728x90 AdSpace

Hot
Menu
Zon-ol na Donate

Latest News

Zomi-te: Gam Khat, Minam Khat (The Zomis: One Nation One People)

Zomi-te: Gam Khat, Minam Khat 
(The Zomis: One Nation One People)
By: Disciple Kap Sian (Taang Sianpu)

Thupatna:
Zomi khempeuh Minam khat hi hangh, Gam khat hi hangh I kici thei takpi diam?
Hih dawnna pen hoih tak in I ngaihsut ciat ding kisam mahmah ta ding hi. Tua hi leh hih dotna I dawng ma in a dotna mahmah I deihna I tel masak hong kul kha ding hi. Minam khat hi hangh I kicih theih na ding ahih kei leh, minam khat kihi khan taktak zo naikei icih theih na ding in Zomi-te icih ciang kua teng, koi ciang huam sak ihiam cih hong theih masak kul kha ding a, gam khat hi hagh I kicih theih na ding in Zomi te gam koilai zaw hiam ahih kei leh, koi teng hiam cih I theih masak hong kul kha thei ding hi. Zomi-te minam khat hi hangh, hi kei hangh, gam khat hi hangh, hi kei hangh cih pen Zomi icih kua teng liang, kua teng tak I gen nopna hiam cih tung ah zong tampi kinga kha ding hi.

  1. I.                   Zomi-te kua teng ihi hiam?
Zomi-te kua teng hiam, Zomi icih ciang kua teng huam sak ding ihiam cih dotna pen tulaitak bek hilo in tuma kum 10, 20 leh kum bang zah lai hiam khat a kipan mikim lungsim ah a teng den dotna khat ahi hi. Mikim icih samg hang in khat leh khat I ngeihsutna, I khiatna kaihzia kibang kimlo in aki bul sak zaw deuh cih mah, aki dai daai khah zaw deuh cih mah in ngaihsutna tuamtuam om hi.  

  1. a.      Sak leh Khang, Kham leh Zaang a om Zomi-te

Tun sung khat pan piang hi ngeingei hangh e…

Sakmi, Khangmi kikhen lo in, Mim bang piana Ciimntui vangkhua

Zinin khen maw, siangmang khen maw…
Sin lai ah na sang’ e, Gi bang khenzong lunglai ah kingilh kei ni
Tun sung khat pan piang hi ngei ngei hangh e…


            “Sakmi” cih kammal pen tulai khangthak lak ah a theilo zong ki om kha mai ding hi. Sakmi icih ciang in Saklam icihna hi a, Saklam (Saklam ah pai to ding I cih ciang, a suk hiam a to hiam bel tel lian kei bek ve hang in) icih ciang in India gam huam sung a om I Zomi pihte cihna ahi hi. Khanglam icih ciang in Kawlgam lam a om Zomite icih nopna hi. Ciamnuihna dan in aki gen ngei kampau khat en pak leng “Gunkhawm khang lam ah Khua om lai ci zen ve uh aw…” Tuan a tawm pen tu lai Khangthak Zomi pawl khat in Gunkhawm (Chindwin river) icih a theilo zong ki om lai thei maitka hi. Sak leh Khang bek hilo Kham leh Zaang, Kham tung lam ah omte leh Zaang gam pan a khangkhia Zomite cih bang in zong kikhen tuam ding ahi kei hi. Zomi mah ihi hi!

            Zomi cih kammal I muh ciang in Kawlgam sung a om Zomi-te, Zomi-te’ omna teng bek a mu pawl khat om in, pawl khat in Mizoram sung ahih kei leh Lamkam lam huam North East India khong a mu kiom hi. Zomi icih leh tua mun khempeuh ban ah Zomi-te omna teng I mitkha ah luai sak in I muh ton khop theihna in minam picing ihihna hong kilang sak hi.

  1. b.      “G” Group leh “R” Group Zomi-te
            Zomi-te in I lai, I kam zat pen ABC.. te aki zang “Roman alphabet” ahi Mikanglai A-Z dong a zang minam ihi hi. Tua Zomi-te sung ah I omna, I khankhiatna leh I omna naihuai tawh kizui in laizat, kampau pi nam (2) om hi. Tuate lak ah eima bawltawm lah ahi lo I laigelh zia leh I kampau zia dung zui in khenpi nih ahi “G” Group cih leh “R” Group ci in nam lian nih om hi.

G-Group: Icih ciang in I lai gelhna sung ah, I laimal (alphabet) sung ah laimal “G” a zang cihna hi. Gtntehna in: ZoGam, Gatam, Gunpiau, Gunkuang cihdan in ki zang hi.   G- a zang Zomi te pen hong kizelh khiat masakna ahi Ciimnuai bulphuh in Ciimnuaimi kici hi. Ciimnuai kul (cave) pen I kiciaptehna pi khat ahihna tawh kizui in Ciimnuai Vontawi, Ciimnuai Lia leh Taangte, Ciimnuai Momno cih bang in aki zangto ahi hi.

R-Group: Icih ciang in I laigelhna sung ah, laimal “R” a zang Zomi-te cihna hi.  

Gentehna in: ZoRam, MizoRam, Ram Lian, Rol cih bang in kammal sung ah “R” kammal kizang hi. R- a zang Zomi te pen hong lal khiat masakna uh ahi Lailun bulphuh in Laimi hong kici to uh hi.


            Ciimnuai Zomi ihi a, Lai Zomi ihi zongin minam khat, gam khat a om te ihi a I laigelhzia, I ki vaipuakzia kibang lian kei mah leh zong minam khat ihihna I manghilh loh ding thupi hi. Ciimnuaimi ihi a, Laimi ihi zong in Zomi sung ah pumkhat, aw khat ihihna pen Zomi Baptist Convention (ZBC) in hong ki langsak hi. Tua ahih man in Zomi sung ah Pumkhat ihihi (We are One in Zomi) akici minam khat, gam khat sung a om Zomi-te ihi hi.
Pawl khat in Zomi icih ciang in “Zomi” kammal a sang theite, a deihte, a zangteng bek Zomi cih ding cih laitak in, pawl khat leuleu in Zomi, Minam (identity) icih pen deih thu a piang, deih loh thu a kinawl khin thei thu pawl hi kei aci ki om hi. Minam cih pen ahilo khat a ut mahmah hang hong I minam hong hih mawk theih loh dan mah bang in, ahi sa khat a deih hetloh hang in aki nial theilo thu khat ahi hi. Tua ahih man in “Identity is not a matter of acceptance or rejection but a state of being rather” (Tg. ZoThang Hatlang) ana ci nahi hi.

Asia a ding in gam khangto khat ahi (nasep silbawl a stable mawhlo) Singapore en leng amau gam a ding in Leitung bup pan a hoih teng, gam khat pan a hoih teng, teltuam teng kaikhawm in gam tampi pan in pilan siamna nei tampi a kaikhawm in, a sep khawm man un Asia bek thamlo Leitung bup a ding in etteh huai gam khat hong suak hi. A mite mahmah zong kum bang zah khat hiam a sep khit ciang in Khantawn Omtheihna (PR), Gammi suahna (Citizenship) cih khong pia in leitung bup pan in minam tuamtuamte’ pilna teng, siamna teng kaikhawm in tangzai sak in, gawmtuah in gam khat in ding ahih man in nasep silbawl leh khantohna lam ah kia lua lo in, mailam manawh to hethet hi. Minam it taktak ihih leh I minam pen khen bawl, sehsat, neu suah, pawl khat nil bawl lo zaw in, neu seek lo in a tangzai ding leh a kisapnanamkim minam (resourceful people and nation) ihih theih na ding in phungvuh in, pibawl ding hangh a, tangzai sak ding hi hangh. Tua ahih man in Zomi icih pen neusek, neu suk sak zaw lo in taizang sak in, huamkim ding kisam hi. Tua hi leh minam khangto, minam lian ihina leh lungsim picing minam lian ihihna hong kilang ding a mite’ ettah minam ihi ding hi.

  1. II.                Zogam koi teng a hiam?
      Zomi sung ah “ZOGAM” cih kammal imuh, I zak khak ciang in pawl khat I mitkha sung ah Tedim khuapi amu I om hi. Pawl khat in Lamka khupi mu in, Pawl khat in Aizawl amu in om a, a dang pawl khat in Khalkha khuapi imu hi. Hih pen a sia leh a diklo cihna hilo hi. Ahih hang in Kawlgam huam sung a om Zogam a it Zomi khat in “Zogam” cih kammal a zak ciang in Lamka khuasung a mitkha ah a luai theihloh ding pen a ngeina hi kik bilbel zaw hi. Tua mah bang in Lamka lam a om Zogam a it Zomi khat in “Zogam” cih kammal a zak ciang in a mitkha ah Lamkha khuapi sung kim teng mah amuh ding a ngeina hi. Zogam cih kammal mun khat ding kimlai, khuapi khat, gam khat ding kimlai tua bang in I mitkha sung ah aki bangl mun dang a tuamtuam hong dawk ngeingai pen bang hang ahi ding hiam? Ngaihsut huai hi. Ngaihsun thei leng na mah hi cih ding ahi hi. Bang hang hi in na um hiam?

Puan bang a keksa Zogam phop kik (belh kik) mateng khawl lo e 

Zogam vontawi lia leh Taang


  1. a.      Hong ki balkek sak Zogam phop kik na ding
Sanggamte aw, i Zogam pen puan bang in a kek hi takpi hi. Kikek ahih man in mah in khangthakte mitkha sung ah “Zogam” icih ciang in eima piankhiatna mun dung zui in mun tuamtuam hong muhsakna pen I Zogam akik kek, aki khen man hi. A kek, ama tu a a kek bek hilo lai in, hong ki balkek sak ahi lai hi. Tuni in a thak in ngaihsun pha dih ni, I Zomi sung ah lungsim tuamtuam, kikhenna tuamtuam, ki tuam balwna tuamtuam hong om theina pen eima ut zong hilo a, eima teel zong hilo hi. I Zomi gam phualpi hong ki balkeksak ahih man in I lungsimte teulen in, sak leh khang ah kikhen in, Kham leh Zaang ah kitheh thang hi.

Taikhua val na zo, Zogam leitang ngah kik mateng kawl lo e

Zogam vontawi Lia leh Taang


                        Khangthak Zomi-te aw, tu laitak a ihihna bek tawh lungkim lo in, I lungsim, I omna, I khua leh tui hong pian dang sak, hong ki gamlasak, minamdang bang in hong pian dang sak, hong khenkham, hong balkek pen Ziin (Dawi) lah hi  kei, Siangmang (Pasian) zong hi kei Ki-ukna dangte, Midangte mah hi. Zogam ngahkik ma teng I khawl loh ding nang leh kei lungtup ahi hi. Eima mawhpuak ahi hi!


  1. b.      Sak leh Khang leh Pam a om Zomi Gamte (United Zogams)
            Tu laitak in Zomi sung ah Reunification, Unification, Unity in Diversity etc. ki nak  gen mahmah in a ki nak hanciam mahmah laitak ahi hi. I gam leh nam a ding in (ZRO, ZORO, ZNC leh Zomi Kipawlna tuamtuamte) in a hanciam mahmah laitak ahi hi. “Reunification” cih a khiatna pen eikam in ci leng “Kipumkkhatkikna” “Kithutuakkikna” cihna ahi hi. Ki pumkhat kikding cih nungsang in, ki pumkhat ngei cihna ahi a, bang hang hiam khat in, bang hiam in, kua hiam khat in hong khen cihna hi. Tua ahih leh a ki pumkhat ngei, gam leh in a om ngei leh suakta tak in a om hilhial Zogam pen Zomi gamte hong suak hi. Zogam icih ciang in I mitkha sung ah mun tuamtuam hong om icih mah bang in I Zogam pen mun tamtuam hi takpi mah hi. Mun khat bek hong hi nawnlo hi. Zomi-te gam tangzai zaw ta hi ci-in I mu hiam ahih kei leh aki khen thang, hong ki khenthang gawp hi ici diam ngaihsut phat phat huai a, hanciam phat huai mahmah hi.

            I pu leh pate I luahsa, amau a sisan, a khuaul tawh a leisa un, a nuntakna uh piakhia, kham in hong leisak sa i tenna Zomi gam pen hong kikek in, hong ki khenkham in seh pi (3) hong kisuah hi. Zomi-te gamte in a nuai a bang ahi hi.

  1. Chin State, Sagaing Division, Rakhine State pawl pawl khat, Myanmar.
  2. Manipur State, Chandel District, Churachanpur district (Lamka), Mizoram, India.
  3. Chittagong Hill Tracts pawl khat leh Bangladesh.
Hih a tung a I Zogam teng pen sapdan a tuamtuam in om hi. Eastern Zogam, Western Zogam cih bang in ahi zong in a sam om hi. Gam khat kimlai, pum khat kimlai hong ki balkek ahih man in, hong ki khenkham ahih man in Zogam-te icih zong kikhial lo hi. Hih bang in khen pi (3) bang in I kikhen hang in Zogam a omlo cih ahi kei hi. Leitung ah  gam khangto pen khat ahi America mahmah en leng zong States tampi kigawm, khen tampi kigawm (50) kigawm gam khat ahi hi. I Zomi-te gamte zong Akigawmkhawm Zomigamte (United States of Zogam) kici theilo ding cihna zong om tuanlo hi. States (50) kigawm gam khat sang in tawm lai zaw pek ihih man in lametna tampi om hi. Mailam ah a pian theih na ding in a hanciam ding, mawhpuak (duty & responsibility) a nei pen nang leh kei mah ihi hi.
            Tua ahih man in Zogam igen ciang in Chin State ciang bek mu kei ni, Mizoram ciang bek en kei ni, Churachanpur bek en kei ni, Sagaing Division bek en kei ni Zogam neuseklo in, Zogam bup I ngah kik ma teng hanciam ding leh I pu leh pate’ leisa gam a tan lawh loh na ding, I gawm kik theih nang ding lungtup in nei ciat ni.


  1. III.             I ki pumkhat kik nading in akisam masa pen thu pawlkhat
Zomi sung ah kipumkhatna cih pen mikhem peuh I gen khat ahi a aki genpen ahihna tawh kizui in aki zui zolo, a haksa pen thu khat zong hi leh aki lawm na ciang khat om hi. Bang ci leng ki pumkhat ding cih I kikupma in bang hang in ki pumkhat thei khin tak zolo cih I kikum theih ding hong thupi mahmah ding hi.

  1. a.      Zomi-te I ki pumkhat kikna ding I zia I tong khempeuh ah kibat masak kul hiam?
Zomi sung ah I ki pumkhat theihna a omsate banah I ki pumkhat tektek theih zawh na  

dig in I hei dan, I ngaihsut zia ekkikna I pai masa ding hi. I minam sung ah Makai kim, mikim phial in aki gen ahi I ki pumkhat theih na ding in I silh I ten, I zia I tong, I pau I lai kibang sak ding hi hangh cih thu hi hi. Tua ngaihsutna pen bang pan hong pai hiam ci leh “Kipumkhat theih na ding in Kibatkim kul hi” (Unity is Uniformity) cih ngaihsutna pan ahi hi. Ahih hang in tu hun ciang in ahih leh Unity is Not Uniformity.


            A beisa hun in Kipawlna tuamtuam, Biakna kipawlna makai tuamtuamte leh mimal in akipia khia Zomi nam leh Zogam a vei te in I hanciam masak pen I bang kim ah kibang khin masa ding cih thu ahi hi. Gentehna Lai khat zang ding, kam khat pau ding (common language) cih khong I bulphuh masak khak man in tua I ban ahi sepkhopna ciangdong ah ki tungto zolo in hih mun bek ah ki awk cip den hi cih I phawk thak ding hoih kasa hi. Zomi bup sung (G + R Group) sung a teeng khempeuh kampau namkhat (common language) kibang masa ding cih tawh Kipumkhatna I hanciam leh baih masa lo kha ding hi. Bang hang hiam cih leh taangpipau ding (common language pen) siamsin sung ah ci leng CLCC cih bang Zomi lai lam kipawlna tuamtuam in a hanciamna kum sawm tampi hi mah ta leh tu dong ki lamdang nailo a, ki kak tektek tawh kibang lai a, mailam ah zong ban hun ciang hong piang ding cih ki gen thei pak nailo ahih man in hih a ki gen thei nailo, akiciangtan thei nailo thu tung ah kipawl khop ding, ki pumkhat ding I ki ngak sak leh I ki pumkhatna hong zekai mahmah ding a, I hunte pammaih mahmah kha ding hi.

            Biakna sung mahmah ah zong Zomi khempeuh biakna khat, Pawlpi khat ihih ma teng ki pumkhatlo ding ahih kei leh a ki pumkhatlo, a sem khawm lo hi mawk leng Zomi khempeuh pawlpi khat ah om khop ding gen loh ki kak tektek, ki gamla tektek in ki tam tektek ahih man in ki thutuahna (unity) hong ki gamla tektek ding hi. A taktak in ci leng biakna icih pen teel theih, khel theih leh akikhel thei ahi zaw lai hi. Ahih hang in pianpih kampau, suahpih kampau icih ahi Zomi sung ah om kampau tuamtuam, Falam, Khalkha, Tedim, Lusei etc. bang dante teng taangpi kampau I neih mateng, lai khat I zat khop ma teng semkhawm kei ni, ki pumkhat keini ci leng I aw khat, lawng khat in I paikhop theih ding hun pen mualmong mei et mah hong bang ding hi.

            Gamkhat, Minam khat ihih theih na ding in I vek in lai khat zat masakna, kampau khat zat masakna hi masa lo cih pen United Sates I a (44) veina Mivom President Obama in thu hong gen hi. Leitung pen angei bang nawnlo hi. Minam thu, minam vai, gam thu ah a ngei bang nawnlo hi. US gam ah nidang lai in Mivom leh Mikang (Black & White) vai pen a khauhpai mahmah leh a buai mahmah gam khat hi. Ahih hang in tu in ahih leh si leh sa kibatlohna, nam ki batlohna tuamtuamte in Minam Khat, Gam Khat ahihna uh khaktan zo tuanlo uh hi. Tua bang mah in Zomi sung ah zong G Group sung hi ta leh R Group sung hi ta leh pianpih kampau ke, kampau tawmtawm aki khia/ akikhai beh leh phung, khua leh tuai kilamdanna om. Tuate en kawm in kampau khat I neih khit ma teng, lai khat bek I zat khit mateng Minam Khat hilo, Gam Khat Hilo I kicih khak leh leitung khelna in nang hong nelhsia lel ding hi. I khua paute, belh leh phungte, I bianate akibatlianloh a neu tuamtuam nate (minor differences) ki khat in a dang khat ko a zang ni, no a hoih kei cih I hanciam lai teng Minam Khat ihihna, Gam khat ihihna hong kilang lo ding a, ihihna bang ciat tawh I ki sang theih, Pasian’ hong piansakna I hihna tek mah tawh khat leh khat ki sangsiam zaw in No pau, ko beh, no khua cihte leh tua sang tua lianzaw, tua thupi zaw cih dan in I kibatkimna (commonness) I zon masak leh ki pawl khop theihna lam I manawh masa kei ding hi. I kibanlohnate khat leh khat ki theisiam, ki thusim pih in ahih nak leh Mivom, Mikang cih thu leh pianpih kibatlohnate in Minam Khat, Gam Khat ahihna a khak tan zawhloh mah ban gin Zomi sung ah Minam Khat, Gam Khat ihihna te hong picing semsem in Zomi leh Zogam hong paal lun tektek ding hi.

            Gam Khat, Nam Khat hih theih na ding in I vek in kibat khit lianluan masak ding kisam masa lo ding hi. Israel te zong beh ahih kei leh bawng nam 12 in akikhen uh hang in Nam Khat ahi uh hi. Malaysia en leng zong Minampi (3), Pau Nampi (3) kigawm Minam Khat, Gam Khat ahi uh hi. A omsa, a tamzaw in a neuzaw te phiat sak sawm, hah gawm sawm lozaw in pau nam kim in zat theih ding policy a neih man un kibanlohnate kawmkal ah gam khat in ding a, minam khat ahi thei uh ahi hi. Pau Khatai, Lai Khat,Ngeina Khat, Biakna Khat  ihih na ciang bek in minam pi hi ding cih pen kawlkumpi’ hanciamna ahi a ahih hang in a nuai a Minam neutete in ukcipna leh nenniamna thuakzolo ahih man in galtaai cih mah, kiukna hoihsalo cih mah a om ahi hi. Zomi khempeuh zong Minam Khat, Gam Khat ihih na I theih kim ciat na ding in Pau Khat, Lai Khat, Biakna Khat cih tawh kikang masa lo zaw in Zomi nam sung a om pau neu leh bawng neu, beh neu a tuamtuamte I thupina ki theihpih ciat in I kibatlianlohna mah pen I etlawmna hi cih sang kimthei ciat zaw in, a lianzaw te in “ko a common zaw, ko a lianpen” cih lungsim a neih kei nak leh Zomi Khempeuh: Gam Khat, Minam Khat ihihna hong kilang to tektek ding a Zomi leh Zogam sunni hong tang zaam ding hi.

  1. b.      Zomi khempeuh Minam Khat, Pau Khat
Zomi khempeuh Minam Khat, Pau Khat ahih theih na ding a thupi mahmah ahi a, ahih hang in I ki pumkhat theih na ding in sep masak ding ahihlohna I kikum khin hi. Minam tuamtuam, Mivom, Mikang, Misan a tuamtuam kigawmna leh Pau Taangpi khat aki zatna US leh Leitung bup minam kim a omna ahi Singapore gamte en leng akibatlohna un Minam khat ahihna, Gamkhat ahihna khaktan tuanlo hi. Hih in gam khangtote ahihna uh tawh kizui in a tawpna ah Pau Khat, Minam Khat a om hong suak hi. A suah hun ding a cing nailo naunge khat thagum hatna tawh saal khiat gawp tawh kibang thei hi. Hoih khin zaw lo thei hi. Tua ahih man in Zomi sung ah pau ke neu tuamtuam a omna lak pan in a neuzawte I hah nial, I hah sawl sawm leh hong ki kaak tektek zaw thei ding a, ahih hang in ki sang siam thei in, kithupi sim pih ciat thei peuh leng a hunk hat ciang in taangpau, pau nam khat hong om to ding hi zaw hi.

Thukhupna
            Zomi-te sung ah Biakna, Khua leh Tui, Sak leh Khang, Kham leh Zaang, Beh leh Phung cih bang in ki batlianlohna leh I omna leh I khankhiatna khua leh tui zui in dante zong a tuamtuam, paute zong a tuamtuam a om hi. Tuate khat in a dang khat zawhthawh thu tawh neng cip ding leh nawl khin ding hilo zaw a, Pasian’ hong bawlsa ihihna bang bang tawh I Biak Pasian in zong I hih dandan tawh hong sang buang ahih man in, ei leh ei zong ki sang (accept) kim ciat in, ki telsiam (understand) ciat peuh leng tua I kibat khiat lianlohnate mah in Zomi khempeuh Minam Picing Khat, Gam Picing Khat ihihna hong kilang sak zaw dinghy. Mun leh gam in hong khen mah ta leh, i zia I tong in hong khen mah ta leh, tuipi, tuita in hong khen mah ta leh laizom khat, Innkuan khat, Gam Khat Minam Khat ihi hi. Zomi Khempeuh Gamm Khat Minam Khat ihi hi!

Divide and Fall or Unite and Rise…

Tuunsung Khat Pan
Tuunsung khat pan piang hi ngeingei hang e
Sakmi khangmi ki khenlo in

Mimbang pianna ciimtui vangkhua

I heina pian in dang zongleh
Sin lai pai tembang kuah chiat ve ni

#Zin in khenmaw, Sianmang khenmaw

      Sinlai ah na sa'ng e

      Gibang khenzong lung ah kingilh kei ni
      Tuunsung khatpan piang hi ngeingei hang e

Sinthu tuibang luang khawm den ding

Kawlgam vaigam gibang khenzong

Sim lei tuibang gawmlo mahleh
Thangvan ah tuibang ki gawm khawm ding


Source ; zomi.net



Lai gelhpa Disciple Kap Sian (Taang Sianpu) leh Cinpu Zomi (www.cinpuzomi.com)

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Zomi-te: Gam Khat, Minam Khat (The Zomis: One Nation One People) Description: Rating: 5 Reviewed By: Cinpu Zomi
Scroll to Top