728x90 AdSpace

Hot
Menu
Zon-ol na Donate

Latest News

TONGSAN WEEKLY JOURNAL Piankhiatna Thu.

Tuhun leitung mihingte pilna, siamna leh hauhna khang mahmah hi. Tua bang a khantohna sungah thukizakna ( Information Technology-IT ) bekbek kithupi ngaihsut ahih manin, leitung pen a neu semsem suak hi. Tua manin mipilte in leitung khuaneu (Global Village) ci-in minute tawmno sungin leitungbup thukiza thei hi. Zomite zong khuahun luan zia tawh kizui-in thukizak tuahna lamah i khuadak hong kulta hi.

Abeisa 2002 kumin Zomite khuapi ahi Kawlpi pan minam veii makai pawl khat hanciamna tawh Zo Aw thukzakna kiphuankhia hi. Tua bang kawm kal pan 2006 February sungin Kumpi lamte leh thu tuamtuam hang tawh kidin khawl hi. Zo Aw pen i minam sungah kizel in, kum 4 sung bang lawhcinna leh phattuamna tampi kinei man hi. Tua bang a kidin khawl hangin Editor leh Manager hunbit nasem Pu Thang Sian Kham (Sia Khampeek) mahin amin khekin TONGSAN ci in minam veiina tawh October 21, 2006 ni akipan hong zomkik hi.
TONGSAN cih a khiatna pen i Zo lakam hi-in TONG-Tongdam pan hong pai/ kila ahi hi. Tongdam i cih leuleu ciangin kampau/kammal cihna ahi hi. Tua kammal pen lai tawh i gelh ciangin Thu hong suak hi. Tua ahimanin Tongdam pan TONG kilakhia a, Sang pan SAN kilakhia hi. TONG leh SAN a kigawm ciangin TONGSAN hong suakin, a khiatna taktak pen thusanna/thungahna leh thukizaktuahna kici hi. Tua manin TONGSAN Weekly Journal kici thei ahi hi.
NGIMNA LEH DEIHNA (Aims and Objectives)
Leitungbup Zomite in thukizaktuahna pan ki-itna, kipumkhatna,thumuhna, kimeltheihna leh khantohna nei ding ngimna kinei hi. Pilna siamna thupisak in, khat leh khat kihuh kipanpihtuah a, Pasian kihtakna panin thupha ngah minam picing khat i suahna ding ngimna leh deihna bulpi ahi hi. Tua bek tham loin Lai nasepna lamah suahtakna nei a,lai nasepna tawh minam kemin, zuun in picing sak semsem ding hi.
NASEP ZIA DING: (Mission)
Leitung thu leh biakna thu kilekkim-a kalsuan khawm theihna ding leh minam dang lai lam nasem khempeuh tawh kizom khawm ding hi. Mimal, kipawlnate leh minam khantohna ding thute mipite tungah hawm sawn den ding hi. Lai thupit zia leh lai in minam akem ahihna te pholak tawntung ding hi. Mai lamah gam sung kikhelna zui in,TONGSAN kalsim(Weekly) bek hi loin, TONGSAN nisim (Daily News) ciang dong sep zawhna nang kihanciam ding hi. Tongsan pen Leitungbup Zomi khempeuh kiangah akizel zawhna ding kihanciam lai ding hi.
LUNGDAM KOHNA:
Tongsan Weekly Journal pen minam veiina leh lai itna bek mah tawh kisem hi. Tuni ciang dong manman i hawm khiat zawhna dingin, minam leh lai itna tawh huhna leh panpihna hong pia gam sung gam pua a om a min kipulak zolo, Zomi Laizom khempeuh tungah TONGSAN pan lungdamna lianpi kinei hi.
A diakdiak in Pa Vungh Suan Mang ( International Tongsan Consultant, Singapore) vaihawm siamna tawh Zomi Innkuan Singapore (ZIS) sung pan mimal tungtawn in Tongsan thapiakna leh a tangzai semsemna ding deihsakna tawh a mau kizawh zahzah hong pia uh a, Computer Complete set khat kilei ahih manin , hong piakhia mimal khempeuh tungah Tongsan pan lungdamna kiciamteh hi. 
Tua banah Tongsan pu Norway a tun khit ciangin a omomna mah pan Thului (Article) leh News tuamtuam mah a gelh/ apuak den kisam hi. Tua bang a laigelh na ding akisap laitak azat tangzang dingin Computer Complete set khat mah Pu Kham Khaw Tuan( International Tongsan Consultant of Norway) in piakhia leuleu ahih manin Tongsan pan lungdamna lian semsem hi.
Minam kician khat i hihna pen i Lai in hong kipsak a, minam i it leh i Zolai mah i it, i zuunzuun ding mah ahi hi. Leitungbup kalsim Zomi thukizakna i neihsun ahi TONGSAN khansauna dingin Nang leh Kei mawhpuak hisak tawntung ding hi hang cih i kicial phapha hi. Lai simsimte pen lai sim ngei lote sangin thuthei/ thumu zaw uh bek tham loin zahtak baangin vaang nei zaw hamtang uh hi. Laisimsim mipilte mah kizahtak den ahi hi.
Tua hi-in laisimna pan khantohna leh kihuh kipanpihnate hong khangin, i minam sungah khantohna lianpi hong om zawkna dingin hih i minam zuunna TONGSAN tawh mapang khawm lai ni ci-in kong zawn uh hi. Pasian hong piak thuphate pen kepcip ding hi loin, u le nau, khua leh tui leh i minam ading i zatkhiat theih ding Pasian deihna ahi hi. TONGSAN in nang tektek mah hong ngak den hi.
Tongsan Website Lui  http://tongsannews.wordpress.com
Kawlpi pan Nipisim a kihawmkhia Tongsan Weekly Journal pen Kawlgam sung le Zogam sungah Nipisim in kihawm khia hi. Gam pua lamah manman kikhak zo lo ahih manin, gampua lam a om Zomite' ading ngaihsutna le Tongsan Lai nasepna a tangzai semsemna ding ngimna tawh Tongsan Website khat neih zawhna ding hanciamna kinei hi. Tua bang a i hanciam laitak in minam ading deihsakna tawh Germany a om Tg. Khaipi (www.zocia.org) in a pialnate sit het loin Website Concept khat Wordpree tungtawn in ma hong patkhiat sak ahih manin a ma tungah lungdamna i pulak hi.
Tongsan Website Thak www.tongsan.org
Tongsan website i neih masak pen Wordpress tungtawn a kibawl hi in, Kawlgam sung leh mundang pawl khat pan ki en/ kizang thei lo ahih manin Tongsan private tawh i neih zawhna ding kihanciam kik hi. Tua bangin i hanciam laitakin Zomi sungah Computer and Internet pilna lamah i muan mahmah ahi Pa Paul Khaipu,(Australia) in minam leh lai itna tawh a pilna siamna leh a hunte sit loin www.tongsan.org hong mapatsak ahih manin Private Official website thak akinei zo suak hi.
Tua banah Website kilamzia (Template) zong a hun zui-in, puahtoh zel kisam ahih mah bangin Tongsan Web Designer Pa Lal (Lamka) in apil asiamnate sit het loin Tongsan website etlawm tak hong puahtohsak zel ahih manin amah le innkuante tungah i lungdamna lianpi kinei hi. A maute khempeuh tungah Zomite Pasian in thupha hong piaksak zel ta hen.
Tongsan Tanute khempeuh tangin,
Tongsanpu ( Sia Khampeek)

Source ; www.tongsan.org

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: TONGSAN WEEKLY JOURNAL Piankhiatna Thu. Description: Rating: 5 Reviewed By: Cinpu Zomi
Scroll to Top