728x90 AdSpace

Hot
Menu
Zon-ol na Donate

Latest News

GAMDANG TUNG I MIPIHTE LEH INN LAMTE. Gelh - Rev. Thang Khawm Pau (Tedim)

1973 kumin ka pa (J. Gin Za Twang) in ‘Zomi Innkuan Laibu’ cih khat gelhkhia hi. Tua sungah Zomite pianna, I ngeina, le galpi nihna ma le khit , Mangkang kumpi hong uk ma le khit le Tedim gam, gamgi hong bawlsaknate kihel hi. Tu hun ciangin tua laibu pen khua tuamtuamte’ gamgi vai le thudang buaina tawh kisai etkaak nop a om ciangin, nakpi in a ki-en mahmah laibu khat a hihi. Tua sungah ‘ Piantit Paina” cih laimai 44 sungah na gelh hi.


Tedim panin a paikhiat ni uh pen May 27, 1917 kum ahi uh hi. Gal sunga, inn le lo siate hah dinguh ahih manun Labour Corp kici uh hi. Leitung gam tuamtuam pan kikaikhawm hi uh a, mi 50,000 val pah uh hi. March kha 1918 kumin Captain E.O. Fowler makai in England Kumpipa King George V in Zomite mu nuam ngiat ahih manin, mi sawm vahawh pih hi. March 27 ni-in giahphual tungkik uh hi.

1917-18 sungin mi 21 bang si a, tuate galpi masa han-ah hoihtakin kivui uh hi. Nidang lai-in gamdang pai ding kut zawh loh a hih hangin, tu hunciangin gamdang paiding kituh zolo hi. Eimi gamdang pai thei, Piantit gam nawkkha khangno na om uh ciangin, hih i mipih, i sanggamte’ omna han, en dingin, dai va hawh le uh cin, i theih loh hangin, a mau na nuamtuam pha mahmah kha ding uh hi, ci-in gelh hi.

Gamdang i tunna: 1917 kum i cih pen tu kum ciangciang kum za pha nai lo hi. A tunga i gen i pute’ thu tuamtuam hang le inn le lo, i mipihte, i khua i tui a ngaihna un, a uk mangte tungah ciahnopna lahna in nihvei bang nuak uh a, a sawt ciangin, hong ciahsak uh hih tuak hi.

Kamkhap zong tampi pia uh a, a hih hangin tuate in khaam zolo hi. Galven khit ciangin omsuak nuam phial uh hi leh zong, a utte omthei dingin ka um hi. Banghang hiam cih leh ei mite pen nasep hahkatin, zuau le ngian pen kisiam hetlo a, hong it mahmah dingin ka um hi.

Kawlgam in suahtakna i ngah ding ciangin eite hong it daan uh i pute hong gen hiathiat thei uh hi. I Lungsim puakzia, i gamtat luheek a hoihna hong muh uh om hiding in ka umpha mahmah hi.

Pasian’ naseem sangmangte (Tuiphum) Tedim ah Nov 1, 1910 kumin hong tunga, tua pan pawldang tuamtuamte zong damdamin hong tung uh hi. Hih sangmangte pawlkhat in eimite a gamvuah ciahpih a, a ta dingun a nei nuam bang zong om hi. Ahih hangin, nu le pate’n phallo-in, pawlkhat Pasian’ nasep ding sawmlo zong ki-om tuak ka sa hi.

1919-1921 dong Sia Vial Nang bang Mesopotamia ah mawtaw bawlin na om ek leuleu hi. 1948 –’50 ciangin Sia Hau Go in U.S pan M.R.E tawh hong ciah hi. 1960 kiim pan tuni ciang dong kumpi lam le Pasian’ thu lam gamdangah pilna kisinin, tampi mah i gamah ciahkikin, i mipih lak le i gamah ma i pantheih bangin kipang tek hi. Pawl khat gamdangah omsuak uh hi.

Ciahkik taleng ciahkik ta kei lehang, i omna peuhpeuh pan i Pasian mangngilh lo-a, Ama nasepna le i mipih i sapih, i gam adingin ma i pan naak leh hoih mahmah hi. Pasian in hong sapna a tuamtuam hilel a, cihtakna, i siam penna Amah i piak ding hilel hi. I gamin (Kawlgam) 1970 kiimin gamdang nak khak mahmah a, tua bang hun haksa mahmah le a lauhuai mahmah hun nangawnin Tedim mite pen i ommawk kei a, US le India gam khawngah hang takin i pai hi. Hih pen Pasian’ nasep hi kei leh i paikhia ngam kei kha ding hi.

2000 khitin Guam panin Zomi tampi tuipi gal khat i tung hi. Tampi zong a tung ding i omlai hi. Ei Zomi a tamzaw in gamdang i theihak luakha hi. Midangte US, England, Australia cihte ah tampi teeng khin uh hi. Tapidaw gamte pen ei teen theih nading gam hi zawlua mahmah hi. Ahih hang, pilna le khuamuhna lam pan eite kizekai pian hi a, ahih hangin tu in pianthakna le Pasian thu in i kha mit le i lungsim hong khangto sak mahmah ahih manin, Manglai/kam theilopi-in, tampi tak mah gamdang i tung hi. Sente, Koreate tampi tak mah Mangkam theilopi mahin om lel uh hi.

Gam dangah teengta i hih man: Atunga i gensa mah bangin mi tampi tak bang vanleeng tawh nai tampi sung i leng a, i thungetna i lungtupna gamdang hita hi. Nuntakzia ki-ukzia, anneek tuidawnna khempeuh kilamdang lua mahmah a, ngeina zong a tuamdangpi na hihi. Nasep i zon kul, sumlo-in bangmah hithei peuhmah lo phadiak hi. Sumin mannei lua mahmah hi. Anneek tuidawn haksa lo-in, vanman kiman mahmah zaw cile’ng kikhial loding hi. Sepna zahin thaman kingah hi. Pumpi damlohna tawh kisai kibawl kikepna pen tambei i cih sam hang, na khempeuh hoihzaw lua mahmah hi.

I teenna gamte omdanin i om theih ding, i zuih theih ding thupi dingin ka um hi. Atuunglamin haksa sakna tampi om thei ding h. Tu hun ciangin, leitung minam tuamtuam gam khempeuhah ki-omta ahih manin, i duhduh kingahta lel hi. Gatam zong tu hun teh kingah dingin um tamai ing. Banghang hiam cih leh US khawngah ei mite inn-le-huang tawh kiteeng ta ahih manin, a lei lah hoih tabuang a, kiciing ta dingin ka um hi. Ei a kumtam khinsa a, a tungte adingin Zo gawl pen beitheilo hi. Kawlte zong a ngapik duh uh a golsate kam’ thei peuhmah lo uh hi. Mangte zong ei lam ni sawt simsim hong taam khit uh ciang, amau bawl hamburger mah lunggulh mahmah uh hi. Khaileh! Gam dangah teengta i hihmanin, hih a nuai-a thute innlam a omte leh gamdang zuankhinte in ngahsut khop ding thupi ka sak pawl khat kikum ni.

A Pilna sinna:  
A golsate in, i tuntunna gamte’ pau or mangpau peuhmah pau theihloh phamawh hi. Mi gam tungta na hih manun, zum selo a, i sin ngam ding le ut-loh-theih-loh dingin i khantawna i zat ding ‘pau’ ahih manin hanciam ni. Na tate uh no sang siam zaw lua ding ahih manin, hong nuihsat-a tuaci pau ke’n, hi bang hizaw hi, hong cih uh ciangin, ‘Note hi ciang kong tut uh nuam un, hong tuaci simmawh kei un, peuh cihding hilozaw ding hi. Amau kihilh sakzaw hi.

I tonpih na tate leh hong suak thakte in ‘pilna’ a sin hamtang dinguh bel gen vet loh hi. Ahih hang, i kidop mahmah dingah, Christian sangte ah i kahsak zawh kei leh i tate tungah Pasian’ thu tawh i hilh, i pattah ding thupi mahmah hi. Kumpi sang (public school) te ah naupang nono in numei-pasal kikholhna a siangtho a, a koihna nakpi takin gen ding leh innkuan kipattahna ahi thunget khopna, kikholh khopnate i neih hamtang ding thupi mahmahin um ing. Nasep bekbek tawh i buai leh khahsuah khale’ng gam khangto gam i tunna a phattuamna omlo ding hi.

A diakdiakin nute in, a tate uh innah lai simpih uh a, innlai bawlpihin itna tawh nakpi in hilh uh hi. I tanote in hia lam lungsim hong neita ding uha, ei lah innlam ngeina, i Zo daan tawh i hih mawk leh hong kikhai lua ding hi. A nute uh tawh a kikhia lua tampi om ding hi hang. Tua ahih teh pate in nasep i cih luat a, i tate i khah luat khak leh dahhuai mahmah ding hi. Sum sangin itate thupizaw hi.

B. Nasepna: 
Ei mi a tamzaw pen engineer, doctor, nurse cih pian tamlo hanga, ansai lam pilna ihih theih hong suak hi. I gamah Japan an, Sen an cih peuhmah a huan ngei dellote, gamdang i tun ciangin tuate zuakna sai bang nei in, chief-cook bang i om khaphial hi. Ei huan ei bawl khawng lim kisa mahmah hi. Pawl khatin company ah i sem a, mi tampi tawh kithuah hi. Tua ahih manin maitai ding, hun maan ding, hopihna kamte pau thei hamtang ding, zuau lo a i pute i pate cihtaknate i zatkik ding a hihi. Lungsim siangtho nei inla, nasep hahkat in. Zuau gen cih pen a khangtote’ zat nuntak zia hi peuhmah lo hi, cih mangngilh ke’n.

Nipi khat sungin ni khat off theih nading a om leh, Nipi ni peuhmah ngah theih nading thunget huai mahmah ding hi. Pasian i biak ni ding mangngilh kei ni. Tua ciang hong tunpih pen i biak Pasian bekbek ahih manin, gam nuam i tunteh amah mangngilhna in i neih ding dahhuai penpen ding hi. Na nasepna peuhah Zomite kicianin thumaan uh hi, hong cih ding pen ut mahmah hang.

C. Biakna: 
Hih thupen a thupipen pen in i ngaihsut ding ka deih mahmah hi. Gamdangah pen Pasian cih peuhmah kithei loin, thupi zong kisa hetlo mai hi. Ei lam nangawnah khangthakte Pasian’ thu sangin leitung vai lamah kipai mahmah a, i gal lianpen in ‘zu’ a hihi. Gamdangah zu le siat theihna a tamlam gen kulin um ke’ng. Khangham khin piansa a, gamdang tung nu le pate pen biakna lo in lungkim zolo cih ka muh sa hi. Hih nangawn pen kikhop hun ding om theilo in, zankim dekdek peuhteh hun ngah pan hanga, kikhop kipat na’ng thungetna pan ihmut suah hong kipanin, thuhilh sung bang pen zak tawh zak loh tawh i thuahta hi. Nu le pate pen ahih leh ei mite lak bek nop i sa ding a,tua tawh i hun tampi bei in i tate kipuahphat hun (13-20) dingah Pasian’ thutawh i kipattah man loh ding, paammaih ka sa mahmah hi.

Tua hi a, i tate in ei lam daan le ei mite lakah kihel ding thupi mahmah a, a lang lamah Pasian’ thu in a neu lai mahun, a lungtang sunguh ah kituh leh hoih penpen ding hi. Kei hoihsak bangah Mang pawlpi hoih khatah i ki-ap theih ding thupi-in um ing. Tua pawlpi sungpan lawm-le-gual zonga, i tate a khanna uh Pasian’ thu-um, Pasian zahtakte lak mah hithei leh, mailam adingin hoih penin ka um hi. Gamdang i tun khitteh i kam in ciahkik ning kicici pongin, a tatakin ciahkik ding pen a sawmzo kuamah om lian theilo hi. A nule pate hun pen tam om nawn lo-in, a khangto ding I tunpih i tate vai ding tampi ngaihsut masak ding kisam hi. A neu tungun Pasian sungah hong khan’ kei-uh leh a gol uh ciangin Pasian’ thu um lo Tedim Zomi-Mangkangnote hong hiding uh hi.

Pu le pi, nulepate’ biak, a nungta Pasian tawh hong kigamla mahmah ding uh ahi hi. Amaute’ khang pan Pasian nusia leh, i thuphate taan baih lua lo ding i hi hiam? Ei mite tamna ah Nipi Sang nei mah le’ng i tate hong Mangsuah tading uh ahih manin, nuam hong sa zo dinguh ahi hiam? Pasian in a hoih penna hong makaih nadingin, thungetna tawh kalsuan in amah dong ni. Sente bangin i pau, i ngeina, i lai le i biak Pasian, Lai Siangtho tawh hoih tak a, a neutung uh pan pantah thei leng bel hoihpen dingin um ing. Hih nangawn pen a suakthak naupang
khempeuh hong utlo lai khading uh hi.

D.Naupangte hong gol uh ciang: Tedim Zomi Mangkangnote hong tangvalin hong nungak uh ciangin i tenna gam nuntakzia banga hong khangto ding uh ahihi. Mangkang pawl khatin Asiate deih mahmah thei uh hi. A pasal’ thu mangsa uh a, pawlkhat leuleu in Mangkang numeite sumzat zia thuak ngaplo uh hi. Ei ate’n zong Mang nungakte tawh hong kithei ding uh hi. Kei theihna ciangah Mikang pongpong uh a nuntakzia uhle a daan uh kibang ding kasak pen na kibang peuhmah lo uh hi.

Gamdang a khanglo nu le pate in, i lungsim i khiat theih mahmah hun a omkul ding ahihlam mangngilh kei ni. Mangkang pasal dik vanglakte in sawl mang mahmah ngeungeu uh a, ei lam numeite in peuh i zawhthawh bawl ngap ding pen i kidop ding zong ngaihsut huai hi. Amau lah hibuang, hi lobuang khat a, i tate hong om ding uh deih masa pen kha hetlo ding hihang. Vietnam gal khit a, US a tung Vietnam pawl khat’ innsung ka muh ciangin, lungkham mahmah uh a, amau le amau bang kingai napi uh in, Mangkang khangnote’ nuntak zia in gamta uh ahih manin, nulepa lungkhamna lianpi suak uh hi.

Ei ate zong tua bang hilo ding cih kigen theilo hi. Pilna le siamna a hoihtak a i ngah theihna gam le mun ahih mahbangin, i tanu i tapate in pila siamna hong nei uh henla, pianna gam le a mipihte uh hong etkik ding, innlam ngak a omte’ deihna ahihi. I tate in hanciam nopna nei-in, Mang lak Zo lakah zahtheih a, a om ding uh i thungetna hi hen.

E. Inn lam nuntak mangngilh loh ding:  Bangbang i ci zongin i gam in, gamdang kong bat nading uh mualmong et banglai hi. I khualam nuntak pen haksa mahmah a, a haksat dan kibang lo hi. Gamdangah sum pen singkung tung pan lawh ziau cih bang hi saamlo hi. Sepna zahin kingah a, sum in man nei lua ahih manin a kizang theisuak cih bek ahihi. Ei lamah zong tua bang hun hong tung ding cih i lamen hi. Inn lam pan zong sum vai khakna nuamtah ci-in email, phone peuh tawh i vaikhak den mawk leh haksatna a thei nu le pate nasep zawh laiteng bek hong hi dinga, tate hun ciangin, hong khak nuam nawnlo ding uh hi. Hong vei nawnlo ding cih a hihi. Ei lam daan a, sumneih ciang zato kahin kibawl ding cihbang ziau, hi theilo-in a maute kiangah cidam nading tawh kisai-in sum bang zah na kholkhin hiam cih kisit masa teekteek ahihlam theihpih ni.

Mangkangte in teek a, na a sepzawh nawnloh ding hun uh ciang a kisam ding sumpen a khangno lai panun, a khol tohtoh uh a hihi. Eimi a tung khempeuh zong tuabangin ahih uh akul a hihi. Inn, mawtaw aamahkhaan cihte peel lo-in koihkholh a kul a hihi. Na koihkhol kei lenga, bang lo khat i tuah leh haksa mahmah a hih manin, i pianna gamte’ gamtat luheek nuntakzia bang a zuih uh a kul ding ahihi. Inn lama omte’n, ngaihsut i siam ding thupi inteh!

Gamdangah anneek tam lua in thau ding kidah a, inn lamah, i nitak i zinghuan ding banghiam cih kithei lo hi. Ei lam aman tam penpente gamdangah tawm man mahmah hi. Gentehna-in aaksa cihte, eite’n i duhpen i genteh ‘Buhsih le aaksa’ cisam hihang. Sun tawntung lokho in, inn i tunteh aaksa tuihawp lehang bel a zanteh i tha hong dimkik taktak hi. Bawngnawi nisimin dawnzo le’ng kihat mahmah ding hi.

Lo pan i tun teh tuisa sungah nai khat bang lum hilhialin kidiah le’ng i thagui i thazangte malh hit-hetin i tawl dam mahmah ding hi. Hih teng pen gamdangah innkhat ahih naak leh a kingah hamphatna a hihi. Mei bel gen vet loh! Khuadam lumsak thei. Lumlua votsak thei! Hih zong sum hong huup mahmah thu khat hi. Na khua na tui vua mite, khangthakte in hong muh ding uh zong vaihawm zel un.

A pu a pi, a ni a gang ding cihte zong hong theih dinguh thupi mahmah ding hi. A tawpna-ah i khanzia i nung-et ciang, i nununna zah sang gamdang i tunzia manlang ka sa mahmah hi. Tua hi a, inn lam a omte’n ngaihsut siamin i tel theih ding leh gamdang a tungte’n zong i innkuanpihte leh i khua i tui, i pawlpite mangngilh loh ding thupi mahmah ding hi. Lai na ngah uhteh, na phun kei unla, innlam pan zong i nget ciang, pheng nget lo-in, thungetna masakin ngen ni. Sum pen a khakte in sawtvei pi a mang dingin i tuat a, a ngah lam pan lah hong bei baih lua mahmah zel hi.

Gamdangah thau in gik sa a, nasep hi in, ei lam gawng in guhtui kanga seem i hihi. Tha bei lua in, a nungciang bangbang a i kibawl hangin, i thadimzo nawnlo cih hizaw hi. Guai! tua a hih leh omdan siam tekin i kingaihsut diamdiam tek ding hanciam ni maw! I Zogam hong vil zel ve vua!!!!


Rev. Thang Khawm Pau (Tedim)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: GAMDANG TUNG I MIPIHTE LEH INN LAMTE. Gelh - Rev. Thang Khawm Pau (Tedim) Description: Rating: 5 Reviewed By: Cinpu Zomi
Scroll to Top