728x90 AdSpace

Hot
Menu
Zon-ol na Donate

Latest News

SIKHANG NATNA THU.

SIKHANG NATNA

1. Si khang natna a cih bang hiam?

Si tha (blood pressure) a cih pen ih pumpi sungah si a ki zeel theih na ding a kisam tha hi. Hih tha pen ih lungtang ki saai na tung tawn in ong piang khia hi a, ih si sung a om pumpi cidam nang a ki sam na te (nutritions) leh oxygen te si-gui dung zui-in pumpi sungah kizel sak hi. 
Hih si tha pen a hun hun in khang thei, kiam thei a, mihing khat leh khat zong ih si tha ki bang lo hi. Ih si tha ii ngeina man a hih leh, nasep tam hun leh lungbuai hun teh khang thei a, tawlngak hun teh kiam hi. Hih a ngei na bang lo in, a hun tam zaw -na tawlngak sung na ngawn in a khan pai suak leh ‘’SI KHANG NATNA’’ a nei na hi ding hi. A theih huai khat ah, khangno khat a hih leh, a si a khan loh ding a ngei na a hihi.


2. Bang hang si khang hiam?

Ih lungtang sung a ki khol si teng pen, lungtang ki sai sim in ki suuk khia hi .Tua a ki suk na si tha tawh si gui dung zui in pumpi ah si ki zel hi.
Hih si tha a khang sak thei thu (3) om a:-

(1) Ih nek ci (salt) a tam luat ciang ,
(2) Ih nek a thau a tam ciang (gentehna,vok thau, aksa vun),
(3) Zu dawn leh za tep na teng a hihi.

3.Bang hang si khang natna lau huai in ki dop huai hiam?

Si khang natna ih neih cil in ih thei na ding lim om mel lo a, ih ngei na mah ki bang thei hi. Ahi zong in, ih kidop kei leh tua natna in ih pumpi meeng teng dam dam in na susia hit hiat hi. Hih thu hang in sikhang natna pen ong ‘’THATSIM THEI NATNA’’ khat in ki thei hi.
Si khang natna a nei pi in, ih ki dop kei leh, hih natna tungtawn in hih nuai aa a kigelh natna tampi ong kizom thei hi.
(1) lungtang natna ,
(2) khuak sung a om si gui kisiatna pan in a ki ngah pum lang zawt na,
(3) Kal siat na leh 
(4) Mit khua muh loh na .

4. Bang teng in si khang natna ding piang sak hiam?

• Kum a tam sem sem ciang in, si khang natna ki ngah baih hi.
• Si khang natna in khang gui ki zui thei hi.
• Pumpi thau luat na leh
(Thadah aa tut tut na leh, gamta lo aa om den na in ong thau sak thei hi. I pumpi a thau luat ciang in, lungtang in i pumpi a golna zah tawh kizui in, na naak sep kul ahih man in sikhang natna ong ngah sak baih hi.

• Cidam na tawh kituak lo an leh tui neekna: 
o A thau tam neek luat na (gtn: ganthau, thawhbat leh sathau tawh a ki kang neek theih tam neek na). Hih a thau te in si sung ah a lauhuai sathau hoih lo te in kikhol aa, i sigui sah in khauh sak ahih man in “Sikhang natna” ong piang sak hi.
o Ci tam zat luat na: Ci tam zat luatna hang in, ci sungah a om ‘Sodium’ a cih in, i si gui sungah tui hup thei aa tua hang in, “Sikhang Natna” ong ngah sak baih hi.
o Zu tam dawn luatna: Zu sungah ‘calorie’ a kici i pumpi ong lumsak thei na tampi kihel hi. Tua hangin, zu tam dawn luat na in i pumpi ii kisap zah vaal ‘calorie’ tampi ong ngahsak hi. Tua pan in, ‘thauluat na’ zong piang thei hi.
• Sikhum/ Zunkhum Natna: Sikhum/ Zunkhum natna in i sigui te ong susia aa, sitha a ngeina bang sak thei nawnlo ahih man in “Sikhang Natna” piang sak hi.
• Lungsim om zia: Lungkham, dahna, launa te in i sitha tawmvei sung khang sak thei hi. Ahi zong in, hih bang lungsim tawh i om den a sawt teh “Sikhang Natna” ong nei sak thei hi.
• Za teepna: Zateep sung aa a kihel za nam tuam tuam te in sigui te kisia sak thei aa, ih sitha (blood pressure) zong khang sak hi.

• Sikhang a piang sak thei thu dang dang te:
o Kal natna
o Nau daal na ding aa kizang zatang te
o ‘Steroid’ a ki ci zatui zatna

5. Ken si khang natna ka nei hiam?

Si khang natna ih neih lam ih theih na ding pen ih sitha sit na tawh bek ki thei thei hi. Na si tha pen siavuan (doctor) a hi kei leh ei eh ei sitha ki sit zel kul ding hi.

6. Ih sitha ki teh ciang bang teng ki sit hiam?

Ih si tha nam nih in ki khen thei hi.
(1) A tung sitha a ki ci, ih lung tang a ki sai sung a ki suuk laitak a ong piang sitha leh
(2) A nuai sitha a ki ci , ih lung tang ki sai khit a tawlngak hun aa piang khia sitha hi.

A ngei na a bat leh a tung si pen a nuai si sang a tam zaw den hi .

Sitha a ki teh ciang a tung si tawh a nuai si a nih a ki teh aa, a nih a ki gen ciang: a tung si 120 (120/80) ci in ki sim hi. a nuai si 80 “Sikhang Natna” na neih leh a tung si bek ahih kei leh a nuai si tawh a nih in, na atawlngak sung na ngawn khang in om den ding hi. Khat vei siteh a na si khang ahih leh “si khang natna” nei ki ci pah thei lo aa, nih vei thum vei, a ni kihal in na teh sim a khang den ahih leh “Sikhang Natna” nei ki ci thei bek ding hi.

7. Si khang ngah baih loh na ding koi cih ki dop ding?

Ih nisim nun zia: om daan, neek leh dawn puah phat na pawl khat in si khang nat na ngah baih na pan ong dal thei ding hi. Khang kizom aa “Sikhang Natna” ahih leh tua natna ngah theih ding pan ki daal zawh thu hilo hi. Hi mah taleh, kidop zawhna in hih natna pan in a kingah beh thei numbat (3) aa kigelh natna sia te pan ong daal thei hi.

• Thau luat loh na ding ki dopna:

Cidam na ding in, I tun tawh kituak in pumpi gihna neih ding thupi hi.
Na tun tawh kituak pumpi gihna na theihna ding in, hih a nuai aa bang in na tuat in.
Tun tawh kituak gihna= 
Gikna (Weight) <kg>/ Na tun (Height) <m> x Na tun (Height) <m>

(Hih a tung aa bang in na tuat theih kei khak leh, zato siam zato syama leh siavuan te’ kiang ah na dong un.)

Tun tawh kituak gikna (kg/m2) Sikhang leh Lungtang Natna ngah ding genkholh theihna

27.5 leh a tungsiah Ngah theihna ding tam hi. (high risk)
23.0-27.4 Moderate risk
18.5- 22.9 Low risk


18.5 leh a nuai siah Guh ngot natna ki nei thei cih ong gen aa, tha om lohna ong lak hi.


Na tun tawh a kituak lo in, na gik luat leh cidam huai lo aa: lungtang natna, sikhang natna, sikhum/zunkhum, guh leh taang natna, leh pumlang zaw natna (stroke) kingah thei ahih man in thau luat loh ding hanciam ding hoih hi.

Na gawng tuam na ding in:
Na tun tawh kituak thahoih na ngah mateng in, Nipi khat 1-2 lb (pound) ciang bang na kiam sak zawh na ding tupna nei in la, an neek khiam in, kimawl den in. Tha khat in gawng vat ding zong hoih tuanlo hi.

Na tun tawh kituak thahoih na ngah khit teh, na kum leh na nasep zah ding tawh kituak zah bek ne in. (Gentehna: Na sep ding a tam kei aa, na gamtat ding a tawm leh an tawm ne pah in.)
• Cidam na ding Neek le dawn zia
Ci dam na tawh ki tuak in nek siam na in ih pumpi thau luat na leh tua pan a a piang sigui siat na pan ong dal thei hi. 
Athau tuam tuam leh sathau hoih lo tam ne kei in.
(Gentehna: Sa thau tam na neek loh na ding in, a thau leh a thau tam a paa aksa vun te pai khia/ hok khia tangh tangh in.Sathau tawh a ki kang gam te tawm nek in. Ngasa tam neek zaw in. Sa sungkua, ak gil, sa sin cih te tawm bek ne in. An leh meh kan na ding in vaimim leh mawngphal pan aa piang sathau nam te zangh zaw in.A hih theih leh, an leh meh ih huan ciang in sathau tam zat lo zaw in tui huan,ngan huan leng ci dam huai zaw hi. Mehteh mehgah te na huan ciang in huan min lua kei in.Huai min luat na in tua te sung ah a paa tha neih na ding ki sam ( vitamins)te bei sak thei hi.)

Ci leh mehza tam zang lua kei in la, tua te ai taang in siing, lothaang leh Tan-pa-ya tui cih te zang in. Mehza taang in cikhum ahih kei leh ngasa neu keu suvui in la, tua zang zaw in.
  • Mehteh leh singgah tam ne in. Buh kaang sang in, Buh ham te pen cidam huai zaw hi.
  • Zu tam dawn lua kei in. Na tan zawh kei ding leh,
  • Pasal te aa ding ni khat in a tam pen:
  • Beer (bawngnawi bung hai 3 <600mls>)
  • Wine (bawngnawi bung hai 1 leh lang <300mls>)
  • Zu/ Alcohol (Bawngnawi bung hai lang <90mls>) bek dawn ding hoih hi.
  • Numei te aa ding ni khat in a tam pen:
  • Beer (Bawngnawi bung hai 2 <400mls>)
  • Wine (Bawngnawi hai 1 <200mls>)
  • Zu/ Alcohol (Bawngnawi bung seh thum suah seh khat) bek dawn ding hoih hi.

Cidam na ding kimawl in!
Kimawlna in thau na ding pan in ong daal aa, na lungtang aa ding hoih hi. Tha tam a kizang kimawlna na hih zawh kei ding leh, lamsiau zo den leteh zong cidam nang ahoih pen hipah hi.

• Za teep loh ding hanciam in.

Za teep laitak na hih leh dam dam in khiam in la, na khawl zawh na ding hahkat in ki-uk tawm in. Zateepna ding aa sum bei ding paam maih lua a, cidam na aa ding zong ahoih beek hilo hi. Tuibuuk le Khaini zong zaa pan mah ong piang ahih man in, cidam na ding hoih lo aa, zat loh ding in nang leh nang ki-uk tawm in.
• Lungsim cidam ding thupi hi. 
Thu khat peuh peuh ah a kisam zah vaal lung himawh lua kei in. Ihmut hun leh tawlngak hun ding la hamtang in.

Tua ahih man in,”SIKHANG NATNA’’pen ih ki dop kei leh ong that sim thei a lau haui natna hi.Ci dam na pen hauh na ahih lam phawk in hih lai sung a thu te zui in tuni a ki pan na nuntakna a hoih zaw in nuntak theih nak ki uk siam in. Ih ZOMI bup a kua ma ciat, a ci dam zaw ih mai lam hun ah ih vak pi in ih nop sak thei na ding khat leh khat ki hanthawn ciat ni.


Source ; ZIS.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: SIKHANG NATNA THU. Description: Rating: 5 Reviewed By: Cinpu Zomi
Scroll to Top