728x90 AdSpace

Hot
Menu
Zon-ol na Donate

Latest News

Ei Zomite Khantoh hun mahmah ta. Gelh - Rev. Dr. Go Za Kham

Gamngaikhuate in Kum2000 cinna Magazine khat bawl nuam ahih manin " Zomite ' khantoh nading thu khat hong gelh in" ci-in vaihawm upate in hong ngen uhi.Hih khantoh na ding thu pen a genhak mahmah thu khat hi a, ahi zongin kei muhna thu khat gelh dingin lawptakin ka saang hi.


Gamngai pen Tedim Gamsung khuate lakah a upa pen pawl khua khat hidingin uphuai hi.Taanglai thu thei mahmah khat a kigen Mualpi Khua-a teeng Pu Thang Tuan in " Ciimnuai panin Phaileng Khua kisat-a, tua panin Gamngai Khua kisat hi," ci-a a genna ka za ngei hi.Tua bang hileh Gamngai Khua kisat zawh kum tamsim phakhin ta ding ahih manin tu-a sanga i khantoh zawk nading bangbang i mu theilai hiam?

Ei Khamtungmite pen a khangto nai hetlo minam khat i hi lailai hi. Taanglai a i pu i pa te lokhawh singpuak daan mah bangin tudong lo kikho lai ahih manin hauh lam manawh loin zawn lam i manawh zaw hi. Tua pen thu khat ah i et ciangin khangluite zahin tuu-ma heima kek zolo, amau bangin hanciam lo, thanuam zolo i hih manin i khawhsa i kham zo nawn kei hi. Nidang lai-in a maute in taangza la in, sialkop go-in, zu nungin, tongin, gal ai-in, sa ai-in sial leh lawi tampi go-in bangsak bangkhang salu dim sak zo uhi. Nupa kop khatin sialkop go zo in, taangza ai zo uhi.
Gala taangpha e, kua ii taang hiam aw,
Kawltu tawi zo le'ng eima taang hi e,
Gala sial ta e, kua ii sial hiam aw,
Lai mi hen zo le'ng eima sial hi e,ci-in la phuak ngam uhi.

A tupna uh penn sihkhit cianga ding le nuntak lai-a gual tungtuan nading ahih manin hanciam mahmah uh-a piang zo pah hi. Zingsang tho baih mahmah in vaikuan uh a, " Zumei tuan un" ci-in ki hanthawn uhi. Tua pen khuavak nailo in lokuan uh a, zusa vasate na ngawn zingtho nailo uh ahih manin tuan gawp kha uh, cihna ahi hi. Tu hun-a i lokuan daante en le hang, vaihamsan khit cianga lo ki kuan a, nikaai peuh leh ki ciahnuam mawk ahih manin bangna semman dinga, an bangci kham theih peuh mah ding i hi hiam? Taangza lei i cihte a neupen in acre 10, bang pha dinga, tu ciangin taangza lei khat inn 4, 5 in kho mawk i hih teh an i khamloh ding mah hi, cih theinapi hangin ki hanciam tuanlo hi. I Pu i Pate in nakpitak in na sem uh ahih manin an kham mahmah pah uh a, nisim in zu lup zoin zu le sa nezo mahmah uhi.

A nuam belin bang a nuam bel hiam,
Zua lam len Sialki le khuang nuam e,
Zan lam len sialki leh khuan nuam e,
Zin lailen kal tang bang dam nuam e,ci-in la phuak uhi.

Tua banga gal-aih, sa-aih, taang-aih, khuai-aih i cihte pen i sih khit ciangin i kha in sila tengta muang ding, ankhing kham ding cihna a thubul pen khat ahih hangin nuntak sung mahmah in midangte tawh ki lamdanna om hi. Sa man, gal man, a tong a hang, zunung leh sialkop gote bekin a nektheih zu le sate bangmah ahih zolo te'n galet hihiai bek uhi. Tua banga minthanna a ngahte bekin zi hoih ta hoih ngahzo bekuh ahih manin hih kidemnate pasal kisa khat in hanciam pipen in nei hi.

Ka von tem bang na deih le aw,
Zangta va mat sak ve aw,
Zangta na mat zawh ciang in e,
Na deih bel pai-au kuah aw,
Kawltei bung leh na deih le aw,
Ngalpa lian sial bang sun aw,
Khaimu vengta na deih le aw,
Do lai albang va that aw,ci-in la tawh thu gen uhi.

Hih i thu gente pen thupi mahmah hi. Tu dongin thupi lai hi i cihna hi loin, i pu i pate hanciam bangin hanciam le'ng gualzawhna khat peuh ngah teitei ding cih i ki hanthot nopna ahi hi.

TU HUN CIANGA I NGAIHSUT DING

A tomin gen le'ng i pu i pate hun leh ngeina te beita hi. Amau thupi sakte zong a kimanna om nawnlo hi. Tuate Pasian biakna le leitung pilna in beisak ta hi. Tua bang hi napi mihingte ki thadah semsemin ki zawntat semsem mawk hi. Hih thadahna le zawntatna i zawh mateng ki khangto hathat lo zaw dingin i ngaihsun thei hi.

Paunak laibu sung ah;

"Ihmumu ke'n la, om mawkmawk ke'n,
sabengpa kiang panin asuahtak nadingin sakhi a tai'bangin; thangawk vasa a kitomtom bangin na suahtak na dingin hanciam in. Thadahpa aw, miksite kiangah pai inla, amau nuntakzia va en in. A maute in a uk ding leh a maikaih ding kuamah nei lo napi-in khuakhal sungin a nek ding uh, tuk hun sungin kai khawm khol uh hi. Thadahpa aw, bangtan vei lumlum dinga, cikciangin thokhia ding na hiam? Tawmkhat sung mengme lai ning, tawmkhat sung ihmu lai ning na cih kikalin, zawnna leh cihmawhna in, migilo gutate bangin a hong susia dinghi. Miginalo, a gilopa, zuau thu genin vak kawikawi a, nang hong khemnop manin, a mitheek hong pia in, a khe tawh hong khoih in, a khut tawh a hong khoih hi." Paunak 6:4-13

Hih lai siangtho hong thuhilhna tawh i gennop dang a omlaite khin ziau ni.

THU MUH ZAWH LOHNA

Thuhoih muh zawhloh nain supna tampi hong pia hi. Ka Pu ka Pa Khua satsa, ka lamkiatna nusia kei ning ci-a phattuamna a hong pia lopi i khua mah a, i belh tentan pen supna lian mahmah ahi hi. A thudang gen nai kei ni. Tui sik mahmah nangawn a kikham lohna ah belh tentan i hih manin siangtho zolo, i ci damlo ahih manin kisisi-a, mihing mahmah kipung zolo hi. A hing laisunte khakhamvei-in a ha peuh tok hemhamin, khangnopi teek suahin a meel ngaihbang hetlo hi.

Tua ahih ciangin inn 400/500 apha khuate bang inn 100/200 bangin gamthak zongin khua khat sat le uh amau nuntakna lah nop pah dingin a nusiat uh khuate in zong tuisik singkang khamtuam pah ding uh hi. Bang dinga tuciang dong meidawi lailai i hi hiam? Midangte khapi tung le aksipi tung nangawn ah pai ngam uh hi.

MiHing A KiKhai Tuam Ding OM

Mi khempeuh kikim theilo hi. Sangkah khempeuh in pilna saang simkim zolo hi. Galkap tum khempeuh bu suak theilo hi. Laithei khempeuh uLian suak kimlo hi. Sum bawl khempeuh haukhin lo hi. Tua ahih manin nang siamna le kivakna theihtel kul kha ding hi. A kikhaituam zo dinga aki muangmawh khat in leiba lian mahmah in pilna saang sin henla, a theihna a siamna bangin na hong sem pah leh hoih ding hi. Tua bang mite el'bawlbawl, ko'bawlbawl se lo in, amau hong lamlahna bang mang pahpah thei le'ng kikhangto thei baih pen dingin ka um hi. E'n lah bangmahpi thei sam hetlo hi napi a theizaw khat el'bawl tha pai a, makai cing thei ding khat suksiat zawh ding bekbek lungsim i neih lai teng ki khangto zo mahmah lo ding hi. Mihing a ki khaituam ding khat Pasian piak hi a, Simmi hi taleh, Zomi, Thahdo, Thahthang,khat vei lai-a mi simmawh daipamta khat hi tase leh mipil, mitei, mikhai tuam khat a hong hih nakleh pahtawi ding ahi hi. Laisinna pen a saangpi a tungzo dinga pilna le neihsa in acitzawh khol kei leh i zat khop ding i theih ciangin khawl khiana kivak zawh na'ng na sep khat sep pah ding hoihzaw ding hi. Nuntakna pen laibek ah om loin i khut sungah om zaw hi. Lungsim le khut le khe a zang theite ki vakzo hamtang hi.

Isreal gama lokhawhzia a vasin officer khat thu ka va dotdot leh, " Isreal gamah lokho liana ki ngaihsun khat in acre 2 ciang kho zo uh hi. Isreal gamah mizawng om loin hau kim tek mai uh hi. Mi khatin ni khatin nai 12 atawm penin na sem uh hi. A tampen pi 100 patle bang bek sungah khaici ciing uh hi. Ni salua mahmah ahih manin puanpa kisilh thei lova, puansah neunau tawh na ki sem hi. Plastic sah mahmahte zangin innlam uha, tua sungah khaici mehthuk, manta, ankam namkim leh lenggah cing uh hi. Agah hoih thei mahmah a, a zawl petpat, a gek geihgaih cih bang omlo ahih manin gamdangte in leiuh ahih manin hau thei mahmah uh hi. Ei'gam ah bel a mau zuun zawh bangin gamdang a zuak khiat zawhzah dong dingin piangzo lo ding hi. Ahi zongin ei'gama i zuak ding le i nek ding piangsak zo leeng hauhna piang thei veve ding hi", hong ci hi. Hih thu pen maansa mahmah ing. I Kawlgam pen bangzahta in sa i cih hangin Isreal gam tawh kinak khaih mahmah lai hi. Nasem thei khempeuh vakthap loin nasem ciat le'ng noptak in ki nungtazo ding hi. Zawn sangin hauh mah nop zaw a, anlim nek mah nop zaw hi. Nikten puansilh hoih mah silh zoin, innnuam mah nei zo le'ng i lungkim mahmah dinghi. Hih banga a pian theih na ding i khut sungah om hi, cileng kikhial lo ding hi.

A MUN ZUI-A KHUA MUHDING KISAM

I Gam i lei ah bangzah ta-a i hanciam hangin mi khempeuh nopsa khin zolo ding hi. Tua ahih ciangin tawldam theih zawdeuhna mun, luzang vanpuak lohna mun, mawtaw tun'na, gunkuang tenbaw tun'na gunpi gei, vanleng meileng tun'na munte i belhtheih mateng i tawldam ngeilo dinghi. Lokhawh singpuakna ah, mihing khat tha sanga azah 100 bang a hatzaw set tha ( Machinery Implementation ) loin kihau zolo hi. I zawn hangin tumh peuh leng hih sette aki neihzawh nang thu om hi. Kum tampipi khit cianga a kine thei pan singgah kungte i hah suan mahmah hangin i suan kum leh a gah i ngah mateng kum tampi sung ki puksih lawh dektak hi. Tua sangin kha 3, kha 6 sunga sum suak thei, kum khat a 2 vei bang akila thei khaicite ciing leng kinopsa baih penpen ding hi. Khangluite in, " Sakhi thatlo ngaltang tum" a cih banga i hih zawhloh pi ding i hanciam kankan hangin a mual suah zo ding mi baihlo hi.

Tu ciangin ei mite zong i muhna hong khangto mahmah a, sum zong dingin gam tuamtuamah kileng khia tek hi. Passport bawlna ding cih mah, Agent te piak ding cihmah dangka a tulza tampipi leitawi ngam in kihanciam thei mahmah hi. Hih pen hanciamna hoih mahmah khat hi a, lungdam huai mahmah hi. Ahi zongin gam dang-a na a vasepte uh a tunga i gente vive mah na hi lel mawka, ei zong ei gam mahah sem pah leng a piang thei hilo ahi hiam? Pawlkhatte a tuahphat mahmah hangin, pawlkhat in khemna tuak in, nasep ngah zolo, kimat kihen peuh tuak in, hum zut sa-in silo beka a hong ciah kik tampi tak mah om leng ki lawm hi.

Tua hi a, khut tawh lokhawh hun hi nawnlo settha tawh, luzanga vanpuak hun hinawn loin mawtaw tha tawh, i khawhsa luzanga va pua a va zuak kaawikaawi hun hi nawn loin, i inn zangah hong ki lei hun hi ta hi. Hih bang teng i septheih na ding pilna pen, ganan tuat theih na dingin, agawm, adawh khiat leh akhansakna thei leng ki cingta hi. Luplup, vakvak hun hilo, sep pah hun hita hi, cih i mite a ding ka deihsakna lianlua ahih manin ka ngaihsut theih tawpna tawh kong hanthawn hi. I Khawhsa khamzo phot leng, tua banah khantohna a tuamtuamin hong zui thei pan bek ding hi.

Source ; Gamngai 2000 jubilee magazine.



Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Ei Zomite Khantoh hun mahmah ta. Gelh - Rev. Dr. Go Za Kham Description: Rating: 5 Reviewed By: Cinpu Zomi
Scroll to Top