728x90 AdSpace

Hot
Menu
Zon-ol na Donate

Latest News

ZOMI PAUNAK HILHCIANNA (A-P)

A.
  1. A hing a vankai omlo = A si ding vive hi hang.
  2. A si masa puantuam tang = A si masa te a it ding, a ngai ding hau, hampha zaw.
  3. A zu a va in zong bu nei = Ganhing natawm in kei a hi cih theih ding munkip nei.
  4. Aisa bang a guh pua nung = Kileh bulh.
  5. Aisa kua han, tapkual han = Ama mun bek ah hangsan, mun dangah dawilok.
  6. Aisa lo-ngek a zol bang =
  7. Ak geh zawngkhal bang (Ak pulsi ding bang) = Ngui, maitai lo, cidam lo.
  8. Ak gilgap bang = .
  9. Ak gulmu bang = Van dak ngawkngawk, tang ngawh ngamlo, kidawm.
  10. Ak kha guh a sai man = .
  11. Ak op leh mikhualin ankham hun nei lo = Anhai cihna.
  12. Ak op tuakkhia sangak tuak = Khatvei vakkhia sunsun tuahsia
  13. Akpi tui lai suam leh sila suam = Bu mang, a vekpi a beimang, hawm.
  14. Akta duhgawh kilawh khup = Huaiham lua thuak lawh.
  15. Aklui khuangtah ci-a, akpi khuang = Mi cih eng kim.
  16. Akpi khuang in khuavak lo = Numei thu thucing lo.
  17. Ankhing satsuah kik sadiak = Kitong kilemsa kitong kik leng amasa sangin kilemkik haksa zaw.
B.

  1. Baak vaat bang = Kia suk pah, lei kidenna.
  2. Baibek zingtho bang = Awng ging zuazua.
  3. Balteh tung a tuitak bang = Kip lo, kitaal.
  4. Bangkua kanzo gatang thawl = .
  5. Bawmsia leh patmu = Kituak, a hoih lo tuak hinapi kituak bilbel.
  6. Bawng nuak bang = Khem zawh loh, phot zawhloh, lungkimsak theihloh.
  7. Belgong hek leh thei vatuk = .
  8. Beli thoknawn gahzawthei = .
  9. Boih in kamei a tu’n teh tong ning ci, a mei tom semsem = Nasep sunsiah seploh suak semsem.
  10. Bokthok kawl a talah = .
  11. Bui a phak kuan a tawp = A haksa teng sem khin napi a tawptan pang teitei lo.
  12. Buipi leikei in zong khuangai = .
C. 
  1. Ci nana sih phut, veih paipai ek phut = Kamsiatna ding khat kihil masa.
  2. Ciamnuih galsuak = Ki maingap khial, kihopih khial.
  3. Ciangsia leh numeisia khekngei na = Numei a hoih kei leh mak ngeina hi.
  4. Cihnang thei lo sial a vui = Dahlua liang, sial sang a dahna lian zaw cihna.
  5. Ciikpi tawh ki bang = A thawmbek kiza a tak kimu ngeilo.
  6. Ciimnuai a sa kibak geltui ah kithuk = Unau sanggam tunga ki itna kilak ki mangngilh lo in kithuk kik teitei hi, a hun lai in a kithukkik pah zo kei zongin.
  7. Cinglo selua, a bel a but = .
  8. Cit leh siamval lo = A hoih deihlo omlo, thupha ngai dah omlo.
  9. Cit leh siamval omlo = Na hoih sep vallo.

D.
  1. Dahpa khuang neih bang = Ki ningcing, deihdeih nei, a kisap omlo.
  2. Dahpa taptung kalh = .
  3. Dai deek bang = .
  4. Deih tel a val = A deihtel lua tangval/nungak val suak thei.
  5. Dot ding neilo singbul dong = Meltheih u leh nau neilo, tagah, meigong, huh ding neilo lua, tangkhat lua.
  6. Duh omna leh ngaih omna = It leh ngaih omna gamla ta leh kipha lah cih omlo, duh peuh leng gamla ta leh kila ban, kisawk ban.
  7. Duhhop sa mal man = . 
  8. Duhselua kikang koih = Duhlua napi ne pah ngamlo.
E.
  1. Ek kawnggei bang = Niin bang den, siangtho lo.

G.
  1. Gallu kite gallu tuak = .
  2. Galngam in the a lot leh mualkua a khumpah hi = The, lengthe genna.
  3. Gamsai matnang in innsai zang = .
  4. Gangpil leh uipil ki manthei lo = .
  5. Gatam thuksang in khuaizu in tho-awk zaw = Hong galbawlte sangin hong itlua te lauhuai zaw, hong siasak thei zaw uh hi.
  6. Gatang khatin kawl denna = Mittang, mit tawh khua mu, en.
  7. Giahbuk singtom = A hoih a pha tenglo, a nai om peuh kaikhawm mengmeng.
  8. Gilpi leh sakhau = Gilvah lua cih omlo, anne dinga deihsakna kinial ngeilo.
  9. Gitta tuktun = .
  10. Guapi kuitung lua paak tong thei = A khanghoih lua khat a tawpna lam siatna tuak thei.
  11. Gul hileh a dek tuzo ta in teh = Migi, heh pahpah lo, thuakzo.

H.
  1. Hakai pahtak lungheng = Muanluat muan banglo.
  2. Hausa khualzin bang = Nuamsa, vanpua lo lampai, khualzin.
  3. Hausa thu leh naupang thu (Man in general, are but great children- Napolean.) = Naupang thu leh hausa thu kinial theilo, kinial zolo.
  4. Hausa ziak in tuikuangban = Mi khat nopsakna, letna mi nautangin noptuam pih.
  5. Heh se lua nuihsuak = A hehluat manin a cihna ding theilo nuihsuak.
  6. Hikpi cipkhap zong banglo = Cih tham lo, kamsung zel zolo lua.
  7. Hikpi cipkhap zong nuamtuam = Nek ding omlo lua hikpi natawm gilvahsak tuam.
  8. Humpi cimawh in zong piauneel baak = A lian, a lal, a haute zong belh ding kisam, mihing a kisam tuahlo omlo.

I. 
  1. Ih mumu zawnphut = Thadah a kizatna omlo.
  2. Ingua leh gamgua kiteh lo = Ei a leh mi a kiteh theilo, mi kiangpan noptuamna lamet ding hilo.
  3. Inn gua hah lo, gam gua hah = Ei a sem masa lo a midang seppih thapai.
  4. Inn hal leh tual that = .
  5. Inn nuaiphel leh tanu khak = Nasep baih hilo, sawm taktak kisam vai thupi genna.
  6. Inn thu leh gamthu kikhat lo = .
  7. Kamsiam siallei sang, kamsia siallei liau = Kamsiam a val omlo, kamsiam in mi lungdam sak.
  8. Kau nei kisungsia = Mi mu ngamlo, ki bubu, maizum.
  9. Kauphe in a sihna ding kungmui zuan = Mihingin zong sihna ding kizuan vanvan.
  10. Kawl gal leh tual gal kikhen lo = Gal ciatciat a hoihzaw omlo, kawlte zong sila in na man uh, galmat in na nei uh cihna hi. .
  11. Kawl zong tuidam in ki ho = Thu in gen ding, thagum tawh kilemna om thei lo.
  12. Kawlmang thu akpi in phiat = A gen leh a tak kizui lo.
  13. Kei leh phalbi zuau ngei lo = Sapi in a gial khek ngeilo, phalbi in a hun pelh lo.
  14. Keltal kisi bang = .
  15. Khankhamang zong siah dong = A min a makai khat in a noptuampih a ngeina.
  16. Khat lah ka tem khat lah ka pa ai = Kuamah paih theih omlo, it zawk theih huatzawk thei om tuanlo, akibang cihna.
  17. Khatvei simsing paak, khat vei zo singpaak = Hauhna zong kho lo, zawnna zong kip tuanlo, a haute zawng thei, a zawngte hau thei.
  18. Khua khat kilungtuak khua kua in zolo = Ki lungtuakte thahat, gualzo.
  19. Khuai lal bang = .
  20. Khuai zong leh ngip zong kituak = Aki tasam tuak kituakkha (zi-pasal zonna ah).
  21. Khuaikai khempeuh takkim lo = A gala et bekin a sungthu kitheilo.
  22. Kii zong annek lai dai = Annek ciang kuamah pau lo ding, dai taka ne hithiat ding.
  23. Ki-kausi phum = .
  24. Komkiim bang in nung leh ma sutuah = Numei in a pasal inkuan leh a sungte kikal kilemsak lo, kitawngsak.

L.
  1. Lamlui leh lawmlui kimangngilh theilo = Ngeina sehsa khat ki zuan kik veve.
  2. Lamphung leh pu te kineh zolo = Lamsak lamphung leh pute galbawl ding hilo, ki zo ngeingeilo cihna hi.
  3. Lamtom tawnnuam behiang kum-a tunglo = Manlah lua in sem khin ngeilo, a manlah luat ah hih khial zel ahih manin a bul pan panpha kik zel in zo hakzaw.
  4. Lawi ken kia bang = .
  5. Lei leh ha zong kipet thei = A ki it a  ki ngaite zong kitot hun om.
  6. Lian Do leh Thang Ho in zong tangtang phelhawm = A ki itte in neulua hawm tak lo cih nei lo.
  7. Ling kheikhiat bang = Dam pah velval, nuam pah, veng pah cihna hi.
  8. Lit tawh ki bang = Khuadak ngawkngawk cihna hi.
  9. Lo zongkhial kum khat, zi zongkhial khantawn = Zi ding, a hoih teel huai.
  10. Lotul siam in zong sanggam zong = Sanggam kisam lo omlo, sanggamte ki nusia theilo, sanggamte kipai theilo.
  11. Lu zang a mei-am koih = Amah leh amah kiminsia sak, ki susia tawm cihna hi.
  12. Lungnun tak bang = Khauhlo, to lo, kho lo, a ne a hing bek cihna hi.

M.
  1. Maitang singhawng belh = Maizum zong khualzo lo.
  2. Makthak sih leh zingguah zuu = .
  3. Mang a tuidawn bang = .
  4. Mei khu lian zawzuan = A nuam a lim omna bek lunggulh, lungsim cihtakna, itna taktak neilo, a haksa thuak ngap lo, uisan. 
  5. Mei kuang paisuak = Thuneu cik khatin thulianpi a piangsak.
  6. Mei-am sikkhak bang = .
  7. Meima lo ah tho tu lo = A omsa thukhat om lo a kigen lo.
  8. Meima lo buang a lian kideih = A hoih lam peuhmah a deihlo omlo.
  9. Mi khut a gul man nuam = A sep ciang ut lo, a minpha bek tangnuam.
  10. Mi khut a gulman nuam = Minpha bek ngah nuamin lah sem ut lo.
  11. Mi zawng pau leh akpi khuan = Mizawng te thugen kuaman thupi simsak lo.
  12. Mihing leh pa po = Mihing nuntak hun tom.
  13. Miksi galsim bang = .
  14. Miksi kiho bang = .
  15. Miksi kua holh bang = Phul zaizai.
  16. Miksi sazawng bang = .
  17. Miksi zong kim ciitciat lubawk kiguan = Pumpi ki kim citciat makai ding kiseh.
  18. Mimzang a sial kainuam = .
  19. Mit a niin tu khelkhia ding zong lawm kisam = Khat bek mi bukim zolo.
  20. Mit taw leh mittaw lamki hilh = A theilo tuak ki makaih.
  21. Mitsawk ding leh guta ding kitheikhollo = Kamsiat ding, tuahsiat ding ki theikhollo.
  22. Mittaw sialkhau let = A theih, a up khat khial ta leh khek ut lo, khek theilo.
  23. Mothak sakuang um = .
  24. Mothak zummawh zasankuang kaai = A hun a mun ah a kilawm in gamta theilo.
  25. Mual a khawl masa leh tui ngak masa kizahtak = Uzaw te ki zahtak ngeina hi.
  26. Mualmong et bang = Lametna bek, a tak muh ding omlo.
  27. Mualmong meikhu zong nuamtuam = .
  28. Muante belh leh phaibuk belh = Belh taklo, kibukna taklo.
  29. Muh loh su bek kilei = Numei a sia a pha ding kithei khollo.
  30. Mui zanglua kipeisat = A kipilsak luate zong khial.
  31. Munphiah thak in niin huai = A thak peuhmah kinuam tuam, kibawh.
  32. Muvanlai-in a tui khuai ngei lo = Muvanlai in a innsung khualzo, kemzo, hungzo.
N.
  1. Na kellu phum kidawk = Na thusim kilang khia.
  2. Naak neilo in tui luang lo = Mikhempeuh in kipatna insung nei ciat.
  3. Naakpheh khaukhih bang = Tai theilo, tangcip, kipeng khia theilo.
  4. Nah puapeuh zu, niknuai peuh su.
  5. Nahdak kaang in kawllawh = .
  6. Nahkia kawi in nahkia kaai = .
  7. Nahkok in musi suang = A tate a gal a suak.
  8. Nahkok musi suak = A tate in netum kik.
  9. Nahkok ta vaak bang = Amah a pattahte gal suak.
  10. Nahtang bul ah khuaiphullo, sakhi sansa vomlo = Leitung kikhel theilo, hihna sa kikhel theilo, a hoih khat in a hoih suang, a sia in a sia suang.
  11. Nahtang zong phungkhat a po khil ki nei = A ki it tuam deuh mihing sungah om ngeina hi.
  12. Naknuai kamvang in gen mawhnei lo = Kampau bek siam, a tak lah sem suah thei lo.
  13. Namtom hauh leh tui ta khan = Sawt khom lo, to lo, kem theilo, beisak pah.
  14. Namtom ta leh lamgei singpo = Ki zahtak lo, ki simmawh, khutthak siaknain kinei.
  15. Naupang silhpak deih = .
  16. Nauzaw ektum pua lah = .
  17. Ne leteh natawhum niteh = Limlua.
  18. Nek ding a lah su, paih ding a lah sa = Lah kizang theilo, lah kipai theilo, ahihna bangbanga sansiam mai kisam.
  19. Nek zahtak lo kuamah omlo = .
  20. Nekloh buanlawh = A noptuam pih ngeiloh ding sem kha thapai.
  21. Neksa thalawh = A nek ding taang a sep khiat ngai.
  22. Neu thumang mawh = Naupang, thu piang ciamteh theih kipat hunlai.
  23. Ngalha paksa tum kik lo = Khatvei minsiat kibawl pha thei nawnlo.
  24. Ngaltak muan luat kitanthei = Kimuanglua kimuang khial thei.
  25. Ngalulok tui ninsak = Mi gamtatna ding nawngkai sak ding ciang a gamta.
  26. Ngapi ngano a kivak = Milian te mineute hanga lian bek hi cihna.
  27. Nikhat baibek thau = A thau kithei man lo, thau cih nei ngei lo.
  28. Nu leh pa’ thu mang a nahlawh pek = Nu leh pa’ thu mangte a sepna ah lawhcing.
  29. Numei gilo akek kawi nuihsan = .
  30. Numei gilo ekthakna ah tha kik = Numei gilo kima kik.
  31. Numei gilo singkhuah-am tawi = .
  32. Numei gilo sukpum kuaitan = Numei gilo lungsim in ngam loh nei lo.
  33. Numei hangsan leh akpi hang = Numei hangsan lauhuai taktak lo.
  34. Numei hoih phung huai, numei gilo phungkhen = Numei hoih in inkuan ki itsak, numei gilo in a ki it kimlai zong ki hua sak.
  35. Numei in a ma khuat, sumkuang in a lii khuat = Ei nopna ding ciat ki thupi bawl.
  36. Numei in pallai nei, balpi in to lai nei = Numei in a hoih laitak uh om a, tua sung a pasal a neih kei leh kipelh suak thei hi.
  37. Numei khua leh sakhi khua = Numei in khua kip neilo, a pasal neihna peuh a khua hi thei.
  38. Numei leh vamim khem nop = Numei khem haksa lo hi.
  39. Numei lo in inn kisuang lo = Numei lo in pasal bek inkuan suak theilo hi.
  40. Numei lumlum zongzaw = Numei thadahte lum lum a, zawnna in pha zaw hi.
  41. Numei meisak a mawh, meikhang a kiciam = Numei a mawh ding hamsa lo.
  42. Numei naupai thaltang pai = Numei nausuak sih leh hin kikal hi.
  43. Numei omom meigong ngak, pasal omom nauluai ngak = .
  44. Numei phungkhawm = Numei hoih in a lutna inkuan kilemsak in, ki ngaisak diamdiam hi.
  45. Numei pu leh phaitam lam = .
  46. Numei suutpom a val omlo = Mo a kihawmthawh pian, a kimaksawm hang sutpi pom a, a ciah ut lo a om teitei te ki it hi, a heh nuam hetlo, a thuak keikaite kipakta hi.
  47. Numei thadah kungmui tu, Pasal thadah tangzang deng = .
  48. Numei thadah umtawng tum = .
  49. Numei vakhat thusia zong, pasal vakhat thusim thei = Numei vak loh ding cihna.
  50. Nunglam sodawh = .
  51. Nupa kilungtuak khuabup in zolo = Nupa ki it kuamah in khenzolo.
  52. Nupi gilkial bel lian suang, pasal gilkial loma kek = Numei ngaihsut sangin pasal ngaihsut lian zaw, numei khatvei nek ding khual, pasal in kumkhat nek ding khual.
  53. Nupi veihsang ding a nunglam en masa = Na khat peuhpeuh i sep ding teh kidawm masak ding.

O.
Ommun a ngam lo, gal a ngam = A taka ngap lo, a thu bek a ngap.

P.
  1. Pa that tokhawm kiguan = Pa that natawm kimaisak hi.
  2. Paihte khuanung pil = A zekai zawh cianga phawk pan.
  3. Pangpalek bang a tungnun kituh = Pangpaleh (butterfly) banga a tungnung ding kituh in van tungah lengtoto in a sawtna ciang huih om nawnlo in a vehvua lei ah kia in si.
  4. Papaak tuak bang = .
  5. Pasal khualzin mualmong en = .
  6. Pasal tup leh ngaltang tup = Khatvei tupsa tangtung sak sawm teitei.
  7. Pasan sialnek bang = Ngui pah sipah cihna hi.
  8. Penglam cisel = .
  9. Phalbi mang mat = Kitel mello kizom mello hi bialbual.
  10. Phalbi zinga khepi suihkhak na diak = .
  11. Phialphiah bang a mei khulam zuan = Mi tamzaw omna lam peuh thupi bawl kawikawi.
  12. Phim leh khau bang = Kizom ngitnget, mat leh zet bang.
  13. Phulum phul bang = Mun khat pan phul zuazua, lengkheh ngeingai.
  14. Phulum phulnang leikha in petlet = Na khat peuh a pianna dingin a sem ding kisam.
  15. Phung (bul) kiloklo, dawn kilok = Nu leh pa leh beh leh phung minsia ngeilo, mimal bek minsia zaw.
  16. Pu lo a han kitang lo = Pute thukimna lo tawh misi kivui theilo, Pute ki simmawh zolo, kisim mawh thei lo, sim mawh theih hilo.
  17. Pu te leh lamsak ki neh zolo.
  18. Puannuai zanglik kuaman theilo = Thusim gen kuamah in theilo ding hi (a genkhia om kei peuh leh).
  19. Puansia thuap leh teeksia thoih = A meetna omlo, kikhek semsem, to pih tuanlo.
  20. Putu kiciamin dai ah va gil khei = .
  21. Putu kiteeng aksa kikhamthei = Pute tawh a kiteng te hampha diak, mapai thei, thupha saang.
Gelh -  Hau Za Cin Suante (Phuitong Liim).
Source - By hornbillnews . Lunglenblog.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMI PAUNAK HILHCIANNA (A-P) Description: Rating: 5 Reviewed By: Cinpu Zomi
Scroll to Top