728x90 AdSpace

Hot
Menu
Zon-ol na Donate

Latest News

Rev. Dr. Kam Khaw Thang, B.Th, D.D.,(The first Tedim Bible translator) Tangthu.

Rev. Dr. Kam Khaw Thang, B.Th, D.D., (The first Tedim Bible translator) Tangthu.


Rev. Kam Khaw Thang pen Tuithang khua mi Pu Sim Tung Nung leh Pi Ciin Za Dim te' sung pan October 17, 1927 ni-in Tedim gamhuam Tuithang khua ah suak hi.Tua hun lai in Tuithang khua ah sang om nailo ahih man in Tonzang ah 1937-1941 dong sangkah hi. 1946 kum in tan (6) zo a, 1947 ciangin tan (7) kah ding kimlai apa' leh Rev. Vial Nang i deihsakna tawh sangkah khawl in, Laisiangtho sang Rev.F.O Nel Son tonu sangah 1947-1950 sung kah hi.

Dr. Kam Khaw Thang tawh holim na.



1952 kum ciangin Tedim pan Kam Khaw Thang Hakha pan Lun Cung Nung leh Falam pan Lal Hnin te kiteel in, Insein ah Special Course kah ding acih pen Special course hilo-in Regular course kahsak in alawm dang te in sangkah zom zolo-in khawl uh a, Kam Khaw Thang bekin sangkah zom suak in 1956 kumin a tuam vilvel in B.Th degree kipia hi. March 19, 1957 ciangin Tedim Baptist Association (TBA) General Secretary semin, kum (2) sung GS a sep sungin Tedim Labu nihvei hong puah hi. 1960 kum ciangin  Myanmar Bible Society te sehna tawh kizui-in Zolai Laisiangtho tei hong kipan a, Late, Isaiah, Piancil cih bangin hong sem toto hi. Thuciam lui (OT) pen 1976 kum in zo a, Thuciam thak (NT) pen 1983 kumin zo leuleu hi.

A nu leh pate Tapidaw innkuan pan khangkhia hi a, Tonzang ah sangkah in a om sung Dec.15,1939 kum in Rev. Vial Nang in Tonzang gam Kongpi lui ah tuiphum hi. Frebuary 17,1959 kum TBA kumcin ki khoppi a (12) veina Phaiza khua pan in Siampi za (Ordination) kipia hi. Pasian nasep leh lai lam nasep thuah in nasem toto a, 1980 kum ciangin Zomi Christian Literature Society (ZCLS) hong piangkhia in, tua laiah 1984 pan lai nasep semto suak leuleu hi. Sangmang te nungzui-in Tedim kiim teng ah Gospel pai kawikawi a, mangkam leh manglai siam ahih man in Sangmang te kampau phen sak hi. Laibu zong nam (5) bang thoh khin ta hi. Zogam bek hi lo khamtung gambuppi Tuiphum Pawlpi te thudotpi muanhuai khat hong suak hi.

1999 kum ciangin ama nasep na leh service tungtawn in thupi leh minam pawlpi ading a kipiakkhiatna le asepnate pahtawina in Yangon Evangical Bible Seminar (EBS) sangte in Doctor of Divinity (D.D) degree pia uh hi. Tuni ciang Zomi Pasian nasem Siate sungah akum tam pen khat hi-in Pasian nasepnate zong ahih theih zah in mapang lai hi. Yangon (TBC-Y) pawlpi ah member in om a, kum 2010 in a zi S/M Niang Khan Ciin in nusia hi. A zi nuasiat hangin, atate in kem in tulaitak Yangon khuapi ah teng hi. A zi tawh Pasian thupha tapa 4 l4 tanu 2 nei hi. A tapa Ubel Nung Khan Kham kum 1990 in Thailand Bangkok ah Electric mei hangin hong nusia khin hi. Pasian nasep sungin Tuiphum mimal (1235) tuiphum a, Nupa kop kiteensak (letthat) kop (41) tengsak hi. Tedim Laisiangtho mangkam in hong letkhia masa penpen Rev.Dr. Kam Khaw Thang Zomi te-in pahtawina kong pia uh hi. Khansauna thupha Topan hong pia lai hen.

Sources by:

- Tedim gam (TBA) Siate'  Kipawlna Laibu (2004)
- Zogam Tuiphum Pawlpi tangthu (1999), Kam Khaw Thang gelh.
- Khamtung gam sangmang masa pen Dr.Carson  tangthu bu (2003), Kam Thaw Thang gelh.
-Tongsan.

Thupi Ka Sak Pawlkhat 
By Taang Zomi

Ka thulu ding, a kilawm a kituak, thei pak lo ka hih manin, "Thupi Ka Sak Pawlkhat" k'ong ci phot hi. Mi khat tawh ka kithuahna-ah hi ta leh, ka kithuah ngei loh hangin ama' thu ka zaakna-ah hi ta leh, amah tawh kisai thupi ka sak khat leh nih om thei hi. Tua thu (khat ahi zongin, nih ahi zongin), a gen nuam, ka hi hi. Ama' tangthu bup (biography) a gen nuam ka hi kei hi. Ama' hoihna, ginatna khempeuh zong a gen nuam ka hi kei hi.

Sia Kam Khaw Thang

Amah pen tu laitak-in Rev. Dr. Kam Khaw Thang, kici hi. Zolai Lai Siangtho hong teikhia khat ahihna, TBA, ZBC, BBC, BCC-te in a muan' khat uh ahihna, sawm-ah-khat citak tak-a a pia ahihna, cih-a kipan, ama' hoihna, ginatna tuamtuamte a suut nuam ka hi kei hi.

1991 leh 1998 kikaal sung hun khat lai-in, Sia Thang Khen Pau (Pasadena, California) in Sia Kam Khaw Thang' thu, hong gen khat ka phawk lai hi. A thu a them a neng-in ka ciamteh thei nawn kei hi.  A maan lo a om leh, amah'n hong puapha kik thei ding hi.

Sia Thang Khen Pau' inn pen Bo Aung Kyaw Street, Yangon-ah om hi. Khua zan ta, 11:00 p.m. bang ahi ding hun laitak-in, kong hong kikiiu hi. A hon' uh leh Sia Kam Khaw Thang, na hi hi. Amah pen inn lam (Tedim lam) pan-a hong tung hi-a, ama' omna (Yangon-a a omna) zong tung nai lo-in, Sia Thang Khen Pau' inn-ah hong tung suak pah, na hi hi. "Inn lam pan lai hong kikhak, hong pua ing. 'A thupi, a thukin hi; na piaksak pah in,' hong kici ahih manin, hong pia pah hi ing," ci-in, a lai puak pen, pia hi. "Tu phot in; niangtui khawng i bawl kei ding hiam?" a cih uh hangin, "Inn zong tung nai lo ka hih manin, na pai pah ning," ci-in, paikhia pah hi. Zan kim hi ta hi.

Sia Thang Khen Pau in hih thu, gen thei zeel hi. Sia Kam Khaw Thang thupi a sakna hi. Khua zan khin ta-a, khualzin hi sawnsawn ahih manin gim ding hi. A omna-ah pai suak phot-in a zing teh tua lai pen pia pan leh zong, kuamah'n mawhsak thei lo ding hi. Amah a ngap kei leh zong, mi khat sawlsawn-in piasak leh zong, kuamah'n mawhsak thei lo ding hi.

Lai a na puaksak ding saang zo ahih manin, lam kaal-ah man'suah lo-in keemcing-a a ngah dingte in a ngah hamtang nading, hah ngaihsut hi. "Thukin hi-a piak pah ding" cih thu ahih manin, Yangon a tun' phet-in, ama' omna zong tung nai lo-in, a ngah dingte kiang-ah, ama' pumpi mahmah-in  pia pah hi.

A etteh huai thumaanna, cihtakna hi.

Source ; FZI. Group mail pan Mar 27, 2007 ni in Taang Zomi gelh hi.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Rev. Dr. Kam Khaw Thang, B.Th, D.D.,(The first Tedim Bible translator) Tangthu. Description: Rating: 5 Reviewed By: Cinpu Zomi
Scroll to Top