728x90 AdSpace

Hot
Menu
Zon-ol na Donate

Latest News

ZOMI Code 914 Zatkim ding Muhna tuamtuam.

( 1 ) By: ZCD. GS. Kam Lian


Minam dang te Minam pi khat din theihna ding sisan naisan,luang in a nuntakna ki pia uhi.Ei pen ei khut tawh zong gelh ding hilo lai ih kam pan Kei /Ko Inn kuan ZOMI-Other 914 - ah ci bek ding hi, hi zong a lamdang in TOPA in tawldam tak in ZOMI minampi khat suah ding ong gel sakna hi,ci theini.



Tua hi ZCD in  tel,tak in kan in ong ki gen khia hi,U leh Nau te aw bangbang ahi zong ong um mai un ko a ding hilo hi, lam ong ki khialh pihlo ding hi,maban khempeuh Khempeuh ZCD in sitan in ong pang ding hi,Vote ngah nang hi peuh mah lohi.Kitel ciang na ut peuhpeuh uh pia unla tutung ZOMI mah na ci ta un itna tawh ong thum ung.lungdam. 

( 2 ) By: Rev. Dr. S. Pau Khan En. GZA Makaipi

Nungin Kawlgam bup milip kisimna (census) ciangin Code Number (914) a om adangdang (Others) acihna ah ZOMI citek ni ci-in kong zasak hi. Tu-in zong tuamah kong cikikkik hi. Bang hanghiam cih leh adangdang te pen beh le phung, pau le ham tawh hong kikhen khap suksukna hi-a, tua tungah iden leh minam picing suak ngeilo ding hi hang. I vekpi in kigawm in Code Number (914) ah ZOMI kici tek le hang minampi khat in ding khawm zo ding hihang.
Tua ahih manin i om naciatciat ah i phakzawh tantan i minamte genin itna tawh kipumkhat nading hanciamtek ni. Hih thupen Party khat vai hilo in i minam bup vai ahihi.
( 3 ) By: Rev. Dr. J.M. Ngul Khan Pau. GZA Central Committee

India lam a GZA member-te kimuh khopna Feb 3, 2014 in CBA zumah kinei a, tua lai ah ka kikup uh ahih leh gamsung census (kisimna) a om peuhpeuh ciangin minam min kikhum khalote khualna in OTHERS kikoih hamtang hi.
Tua lai-ah tutungin ei Zomite'n i gelh ciat ding ko zong kong hansuah nuam uh hi. A gentehna in, Meiteite Manipur sungah ni dangin amau tenna khua zilin min tuamtuam na nei uh hi. Khua min Moirang, Bishunupur, Imphal leh adangdang na kilo uh hi.
Ahi zongin census hong omtak ciangin amau na kilom khawm thei uh ahih manin amau kilawh tawmnate nusia in lomkhat in na kigelh uh hi. Ei zong tutungin kilom khat in i gelh theih leh ZOMI pen historical record ah kikoih ding suak hi. I gelh nop kei leh "ciamteh taaklo" in awkaih min leh khua min peuh tawh "kigelh lum" i hi ding hi. 

( 4 ) By. Rev. Dr. Do Suan Mung

Zomi in kua teng huam hiam cih tawh kisai in atunga mipil te in Kawlgam, India leh Bangladesh gamgi dunga mualtungmite ahuam in gen uh hi. Tua pen maan hi. I pau tawmtawm a kilamdan hangin ingeina, itatzia kibang mahmah hi.  Hun khat lai in zong biakna lam bangah ivekin Zomi min nuai a ki-omkhawm ahi hi. Ahi zongin, tuhun teh Zomi pawlkhat Zomi ut lo tadih phot uh ahih manin Zomi a ut teng kipumkhat a kalsuan khiat ding hong suak hi.  Nikhat niteh ivek mahin Zomi nuaia h kigawmkik ding cih ilam-etna leh ithungetna ahi hi.
Zomi min bek tawh minam picing suak zo ding hihang.  Zomi nuai a ake ahi -Zo, Sihzang, Teizang, Khuano, Saizang, Tedim,etc. te abei ding hi zenzen lo hi.  Tua teng kigawmna Zomi hizaw hi.  Teizang, Sihzang, Zo, Khuano, Saizang, Tedim ci-a atuamtek a ikigen khak leh tua minte tawh lah hong kiciamteh tuanlo in Chin khutnuai mah a kitung ding ahi hi.  Zomi ideih pen Zo, Sihzang, Teizang, Khuano, Saizang, Tedim te laih nang hi loin ” Chin” laih nang hizaw hi.  Tua ahih manin Zomi ah ikigawmkhop ding lunggulh huai mahmah hi.
Code nambat tawh kisai in 914 (Others) cih zat ding patauh huai het lo hi.  Vuanzi U Khin Ye in a thugenna tuamtuam leh VOA tawh a kihonate ah siangtakin gen a, ei Zomi bang gentehna in zang zawzen hi. Tua banah hih Code 914 zang ding pen ei Zomi te kia hilo hi. Minam lian mahmah Po Karen in zong code nambat nei lo mawk ahih manin azat kul ding hi. Kayan(Kaya), Khami (Khumi) cih bangin minam tam simsim in azang ding ahi hi.  Code 914 izat manin Kawlgam mi ihihna peuhmah kitaan lo lua ding hi. Tua ahih manin, tuhun teekteek a Kumpi in census hong bawl pen ei Zomi ta dinga Pasian hong geelsak hi cih theih  ahi hi

( 5 ) By: Rev. Khoi Lam Thang.  General Secretary Bible Society of Myanmar

Gamlak ah ngalte a honhon-in kikhawl diamdiam uh hi. Ngal hon a tamte 100 kimkim pha thei hi. Ngal pite a suah ciangin vok mah bang uh a, 6 pan 12 ciang bang pha thei haamtang hi. Ngal hon lakah ngal pi 3 le 4 om hen la a no suak leh ngal no 30 bang 40 bang pha thei hi. Tam uh ahih manin a tatna uh kithei baih mahmah hi. Lo khawng na ne kha leh hun tom no khat sungin lo ciing khat ne mang zo uh hi. Hih ngal honte in gal le lauhuai ahi sabengte ahi zong, sahang le humpi ahi zong tuak kha thei uh hi.

Tua ahih manin ngal honte a cing dingin ngal khaat-te in a kimkot, a vei le tak ah panla in gamta uh hi. Ngal khaatte in ngal hon kalsuan zia ding makaih uh hi. Lauhuaina gal a om leh galphawnna aw gingsak uh hi. Tua bang ciangin ngal honte in thakhat thu-in a bil uh tungsak uh hi. Ngalkhaatte' aw a ngai lo cih bang omlo uh hi. Ngai loin a tuampek leh sihna le siatna in a dawn tuah hipah lian hi. Ngalkhaatte in galphawnna aw a zak phetun a mailam khe khat khaisa lian uh hi. A tai ding lianin a mansa in om uh hi. A tai uh ciangin a kibangin tai uh hi. Suk le suk khawm, to le to khawm, diamdiam liailiai a cih ciangin galsia le lauhuai, liamna le sihna panin suakta uh hi. Hih ganhingte tatzia a tel mahmah khangluite in mihingte' tatzia dingin kilawm sa lua uh ahih manin "KA KHAW KHAI MAI TANG EE" cih la phuakin, a sa, a lam uh ahi hi.

( 6 ) By: Dr. Dongno

Ongtung ding Kawlgam ah mimal phazah kisimna, census pen ei Zomite adingin Pasianin hun hoih mahmah khat ong pia  hi dingin ka um hi. Hih hun pen ageek mahmah hun laitak ahih manin kuamah tek hanciam ding hun hi aa, ZCD, GZA, ZYA, Zomus, Siamsinte mah nong kipei uh kul ding ahihna tawh hizah nong vaihawm khit manun, kong pahtawi aa thu nakpi takin kong nget sak hi. Hi bang hun hoih ong pai kik baih nawn khol lo ding hi.

PILVAANG DING KISAM MAHMAH:  Form fill up na mun ah, ava om  ding, ava fill up pih ding kiseh ding; tua hi kei leh, lai thei lote, ong deihsak lo supervisor te'n amau deih bang aa na guang thei lai ding uh hi.  Hih ngeingei kha ding uh hi.
Formte zumpi ah akipuak ciangin zong mimuante seh in va zui thei leh deih huai kasa lai hi. Lampi ah deih bangin ki kheel thei ding hi. ( Ih gam om daan leh mite lungsin puak zia tawh kei upmawhna hi ).
A simna mun zumpite ah zong ahih theih leh Zomi, mimuanhuaite,va ki phuum keei ding aa, va kihel in etcik ding thupi lai hi. Midangte-in, e'n, tat-ngam-huai isak lohte  cikze peuhmah lo in ong hih ngam uh hi'  cih mitsuan gige ni. Hih ngeingei kha ding uh ahi maw !
Mi tua zah tak aa dirty uh ahih ciangin, pilvang, ngentel, kuhkal, phincil  takin, ong sem un. Form khia khin ta ci-in ,' yo-thaa ' tak leh lungmuang tak aa ih om phiuphiau mawk leh hi thei lo hi; ‘ mite tuabang hi thei mawk uh ‘, cih ong ngaihsun un. Ih formte nangawn a kipaihsim ding lauhuai lah lo ahi maw !  Zomi ahi lo, Census Committee te muang lua lo ding,  pil gige, hak gige aa etcing den ding ong hanthawn nuam ing. Hih pen, maantak, siangtho tak aa  census aki bawl ding deihna bulpi ahi hi. Thumaan tawh ih sepnate, Topa'n ong gualzawhpih ta hen. 

( 7 ) By: Zomi Paul Pau. ZAT

3.2.2014 ni in TaMu khuapi ah  ZCD/ GZA/ UZO/ ZRDP/ ZCLS/ ZAT/ ZYA te mawtawi 2 tawh Kalay khuapi pan pai in TaMu khuapi a' ih Zomi te leh ih U ih Nau Thado te Ka Te te Vai phei te Mipi 300 val TaMu Biakinnpi ah Census ( Mi kisim na) vai na sia tak in gen na ki nei in Dotna Dawn Na zong nasia tak in ki nei hi ih sang gam te a hi Zo/ Thado/ Kate te tawh ZOMI sung ah ki gawm khawm ding cih thukuppi in ki nei hi. Ih sanggam te Zo/Thado/Kate pan Chin a hihkei nak leh thupi sa uhhi ki gawm khawm ding in a tam zaw  thukim uh hi. Lungdam. 

( 8 ) By: Thang Khawm Pau Zomi 

Zomi Census 2014 tawh kisai in akitaangsam bang gending leh mipi tetung thuman thutak theisakding in ZCD,ZYA,ZRDP,ZOFA,GZA,ZOMUS, Siamsin,UZO leh adangdang pawlkhat te Kawlzaangkuam khua tuamtuam teng ah zinkawikawi in mipi tha kingah mahmah cihthu kiza hi. Tua ban ah asawtlo in Cikha township, Tozang township leh Tedim Township te ah alemthei bang in khuasim ah kuanding uh cihthu zong kiza hi.  Sum peen atawmpeen kawlsum in K/s 80.000.000,00  bang beiding in kilam en a, Kawlgam sung a om Zomi mihau teng in siziau nuam himah hivaai ah leitung muntuamtuam a om Zomi kheempeuh kihelnuam ihihman gampua a te kizang masa ding hi.


Thu kai khawm
Khen Za Muan Thang

Source ; Zomi Nam Net.


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMI Code 914 Zatkim ding Muhna tuamtuam. Description: Rating: 5 Reviewed By: Cinpu Zomi
Scroll to Top