728x90 AdSpace

Hot
Menu
Zon-ol na Donate

Latest News

ZOMITE KI-IT DING LEH INNKUAN LUNGSIM NEIH DING KISAM:


I. Zomi te sung ah ih kisap tampi a om hang in, a masa penpen in "ki it na leh kipumkhat na" ih kisap masak pen in ka mu hi. Tua bang aa ki it na ki pumkhatna lungsim in neih theih ih kep theih na ding in Innkuan Lungsim ih neih kul hi.
II. Innkuan lungsim ih cih in 

(a) khat leh khat ki hazat na tawh ih innkuanpih dang te siatna ding bawl lo, 
(b) ki langpan na leh ki gal bawlna omlo, 
(c) ih tha nem na te khat leh khat it na tawh ki genpih, 
(d) a tha nem te sim mawh lo in tawsawn leh panpih, 
(e) innkuan sung khat leh khat kitel khialh na ding in sutuah lo, 
(f) ih ki awi loh na a om leh mipi mai ah ki sel pho lo in inn sung ah ei innkuan teng lian ih om ciang maw? a hih kei leh ih genpih nop ih u pa ih nau nu tawh mimal in holim in kigenpih, 
(g) khat leh khat ki langpan in ki zuak bawl leh ki nawl khin lo, ki pampaih lo, ki gup bawl in tha kipia, 
(h) Laisiangtho sung ah note khat leh khat "itna lo buang lei na ki basak kei un" ci hi.

III. Innkuan khat cih min pua napi in innkuan lungsim a nei lote a cidam lo innkuan hi uh aa, khantoh na ding pen midang te khaktan sang in innkuan sung kilem loh na hang hizaw thei hi. A pualam gal sang in a sunglam gal lauhuai zaw kici ngei hi. Ih veng te tawh ih kilem loh sang in innkuan sung ih kilem loh pen kisup lawh zaw hi. Innkuan lungsim ih cih pen ih lungdam leh lungdam khawm, ih dah leh dah khawm in, khat leh khat kipan pih in, ki taw sawn in, thu kingetsak in, vai hawm khop theih na a hihi. A gualzo te lungdampih in a gual lel te panpih nopna lungsim pen Pasian deih innkuan lungsim leh a picing lungsim a hihi. 

IV. A deuhdeuh in tulaitak aa ei Zomi Innkuan makai te sung ah biakna lam ih pawl min a ki bat kim loh hang in a nungta Pasian a um tek ih hihi. Zomi te zong Pasian teltuam leh a nungta Pasian a bia minam hihang ci leng ki khial lo ding hi. Tua a hih man in, thu khat pepeuh ih gen ciang zong ih thugen te hong zakpih, ih lai gelh te hong muhpih ih Pasian om gige a hih lam ih phawk kawm ding zong thupi sa ing. Ih lungsim sung aa ih ngimna (motive) hong theihpih Pasian phawk kawm in innkuan lungsim taktak tawh ih ki zop ding thupi kasa hi.

V. Khat leh khat pilna kilak in, ei leh ei kidik sak in, tung nun ki tuhtuh le hang, ih nung hongzui mipi te dah mahmah ding uh aa, ih makaih na pen picing zo ngeilo ding hi. Mipi te aa ding in tua pen a picing lo, a lip khap huai makaih na hi ding aa innkuan lungsim taktak a neilo ih hi ding hi.

VI. Ka pianna ka nu in kum khat val deuh lai in vantung hong zuatsan khin aa, a dam lai in ka nu ka dot theih zel thu khat pen, nu aw nang zong teklam manawh na hih man in, ko na tate aa ding bang nong vaikhak nuam hiam? cih thu a hi hi. Hih thu ka nu ka dot sim in, hong dawnna kibang den hi. "Kham aw, na hau kei vua na min thang kei zong un phamawh masa kei, na u nau un na ki it diamdiam unla, kim leh pam aa midangte nuih sat lel ding in na om kha kei un" cih hong vai khak den hi. Tua pen tudong ka bilkha ah mang thei lo hi. Tua bang mah in ei Zomi Innkuan sung ah zong khat leh khat ki it in, kim leh pam aa te nuihsat ding aa ih om khak loh nading in thu kangen hi.

VII. Tua a hih man in, a kipan tung a hi, picin lam a manawh ih Leitungbup Zomi Innkuan Kipawl na a cidam na ding leh a khantoh na ding in nang leh kei tung ah tavuan (vai puakna) om hi cih phawk kawm in itna, lungsim picin na, ki niamkhiatna, thu khualna leh khat leh khat kideihsakna lam manawh ciat ni cih kei aa kipan ih vekpi in hong hanthawn ing.

VIII. Ih Pasian hong hehpih na leh hong thupha piakna hang in kum tawmno khat sung in Zomi te gamla pi ih pai khin ta uh aa maban lian pipi leh kipawl na tuamtuam zong ih nei thei ta uh hi. Tua bang mah in ih mailam saupi om lai a hih lam zong phawk ciat ni. Ih kipawlna te ih zat siam leh ih khantoh pih ding aa, ki pumkhat semsem in na lianpi ihsem zoding aa, mi namdang te in zong hong zahtak in a et teh huai innkuan ih hi ding hi.

IX. Mipi te in ih kampau te hong ngai in ih tatzia te hong en gige uh hi. Makaih na tawh kisai laibu khat sung ah, "You cannot demand respect. You must earn it" (Kei hong zahtak in ci aa tangsawl theih thu hilo hi. Zahtak na pen na thalawh kul hi) cih khat ka sim kha ngei hi. Leadership lam aa laibu tampi a gelh leh a minthang mahmah Dr. John Maxwell in "Leadership is not a position, but INFLUENCE" cih genden hi. Tua bang mah in pan mun deihna sang in Zomi te aading aa sep khiat na tawh na hoih tampi a semzo Innkuan makai hoih hiding in ih Pasian in ei mimal khat ciat hong siam ta hen.

X. Tuni aa Pasian leh mipi te hong piak minam aa ding aa ih neih ih vaipuakna (tavuan) pen thupi ngaihsut in ih zatsiam aa, mimal aituam phat tuam nading hi lo, ih makaih mipi te leh a deuh deuh in khang sawn te aa ding aa a et teh huai makai picing leh makai siam te ih hih na ding in ei Leitungbup Zomi Innluan Kipawlna aa makai mimal khat ciat ih Pa Pasian in thupha hong pia ta hen.
Veina leh Zahtakna Lianpi tawh,

Chin Do Kham, D.Min., Ph.D.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMITE KI-IT DING LEH INNKUAN LUNGSIM NEIH DING KISAM: Description: Rating: 5 Reviewed By: Cinpu Zomi
Scroll to Top