728x90 AdSpace

Hot
Menu
Zon-ol na Donate

Latest News

Paunak leh a khiat na


1. A si masa puantuam tang.

a. A masa peuh hampha zaw.

2. Akta mang kuan kitutu.
a. Kilemna om kei leh kiamsukna manthatna piang.

3. Akta duhgawl kilawh khuh.
a. Huaiham lua leng gimna kingah thei.

4. Aktui sungah a vom ding leh a kang ding kitheilo.
a. Mailam thu piang ding kigen-khol theilo.

5. Buipi leikei in zong khua ngai
a. Kidawm in gamta ding

6. Bui a phak kuan a tawp.
a. Maban tun dektak napi a tut kuan a tawp.

7. Cimnuai a sa kibak, geltui a kithuk.
a. Lungdamna mangngilh ngeilo, khatvei teitei thuk kik hamtang.

8. Dektam tuktum zong gal suak thei.
a. I muan pen zong gal suakthei.

9. Gallu kihta gallu tuak.
a. A haksa khatpeuh utlo a i pelh hang ki tuak veve.

10. Gal phawn kuan leh matut kuan.
a. Nasepna khatpeuh ah I zawh kuan ciangin hanciam semsem ding.

11. Gip zong leh khuai zong kituak.
a. Deih tuak kikhek.

12. Hakai pahtak lung heng.
a. A hoih ding a i upmawh khat a hoihlote.

13. Hausa sial mei let.
a. Nasepna ah siksan khitna a sem lelte.

14. Hausa ziak in kuang zawn ban.
a. A haua lian khatpeuh hangin a kim a pam a te’n noptuamna ngah.

15. Hawmsiam nungta, nebum si baih.
a. Cingh in hawm dimdiam leng nuntak nuam, huaiham in angsung bek gen leng puksi thei.

16. Inn gua hahlo, gam gua hah.
a. A u a nau, a khua a tui puahlo a, midang a puah te.

17. Kamsiam sial lei sang, kam sia sial liau.
a. Kam siam leng thu sia zong mai thei, kam sia zang leng thu gina lo khat zong kiliau thei.

18. Khaikha a gui-ah gah.
a. Mi hoihlo te kigui zuih.

19. Kawl zong tui dam in kiho.
a. Zindo lengla do siam

20. Komkim zong ta pasa sagih nei sa nawkik.
a. Numeite tanu tapa a kimin a neih hangin kisak theih ngam huailo.

21. Khuapi guahzu satang hal
a. Thu khatpeuh a thang vengvang hang a dai baihte.

22. Leiba leh sakha nuai nung.
a. Leiba neite kisim mawh.

23. Lamnai tawn nuam behiang kum kua a tunglo.
a. A ngeina bang tawnlo in a baih bawl manin haksakna a piang thei thute.

24. Langbawm a ek ah awk.
a. I kidawp kei leh eima gamtatna pan gimna kingah kik thei.

25. Lei leh ha zong kipet.
a. I it I ngaih pente tawh zong kitawng kha thei.

26. Lusum zong bingtawn a zom
a. Thusia sa a hoih ding a lem

27. Meima lo ah tho tu lo
a. A omsa thu khat omlo in kigen lo

28. Meigong lung leh sa zan ta.
a. Thu khuallo, hehbaih, lungtom, ngongtat.

29. Mihing leh papo.
a. Mihing nuntak hun tom.

30. Mualmong meikhu zong nuam tuam.
a. Dahna,lungkhamna, haksatna i tuah laitakin i gei a om mawk khat zong nuamtuam kisa in kingai hi.

31. Mui zang lua kipei sat.
a. A kipil sak lua te in tuakkhial baih.

32. Nadak kangin kawl lawh, dai zang kangin kawl peh.
a. Mun khat a thu piang khat in mun khempeuh lawh.

33. Ngaltang hapaksa tum kik lo.
a. Pasal thu gensa dok kiklo.

34. A nunung gal bansat.
a. A lawmte zah in a hat loh hangin lungkia lo in, sem teitei a hih manin hamphatna ngah veve.

35. Nu leh pa thumang a nah lawh pek.
a. Nu leh pa thu mangte in thupha ngah.

36. Nupa kilungtuak khua khat in zolo, khua khat kilungtuak khua kua in zolo.
a. Kilungtuak a i kithu bup leh kuamah in hong susia zolo.

37. Numei in a ma khuat, sum kuangin a lii khuat.
a. Eima mailam nuntakna ding eimah ciatin i hanciam kul.

38. Nahkia kawi in nahkia mam suang.
a. Mi gina lo sung pan mi gina khat peuh piang thei.

39. Pa that tokhom guan.
a. Thu khual in hehna thukkik pahlo.

40. Pute leh lamsak kineh zolo.
a. I pute i simmawh nop hang in kizo ngeilo.

41. Sakhi a pi san a no san
a. I nu leh i pate mah kisun ciat.

42. Sakhi in a tatna ding kuam kua khual.
a. Mailam thu khualna in kidawm in gamta ding, na khempeuh ah kiguang kuak ding.

43. Sakhi thatlo ngal tang tum.
a. A neuna te zo masa lo in, na lianpi a tumte.

44. Sial tat nung a sial dai kai.
a. A sia ding teng a siat khitteh, I puah kik hang phattuam nawnlo.

45. Sial nuphal zong sihkuang ah kiliak.
a. I lawm i gual luite kimang ngilh ngeilo a hih manin i kimuh kik ciangin nuam kisa.

46. Sial vom leh sial vom ki ngai.
a. Eimah tawh a kibang mite kingai.

47. Simbeng zong kim citciat tang zang kiguang.
a. Pilna siamna kikim taleh makai ding khat kiguang tuam.

48. Suangpi suangneu in theek.
a. A mah kia a, a lian a hau thei omlo.

49. Tanga si Kawl in kah.
a. A beisa a nopna dahna a hong phawkkik sak na. (melmuh)

50. Tu nailo a khe khuang, man nailo a tui sui.
a. A hih dingteng zo masa photlo a, a man khinsa bang a omte.

51. Thupha in kong biang kanlo, thusia in mual kua khum.
a. Thu hoih thu pha kizel hak, thu sia kizel baih.

52. Va-ak cing kam sakhau taw ah kipua lo.
a. A tawntung a kikem, ki galging gigete tungah thusia tung ngeilo.

53. Vai nunung guahsia in lap.
a. Sepna bawlna ah a thadah a, a tuantualte hamsatna khatpeuh in lap.

54. Vaphual tang sa, va-ak tang.
a. A gina sa mi khat a ma kikep zawhloh man a gina lo a suak kikte.

55. Zawlthu kal ah sial thawl.
a. Zawl thu ah thu neuno khat peuh, thu lian suak baih deuh.

56. Zawng nek ngau in thal pu.
a. Mikhat gamtat hoihlohna midang khat in thuak lawh.

57. Zawng in a ma kheng mulo in a lawmte kheng ko.
a. A ma hoihlohna mulo in a lawmte hoih lohna bekbek a kokote.

58. Zuau in a khap tawn
a. Zuau thu i gen leh kisui zuih in kithei kik veve.

Source ; (NAMKIM BU – Office of Township Education,Tedim)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Paunak leh a khiat na Description: Rating: 5 Reviewed By: Cinpu Zomi
Scroll to Top