728x90 AdSpace

Hot
Menu
Zon-ol na Donate

Latest News

Zomi te'n Kum 2000 khit Hiamtawi ding Hanciamna.

2001 kum pawla kipanin Yangon-a om Zomi khangno pawl khat in gam leh minam vai kikupna Forum no khat kipan uh hi. Tua kipawlna pen Hornbill Group ci uh hi. A tawm pen kha khat khat vei kimu-in holimna nei zel uh hi.

Tua hun laitakin gamthu tawh kisai khangno kipawlna Momno leh sangnaupang kipawlnate om khin hi. Dikonia cih Dikom zong om hi. Ahi hangin hih kipawlna pen laisiangtho saangnaupangte kipawlna hi zaw pian aih manin gamthu lam tawh kinaak zop lua lo uh hi. Siamsin kipawlna ciangin picnic pai, Zomi Nam Ni pawi bawl cih ciang tawh daikai uh ahi manin, minam vai asem nuam taktakte adingin piang thei lo hi. Momno zong a kipat cil lai-in minam vai leh politik lam dingin hong kipat hangin, a sawt ciangin makaite’ lunglulhzia tawh kizui-in a lim a meel hong kikhel toto hi. Thupuak hawm (Kaal 2 khat vei) leh Momno tungpeng pawi kumsimin a pawl uh hi. Tua manin hih gamthu kisapna hangin Hornbill Group kipan khia hi. A kipat cilin mi 6 tawh kipan hi.

2004 kum ZSYO Thai gamgi ah hong kiphuat ciaingin tua tawh kizopna kipan hi. 2006 kum, April kha sungin ZSYO vaihawmna tawh gamgi ah HG makaite gamthu lam thusinna va nei uh hi. Tua thusinna hun sungin gamsunga a kingah zolo, a kisim kha lo laibute, data, laithupi leh muvite kien kha hi. Tua hangin zong gamthu lam muhna khang bek hilo-in, sep ding a kisap lam tel semsemna leh sepnopna lungsimte hong hat tektek hi.

Tua sung mahin, Kawlgam Saangnaupang Galkap (ABSDF) leh gam minam hiamtawi makai tampi tawh kimuhna om thei ahih manin, alungsimte uh hong hang tektek hi. Kawlgam khangthak tangthu ah galhat pen Deek KNU pualpi ah galvan zatdan thusin leh pawite ah akihel ZSYO pawlmi pawl khat leh HG te a kithuah khak tak uh ciangin, hun khat lai-a a ngaihsut ngeite uh hanciam dingin a thukim uh hi. Ei le ei ki-uk theihna (Self-determination), suahtaakna (Freedom) ngahna dingin hiamtawi-a kipat ding hoih sa tek uh hi.

Tua hun laitakin Kawlgam Zomi sungah hiamtawi kipawlna nih om hi. Chin National Front parti nuai ah Chin National Army om hi. Zomi Reunification Organization nuai ah Zomi Revolutionary Army a om hi. Hih khangnote’ muhna ah, ZRO pen Tedim kampaute’ makaihna ahih mah bangin, a kithukimpih sam hangin, Kawlgam Zomite ading a sep uh om mel sa lo uh hi. CNF in a sep lai sam hangin, thautang sangin huihthau tamzat zaw uh hi. Tedim kampaute sungah zong CNF tungah muhkhialhna nasia lua ahih manin, CNF sungah lut ding hi kisa zo lo hi.

Zomi Revolutionary Army

Tua manin ei le ei dingkhia ding cih kithukim hi. Ahih hangin, khangno vive ahihna uh tawh kizui-in kipat pah theih om lo ahih manin, hiamtawi sa kipawlnate kiangah huhna nget ding hoih sa tek uh hi. A omsa kipawlnate tungah gal siamsinna a piakna ding uh genin, galvan pen nung zon ding cih tawh kithumin uh hi. Hih kaal nih kaal thum asawt thusinna a man ciangin, Kawlgam ciah dingte ciahin a pua lama te tawh a lem thei bangin kithuzaak kik dingin kivai khak uh hi.
Chin National Army

Gam sunga omte zong khat le nih kikai tuahin hiamtawi ding thu kikuppi-in nei pah uh hi. Gam puate in zong gam minam makai tuamtuam tawh kihona nei-in hanciam tek mahmah uh hi. 2007 kipat lam ciangin, Deekte lampan a van tawh hong huh nung cih a thalawp huai thu a ngah uh hi. Yangon ate bang hih thu hangin nisim phial thukikupna nei-in gal siamsinna kua kiangah ngen ding cih vai thupi khat a om hi. Tam veipi kikup khit ciangin, Tedim kampau mah ZRO tawh kimu-in I ngimna gen sin ni. A pian’ kei leh lah, tua pan mi namdangte kiang gen kik ni, cih thukhupna tawh Vaigam pai ding kisa leuleu uh hi.

Amasa penin lamsaap tawh buai masa pah uh hi. Makai khat in ke’n a pai lam, a ciah ciangin a dang khat in zong ke’n a ciah lam cih kik pah ahih manin a sum vai uh a lem suak hi. 2007 Febuari, Zomi Nam Ni man ciang kithawi pah uh hi. A pai thei ding a kiteng ciangin mi 4 kiseh pah uh hi.

Tedim-Aizawl lam tawnin Aizawl ah Pa Khup (Chanmari kawn) ah tung uh hi. Tua lai ah ZRO palai Pu Thang Lian Piang in hong dawn tuah pahin, an neek vai ding khempeuh aman vaihawm pah hi. Kha khat sung bang ZRO lutangpi Pu Thang Lian Pau ngakin Aizawl ah om uh hi. Tua sungin Zomi sumbawl, singtangvaak teng tawh kithuahin, Aizawl Bazaal niangtuisai khat ah zingsang sim hih gamthu mah genpi in a nei uh hi.

Pu Thang Lian Pau in Aizawl zin zolo ding a cih ciangin, Aizawl leh Lamka kikal Sialtong camp ah mi 2 pai-in adang nih in Aizawl ah ngak uh hi.
Hih Pu Thang Lian Pau tawh kikupna ah
(1)Kawlgam sungah nasem dingin galkap a kisapna
(2)Tua manin gal siamsinna piak ding
(3)Hih a kiphuan thak pen in ZRO min mah zangin a mau thu tawh nasem thei ding leh
(4)Thu le la kizasak, kizomin, kisapna ah pawl khat le khat kihuh ding cihte thukim uh hi.

Tongsial paite a tun kik ciangin Aizawla angakte kiang hoihtak gen kikin, lawp thei mahmah uh hi.

A zingciangin Ex-Mizo National Front uliante tawh amau ex-MNF quarter ah holimna nei suak uh hi. Galvai lian a kigen loh uh hangin, Sanggam unau khat hihna tawh nasep bangbang uh hong panpih ding hi ung, ci’n vaikhakna zong ngah uh hi. Mizoram sungah Kawlgam Zomite’ tuah thute pulaakna nei-in holimna khawl bawl uh hi.

Tua nitaak mahin, palaite zong Kawlgam lam zuan kik pah uh hi. A zingciang, zingsangin Ciau lut suak uh hi. Nawng kaaina om kha leh ci’n Ciau pan kikhenin mawtaw tuam ciat tawh Tedim, Kawlpi zuan kik uh hi. Makaite zong galkap ding mi zong dingin Tedim, Kawlpi ah a khawl suak tawh, Yangon zuan suak tawh nasep kiguan pah uh hi. 2007, Kawl tuibuah pawi a man ciang, tawmtawmin dingkhia-in Tonsimh ah kituah dingin kigel pah hi. Lamsaap dingte zong makaite in ahih thei bangin a mau tumtekin zong ciat uh hi.

Yangon tungkik kim ciangin, upa lam pawl khat tawh kikup kikna nei leuleu uh hi. Tua lai ah upa lam panin hih thu pen luangkhaam leh khantawn sep ding vai ahih ciangin, upa lam pan khat tawh ZRO makaite kikup kik masak ding cih, thu kikhelna hong om hi. Hih thu hangin, gamsung leh Thai gamgi pan makai pawl khat leh upa lampan khat tawh kipsakna nei kik dingin Kawl tuibuah pawi sungin, dingkhia kik leuleu uh hi. Tua lo, a pai ding kigingsate khawl kik phot hi.

Hih anih veina ah mi 6 kihel hi. Pu Thang Lian Pau khawlzin tungnai lo a cih ciangin, Aizawl pai suak nawn lo-in Tonsimh ah ngakkawm in tam phot uh hi. Tua sungin 1990 kum ZNC parti pan kiteelna lut Pu Vungh Za Kap in hih palaipawlte an neek pihin, gam thu lam kikupna, holimna nei thei uh hi.

Tua hun sung mahin Mizoram Congress parti palai Pu Khai in zong anneek samin, Mizoram leh Kawlgam Zomite vai tampi tak kikupna nei thei uh hi. Pu Khai pen Kawlgam lampan Mizoram ah a lalto pawl hi-in, tu-in Mizo politik sungah a tualbial mahmah khat ahi hi.

Tonsimh ah tawl khat a taam khit uh ciangin, Aizawl lam a zuan to uh hi. Tua hun laitakin, Chin National Council khawmpi a om laitak tawh kituakin Kawlgam lam pan ahi zong, leitung mun tuamtuam ah a kithehthang Zomi makai tampi kim uh hi.

Aizawl ah Pu Thang Lian Pau a tunciangin, palaipawl sung pan upapi pa leh khangno lam pan khat tawh kimu masa uh hi. Pu Thang Lian Pua’ genna ah
  1. ZRO in Kawlgam lam tawh kisai galkap battalion khat koih ding gelna om hi.
  2. Tua manin ZRO/ZRA ah Kawlgam Zomite kisam uh hi.
  3. Kawlgam Zomite in ZRO phualpi koihkoihna Vaigam sungah ahi zong nasem ding
  4. Hih battalion thak makai zong Vaigam Zomite hi thei kha ding
  5. Hih battalion sungah galkapte pen Kawlgam Zomi vive hi thei lo ding
  6. ZRO/ZRA cihcih bangin gamta thei bek ding
  7. Zomi sungah galkap nih om thei lo ding cihte ahi hi.

Hih thu teng tawh kisai-in palaipawl zong nitaak ciangin, a ziinbuuk uhah kikum kikin kua mah thukim zo lo uh hi.

A zingciangin, palaipawl leh Pu Thang Lian Pau te in Orchid Hotel ah zingan neek kawmin holimna nei kik uh hi. Zaanni-a Pu Thang Lian Pau tawh kikupna ah akihel lo khangnote in a dotnopte uh leh ZRO dimmun tawh kisaite dong ciat uh hi. Palaipawl lam panin zaanni-a a kikupna uhah a omsa mah bangin, ZRO lampan apai masak lai uha thukimnate tawh bangmah kisai lo bangin, Pu Thang Lian Pau’ dawnnate hangin ZRO/ZRA kiangpan gal siamsin dingvai khawl dingin genkhia uh hi. Ahih hangin, mailam ah kiteelkhialhna a om lohna ding leh nasepkhop dingin kithukim uh hi.

Hih kimuhna aman ciangin, mun dang ah palaipawl kikupna nei suak uh hi. ZRO lutangpi Pu Thang Lian Pau’ genna sungah – Zomi sung galkap nih om thei lo ding ci napi- nasem khawm ding a cih zel pen muanmawhna a nei uh hi.

ZRA in ZRA pan akakhia pawlte tung a bawlnate uhah gaam mahmah uh hi. Ahih hangin Chin National Army ciang lah bangmah cih lo zel uh hi. Amau ii polisi pen a koi ci dan hiam cih tel khaksa uh hi. Azawh ngapte uh tungah a tuam, a laupiante tungah a tuam cih danin mu uh hi.

Kawlgam Zuatkikna
ZRO tawh kikupna alem loh ciangin, palaipawl zong a lungsim uh tampi tak kiam uh hi. Ahih hangin, tua laitaka CNC khawmpi sunga kihel makai tampi tawh kihonate hangin alungsimte a hat kik hi. Hih khawmpi sungah CNC sapna tawh kizui-in palai sungpan pawl khat va kihel uh hi. Adangte ahih leh, khat khatin Kawlgam lam zuan kik uh hi.

Tedim leh Kawlpi ah kituah kikin hih hiamtawi ding vai mah kikum kik uh hi. ZRO tawh alem kei leh, kua lam ah nga ding cih kilutuahin gel leuleu uh hi. Kawlgam rivolusian kipawlna a tampen phualsaatna Thai gamgi ah pai-in huhna zon ding thukim uh hi.

Gam sung nasepna tuamtuam hangin, hih gamgi pai ding vai lem thei pak lo hi. 2007 sathau man kahna hangin 88 saangnaupangte a kipat ciangin, gamgi pai ding vai a zia kaai tektek hi. Hih 2007 Kawlbiakna siapite’ rivolusian, Saffron rivolusian sungah makai pawl khat kiman ahih manin, Thaigamgi lam maingat ding vai taksuak zo nawn lo hi.

Hih thuteng pian zawha kipan innkuan sungvai leh thudang tuamtuam hangin makaite zong leitung mun tuamtuam ah kithehthang uh hi. Kawlgam lama a om lai sunsunte zong gamsung nasep tawh buai-in hiamtawi dingvai lam bangmah vaan zo nawn lo uh hi. 2008 kum sungin gamsung lam pan makai pawl khat leh Thai gamgi om makai pawl khat kikup kikin Arakan Student Army makaite tawh gal siamsinna ding gelna a neih uh hangin taksauk zo lo hi.

2010 kum sungin gamdang phualsaat Zomi kipawlna khat ii panpihna tawh Thai gamgi ah Zomi Independence Army ding khia hi. Atha uh leh bang ciang tung uh cih puaklakkhiatna a om lo hangin, Zomi sung ading gimna tawh Zomi minpua hiamtawi kipawlna khat a om a suak hi.

Zomi Independence Army

By - Tang Salaia.

Source : 
Zogam Hornbill.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

1 comments:

Item Reviewed: Zomi te'n Kum 2000 khit Hiamtawi ding Hanciamna. Description: Rating: 5 Reviewed By: Cinpu Zomi
Scroll to Top