728x90 AdSpace

Hot
Menu
Zon-ol na Donate

Latest News

Pau Cin Hau Siangsawn Pasian tangthu (Atom in)



Tapa Pau Cin Hau hongpai ma hun:-

1. Pasian Tapa Pau Cin Hau hong pai ma in Zomite in dawi gilote ukcipna athuak uhhi. Asia apha khempeuh dawimangpa bawl hi, ci-in um uhhi. Tua dawimangpa lungkim nadingin a hunzui-in inn aa khawi ganhingte ii asi asa tawh biakpiakna abawl uhhi.

2. Vantung ah dawi khuapi om aa, mihingte asih uh ciangin akhaa uh dawi khuapi tunghi, ci in a um uhhi. Tua dawi khuapi tuntheih nadingin inn a kikhawi ganhing te ii a sungkua leh a sate tawi in a masot ciangin maipha mu hi, ci-in um uhhi. Tua ahih ma in asih uh ciangin ganhing gawhna ngeina a piangsak hi. Amau neihsa ganhing a omkei leh midangte kiangpan leitawi aa, apiak kik zawhloh uh ciangin a sila asuak hi. Misi te in amau mat galte leh a sila te ii khaa dawi khuapiah sal leh sila in ki zanghthei hi, ci-in a um uhhi. Hih thu hangin mihing thahna leh gamsa matna te nasep thupi in ngaihsun in a um uhhi.


3. Hih bangin gal aihna tawh tungnun kituhna pawi, sa aihna tawh tungnun kituhna pawi, tangza aihna tawh tungnun kituhna pawite abawl uhhi. Hih tungnun kituhna te hangin mi khat leh khat, khuakhat leh khuakhat, minam khat leh minam khat, u leh nau zui-in gal aa kidona, phu kilakna , a lelte in a zote ii sila suahna te hong piangkhia hi. Mihing khat ahih nak leh tungnun kituhna pawi bawlnate ahanciamna pan amaa neihsa in azawh loh ciangin mite aa leitawi aa pawibawl teitei na pan a lohkik zawhloh ciangin a sal leh a sila asuak hi.

4. A cidamlo natna athuak te in amau neihsa van leh sum leh paaite tawh azawh nawnloh ciangun mi kiangah leitawi in dawimangpa biakpiakna in nei aa, a lohkik zawh nawnloh ciangin a sila asuak hi. Numei te in lolai ah lokho in pasal te in lonawl pan galvil in va-ak lau anne bangin a nungta uhhi. Numei te ii lolai pan a khawhsa vaimim, taang, vui leh gahte zu in sa aa, dawite biakpiakna leh tungnun kituhna pawite ah azat manun gilkial dangtaakna apiang hi.A tawpna ah mite sal leh sila suahna dong atung hi. Dawi gilote in mihing khat leh khat tungnun kituhna, ki nenniamna tawh hong ki ukcip sak hi. Hih in a sisa pi leh pute ii khaa leh dawi gilo upna ii thaman ahi hi.

Honkhiapa hongpaina
5. Hih bangin mihing nuntaakna hatsatna banah na khempeuh a piangsak Pasian ii hongpiak thupha khempeuh dawite in hongsut in a tawntung in hong nengniam uhhi. Leitung mihingte tungaa dawi mangpa thuneihna khempeuh pan ahong honkhia dingin na khempeuh a piangsak Pasian in amaa taa'ngin a Tapa Pau Cin Hau mihing ci leh sa tawh leitungah hong paisak hi. Pasian Tapa Pau Cin Hau in leitungah hongpai ma in na khempeuh a piangsak Pasian maanna vantung Siangsawn Kham khuapi ah vantung kumsim in kum tampi vantung sawltaakpi in na asem khinzo hi. Amah in Siangsawn khamkhuapi ah Pasian nasepna te a zawhsiang khit ciangin leitung mite khempeuh dawi gilote ii nuainen bawlsiat tawntung na pan hong honkhia ding leh Siangsawn kham khuapi ah leitung mihingte khaa amaan theih nadingin leitungah a hongpaihi.

Pasian Tapa Pau Cin Hau leitungah hongpai nading limlahna leh hong suahkhiatna
6.Minghing tapa Pau Cin Hau leitung ah hongpai ma in thu lamdang lim kilah kholhna apiang hi. Lamdang takin Ni awk in kha a awk hi. Ukpite mang ah nitaang kualpi in naupang khat a umcip hi. Amah leh amah in "Kei in Pau Cin Hau hi ing,"ci-in aki gensak hi. Leitungah mi lamdang mi vanglian uk za nei hong piang dinghi, ci-in mailam thu a ngaihsun thei a mukhol thei mipilte in mang akhia uhhi. Hauh Tuang, Pau Vum, Khan Lian, Cing Zam te tungah mang lamdang kipia denden hi. A nu Cing Zam in a paai hunsung in naungeek kimkot ah vaangtaang in a umcihna thu a mangmat hi. Pasian Tapa Pau Cin Hau in apa Khan Lian, anu Cing Zam te sungpan 1859kum December kha in Tediim khua ah asuak hi.

Pasian Tapa Pau Cin Hau Pasian teelna leh Pasian nasepna
7.Pasian Kamsangpipa dingin aki teel Tapa Pau Cin Hau in leitungah mihing ci lehsa tawh hongpai khit ciangin 1876 tapa kum(17) aphak laitak Tediim khua-ah Nuam Dim kici Pasian kamsang khat apiang hi. Tua laitak in Tediim khua ah Pu Khua Cin amaan hun ahi hi. Nuam Dim in Tediim khua ah mipil tampi om ahih hanginPasi an in Pau Cin Hau deihhi, ci-in a tangko khia hi. Tuahun laitakin Tediim gam ukp ipa Pu Khua Cin in laangva inn adeih hi. Na khempeuh apiangsak Pasian in Nuam Di m tungtawn in thu kilangh sakaa, Khua Cin in laangva inn deihkei hen, laangva in adeih leh ata Hau Za Kham leh anu Ciin Ngul kala dinghi. Khua Cin ka inn gamhsak dinghi. Tediim khua ka mangsak dinghi, ci-in thu apia hi. Khua Cin in Pasian thupiakna manglo ahih manin ata Hau Za Kham leh anu Ciin Ngul si aa, Khua Cin inn gamh in Tediim khua amang hi.

8. Pu Khua Cin tapa Hua Za Kham aki vui ni in na khempeuh a piangsak Pasian in Khua Cin tuangdung ka kuaitan dinghi, ci ahih manin a laangkhet ni in Pasian kamsang Nuam Dim sawlna bangin Pasian Tapa Pau Cin Hau in kuamah zahtaak lo-in mipi maiah a tangko khia hi. Hau Za Kham kivui ni ciangin misi luang hong ki pusuah aa, bikhalap hongtun laitak in khuaphia aa vanpi mau bangin lamdang takin vanpi lum in Khua Cin tuangdung ki phahna zawl zabo aa sah ki tan in mi tampi innnuai ah akia hi. Tuahun pan kipan na khempeuh a piangsak Pasian in a tapa Pau Cin Hau lungsim khuazakna tawh hopih in 1879 tapa kum (20) aphak aa kipan vantung Siangsawn nuntaakna thusiangtho apia hi.

Nuntaakna thusiangtho thupiakte
9.Aki gensa mihingte nuntaakna hatsatna kawmkal ah na khempeuh apiangsak Pasian in a tapa Pau Cin Hau tungah,
1)     Vantung thusiangtho thupha zuihding thu leh zuihkei leh gimthuak dingte,
2)     Dawi gilote tawh kum (8) kidemna zosak in hawlkhiat sakna,
3)     Pasian ni zuihding thupha te,
4)     Vantung Siangsawn Pasian lai leh Zotuallai,
5)     Leitung pian leh khan kikhek nading lahkholhna,
6)     Vantung thuap (30) Siangsawn gamnuam velsakna,
7)     Dawigam gawtna mun velsakna,
8)     Guihtheih khamtheih zu tawh kisai nuntaakna thusiangtho,
9)     Leitung mihing pianna,
10)  Na khempeuh apiangsak Pasian in a Kamsangpipa ding aa teelna,
11)  Siangsawn Pasian minphatna Sanginnpi lamh nading leh leitung mihingte hotkhiatna,
12)  Nin leh siang khenna,
13)  Namdangte upna deihgawh kei un,
14)  Pasian nuntaakna tuisiang ,
15)  Nupa suahna thugui leh nupa suahna tuisiang ...te pan kipan nuntaakna thusiangtho te apia hi.

10. Na khempeuh a paingsak Pasian sawlna bangin dawi gilote hawlkhia aa Pasian Siangsawn thusiangtho a hilhkawm in dawi biakna nam (68) a phiat ciangin ukpite, hausa liante, siampite ii phiangsaih ( siah leh kaih ), mim siah taangsiah, saliang sapa (innsa gamsa) tawm in bei ahih manin Pasian Tapa Pau Cin Hau lum leh tei tawh thah dingin a sawm uhhi. A tawpna ah a  sawltaakpi te sungpan lungsim gi nalo, mi hoihlote ii leh do langpan na a piangkhia hi.

11. Pasian Tapa Pau Cin Hau ii nungzui pite in tungnun kituhna, kiliatsakna, gal-aih sa-aihna pawite abawl banah Pasian deihloh beeltung zatna, khutdawh domna, aisaan na, ki mutna te leh khut lam-etna te Pau Cin Hau Pasian Siangsawn thusiangtho sungah gawm in zanghkhawm uhhi. Tua ciangin na khempeuh a piangsak Pasian in "Kata aw, na thuzui mite in ka thusiangtho leh ka thupha hong zuilo hi," aci hi. Dawimaangpa tawh a kizom biakpiakna gamtatnate khempeuh zanghlo in a beisiang nading ahilh banah Pasian siangsawn thusiangtho taktak hilh in, nin leh siang khen in ci-in asawl zelzel hi.

12. Na khempeuh a piangsak Pasian in vantung Siangsawn kham khuapi pan a Tap a Pau Cin Hau tungah vantung siangsawn thusiangtho leh thupha zui un, ci aa thup iakna mah bangin Pasian Tapa Pau Cin Hau makaihna tawh 1938 kumin Lailui khua a h vantung siangsawn thusiangtho azui nuam 
(1)Pu Vum Khua Thang, 
(2) Pu Lian Khaw Zam, 
(3) Pu Lian Khaw Vungh,
(4) Pu Tun Nang, 
(5) Pu Ngam Za Cin, 
(6) Pu Tun Za Thang, 
(7) Pu Khup Khaw Suan, 
(8) Pu Ngam Kai te in Pau Cin Hau Pasian Siangsawn pawlpi ahong phutkhia masa uhhi. 

Siangsawn cih in "A siangtho te lakpan a siangtho pen" cihna ahi hi. Siansgawn a khiatna in anuai aa bang ahi hi.
a) Pau Cin Hau cih in na khempeuh a piangsak Pasian Tapa ii min ahi hi.
b) Pasian cih in Tapa Pau Cin Hau tungah vantung siangsawn nuntaakna thusiangtho apia, na khempeuh a piangsakpa ii min ahi hi.
c) Siangsawn cih in na khempeuh a piangsak Pasian maanna gam a siangthote sangin asiangtho zaw vantung thuap (30) Pasian innpi leh na khempeuh a piangsak Pasian honghilh nuntaakna thusiangtho thumaan na leh thumaan gamtatna tawh kizui in a nuntaak pihte cihna ahi hi.

13. Na khempeuh a piangsak Pasian minphatna ahi siangsawn minphatna late, Pasian nuntaakna thusiangtho leh kammal siangthote, Pau Cin Hau Pasian Siangsawn cih kammalte anei bulpi ( မူပုိင္ ) tawh kisai in na khem peuh a piangsak Pasian deihna thuk in nellua mahmah ahih manin amaa deihna bangin zuihna leh gamtatna, a maa minsiangtho phatna, a tapa Pau Cin Hau mintawh deih angen misiangtote in anei bulpi ( မူပုိင္ )te ahi hi. Siangsawn Pasian thusiangtho in aki patcil in kamsangpipa Pau Cin Hau phuatkhiat ahi hi. Siangsawn cih kammal in na khempeuh a piangsak Pasian minphatna la No. 27, 30, 72, 76, 80, 90, 97, 98, 100, 120, 121, 129, 132, 133, 135 te ah Siangsawn cih kammal tawh laphuak in aki ciamteh banah Siangsawn lapi tawh na ki ciamteh hi.

14. Pasian Tapa Pau Cin Hau phuatkhiat Siangsawn pawlpi in kim leh paam, u lehnau te tawh kizopna hangin siangtho takin upna leh zuihna damdam in hongkiam hi. Hih bangin 1948 Decembet (28) ni-in Pasian kamsangpipa Pasian Tapa Pau Cin Hau in leitung hong nusia in Siangsawn kham khuapi ah amaang hi. Tapa Pau Cin Hau nungsang ah nungzui pite in amaute ii minphatna, gamtatnate leh Siangsawn thuzuihna ki lamdanna thu amuh uh ciangin Siangsawn tawh kituak aa nuntaak theihna, kalsuan theihna hong om nawnlo ahih manin Pasian Kamsang pipa Pau Cin Hau minphatna in " Laipian pawlpi" cihding hong thukim uhhi. Laipian pawlpi in Pasian Siangsawn pawlpi thuzuihna ukcip in mangthang sak hi.

Hilhkikna Pasian Kamsang hongpai na leh a lamdang ki hilkholhna te
15. Hih bangin Laipian pawlpi hong kiphut aa, Pasian ni thupi nite ah Pasian deihna bang zuilo in ganhing thahna, nuntaakna anei khempeuh siatsakna, guihthei h khamtheih zozu leh zuhang te zatna, leitung nusiatna(sihna ) hunte ah i nn aa kikhawi ganhingte thahna, zozu leh zuhang te zatna, guihtheih khamtheih ta wh lengla dona, zozu leh Pasian nuntaakna tui hel in minphatna bawlna, Pasian ni thupi nite ah ganhing that in leitung ki liatsakna pawi bangin bawlna... cih ba ngin kilawm lo takin aval in kizangh hi. Hih bangin Pasian thuzihna sungah thang huaina hong om ciangin Pasian thuzuihna thaksuah kik theih nading, theihloh tell oh thute hong hilhkik ding leh nin leh siang khen dingin 1995 November (29) ni-i n na khempeuh a piangsak Pasian in kamsangthak hong paisak hi.

Pasian kamsangtha k hongpian nadingin ki hilkholhna lamdangte apiang hi.
a) 1968 kum July kha ni (10) ni-in apa Pum Khan Thang leh anu Ning Khan Niang te sungpan Lailui khua ah asuak hi.
b) Amah in a neutung pan kipan mang lamdang tuamtuam te aman hi.
c) 1993 Nov, 29-30 nitak leh Dec 1 nitak te in Lailui khua Laipian Pau Cin Hau Pasian paaina pawlpi huangsung lutna signbord tungaa teipaak lim lamdang takin khuaphelep mei bangin ataang hi.

Pasian Kamsang thak Siangsawn Sayadaw U Kam Suan Mang ii Pasian nasepna
16. Na khempeuh a piangsak Pasian in 1995 Nov (29) ni zingsang nai 7:00 pan kipan a thanghuai Pasian thuzuihna sungpan anuai aa thute bulphuh in na a semsak hi.
a) Misiangtho kaihkhopna,
b) Khaa ki hualna,
c) Na khempeuh a piangsak Siangsawn Pasian tawh kizopna,
d) Dawi gilo khutsung pan hotkhiatna
e) Nin leh siang khenna.

17. Na khempeuh a piangsak Siangsawn Pasian thupiakna bangin kamsang thak Siangsawn Sayadaw U Kam Suan Mang in Pasian thuzui mite omna khua leh inn sim ah pai in atung aa bulphuh thute gen in Pasian na asem hi. Minphatna Sanginnpite zong Siangsawn Pasian thupiakna bangin puankang zatna, Kamsangpiapa maan suanna, Minphatna Sanginnpi dawlthum aa bawlna, Siangsawn Pasian sumpi bung koihna, Siangsawn Pasian tawh kizopna hong bawlsak vantung mite zum phuhsakna te aki bangin hong bawlsak banah Siangsawn Pasian minphat hunzong mun khempeuh aki bangkiim ding in hong bawlpih hi. Siangsawn Pasian thu um mite in amau innciat ah Siangsawn Pasian tawh kizopna bawltheih nadingin Siangsawn Pasian deihngetna Sanginnpi bang in vantungmite zum phutsak in aki bangin hong bawlsak hi.

18. Na khempeuh a piangsak Siangsawn Pasian thupiakna bangin Siangsawn Pasian Kamsangthakpa in thu um mite innsim leh khuakim ah hong bawlsak khit ciangin sepna sate etkikna 1998 kum in Laimaangpipa phalna tawh anih veina Pasian thu um,thuzui mite innciat ah pai in Pasian na hong semkik hi. A nihvei paina etkikna te a mankhit ciangin Lailui khua Minphatna Pasian Sanginnpi ah Zum phutsak in cidamlo te Siangsawn Pasian nuntaakna tui tawh a honkhia sak hi. 2000 kum ciangin Siangsawn Pasian thupiakna bangin Lailui khua Pasian Sanginnpi panin Teeklui khua Pasian Sanginnpi ah Pasian na semsak hi. Lailui khua leh Teeklui khua Siangsawn Pasian Minphatna Sanginnpite ah Pasian na asep sungin a lamdang natna tuamtuamte, zatui zawhloh natna lamdangte, bum natna te aa kipan ta nei theilo te ta neih theihna dongin natna gentheihna athuak mite khempeuh upna tawh a zuante Siangsawn Pasian nuntaakna tuitawh atul aa simin a honkhia hi.

Siangsawn Pasian Kamsangthakpa ii a lamdang Pasian nasepna te hangaa phattuamnate
19. Pasian Kamsangthak Siangsawn Sayadaw U Kam Suan Mang ii a lamdang Pasian nasepna te hangaa phattuamna pawlkhat in anuai aa bang ahi hi.
1) Pasian Siangsawn Kamsangthakpa in khaa mit muhna, lungsim khuazakna te pan asiangtho, a manpha khaasiangtho nasepna atuamtuam te theihna muhna ngah aa ah un zui in Vantung Siangsawn Pasian tawh kizopna anei hi.
b) A beisa, tuhun, mailam aa thu piang leh thupiang dingte theihna leh muhkh olh theihna, genkholh theihna pan kipan mihingte ii lungsim gentheih haksatna, pumpi gentheih haksatna te panin hotkhiat theihna thu leh genkholh theihna thute anei hi.
c) Vantung Siangsawn Kham khuapi aa maang Pasian min tawh hi taleh, Siangsawn Pasian nuntaakna tui tawh hi taleh gimna tawlna, natna satna, gentheihna atuam tuam athuak mite pan kipan zatui zatang tawh kibawl in cancer ( ကင္စာ ေရာဂါ ) nat na te pan kipan natna lian tuamtuamte damsak theihna apiang hi.

20. Tua banah a beisa, tuhun, mailam aa piangding, a piangsa, apiang laitak, apiang lai ding theihnop thute khempeuh theihsak theihna te hangin lungsim gentheihna pan lungnopna, gimna tawlna, natna satna, thuakna pan dam siangthona ngahsak kikna te hangin atul aa sim mi tampite in sin nopna lungnopna, lungdamna angah uhhi.

Pau Cin Hau Pasian Siangsawn Pawlpi phuhkikna
21. Na khempeuh a piangsak Siangsawn Pasian vangliatna hangin Siangsawn Pasian Kamsangthakpa ii Siangsawn Pasian nasepna te a munmun, a gamgam, a khuakhua ah a lunglut mi nisim in hong khangkhia hi. Thu um mite in zong khaa khanlawhna, pumpi taksa khanlawhna, lungsim khanlawhna nasia takin hong khangkhia hi. Ahi zongin khaa tha a zawngkhal mite siangsawn Pasian tawh kizop nading a thazawm mipawl leh a khanghlo mipawl ci-in namnih in hong om hi. Na khempeuh a piangsak Siangsawn Pasian deihna bangin ngaihsut gamtat kampau adeih Siangsawn Pasian Kamsang thakpa leh apawlte in Minphatna Sanginnpite leh neihsa vante khem peuh 2006 May kha (26) ni in Siangsawn Pasian Kamsangthakpa a deihlo asang zolo pawlte tungah avek in a apkhin hi. A ap khitna thu thunei kumpite leh aki sai na hausa te tung ah thukohna bawl in Myone biakna Zumpi pan Pyinee biakna Zumpi ah suakta taka zuihtheih nading leh pawlpi kipsak na thu phalna hongpiak nadingin ki ngen hi.

Pyinee biakna Zumpi panin Pau Cin hau Pasian Siangsawn pawlpi phuh theihna thu leh kipsakna thu ciaptehna 2007ခုႏွစ္ ႏုိဥင္ဘာလ(၉)ရက္စဲြပါာအမွတ္၊၄၉၆.ပနသ(ခ်င္း)၂၀၀၇ tawh athu hong zasak kik hi.

Bualzang ah Pasian nasepna leh Zum phuhna thu

22. Pau Cin Hau Pasian Siangsawn Pawlpi Teeklui khua ah a kineih sungin na khempeuh a piangsak Siangsawn Pasian in khaasiangtho lamkaihna tawh honghilh in hong lamkaih tawntung hi. Na khempeuh a piangsak Siangsawn Pasian in Kamsangthakpa tungah a tawntung aa Siangsawn Pasian nasep nading Zumpi Bualzang mun velsak in, thupha apiak sak zelzel banah Siangsawn Pasian nuntaakna tuitawh zong thupha pia in a apsak zelzel hi. Pau Cin Hau Pasian Siangsawn pawlpi in Minphatna Sanginn pi pan kipan neihsa van khempeuh a apkhit zawhnung ah Pasian Minphatna Sanginnpi nei nawnlo ahih manin thupha apiak kholhsakna sa Bualzang ah Siangsawn Pasian minphatna leh Siangsawn Pasian nasepnate bawl nadingin thu apia hi. Siangsawn Pasian thupiakna bangin 2006 kum pan kipan Bualzang ah Pasian minphatna, deihngetna, Pasian nasepnate kisem hi. Tua mah bangin Siangsawn Pasian thusiangtho auma zuite zong a teeng uhhi.

23. Pau Cin Hau Pasian Siangsawn pawlpi Gambup nasepna phual Bualzang ah 2007 August kha (20) ni-in ျပည္နယ္ ေအးခ်မ္းသာယာေရးႏွင့္ ဖြံ႔ၿဖဳိးေရးေကာင္စီ ဥဗဌ ဗုိလ္မွဴးခ်ဳပ္ဟုန္ငိုင္း makaihna tawh ျပည္နယ္ ဌါနဆုိင္ရာအႀကီးအကဲ te, ဖလမ္းခရုိင္ေအးခ်မ္းသာယာေရးႏွင့္ ဖြံ႔ၿဖဳိးေရး ေကာင္စီ ဥကဗဌ leh ဌါနဆုိင္ရာအႀကီး အကဲ te, တီးတိန္ၿမိဳ႕နယ္ေအး ခ်မ္းသာယာေရး ႏွင့္ ဖြံ႔ၿဖဳိးေရး ေကာင္စီ ဥကဗဌ leh ဌါနဆုိင္ရာအႀကီးအကဲ te hongpai in hong vel uhhi. ျပည္နယ္ဥကဗဌ pa in Niiangteh lamlak khua ( လက္ဖက္စံျပေက်းရြာ) kipsak nading leh khuapi tawh kizop nading mawtaw lam bawl nading, niangteh te a etlawm aa suan beh nading, innmun te a ngeina bangin hoihtak aa hawm nading, innte zong lambeh nading pan kipan ေက်းရြာေအးခ်မ္းသာယာေရး ႏွင့္ ဖြံ႔ၿဖဳိး ေရး nasepnate aki muthei aa sepzawh nading leh akip akho khua asuah nadingin hong vaikhak hi. 

Thuzui mite in zong ျပည္နယ္ဥကဗဌ pa ii hong vaikhakna te lungdam na tawh muak in sang aa, niangteh ciiinna, teenna innte lamhbeh na, khuapi tawh kizopna mawtaw lampi bawlna, khuasung a etlawmsak ding naitaupi ( နာရီစင္) bawlna, ကုိယ့္အားကုိကုိး စာၾကည့္တုိက္ honna, ကုိယ့္အားကုိကုိး မူႀကဳိ sang honna, khuasung gamdaihna leh nopcit nading khantoh nasepnate ah kipawl khawm in nasia takin asem uhhi. Tu in inn (50) val leh mi (200) val bang kipha aa, ၿမိဳ႕နယ္ေအးခ်မ္းသာယာေရး ႏွင့္ ဖြံ႔ၿဖဳိးေရးေကာင္စီ ii thupiakna bang mang in gamdai tak leh nopci takin ateeng uhhi. 

Pau Cin Hau Pasian Siangsawn pawlpi thukhun ( ဖဲြ႔စည္းပုံ )
24.  Pau Cin Hau Pasian Siangsawn pawlpi thukhun ( ဖဲြ႔စည္းပုံ ) adawl dawl anuai aa bang ahi hi.
a) Pau Cin Hau Pasian Siangsawn Council,
b) Pau Cin Hau Pasian Siangsawn Pawlpi Gambup upapi te,
c) Pau Cin Hau Pasian Siangsawn Pawlpi Gamkhen upate,
d) Pau Cin Hau Pasian Siangsawn Pawlpi Thutangko upate,
e) Pau Cin Hau Pasian Siangsawn Pawlpi Lapawl upate,
f) Pau Cin Hau Pasian Siangsawn Pawlpi Numei upate,
g) Pasian Siampi ( Siangsawn Pasian nuntaakna tuitawh thupha piapawl)ci-in kivawh aa anuai aa bangin panmun hawmna kinei hi. 
1) Lokhawhna lam Siampi,
2) Gankhawina lam Siampi,
3) La leh tumtheih saitheihna lam Siampi,
4) Inn leh neihsa lamhsa Siampi,
5) Pilna lam Siampi,
6) Sumlei sumzuakna Siampi,
Ciamteh:- Cidamna lam tawh kisai in hih siampi khempeuh Siangsawn Pasian nuntaakna tui tawh thupha piakna sem thei hi. 

25.  Khua / veeng zui-in akul bangin Pau Cin Hau Pasian Siangsawn pawlpi upa panmun kivawh thei hi. 

Pau Cin Hau Pasian Siangsawn pawlpite upna bulpi ( အဓိကယုံၾကည္ခ်က္ )
26.  
1) Van leh lei abawl Pasian, Ni leh kha aksite abawl Pasian, Mihing leh nuntaakna anei aneilo na khempeuh a piangsak Pasian, ci natna adamsak thei Pasian khatbek ki um hi.
2) Tua Siangsawn Pasian in a bawlsa na khempeuh a vangliatna tawh uk hi, ci-in ki um hi.
3) Leitung mihingte in vantungmite sung panin piangkhia hi, ci-in ki um hi.
4) Leitung mihingte dawimangpa ii ukcipna pan hong honkhia dingin Pasian in amaa taa'ngin a tapa Pau Cin Hau leitungah hong sawl hi, ci-in ki um hi.
5) Na khempeuh a piangsak Siangsawn Pasian in a tapa Pau Cin Hau tungah Vantung SiangsawnPasian lai leh Zotuallai lungsim khuazak na tawh pia hi, ci-in ki um hi.
6) Na khempeuh a piangsak Siangsawn Pasian in a tapa Pau Cin Hau tungah leitung mihingte a hotkhiat nading leh thupha apiak nadingin a nuntaakna tuipia hi, ci-in ki um hi.
7) Na khempeuh a piangsak Siangsawn Pasian tapa Pau Cin Hau min bektawh vantungmite leh vantung galkapte zattheihna thu a omna, vantung thupha leh leitung thupha khempeuh ngah theihna thu om hi, ci-in ki um hi.
8) Siangsawn Pasian maanna gam vantung thuap (30) na mun in Siangsawn misiangtho te ii khaa pumpi maanna Siangsawn kham innpi hi, ci-in ki um hi.
9) Vantung Siangsawn innpi ah amaang misiangthote ii khaa vanmisiangtho in taksa teenna gamah thupha piakik hi, ci-in ki um hi.
10) Pasian Siangsawn thusiangtho a langpang mite tun nading dawigilo gawtna gam a omhi, ci-in ki um hi.

Pau Cin hau Pasian Siangsawn thuzui mite zuihding thute
27.  
1)Van leh lei abawl Pasian, Ni leh kha aksite abawl Pasian, Mihing leh nuntaakna anei aneilo na khempeuh a piangsak Pasian, cinatna nam khempeuh a damsak Pasian khat bek a minphat dinghi.
2) Siangsawn Pasian pawlpi thutawh ki lehbulh lo ngeina te zui in zangh ding hi.
3) Na khempeuh a piangsak Siangsawn Pasian nithupi ni te ah thupha bawl in

Pasian min leh a vangliatna te phatna leh pahtawina bawl dinghi.
a) Pasian ni ( Sunday )
b) Pasian Siangsawn Lapawl te ni { Febuary 21 }
c) Pasian Siangsawn Nute ni { April 9 }
d) Pasian Siangsawn Thutangko te ni { July 10 }
e) Misiangtho pawi ni { Phalkha liik ni }
f) Pasian Zat mite leh Upate ni { Nov 29 }

Atung aa (f) na pen kumsim in aki bawl banah 1995 kum pan kipan aki she to kum (8) cin sim in atuam vilvel Pasian minphatna pahtawina pawi kibawl dinghi.
g) Tapa ni ( Siangsawn Kumthak ) { Kau kha kiam 13 }
4) Nisim in khatbek ahi zongin honpi in ahi zongin Pasian minphatna bawl dingaa, nisim in lungsim masa, kammal masa, piakkhiatna a om zahtawh vantung Siangsawn Pasian min leh a vangliatna te phat in pahtawi dinghi.
5) Hong uk Kumpi te thu mang dinghi.

Pau Cin hau Pasian Siangsawn thuzui mite pelhding thute
28.  
1) Siangsawn Pasian deihna tawh aki lehbulh dawi biak ngeina gamtatna leh pawite bawllo dinghi.
2) Leitung nusiat (sihna) hunciangin Siangsawn Pasian deihna khaa upna tawh kilehbulh tanglai upna dawi biakna, ganhing thahna, tungnun kituhna tawh pawi bawlna, tungnun kituhna tawh sihvuina te bawllo dinghi.
3) Zuau thutawh mi taa'ng in thukho panglo dinghi.
4) Pumpi thazawm sakthei, lungsim thazawm sakthei, khaa thazawm sakthei, asia sakthei, a bawlsia thei guihtheih khamtheih khempeuh zanghlo dinghi.
5) Pau Cin Hau Pasian Siangsawn pawlpi in hong uk kumpite vangkiam vangneu nading leh Pasian Siangsawn thuzuihna tawh ki lehbulh ngaihsutna, gamtatna, kampau na te zanghlo dinghi.

Upapi
Gambup Siangsawn Pawlpi
Bualzang (Siangsawn)
Tedim.

SSource ; siangsawnmodelvillage 

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Pau Cin Hau Siangsawn Pasian tangthu (Atom in) Description: Rating: 5 Reviewed By: Cinpu Zomi
Scroll to Top