728x90 AdSpace

Hot
Menu
Zon-ol na Donate

Latest News

MALAYSIA GAM leh ZOMI TE

Malaysia gam in mikang te’ khutsungpan’ August 31, 1959 kum in gam suahtaakna a ngahhun akipat kumpi makaite’ veina, gam itna leh thumuhna tungtawn in gam leh mipih te a ding asepna hang un tuhun teh hih Malaysia gampen Asia gamsung ah gam khangto peh khat in ki ciamteh hi. 

Malaysia gammi ci a minam akithei zawdeuh khenpi thum om in; Malay minam, Sen minam [Chinise], leh Indian ci-in ki theizawdeuh hi. A gam in taangpi a kizangkampau pen Bahasa kici a,zumkong,mangkong pai naah hih Bahasa theilo in thu leh la vaan haksamahmah hi. Tualo pen mikangpau i theihnaakleh tawmkhat omdan nuamzawdeuh cih ding hi. 


Malaysia gam a minampi thum akicite pen Indonisia gam, Sen gam, Taiwan gam, leh India gam pan’ tuma kumtampi lai a, Malaysia gam alutte hiuh a, amau zong hunkhat lai peemtate mah na hiuh hi. Hih minampi thum te a hilo mipi inzong aphawkkhak loh leh a mau mahmah zong milak ah ki tamhel khollo in gamsung khamtunggam khawngmah ah teen leh khuasak nuamsa apupa ngeina mah azuilai minam khat omlai-in tua minamte pen Orang asli kici hi.  hih minam tepen Malaysia gam leitang neite hi a, Malaysia kumpi in zong adopmahmah leh a vaan mahmah minamte ahi uh hi.

Malaysia gampen leitung ah sathau (Palm Oil), Buangnaai (Rubber), leh Siik namkhat (Tin) tampi apiangpen gamkhat in ki teel a, 1980 pan 1990 kikaal sung Malaysia pen South East Asia gamteng lakpan a khangto pen in kiciamteh hi. 

Malaysia gampen khenpi nih in kithei a, Nisuahna lam Malaysia (East Malaysia), leh Nitumna lam Malaysia (West Malaysia) ci-in kiciamteh hi. Nisuahna lam Malaysia te pen Sabah, Sarawak kici a, nitumna lam a hihleh Pennisular Malaysia kici hi.  

Gam khantohna dungzui in gam tuamtuam pan’ minam tuamtuam te’n khualzin na leh sumzon na in kizuan ngeingai a hih man in minam kimna, ngeina kimna omna gamkhat ahihi. Gamkhantohna tawh kizui mah in siatna, khamtheih-guihtheih mahzong tampitakmah naom in migilo, guta cihte zong a diilpi mah in naom hi.  Sabah-Sarawak gamkhen lam ah ei Zomi ki ommello in, nasem silbawl a, a tampen i omna gamkhen a hih leh Pennisular Malaysia kici-in tua gamkhen ah ki omkim zaw hi.


MALAYSIA GAM AH I LUTZIA LEH NUNTAAK KHUASAKZIA

Zomi te a tamzaw i tenna Kawlgam/Zogam pan hi-in gamkumpi makaihzia, kiukzia hoihlohna hang leh gentheih, haksatna tuamtuam te hangin Zomi tampi-in sanggam u leh nau, it leh ngaih leh pianna Nu leh Pa nusia in, leitungbup phial ah i kitheh thaang a, tua lakpa’n hih Malaysia gam ah zong Zomi te a tampen dingin ki ummawh hi. Zogam pan gamdang tuntheih na ding lampi tuamtuam kizangin kipaiciat a, adiakdiak in hih Malaysia i luutzia pen kibanglo in lampi tuamtuam zang in kipai ciat hi.


MALAYSIA I LUUTZIA

Malaysia gam ah Zomite i luutzia pen pawlkhat leh pawlkhat kibanglo in, a taangpi in paizia namthum tawh Malaysia gam kiluut hi. Permit tawh a luut om in, Visit leh Leilam tawnin a luut cihbang in kiluut ngeingai hi.

Pawlkhatte work permit tawh paiuh hi. Hih work permit tawh apai te pen, Malaysia gam a luutphet in a pu dingte’n vanleengtual ah dawnuh a, nasep nading munah puaksuakpah uh hi. Gam khempeuh pan’ hih permit tawh a paite khempeuh zong a permit ngahdan kibangkimlo laihi. Pawlkhatte ansai (Restaurant), pawlkhatte innlamna (Construction), pawlkhatte Company cihbang in kikhen leuleu a, khat leh khat permit ngahdan kibangkimlo uh hi. 

Permit tawh a luutkhempeuh peh utbang leh deihbang in vaaktheulo uh hi. Apu (Boss)te’n laibu (passport) kepsak uh a, a nasepna mun ah ki bilh/kulh cip uh hi. Tua kawmkal ah nasepna lamet banglo, sum leh paai thalawhna lamet banglo, pu (boss) te thumaanlo cihbang haksatna tuamtuam tawh nasepna leh laibu(passport) nusia in ataikhia kitam mahmah  hi. Hih a taikhia khempeuh pen beem hikhin a hihman in Malaysia gam thunei kumpi te’n a ut hunhun in a muhmuh na ah hong manthei uh hi.

Pawlkhat te pen visit tawh paiuh a, hi visit tawh apai te zong khenkhat Malaysia direct in apai omin khenkhat te Singapore lam pa’n alut oma, khenkhat te pen Thai  pan a luut omhi. Pawlkhat te leuleu pen Korea pa’n hong luutkik zaw uhhi.  Malaysia direct a alut te’n thakhat(one mounth) visa ngah uh a, tha khat abei teh tha khat mah visa sotto thei uh hi. Tualo gamdang tawn a hongluut ta ahih leh visa ni 15 cih bangciang bek ngah uha, visa abei teh ki sotto theinawnlo in visa beima Kawlgam aciahkik lote pen beem in omuh hi. Beem i cihciangin khutnguak (khut sung ah Malaysia gamsung omtheihna phalna bangmah neilo)cihna hi. Tua ahih man in Malaysia gam thunei ulian te in a uthunhun in hong man thei uh hi.

Pawlkhat te leuleu pen leilam tawn in Malaysia hongluut uhhi. Hih leilam tawn a Malaysia hongluut te ahih leh lungkham a Malaysia hong luut cihding hi. A pai na uh lamkal ah thusia lasia haksatna tuakthei uh a, gamgi dung khawng ah utlohpen in mat leh hen tuakthei uh hi. Kawlgam pa’n a din khiat akipan Malaysia atun uh pen hun leh ni zong kibanglo leh puaisa (agent) zong kibanglo ahih manin khenkhat te ni 5 sung in tungthei uh a, khenkhat te leuleu pen ni 10 pa’n 15 sung bang sawtthei uh hi. Tua kawmkal ah khenkhat te mat leh hen tuakin, khenkhat te Malaysia tung loin a mangthangzong omthei uh hi. Hih leilam pa’n a paite zong pau leh haam theilo a hihman in koi mah vaakngam pakpak lo uh a, mat leh hen tuakkhaak ding kidopna in lungkhamna tawh kidim uh hi.


NUNTAAKZIA

Malaysia gam ah Zomi te mimalsim in numei naupang avekpi 15000 val bang kipha ta hi. Kawlgam muntuamtuam pan hongpai bek hiloin Zomi te Malaysia gampiang/suak bekbek zong a 100 a sim kiom ta hi. Hih 15000 bang apha Zomi pen Malaysia gamsung sep leh bawl, nuntaakzia kibangkimlo a, omna omdan zong kibang kimlo hi. A tamzaw ih taihkhan kisaap in Khuapi sung ah kiteengkimzaw hi. Pawlkhat te pen nasepna mun zuileh apu (boss) te’ gelna zui in omna khawlna ngah uh ahih man in apu te’ gelnana ah khuasa uh hi. 

Nasepna ah naseppih lawm leh gual te’ bawlsiat athuak khazong kiom a, Boss te’ bawlsiat athuak zong i om kawmkaal ah thaman ngahloin thaman piaknoploh man a, hawlkhiat athuak zong kitam simsim hi. Pawlkhat te leuleu pen gamsung muntuamtuam ah buuk lamin ateengzong kiom hi. Hih gamsunga buuklam in a teengte pen kumpi thunei te’n buluh theizel uh ahih manin zan alup uhciang in zanthapaai duty tu ding kiseh cihbang in khuasa uh a, natl eh at zong tammahmah ahih amn in omdan nuntaak khuasak zia haksa mahmah in, NGO tuamyuam te’ huhna tawh a khuasa zong tampitak kiom hi.  Khuasung zong phapakpak zolo uh hi. Hih taihkhan sapin aom tepen a tamzaw cithei zawdeuh te, muntuamtuam pan huhna anei te leh zi leh ta tawh aom te hizaw deuh uh hi. 

Zomi pawlkhat leulau te’n khuapi sungah ansai khawng neizo uh a, pawlkhat te leuleu pen cimawh in omnading neilo in aomzong kiom veve hi. Malaysia kumpi’n a gamsung ah phalnatawh aomlo naupang hita leh a kuakua cih omlo in pilna sangkah phallo ahih man in, Innkuan tawh aom naupang anei te’n a tate uh minam kipawlna (community) gambeel (refugee) sangte ah lai/pilna sinsak uh hi. Naupang khenkhat te ahih leh lai/pilna sinna ding lemlo ahih man in innsung ah omcip uha, koi mah vakkhiathei khollo uh hi.

Zomi atamzaw beem vive ahih dungzui-in, omna ah suakta takin om theilo a,nasepzong munkhatbek ah nuamtak in semsuak theilo zong tampitak kiom in, pawlkhat te’n innlam sum athaak zawh mahbangin, pawlkhat te leuleu amah leh amah zong ki khuapha zolo cihbang zong Zomi sung ah ki tam mahmah hi. Zomi  pawlkhat te leuleu nasep neilo, tanau zi/pasal te huhna tawh bangmah semlo in gambel hihna dungzui-in a pum omcip zong kitam veve hi. 

Malaysia ah NGO te’ nasepna leh Christian te nasepna dungzui-in gambeel mitampi tak in noptuampih mahmah uh a, tua lak ah ei Zomi tampitak zong kihel hi. Hih beem vive lak pan in UNHCR te’n register apiak a tamzaw hibilbel ahih man in, omdan khawldan tawmkhat ki lungmuang zawdeuh, kisuakta zawdeuh cih ding hi bilbel hi. Khuasung khawng avak uh ciang in guta buluh khawngtawh kituakthei zel a, neisunsun teng laksak magzel uh hi. Pawlkhat te pen vuakthuak ngawp in zato kitun cihzahdong bang om thei hi. Malaysia gam ah Zomi te’n a tuaktheih zel pen guta buluh bek hilo in pute a kici gamnei/kem palik (police) te zong lauhpi khatmah a hihi.

Mat leh hen a tuakkha te thuakdan leh suahtaakdan zong kibanglo in pawlkhat te tha 6 kiim bang leh ciingsat angah a ommahbang in pawlkhatte thong tung selo in tha 3, pawlkhat te tha khat cihbang in thuakdan zong kibanglo hi. Pawlkhat te leuleu pen Palik te’n a matna munpa’n sumtawh kitan sak uh hi. Ki tatdanzong kibang kimlo in pawlkhatte pen RM40, RM50, RM500, RM1000 tawh athu, ahun leh amun dungzui in sum leh paai tawh kitanh thei uh hi. 

Thongkia khenkhat te pen ngamngi kipuak in, ngamngi pan sum 2000 val khawngtawh kitanh kik a Malaysia luutkik a ommah bang in pawlkhat leuleu pen UNHCR in a lakkhiat zong pawlkhat om uhhi.  Hih ngamngi kipuak te dinmunpen a cikzet huai mahmah thu tampi om hi. Malaysia kumpi thunei te’n Thai ngamngi apuak uh ciang in puaisa (agent) te khutsung ah atamzaw tung uh a, innlam hitaleh Malaysia gamsung tanau meltheih lawm leh gual te’n sumtawh atat/alei zawh pahkei leh puaisa(agent) ten vuak cihtakin vuathei uh a, mundang, midang kiang ah sal dingin hong zuakthei uh ahihman in mat leh hen tuahkhak ding laupi pen in kinei hi. Hih bang in gentheih haksat, mat leh hen thuak Zomi sungah lungsim kiukzolo in lungkia gawp uh a, a hai lawh Zomi tampi kiomta hi.


Zomi te’n Malaysia gam ah i tunzia kibanglo, nuntaak khuasak danzong khat leh khat kibanglo himah taseleh lauhuai haksa nuntaak haksa kisamahmah a, pawlkhat te’n nuntaakna a beilawh uh hangin Kawlgam/Zogam nusia in Malaysia atung khempeuh atamzaw in UNHCR te a lunggulhna hang in kitung a, UNHCR te’ hungelna leh panpihna dungzui-in a tamzaw kikhuasa ahihman in, haksa in lau huaina tammah taseleh Kawlgam a nuntak sang in nuamsazaw uhhi. 

Malaysia ah UNHCR te’n register apiak/angah mikhat pen kum nih sungin UNHCR te’ vaihawm siamna tawh gamthumna kitungthei ahih man in Zomi atamzaw in Malaysia gam ah i tuak leh i thuak thute ki theihlohbawl/kimanggilhbawl zah dongin a omuh hizaw a, hih Malaysia pa’n gamnuamzaw tuntheihnading in hanciamna hizaw ahihman in Malaysia gam aomsung un thuhaksapi tampi tak a kiphuutkhak hang’ Malaysia pa’n atunnading gamte mitsuan in/nhak in neiuh ahihman in sum leh paai nasep silbawl te leh thudangdang te ah haksatna tampi aom hangin, Malaysia ah tawmvei aom honsungteng pen atamzaw in Malaysia a ompen nuamsazaw uh hi.

Source ; http://phunom.wordpress.com/2010/08/13/malaysia-gam-leh-zomi-te/

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: MALAYSIA GAM leh ZOMI TE Description: Rating: 5 Reviewed By: Cinpu Zomi
Scroll to Top