khat pen a tawp nading i muh cianloh man ahi hi. Kumpi nasem pawlkhat in a nasep uh pen a tawp nading leh a kisapna leh meet nading thei lo uh ahih manin pending thei uh hi.

Lokhote in a nasep uh pen pending mawk uh leh, a khai/buhte pen lopa/kiak in deep mang ding a, a gah lak ding om lo ding hi. Tua manin pending ngam lo uh hi. Sepna hanga meetna ding leh nasep kituak lo sakna hangin zong pending om thei hi. Nasep ding maban theihcetna leh a tawp nading theihcetna pen hun mawkbeisaklohna hoih mahmah ahi hi.
4) Hun ciangtan nei in : Ni khat sunga sep ding, ni khat sungin zong naikal sep ding zah ciangtan neihna leh mah le mah ki-ukzawhna pen pending lohna ahi hi. Hun ciangtan i nei kei leh i nasep bek hi loin, i nuntakna mahmah zong pending ding hi.

Lungsim na
Hehsuak, lungzuang, mi huat leh deihgawh cih bangte in mihing nuntak hun tampi mawkbeisak hi. Hihte pen ‘na tungah tungsak kei in’ cih theih hi lo a, mihing nuntakna a kihel ahi hi. Mikim in kinei khin a, ahih hangin, i maingatdan kibang lo cih thu bek ahi hi. Hihte hanga sauveipi kibuaisak sangin, puakkham vet leng, kapkhia-in, i lunggimna khempeuh pen Pasian nasemte kiang hiam, i lawm hoih leh i mi muante kiangah kipholhkhia khin vetin, i nuntakna sunga kiphumsim tampi genkhia vet leng, tua in hong suaktasakin, nuntak ngeina hong neisak kik thei hi.

Sep masak ding leh nunun ding theihlohna

Mi tampi pen buai mahmah leh hun zeek mahmahin kinungta a, ahih hangin sep masak ding leh sep nunun ding kikhentel thei lo ahih manin kipumbuai gawp pongmawk hi. Mabana sep ding om peuhpeuh, a phamawh masa, zawh pah dinga kisam leh, a zekai thei deuhte khentelin, a sep hun, sep zawh nadinga hun kisam.... cih bangin khentel kisam hi. Sep ding khat peuhpeuh pen a meet thei pen huna zang/sem dingin a kisapdan, sep masak ding leh sep nunun ding khentel masak kisam mahmah hi.

Mi pawlkhat in sum le pai pen lawhcin nadinga kisam masapen hiin thei uh a, pawlkhat in hatna leh cihtheihna pen kisam sa uh hi. A kisam mahmah, sep ding masa leh nunung pen lawhcin nadingin kisam pen hi. Tua pen sum le pai, hatna leh cih theihna zong hi thei a, geelna hoih tak tawh bul pat siamna kisam mahmah hi.

22. Kisam Kisapna

Kisam cih kammal pen kisam mahmah hi. Ni khat sungin hih thumal bangzahvei tak i gen tam? I gen nawh zahin kisam i cih pen a kisam taktak hiam? Kisam hi le zong tuhunah a kisam takpi mah hiam? Kisam hi-a i theih maw, midangte in kisam a sak uh? Mi te’n kisam a sakna uh hang leltakin kisam a sa kha i hi hiam? Dotna tam mahmah kha ding hi.

French philosopher Blaise Pascal in, “Na a kisap dan a masa leh a nunung theihna sanga kisam dang tam lo hi” ci hi. I buai mahmah hun ciangin na tampi semin i kingaihsun thei a, ahih hangin a kisap dan tawh kizuia i seploh ciangin i sepsa kisiasak kik a, midang buaisakin, lungkiatna piangsak lailai hi.

Na nasep khempeuh in na sepna zah lian manphatna nei hi-in na ngaihsun a, na sepna hun le mun, leh na seppihte tawh kizuiin a manphatna niamin sang thei hi. Tuate pen siamna, hun hoih, geelkholhna, manphasakna leh tun sawmna munte hangin kilamdang thei hi. Na lawm hoih khat tawh nasep kibang na sem uh a, tua nasep pen ama adingin a damsunga a mangngilh ngei nawnloh ding na manpha leh meet hi kha thei hi. Ahih hang, nang’ adingin hun a mawkbeisak leltak hi thei hi!

Nasep ding a masa leh a nunung ding theihlohna hang leh, i sep leh i hun zat bei sung kituak lo ahih manin, “Committee sauvei lua ahih manin hong kihel man ke’ng” kici thei zel hi. Thu (gina lo) tampi kimawk gengen ahih manin committee pawlkhat in hun mawkbeisak hi. Kamkupna leh kikholhkhop nuam a sa pongmawkte adingin midangte ading leh eimah mahmah adingin hun mawk beisak baih mahmah ahih manin kidophuai mahmah hi.

Tua bang i gen ciangin, kamkup nading leh kikholhkhop nading nei lo lianga geelkholhna tawh damsung hun zat ding cihna hi lo hi. Tawldam hun pen a tuampi ahi hi. I tawldamna hangin midang i buaisak uh a, tua pen kietcian nading leh, mi hun hoih a mawk beisak i hih ding kidophuai ahihna i gennopna hizaw hi. Tua ahih manin kisam i cih a masa leh a nunung bangci bangin khentel ding, bang teng kisam masa cih nakpi’n ngaihsut kisam hi.

A kisam pen theitel in
Nangmah hi lo midang in a sep theihloh, nangmah tektek in na sep a kisamte pen na sep ding kisam masa hiden hi. Eimah mahmah in i sep ding, midang in a sep theihloh, a sep ngamloh, a sep noploh hang hiam a ‘kisam taktak lo’ banga ei le ei kingaihsutna in mi tampite nuntakna buaisak hi.

A manphapen ngaihsun in
Na hun, thatang, leh sum zanga nasep ding tuamtuamte manphatna na tuat ding ciangin, bangin nang tungah meetna hong piakik thei lianpen ding hiam? cih ngaihsun in. Mihing nuntakzia-ah mi tampi in ‘Pareto Principle’ kici kizang zel hi. Tua pen ‘80/20 principle’ zong kici hi. A omzia pen : Na pen 100 hi leh, na khat peuhpeuh na sep ciangin a meetna pen nangma’n 80 zang lecin, a ban 20 pen midang (khua, pawlpi, gam etc) adingin na zang thei ding hi. Hih pen mi ngeina khat i omdan ahi hi. Ahih hangin meetna pen suma meetna bek hi lo a, tu-a na omna mun lianah, nang adingin bang manpha pen hiam? cihna lel ahi hi. Gentehnain : Nasep pawlkhat pen sum hauh nading lama meetna hi lo hi. Ahih hangin tua munah lungnopna, lungkimna, leh maitaina thupi mahmah hong pia thei om a, nang adingin manpha mahmah thei veve hi.

Pawlkhat ki-khami sakin, meetna lam limlim ngaihsut pen Pasian tawh ‘kigamlatna’ a sa om hi. Hih bang ngaihsutna kigawmkhawm in minam khantoh nading buaisak thei hi. Mikim in ei adinga manpha leh meet nadingah nasep kithalawp a, tua thalawpna in thanuamna piangsakin, a thanuamte khutah sum lutin, gam le nam khangto lel hi.

Ngeinaseh
A kisam masa theihna pen khatvei thu-a theihtheih hi lo hi. Ni khat thu a hih dik theih hi lo hi. Zingthawh a nop ni a hih theih zong hi lo a, nuntak sung a ngeina a neih ding ahi hi. Tua banah, sintawm theih hi. Hih bang a ngaihsun siamte mi hat, mi hangsan, thukhensat siam mite hi uh a, suanhuai, pahtakhuai uh hi.

23. A Kisamte Seppah
Biakinn maiah, ‘Na thugen hoih mahmah hi’ ci-a kibansah/kinohset zawh cianga a thugen mangngilh pah bang hi a, i gensate zong i theihsa vive ahi hi. Tua ahih manin a kisam penin, i theihsa thute a tak suaksak dinga kalsuan ahi hi.

Harvard University a Prof. William James in, “Na nuntakna kikheel na ut leh tun pan pah in” ci hi. Nuntak hoihzaw, nuntakzia hoihzaw, ngaihsutdan leh lungsim puakzia hoihzaw neih nadingin tu pan seppah pen kisam mahmah hi.

Thu hoih pipite, a hoihna i theih hangin i seppah theihlohna hang lianpi pen - eimah mahmah in a masa leh a nunung ding i gualh sanga lianzaw, i kiim i kianga hong tungte in i geelkholhna hong laihna hang ahi hi. Mi tampi in hih pen ahi ding mah sa uh hi. Amau nuntakna-ah sep ding a masa leh a nunung pen amau hi loin, midangte vaihawm ding sa uh hi. Hih pen lawhcin theihlohna lianpi ahi hi.

Bethlehem Steel Company president Charles Schwab in haksatna tuak a, a haksatna pen i vekpi a haksatna i tuak tawh kibang hi. A steel company in vanzat hoih nei uh a, raw material nei-in, sum zong nei a, nasep ding leh a kisam khempeuh a kicingin neiin, nasep zong hahkat uh hi. Ahih hangin, company in a lametna bangin meet thei lo hi. A makaih dingin Ivy Lee cial a, president in Ivy Lee kiangah, “Ka haksatna nong vensak a, mainawt theihna nong neihpih theih leh a kilawm zah thaman kong pia ding hi” ci hi. Lee in hoih takin tua company nasepdan encian a, tua ciangin minute 20 sung bekin tua company in a sepkhiat ngeina zah lang a kibehlap theih nading lamlak hi.

President kiangah laidal neu khat pia a, “Hih lai tungah zing cianga na sep ding thupi diak guk gelh inla, a masak ding dan leh a nunung ding danin gualsuk in” ci hi. Charles Schwab in minute nga sungin gelh khin a, Lee in, “Tua laidal neu na ipsungah kuah inla, zing ciangin tua na laigelhna bekah na ngaihsutna pia in. A masapen na sep zawh uh ciangin na dang sem loin a nihna sem suak unla, a gukin ni khat sungin na sep zawh man kei leh zong phamawh sa kei in. Hih bangin nisimin hihden inla, na sep taktak ding ma-in a kisapdan, a masak dan leh a nunundan encian masa zel in” ci hi. Thupi het lo tawh kibang hi. Ahih hangin Lee in a thugen theician mahmah a, “Hih ka thugen bang lianin na sep a, na meetpih taktak leh kong ngaihsutpiakna tawh kituak na sak zah sum ‘cheque’ in hong khak in” ci hi.

A omkhop hun uh pen naikal lang zong hi lo hi. Nipi kal thum khit ciangin Lee in dollar 25,000 cheque ngah a, cheque tawh hong tungkhawm laikhak sungah Schwab in Lee ngaihsutpiakna pen manpha a sakna thu kigelh hi. Tua pana kum nga a bei ciangin nidanga kuama theih ngei meelloh steel company pen leitunga independent steel producer lianpente laka khat hong suak a, a neipa Charles Schwab in zong dollar then za tak bank account ah neih beh hi. Hoih hi, cih a theih, a kisam masapen sem pah ahih manin Schwab pen lawhcing hi.

Kisam i sak tampi pen a kisapna hanga sem i hi kei a, sep nuam i sakna hang, tawldamzaw, tua nasep i sepna hanga mite hong thupingaihsut ding ut man maimai khawng hizaw thei hi. A kisam taktak leh a kisam pen sem pah in. Kha khat sung tua banga na sep leh mite in, ‘Bangci bangin hih bang nuntak manpha nei thei na hi hiam?’ hong ci pah ding uh hi. Ahih hangin a taktakah, midang sangin gimzaw leh lim sepzaw na hi tuan kei ding hi. A kisamte bek na sep manin na sepkhiat manpha cihna hi lel hi. Mihing manphatna tampi pen i sepkhiat manphatna pan kiteh mawk ahih manin.

Khen - VI : Kizopna Hoih

24. Lawhcinna-ah Midang Zong Kihel Hi
Khatvei sangsia bangzah hiam in mihing nuntakzia a theihbeh theih nadingun nasem a guai mi 2000 tungah dotna kibang dong uh a, a dotna uh pen, “Na sumbawlna mun a nasem na khawlsak kik mi 3-te ngaihsun kik inla, a sepna gam, a nasep neu leh liat, leh a khasum lam uh tuat het loin, na tawpsakna bang hang hiam?” cih ahi hi. A dawnna tampen uh ahih leh lamdang mahmah, “Seppih haksa lua!” cih ahi hi.

Theodore Roosevelt in, “Lawhcin nadinga a kisam penpen in midangte tawh i kizopna bawl hoih ahi hi” ci a, John D. Rockfeller in, “Ni nuaia om na khempeuhte i kholhpihdan sangin, i mihingpihte i kholhpihdan i thupingaihsut zawk kisam hi” ci hi. Bangci bangin nasep siamin, thahatna, septheihna i neih hangin, i mihingpihte tawh na i sepkhop theih kei leh kivalden ding cihna hi.

Na mihingpih ‘deal’ dan na siam nak leh na nekzonnaah 85% na lawhcing ding a, na nuntaknaah lungnopna leh lungkimna 99% hong pia thuah lai ding hi. Tua bang liangin hih thu pen manpha hi.

Baih taka genteh theih pen innkuan kizopzia pan ahi hi. Innkuan nuntak a nop a, a kithalawp leh na khempeuh sep nuam kisa hi. Innkuan nuntak a buai leh na khempeuh in hong taisak khin thei hi. Nupa kal haksatna nei kawma mi lawhcing tam lo ding hi. A ciilin lawhcing bangin a kidawk hangin sawt kimang lo hi. Tua ahih manin, i seppih, i pu, i nasemte, leh van hong leisakte tawh i kizopna a hoih nak leh ‘lawhcinna tawh kinai hang’ cih theih ding ahi hi.

Hih bang lianga leitung a khantoh zawh, set in nakpi’n mihing a thamaan sak zawh ciangin zong mite in America gama sumbawlna muna kizopna vai a sinna uh panin ulian (officer) khat in a nasep mun li a khen mun thum (3/4) pen a mihingpihte adingin zang hi, kici hi.
Tua ahih manin, kha-mi na hi a, thu-um lo mi na hi a, bang mi bang mi na hi zongin, leitungah lawhcin na ut leh na mihingpihte tawh kizopna hoih na neih ding kisam hi.

25. Bangci Kizop Ding Hiam?

Midangte tawh kizopna hoih nei dingin ai-siam hih kul tuan lo a, hih lama siamna pianpih kisam sese lo hi. Mi pawlkhat in a pianzia uah hoih tuamna leh siam tuamna nei uh a, a tamzaw in a sinin kisintawm hi. Kisintawm theih hi a, a kisamte hih anuaiate ahi hi :

Nangmah mahmah kiselsim in
Sumbawlna-ah na mihingpih na maingat hun ciangin midang sangin nangmah na kithupisak leh na lawhcing ngei kei ding hi. Nang kisapna sangin midang kisapna, na lungkimna sangin midang lungkimna pen ngaihsutsak siam in. Tua in na nasepna-ah thalawpna leh lungkimna hong ngahsak ding hi.

Midangte thupingaihsut in
Midangte in na thupingaihsutna thu a theih ma un amau na theihtelna bangciang hi hiam, cih thei lo uh hi. Na pilna, thu tampi na theihna, na ngaihsutna tangzaina leh na khantohna khempeuh pen midang nuntakna-ah na lutpih ding ciangin a tuamin koih kei in. Amaute thupingaihsut inla, a ngaihsutdan uh, a muhdan uh, a san (pom) dan uh tawh kituakin tuate a nuntakna sungah lutpih in.

Wall Street Journal in Teleometrics International-te muhkhiat khat gelh a, Officer 16,000 nekzonna a sinna uh statistic sungah, tuate laka a lawhcing 13% pen a meetna zah mah un a mihingpih a thupingaihsutte ahi uh, cih mukhia uh hi. Kizopna hoih na bawl nop leh ‘na kizoppih dingte’ thupingaihsut mahmah in.

Na kizoppih dingte theician in
Nekzonna genloh biakinn leh khuasung kipawlna tuamtuam paikhopna panin zong gen leng kitel mahmah pah ding hi. Mi i theihcianlohna hanga kizopna hoih i bawl theihlohna tam zen si!

History in Nepoleon Bonaparte pen mangngilh thei nawn lo hi. Amah a om nawnloh hangin a gualzawhna thupite in tuni tanin i tenna leitung gamlim (map) kilamdangsak hi. A thusim pen bangdang hi lo ; A paltan/galkapte theician mahmah hi. A nuaia paltan ulian khempeuh a min un sam khin thei a, a camp uah paiin gal kidona muna a omdan uh a mau gen kul lua loin tampi genpih thei hi. Paltan haipen zong, a khua uh leh a zi le tate tangthu dongin theih sawm hi. Kumpipa in tua bang zah donga a tate min a gen theihna hangin hangsan takin thauvui thautang maiah si ngam a kumpipa adinga kalsuana mainawtloh theihloh hi!

Mimal manphatna muh sawm in
Politician khangno khatin khua khatah mipi samkhawm hi. Papi pilvang lua lo khat bek hong pai ahih manin a programme geelsa pen zatloh sawm hi. Tua laitakin tua papi in, “Pu aw, gan khawi a nekzong khat ka hi hi. Na ngeina uh ka theihloh hangin ka theih khat om a, gante ka sapkhop ciangin khat bek hong pai leh zong ann ka pia veve hi” ci hi.
Mi tampi in hih politician bangin mi khat i manphatna kimu lo thei zel hi. Mi tampi lungsim a zo thei pen mi khat hi thei a, a tawm hangin mihing mah hi veve hi.

Hun tomcik sung bekin kizopna hoih bawl sawm kei in
Nekzonna lampi-ah mihing khat pen ei deih hun sungah khumcip kisawm thei hi. Khatvei kimuh a, taisan kik pahna tawh meet theih ding khawng peuh kisa hi. Mihing kizopna hoih nei dingin khatvei kimuhpakna tawh piang thei lo hi. Bazarah van lei dinga i pai ciangin khatvei kimuhna ahih mah bangin hong khiam dingin i deek uh a, a hoihna leh hoihlohna kihilh tuahin, ‘kizawh’ sawmin i kinial uh hi. Kizopna hoih nei dingin tua bang maimai tawh nuntak ding hi lo hi. Hun hoih khempeuh tuh a, eima nekzonna bek ngaihsun a, midang zawh sawm pen lawhsap theihna ahi hi. Tua banga lawhcinna a om phial zongin sawt kikhom lo hi.

Thu a hilh hi loin mi hong thuhilh hi in
Midangte tawh sepkhopna hoih nei dinga a kisam mahmah pen amau muangngam na hihna dawkkhiatsak ahi hi. Ka geelna hoih na sa hiam? Banga na ngaihsut dan? ci a midang’ ngaihsutpiakna lametna mel na theihna pen kizopna hoih bawlna ahi hi. I panpih kisam lo dinga i ngaihsutte in, ‘Nong panpih kisam ing’ hong cih uh ciang, i vote sawmlohnapi ah vote kikhia kha zel hi! Hih pen politiciante in theician mahmah uh hi.

Na thak pholhkhiat ding neiden in
Mite’ muanngam, kianga om manpha, leh muanhuai hi dingin, ‘Kei hoih ing’ ci a tangko den kisam lo hi. Tua sangin na hatna thei inla, na theihna leh na cinna ciang theicianin, tua tawh kituakin midang lawpsak nadingin na thak pholhkhiat ding nei den in.

Khatveivei ciangin cimtakhuai zah dongin a kiciangtansa committee hiam, kimuhkhopna hiam om thei hi. Tua bang huna na muh ding mihingte muh ding na thalawp hiam? Hong vaidawn hoih ding uh hiam? Ciamnuih thak, ngaihsutdan thak, thu lungdamhuai leh ngaihsutna a thalawpsak thei na pholkhia thei hiam? A pholhkhiat hun ding takah na pholhkhia hiam? A hun maan takah na pholhkhiat siam leh mi tampi lakah mite thupingaihsut leh kholhpih nuam na suak ding hi.

Mi lungsim a nasak lo lamin
Khedap zuakna a sem khangno khat in nupi khat khedap lei ding etpih hi. Khedap tampi a bulhsinsak zawh ciangin a kituakpih om thei mahmah lo hi. A tawpnaah, “Pi aw, ka khedap uh leh na khe kituak lo hi. Na khe taklam pen a veilam sangin lianzaw a, cih nading om lo hi” ci hi. Tua banga a khe kikimlohna thu a gen gawpna hangin nupinu zong a hehsuak mahmah a, tua sai paikhiatsan sawm hi. Tua laitak saineipa in mu a, hoih takin kam kuppihin, khedap a leisak banah, lungdam takin sai pan pusuaksak thei mawk hi.

Khangnopa in a pu kiangah, “Pu aw, bangci hopih na hia? ka gen bangin a khe kikimlohna thu gen veve cin a?” ci hi.

Saineipa in, “Na gen bang lianin gen ke’ng. A khe veilam pen a taklam sangin neuzaw deuh ahihna thu ka hilh kawmin, a khe veilamah mawza sahte bulh thuah dingin ka hilh hi” ciin dawng hi.

Numeite in khe lian neih sangin khe neu neih utzaw uh a, khe kikim lo hih sangin mawza sahte tawh kiselsim theih ahih leh nuam mahmah ding uh hi. Hih banga mi lungkim nading theihna thusim pen sin theih hi lo hi. Saineipa in tuate a theihsim hangin a van a leisak lo ding genloh, a sai sung a siik nawn mahmah lo ding khat pen a vanzuak a leisak theih banah, lungkim takin tua a sai pan pusuaksak thei dingin lungkimna bawl thei hi.
Hih gentehna pen mi lungsim nasak lo lama thugen siam leh, amau thalawpna bang a lamlahna pen manpha mahmah hi, cih theih nading ahi hi. Novelist Joseph Canrad in, “Thugen ding maan leh gendan maan hong lamlak unla, mualte ka khin thei liang ding hi” ci hi.

Midangte adingin manpha in
I nekzonna peuhpeuhah eimah bek i meet nading lam sangin, midangte adinga manpha i neih nading ahihna thupi ngaihsunin hi leng, ei adingin sep nuam a, midangte tawh kizopna hoih bawl nadingin hoih a, nekzonna leh sumbawlna manpha leh zahtakhuai hi ding hi.

USA a Nordstrom Departmental Stores in, “Sai tuamtuamte thupina leh thupilohna pen amau a zuante (customerte) a thupingaihsut leh thupingaihsutloh (care leh care-loh)ah kinga hi” ci uh hi. Sai tuamtuamte in a zuan mite a kiamna hang a kanna uh panin, amau a zuan 1% si a, 3% khua dangah lal (pem) a, 5% in lawm hoih dang neiin, 9% in a tua saite kidempih zuan uh a, 14% pen a vanzuak/a vanlei uah lungkim lo a, 68% pen sai ngakte vaidawn danah lungkim lo uh ahih manin sai dangah kisuan uh hi. Hih pen hoih takin sinin hi leng midang tawh kizopna hoih manphatna i theisiam ding hi.

26. Kizopna Hoih Nei Dingin Bang Kisam?

I thugente pen kinai thei mahmah hi. Midang tawh bangci kizop ding cih i genkhin a, tua tawh a kinai mahmah tua dinga kisam pawlkhat i genkik ding hi.

Mi thugen ngai khia in
Mi tamzawte pen i kamtam lua uh hi! Lungduai leh thanuam taka ngaihkhiat nopna pen ‘talent’ thupi mahmah khat hi. Ngaihkhiat bek zong hi loin, ngaihnop sa mahmah bang a ngaih pen manphazaw lai hi. Mi te’n nang tungah a tangthu a gennop leh mi ngeina khat in hong ngaihsun cihna hi a, a nuntakna-ah mi thupi khat na hi cih kithei in. Tua banga na cih theih maloh na maia mi tawh na kikal uah guam thuukpi om cihna hi.

A ngaikhiate nektheih lamin thugen in
Bang thu a na gen cih zah mahin, bangci bangin gen na hiam? cih pen a kisam mahmah thu hi. Na gennop pen nangma muhna/etna panin gen pah kei inla, a ngaite muhna panin genzaw in. A theihsiam khom, a kim le pam (environment) tawh kituak etsakna, a lungdam theih nading kammal dongin zang lecin nuam sa ding uh hi.

Mi inn leh office ah na hawh ciangin a kim le pamte en inla, a lungdamna lam uh leh a thupingaihsut lam uh a kidawksak dinga sabuai leh bang tunga kisuangte nadongin na theithei ding hi. Maan na et ciangin tua maan pen a kisuanna hang ngaihsun in. Tua bang mahin, kizemnate leh a siamnate uh theihpih lecin hoih mahmah ding hi. Mikang pau siam khol lo kiangah kipilsakin kammal lawhdan hoih na pulaklak leh hong thupingaihsut mahmah napi’n na kiangah om nuamsa lo ding uh hi.

Thupingaihsut na hi cih theihsak in
Hih pen baih het lo a, ahih hangin siam vanlak le’ng midang tawh kinai theihna thu manpha mahmah ahi hi. Na kithuahpih mi in amah pen na thupingaihsut mahmahna thu hong theih leh, kizopna/kinaina baih hi. Nungak le tangval kiheelnaah zong hih pen maan mahmah hi. Thupingaihsutloh hi a mi in a kitheih leh, a lungsim pen a kiumcip bang hi a, lut haksa hi.

Muan taakin om in
Pasian thu ahi a, nungak-tangval lawm kingaihna thu leh vanzuakna lam ahi zongin, na khat peuhpeuhah na maia mi in hong muang ngam hiam? cih pen a poimawh mahmah ahi hi. Van i lei ciangin a hoih leh hoihloh etcian theih hi khin lo a, ahih hangin van i lei veve hi. Ahang lianpi pen, a zuakte kimungngam hi, cihna ahi hi. Pawlkhat in, ‘Sumbawl mi na hih leh pastor banga nuntakzia hoih na neih ding kisam kei’ kici thei hi. Ahih hangin vanzuak khot i ut leh i nuntakzia a hoih lo ahi zongin a leite muan taak beek hih i sawm kisam hi. Khatvei mite muangamloh a na om leh, mi’ muan hih kik nadingin haksa taka thasan kisam a, sum tampi zat kul hi. Tua ahih manin mi te’n hong muanloh hih ding kidophuai mahmah hi.

Kinialna taisan in
Kinialna haihuai mahmah pen taisan ngam ding ahi hi. Khatveivei taisan pen zawhna hi thei hi. Genkhopna, thukikupkhopna leh kinialna pen a tuampi hi a, kinialna in a thumaanna lam sangin, a genpa dikna leh zahtakhuai ahihna lam hong liansak a, ahih hangin kizopna nakpi’n siasak hi. ‘Hat’ leh ‘zozaw’ hih sawmna mun peuhah kizopna sia thei hi, cih i theih ding kisam mahmah hi. I ngaihsutdan a kibang kei deuh zongin, a hatzaw om tuan loin dinmun kibangah omin, i thugen khawlsak ding ahi hi. Hih thu i gen cil pan i thupi pen ‘lawhcinna’ hi a, maan lo taka ‘gualzawhna’ hi lo hi. Tua bang kinialna hunah hih anuaia thute phawkden in:

1) A om ding mah hi a, pelh sawm kei in : Mihingte pen kithutuak khit theih hi lo hi. Meel a kibatloh mah bangin ngaihsutdan zong kibang lo hi. Tua hang leltakin na kholhpih pen, ‘Maan lo hi’ ci pah kei in. Tua banah, ngaihsutdan kibatlohna in geelna hoihzaw, muhna tangzaizaw leh theihsiamna lianzaw hong pia a, phatuam taka zat ding hizaw hi.
Mihing nuntakzia-ah a lamdang mahmah om a, thumaan leh maan lo lam sangin eima hihna leh mi hong zahtakna kepbit nopna lian mahmah hi. Tua bang a mah le mah kikepbit nopna hangin midang’ ngaihsutna leh ngaihsutpiakna hoihzawte i ngah ding bang kingah lo thei hi.
2) Thangpaihna pan kidawm in : Hehsuak/thangpaihna pen vanzat hoih hi ngei lo hi. I nuntakzia kibang lo a, a thangpai baih leh a thangpai hak ki-om a, pawlkhat pen i kidop kisam mahmah hi.
Na maia om mi pen thu gensak inla, a gen thu ngaihkhiatsak in. Na ngaihsutdan tawh a kituak kei zongin a thugen ngaikhia khin hamtang in. Tua in a hoihzaw ngaihsutdan thak hong pia thei hi.
3) Na kituakna uh zong in : I kinial hun ciangin a vekpi in i ngaihsutna kituak lo khin tuan sam lo hi. Bang lam hiamah i ngaihsutdan a kituak om veve hi. Sauveipi kinialnial sangin, i ngaihsutna kituakna san tak pen liansakin, tua hi leh haksatna leh buaina lianzaw tawh kigamlat theih hi.
4) Ngaihsun pha dingin khawl bawl mai in : Kamkupna muna na ngaihsutdan uh a kibat het kei leh, ‘Na ngaihsutdan zahtakhuai mahmah hi. Hih bang lamin ngaihsun ngei lo ka hih manin a kicianzawin hong ngaihsun pha ningin, na muhzia banga muh hong sawm ning e’ cih hoih hi. Thal nial gawp pah sangin manphazaw pek hi.
5) Lungdam ko zaw in : Na ngaihsutna a maanlohzia hilh ding bekbeka hong delh tantan a om leh, panmun bawlin thalnial pah kei in. Nangma hangin hun leh ngaihsutna tampi zangin hong maingat ahi hi. Tua hangin, nial pah buatbuat sangin, lungdamthu gen pen masakpen ding ahi hi. Deihsak takin mi in na ngaihsutna hoih a saklohna thu hong gen ngam uh ahih manin tua bang mite in hong it mahmah uh cihna hi.
6) Khensatna bawl pah cidam thei : Committee leh Board Meeting khawngah papi cingteng a kithalnial uh leh meetna sangin supna tam piangzaw a, a khawlsak ding dan zon pah pen pilhuai mahmah hi.
A tunga kigente pen nuntakzia leh sepdan hoihpen hi pah lo hi. Behlap ding leh kicing lo zong om kha inteh. Hih pen theidenin, kinialna a pian hun simin maanlohna nei na hih leh na maanlohna sangsiam in. Maan lo na hihna na pulakkhiat dan leh, pulakkhiat nading hun maan na theih leh theihlohah na lawhcinna tampi kinga hi.

Mipi pen na sangsia hi hen
La sungah, Kha Siangtho hong sinsakpa hi hen ci hi. Hih munah i kiim le paam a mite laka khatpeuh pen i sangsia i hisak ding hi. Mite’ kihtak, lamet, ngaihsutzia leh a muhdah mite uh theih pen kizopna hoih bawl nadinga manpha ahi hi. Mihingte in i mihingpihte i kholhpih dan a tuamtuam om hi. Sumbawl ahih uh leh i deek a, siattuak ahih uh leh hehnemin, sangnaupang ahih uh leh i sinsak uh a, a linglawng mite khamuanin, a lungdam mite i lungdampih uh hi. Ahih hangin tuate pen ‘kisin’ ngei sese lo hi. I mihingpihte hoih takin kancian leng kizopna hoih neih leh neihloh pen eima thuthu ahi hi.

Mi tawh kizopna hoih neihna lama mi lawhcing mahmah a kigente laka khat pen Benjamin Franklin ahi hi. Philadelphia khuasung meivak leh lamlian gei a khe lampi bawlhoih a, Gamhal Do Pawl masapen phutkhia-in, laibuli (library) masa pen phuankhia a, mipi zat theih ding zato inn masapen zong ama makaihna tawh lawhcing ciin gen le’ng kikhial lo ding hi. American Philosophical Society phuan a, hih pawl pen a sawt ciangin Pensylvania University hong suak hi. Sanginn leh kipawlna thupi tampi a phuatkhiat banah, England tawh a kido laiun Francete kiangah a colony pawlkhat uh pia dingin a ngetin ngen a, lawhcing takpi hi.

Bangci bangin mi khat in a damsung sawt lo cik tua bangin manpha takin zang thei hiam? A naupan laiin mi genhak leh kholhpih nuam het lo hi a, a lawm quaker khat in hoih takin mihing kizopna leh kinaihna a kisapna thu hilh/ sinsak a, ama nuntakna-ah a omsa hi lo, kizopna manpha neih nading hong hanciam thei mawk hi. “Mi tawh ka kimaingat ciangin amau etdanin enin, a hoih lamin meetpih ka sawm hi” ci hi. Thu ngaihkhiat nuamsa-in, mi nial pahpah lo a, a kianga om tawldamin, mi te’n a kianga om nuamsa mahmah uh hi.
Sanginn a bawl nop ciangin ‘a ngaihsutdan’ picingsak dingin mipi samkhawmin genpih gawp ut ngei lo hi. Kipawlkhopna tawh ‘mi kipiate leh phatuamngai diakte’ nasep bangin dawksak zel se hi. Khua sung hoih nadingin geelna tawh bul a pat hun laitakin ‘a neipa’ bang kekin kithupisakna lam lunggulhna tawh ama min kidawk ding ut ngei lo hi. Tua tak pen khuasung mite muanngamna hi a, theihden ding tampi semkhia thei pah hi.

27. Midang Tawh Kinaina

Kinaina i cih ciangin a naih om a, tua i naih om hi. A piakhia om a, a sang/ngah om cihna hi. A piakhiate zah mahin a ngahte in poimawhna nei uh a, a piate piakdan leh a ngahte ngah danah nakpi’n lamdang thei hi.

America Civil War laia general minthang, gal ven khit cianga US President ahi General Ulysses S. Grant in hih pen theician mahmah hi. Kido lai-in a office maiah a paltante laka haipen hi-a a theih dingsak den hi. A thu khakkhiat ding peuhmah tuapa theih dingin simkhia masasak den a, tua paltanpa in a theihsiam kei leh gelh pha kik zel hi. A theihsiam hun ciang bekin a laikhak gelhte pen laikhak taktak hiin ngaihsun hi. Mi mawlpen in zong a theihsiam theih dinga mi a hopih a, a kholhpih siamte in midangte tawh kizopna hoih nei thei uh hi.

Bangci bangin?
Wayne Pennington in, “Midangte tawh kinai nadinga a kisam mahmah pen i maia om mite’ ngaihsutna, a hun paisa leh na khatpeuh a ngaihsutdan uh theihsiam ahi hi. Hihte na theih naak leh midang tawh kinai haksa lo ding hi” ci hi. Mi pawlkhatte in piteekte kiangah a zat hetloh ding uh cinsanza tampi khawng thei ding zah dongin mi thuzawh thei uh a, kam le muk zatsiam lamah kuama demzawh ding hi lo hi. Ahih hangin mikim in tuhun i dinmun panin sin ding leh mainawt nading kinei ciat a, mi tawh kibat ding lam sangin lawhcin kisawmzaw hi. Tua manin hih thu pen kidem nading a kigelh hi lo a, a bana thu kigelhte zong tua lam (lawhcin nading) ngaihsutna tawh sim zel in.

Pau kei mai in!
Midang tawh kinaina hoih nei dingin pauloh ziau pen kisam mahmah ci vanglak uh hi. Mi te’n hong hopih ciang dawnkik sawm pah kei inla, lungdam phot in! Bang hangin maw? Hopih taakin hong ngaihsun uh cihna hi! Hopih taakloh, kamsawl taakloh-a a ngaihsut uh leitungah tampi om hi. Tuate lakah kihel lo a, hopih taaka hong ngaihsutna mahmah uh zong lungdamhuai khin hi. Holimpih a, thusim hilha, a lunggimnate uh a ngaikhia taaka hong ngaihsutna uh lungdam takin sang inla, na kiangah tawldam hen. Mi tampi in mi thugen ngaihkhiat ki-ut lo a, a genpa/nu hih kisawm den ahih manin midangte i kiangah om nuamsa lo uh hi. Ngaihsun kik mah ve, hoih taka na thugen hong ngaihsakte pen na gensia ngei khol kei ding hi. Tua in etsakna tampi nei hi. William Shakespeare in, “Mi khempeuh lamah na mit nga inla, na aw gingkhiasak se kei in” ci hi.

Pasian in midang thugen ngaihkhiat sangin, mi tungah genkhiat tamzawk ding kisam sa hi leh, mihingte bil khat leh kam/muk nih hong pia kha ding hi. I sim uh a, i theih leh zakte laka genkhiat taak, a kimkhat bek pulakkhia dinga hong deihna hangin i bil zah lang, kam khat bek hong pia hi kha ding hi!

Hih na laisim tawlnga pak inla, kingaihsun pak dih ve. Na kihopih zawh lian tawh kua kamtam pau zaw? Mihing nuntakna a thuzawh pen nuntakna mah hi a, pau pen ‘a vanzat’ hi lel hi. A tuama hun zatna, mipi maiah ding a thugen khawng ahih kei leh na kamtamna in na minsiat nading hun hoih hong ngahsak lel hi!

Midangte suaktasak in
Thugen hoih taka ngaikhia thei dingin a ngaikhiate in veiluat nei lo ding hi. Tua bang a neih leh thugenpa thugen a sungah lut thei lo ding hi. Tua ahih manin thu ngaite in vei lianpi a neih uh a, tua amau vei thute a gen na hih kei leh nangma ngaihsutna gen gawp nadingin hun hoih hi lo hi. Tua bang mahin, midang thugen na ngaih ciangin nangma sungah thungaihkhiat a nuamsak lo ding zah dongin lunggimna na nei hiam? Hihte vensak masak kisam hi.

Mihingte pen mihing kihi ahih manin ganhing bangin i ngaihsutna khempeuh kigenkhia pah lo a, selsim bangzah hiam om hi. Tuate bangci theih ding?
Mihingte pen i gamtatzia panin i nuntakzia leh ngaihsutna tampi kitheithei hi. Tua bang a theisiamte in mi tampi nuntakzia thei uh hi. A vekpi-in kigen kim thei lo ding a, pawlkhat gen dih ni :

Mi pen a mit-ah en leng buaina a neih leh neihloh theih baih pen hi. Hong et ngam kei hiam, hong et nop kei leh thudang ngaihsun ahih kei leh a zahkai hi thei hi. Phone a mi i hopih ciangin a aw luanzia uh pen damdamin a gen uh hangin a tom thei bang pena hong hopih uh leh nang hopih nadingin hun-awng tam neih lo cihna hi nuam mahmah hi.

Tua bang dinmun na theihsiam masak kul a, na theihsiam kei leh na kamsiamna zahzahin a cimtakhuai na suak ding hi. A ngaikhiate in na thugen pen bangci ngaihsut uh hiam cih pen thugensiamna sangin manphazaw hi. Na kamsiamna lam sangin a lungsim kihon nading siamna manphazaw lai hi. Khatveivei ciangin i nuihmai leltakin zong thu tampi gen thei hi. Tua banah lengla do siam hih ding zong kisam mahmah hi. I innsungah mi hong sungtum uh ciangin i neih laka hoihpen, etlawmpen leh deihhuaipen tawh kivaidawn nuam hi. Tua bang lianin mundangah zong mi va kholhpih siam le’ng kuama’n hong nial lo ding hi.

Ngaihkhiat nopna nei in
Mi tungah dotna na dot ciangin, na melah citak lo leh ciamnuih bawl khawng hong sak uh leh tua hong muhna tawh kituakin hong dawng ding uh hi. Midangte nuntakzia na sin bangin na nuntakzia zong midangte in hong sin uh hi. Thungaihkhiat thalawp mahmah (bangin om) inla, thusim hong hilh a sawm uh ciangin (a thupi kei phial zongin) kithalawp gawp pong leh puatham takin kidawk ngei kei in. Midang kiangah a gensawn ding beka a theinuam hong sa kha ding hi.

Mi thugen na ngaih ciangin, a gente in na dawnna sangin na theihsiampihna kisamin thu hong gen hi, cih mangngilh ngei kei in. Na ngaihkhiat danah tua pen na kidawkkhiatsak kisam hi. Na dawn nading bekbek na ngaihsut leh a thugen theih kimloh na nei ding hi.

Dotna dong in
Mi te’n thu a gen uh ciangin thupingaihsut i hihna a theihtheih nading baih mahmah uh pen dotna i dot ahi hi. Tua pen limtakin ngai taktak hi cih kidawkna ahi hi. Ahih hangin dotna tawh kisai-in dotdan lianpi nih om a, a thugente’ thugen buaisak nading leh thugente in a thugen uh lawp taka a zopkik theih nading ahi hi. Dotna na dot pen amah a maizumsak thei ding a dong tawh a kibat hun om thei hi. Pilvang in.

Hong buaisak thei dingte lak pan kidawm in
Mi thugen na ngaihkhiat hiam, mi te’n na thugen a ngaih uh hiam ciangin kim le pamah hong buaisak thei a om leh hoih lo hi. TV, music, tutna nuam lo, khua lum le vot lua..etc. in thugente’ thugen sangin a ngaikhiate lamah ‘aw’ nei lianzaw thei hi.

Lungduai in
Tampi i genkhinta hi. Mihing kihi ahih manin nuntakzia kibang lo vive i hi uh a, tua manin kinai i sawmdan leh i siamdante kibang het lo hi. Mi lungsim zawh nading ahih nak leh i genloh a tuamtuam zong hong zang ding uh hi. Tua manin kimansa a, lungduai a, a hun hong tun bang tawh kituaka sansiam pen hoihin, pilhuai mahmah hi. Pawlkhat in kammal kilawm lo leh zawlthu kihel loin thugen siam lo uh a, a piankhiatna uh leh a nuntakzia uh theihpihna lo tawh ngaihkhiat cimtakhuai mahmah thei hi. Lawhcin na ut leh, tua bang mite thugen zong a ngaikhia thei dingin lungduai in. Benjamin Disraeli in, “Lungduaina pen mihingte pilna a dawksak thupi mahmah hi” ci hi.

Theihsiamna kisam
Mi khatpeuh in thu a gen leh, bang thu bang thu ahi zongin, a gen hoih leh hoihloh lamah thukhensatna na bawl ding ciangin, a gente dinmun banga na kingaihsut zawh ciang bekin thukhensatna bawl in. Tua hi leh ngaihkhiatdan maan tawh mi thugen ngaikhia-in, a gen hoih leh hoihloh na thei pan ding hi. Thugente kim le pam dinmun panin, ama muhna panin thudik ahi hiam? cih ngaihsun phot inla, tua bang na ngaihsut khit ciangin dawng pan in. Nangma muhna bek panin thukhensatna na bawl pahpah leh na bawl khial zelzel ding hi.

Na heh a suak ciangin bangmah gen kei in
Hehsuakna pen mihing nuntakna sunga om khat ahi hi. A heh ngei lo mihing om lo hi. Bangmah gen loin, a kiukzote in nuntakzia in nei uh a, a hehsuak ngei lo taktak peuh kisa thei hi. Tua manin, na hehsuak laia kam tam na pauna zahzahin na haina kidawk hi. Na hehsuak ahih manin na kampau/kammal leh awluanzia pen nidang cianga na kisikkik nading a tungsak hi nuam mahmah hi. Lawhcinna lamin gen leng, hehsuak laia kammal khat maimangsak dingin hun sawtpi thu genvetloh khawng, saupi gen khawng, ngak khawng kisam hi. Hehsuak hun ciangin mipite in, “Nidang ciang kiho kik zaw ni” ci uh hi.

Khen - VII : Thugen Tawh Kizopna

28. Kizopna Hoih Bawl Na Dingin Thugen

Lungsim sunga thu om a kibatloh theihdan, tua thu omte i genkhiat siamdan a kibatlohzia panin thugen siamna pen manpha mahmah hi, cih kithei hi. Tua ahih manin midang tawh kizopna hoih bawl nadingin zong thugenna pen kisam mahmah hi.

Na thugensawm zah in na gendan kisam
‘Hih na sem kei in’ cih khawng, ‘Tua sem in’ cih pah zangzang pen a uk dinga om na hih hangin kilawm khin lo hi. ‘Nang pen hih na sem dingin muanhuaipen dingin hong um ing’ cih khawng, ‘Nang pen a sem lo dingin zong kikham zo na hih manin pahtakhuai mahmah teh’ cihte in thugen sawm kibang tektek pen gah manpha mahmah gahkhiasak theizaw hi.

Tom cika dawn leh gencian siam in
Kinai nadinga kisam mahmah pen dotna leh dawnna ahi hi. Dotna’ dawnna panin pil leh pilloh kidawk mahmah hi. Ngeina hoih het lo khat neih theih hi a, tua pen dotna peuhpeuh a a pelh theih nading lampi a zong bang kekin saupipi a dawn pen hoih lo hi. Tua bang dawnna tungtawnin dotna kibehlap thei hi. Tua sangin a baih theipen in hong dotna tak uh dawng ziau-in, a kicet kei leh tom cikin etsakna pia le’ng, dotna neite in theihsiamloh a neih uh leh hong dongkik zawsop uh leh hoih hi.

Dawn nophuai dingin dong in
“Atom pen bang cihna hiam?” cih pah luanluan sangin, “Ka laibu sungah Atom thu a kigelhna mun tam mahmah ven, bang hiam cih theician lo ka hih manin kician taka hong hilhcian thei dingin nang kong muang a, nong hilh thei diam?” ciin zong dot theih hi. A dawng ding hi leng, dotna nunungzaw pen dawn uthuaizaw pek hi. Dotna na dot ma-in na dot ding mi pen kua hi a, bangci bangin dong lecin hong dawng thanuam ding hiam? Dawn nading hun a nei hiam? Tu huna dot dingin a kilawm hiam? Tua munah dot dingin a kilawm hiam? cihte ngaihsun masa in.

Na gensawm gencian pah in
Hih pen kum upate adingin kisam diak hi. Eimite pen thukikupkhopnaah manlah het loin damdama a genkhawm mi i hi hi. Kum lam upate in tua bang nuamsa diak uh a, tua bang leitung lunggulhin bawl sawm uh hi. A hun tawh kituak mahmah ahih kei leh, tulai hun ciang mihingte in sep ding kihau a, kibuai ahih manin gensawm gen pah lo a kawi gengen ding hun hi nawn lo hi. I gensawm kician taka gen pah ziau pen mipil hihna ahi hi. ‘Manlah lo ing a’ cih pen nangma lamah a maan hangin, na thugenpihte lamah maan lo thei hi.

Na gen ding theician in
Mi tampi pen thugen siam uh a, gen zong utin, mi theih zong ki-ut a, mite tungah thugen ding tampi a nei hiin kitheiin, politics leh kha in hong sawl hun bang ciangin ‘hai thum beel a hai guk huan’ a gen uh banga dimlet hiin i kithei hi. Ahih hangin i gen ciangin i theician kei kik leuleu hi! Gensiam leh uanggen sangin i thugen theihcian kisamzaw hi. Kisinkholh theih hi. Mipi maiah thugen ding, ahih kei leh mi holimpih ding cih i kitheihsa a, gen sawm kician tak i neih leh, kisilna khan sung khawngah gensin leng hoih mahmah a, genkik nuam hi.

Thugensa genkik pen siam le’ng zaknop a, siam kei le’ng cimtakhuai mahmah thei hi. A siamte in a thu ngeina etsakna dang tawh hiam, ngaihsutdan dang tawh hiam siam takin genkik uh hi. Pawlkhat in kisam a sak uh point khat bek genkik uh hi. Na genkik ciangin gen nuam na sakna hangin gen kei inla, a ngaikhiate in theician dinga na deihna, theician zo lian lo a na theihna hang ahih kei leh, a mipite’ lunggulhna hang ahih kei buang leh genkik kei in.

Na thugen ngaite ngaihsutna theih sawm in
Pawlkhat in vei kihauin, gen ding kal kingaklah hi. Hun a om nak leh - kuate kiangah, koi munah, bang hunah, bangci bangin.. cih lam ngaihsun loin i gen gawp uh hi. Gen zoin kisuakta ziau thei zawmah lai! Na khempeuh a genkhin bangin kingaihsunin, i genkhit lian ciangin thugen taktak a pan i hih lam i thei kei hi. A genkhiate lam pan a zo hi a, a ngaikhiate nuntakna-ah a nasep kipan pan hi. Na lungnuamsak kei in. Kinaina hoih a bawlsiam mite in a thugen uh mite in bangci ngaihsut uh hiam cih kankik hamtang uh hi. ‘Mi te’n hong thupingaihsut hiam?’ ci-a kankik lam hi lo hi.

Lawhcinna pen i gen hoih leh i gelh hoih lamah om lo a, a ngaite nuntaknaah thu a gen leh genlohah kinga zaw hi. Tua bang kankikna leh theihna om loin gen kik dingin kisakkholh theihloh hi. Tua manin Seminar, Workshop liante ah a ngaikhiate in a ngaihsutzia uh a theihsak kik nading hun bawlsak den uh hi. Na thugen pen hoih sa napi, dotna hong dot kei uh a, a ngaihsun kik a om kei leh na genma tawh a kibang na hi hi.

Hong dawn kik uh ciang
Kinial taktak lah hi lo, na thugen mi in a ngaihkhiatna uh pana a ngaihsutzia uh hong gen ciangin bangci sang na hiam? Lungsim kihong takin maw ahih kei leh nangma bit nadingin bekin? Nang le nang siam kitangsak nuamin kigensiam na sawm hiam? Dawnna i ngahkik ding a i kingaihsutna tawh kituak lianin dawnna kingahkik hi.

29. Mipi Maia Thugenna

Midang tawh kizopna hoih neih nadinga kisam mahmah leh nasem thupi mahmah pen mipi maia thugen ahi hi.

Na hun paisa-ah misi inn leh pulpit tung pana thugen, ihmut suak lopi a lusuksan na sawm, ahih hang na lusuksan theih tuanloh thugen ciamtakhuai pipi na theih tampi om ding hi. Gensiat khit theih hi lo hi. Gending thei lo leh gendan ding thei lo mi hizahta kawmkalah tua bang thu hong gen uh zong a pahtakhuaina uh om veve sam hi! I gen sawm pen thugensiam diakte ading hi loin, mi ngeina, mi khempeuhte theih dinga kilawm ahi hi.

Na thugen a lawhcing hiam?
Thugen tampite in kipawlna, pawlpi, la siamna, lai siamnate masuana i neihna hang leltakin mi te’n i thugen ngai uh hi. Mi tampi te’n hih thu pen kitheisiam lo hi. Thu i gen ciangin mi te’n ngaikhia tek uh hi a i theih ciangin lawhcing kisa-in, i thugen pen ngaihsut kik kul nawn lo ding zah donga lawhcingin i kingaihsun thei hi. Ahih hangin, hang tampi leh aana tawh a ngaikhia na hi zawsop uh hi. Na min Thangboih hi leh, na vengte kikoin, ‘Khua laiah Thangboih in thugen ding hi, a ngai nuam peuhmah hong pusuak un’ ci bang hi leh, bangzah hong pusuak tam? Tua santak pen bangci banga lian na hi hiam cih theih nading ahi hi.

Kisakhol in
Thugente pawlkhat pen sangnaupang thadah pawlkhat bang hi a, sim ut lo napi’n exam hall-ah panla mahmahin, a etteh liangte tawh kibang hi. Kisakkholhna lam hoih neihloh napi a thugen dinga dingkhiat cianga panlak mahmah pen thu kimot gen gawp thei hi.
Ngaihsun cian lopi a mipi maia thugen pen hihkhial vanglak le’ng ei le ei kimindaisakna hoih mahmah hi a, tua bek zong hi loin, Pasian mindaisak theihna zong ahi hi! Tua manin hoih taka kisakkholh kisam hi. Kha Siangtho nasep i lametna hang pawlkhat pen thadahna hanga i kisakkholhloh paulap hi leltak hi. Na kisakkolh hun ciangin hih thu mangngilh kei in; Tuhuna na maia mite pen na damsungin tuhun bang lianin kuamah om nawn lo ding hi. Na hih khialh vanglak leh kumtawnin na minsia ding a, na gen hoih leh tua tawh kilehngat lian ding hi. Na thugen ding hunsung a tom mahmah leh na kisakkholhna hun sau hen la, a sentence kizopdan a gelh sangin a point kizop dana gelh pen gen baihzaw hi.

Tom maw sau
Kisakkholh nading hun om lo a mipi maiah thugen a kisap hun om thei hi. Hih bang hun ciangin sauvei genluat pen manpha ngei lo hi. Na thugen theician inla, na gennop gen ziau in. Sauveipi na gen hangin kuama’n thei taktak lo ding uh hi!

Na gensiam mana gen na hi kei a, na lungsima omte a pulakkhia ding ahih kei leh mi khat in gen dinga kilawm hong sakna hanga gen na hi lel hi. ‘Ka lawmpa pen ngai mahmah ing a, ka damsungin mangngilh nawn kei ning’ hoih lel! ‘A innkuanpihte Pasian in a ompih ding ka deih a... cih tohtoh leh A kha pen tawngtung gamah.... cih bang khawng gen kul lo hi. Kisam a sak leh pastor in gen hen. Tuni a ka lawmpa lawhcinna ka lungdampih a, a mailam kalsuan nadingah deihsakna lianpi ka pia hi cih ziau zong hoih lel. Kipawlna leh innkuan tanga gen ding na hih leh a sauzaw deuh, ama tangthu zong na suut hangin phamawh lo ding hi. Tua lo a, thugen dinga hong kisawlna hanga ‘theih khempeuh’ gen sawm mawk pen cimtakhuai mahmah hi.

Cimtakhuai kei in
A kisam pen-in, ‘cimtakhuai kei in’ cih ahi hi. Mipi lam nga-in dakkhia inla (na ngam leh!), na tungah lametna a neih uh leh muhloh theihloh hi. A neih nawn kei uh leh zong na mu thei veve ding hi. Naupangte maia thugen pen kisinna hoih mahmah khat ahi hi. ‘Dai un’ cih leltak a na thugen hun kimkhat khawng na zat leh naupangte hang hi loin, nangma ginatloh man hi kha thei hi. Ciah inla, na khan (room) sungah lutin kisin kik in.

Kim le pam
Bangci bangin na kigingkhol zongin kician taka gen theiloh hun om thei hi. Kum kikhia lua omkhopna, lungsim ngaihsutna kibang lo lua leh lungsim a linglawngsak thei a omna munteah phatuamngai lua nuam kei in. Mi ngeina tunglam, thugensiam tungtuang na hih kei leh tua bang munah thugen lawhcin haksa hi.

Kammal zat
Ahih theih liai leh na maia om dingte nuntakna, deihna, leh ngaihsutzia theihcian sawm in. Na gensawm theician inla, na kammal zat pen hong paikhawmte kum zah, nuntakzia, lai siamna, leh nek le tak zonna dinmun tangpi tawh kituakin kammal zang in. Tangval gual zu nam philphialte lakah, “Pu Chiarman..” cici kei in. Meigong zuzuak tanu nungak melhoih tangthu panin na thugen pan lecin hoih pah lel ding hi!

Kipiakhia khin in
Hoih leh etlawm na deih a, siam tak hih na ut a, mite thupingaihsut mahmah ding leh mi advance hih na ut leh thu gen kei mai in! Na thugen ding leh na thungaite a kisap zah mahin nang zong na poimawh hi. Tua na ngaihsut kei leh na thugen kuama’n meetpih ngei lo ding hi. A meetpih pen in zong, “Siam vanglak” a cih kei uh leh, “A nectie etlawm..” cih khawng bek hi kha ding hi. Na nuntakna buppi pia inla, nangmaha om ‘khempeuh’ kaikhawmin, sungkhiain thu gen in.

Etsakna hoih zang in
Etsakna pen thugente vanzat manpha mahmah khat hi a, thugen siamlopi khat thugensiam a suaksak thei ahi hi. Tua mah bangin, zat khialh khak leh thugen bangmah lo suaksakna ahi hi. Laibu sunga na sim etsaknate mawk zat kei in. Na thugen ding pen inn lamah gensin inla, a gingin tua etsakna tawh a kituak thei ding hiam cih na genna tungtawnin na thei ding hi.

Gelh cianga nuihzakhuai om a, gen cianga nuihzakhuai om hi. Gentehna in, Picing Nipi sangah thu na sinsak a, na thugen a kiciansak dingin na sinsakte kum leh kim le pam tawh kituakin etsakna na zatsiam ding thupi hi. Upa lamte kiangah Hau Cin Khup, Pau Cin Hau, Japan Gal, lo khawh, gal aih..cihte leh nupite kiangah singtuah ding, gas stove, vok khawi, second hand puan, tate siatna.. cih bang zat hoih hi. Khangnote lakah lawm kingaihna, nekzonna, siamsinna, mi lawhcingte tangthu, media, music, leh kimawlna thu cihbang, naupangte lakah cartoon, Tom & Jerry, mitphial, exam, science fiction cihte zat hoih hi. Hihte zong khua khat le khua khatah kilamdang thei lai hi. TV omlohna leh gas kizatlohna mun khawngah!

Thulu tel
Kum 2000 khit ciangin Lamka khuapi a naupangte nuntakzia dinga kumpi malakna a hoih lote leh mailamkalsuanzia ding... sau lua a, a thulu bekbek in zong ihmut suaksak hi! Hih bangte pen a kantel, misiamte’ seminar/ workshopah subject matter specialistte in a ut uh leh zang hen. Mi ngeinate lakah tom kim tak hi hen. Ahih hangin, ‘Hoihna’ cih leltak khawng tom lua leuleu hi. Haksa na sa hiam? Tom kim si, a tangpi theihtheihna, a ngaikhiate adinga theihnophuai mahmah zatsiam kisam hi.

30. Biakinn Pen

Biakinn a thugen pen kithupingaihsut a, nasep thupi khatin kingaihsun hi. I thugen in mi thuzawh taktakin, phattuampih taktak hen cih i deih leh biakinn pen thugen nading munhoih ahi mah hiam? cih pen dotna lianpi ahi hi. Kikhawm mi 100 hi leh a omdan uh upmawh gen dih ni :
1. 20% - Lusu
2. 10% - Thungaih sanga kikhop limlim a thupingaihsutzaw
3. 10% - Hihna/mawhpuakna hanga kikhawm.
4. 10% - A kilawmsakna hanga kikhawm.
5. 10% - Sep ding neihloh mana kikhawm.
6. 5 % - Thugen leh a gen thulu sanga a gente a thupingaihsutzaw.
7. 5 % - Thugen sangin kizemna leh na dang a buaipih.
8. 5 % - Tavuan neihna hanga kikhawm.
9. 5% - Thungai thei lo, naupangneu leh mibang lo!

Tua leh mi 80 kitaanta hi. Mi 20 bek thungai ding kinei lai hi! Hih pen maan khin lo ding a, ahih hangin a maan tamzaw ding hi. Tua banah pulpit pana thugen nading hangin thugelh leh milim zangin hiam, vanzat tuamtuam zangin na thugen hong huh theih ding na zang thei kei lai hi. Na gen ding print a hawmkhiat ding lah lem lo lai!

“Koi maw, a ngaihnop thei pen dingin gen dih ning” ci lecin hi thei lo hi. Thu-up leh Lai Siangtho tawh kituakin na gen kul a, mi gen ngeiloh thu thak na genpah hoih lo hi. Kum 2000 val bang leitungbupa Pasian thu hilh tulsawm tampite in tamveipi a gensa uh laka khat a gen na hih lel hi, cih kithei in.

Na kaam a phat mahmah leh mi nih le khat in note bu lakhiain na thugen point pawlkhat gelhin ciamteh ding uh hi. Tua mite in kumkhat sungin khatvei hun ngah ding uh a, na kaam a phat mahmah leh genkhia kha thei uh hi. Midangte in hoih takin ngaiin, na genkhit ciang hong nohset ding uh hi. Kuama’n, ‘Siam kei mah si cia!’ hong ci lo ding uh hi. Ahih hangin hong nohset khit uh ciangin a mawhpuakna uh a zo danin kingaihsun ding uh a, na thugen mangngilhin, biakinn pualama kisuang pawlpi biakpiak hun sehna en ding uh a, Nipi kik cianga thugen ding kua hiam? cih simloh ngaihsun nawn lo ding uh hi.

Biakinn a thugen tampite laka khat na hih manin mi tunga tung pen na tungah zong a tung ahi hi. Thuthak hi lo a, thucin-thutang (newspaper) ah kisuaksak lo ding hi!

Kingaihsun pha in. Biakinn a thugen na lunggulh mahmah hun ciangin na thugen pen mi te’n thei leh na cih taktak man maw, na mawhpuakna zawh nadinga gen lel? Biakinn a thugen hoih lo i cihna hi lo a, pumpi ci le sa’ ngaihsutna pan lunggulh taak lo hi. Kha lam thu tawh kisai taktak ahi hi.

31. Thugen Khit Cianga Kizopna

Mi tampi omna muna thugen sangin, mi tawmcik omna muna thugen kitamzaw hi. Tua ahih manin tua bang hunah theih ding tampi om hi.

Mipi kikhopna maia thugen tawh kisai honpi khat i gelh khin a, gelh behlap ding tampi om lai ding hi. Tua laitakin a kidawkcian lian lo a thu khat a kikoihsim pen thugensiamna lam bekbek hi loin, midangte tawh kinaizawk theih nadinga i sepna-in, tua mite tungah bang tun hiam cih theih pen a kisam mahmah ahi hi.

Siam takin mipi maiah khitui luang liang a thu na gen ciangin ‘lawhcing’ kici pah kei in. Thugen lawhcinna pen nangma thugen lamah kinga loin, a ngai mite a thuzawh leh thuzawhlohah kinga zaw hi. Tua ahih manin thugen hun ciang, tua thugenna in mi a thuzawh hiam cih ngaihsun lo a, na lungsima a om bangbang na suahkhiat gawp theihna hangin lawhcingin na kingaihsut leh khial den ding hi teh. Na nasep leh thugen in midangte’ nuntakna-ah na a sepdan tangpi pen nam thum (3) in kikhen thei hi.

A thalnial pah om
Mipi paikhopnaah hiam, committee tutkhopna munah na deihdan na gen a, midangte hong dawnna pen, “Sep dingin hoih kei!” cih hi leh, “Bang hangin?” ciin a taktakin na dawnkik kei leh zong na lungsimin na dawngkik ding hi. “Nidangin kisem khin a, kilawhsam khin hi” hong cih kei leh, “Kua hiam tua bang nasema lawhcing” hong ci nuam mahmah uh hi. Tua pen a buaihuai mahmah khat ahi hi. A hoihna a theih hangin a sepzawhloh ding leh sep theihloh dinga a ngaihsut uh leh tua na thugen a meetna om lo hi. Tua bang dawnna pen ngah thei na hihna thei in. Tua ahih manin thu na gen ciangin tua banga dotna om theite dawn nading tawh na gen pah ding hi.

Nang zong bang na hia?
Hih dotna pen a gingin na maiah kuama’n hong gen lo ding uh hi. Ahih hangin i thugen tamzaw a lawhcinlohna pen a ngaite lungsimah hih dotna a om man ahi hi.
Khatveivei, “... a sep phot kei leh..” cih thumal hoih lo tawh thungai mite in thugen sang nuam mahmah uh hi. Na nuntakna kikhel masa inla, tua ciang na thugen zui ning” cih khawng, “Na theory pen a taktaka na hih theih leh na hoih mahmah hi” cih khawng zong hi thei hi. I thugen pen a vekpi a um lo hi loin, ‘thu’ bek hi loin na dang ei tungah lametna nei uh cihna hi. Tua manin pulpit tunga i thugen tampi lawhcing thei lo hi.

Sang siam ing ei!
Hih mite pen a vekpi a thugen ngai a, sang a, a zuipahte ahi hi. Mathematics dana tuat theih hi leh hih mite tung bekah thugenin, hih mite bek thu hilh zelzel le’ng hoih lel ding hi. Ahih hangin nuntakna pen tua bang hi lo hi. Ahihna takah tua bang mite tungah thugen pen kisam lua lo a, i gensa midangte tungah gen kisamzaw hi.

Mi tampi in, “Sang siam ing ei” ci-a gingtaka kiko tawmcikte thugen bek kiza nuam a, lawhcing pelmawh dingin i kingaihsun uh hi. Tua manin hong vote cing dinga i kingaihsut laiin i theihdan na maan lo zel hi.

32. Banghang in Mite In Na Thungen Sang Ding

Hih banga i gen taktak ciang, thugensiam leh thugen lawhcing hi a kingaihsunte adingin ngaihsutphat ding tampi hong om mawk hi. Tua manin gencian kik dih ni :

Mi te’n a theihcianloh sang thei lo hi
Lai Siangtho sunga pianpih gehsa kigelh bang ahi hi. Tua gehsapa in Pasian thu kigelhna laibu sim a, ahih hangin kuama’n gencianpih lo uh ahih manin ‘pianthak’ ding dan om lo hi. Na thugen hiam, na etsakna bawl hiam, a thungaite in kician taka hong theihsiampih maloh uh sang dingin na sawl gawp thei kei hi. Hong cimtak kei uh leh zong hong lusuksan ding uh hi! Nasem ding na cial ciangin a kinhuaizia leh damdam a sep a poi theihzia gencian lo a na nawh gawp leh, kuama’n na nuaiah na sem nuam lo ding uh hi. Kician takin gencian a, a kisapna thu a theihsiam nak uh leh nawh tengtunglohin zong kinawh takin sem ding uh hi.

Ama adingin zong hoih hen
Na thugen pen nang adingin a hoih banah, hoih na sa mahmah a, gen zong nuam na sa hi. Ahih hangin na pulakkhiat pen a ngaite adingin a hoih hiam? Tua mun lianah a thu ngaite na zawh ding ahi hi. Ama adinga hoih lo, nang ading beka hoih ahihna hang bek tawh sang ding hi leh mi bang lo hi ding hi! Tua bang ahi kei zongin, na thugen siamna hang hi loin, na hehpihhuai mahmahna hang hiam a nang ading hoih a sak mahmahna hanga hong seppih thei hi bek ding hi.

Kipawl nadingin a hoih hiam?
Tulai leitungah khat bekin kinungta lo a, a lom a tenkhopnain bit hi a kitheihna hong pia hi. Mimala i phattuampih ding pen kipawlna in a phattuampih kei ding leh a tawpnaah mimal in kisiatpih kik veve hi. Tua manin mimal khat le nih adinga a hoih ahi zongin pawl, khua etc. adinga hoih lo ahih leh saan haksa kisa hi. Mimal in i deih khat pen kipawlna in a deihloh om hi. Tua manin, tulai leitungah thu khat peuhpeuh a kipulak ciangin a ngaite kua kipawlna hiam, a bitna kulhpi (pawl) a cimsak thei ahi hiam? cih kingaihsun masa hi.

Kuan zawhngeu long oksak ding
Na thusun pen theician uh a, amau ading leh kipawlna adingin hoih hi cih zong thei uh hi. Ahih hangin a lawhcingsak taktak dingin sem thei lo danin kingaihsun thei uh hi. “Hoih mahmah hi. Ahih hangin ei leltak in bul i pat theih hi lo hi” a cih uh leh, na thugen pen a zo nai lo na hi hi. “Hong honkhia thei cih i thei hi, ahih hangin ei leltak, mi gi lopente..” cih khawng, “I pawlpi adingin hoih hi cih i thei a, ahih hangin ei leltak nasepna in bangmah lamdangsak tuan lo ding hi” cih bang khawng ahi hi. Nang mahmah in bul pan masa ngam in.

33. Thu Kikupna Pana Kizopna

America gama management lama misiam Kenneth Blanchard in leitung a sumbawlna lianpipite tunga thunei company makai liante in revival speakerte bangin mipi tampipi maingat ngei lo uh a, mite a maingat uh ciangin zong kipawlna sunga mi tam lo tawh kimuh nadingin hun tam zatzaw uh ahihna thu gen hi.

Tua banah, khatvei thu-a mi tampi muh pen mi lamdang diakte nasep hi a, mi ngeinate tua bang dinmunah kiding ngei lo hi. Tua sanga kisamzaw pen, mi tawmcik tawh kikholh dan siam ahi hi.

Tua bang hunah theih ding kisam tampi om hi. Mi khat in ding kawma thu tampi a genna mun hi lo, midangte in hong dawnkik theihna munah hun kilimzat zaw hi.
I gamah company leh board meeting lam tam lua lo a, a tamzaw pen pawlpi leh kipawlna committee khawng hi ding hi. Tua manin, tua hun le munah omdan i sin kisam a, mi tuamtuam i maia om dingte zong i theihcian kisam hi.

Kam tam lua
Mi pawlkhat in cimtakhuai liangin pau nuamsa uh hi. Thu khatpeuh kigen leh a theipen bangin gen pahpah uh a, midangte gen nading hun piak sawm ngei lo uh hi. Tua bang mite in thu kigen khatpeuhah ama ngaihsutzia tawmcik beek a kihel kei leh thupicing lo bangin ngaihsun nuam mahmah lai uh hi. Hih bang mite pen siam tak leh a lungsim uh na sak het loa a thugen uh khawlsak kisam hi. Amau ut bangbanga omsak gawp ding hi lo hi. Mi lungsim hat mahmah hi thei uh a, zang siam le’ng manphatna bang hiam nei nuam mahmah uh hi. Ahih hangin tua bang mite pen, makai hoih leh hat a kisampente hi leuleu uh hi.

Thugen siam pen kamsiam bekah teh ngei kei in. A aw luanzia, a pau manlang dan, leh mi a zawh theih dante pen thugen siam teh nading hi lo hi. A thugen point a maan hiam? A gensa a genkik hiam? A manphatna bang? cihte ngaihsut ding hizaw hi.

Thugen lo lua
Kam tam tawh a kilehbulh lian mi om hi. Bangmah in a lawpsak zo lo leh, thupingaihsut a nei vet lo tawh kibang uh hi. Hih bang mite pen pualama a kidawk bang hi khin tuan lo uh hi. A ngaihsutzia uh a kigenkhiatsak hun ciangin, “Hi mah hi” hong cih uh leh saan ziau hoih hi. Mi te’n bangmah a genloh uh ciangin a hang om teitei hi. Zahkaai, cimtak, kihel pha ban taktak lo hi a kitheihna, kihel taak taktak lo a kingaihsutna hang zong hi thei hi. Thu pawlkhat gen cianga lawp mahmah, thudangah a pau nuam mahmah lo a om leh tua pen a nuntakzia uh hi lo a, a subject tawh kituak a gi lo lua hi kha thei cih theih ding hi.

A siatna lam bekbek a ngaihsun
Thu khatpeuh gen leng, a hoihna sangin a hoihlohna hiam, a maanlohna lam bekbek gen nuam a sa mi om hi. Hih bang mi tawh na kituakkhak hun ciangin lungduai takin a gensiat thu uh sanga hoihzaw thusun a neih leh gen dingin cial inla, tua in kimukhiasak ding hi. Hih bang mite pen lungsim sungah a simthama buaina a neite hi nuam mahmah uh hi.

Thu kigen khempeuh a thukim pah
Thu khatpeuh a kigen ciang, a hoihna leh hoihlohna zong ngaihsun lo-a a thukimpih pahpah om hi. Hih bang mite pen thu a ngaihsun taktak lo, lungsim a zang taktak lo mi hi nuam mahmah uh hi. Kha mi kicite laka tam nuam a, a ‘thu’ sangin a ‘awluanzia leh kammal’ khawng peuhah lungkim uh hi. Hih bang mite in makai hoih kisam uh a, vote neih tam lamah kibang i hih manin thugensiamna zanga mi khemsiamte lak panin kep kisam mahmah hi.

Gennop nei napi a genkhia thei lo
Committee leh na sepkhopna-ah bang hiam genkhop ciangin gennop tampi nei napi, a genkhia siamlo, a genkhia thei lo om hi. A ngaihsutna sung ua point pen maan nuam mahmah zawsop! Ahih hangin genkhia siam lo thei uh hi. Hih mite panpih pen meet mahmah thei hi. Ahih hangin maizumsak leh minsiatsak ding hi lo a, ‘Na gensawm hi a ka theihpen..’ cihte zatloh ding ahi hi. ‘Na gen pen maan mahmah hi’ cih hiam, ‘Na genna pana hong kilang pen...’ cih hiam zang a gensuak ding ahi hi. Siamtakin a thugen sawm gensakin, a thaman ama tungah piak siam pen pilhuai mahmah hi.

Thugen a buaisakte
Thugenkhopna tuam khat a om laia kianga tute tawh thutuam genna pen committee-na munah hoih lo hi. Tua bang mite pen amau ngaihsutna genkhia nuam lo, tutpihte kiangah phunphuna lungkim lel leh, meeting zawh cianga meeting thusim pulak a, ‘Ka ngaihsutdan hi lo mah hi...’ a ci kikkikte hi nuam mahmah uh hi. Hih bang mite pen a min uh tawh sap a, a ngaihsutdan uh hoih taka genkhia pah dinga ngetziau pen hoih hi, kici hi.

Mah le mah kikalh
Thukupkhopna-ah amau ngaihsutdan siam tak leh kician taka gensiam leh, genkhop ding thupi paisan-a thu tuampi a gen gawp om thei hi. Thukhensatna bawlpih sawm ciangin zong bawlpih theihloh, thugen limlim nuam a sa a om zel pen awlmawhhuai hi. Thukhensatsa gensiat kik khawng nuamsa thei uh hi. Thu a tam gen luat ma un thulu gen dingin lamlak siam kisam hi. Mi lungsim hat lo leh a kingaisia (inferiority complex) ahih kei uh leh zong, a thupi sangin a thusungte a thupingaihsutzaw hi nuam mahmah uh hi.

Khen - VIII : 34. Tha Lawpna

Hih sungah i gennop pen mi om mawkmawk khat thalawpsak ding dan tawh kisai hi lo hi. Mi pawlkhat in geelkholhna hoih tak nei thei uh a, sep theih ahi cih zong theiin, a sep ding dan zong thei khin uh hi. Ahih hangin thalawp lo thei uh hi. Lawp lo pipi a nasep pen cimtakhuaiin, nasep hoih nuam lo hi. Thalawpna in nasep nuamsakin, mainawtsak a, lawhcinna tunin, a semte leh a ngahte adingin tawldamhuai diak hi. Sunglam pana ngaihsutna om pen kidawkkhiasak thei dingin hong sawl, tua sem thei dinga hatna leh kuhkalna hong pia thei pen hih muna i gen ding ‘thalawpna’ ahi hi.

Bang hangin thalawpna pen tuhunah kisam mahmah hiam? Tulai nuntak pen petrol kithun lo car tawh kibang ta hi. I sawn (push) zawh sung teng i paisak thei a, i sawn nawnloh ciangin pai nawn lo pah hi. A nungtasak thatang (petrol) lo tawh car suak thak leh hoih penpente in zong manphatna nei lo hi. Tua manin sinmi pawlkhatte in thalawpna (motivation) pen mailam zuat theih nadinga mihing thahatna a piangsak leh a kisampente lakah hel uh hi.

Upna pen mawtaw a paisak set bang hi a, set a nungtasak petrol pen thalawpna ahi hi. Mawtaw gear khat a tawl hun ciangin a dang khatah i laih a, tua in i tupna mun hong tunpih hi. Tua bang mahin tua thalawpna in hong mazangsak a, gear pen tua thalawpna hong piang bang ahi hi.

Tuma lamin i kim le pama nisima i muh - tui, meivak, vantung, leh leitunga na omte pen mihing thalawpsak nadingin kicing mahmah lel hi. Mihingte kikhangto zelin tuhun ciangin mihingte a thalawpsak dingin mihing mahin na lamdang tampi kibawltawmin, thucin-thutangbu (newspaper) in i lawp leh lawplohna nakpi’n saiin, tua sanga nasiazawin TV in i nuntakna kikhelsakin, i thupingaihsut nate nadongin hong kikhelsak khin hi. Lawp dingin eimah kingaihsun tawm loin, mihing bawltawm nate tungah i zong uh a, na thak, thupingaihsut mahmah ding a kilawm zong media te’n a thupingaihsut kei uh leh kithupingaihsut tuan lo hi.

I thusun pen hoihin a sep theih cih i theih hangin a sem dingin i thusun sangin TV programme ah a nasem ding mipite a lunglut zawk mawk uh leh thupi taktak thei lo hi. World Cup final et ding a om laitaka mundang khata mipi kaihkhop i sawm leh mipi tam hong pai het lo ding hi. TV in a lawp nading uh bawl ahih manin lakkhiatsak theih lo cihna hi. Bang hiam ci-a tua tawh a kizakimpih ding bawl thei i hih kei leh a hun laih hiam, lampi dang bang hiam zanga lawpsak nading zon kisam hi. La siam, thugen siam, ciamnuih siam leh mit ala theite pen vanzat poimawh mahmah hi a, a tamzawah media mah kithalawpsak nadingin i zatsiam kisam hi. Hih pen thucin-thutang (newspaper) leh TV a advertisement bawlte in a manphatna theician mahmah uh hi

Tua hi a, hih i thusinin hong tunpih a sawmna pen - nuntakna ‘car’ sung a ‘pertol’ thun dan ahi hi. Lungsim lam a sin mi 70 kiangah dotna kibang dong uh a, “Maban a omte zo thei dinga midangte nasemsak thei dingin supervisorte theih ding thupipen bang hiam?” cih dotna pen mi 65 in, “Thalawpna” ciin dawng uh hi. Makai hi dingin hih pen theih bek hi loin talent banga kep kul hi. Bangci bangin mi thalawpsak thei ding?

35. Nangmah Pan Kipan Hen

Midang thalawpsak dan siam taka na sinkhiat hangin nangmah na lawp kei leh a lawhsamsa na hi hi. Amah leh amah a kimuanglah mi pen kuama’n zui ngei lo hi. “Amah in a nungta Pasian galkapte ninsak ahih manin..” a cipa David in a maingat Goliath pen amah sanga galhang, lianzaw, galvan nei hoihzaw leh zang siamzaw hi cih thei hi. A langlam pan gen leng, David lungsimah lawpna in nasem a, Pasian tung panin David in thalawpna ngah a, tua lawpna in Goliath zosak bek hi loin, midang tampi lawpsak a, galzawhna bek hi loin, tua lawpna mah in tuucing tangvalpa pen Israelte kumpiah koih to hi, kici thei ding hi. Tua ahih manin nangma tungah lawpna a tun dingin hihte kisam hi :

Lawhcin manphatna kihilh kikkik in
Nek le dawn kidek theihlohna hanga thauna tawh kipelh a utte nuntakna a lawpna a tungsak pen hih thu ahi hi. Nek le dawn a kidekna uh hangin a pumpi ci le sa uh hong etlawm ding ahihna leh, tua in a nuntakzia uh nakpi takin kilamdangsak ding ahihna ngaihsun uh a, tua in lawpsakin a haksa mahmah ding khat pen baih takin zosak thei hi. Tua bang mahin, lawhsapna a hoihlohdan ngaihsutna-in nuntak bawlhoih thei hi. A lampi a haksat hangin a tawpna thaman ngah ding ngaihsutna in Khristiante’ nuntaknaah zong kumpi lukhu lametna hanga thuaknate phamawh saklohna hong neisak hi.

Hoih na sak leh sem pah lel in
Hoih hi, cih i theih, a thaman ding zong i muh khit, a sep dingdan zong i theih khit om hi. Ahih hangin, “Zing ciang..” cih kammal tomcik hangin mi tampi in i damsunga i tun ding ciang kitung lo hi. Tuhun a sep pah ding a kisapna in lungsim luahden hen la, sep ding omte sem pah ziauin hi le’ng lawhcinna tawh kizuiin meetna hong tun hi. Hih pen sumbawlte khempeuh in thei ding a, siamsinte nuntaknaah zong maan mahmah ding hi. Tuhun sangsiate nuntakah thalawpna a om kei leh, a laisimbu uh leh a vanzatte uh hoihin, a khasum uh zong a tam mahmah hangin kumbei result hoih ngei tuan lo ding hi. Kum cila lawpna in kumbei cianga gah deihhuai hong pia thei hi.

Hun geelnasa kician nei in
‘Tuhunah..’ cih ziau pen sep ding leh a masa le nunung ding i geelkholh kei leh thupi lua lo thei hi. “Sumbawlna bul pan dingin tua hun/mun panin bulpan ning” na cih hangin, bang sem masa ding? Inn sap ding zong masa ding maw, agent zong masa ding? Bank ah sum la ding maw?... kician lo hi. Sepzia ding a kizom hoih tak na neih kisam hi. Geelna hoih nei lo a lawp gawp pongmawk pen mi bang lo nuntakzia hizaw hi. Nang le nang na kidop siam kei leh na lawpna pen bangmah phattuamna om lo ding a, makai na hi ngei kei ding hi. A lawhcing thalawpna in paizia hoih tak nei a, hun geelnasa kician zong nei-in, zui pah hi.

Na thalawp hun ngak kei in
Kithalawpsak manphatna thu i gen ciangin, ‘Ka thalawp hun ciang sem ning’ na cih leh, na damsungin lawp kei lecin a lawhsam na hi ziau hi! Kimawl dinga field sungah na lut photlohin lawpna om thei pah lo hi. Lai sim khawng zong tua bang mah ahi hi. Kisim a kilawp tawmtawm hi. Hih bang thang-ah mi tampi ki-awk a, zu sai khawngpeuhah thalawp hun ngaka damsung hun zatbei theih hi!

Na thalawp sawm hun
Haksatna khempeuh vensak dan na theih ciang bekin lawp sawm kei in. “Hoih hi’, cih ka thei hi. Ahih hangin haksatna pawlkhat vensak ding dan thei lo ka hih manin bul pan lo hing” cih pen mi tate leitung nuntakzia leh muhdan hizen leh, meitha (electric), computer, hih lai na sim theih nading a laidalte zong leitung in mu ngei lo ding hi. Bul pan uh a, mukhia tawmzel uh a, tua in midang lawpsakin, i teenna leitung pen a nuamzaw leh manphazaw suaksak uh hi. Mi tampi in a geelkholhna goal uh tung zo loin leitung nusia uh a, ahih hangin leitung in tuate sep gah kilo zel lai hi. Haksatna vensak ding dan na theihlohna pen hong thanemsak hi loin, hong thalawpsak danin ngaihsun lecin, na mai a om na khatpeuh a haksat naak leh na lawpna lian semsem ding hi.

Mawtaw tawh gentehna pen maan mahmah hi. Mawtaw pen i paikhiat ding lian ciangin gimpen a, a engine in zong na limsep penin, thatang zong limzat pen hi. Ahih hangin a kipeina khatpeuhpeuh a kipei zawh ciangin a kipeina tha in a maban thahatna/thatang kibawltawm a, tha tampi zang nawn loin kipei thei a, a tawpna-ah hat takin kipeiin, a tai hatna tawh kituakin thatang tamzat nawn tuan lo hi.

Thalawpna zong tua bang hi. Mabana sep ding om peuhpeuh pen a cilin lawphuai loin tawlhuai khin phial hi. Bul i pat zawh ciangin amahin kipei tawm a, nasep mazan dan kithei semsemin, a cil lama i ngaploh leh haksa dinga i ngaihsut khat pen a sepzia ding kitheih beh zel hi. Mawtaw pei khatvei a kipeina in nihvei a kipei nading a baihsak mah bangin, khatvei maban sep suakna in a bana sep ding baihsak tuam hi.

36. Midangte Thalawpsak

Thalawpna pen nangmah pan kipan ding ahihna thu i genkhinta a, thalawpna pen nangma tungah om ta hi. Nasep lawhcin nadingin midang na lawpsak siam kisam a, tua dingin na kiging hiam?

Mi pawlkhat te’n a nasep ding uh theician uh a, sem zo ding hi-in kitheiin, a thalawpna u’n zong cin hi. Sem dingin hong kipan uh a, leitungah nasep khat peuhpeuh khat beka sepzawh theih ahihlohna leh midang kihelna lo tawh lawhcinna taktak om thei lo ahihna hong thei uh a, lungkia kik uh hi. Tua ahih manin midang thalawpsak ding dan ngaihsut kisam hi.

A sep ding siam takin theisak in
Pasian thugen tampi lawhsapna pen hih lian ahi hi. Amau lamah theician kha ding uh hi. Ahih hangin amau lama kician pen midang tungah kician takin genkhia thei lo a, ‘cimtakhuai’ hi lel uh hi. Gentehna zong nang adingin a kician khat pen na thuhilh mite adingin kician lo thei hi. Hih thu pen a mai lamah tampi kigenkhin hi. Theihcetna in thalawpna piangsak hi, cih mangngilh kei in.

Theihpihna leh theihsiamna
A tangpi in mite in i lametna tawh kituakin hong maingat uh hi. I lametna bang a hong maingat kei uh leh mi lamdangpi ahih kei uh leh i lametna piciang a maan lian lo hi kha ding hi. Mi tungah lametna piciang kician neih nadingin i mai a om mite’ dinmun i theician kisam a, a cihtheihna, a tupna, a siamna lam leh a thalawpna uh i theihpih kisam hi. Mi thalawpsakna hoih mahmah pen, a lawhcinna theihpih leh lungdampih theih ahi hi. A nuntakzia uh tawh kituakin amau tungah lametna nei-in, tua lametna tawh kituakin amaute theisiamin a lawhcinna uh theihpihin phat siam le’ng, tua banga phat na aw ging a za-dah leitung mihing lakah tam lo ding hi.

Kidemna maan
Mihing lungsimah kidemna lianpi om a, a zang siamte adingin tua pen thupi mahmah hi. Kidemna in thalawpna piangsak hi. Company nih kikala kidemna pen a ngeina hi a, company khat sunga nasem tuamtuamte a hoih lama kidemna pen hoihzaw kan lai hi. Ahih hangin, kidemna ngeina hi lo, kibawlsiatna, kiminsiatsak sawmna, kisuksiat sawmna a kihel leh kidemna pen maan nawn lo, manpha nawn lo cihna hi. Tua bang tung lo lian dinga a geelsiam mite adingin kidemna pen thalawpna a piangsak hoih mahmah ahi hi.

Dale Carnegie laibu How to Win Friends and Influence People kici sungah mi a thalawpsak siam mahmah Charles Schwab tangthu kigelh hi. Nasepna mun khata Manager in a cihtheihna lianpen tawh a nasemte a makaih hangin a sepkhiat uh kibehlap thei tuan lo hi. Charles Schwab cial a, ama’n bangdang a thupi hih tuan lo hi. Chalk khat la a, sun lama nasemte kiangah, “Unit bangzah semkhia na hi uh hiam?” ciin dong a, nasemte in, “Unit guk” ciin dawng uh hi. Schwab in golpi-in ‘6’ cih bek factory sual tungah gelh hi. Sun a nasemte a ciah khit uh ciangin zan lama nasemte in lamdang sa in dong uh a, sun lama nasemte sepkhiat ahihna thu hilh hi. A zingsang ciangin Schwab in factory pha kik a, zan lama nasemte in ‘6’ pen phiatin lianpi-in ‘7’ gelh uh hi. Sun lama nasemte in a muh uh ciangin sunnung lam ciang ‘8’ gelh kik uh hi. Tua bangin kithuhilhna, Lai Siangtho sung, sermon, leh management institute a seminar thupi mahmahah kihel tuan loin, Schwab in ni tam lo cik sungin ‘6’ pen ‘10’ suaksak hi. A geelsiam mite adingin vanzat neucik zong na lianpi a sem thei suak hi. Kidemna pen i zat siam leh thalawpna siangtho piangsak thei hi.

Khatvei thu-in thu tampi hilh kei in
Pasian thugente in a hih khialh zel uh pen mawhna kiphawkna taktak gen lo a Pasian’ mawhmaisakna lam uanggen luatna hi a, a hun a cinmain maisakna lamah mipite lawpsakin, theology maan lo hong piang hi. Khatvei thu-in thu tam hilh lua cihna hi. Thudangah zong hih thu pen maan hi. Nasemte pen a dinmun uh leh a theihsiam khom ding un hilh in. Thalawpna thu i gen ciangin mi pawlkhat pen mi maingap theih dingin omin, kikamtam a, nasemte kiangah thalawpna sangin linglawnna bek kitun hi. Tuni a nasep thalawpna a neih nadinga hilh ding kimlai, zing ciang a sep ding na gengen leh, sep ding tam sa lua-in ngap loin tuni a sep ding zong haksat ngaihsutin sep thalawpna nei lo pah thei uh hi. Manager hoih in a hun khom bekin a nasemte lawpsak siam hi. Nasem nuak (strike) omna hang pen amau theih ding hi lo thu tam a theihluatna uh hang hi nuam mahmah hi.

Mimal kizopna hoihsak in
Hih pen i gam sungah thugensiamte kitangsap lianpi ahi hi. Pulpit leh stage khatpeuh pan mipi tampi thakhatin lawpsak siam uh a, mimal address loin, a lomin mipi address uh a, mipi neiin, mimal nei lo uh hi. Mipi a bawl pen mimal hi a, mimal tawh kizopna hoih na neih kei leh a loma mipi thalawpsak na siam hangin kizopna taktak na nei kei ding a, zung (root) na nei hoih taktak kei ding hi. Hih pen politician te’n theician mahmah uh hi. Vote khiat ding ciang a huihnun dan panin bang party hiam hat tuak mahmah a, a mipi’ lamah hatin, vote pen ‘mimal’ vai ahih manin ki-umkhial zel hi. Mimal sin inla, theicianin, ama nuntakzia (pivate life hi lo) theician in. Tua in na sepnop lawhcing taka sem thei dingin hong huh ding hi.

Result pen thalawpna a piangsak hi
Hih thu pen maan lo a ci i om ding ka um kei hi. Hun khat laiin ka sepna khatah uliante in sep ding khat - Bangci sep ding? Bang hiam a kisapna? Hih sepna in manphatna bang nei? cih hong hilh loin ka maiah sep ding hong guan ziau uh hi. Tua bang hun ciangin tua nasep result ding thei lo ka hih manin thalawp taka sep haksa ka sa mahmah hi. Laigelh khawng ka uk pongmawk zawh, tupna kician nei a kalsuanin, nasep ding om peuhpeuh a manphatna lam leh a result ding ngaihsun kawma ka sep zawh ciangin nasep hong nuam mahmah hi. Tua banga sepna thaman (result) ka muh ciangin hong thalawpsak zaw sem lai hi. Lo khote in buh lak a manphatna a theihcian mahmah bangin, result pen thalawpna a piangsak lian mahmah ahi hi. Ama nasep result ding a thei lo leh a ngaihsun lo mi in lawp takin sem dingin hatna hau lo ding hi.

Muangngam in
Hih muna thalawpna i gen pen entertainer in mipi a thalawpsak bang hi lo hi. Na manpha sem dinga lungsim sunga nasep nopna lam hi, cih mangngilh kei ni.

Thalawpna gal lauhuai mahmah pen kimuanngamlohna ahi hi. Mi te’n hong muanmawh leh, a lawpna zahzah un

lauhuai uh hi, cih mangngilh kei in. Thalawp bangin a kidawk uh hangin, hong khem uh cih uphuaizaw hi! Nangmah mahmah in zong mi pen a muanhuaina uh ciangah na muanngam ding ahi hi. Kimuantuahna om lo thalawpna pen laisia hal tawh kibang a, kuangziau a beikik ziau hi. Manpha taka zat ma-in mit kik ziau hi. Tua manin thalawpna piansak ma-in kimuantuahna/kimuangamna lei (bridge) hoih takin dawh masa in.

Lawhcin taktak na sawmna kilangsak in
Lawhcinna pen sin theih hi a, a picinna pen sawmna taktak leh a kho nuntakna ahi hi. Sin bek pen a tawpna hi lo a, na tupna pen lawhcinsak sawm taktak na hihna na kilatkhiatsak ding kisam hi. A lawhcin sawmte mah lawhcing uh hi. Nangmahah sawmna taktak na neih kei leh midang na lawpsak thei kei ding hi. Company lian makaite in zong a nasem ding a lak uh ciangin a siam sangin ‘a sawm taktakte’ deihzaw uh hi.

37. Mite Thalawpna Bang Hiam?

Lawhcin nadingin thalawp a kisapna thu, midangte lawpsak dingin nangmah mahmah na thalawp masak a kisapna thu leh, nangmah panin saupi kipan masa ahihna thu tampi i gen khin hi. Tua lamah a kithawikhol khin dingin ngaihsun leng, bangin mi thalawpsak a, maban zom dinga kuhkalna a piangsak bang hiam? Tawm khat gen kik ni.

Vanzat tampi i gensate pen, ‘Hoih pen in tua zat ding hi’ cih ding om tuan lo hi. Mihing pen set (machine) kihi lo a, gan kihi loin, mihing i hi hi. Tate kepdanah, uzawte kepdan banga nauzawte kep a kisaploh hun tampi om hi. Tua bang lian ahi hi.

Standard Oil Company chairman Frank O Prior in, “Ka nasemte pawlkhat ka taii a, pawlkhat a gukin ka hilh a, pawlkhat a seppihte zaknaah ka taii a, pawlkhat nuihmai tawh mai-etin, ka zat theih khempeuh ka zang hi. Tua pen bang hang hiam cih leh, a kibanga ka kep ciangin lungkim lo pah zel uh hi” ci hi.

A kidawkcian mahmah khat pen, mite in ngaihsutpiakna / thuhilhna sangin i nasep leh nuntakzia panin hong en zaw uh hi, cih ahi hi. Bangci banga siam leh pil tuam i hi zongin, bangci banga mi a thalawpsak siam i hi zongin, i nuntakzia leh i nasepzia in i thugen a delhphak kei leh, khatvei lawhcinna bel omin, ahih hangin a nunggu pen nuam het lo kha ding hi.

Mi lawpsak ding i gen laitakin eima nopsak nadinga mi bang lo khat i phatbawl gawp a, na lamdang pipi semsakin, adikna leh a ngah ding, ama mihing zahtakhuaina siasak ding zahin mi lawpsak lam pen i gensawm hi lo hi. Tua bang hun ciangin tuabang mite a lawp zongin mihing mihinna tawh kituak lo hi. Mi lawpsak pen pianpih theih hi a, a sina sin theih zong ahi hi. Ahih hangin a zatna mun ding taka zat ding thupi hi. Mihing lungtang sunga thalawpna a piangsak thei thu tampi om hi :

Meet nadingah lawpna om hi
A meet ding cih thei uh ahih manin Vangteh te’n mehthuk (tomato) huan bawl uh hi. Tua khaigah pen mun tuamtuamah zuak uh a, lim kisa mahmah hi. Bang hangin tua mehthuk huan pen bawl nuam uh hiam, cih leh, meetna om a, tua in huan bawl dingin thalawpna pia hi. Mihing lungsimah hong Bawlpa in kidemna lungtang koih a, tua manin nangmah bekin na meet nadingin kuamah na lawpsak ngei kei ding hi. Na sep ding khat pen hong seppih dingte in zong a meetpih ding uh kisam hi. Amau meetloh nading leh sup nading a thalawp taka hong seppih a om leh tua mi pen mibang lo hi kha ding hi!

Thakhata thalawp vatna (Emotion)
Moses pan Bin Laden kikal hun sung khempeuhah thakhata thalawpvatna pen leitung tangthu-a a kumpi gam nangawn phiat a, a piangsak thei, mihing pianpih thalawpna i kipiaksawn theih ahi hi. Zopau a gencian sese kul lo liangin vote muh nading leh Bethel nadingin kilimzat mahmah hi. ‘Nepoleon lawhcinna kimkhat pen emmotional appeal hi’ ciin historiante in genkhin uh hi. Ahih hangin akbawm sia a kihal bang hi a, khatvei thu-in kuang lakin, mit pah thei hi. Hih manphatna pen politiciante in theician mahmah uh ahih manin vote khiat dektak ciangin hahpan mahmah uh hi. Tua manin gen tam kul lo hi.

Kisapna in thalawpsak
Meetna cih kammal kiang cika om banga ngaihsut theih, ahih hangin a meet hetloh hanga mihingte in i kisap luatna hanga i lunggulh nate in nakpi’n thalawpna piangsak thei hi. Douglas Mc Gregor in, “Mihing pen ganhing (animal) deih hau mahmah hi. A deih picinsak ahih lian leh, tua sanga nasiazaw deih kik man uh a, hih pen sih dongin bei thei lo hi. A deih neih nadingin a pumpi in a citzawhloh dongin sem hi” ci-a a gen pen maan mahmah hi. I kisapte pen anuaia kigelhte bangin khen theih hi.

i) Bitna (security) kisapna : Nek ding, teenna inn, pumpi khuhna leh kituamlumna puante pen i kisap tangpi (basic needs) ahi hi. Tua zawh ciangin siamsinna leh adang tampi hong kilang pah hi. Biakna leh minam ngeinate kitheihtuahpih vet loin zong hih i kisap tangpite tawh zong midang lawpsak baih mahmah hi.
ii) Ki-itna leh kikhiatlahna : Hong it ding i kisap mah bangin en zong it ding i kisam hi. “Ka lungzuang” i cih ciangin tuate khempeuh i lungsim sungah kihel khin hi. Mihing i it kei leh zong ui, vasa leh paak beek kikhia-lah hi. Innkuan leh lawmte kikalah, nekzonna kibang leh deihlam kibang kikalah zong hih khau in hong khihkhawm khin hi. Mi te’n hong it ciangin a nopna kithei ahih manin mite it ding zong kithalawp pah hi.
iii) Na hoih zanga kipulakkhiat (creative expresion) kisapna : Hih thu ka gelh laitakin a meet ding leh meetloh ding lam sangin ka lungsim a om pulakhiat ka utna lianzaw thei hi. Thu manpha mahmah genkhiat pen, siam zen leng, kilunggulh mahmah ding hi. Tua bang lianin, mikimin i lungsim sunga om pulakkhiat ki-ut bek tham loin, kikhia-lah a, eima hih theihna ciangah, naungekte pan piteek-puteek dongin, i thugen hong ngaihkhiatsak a, i thugelh hong simsak a, i ngaihsutdan hong theihsiampih a hong huh om leh ki-ut khin hi. Thugelh bek hi loin, i limgelhte, i la phuakte, i paak suante, i testemony, i buh lak zah nadongin mihing i kipulakhiatna ahi hi. I kidawkkhiatsak nopdan bel kibang het lo hi. A kidawkkhiasak siam lote pen mi kisathei, kihisak, sinsia, maizum, zahpihhuai hi uh hi.
iv) Theihpihna (recognition) kisapna : Kisimpina-ah mihing nambat khata a behlap hih leltak pen kuamah ut lo ding hi. Om sam hang a, nungta samin, huih diik tei sam i hihna leitung in hong theihpih ding ki-ut ciat hi. I hoihna in leitung bawl hoih thei cih i kilatkhiatsakloh hangin i gitlohna in mite lakah thusia piangsak thei cih beek kilakkhia nuam hi! Mi pheituam sanga tight-zaw, mi car sanga hoihzaw, mi tem sanga hiamzaw i deihna lungsim pen gual-elna hang bekbek hi khin tuan lo a, mi te’n hong thei leh cih deihna hi a, ‘mi theih’ hih nading leltakin mi sanga khepi lianzaw hih leltak zong kigengen nuam hi!

J.C Stachle in a nasemte’ lungkimlohna hang zongkhia dingin survey nei a, a muhkhiatte pen :
a) Mi tungah ngaihsutpiakna piak nading hun nei lo
b) Lungkimlohna vensak nading hun lem nei lo
c) Kithuhilhna hoih om lo
d) Seppih dangte theih lai a kitaina leh
e) A ngaihsutna uh kidawkkhiatsak theih nading hun om lo... cihte pen nasemte a thanemsak lianpente hiin mukhia hi. Nasemte thanemna lianpi pen thupi ngaihsutloh a kitheihna hipen hi.

v) Na thak sep kisapna : Hih pen mihinga om ngeina hi. Mt. Everest mual tunga a kah tamzawte pen sum thalawh ding hi leh ut het lo ding uh hi. Mi theih hih nading bek a sep ut zong hi lo hi. Mikang gam khuapi nuam mahmah paisana Vaigam khuapi nuam het lo a hong zin den (tourist-te) zong mi theih a utna uh, sum deihna leh amau teenna uh sanga nuamzaw mun ahihna hanga India gam hong zuan uh hi lo hi. A nopsak uh tampi amau teenna munah baih takin mu thei uh hi. Ahih hangin a hih ngeiloh uh na thak leh na lamdang bang hiam sep ding lunggulh uh a, mi tawmna muna omte in mi tamna mun nuamsa in, mi tamna muna omte in gamdaina mun nuamsa uh a, tua bang mihing kibang lo pipi kipel zangzang hi. Mihing nuntakna sunga hih dangtakna in na thak leh lamdang tampi hong mukhiasakin, lawpna guan a, mi tampi lawhcinna lampi sialsak hi.

38. Thalawpna A Piangsakte

Midangte thalawpsak dingin eimah lamah i lawp leltak hangin, amau lamah a lawp uh hiam? Tua thalawpna a piangsak thei tuamtuamte bang hi hiam? cih gen kik ni.

Mihingte in kisap kibang khat i nei uh a, tua zangin thalawpsak baih hi, cih i genkhin a, tua lakah meetna, thakhata thalawp vatna, leh kisapna vai genin, bitna kisapna, ki-itna leh kikhiatlahna kisapna, na hoih khat zang a kipulakkhiat kisapna leh na thak sep sin kisapnate in nakpi’n mihing thalawpsak thei cih i genkhin hi. Hih anuaiate pen mihing a thalawpsak baih mahmah dangte ahi hi :

Theihna leh siamna
Bangci bangin maban pen lawhcinsak theih na ki-up hangin na siam kei leh cih nading om lo hi. ‘Computer tawh sep theih hi’ cih theihna bek tawh a sep theih dan na thei kei leh a buaihuai hun tam mahmah ding hi. Kimawlna tawh tehkak leng, kimawlna lama minpha mahmahte in a siamna leh theihna uh zangin a lomin mipi lawpsak thei uh hi.

Footballl star Lionel Messi pen thugen siam hi tuan lo a, vanzuakin vak ngei lo hi. Company lian zong nei tuan lo a, ahih hangin football siamin football field sungah pass ding thei a, ball ngah dingin om siamin, a langlamte khem siam a, mi bangzah hiam ball khoih man lo lianga amah a cing dingin omsak siam ahih manin amah pen industry thupi mahmah bang ahi hi. Tawldam taka kimawl a siamna, a lungsim hatnate banah a nuntakzia leh a innkuan tangthu dongin mite thalawpna a piangsak hikhin uh hi. A maan, a jersey silh lui, a football boot lui leh a toothpaste zat nadongin mite theicet nop ahi hi. Tua manin, cihtheihna leh siamna zanga thalawpsakna mangngilh a, thugensiam leh kha nasep bek mihing a lawpsak thei hi a i ngaihsut leh khangnote khantoh nading tuamtuam a khak kihi thei hi.

A hun hong tung
Papi khat in, “Halpuak hoihlohzia pen i thei khin hi. Kum simin hal nawnloh ding kici den a, ahih hangin kum thak zan hong tun ciangin zuih haksa mahmah hi. Mun dang pana hong puakkhap zuauzuau ciangin ki-om maimai thei lo a, kihal kik kha zel hi” ci hi. Maan mahmah hi.

Hun ngeina a mihing omdan dinga geelna khempeuh, hun lian leh hun thupi hong tun ciangin mipi ngaihsutna pen kilamdangsak mahmah hi. Pawi banah, World Cup football nadongin a hun hong tun ciangin thalawpna hong pia hi. Hih bang hun tuam hong tun ciangin, ‘Rom khuaah na om leh Rom mite omdan bangin om mai in’ cih bangin a huihnung a langpan lama om sangin, a huihnung manpha takin zang leng hoih ziau hi.

Muanhuaina hanga thalawpna
Nepoleon i paltan hoihte nuntak kip mahmah a piangsak pen thupina leh khasum lam hi lo a, kumpipa leh a kumpi gam adinga a muanhuaina uh hizaw hi. Hih pen thalawpna ngeina sangin a thupizaw, sih donga muanhuai ngamna hi thei hi. Politician pilte in hih pen theician mahmah uh a, “Sum leh suangmangpha bangmah nei keng. Ahih hangin i gam in huhpa kisam a, khua-ul leh sisan tampi zanga gam a bawl hoih nuam kua tengin kal hong suankhia ding?” ci-a hong pulakkhiat a, mipi lungsim hong zawh uh ciang, kulh thupipen nadongin cimsak zo zen uh hi.

Mipilte in amau nasepa muanhuai dingin a nasemte uh hantawn siam uh a, a sepna uah a muanhuai kei uh leh amau adingin hoih lo ahihna leh, amau lutungah mei-am kikoih theih ahihna thu hoih takin hilhcian uh hi. Tua bangte in a uk om loin zong muanhuai tak leh lawp takin na sem thei uh hi. Tua bangmahin, pawlpi sum leh vante zong kuama hilh kul loin, pawlpi a muanhuaina hang zawin bit takin kikem thei hi.

Mi thalawpna pholhkhiatsak
Sam tan lo ding, sa ne lo ding, zu dawn lo ding, za tep lo ding, guta lo dingin mi pawlkhat in thuciam uh hi. Tua pen a thupi, a zahtakhuai leh lamdansak theih nawnloh suak hi. Mihing nuntaka na thak va koih a phungvuh sawm sangin, amau sunga omsa phungvuh a kipsak siamna leh, tua a omsa zanga thalawpna bawlsak pen baih mahmah hi. ‘Zu khaam nuam teng kei lamah hong pai un’ cih ziau khawngin na thupi tak gen thei a, mipi kikhen pah lian hi. Gensiam kisam lo a, a deihte in hong genpih ziau ding uh hi. Amau a omsa pen a pholhkhia na hi hi.

Mi lawhcingte khempeuh in midangte lawpsak thei nadingin siamna leh hatna nei khin uh hi. Amau a hatna leh cihtheihna pen midang sangin a thupizaw ahih kei leh zong a zatdan siam uh cihna hi. Hih mite in a hatlohna uh leh a kicinlohna nadongin lawhcin nadingin zang thei uh hi, cih ding hi. Hih bang mite pen pua lamah ‘Lamdang hi’ cih liang ding hi a, ahih hangin a sungtawng a om pilna pen, mihing nuntakzia a theicianna uh ahi hi. Mihingte nuntakzia leh lungsim thei uh a, a ngaihsut gawp uh hi tuan loin nuntakzia ah nei uh hi. Midangte hatna leh pilna pen zangsiam mahmah uh hi.

Ann Arbor, Machigan khua-a University of Machigan Research Centre a mihing lungsim a sinte in 1949 pan kantelna nei uh hi. ‘A tamzaw na sem a, a meetzaw sem dingin mihing lungsimah bang thupi pen hiam?’ cih kum 40 val a kantelna uh panin a muhkhiat uh thupi mahmah pen, makaite lakah kithuneisak taka thupiakna tawh midang a tawngtawngte sangin, kithuneisak lua lo a, a nasemte uh seppih banga ngaihsun a, a haksatna leh lungdamna uh a theihpih leh a hamphat nading uh a deihsakte pen lawhcingzaw uh, cih ahi hi.

Hih mite in Science Newsletter ah a na muhkhiat uh a gen dan un, “Mihingte in set bang a zat ut lo hi. Thupiak zuia a nasep uh a meet mahmah hangin, a nasep uh hoih loin cimtak baih uh a, sawt khom ngei loin, koi mun hiamah a semsakte in thuak veve uh hi. Nasemte leh a sepnate pen mihing mihinna ah kikimna nei veve uh a, hih pen theisiam a, amau lunglut lam leh a kiginkholhna nawngkaisak lo a, suahtakna lungsim tawh na a sep uh ciang, khatvei thu-in tampi a sepkhiatloh uh hangin sawt kikhom a, lawhcingzaw uh hi” cih ahi hi.

Nuclear galvan lauhuai sangin mihing sunga thalawpna pholhkhiatsak theihna leh siamna in leitung ah gualzawhna tun baihzaw hi. Cihdan maan, sepdan maan taka a kisep nak leh a thalawpsakte leh lawpna a ngah mite lungsim sunga lawhcinna pen kikim lian ding hi.

Khen - IX : 39. Makai

A hat lote pen eimah bekin zong zawh theih hi a, zawhna thupi leh lawhcinna lianpite pen eimah beka picinsak theih hi ngei lo hi. Tua banga lawhcing dingin midang hong kihel uh kisam hi. Ei mah beka lawhcinsak theih nateah makai hoih leh hoih lo kithei lo hi. Na lawhcinna lampi-ah midang hong sungtum lian uh ciangin na lawhsapna leh lawhcinna pen makai hoih na hih leh hihloh-ah kinga ziau hi.

Makai dinmun
Warren G Bennis in, “Makai pen a taktaka muhkholhna (vision) a picingsak thei hi phot ding hi” ci hi. Makai in a muhkholhna pen ama theihna leh sepna bek hi loin midangte theihna leh sepna zangin lawhcingsak thei hi. ‘Makai ka hi’ ci napi nungzui nei lo makai pen, ‘lapawl makaih hi ing’ kici napi a khat bek a la sa den bang ahi hi.

Leadership cih thumal pen ‘makai dinmun, hihna leh makaihna, makai dinga theihna’ ciin gen ziau leng a kitel zodiam maw? Mi pawlkhat in hih bang i gen ciangin a dinmun, min leh hihna limlim pen thahatna tawh a kithuahpah sa kha uh hi. Hihna leh dinmun neu leh liat leltak hanga midangte a makaih thei hih pen makai hoih cihna hi ngei lo
hi. John White in, “Mite in vaihawmsa zui pah ziau lo uh a, amau a lawpsakte zuizaw uh hi” ci hi.

Makaite hihna gencianna hoih tak pen, ‘midangte zawh theihna, midangte nuntakna a nasep theihna’ hi cileng kikhial lua lo ding hi. Amah a zui dinga midangte nuntakna-a thugen siamte in makai thei dingin hatna nei uh hi. Ahih hangin tua-ah tawp lo hi. Makai in muhkholhna hoih tak nei-in, tua a muhkholhna pen ama angsung ding bek hi loin, midangte zong a kitat theih nading ahih zong kisam hi. Tua a muhkholhna sepzawh ahih theih nadingin phatuamngai taka a sem leh, midangte hanthawn-a lawhcing dinga a phungvuh theite pen makai hoih ahi hi. Midangte thatang leh hatna zanga ama angsung ading bek a sem mi pen a lawhcin hangin makai hoih hi lo a, mi khem a siam hizaw hi!

Makaite nuntakzia pen a kisam masa ahi hi. A hihna, tavuan leh a hauhna khempeuh suahkhiatkhit ciangin a mihing mihinna-a a nuntakzia pen a hoih kisam hi. Tu-a ahihna zong a poimawh mahmah hangin tuhun sanga poimawhzaw pen zing cianga ahihna ngah ding ahi hi! Makai pen a kisin mi hi ding a, tuni sangin zing ciang khangtozaw ding a, theihbeh zelin, mainawt zel ding hi. Lawhcin a sawm mah bangin sup a kul leh zong sum ngam ding hi. Ama nuntakna-ah mainawtna a neihzel theih nadingin leh, a muhkholhna a kicet zawk sem nading ahi zongin, a siamna a behlap theih nading leh thahatna a neih behlap theih nading ahi zongin, ki-ap (sacrifice) a kisapna hun leh munah, a hun leh neihsate ap ngam ding hi. A makaih taktakna sangin hih banga ama nuntakna manpha taka a kisekna in a tungah a muanhuai mi kibehlapsak ding a, mite thupingaihsut leh makai hoih hi thei ding hi.

Tua banga mite’ thupingaihsutna a ngah thei lo mite adingin makai hih pen a uthuai het lo hi. Hauhna leh neih le lam thu hi lo a, nuntakna thu ahi hi. Ahih hangin hih bek pen makai hihna bucing hi khin tuan lo lai hi. Ki-ukzo-in, hun ciangtan hoihtak neiin, nisimin dictionary thumal khat siam behlapin, na cihtak mahmah hangin makai na hi pah thei kei hi. Lam khat panin ngaihsun le’ng, tuate hangin na kiangah mite in om nuam sa loin hong gamlatsan zawsop thei uh hi. Tua hun lianah a kisam pen, i gensa midang tawh kizopna hoih neih ahi hi. Midangte tawh kizopna hoih bawl a, amaute mailam khual a, kitheisiam taka na a seppih siam mi leh a lawpsak siamte pen makai nuntakzia hoih tak a neite ahi uh hi.

40. Kimakaih Dan Tuamtuam

Makai ahih manin a min bang lianin ma kai ding hi. Makaih dingin pai nading mun, tupna kician, hoih, kip leh maan pen makaite lungsim sungah om masa phot ding hi. Tua sem thei dingin makai in a makaihte pen tuhunin koi munah om uh hiam, cih a theih kisam hi. Tuhuna a omna uh thei loin bangci mahin makaih thei lo ding hi. Mipi tampite in i omna ciang zong kithei lo zawmah lai!

Mipi nuntakzia na ngaihsun ngei hiam? A tampen in tu-a i dinmun hoih leh hoihloh zong kithei lo hi. I omdan ngeina ah kilungkim mahmah lel hi. Tua bang mite kiangah thakhatin, “Hong pai in, mailam galmuanna munah pai ni” ci lecin ciamnuih bawlin hong ngaihsun ding uh hi. Amau dinmun a theician lote pen mi kiphasak leh a nuntak tawldam tata hizaw lai! Anihnate in a dinmun hoih zo lo ahihna theiin, a tuhun dinmunah lungkim lo hi. Ahih hangin cih nading bangmah thei loin, hotkhiat ahih kei leh makaih kisamin amau om munah tau ngeungeu uh hi. A thumnate pen a dinmun hoihlohzia thei a, a vensak ding dan zong a theite ahi hi. A gen kisiam mahmah a, a gensiam kidem bang liangin kilimgen hi. Omna munah kinialnialin a vensak ding taktak ciangin (a theih hangin) a sem masa hih ding ut lo hi. Amah liangin a sep ding pen hi sa lo a, midang lunggulhin, tu kawmin ‘huhpa’ ngak leltak hi.

Kipawlna, gam, pawlpi, kumpi vaihawmna leh sanginn nadongah mi tampi hih bang dinmunah kiom hi. Makaite in a makaih dingte omna mun, omna mun uh a theihcian dan, leh haksatna amau bek a vensak a sawm leh sawmloh uh nadongin theician ding hi. US President Jimmy Carter’ zi Rosalyn Carter in makai thupite dinmun cian takin gen a, “A makaih mite tun nopna munah makai hoih ngeinate in tunpih uh a, makai thupite in ahih leh, a makaihte in a phattuampih ding uh ahih nak leh a utna mun uh a tun main zong khawlpih ngamin, khatveivei a utna mun uh sanga gamlazaw zong paipih thei uh hi” ci hi. Hih bang a sem theite in a makaihte leh a kim le pam nate theician-in, uk zo mahmah uh cihna hi.

I gen sate panin makai hihna leh midangte tawh kizopna pen kikhen thei lo cih mangngilhloh ding thupi hi. Kimakaihdan tampi om a, makaite makaihdan zong kibang khin lo hi. Ama mimal nuntakzia, a nasepna (kumpi, company, politics, pawlpi) kilamdanna, a piankhiatna leh minam ngeina, amau omna mun i ngeina, makaih ding a hun a neih tam leh tawm dan, a makaihte tunpih a sawmna mun lamdanna, leh genzawhloh a hang dang tampi in makaihzia kilamdangsak thei hi. Ahih hangin, sung lamah ngeina (style) zuih tuam nei khin uh hi. A nuaiate pen makaite in a makaih dan tangpi uh ahi hi.

A makaihte a ukcip makai
Ukcip kawma makaite in a sep ding uh pen lawhcinsak sawm ziau uh a, a lawhcin nadingin thupia ziau uh hi. Sep ding om pen sep ahih leh lungkim uh a, a semte lungsim nat ding leh lungdam ding lamah buai lo uh hi. Hih bang makaite in, ‘kithuneihsak’ siamin zang zel uh hi. Tua lian pen mipi a makaih theihna uh zong ahi hi. A makaih mipite in peel loa zui dingin ngaihsun uh a, thupia-in, a thupiakte tungah thu gengen nawn lo hi. Hih banga kimakaihna pen sia khin lo a, a kulna hun leh mun zong om hi. A hoih lamin zang le’ng makaite in a deih hun, a deihna mun leh a deihdan lianin manlang takin makaih thei cihna hi. Meetna lamah zong khatvei meetna om thei hi. Ahih hangin a zuite in cimtak mahmah thei uh hi. Launa tawh na a sep khop lai uh leh, makai leh nungzuite kikalah kimuantuahna bei pah thei a, kikhemna leh ki-etsimna in zui nuam mahmah hi.

Ukcipna tawh kimakaihna pen hoih den lo hi. Haksatna bang hiam a om kei leh om thei lo lai hi. Mipi’ vaihawmna kumpi-ah, mi te’n a deih leh ngaihsutna a pulak khiat theihna munah ki-ukcip theih hi lo a, ki-ukcip sawm pen a haihuai mahmah thu hi. Ahih hangin hun haksa (crisis) phutsuak a kisap hun cingin loh theihloh in zat kisam thei hi. Paltan kiukna ah zong ki-ukcipna lo tawh kimakaih theihloh hi. Paltante in - bang a, koi munah, cik hun ciang, bang ci bangin etc.. ciin ngaihsut kholh thei taktak hi lo a, thupiak zuih ziau kul hi. Tua bang hun leh munah hih kimakaihna pen kisam mahmah hi.

Ahih hangin uk thei dinga thuneihna tak pen makaite in masuan pena a neih uh ciangin minsiatna ngah uh hi. Galpi Nihna laia general minthang leh gal ven khit cianga US president Dwight D. Eisenhower in, “Picing lu tunga tupna tawh kimakaih sawm pen sauvei kizang thei lo hi” ci hi. Tua manin hih bang kimakaih dan pen paltante camp sungah ahih liang kei leh sawt lo sung bek zat ding hi.

Makaihte thu dong kawma makai
A min bek panin zong meidawi vai hi! Makai hi sam a, amah in ngaihsutna nei lo bang kekin a makaih mite thudong cih pen... ciin ngahsun kei in. Bang hiam suplawh zong kul kha ding a, lawphuai lo hi. Ahih hangin hih banga a makaihte a thudot kawma makaite pen tulai hunah makai lawhcing leh deihhuai hizaw uh hi. Amau beka lawhcing hi loin, midangte zong lawhcingsak khawm hi. Hih bang a zangsiamte in a kitonin na thum sem thei uh a, kipawlna lawhcingsakin, amah a zuite lawhcingsak a, amah mahmah zong lawhcing takin kisekkhia hi. Hih bang makaite in pahtakna ngah nuam mahmah uh hi.

Ahih hangin pilvang taka mi a thudot lo makaite adingin hoih lo thei ahih manin hih anuaia thute theih dingin hoih mahmah hi :

1) Tupna nei-in makaihte thudot ding : Makai in a tupna theician ding a, a makaihte adingin a hoihna zong theician
ding hi. Hihte theiden kawmin a nungzuite pen kamkuppihin thu dong zel ding a, a tupna pen a vekpi ua tupna hisak thei ding hi. Tua mun tun nadingin bang vanzat zang ding? Hun bangtan bei ding? Sum bangzah kisam? Bang lampi tawn ding? cihte pen a makaihte tung bekah dot ding ahi hi. A sep ding bulpi natawm a nungzuite a thudot leh a min beka makai, amah a muhkholhna leh maban nei lo cihna hi a, a tupna mun a tun ma-in a nungzuite’ ciamnuih bawlna hi thei hi.
2) A tupna pen midangte adingin zong hoih hi cih theician ding hi : A nungzuite thu dong ding ahih leh, amah in zong a theicianlohpi pen genpih lo ding hi. A hoihna pen amah in a thei bek hi loin, a nungzuite in hoih a sakpih theih nadingin genkhia siam ding hi. Makai tampi in a muhkholhna uh gencian teei uh a, a lim gen semsem leh ama’n zong a theihcianlohzia leh a lungkiat dan khawngpeuh kimu thei hi. Makaite in a zuak khiat uh thute pen amau mahmah kimuanna leh theihcetna tawh mipi lungsim a zo thei dingin pulakkhia siam ding uh hi. Amau kimuanna tawh kituakin lawhcinna tung thei hi.
3) Thudot ding zah : Makaite in nungzuite a thudot hun ciangin a dawnna ding uh, thukhensat ding dan, thu kituh ding dan leh a lungsim uh paipih sawmna khat neikhol ding hi. Ahih hangin, ‘a deih bang lianliana sep’ a sawm leh khial den ding hi. Ngaihsutna kician neihlohna hanga thukhensatna kician bawl lo a mi thudot den cih khawng, nungzuite buai nading lama thukhensatna manpha het lo bawl khawng pen makai hat lote nuntakzia ahi hi.
4) Kithudot hun leh mun theih : Thudot taakloh nungzui tampi na makaih thei hi. Tua bang mite thudot sese kisam lo hi. Thu hoih tun tuan lo ding hi. Kithudot kawma kimakaih pen mipil leh mipil kikalah a phattuam mahmah hangin, mipil leh mihai kikalah hoih khin lo hi. Thudik zonna sanga amau biakna leh amau minam ngeina a gum teitei dingte lakah hoih lozaw lai hi.
Kimuantuahna a om kei leh kithudot pen a meetna om lo hi. Mi khat i lawhcinna pen a dang khat in lawhsapna-a a ngaihsut hun om thei a, thusim ipsim a kisap hun, a thu lam sanga mimal kihuatna a om hun khawng ciangin leh, lungsim kawcik taka ngaihsutna a kizat hunah hih kimakaihzia pen zathuai lo hi. Gentehnain, “Khuapi sungah Nipi ni sai hon hoih i sa hiam?” cih kikupna bang om hen la, “Khuapi in a kisam takpi mah hiam? I buai zawk nading maw i noptuam zawk nading?” cih gen theih vet loin a tamzawte in, “Khristian gam kihi sam a..” ci-a a khuttum khawng a liik liang uh leh genloh vet hoihzaw hi. Zu kham khawng zong ngaihsutna kawcik tak tawh gen theih hi lo hi.
5) Thu khat peuhpeuh neu ngaihsut pah lo ding : Kam siamloh, lai siamloh, maizum leh hang tampi tawh thu hoih mahmah, genkhiat siam siloh, a manpha mahmah om thei hi. Makai pilte in hih pen theician mahmah uh hi. Tua laitakin, a muhkholhna uh lawhcinsak a sawmna hanga zuau gen theite lak panin kidophuai mahmah hi. Tua banah, a gen hun cianga pil mahmah, a taktak suak thei lo, sauveipi buaipih a kulte pen, kua hiamte in, “Gengen loin sem ziau ni!” a cih uh pen maan nuam mahmah hi.
Nungzuite thudot kawma makai lawhcing hi dingin makaite pen a pil leh a hat uh kisam hi. Tua banah, nungzuite in lawhcin taktak utna lungsim a neih uh zong kisam veve hi. Class kibang, ngaihsutna leh nuntakzia kibang kithudot tuah a mainawt sawm pen mazang nuam mahmah hi.

Thuzawh sawma makai
Khat veivei makaite in a makaih kipawlna i hoih nading kician takin thei uh a, a picin theih ding dan zong thei-in, a makaih kipawlna bek hi loin, a seppih khempeuh adingin zong a hoih ding thei hi. Gencianna, ngetna, lamlakna leh makaihna tawh nakpi’n a thuzawh sawm om hi. Hih bang makaite pen mi thuzawh a sawm makai kici thei ding hi. Sermon gawp lam hi lo a, khitui luang lianga nget gawp zong hi lo hi. A masa leh a nunung ding kician tawh lawhcin sawmna lampi mah hi a, hih anuaiate theih kisam hi.
1) Makaite nuntakna-ah kidawkkhia hen : Makai lungsim sungah a lawhcinsak sawm pen lawhcinsak ut mahmah ahihna leh ihmu thei lo zah donga veina ngamna om masa ding hi. Huan bawl pen gam khantoh nadinga a ngaihsut leh huan bawl pah ding a, a piang khai leh theite zong lunggulh pah ding hi. Tua bang ahih kei leh a gengen hangin lawhcin haksa mahmah ding hi.
2) Mah le mah kimuanna : Makai khat pen amah leh amah kimuangngam ding hi. Midang thuzawh dingin amah leh amah a kimuanngam kei leh lawhcing taktak ngei lo ding hi.
3) A nungzuite theihcian ding hi : Tu malamin bang ngaihsutna nei uh hiam? Bangin a ngaihsutna uh makaih hiam? Bang lam lunglut uh hiam? A nasepna uh bang? cihte thei masa ding hi. Hihte thei lo a kithuzawh zawm pen haksa mahmah hi.
4) Bang hangin? : Makai in midang thuzawh sawmin nakpi’n thasan hi. A thuzawh dingte in a ngaihsutna uh a khel uh kisam hi. Tua ngaihsutdan khelsak dingin makai pen a muanngam ding kisam hi. Lungsim laihna/khelna taak ahih kei leh mi picing ngeina in a ngaihsutdan uh laih mengmeng ngei lo uh hi.
5) Kimuantuahna kisam : Aristotle in genkhin hi. Midang thuzawh dingin thu thum - logos (reason), pathos (emotion), leh ethos (credibility)te kisam hi, ci khin hi. A hang kician tak, thalawpna, leh kimuanngamnate pen a kisam mahmah ahi hi.

41. Makaite Cinna

Makaihna tawh kisai i gen laitakin, Zomibup phial Khristian kihi ta ahih manin Khristian kimakaihna tawh kisai i tam gen ding hi.

A piangthak mi
Kipawlna dangte lakah zong kisam mahmah napi’n, biakna pawlpi sung diakah makaite pen a piangthak, Pasian a zahtak, Pasian in sem dinga a seh (I Thes. 5:12) ahihna phawkin a zahtak, thunget a hat, leh a kiniamkhiat mi ahih kisam pha mahmah hi. Bang hang hiam cih leh, mi mangthang, mi kibang lo, leh a gi lo mahmah zong makaih ding uh ahih manin, mi piangthak lote in tua bang mite makaih zo lo uh hi. Jesu in mittaw leh mittaw a kimakaih theihloh ding thu na gen hi (Luka 6:39).

Mi citak leh muanhuai
Mipite lutang ding ahih manin makai pen a makaihte etteh tak dingin citak-in muanhuai ding hi. A makaihte a lungkiat hun uh ciangin zong tha a ngah kik theih nadingun a nuntakna-ah cihtak ding a, haksatna lauhuaipen a tuak uh ciangin zong kibelhna taak dingin muanhuai ding hi. Sum leh nu le pa (sex) thu-ah a citak mi hi ding hi.

A ettehtak mi
Makai ahih manin ama nuntakna leh a innkuan nuntakna pen mite in etteh den hi. Tua ahih manin a makaihte’ ettehtak dingin ama nuntakna leh innkuan kemzo in, ukzo ding hi. Pawl nasep nadingin a hun leh a neihsa sum le pai kipiakhia ngam ding hi.

Sawltak Paul nuntakna pen ettehtak mahmah hi. Khual a zin ciangin zong mite buaisak sese lo a om theih sawm a, nungzui masate zong mite etteh ding a om ding leh, ama nuntakna mahmah etteh dingin hih bangin gen hi : “Sanggamte aw, keima gamtat bangin hong gamta niloh un. Note’ etteh dingin a hoihin kote hong gamta ka hih manun, kote’ gamtat bangin a gamtate na etteh un” (Fil. 3:17). Tulai pawlpi makai pawlkhat leh, nu leh pate in, ‘Ka nuntak bang hi loin, ka gen bangin nungta in’ a cih tawh kibang het lo hi. Peter in makaite pen tuucing, aana neihna tawh cing hi lo a, nungzuite (tuute) etteh ding a gamta dingin hilh hi (1 Pet. 5:3).

Midangte a pahtawi siam
Mihingte eima hihna leh sepna ciangciangah pahtawi nuam kisa-in, ki-ut ciat hi. Makai hoih, mipite tawh kithutuak hih nadingin mi phat siam, pahtawi siam kisam a, mi pahtawi a siamte in a pahtawite tha a piapia ahi hi. A makaih mite a kibangin en kimin deihsak tuam aneih leh zong kilangkhiasak lua lo ding hi. Mihing genloh, Pasian mahmah zong pahtawi kisam a, David in, “Lasakna tawh Pasian’ min ka phat ding a, lungdamna tawh amah ka pahtawi ding hi” (Late 69:30) ci hi.

Thuakzawhna nei
Kipawlna khat peuhpeuhah haksatna leh buaina, makaite hawmthawhna leh gensiatna om teitei a, makai hoih in tua bang hun ciangin kiniamkhiatna leh lungduaina tawh thuak zo hi. Thu hoih mahmah zong a makaihte in a hoihna tel pak lo thei a, a saan theih nadingun hanciamin, kinawh tengtung loin ngakzo ding hi.

Pil ding
Mite makai ding, mipite maiah pai ding ahih manin na khat peuhpeuhah a makaihte sangin theizaw, siamzaw,
pilzaw-in, thudik leh zuau thu khentel thei ding a, a hun leh mun tawh kituakin kampau leh gamtatdan ding khentel ding hi. Ama khantoh nading bek ngaihsun loin, a makaih mite’ khantoh nading zong gelpihin lamlak ding hi. Mi lungsim nasak het loin a hoihlohna leh kicinlohna hilh siamin, a thalawp theih nadingin hanthawn siam ding hi. Tua banah haksatna leh buaina a om ciangin kician takin thukhensatna bawl thei ding hi. Mipil tawh a kithuahte pil hi.

Ciamnuih gen siam
J. Oswald Sanders in, “Makai ciamnuih siam lote lawhcing thei taktak lo hi” ci hi. A makaihte tawh kizopna hoih nei a, a nungzuite in a mai-ngap theih nadingin ciamnuih a gen zong a kisap hun om hi.

A kiva mi
A makaihte in haksatna leh nopna a tuak uh ciangin a kidawk masapente lakah kihel ding hi. Vaihawmna tungtawna sep le bawl ding kipiate leh, ama tunga kisuante lawp tak leh a theihna tawpin sem ding a, mawhpuakna awlmawh ding hi. A gen bekbek hi loin a takin semkhia ding a, thuak a kul leh zong thuak masapen ding hi.

Amah a kimuangngam mi
Makai hoih hi dingin mah le mah kimuanna (self confidence) a neih kisam hi. Midangte a muan theih nading leh lawp taka sem a pulak / genkhia thei dingin amah leh amah kimuanngamin hangsan (courage) ding hi. Mi lakah zahkai den makai pen makai hoih hi ngei lo a, mipite in zong muangzo lo pah hi. Amah a kimuan laitakin, ama pilna le siamna bek suang lo a, Pasian leh mipi deihna bang hi hiam, cih kantel ding hi.

A huaiham lo mi
A makai hihna suangin, nekguk takguk theihna leh ama phattuam nading bek ngaihsun lo ding hi. Ngah ding bekbek a lamen hi loin, a piakhia hizaw ding hi (not greedy, but giving).
Kumpi Ahab nuntakna panin huaiham hoihlohna tampi kimu thei hi. Naboth in kumpi Ahab inn gei-ah leenggui lo nei hi. Tua leenggui lo pen deih ahih manin lei dingin Ahab in Naboth kiangah ngen a, Naboth in a pu a pate gamh Ahab tungah apiak ding Topa’n a khamna thu tawh dawng hi. Ahih hangin kumpi Ahab’ lawmnu Jezebel in a kumpi thuneihna tawh leenggui lo a neih theih nadingin maan lo takin Naboth that mawk hi! Tua hangin Pasian lungkim lo a, a sa uh uite in a nek ding thu gen mawk hi.

Theihsiamna nei mi
A makaih mipite cinlohna leh hatlohna theisiam ding hi. A haksatna uh leh cinlohna panin bangci hotkhiat ding, cih a ngaihsun mi hi ding a, a makaihte utdan, lawpdan, leh lungsim ngaihsutnate theisiamin tua tungtawnin na semin vaihawm ding hi. A makaih mipite pen mihing mah ahihna uh thei ding a, semkhial, bawlkhial, leh ngaihsunkhial thei ahihna uh phawk ding hi.

Sapna a ngah mi
Khristian makaihna pen thubaih hi lo hi. Sapna a za/ ngah lote adingin cimtakhuai mahmah thei hi. Bang hang hiam cih leh, sapna in a sappa/nu tha piaden a, tua-in na hoih sem dingin huh hi.

 Theihna

Makaite puk theihna tampi om a, makai hoih hi dingin hih anuaiate panin kidophuai hi :

Kisaktheihna (pride)
Sep le bawlna-ah lawhcinna hang leh makai kum tam sepna hangin kisaktheihna piang thei hi. Makai in kisaktheihna leh kiphatsakna a neih leh, tua in pukna piangsak hi (Pau. 16:18).

Makai tampi pen a hoih lo zong hi pah lo napi, midang omloh man khawnga makai sauveipi a sem om hi. Amau makai sepna sung panin mi hoih, mi kiva, a za laih thei ding hong om ciangin a seppih thei lo om hi. ‘Makai masa ka hih manin kei makaihna nuaiah om ding uh hi’ ci bang keekin, makai hihna midang tungah suan ngam lo, suan nuam lo uh hi. Kiteelna panin tua bang mi hoih dangte in hihna a ngah uh ciangin tua a sepnasa hanga kisaktheihna hangin thanem lawh zawsop hi.

Minthanna (popularity)
Minthanna pen a hoih mahmah ahih laitakin tua-in kisaktheihna leh hi kisakna piangsak thei a, a hoih lo lamin mihingah na sem thei hi. William Penn in, “Avoid popularity; it has many snares and no real benefits” ci hi. Meetna pi om lo, thaang (trap/snare) lauhuai mahmah hi thei hi.

Lawhsapna (failure)
Mikang te’n, “Lawhsapna pen lawhcinna khuam muanhuai ahi hi (Failure is the pillar of success)” ci uh hi. Makai te’n makaihna-ah lawhsapna tuak teitei uh a, makai hoih lote pukin, lungkia thei uh hi. Joshua in Ai khua a zawhloh hangin a makai hihna panin kitawp lo hi.

Mahatma Gandhi, Nelson Mandela, Abraham Lincoln, Henry Fort-te pen a lawhcin sawmna uah lawhcing pah lo uh a, bangzah vei hiam a lawhsap zawh uh ciang a sep tantanna uh hangin lawhcingin, makai hoih suak pan uh hi.

Huaihamna (greed)
Amau phattuam nading bek a ngaihsun, a huaiham makai pen makai hoih hi ngei lo hi. Lai Siangtho in huaihamna pen, ‘milim biakna zahin sia’ (Efesa 5:5); ‘Enna leh huaihamna a om nak leh buaina leh siatna nam khempeuh tawh kizom pahpah hi’ (James 3:16) ci hi. A huaiham makai pen a puk, a kisia makai ahi hi. I gensa Ahab nuntakna panin huaiham hoihlohzia kitel mahmah hi.

Hazatna (jealousy)
Makai pawlkhat amah sanga mi a siamzawk, pilzawk leh neihzawk ding a lau om thei hi. Hazatna pen - guh a muatsak natna hi a (Pau. 14:30b), hehna leh sin-sona siahuai a, tua sangin zong siahuaizaw lai hi (Pau. 27 :4).

Mihing hong buaisak lianpi pen ei neihsa hi loin, midang neihsa deihgawhna hang khawng hi leltak hi. Tua manin hazatna panin kidophuai mahmah hi.

Lungkiatna (discouragement)
Makai hoihte a lungkia pahpah lote ahi hi. Haksatna leh galte tamna lakah Joshua lungkia lo dingin Topa’n ci hi (Joshua 1:9). Ai khua a zawhloh na panin lungkia lo a paikik dingin Topa’n hilh hi (Joshua 8:1). Cidamlohna, gensiatna, lawhsapna, mipite thadahna, sum haksatna etc. hangin lungkiat theih hi.

Gensiatna (criticism)
Leitungah mihingte a paubang lo (perfect) om lo hi. Mi khat in na a sepna gensiat nading a zong teitei pawl om hi. Gensiatna pen nam nihin kikhen a, kibawlphat nadinga gensiatna (constructive criticism) leh siat semsem nadinga gensiatna (destructive criticism) kici hi. Mi pawlkhat tua bang gensiatna hangin puk thei hi.

43. Maikai Dinmun Sangpen

Midang thuzawh a sawm makai khatin mi lungsim zawh sawm hi. Midangte lungsim zawh nadinga hoihpen in itna ahi hi. Itna in galte lungsim khauhpen zong nemsak thei cih pen leitungbup in a theih thu khat ahi hi. Ahih hangin i kidawkkhiatsak dan leh i zatsiam dan pen kigamla thei mahmah hi. Na nungzuite in amaute thupingaihsut na hi, cih a theih masiah uh amaute sangin thupizaw na hihna thu sang ngei lo ding uh hi. Na thupingaihsutna kidawkkhiatna pen itna ahi hi. Itna kihel lo a kiphawkna pen a taktak hi lo, a lem ahi hi. A khasum uh na khan pong hangin, amaute na it tuan kei leh a lungsim uh na zo tuan kei ding hi.

Etteh dinga kizang makai
Etsakna hoih pen nu leh pate hiziau hi! Naupangte in neucik ahih lai uh panin nu leh pate kampauzia, gamtatdan leh a khuahekdan uh, a lunglut lam uh leh a hoihsak lam nadongin etteh uh hi. Etteh dinga i deihloh nadongin hong ettehin, khatveivei ciang nupi pawlkhat in, “Ka gamtat bangin gamta kei inla, ka gen bangin gamta in” ci thei uh hi! Innkuan bek hi loin, veng, khua leh leitungbupah ‘ki-etteh’ (copy) pen mihing ngeina hi. Nuntakzia leh kizemna, ‘tulai dan’ i cihte zong i etteh hanga hong piang hi. Mi thupi i cihte in, “Mipite aw hong etteh un” ci ngei lo uh hi. Ahih hangin a gen uh kul sese loin ki-etteh lel hi. Tua etteh utna, mihing nuntakzia a kiptak a omsa pen makai pawlkhat in manpha takin zang uh a, amau pen midangte etteh dingin omin, tua banga mi in a etteh uh ciang tua mite makaih haksa nawn lo hi.

A hoihna tam mahmah hi. Makai cing leh hoih a hih leh, a nuntakzia in mite thuzawh a, a tupna mun tunpih thei ding hi. Ahih hangin, ama nuntakzia a hoih kei a, a tatkhialh khak leh bawlphat haksa mahmah hi. Tua banah, mihingte in midangte nuntak hoih sangin a hoih lo lai etteh nuam kisa zaw hi. Etteh dinga a hoih bucing leitungah kuamah om sam lo hi. Tua manin, a hoih mahmah tawh kibang, a taktaka zat theih meelloh tawh kibang hi. Tua banah, mi khat i nuntakzia bekbek i etteh leh pawl leh gam paizia hong hoih lo ding hi.

Hatna a guan makai
Hih pen makai dinmun sangpen banga ngaihsut ahi hi. Mipite tungah thahatna pia kawm thei makai pen a nungzuite tawh kithutuak hi. Makaite in a muhkholhna pen a muhdan bang lianin a nungzuite tungah musak siam a, lawhcingsak dingin ama thalawp banga thalawp dingin a nungzuite omsak thei hi. A thalawpna uh zangin a vek ua a tun sawmna uh a tun theih nadingin a nungzuite kisap zah tawh kituakin hatna leh cihtheihna pia hi.
Nidanglaia kidona-a pasalpha leh mipil Pittacus in, “Mihing pilna sanlam pen cihtheihna lamah kinga lo a, cihtheihna a zatsiamdan uah kinga zaw hi” ci hi. Cihtheihna pen sum bang lian hi. Sum pen khola tampi neih i sawm leh a tawpna-ah mi ciil mahmah kisuak lel ding hi. Sum hau dingin meetbawl kisam hi. Cihtheihna pen a meetna thei lo a neih maimai ding hi lo a, a manphatna theih mana kepcip gawp ding zong hi lo hi. Makai tampi in cihtheihna pen meetbawl loin kholkhawm uh a, a nungzuite buaina a vengsak hi loin, buaina a behlap suak thei hi. Thahatna pia kawma makai dinmun pen tua tawh kilehngat lian hi.

‘Keima sep theih hi’ cih mana nasep ding a sem thei dang tungah nga lo a, buai gawp theih ahi hi. Sep ding tampi pen muhkolhna kician tak tawh paizia hoih tak neiin, a nungzui mite sep theih ciang leh sep ding hoih takin khen ding a, tua sem zo dingin hatna leh cihtheihna guan ding hi. Tua hi leh a ngaihsutna pen lawhcingsak dingin sem ngeingai lel ding uh hi.

Hatna a guan kawma makaite in nuntakzia kibang tangpi nam guk (6) nei uh hi :
1. Amah sang a muhkholhna (vision) lianzaw : Makai hi sam a na muhkholhna pen makai na sep sunga ‘RCC building khat beek neih’ khawng maimai ahih leh na mimal nuntakna ciang bek a ngaihsun cihna na hi hi. Tua bang bek a lunggulh na hi leh VC, Minister na hi a na hi kei zongin nekgukna leh golhgukna i khemna in hong ngap nadingin muhkholhna nei na hih manin na buai den ding hi. Tua banah mipite tungah thuneihna piak a, hatsak zong kisam lo hi. Na teenna khua/gam khantoh ding na deih taktak leh tua muhkholhna pen nangma nuntakna sangin lianzaw ding a, khua/ gam hoih nadingin sih zong na ngap pah ding a, tua pen mipite in mu lo het lo ding uh hi. Ahih theih zah un hong panpih ding uh hi.
2. Mipite a muangngam : Midangte i muanngamna zahzahin midangte pen ei adingin muanngam dingin om uh hi.
Makai tampi in selsim, ipsim, thusim hau lua uh a, a kidawkkhin (transparency) lau uh ahih manin kikhemna leh sum zangin kiteelna ah hatsawm thei uh hi. Hatna a pia kawma makaite in a nungzuite uh muangngamin, a muan mite in amah zong muang ahih manin nasep nuamin lawhcing baih mahmah hi.
3. Theician hi! : Hih pen kisam mahmah hi. Amau kitheician phot uh a, a hatna leh hatlohna, amah bek a sep theih dan leh midangte huhna a kisapna ciang theician hi. Tua ciangin a sep ding theician a, haksatna om thei leh a vensak ding dan zong theician hi. A makaihte in lauh neih lo a, tua in sunglam pan thalawpna pia hi.
4) Mipi khantohsak sawmna : A nuntakna-ah midang huh nopna nuntakzia kician tak nei a, midangte mainawt ding hazatna sanga muh nuam a sazaw leh a lungdampih, midangte mainawtna pen ama mainawtna banga a ngaihsun thei leh, makai hoih dang tampi sekkhiat behlap a sawm nasem ngamte ahi uh hi. President Ralph Nader in, “A cilin lawhcinna pen nungzui a haute ka sak leh a tawpnaah zuih taak makai hauh pen lawhcinna hiin thei ing” ci hi. Ama nuntakna-ah amah kiliansak, kithupisak lam hi lo a, midangte nuntakna-ah a pilna a siamnate uh zangin, tuate khangto, mainawtsak cihna hi.
5) Sila nuntakzia a theihsiam : A kumpi tutphah leh kumpi lukhu pen banci banga thupi ahi zongin, a lungsim sung pen midangte adinga nasep nopna in luahden a, hatna leh cihtheihna a khutah a tam naak leh a nasepsak mipite nuntak nadingin phatuam hi.
6) Midang kaihkhop siam : Millionaire Andrew Carnegie hanah, ‘Hih munah amah sanga mi hoihzaw tampi a kaikhawm siam pumpi kisial hi’ cih kigelh hi. Lawhcinna pen sum bek hi lo a, amah sanga hoihzaw leh kicianzawte kaihkhop siamna pen lawhcinna lakah a thupi mahmah ahi hi. Sum hau khempeuh in hih pen hih thei khin het lo hi. Hih thu pen manpha hi. Politics ah diakdiak manpha zaw lai hi. ‘Ka makaipa uh a hoihna tuam ka gen ding thei keng, ahih hangin amah in hong makaih kei leh kikhenzak ding hi ung’ cih thu pen i theihzel ding hi. Ahih hangin tua tak pen ‘a hoih mahmahna’ hi citciat hi.

Mi khempeuh ading lawhcinna
Makaite nuntakzia tuamtuam pen mi khat tungah khat ta om thei lo hi, cih theih kisam hi. A hun leh mun tawh kituakin a nungzui mipite, a nasep ding tawh kisaiin a nuntakzia uh kilamdang thei hi. Mipite tungah hatna pia kawma makai dinmun pen dinmun sang tawh a kibat hangin, tua hun laitakin mipite hatna piak taak ahi uh hiam? hatna na piak ding ciangin mipite in tua hatna pen a zang siam dingin pilna leh lungsim maan a neih uh kisam hi. Tua manin makai pilte in a hun leh munah ‘siamna’ tuamtuam zang ziau uh hi.
Makai nuntakzia a poimawh mahmah pen, ‘Mite cihtheih hun theih’ ahi hi. Makai hi nawn lo a mipite in hong theih zawh ciang a makai hih sawm pen mipi vaihawmna kumpi ah pilhuai het lo hi. Margaret Thatcher in gensiam mahmah a, “Lady maan taktak pen a kigengen kul se loin kithei lel hi. Mi in ‘lady ka hi’ a cihcih leh lady hi lo cihna hi a, ahih kei leh zong lady omloh nadingah om cihna hiziau hi. Makai khat in, ‘na makai uh ka hi’ a cihcih a kisapna munah, makai taktak hi nawn het lo cihna hi” ci hi. Tua ‘hihna’ tak pen seek-hiam a hatsak theih hi. Nangma kihihsak tawmna lam sangin mipi in ‘hi teh’ hong cihna kisamzaw hi.

Andrew Carnegie pen genthei takin Scotland panin America ah lal (pem) a, a kuhkalna hang leh makai nuntakzia deihhuai tak a neihna hangin mi haupi hong suak hi. Library 2,500 val phuanin mihing nuntak bawlhoih a, kipsakin, midangte adinga kipia dingin hanthawn hi. Institution thupi tak a nutsiat banah, 1919 a leitung a nusiat laitakin dollar 350 million val tak nusia hi.

Mi lawhcingte tangthu a kigen simin Carnegie pen kigen den hi. A thugen a kigen kikkik pen, “Ei bek a na khempeuh sep sawmna leh a minphatna khempeuh ngah sawmna a neite kuamah makai thupi leh hoih hi ngei lo hi” cih ahi hi.

Lawhcinna pen mikim aa leh midang hong kihelna hi a, eimah beka lawhcinna pen nuam ngei lo hi. Lawhcinna lampi-a midang a buaisak leh a nawngkaisak hi lo a, midangte lampi a sialsak lama lawhcingte nuntakna pen nuntak hoih leh manpha hi a, tuate nuntakna pen deihhuaiin zahtakhuai mahmah hi.

Gelh - T. Sawm Lian 
Daihna Cabin 
Champhai, Mizoram. 
sawmthomte09@gmail.com.

Source ; Daihna Cabin.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: NUNTAK MANPHAZAW TAWH LAWHCINNA (Meaningful Life Leads To Success) Gelh - T. Sawm Lian . Description: Rating: 5 Reviewed By: Cinpu Zomi
Scroll to Top