728x90 AdSpace

Hot
Menu
Zon-ol na Donate

Latest News

ZOMI LE GLOBALIZATION: TULAI ZOMITE’ TUAHKHAK THU PAWLKHAT. Gelth - Rev. Lang Suan Thawn

Thupatna: 
            Kum zalom 20 beikuan pan kipan leitung a huzaap/a kikhelsak thu hualpi nih om hi ci’n mpilte’n gen uha, tua-te in hunthak hun pan hunthak-khannelh hun ah (from modernity to postmodernity) kikhelna le globalization (leitung huam kizopna)te ahi uhi. Hih thului sungah a nihna ahi, globaliztion hanga Zomite’ tuahkhak thu pawlkhat le a kidop huaiziate i gen ding hi.


Globalization (Leitung Huam Kizopna)
            Globalization pen Mikang lai hi-in leitung huam kizopna cihna hi. Leitung kingopna, leitung khua suahna a ci zong om hi. Globalization pen kum zalom 15 pawlin a om khinin a gen mi pawlkhat om uhi. Ahi zongin globalization cih kammal pen 1985 kumin Theodore Levitt in na zang masa pan hi kici hi. Tua ahih manin globalization in kum zalom 20 bei kuan pan leitung a huzaap mahmah na hi pan hi.

            Globalization pen hong khangto mahmah ahi thukizakna (Information Technology) hanga hong piangkhia thu khat hi. Computer, e.mail, internet, TV, Satallite-te pan leitung mun khat a thupiangte, minute tawmno sungin leitung bup in kiza, kithei, kimu zo ta hi. Nidang hun bangin thukizakna haksa nawnlo-a khuano khat sunga thupiang, tua khua sungah a kizak pah theih bangin (Gtn: Hausate’n thu a taangkona, thau lawtna, zam tumna cihte pan) alian mahmah leitung i cih zong thu kizakna, kizopna-ah leitung khuano (global village) khat hong suak hi ta hi, kici hi.

            Globalization in nainganzi (politics), sumzonna/sumbawlna (economics), nuntak-khuasakna (social life), ngeina (culture), biakna (religion)te dongah na huam hi. Nainganzi thu i gen kei ding hi. Sumzonna tawh kisai-in 2008 kum sung, USA gam a, sum buaina in leitung bup phial hong linglawng sak zo mawk hi. Globalization (Leitung huam kizopna) hang na hi hi. Globalization in gam tuamtuam, minam tuamtuam, nuntak-khuasakzia tuamtuam, ngeina tuamtuam, biakna tuamtuam, upna tuamtuamte khat le khat kitheisak, kimusak hi. A liante’n a neute, a thahatte’n a thaneemte, a neite’n a neilote, a theite’n a theilote, mitamte'n mitawmte huzaapin a neektum hun hi. Tua hangin mipilte’n globalization pen gam keekna nam thak (neo-colonization) hi, ci uhi. Bangbang ahi zongin globalization pen khaktan theih/zawh ding hilo ahih manin ei sungah hih thu thei-in, ei-le-ei i kidal theih ding thupi mahmah ding hi.

Ngeina Tuamtuamte Kimuhtuahna
            Tuhun Zomite pen a paikhiate ihi hi. Nidang lai bangin i khua sung bekah ki-omcip nawnlo hi. Khua le tui pan paikhia-in lonona mun kizonga, mun tuamtuamah sum zong, pilna zong, siamna zongin, le nasep tuamtuam tawh ki-om hi. Gam sung bekah hilo-in gam dang tuamtuamah zong a paikhia Zomite ihi ta hi. Ei, i paikhiat mah bangin mi namdangte, gamdangmite zong ei kiangah hong pai thei zel uhi. Tua hangin ngeina tuamtuamte hong kimutuah ta uhi. Hih in globalization hang hi. Tua ahih manin globalization hanga Zomite tuahkhak thu pawlkhat i kikum nuam hi.

1.  Ngeina (Culture)
            Mun tuamtuam, gam tuamtuama om Zomite ihih manin minam dangte’ ngeina tawh i kisukha ta hi. Ei pau bek, ei lai bek, ei ngeina bek cih theih om nawnlo-a, midangte’ pau, midangte’ lai, midangte’ ngeinate i theih, i zat loh a pha mawh dinmunah i om hi. Hi bangin ngeina tuamtuam sungah i nuntak laitakin, i kiim i paamte’ ngeina in ei mimaltawm (minority)te hong deep pahpah, hong huzaap pahpah thei hi. Tua hangin i pau, i lai, i ngeinate a theilo/a thei nawnlo Zomi tampi ki-oma, amah le amah kua hiam cih nangawn a kitheilo zong ki-om pianpian ta mawk hi. A taktakin cileng, Zomite pen ngeina kician a nei minam ihi hi.            

(a) Min phuahzia le min gelhzia:
            Min phuahzia tawh kisai-in ei Zomite’n minam dangte tawh a kibanglo, ngeina tuam deuh a neite ihi hi. Ahi zongin tuhun ciangin Zomi pawlkhatte’n amau min tawpna-ah a pa’ min nunungpen a behlap kiom hi. (Gtn: Pa Thang Kham' tapa Tg. Lian Do' min nungah Kham behlap in, Tg. Lian Do Kham ci'n gelh hi.) Pawlkhat leuleu in amau min kitheilo zah khop dingin a beh min a gelh zong ki-om hi. (Gtn: S.T. Naulak ci'n gelh ahih manin, a beh min bek kithei a, ama' min ahi Suan Thawn tawh kitheilo hi.). Mi pawlkhat leuleu in mikang min (or) Lai Siangtho sunga min (or) Khristian min a mai-ah phuak uh ahih manin, amau (Zo) min tawh a kitheilo zong om thei uhi. A taktakin cileng I min in ihihna (identity) a hong lak ahi hi. Hih banga ihih ziazuana pen globalization hang na hi gige hi. Hih thu hang mahin, 2002 kum pawlin “Min Gelhzia” tawh kisai-in Zonet-ah kikupna nasia takin om ngei hi. Tua ahih manin hih globalization hangin Zomite i manthanloh nading le minam dangte ngeina in hong valhtumloh nadingin i kidop, i kidal theih ding thupi mahmah ta hi.

            (b) Kiteenna/Nupa suahna:
            Gam dang pai Zomite lakah tangval lai khangno tampen hi. Tua hangin i khua, i tui, i pawlpite-ah khangno tawm tuam hi. Tangvalte’ khualzin khia uh ahih manin i khua, i tui, i pawlpite-ah nungakte hong val keei ta uhi. Tangval kicing zo nawnlo cih ding hi. Mailamah nungakpi hong tam thei dinga, ahih kei leh minam dangte lakah mokhak ding hong om zeuhzeuh thei ding hi.

            Ahi zongin hi bang thu kawmkalah gam danga om Zomi tangvalte’n i mipih i sapihte mah hong cih theih manun lungdam huai hi. Nu le pa deihsakna hang ahi zong, amau deih teelna hang ahi zong, innlam pan gam dangah Parcel kikhak ci’n Parcel kiteenna min thak/ngeina thak khat i zang hi. Parcel kiteenna ah a kikhak pen numeite hi den hi. Mihing khat pen van (nuntakna neilo) nam khat kikhakna min “Parcel” cih kammal i zatna in Zomi numeite’ dinmun le a vaang uh niamsakna, van nam khat banga sehna ahih manin Parcel Kiteenna cih kammal sangin Kigalteenna cih huai ka sa hi.

            Gam sung le gam pua thu vaihawmkhopna-ah monu le mopate hong omkim khawm theilo uhi. Bangbang ahi zong kipi kiteenna-ah ngeina a nei minam ihih mah bangin i ngeina banga a gamta ki-oma, ahi zongin pawlkhat te’n mopa lah omlo (or) monu le mopa omlo lel uh ahih teh ci’n thupi ngaihsut selo uhi. Amau a kiteen theih nak uh leh hoih lel e, ci uhi. Tua bek thamloin, kipi kiteen ma-in nupa a na hi khin zong ki-om zeuhzeuh ta mawk hi. A taktakin cileng kiteenna, nupa suahna ah ngeina kician a nei Zomite ihi hi. Khristian i suah ciangin Khristian ngeina khat zong i zang lai hi. Ahi zongin tuhun ciangin Zomite’n kiteenna, nupa suahna pen i thupi ngaihsut lua nawn kei-a, i peengsak pianpian ta hi. Tua hang mahin nidang banglo in, nupa kikal buaina le kikhenna Zomite sungah hong tam simsim ta hi. Hih in globalization hang hi-a, i kidop, i kidal theih ding thupi hi.

2.  Nuntak-khuasakna (Social Life)
            Khuahun luanzia tawh kizui-in a kizeem theite, a nungta theite mi a baan, a khetmii i ci hi. Ahi zongin niktual pen hong singto a, niksing pen a tunglam a manawh luat ciang, anik apuan in a cin luat nawnloh ciang, a khetmii cih sangin piancilna lamah a nungtolh cih huai leuleu hi.

(a)   Kipuah-kizepna (Fashion):
Thu kizakna hun sungah mipi thukizakna (media) pan in nuntak-khuasakzia, kipuah kizepzia (fashion) tuamtuam i mu a, i thei hi. Nitumna lamte nuntak-khuasakzia bek hi nawnlo-in, ei Asia mite nuntak-khuasakzia in zong i gam sung hong huzaap mahmah hi. (Gtn: TV pan Korea-te’ nuntak-khuasakzia). Manila-ah sang ka kah lai-a ka muh numeite i pheituam sau a teen, a kigak phetphatte nam pen, "Kawlgam-ah kua mah in teengngam ken teh" ka cih vial leh tu’n Zomi nungakte nangawn in hong teeng ta uhi. Kawlgamah Rap/HipHop late hong kisak masak lai-in, “Hi dan late kua’n deih thei peuhmah mawk ding!” ka cih leh tu’n khangnote sak pen la namkhat hong hi ta hi. A uanglua, a vaallua cihte hoihlo a, ei tawh kilawm kituak kipuah kizep theih ding hoih hi.

(b) Cidamna (Health):
Cidamna tawh kisai-in globalization hanga a kilawh, a kizel natna thu a gen nuam ihi hi. Mihingte tam hong sisakpen natna nam thum om hi. Malaria, TB le HIV/AIDS hi. Hih natna nam thumte pen leitung bupah kizel hi. Tua sung pan Kawlgam sungah 1988 in a om lam a kithei pan, HIV/AIDS pen tu’n ei Zomite sungah zong hong lut ta hi. Wesley Clinic (Tahan) pan muhkhiatna-ah sisan kisit mi 16506 sungah 1802 in HIV/AIDS natna nei uha, mi 10 ah 1 in natna nei cih ding hi. Tua sungah ei Tedim kampau Zomite a tampen kihi mawk hi. A paikhia te’n hong ciah uh teh hong pua thei uha, a hong pai te’n zong hong keng thei uhi. Hih in globalization hang na hi gige hi.

            (c) Kizopna (Relationship):
            Zomite pen a ki-itdeuh, a kikhualdeuh, a kizomdeuhte ihi hi. Tua hangin innkuan sung, u sung nau sung kizopna tawh kisai-in Zomite le gamdangmite (a diakdiakin nitumna lamte) i kibang kei hi. Ahi zongin Zomi pawlkhatte pen gam dang, mun dang gam dang a tun uh teh a kikhel om mawk uhi. Ni dang banglo-in nu le pate, ulenaute phawklua nawn mello uh a, sum a khak nawnloh uh ban ah kizopna, thu kizakna zong a neilua nawnlo lai uhi. A hang pen  nam nih om thei ding hi. Khatna-ah a omna gam le mite nuntak-khuasakzia ii huzaapna hang hi ding hi. Nihna-ah innlama omte’ kisapna zong hi thei kha ding hi. Bangbang ahi zongin tuhun Zomite sungah tapa taimang sangin tapa pai-mang kitamzaw ta hi.
A thak khempeuh hoihkhin lo-a, alui khempeuh zong siakhin samlo hi. Tua ahih manin a hoihlote nusia/pai-in a hoihte i pom, i zuih pah theih ding thupi ka sa hi. Khantohna hoih ahih ding thupi hi. Ei tawh a kituak nuntak-khuasakzia i zat theih ding hoih pen ding hi. Midangte-a i delhdelh leh ei-a cih om thei ngeilo ding hi. Midangte' nuntak-khuasakna tawh ei-a a kibatlohna pawlkhat pen ihihna a kilatna hi zaw hi.

3.  Biakna (Religion)
             Globalization hangin ngeina tuamtuamte a kimuhtuah uh mah bangin biakna tuamtuamte zong hong kimutuah uhi. Khristian biakna sungah zong pawlpi (denomination) tuamtuamte hong kimutuah lai uhi.

            Mun tuam gam tuamah pai-in sum zonna, pilna zonna, siamna zonnate-ah mipawlkhat in kikhawm manlo, Lai Siangtho simmanlo, thungen manlo liang uhi. Tua hangin kha thu-ah thaneem in, Khristian a hihna nangawn a mangngilh kha dek zel uhi.

            Khristian khempeuh in i pom theih upna (Creed) i neih mah bangin pawlpi (denomination) zui-a upna pulakna (Confession) zong i nei ciat hi. A kibang pawlpi sungah zong pomzia, kalsuanzia (movement) kibanglo thei lai hi. Hi bangin i omna sungah ei-a bek gen ding, kihilh ding, ei sanlohte i pawlpi mite theisaklo ding ci-a khaktan theih/zawh ding hun hi nawnlo hi. Biakinn sung pan a zakloh uh hangin kiim le paam pan na za thei, laibu, lai hawm tuamtuamte pan na sim thei uhi. Upna tuamtuam hong lut hun le a kimuhtuah uh hun ahi hi.

            Tua ahih manin i pawlpi dinmun, i pawlpi upnate i teltheih ding hun hita hi. Ahih kei a, a pua tham, vun Khristian ciang bek ihih leh upna tuamtuam hangin kihoi daidai thei dinga, kipuk lawh thei ding hi. Amah sung tawh kilem maw, kilemlo cih kan selo a, a muh peuhpeuh a ne pahpah Khristiante pen a gilpi'n a annek gawi zolo thei ahih manin a sung puakin, a gil natlawh thei hi. Upna tuamtuam hong kimuhtuah ciangun thu hoih tampi a piankhiat theih mah bangin, pawlpi sung kithutuahlohna, thaneemnate hong piang thei hi. Tua ahih manin i pawlpi dinmun i theih kul a, Khristian min a pua bek ihihna tawh lungkim ding hi nawnlo hi. I pawlpi' dinmun thei a, pawlpi dangte’ upna le biakna dangte' upna zong a thei, a picing upna le Khristian hihna-ah i manawh kul ding hi.

Thukhupna:

            Globalization (Leitung huam kizopna) pen khaktan zawh ding hilo hi. Globalization huzaapnate i ngaihsut ciangin lauhuai mahmah hi. Mimaltawm ei Zomite adingin i minam, i ngeina, i pau, i laite a ciitam minamte' ngeina, pau, lai te'n hong valhtum theihna hong musak hi. Bek thamlo-in, biakna thu-ah zong a lauhuaizia hong phawk sak hi. Tua ahih manin globalization huzaapna pan i kidal nadingin, ei Zomi Khristiante'n i minam, i ngeina, i pau, i laite it in, i kepcin mahmah ding le khangthakte zong i hilh, i theihsak ding thupi hi. Nuntak-khuasakna-ah ei tawh kituak, a etlawm, eizia a, nuntak theih ding kisam hi. Khristian ihihna ah zong a puatham/vun (or) amin pua Khristian hihna pan, a sunglut Khristian hihna-ah kikhel a, i khantoh ding hun hi ta hi ci'n hong musak hi. 

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: ZOMI LE GLOBALIZATION: TULAI ZOMITE’ TUAHKHAK THU PAWLKHAT. Gelth - Rev. Lang Suan Thawn Description: Rating: 5 Reviewed By: Cinpu Zomi
Scroll to Top