728x90 AdSpace

Hot
Menu
Zon-ol na Donate

Latest News

STEPHEN VOCAL BAND TE THU (TOMNO)


1. “Stephen Vocal Band” hong piankhiatna thu nong gen thei uh diam?

Stephen Vocal Band hong kipat khiatna Stephen Mang in hi bang in gen hi.

Zeisu Gumpa leh Honpa a kasan kum 1992 khit ciangin Laisiangtho sang kah ding lunggulhna ka nei hi. Kum 1996 – 1999 ciangdong FBBC (Faith Baptist Bible College, Tedim) ah Laisiangtho sang kakah hi. Kum 2001 ciangin Yangon ah graduation dingin ka pai suk hi. Tuapan in EBC (Evangelical Baptist Church, Yangon) ah la makai semin tuni dong ka om hi. Yangon ka tun a kipanin ka thungetna ah ‘Topa aw Nasepna – Ministry khat hong pia in’ ci-in thu ka ngen ziau pong hi. Thungen to to in 2003 – 2004 sung teng FBTS (Faith Baptist Theological Seminary, Yangon) ah M. Div ka zom leuleu hi.
TEDIM
Laphuak : Joseph Mung + Stephen Mang
Lasa : Stephen Vocal Band



Tua kipanin thungetna kiciansak focus deuh nei-in, specific prayer sak ding cih ka ngaihsun hi. Thu nakpi takin ngenin Music Ministry khat hong pia in ci-in thu ka ngen leuleu hi. Pasian in thupha hongpia takpi-in Kum 2007 in Maranatha Music Ministry ka na phuan khia hi.

Tua Ministry a makaih diak ding (Lead Singers) dingin May 5, 2007 (Saturday) ni-in Stephen Vocal Band ka na phuan khia uh hi. Mi li ka pha uh-a, 1. Stephen Gin Lal Mang (Stephen Mang) 2. Pau Sian Lam Cin (Henry Cinpi)  3. Khen Sawm Tuang (Tuatuang) leh  4. Thawng En Thang (Thangpi) hi teng ka hi uh hi. Lawm Thangpi vai tuamtuam hang tawh hun ngah ding hamsa sa ahimanin sawt ka kikhawl man kei uh hi. A ma munah Vungh Tul Suan (Suanpu) ka la uh hi. Hih in Stephen Vocal Band hong piankhiatna ahi hi.

2. Na Khua uh leh na pa min tek uh nong gen thei uh diam?

Stephen Gin Lal Mang (Stephen Mang)Pa min – Ngai Za ThangKhua – Pangmual, Tonzang Tsp., Northern Chin State.Tu in Yangon ah teeng ingh.

Pau Sian Lam Cin (Henry Cinpi)Pa min – Ngul Khen ThangKhua  – Tahan,  Kalay Myo, Sagaing DivisionTu in Yangon ah teeng ingh.

Khen Sawm Tuang (Tuatuang)Pa min – Rev. Sian Za LalKhua  – Tedim Myo, Chin StateTu in Yangon ah teeng ingh.

Vungh Tul Suan (Suanpu)Pa min – Dongh Cin LianKhua – Thalmual, Tedim Myo, Chin State.Tu in Irrawady Division ah Evangelist dingin kuan khia hi.

3. Na Education Background uh ee nong gen thei uh diam?

Stephen Vocal Band, Laisiangtho lamah ka vekpi un M.Div ciang zo kim ungh. Secular lamah Tan 10 zo khin vive hi bilbel ungh. College lam bel Laisiangtho sang lamah a zom to suak tek hi zaw ungh cih ding hi.

4. SVB mintawh CD, VCD bangzah bawl khin, tualo CD,VCD tuamtuam te ah no la dawng bangzah sa khin?

Stephen Vocal Band mintawh Audio CD nih release ta ungh. 2008 Kum in  ‘Zeisu Kei A’ cih leh 2009 kumin ‘Aman Hong Kha – Hymn Series’ cih te ka hawmkhia khin uh hi. Audio CD leh Video CD tuamtuam Series 5 ( nga ) ah lasa in ka kihel khin uh hi.

5. Na late uh a vek in no mau phuah mah maw?

Ka late uh a tamzaw English la, a diakin Southern Gospel Music te pan ka tei (rendered) sawn uh hi. Pawl khat ko phuah (own tune) zong om mah hi. Sia Lalpu (Zogam) in ko sak ding la pawlkhat hong phuahsak khin-a, pawlkhat zong hong teisak khin lai hi.

6. Pasian leh Zomi  ading  a beisa leh tu laitak a nasep te uh nong gen thei uh diam?

A beisa ah a hi theitan in lasakna tawh pawlpi tuamtuam ah ki hel kawikawi ungh. Biakna tawh kisai, mopawi cihte ah lasakna tawh thasial hetlo in hanciam theih zah hanciam in ki hel ungh.

Minam (Zomi) a dingin abeisa hun in ‘Gam Itna La’ sa in minam tawh kisai function tuamtuam ah lasakna tawh a hihthei tan in va kihel den ungh. Minam  vei-in, khual in, minam min tawh hih ding te thasial hetlo in sem ding cih ka thupi khat uh zong a hi hi. Mailam ah i minam bupin ki pumkhat liailiai-a, ma pankhawm theih ding cih te lunggulh mahmah ungh.

7. Nung aa UK na pai uh pen Mangkang( English ) te hong sap ci leeng pawlpi bangzah ah la va sa thei na hi vua?

UK ka paina uah pawlpi sagih ah lasakna, teci panna cih te va nei thei ungh. Tualo fellowship tuamtuam tawh a kigawm in service 15 vei bang va nei thei ungh. UK a om ZI-UK (Zomi Innkuan – UK) te tawh zong Biakpiak kikhopna nitak khat nei khawm thei ungh, mipih sapih te tawh kikhawl in zan sawt zong phawk lo in zingsang lam nai 3 ciang kikhen thei pan ungh.

8. UK mun tuamtuam leh London na paina uh tawm nong gen thei uh diam?

  Anopna a thupina cih te ee…

UK ka taam sung un mun thupi tuamtuam va hawh (visit) ungh. Mi pawl khat a dingin lamdang hetkei mah leh ko a dingin na khempeuh a thak hi mawk in nuam sa mahmah hi ungh.

Cambridge University sung cih bang, King’s College Chapel Hall sung cih khawng, Westminster Campus cih te Westminster Chapel cihte, Buckingham palace, Big Ben, Tower Bridge, London Eye, Lake District cih khawng, Manchester United Stadium (Old Trafford ) cih bang leh mun tuamtuam, Museum tuamtuam zong pai ungh. Tua teh Lowestoft Sea beach ah Air Festival ci-in tuipi tungah British vanleeng kimawl va en ungh. Mun khempeuh thupi thei mahmah in, muhnop thei mahmah hi. Pasian hoihna phatphat mai ungh.

9. Mailam ah Pasian leh Minam (Zomi) a ding sep ding ngimna, tupna na neih te uh nong gen thei uh diam?

Mailam ah Pasian phatnala kasakna tungtawn pan un Pasian a thei nailo, Zeisu a nei nailo te’n Zeisu gumpa le honpa-a a san theih na ding, khalam tha neem khat a hatkik na ding, kha sung a picing sate a thalawp semsem na ding cih te ka lunggulh pipen uh ahi hi. Tua in Pasian na kasep theih uh om sun hi dingin ka ngaih sun uh-a, mihing nuntakna sungah Pasian hong deihna bulpi pen hi dingin zong ka um uh hi.

Tuaban ah, mailam ah minam (Zomi) a dingin ko hihtheih ahi ‘Gam Itna La’ kasakna uh hangin mun tuamtuam, gamsung gampua-a om Zomi pih te’n Nam Itna, Pau le Ham ngaihnatna, minam veina, khualnate khahsuah lo in na nei tinten-in, la tungtawn in i minam bup ki pumkhat thei in, ma pang khawm thei leeng cih ka lunggulh mahmah uh hi. Zong tua in i minam sungah I kisap pipen khat hi ci-in ka mu uh hi. Ih Christianity leh Politics tonkhawm den hi ci-in ka ngaihsun uh-a, Moses – Pasian in Ama’ na sem ding leh a minam teelte makaih dingin a tel ahi hi.(Pasian nasem, makai pawlkhat te’n Minam vei hetlo thei mawk uh hi).

10. Mun tuamtuam ah a om Zomi pihte kiangah gennop na nei uh hiam?

Mun tuamtuam a om Zomite tungah gennop tampi ka neihte lak ah tawm hong gen ning:

A tung a ka gen mah bangin, minam lungsim pua tinten in, pau le ham thupi sak in, i tate, tute khangah i zopau mah tawh i tate, tute i pausak setset ding tua mahmah thupi sa ingh. Tua in minam khat hihna pau le ham kician nei, ngeina (culture) nei i hihna hong pulak hi.

Ph.D thuap 10 i ngah phial zongin i pau i ham i thupi sak kei leh mi mang- thang, nam mangthang hi veve ding hi hang. Sen (Chinese)te gamdang ah a teeng te a minam mah uh thupi sak in, China town bang ci pah in, teeng khawm liiliai in a maupau mah in pau in kiho pah ciatciat uh hi. Tua in minam lian, minam kician hihna ki langsak mahmah hi. Tu in ei Zomite Gamdang a i om sawt nai hetlo kha ding hi. A sawt a tom kisai lo in i tate, tute eipau i hilh ding, eipau i siam sak ding i tavuan (mawhpuak) lian penpen te lak a khat hi ci-in ka mu hi.

I pau hilh ni, I ngeina hoihte hilh ni, Pasian thu hilh ni…

▪   Pil semsem, Minam It semsem
▪   Hau semsem, Minam zuun semsem
▪   Lian semsem, Minam huai semsem
▪   Siam semsem, Minam angtang semsem
▪   Minthang semsem, Minam pahtawi semsem
▪   Gamla om semsem, Minam tawh kinai semsem
Minam vei man a gen khelh a om leh ki maisak ni.

11. Stephen Vocal Band tawh hong ki zom nuam om leh na address uh leh contact nong gen thei uh diam?

SVB tawh kizom nuam, hong hopih nuam, la tawh kisai, minam  vai tawh kisai cih te dotnop tuamtuam khempeuh ki dong thei hi cih hong pulak masa ungh. A thupi pen khat a hi Band sungah mi nih tangval lai hi ungh ei ngaihsun khawm dih ni nungakte …hehe…(for ladies)…

Contact Information:
Stephen Vocal Band
# 84, 5(A) Middle Block49th Street,
Pazuntaung Tsp.
Yangon, Myanmar.e-mail:

Source ; http://stephenvocalband.com/ .


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: STEPHEN VOCAL BAND TE THU (TOMNO) Description: Rating: 5 Reviewed By: Cinpu Zomi
Scroll to Top