728x90 AdSpace

Hot
Menu
Zon-ol na Donate

Latest News

SIALSAWM PAWI. Agelh - Dr. Dal Lian

Agelh : Dr. Dal Lian

Sialsawm pawi a kici pen nidang lai a, Zo mite pawia thupi khat a hi hi. Akipatdaan leh a min khiatna geen daan tuamtuam om hi. Pawl khat ten Hih pawi bawlna ah biak piak na om a tua biak piak na ah mihing na ngawn tawh a ki biak hun om hi ci uh hi. Tua bang a mihing tawh biak piak na pen naakpi tak a sawm vai hawm kuul ahih manin SIALSAWM ci uh hi. Sial pen Zomite khawi gan hing lak pan a lian pen leh a tam man pen hi a mihing tawh ki thoih na zong biakpiak na lak pan a mulkim huai pen leh man saang pen a hih man in hih pawi pen sialsawm kici hi a ci pawl zong ki om hi. Pawl khat leuleu in hih pawi pen LAWM ANNEEK ci uh hi. A diak in Tonzaang khua leh a kiim a paama khua ten lawm anneek ci in an ne khawm takpi uha ,a mau a ding in pawi nuam leh thupi khat a hi hi. Sialsawm/ Lawm Anneek pawi pen amah a hong om mawk ahi kei hi.

Hih pen a ciilin gualnop pawi zonghi lo hi. Biakpiak na pawi hi a, a nunglalm ciangin biakpiakna saang in ahong kithupi bawl zaw a ,gualnop bawlna pawi khat hong suak hi. Hih pawipen a taangpi in April kha a kaal nihna leh thumna pawl in kibawl deuh hi.Bang hang hiam cih leh taanglai a ipu ipaten sing taang lo na kho uha anpen August, September in na la khin uh hi. Buh ciingten October kha in lauh hi. An a laak thit tuungun an hau kisa uha ,lungnuamin, zu sa uha anlaak pawi pi khat bawl iuh hi.. Tua pen KHUADO PAWL kici hi. Khua a kido khit ciangin kha nih sung bang tawlnga uha tua hun sungin innlam nasep inn puah huan bawl cihte seem uh hi. Bang hang hiam cih leh October,November pawlin gam lakah lopa saang thei mahmah a, gamlak vaak nuam mahmah lo hi. December kha hong hih ciang in , kum thak cianga a lokhawh nading mun uh en khol uha , a logamte uh hawmin, sing nuai lak vaat siang uh hi. January kha ciangin sing phuuk uha, a singtee keu sak uh hi.March kha sungin lo haal uha, a kaangtum lote tom khawm uh hi. Tua pen MangTom kici hi. Lo tulsa khoten ham tom uh hi. March kha bei ciangin a loteng uh hah siang sa-in koih uh a, guahtuui ngak uh hi. Khaicite zong bawh-in tuh khin uh hi.Lo khawh nasep pen guahtuui a kinga nasep hi a guahtuui a hoih ciangin an kihau a,guahtuui a ginaat loh ciangin an kihau lo hi.


Tua ahih manin, a kituh khinsa khaicite limtaka hong po, hong khan nadingin, muh theih lohte kiangah huhna na ngen uh hi. Tua muh theih loh pen KHUASIAM kici hi. Tua khuasiam bia dingin khua sunga siampi lian penpa in makai hi. Tua Banga biakna pen TUAL biakna kici hi. Tual i cih pen mun zaang khatpeuh hi a, kimawlna mun zaang lian pen TUALPI biakna kici hi. Inn maai a zaangpen INNTUAL kici hi. Tua TUAL BIAKNA mun pen khawsung laizang khawnawl, ciktui omna gei khatpeuh hi nuam deuh hi. Tual biakna kibawlna munah suangnih A tung lamin kiphuta, atungah suang peek khat kikham phei hi. A nung lamzong suang peek khat mah tawh kidaal hi. Tua bangin a maai lam bek vangin kibawl hi. Tua tualsuang omna zuan in SIAMPIPA ,TUALTEEKTE, TUALPHUISAMTE, TUAL TANUTE(TUANVAITE) khaw sung mi khempeuh sik leh taangin va pai uh hi.Amau bawl bangin kisaang hi. Tua tualbiakna a pai ding mi kitam sak lo hi. A diakin numeite kipai sak vetlo hi.

Bang hang hiam cih leh tual thoihna a kineih ciangin KAMPAU ZEHTANNA kinei a, mi kitam leh a zehphih kha ki-omkha ding hi. Tua banga a pai uh ciangin, a tualgam ding uh hawl pah uh a,a mun a tun uh ciangin, tualgan pen Siampipa in zu hih-in khuasiamte tungah aapna nei hi.Tualgan pen Siampipa' inn ah kigo a, ken ding teng tawh tual biakna muna pai hun zongh om hi. Tualgam pen vok leh bawng hi deuh hi. Sial tampi a khawi khuate'n zingh tualgan dingin vok mah zangh uh hi. Vaangteh khua ah tualbiakna pen vok tawh a kibawl gige hi a, kum khat sial tawh a biak uh leh thupi kisa lua ahih manin, tua ni pen SIALSAWM ni ci uh hi. Tanglai a Isrealte'n gan-gawh biakna a neih uh ciangin, tua ganhing in Topa Jesu limla ahih manin, poina leh hemna himhim neilo ding hi a cih Mah bang, tual biakna a tualngan zongh poina hemna neilo, (mittaw lo, abil Heek lo, a gial lo, a vom a hih leh vom kim vek) vive bek na zangh uh hi. Tualgan a gawh ding uh ciangin, vok gawh bangin a tee (lenuai) panin Tei tawh sun masa uh a, tua khit ciangin tual tanute'n a deek panin sukpum Tawh sulum uh hi. Tualgan pen kisem neena, khuasiamte ading khen khen masa Uh hi. A muuk, a leii, a sin, alung, a kal leh a gilzang themkhat ciat leh A khedawn teng kaaikhawm uh a, khuasiamte ading ciuh hi. Tualgan pen a kuanteng ading khenin a om teng khuasung in milip in kisawng saat sat hi. Tua pen tua tual biakna ah khua sung mi khem peuh zongh kihel hi a cih nopna uh hih tuak hi.

A tunga kigeensa khuasiamte' adinga kikoih tuam sateng pen tualsuang nuaiah koihin khua siamte kiangah a nuaia bangin thupha ngen uh hi. "Ka khua siam ka tuui siam, Ka phuhpi ka phahpi, Ka Pasian ka lungzai, Ka nipi ka khapi, Ka mualziat ka mualzei, Ka gunpi ka thaangpi, Ka thumapi, ka innbuk, Ka lihli, ka ciaupi, Ka kente, ka mualmau, Ka pangdin, ka cilciik, Ka mualtom, ka khaankha gun, Ka tu tawina ka hei tawina, Ka singgam ka zogam, siam in. Cidamna mulmaamna kong ngetna hi. Tanu tapa kong ngetna hi Sin ciim, lung ciim kong ngetna hi Teek kuun kong ngetna hi Mimm za taang za kong ngetna hi Siing phungpha baal phungpha kong ngetna hi Vokno dawng, aakno dang kong ngetna hi Sialno dawng, bawngno dawng kong ngetna hi Guahtuui khum, guahtuui al kong ngetna hi Sumnu sumpa kong ngetna hi Taang guipha, be guipha kong ngetna hi ZU HONG LUUP INGH, SA HONG GAWH INGH". Tual a kithoih ding ciangin, khua kiim khua paam khua veengte Kiangah "tua ni tua kha ciangin Tual kithoihna nei ding hi ungh." ci-in thu kiza sak masa hi. Tua ni-in, khua kiim ah sawl kibang hi. Sawl kibaang ahih lam, tual kithoih a hih lam thei lo a hong luut khualmi khatpeuh a om khaak lehZEHPHI ci-in, khatvei tual thoihna kibawl kik leuleu hi. Tua banga zaaksaksa khuaveengte khatpeuh in tual kithoih hi cih thei gegu napi a hongluut a om leh ZEHPHI mah kici in tua khualmi pen in tual kithoihna a Sum beiteng liau hi.

Tual thoih ni a zing cianga kipan ni thum sung Khuazaang bup in zeh kitang i cih ciangin, gam kuan lo, lo kuan lo, sa beng lo, nga beng lo, inn ah om cihna hi. Tua zehtan hun sungin ganhingte kipusuak sak nuam lo ahih manin, a neekding uh lopa sawlhiangpen kila khol hi. Zehtang a a om sungun, unau sanggam teng, a bawngbawngin, a behbeh-in, anhuan khawm zu luup khawm, an ne khawm, zu dawn khawmin beh thute suut uh a,gual nop bawlna leh kithuhilhna-in zangh uh hi. Lawm leh gual deuh-teng sung khat lainateng in an ne khawm zu dawn khawm ahih manun, LAWM ANNEEK naci uh hi.

Tu hun ciangin, tual biakna kibawl nawn lo ahih manin, lawm anneek hun Pen gual nopna pawi bekin kizang a, a ni nih ni ciangin khua sunga thau nei teng, saben siamteng, tang vaal thahaat teeng gam kuanin sataang haalin, sahawlin, sataang pangin, tua bangin sa beng ngeeingai uh hi. Tua ni a kimansate a khua zaangun a kicing thei daandaanin huan uha, a kuul leh innsa nihleh thum tawh beh uh hi. Huumpi, Sahaang, vompi cihte a matuh ciang innsanihleh thum tawh aai uha, gual nuam mahmah uh hi. Sabengte hong ciah uhciangin, khaw mualah nungaaktein zu khum mahmah tawh na dawn uha, gamkuante'n a thau uh lawn uh hi. Hih bangin Zomite'n biakna lah hi, ngeinalah hi, nop sakna lah ahi pawipi khat SIALSAWM pawi ki ci hi.

Source ;
https://groups.yahoo.com/neo/groups/ZOMIFLA/conversations/topics/130?var=0 .


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: SIALSAWM PAWI. Agelh - Dr. Dal Lian Description: Rating: 5 Reviewed By: Cinpu Zomi
Scroll to Top