728x90 AdSpace

Hot
Menu
Zon-ol na Donate

Latest News

Khaimulen Tapong i cihcih Tangthu atom in.

Arakan Liberation Army (ALA) makai Khaimulen.

1948 kumin Kawlgam in Bristish khut sung pan suahtakna alak khit asawt loin gam sungah buaina tampi om hi. Ahang pen Kawlgam makai te in Democracy lungsim vomh zo taktak lo uh ahih man ahi hi. Pu Ne Win in 1962 kum in gam uk theihna thuneihna khempueh la in, Kawlgam sungah ama deih bangin thu zeek hi. Ama deihna athukimpih lote leh ama langpang te khempueh cikzialo tak in bawlsia in suam lum pahpah hi.

Thuman lo gamtatna leh zawhthawh thu tawh kimakaihna deihlo mi tampite lak ah Zomi te zong kihel uh hi. Tuate gen ding ci leng mimal leh kipawlna tuamtuam tampi om kha ding hi. Ahi zongin neulai pek akipan Zomite tangthu sungah amang mawh khat ahi Khaimulen Tualgal (Khaimulen Tapong) thu tawm hong gen nuam ing. Mimal in ka tuak khak thu hi lo ahih manin, ka zakna bangbang hong gen kik ding ka hi hi. Hi bang tangthu nengneng te pen ih kigen kikkik kei leh a mangthang thei ding tangthu pawlkhat om thei ahih manin khanglai/khangthak te in theih ding kilawm leh manghilhlo ding hoih kasa thu khat ahi hi.

ALA Makai Khaimulen leh apawlte, Dekte Gam ah.
Khaimulen Tapong i cih pen, adiakdiak in Ne Win ukna deihlohna le Khamtung (Zogam) suahtak nading hanciamna khat ahi hi. 1975 kum tukhun guahtui tam mahmah laitak in Zomi galkap 20 leh Rakhine (Arakan) galkap 100 te kipawl in Zogam ah hong kuankhia uh hi. Hi Zomi galkap te le Rakhine galkap te pen Karen gam a om KNU te kiangah galdodan sin uh a, tua lai pan Training aman khit uh teh Shan gam tawn in Kachin gam KIO te kiangah va pai uh hi. KIO te kiangah kha 2 sung kilawmtatna abawl khit uh teh India gam Nagaland tawn in Zogam ah lut uh hi. Zogam galkap makai pen Major Sa Lian Zam hi a, kipawlna min pen Chin Liberation Front (CLF) kici hi. Rakhine galkap makai pen Khai Moe Lin kici pa hi-in, Arakanes Liberation Army (ALA) kici uh hi. Kawlgam kumpi asem ngei U Nu panpih na tawh galvan le thauvui thautang tawh Zogam leh Rakhine gam ah hong kuankhia uh hi.

Kawl galkap te in Khaimulen tapong (CLF le ALA kigawm) te Zogam hong tung cih a theih ciangin patau mahmah ahih manin, Kawlpi pan galkap 400 kuanto sak uh a, Gangaw ah zong galkap 300 kiging sa in om sak hi. Tua Kawl galkapte amakaihpa pen Capt. Maung Aye ahi hi. Khaimulen tapong te in Saizang, Phunum le Vangteh kual teng hong tung ta uh hi. Sapan ken ah zong Kawl galkap te do dingin kiging sa in om uh hi. Tuukguah nuai ah, natna satna le gilkial dangtak haksatna tampi tuak uh ahih manin Zogam mipi te khiangah huhna hong ngen uh hi. Mipite in Kawl kumpi te kihta uh ahih manin, tua hun laitak a khua tuamtuam a om hausa upa te in zong, Kawl galkapte khut sungah ki-ap ding na hanthawn zaw ta uh hi.

ALA te.

Tua bang a Kawl galkapte khut sungah a ki-ap masasa pen Kawl galkap te in cikze lo tak in na kaplum pahpah hi. Khuasak ah Zogam galkap mi 4 kikaplum ahih manin mipi te dipkua mahmah uh hi. Tua mah bangin Saizang khua gei pan aki surrender Zogam galkap te zong, amit uh tuamsa in kigual sak a, M16 tawh a banban kaplum uh hi. Khaimulen tapong 120 lak pan bangmah thei lo galkap nautang mi 40 bek suakta hi.

By: Eng Mang

References:

1. The Justice of Tatmadaw - Burma Army by Dr. Vumson Suantak

2. Suppression of Chin national movements by Pu Lianuk

Photos : Internet.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Khaimulen Tapong i cihcih Tangthu atom in. Description: Rating: 5 Reviewed By: Cinpu Zomi
Scroll to Top