728x90 AdSpace

Hot
Menu
Zon-ol na Donate

Latest News

Lih Li (Rih) Tuili Thu (Rih Lake). Gelh - Dr. James Suan Za Dong, Australia

Rih Tuili
Rih ong pian khiatna tangthu Zomi te'n i nei zongin ka za kha ngei kei hi. A zongin nidang pekin ei Zomi ( Tedim mi)te tangthu sungah Rih thu om lua hi.  Ei Zomi(Tedim kampau)te in Lih Li ih ci a, hih ( Lih Tuili) Lih Li thu ka neu lai pek un akigen ngei kei theihna a nuai bang tengin tomkim kong pulak hi.


Lih Li (Rih) tuili pen mual tung khat ah a-om alamdang tuilipi khat ahi hi. Amual ih suah ciangin van dum bangin, dum dide ahih manin i diipkuain lipkhap huai mahmah hi. Zogam ah tua bang tui lianpi kimu ngeilo ahih manin taanglai i pu i pate-in na lipkhap mahmah uh aa minthang sak mahmah hi. Akiim ah i pai ciangin daaitakin pai khiankhian leng atui daai dide hi. Pau-in gamlum le hang atui kilok damdam kici hi. Nidang lai-in i pu i pate-in tua Lih Li panin ak, ui le zawhngeute kingah thei ci-in um uh hi. Tua inn ganhingte a nei dawite kiangah a nget uh ciangin, bel tawh kingenin/ kikhek uh hi. Tua bangin bel tawh akikhekna pan khatvei bel tawvang khat tawh khek kha uh a, a dawite lungkim lo-in tua aa kipanin kikheek thei nawnlo hi, kici hi.


Lih Li (Rih) tui pen siangtho tawntung ahih manin, asung ah ninpa nahthel akiat ciangin phialphiah vasate-in tuah khia pah lianlian hi. Tua Lih Li gei ah a taang neilo gua nam khat po a, tua gua tawh saili kibawl leh ih kap pepeuh kikha/ kiman lianlian hi ci-in kigen hi. Tua upna hang mah tawh tua guate ki-lala ahih manin tuhun ciangin cimang khinin om nawn lo hi. Japan gal ven khit diak ciangin Lih tuili sung ah Mangkang kumpite in van manpha, sum manpha tampi seel ding cih ki ummawh ngei ahih manin atui khahkhia / heikhiat sawmin India gamgi lam pan kito ngei hi. Tua bangin akitawhkhiat laitak sun khua pha mahmah kimlai-in huihpi nungin mei vom kai-in guah leh huihpi ki thuahin om ahih manin kizom nawn lo-in atawh bang uh bangin om lai hi. 1975-1976 kum pawlin Chin Affairs Council  Member-te  Lih tuili  a en dingin zan tam in pai uh hi. Zingsang tungin Bo Tin Zam tua bual gei ah lam a siauh leh, Sakol lutang cia apha ganging namkhat tui sung panin ong dawk khia mu in, tui sungah lut / tum kik ci hi. Bang lutang a hiam cih cian takin mu lo/ kitheilo ci hi.

Lih Li pen nidang Mangkangte'n India tawh gamgi ong khen maa un, Mizote gam hi thei kha mah dingin ki-ummawh hi. Ahih hangin Mizo i cih Lusei, Hualngo mite pen ei Zomi mah hi uh a, a pu uh'n, ngal/vom amat ciangin hanla sa-in, Zomi cihna-in, la kam, poetic in, “ Mizo tu -Mizo ta hing" ci-in mual suah in hanla sa uh hi. Tua a han lasak pen Gentehna-in,Sihzang pen Zang sih ci-in la phuakte in tuni dong mah kizangh lai hi. Tua ahih ciangin, Rih Khua dar i cih khawngte zong Hualngo mi vive hi aa, tu mahmah in Tonzang gam ah Hualngo khua tampi om ahih ciangin ei Zomite tawh kizopna, kinaina tampi om hi. Tiau (Ciau) gun zong Mizo gam leh Tedim gam gamgi mah ah om hi.  Tua banah hih Lih Li leh Len Nupa pai nading lampi nuam pen zong Tedim pan nai pen le nuam pen a, lampi hoihtak i bawl ding zong kisam mahmah hi. Tua hi leh Tourists tampi i gamah ong hawh ziahziah ding uh ahih manin i Zogam zunna ding sumlut tampi kingah ding hi.

Lih Li pen Tedim pan tai 30 kiim khawng bek pha a, Falam pan akipai sangin alang nai zaw lai hi. Tedim lam pan paina ding Lampi le Lih Li i kim le pam mahmah limtakin puah zo le hang mai lam ah Lih Li pai dingte, Tedim lam pan kipai zaw ding ahih ciangin i hamphatna tampi om ding hi. Tu laitakin India kumpi-in Kawl gam tawh kizom dingin Lentang leh Tedim kikaal lam lianpi bawl/ puah ding kipanta uh hi. Tua ahih ciangin Tedim ah Hotel hoih tampi kisam dinga, Hotel nasem ding zong tampi kisam ding hi. Zo an tuamtuam ahi tangho, Vaimim cim -Gataam le zasan /saphel, a lim mahmah i Zovok sate zong i zuak zihziah theihna dingin Zovok nasiatak khawi huai hi. Vok mawkmawk sangin tam man sak zaw ding hi hang. Tua banah Zozu / Zuhaate khawng zong hoih takin bawl ding siangtho takin thawl siangtho le thawl etlawm theithei tawh koih ding thupi hi. Gamdang tourists-te thei sak leng minthang mahmah dinga, i sum ngahna lianpi khat piang thei ding hi.

Tua mah bangin, ansai, niangtui sai, Zongeina vangil ( gawsem, khuang, zaam, daktal, kilong, model nono  leh Zomi milim neu nono, thau leh thau sial phei model nono, thung ip, i Zo puan nam tuamtuamte, i tu i hei aa kipan taangh van, tukpaak, Vaphual mei/ mul le lum leh tei, temta nono, naang-phan, seeng, bawm cihte akipan van namkim kizuak thei ding aa mi tampi-in kivakna/ nuntakna ciang dong ngah thei ding hi. I Zogam ah mun le gam etlawm dangte ahi Thuammual (Canedy Peak), Len Nupa, le Meiteii gun kuam cihte puah theihna ding mun hoihte puah a, Hotel le tawlngakna Inn te lam ziahziah huai mahmah hi. Tua bangin lam/ bawl leng a kisam TV, Internet cihte dongin hong zuito pah lel dinga, manlang takin i Zogam khangto ding ahi hi. Ngaihsutna hoih le Muhna (Vision) hoih neih ding bek kisam ding hi. Pasian hong piak i Zogam zunin puah ding mimal kim in mawhpuak kinei ahih lam phawk ciat ni.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: Lih Li (Rih) Tuili Thu (Rih Lake). Gelh - Dr. James Suan Za Dong, Australia Description: Rating: 5 Reviewed By: Cinpu Zomi
Scroll to Top