728x90 AdSpace

Hot
Menu
Zon-ol na Donate

Latest News

ZO MINAM NI PIANNA LEH NGAIHSUT HUAI THUPITE, Thupulak khia: C.Thang Za Tuan, M.A; Ph.D.


 

KUM 66 CIN ZO MINAM NI BAWLNA AH THU PULAKNA
Tedim Baptist Church, Yangon. February 16, 2014

Thulu:              ZO  MINAM  NI  PIANNA LEH  NGAIHSUT  HUAI    THUPITE
LST: 1 Peter 2:9-10  “Note pen Pasian in ama nasepna a lamdangte  a genkhia dingin hong teel minam leh Ama hehpihna   angah nahi uhi.”
            Johan 8:31 “Tua ciangin thuman na thei ding uh a,  tua thuman in note hong suaktasak ding hi.”                
A.   I  Zomi Nam Ni a Thupitna leh Kumsim in i bawlna ahang.
·         Zo Minam Ni cih I omna ciatah agamgam ah Zomite in kibawl hi. Banghang: Minam thupi khat ihihna kepna leh kilatsakna hi. Zomi buppi suahtak ni, Zogam ki-ukna akikheelna leh Zomi bup in Democracy ki-ukna tawh ikalsuan na ciaptehna ni hi.
·          Kawlgam sungah Zogam leh Zominam  cih pen kilangh takin om hi cih thu akip semsem nading in kumsim kumsim in pholak khia in pahtawina zong ahi hi.
·         Banghang in Zomi Nam Ni ci-in tangko khia in pahtawi ihihiam cih leh Zominam icih in Kawlgam tangthu ah a minthang minam ahihna, Zominam te in gam leh leitang a neihna, Zominam te ii Zongeina, Zolai, Zopau, Zola, Zodan… cih a tuam vilvel in a neite ihihna hang ahi hi.
·         Hih thubulpite zui in ZOMI NAM NI  pen a bawlhuai, a bawltak  Zomi bup ii Ni Thupi Ni ahi hi.
·       Pasian hoihna leh hong huaina a lamdangte agenkhia ding in hong sawlte zong ihi hi.

B.   Zomi Nam Ni a pianna thu atom in pulakkikna:
·         Hih banga  a lamdang, a manpha Zominam ni pen pian ngeina banga apiangziau hilo hi.  Zominam bup in kum tampi sung nuntakna neih le lam suukkhia piakhia in a hanciamna uh tawh a piangkhia Ni thupi ni hi.
·         Zomite nidang pek a kipan in ei Tulpi, Hausa leh makai ciat-in hong makaih in ki-uk. Thawmte       khang hun, Guite khang hun om kici in, Sukte khanghun I theician hi.. A nunung Sukte hun 1810 kiim akipan in Ukpipa ci-in hong uk in      1948 kum dong hi.
·         1886 January 1 in Kawlte teenna gam bup Gamkek Mikangte in hong uk in ei Thahdo, Zomi minam khat kimlai Kuki leh Chin in  I veengte hong lawhna tawh hong lo uh hi. Zogam zong 1889 kum in Tedim hong la in 1896 August 13 ni a kipan in Chin Hills Regulations Act tawh hong uk zawh Zogam pen Kawlgam uksung ah  hong kiguang kha mikmek hi. Tuama in ei kuama ukna sungah om khalo hihang. Zogam ukding in Ukpite ukna (Feudal chiefs) hong guan beh in, amau sehte in khua hausa sem in siahtung siahphei, saliang tangseu , tuktha, khaltha, kaisak suak uh hi. Hausate tung ah Ukpi, tua tung ah Vuandok, Mangpi leh Menzi koih uh hi.
·         1948 January 4 ni in Kawlgam ah suahtakna akingah ciangin 1947 Constitution zang in       Parliamentary Democracy tawh gam ukna kipan hi.  Tua Constitution Khenpi 5, aneu 196, 197, 198 ah Zogam zong Chin Affairs Council tawh ki-uk dingin Frontier Areas Enquiry Commission (U Vomthu Maung, Chin Minister; U Thein Maung, Menzi leh U Soe Win, Education Officer)te in  February 3, 1948 pan in Tedim, Falam, Khalkha ah thu hong dot ban ah mipi tul nga (5000) val  in Falam khuapi ah 19- 21.2.1948 ni in kikhopna ah Democracy tawh kiteel Councilte ukna dan zangin Zogam ukpite  ukna laih ding kithukim hi.
·         Tua bangin akilaih pah lian nading in tualai in Politics ah amakaipi in thusaupi muhkholhna (Vision) anei Pu Vomthu Maung (Thang Pet Maung), Mindat leh Pu Captain Mang Tung Nung, Pu Thang Khaw Kai te’(KSVP) madawkin a makaihna uh hang hi.
·         Tua mipi kikhopna ah Zogam leh Zomite in Feudal ki-ukna nelhsiah in Kawlgam bup ki-ukna Parliamentary paizia tawh ki-uk nading in Subedar Thang Za Kai, (Tuithang) in thusung in Pa Hang Bung Thang (Kanpalet) leh Pa Con Mang (Laizo) in lungkimpih na tawh mipi thukimna kila hi. Mi 17 bek in kankuat ahihman in kikipsakna hangin Zogam ki-ukna kikheel ahi hi. Hih Falam ah mipi kikhopna ah  Kawlgam President masa pen Soa Shwe Taik  zong in hong uap hi. Ukpite a suploh nading in Kumpi in Compensation apiak ding zong kivaihawm pih in Ks. 500,000 ngah uh hi.
·          1950 kum October 9 ni in Chin Affairs Council in tua February 20 ni pen Zo Minam Ni (Chin National Day) ci-in kumsim in bawl ding in khensat uh hi.
·         Tua Zo Minam Ni pen Kawlgam ah suahtakna leh ki-ukna thak tawh kizawitawn a ukna dan kikheel ni hi in Ukpite guallelhna hituan zenzen lo hi. Nautangte ading in ahihleh saliang tangseu, siahtung siah phei piak beina hi in hamphatna leh suahtaak tatakna, hakkol zan Ni hi. Kawlgam bup mahbangin Democracy tawh ki-ukna dan in a kilaihna Ni hi. Khang kilamdan Ni hi. A lakdan, muhdan leh a sandan i siamciat ding tudong mahin ikisam thei hi. Mikim in lawptak in kipahhuai Ni leh a san siam ding hi.
·         Kuamah ii gualzawh ni, gualleh ni hi zenzen lo-in ukna paizia Kawlgam bup ah akikheelna hang hi cih theih mahmah ding hi.
C.    Zo Minam Ni  Bawlziate
·         1951 February 20 ni in Mindat khuapi ah ei Zo Vuangyi (Chin Minister) masabel U Vomthu Maung makai in amasabel Zo Minam Ni (Chin National Day)  kibawlna ah Prime Minister U Nu leh adang State Minister te kihel hi. President Sao Shwe Thaik ii Good-will Message (Deihsak Thupuak- Thawunlwa) zong Prime Minister pa tektek in sim khia hi.
·         Tua akipan in Zomite in kumsim in Zogam Khuapite ah leh Zomite om nana ah nasia takin Zo Minam Ni (Chin National Day) kibawl den hi. 1956 kum in Chin Minister hangin December kha in ani laihnuam in khatvei om in University Chin Student Union in lungkim lohna lahna tawh kikheello hi. Galkap Kumpi in hong ukzawh 1966 February 1 hun in Chin Special Division Day in laihnopna te Chin Supreme Council ii January 9, 1967 ni in thukhensatna 29/04 (2) tawh kilakik zo hi. SLORC leh SPDC Galkap Kumpi hun in phallohna  akipan in haksatna atuamtuam a om hangin min tuamtuam tawh Yangon bangah zong Universities Siamsinte makaihna tawh  in kitam bawl pen hi.
·         1998 Kum pan Universities kikhak sungteng Kumpi Nasemte makai in Yangon Khuapi ah Zo Minam Ni kum 50 cin Golden Jubilee Zo Minam Ni nasia takin akibawlna ah Zomite sung pan a zahtak-huai leh a pahtawi huai, Kumpi Nasemte, Galkapte, Civilliante, Zomi leh Zogam atawisangte  (Honor to whom honor is due) mi 911 Pahtawina Laipi (Certificate of Honour) kipiakhia hi. A kumkik in Golden Jubilee Commemorative Magazine zong bawl in pahtawina apiakkhiat mithupite min zong ki suaksak hi. Tua celebration Committee mah in  Chin History Compilation Committee phuan in 2002 kum in Zomite Tangthu atom in sutna leh Ngeina Hoihte Pulakna Laibu (A Concise Study of the  Chins, Their History, Culture and Traditions) zong kumpi phalna tawh gelh in ahawm khia uh hi.
·         1999 akipan in Zominam Ni bawlna ah Lai a sang tawh azote kipahtawina, khantohna lahna in Ngeina lam lahna banah Zominamte Puansilh hoih nono Model girlte lahna (Fashion show item) zong guan beh uh hi.
·         Kum 2000 khit ciangin Zomite omna Kawlgam, Vaigam leh gamdang mun tuamtuam Zomite tuntunna ahi Malaysia, USA, Australia cih bangah Zo Minam Ni nasia takin kibawl hi. 2010 khit nungsang in leitung gam tuamtuam ah akibawlnate You Tube pan kilak kawikawi ta hi.
·         Kawlgam ah kum 2012 akipan in suakta takin Zo Minam Ni nuamtak leh thupi takin kibawl thei ta hi.
·         2013 kum in Hakha khuapi ah nasiatakin kibawl hi. Tu 2014 kum in Mindat khuapi ah kibawl kik ding hi.

D.   Mailam ah Zomi Nam Ni Bawlding dan leh dinmun etkikpakna pan mailam ading sephuai thu pulakna             pawlkhat
·         Zomi Nam Ni in mi namkhat ihihna hong kipsak hi. Mizo gam a I sanggamte in zong Mizo State ni in February 20 ni ana teelse manun I minam ni thupisak tuam hi. Zomi suan teng minam khat ihih mah bangin koi gam koi gam tung talehang I Minam Ni zat leh bawlciat ding hi.
·         Zomi Nam Ni in Zomite’ lunggulh teng atangtun theih nading hanciam ding hi. Thu kikup ni ding hi. Mi khansuah ihihzawh nading in kipantah leh kihuh diamdiam ding hi.
·         Zomi Nam Ni in Zomite’ sung ah a madawkte ahi, gam vaante, a nuntakna abeilawhte, Zomi madawksak leh akilangsakte, apil asiamte, etteh taak nasemte pahtawi ding hi.
·         Zomi Nam Ni in Zomite ngeina kepna, khantohna lahnate leh Zomi tawh kisai lahkhiat huaite lahna in zong zat ding hi.
E.    Thukhupna
Hih a tungah I pulakna mah bangin Zominam Ni apian khiatna, athupitna leh I kepsiam nading in mipi lungsim neihna, pilvanna, kipumkhatna leh kithutuahnate I neih ding ikihanthawn nop ban ah Pu Captain Mang Tung Nung in a (7) Veina Zomi Nam Ni  1957 kum in Tedim ah hong vaikhahna pulakkikna tawh thu kakhum nuam hi.
“Zomi Nam Ni in Zomi khempeuh, Zominam lungsim a nei khempeuh , Zominam om hi cih ciamteh in a zahtaak khempeuh in , akip akho nadingin  thupilak in hanciam ciat ding hi cih upkhialhna, lunghianna omhuai  hetlo thu hi.
Hih bangdan in  Minam ni bawlna in  Zomite in  Zomite a zahtakna, amuanna bek zong hilo hi. Zomite in minam dangte a lahkhiatna mah tawh  akibang ahi hi.  Minamkim kilem kithutak, kipumkhatna zong kiptak a lamlah nading  bulphuhna zong ahi hi.
Eite minam ni pen eite mahin zahtaaklo hilehang minam dangte  a zahtak hihang cihzong kici thei tuanlo hi. Minamkim kithukhat kilungtuakna cih zong a om thei tuan ding ahikei hi.
Tua hangin Minam kimte ii kithukhat kilungtuak nading  a deih khempeuh in amaute ii “Minam ni” ciat zong a bawl ding uh ahi hi. Minamdang te zong a mau’ minam ciat tawh kisai Nithupi te manphatak in a bawl nading un hanthotna pen thupi kasa hi.
Zomi te in Zomi nam ni thupi takin ibawl manin gambuppi (Pyidaungsu) a sukha a nawngkai sakding  dank hat in a gen, a um mite pen upkhialhna, genkhialhna tatak ahihi.
Zogam ah Naingnganzi (Politics) muhzia a kilamdang phial zongin Zominam tawh kisai in Zomite in lungkituak takin kalsuan ding hi cih ken ka um hi.
Hunthak ah ngeina thak khat iphuh ciangin ngeina lui tawh phattuamna angah mi pawlkhat in lungkim ngeilo in tua ngeina lui pen hong thun kik zawh nading lampi tuamtuam tawh hong hanciam ding cih pen akitel ahi hi. Tua pen eite’n itheihsa ahi hi.
Zomite ii kithutuahna, khantohna, minamkim(Taingyintha) te ki-it kilemna, Gambuppi (Pyidaungsu gyi) akipna Democracy ngeina hong kizelhna cih thute aadingin  Zomite’ aading in a thupi pen a manpha pen ahihi.”
                                                                         - Captain Mang Tung Nung (1957)

            Tuni a hih thu I genna TBCY Khangnote Motto ahi: Note pen Pasian in ama nasepna a lamdangte  a genkhia dingin hong teel minam leh Ama hehpihna angah nahi uhi.” Hih thu in no bek hilo Zomi khangno khempeuh I minam kemsiam, zuunsiam ding in Pasian in tavuan hong pia ahi gige hi cih phawk in sang in, sem ciat ni.
            Tukum  Zo Minam Ni  akipan in Zo minam leh Zo tangthu a kipden nading, Zomite kipumkhat nading, thumuhsiam nading leh thupha i san theih nadingin i biak Topa Pasian in i vekpi in khuamuhna leh khuaphawk hanciamna thak hong pia-kim in Zogam, Zolei,  Zo Minam khempeuh a mimal in  hong huaisiam, zuunsiam zo sak ciat tahen!  
            John 8:31 “Tua ciangin thuman na thei ding uh a,  tua thuman in note hong suaktasak ding hi.”
Zomi nam Ni pen kumsim in hoihtak in hanciamna tawh thahat takin minam bup in kihelkimna tawh pelhlo in I bawl nading in  hanthawt behna tawh thu kahialbawl hi.
Zomi Nam Ni kipkho den tahen!

                                                                        *******



Thupulak khia:                                                                        C.Thang Za Tuan, M.A; Ph.D.
                                                                                                Makaipi,Tedim Kipawlna, Yangon

Main Sources:
(1)  Khen Za Moong (2005): Chin National Day, Background History, Survival Efforts, Indisputable Facts (Private Circulation).
(2)  C.Thang Za Tuan : 2013 kum Zo Minam Ni  February kha 17, 2013 ni in TBCY, Yangon ah athugenna
(3)  Pu Chin Sian Thang, J.Thang Lian Pau, Rev. Dr.Khen Za Sian, Pa Dr.C.Thang Za Tuan, Tg. Vungh Za Pau, Captain MangTung Nung te’n “ZOMI NAM NI” athugenna uh .CINPUZOMI <http://www.cinpuzomi.com/p/zomi.html.>








Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZO MINAM NI PIANNA LEH NGAIHSUT HUAI THUPITE, Thupulak khia: C.Thang Za Tuan, M.A; Ph.D. Description: Rating: 5 Reviewed By: Cinpu Zomi
Scroll to Top