728x90 AdSpace

Hot
Menu
Zon-ol na Donate

Latest News

Pu Capt. MANG TUNG NUNG (1901-1968) Tangthu

Capt. MANG TUNG NUNG(1901-1968)

Capt. Mang Tung Nung pen 1901 kumin Muizawl khua ah suak hi. 1909 kumciangin Tedim ah Kawllai tan 4 sang kihong a, tua lai ah sangkah hi. Kawl lai sang kah masa te lakah khat in kihel hi.

           
1921 November 30 ni in paltan tum hi. 1/20 Burma Rifles ah 1925 July 21 ni in Jemadar ngah hi. 1936 December 16 ni in Subedar ngah hi. 1937 July ni 8 ni in 4th Burma
Rifles ah Subedar Major ngah hi. 1940 October ni 8 ni -in Honorary Lieutenant ngah hi. 1943 April ni 4 ni in Khamtung Western Chin Levies panin ABRO (Army in Burma Reserve of Officers) Commission ngah a, Second Lieutanant ngah hi. 1944 November ni 2 ni in BRC (Burma Regimental Centre) Hoshirpur, India gamah Captain ngah hi. 1945 October
ni 4 ni in No. 2 H&E Centre (B) (Holding and Enquiry) pan Major ngah hi. Major a suah hangin mi a tam zaw in lawh nuamsa zaw in Captain Mang Tung Nung in thei zaw hi.

1924 in India gam Pachmari Small Arms School ah nasep sinin pai a, D. (Distinguished) tawh ong ahih manin tua sangah 1925 dong sia semin om suak hi. 1927 in Ahmednagar Machine Gun School ah nasep sin leuleu in Q1 tawh ong hi. 1931-32 in Nawgong Kitchener College ah nasep sinin pai leuleu a, ong bek tham loin, Bird-wood Sword of Honor (Ngunnam ) ngah hi.

1937 kumin King George VI Coronation (Kumpi suahna) pawi simin pai hi.
1941 Japan gal Kawlgam hong tunin a tat tawh gal pangin Kawkareik ah om hi. 1942 December kha in Western Chin Levies (Zo Levi) tat ah tung hi. Tedim gam Levi phuan pha hi. Tedim Zone ah Adjutant semin 1943 teh Sector Commander sem hi. 1944 March kha in Tedim paltan
teng tawh Hoshiarpur khua ah pai hi. 1944 September kha in BRC tung a, 1945 in No. 2 H&E Centre (Burma) tung hi. 1946 September kha 31 ni in pension la in tawlnga hi. Galkap sungah kum 25 sem hi.

1947 kum Pinlon kikhopna ah SCOUHP (Supreme Council of the United Hill Peoples) le nautaang kosale in pai hi. Tua khit teh Mualgam teng ki-uk nang kanna Maymyo
(Frontier areas  Committee of Enquiry) ah nautaangte deihna bang a kiteelna tawh ki-ukna om theih nading thu gen hi.

1947 ciangin Taingpyu Pyipyu Hluttaw (Constituent Assembly) kiteelna om hi. Khamtung in amat 6 kingah hi. Tedim adingin kitel leuleu hi.

Mailam Naingnganye vaihawmna a baih nading leh nautaangte' tel Councilte a kip nadingin, 1948 January kha in Capt. Mang Tung Nung makai in KSVP (Khamtung
Suahtakna Vaihawm Pawlpi) phuan hi. 1948 January kha ni 4 ni a Kawlgam in suahtakna a
kingah ciangin Capt. Mang Tung Nung in Zogam zumpi (Ministry of Chin Affairs) Paliman Atwinwun (Parliamentary Secretary) ngah hi.

1948 sungin Capt. Mang Tung Nung in Thailand gamah Goodwill Mission ah kihel in pai hi. 1949 in Maha Thray Sithu minphatna ngah hi.

1951 kiteelpi teh Tedim pan Pituh Hluttaw amat dingin kiteel a, Vuanzichoke pa Palimen Atwinwun sem hi.

Rangoon University Councillor zong sem hi. 1953-54 in Kawlgam ading bawng cihoihte leina, puakna ah makai hi. 1956-59 dong SAMB (State Agriculture and Marketing Board) ah OSD (Officer on Special duty) sem hi.

Capt. Mang Tung Nung makai in MP. Hrang Nawl, Bu Phosa, Ling Pe, Van Tling, Khol Kham, On Kho Khai te tawh taangpi 5000 valin 1957 February 20 ni mahin Tedim - Lawibual ah Zo Minam Ni pawi bawl hi. Zomi khempeuh huamin, Zo Minam Ni kip nang leh Zomi vai tavuan ladingin CNO (Chin National Organisation) phuan hi. Capt. Mang
Tung Nung Okkathah in teel uh a, Tedim pan Bu Pum Kho Gin, Hakha pan Bu Pho Sa, Matupi pan Van Tling, Kanpetlet pan Ling Pe palai (Secretary) dingin seh hi. KSVP leh Zomite kipawlna Party (Chin Amyothamya Nyinguntye Aphwe) te zong kigawm hi.

1960 kum ciangin Tedim Pyithuh Hluttaw amat dingin kitel leuleu a, Zo Zumpi ah Palimen Atwinwun sem hi. 1960 kum kiteelpi in Tedim Pyituh Hluttaw amat ding mi 4 kidem a, a nuaia bangin me ngah uhi.
            
Mang Tung Nung  10000 pawl
Dr. Vung Suan           5000 pawl
A. Lun Pum                2000 pawl
S.T. Hau Go           2000 pawl

1962 Tawlanzi kumpi kah ciangin Tedim ah a innkuan un ciah uhi. 1965 kum in Tedim pan Muizawl gam Tui-al lo gam kho a, taang 150 la hi. 1968 January ni 6 ni in Tedim
ah si a, ni 7 ni in Muizawl ah kipua in, 12 ni in kivui hi. A  zi pi Lun Kho Zam pen 1961 October 24 ni in Zangkong ah si hi. A guhte khawmin 1962 June 1 ni in Muizawl ah kivui hi.

            Capt. Mang Tung Nung leh pi Lun Kho Zam' tate a nuaia teng ahi hi.
1)     (Pu Khen Kang Lo)
2)     (Lt. Col. Hang Khaw Lian)
3)     Pi Lun Za Dim
4)     Pu Kai Za Tuang
5)     Pu Kam Za Mung



Source - (TEDIM PAN ZANGKONG, p. 28. Col. Khen Za Moong)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Pu Capt. MANG TUNG NUNG (1901-1968) Tangthu Description: Rating: 5 Reviewed By: Cinpu Zomi
Scroll to Top