728x90 AdSpace

Hot
Menu
Zon-ol na Donate

Latest News

PA NOK SWAN LIAN ( Students' English-Tedim Chin dictionary abawl masa) TANGTHU TOMKIM (1937-2011)

Pa Nok Swan Lian

      Pa Nok Swan Lian pen Mualnuam khuami Pu Suam Nok (Tanghau) leh Pi Vung Luan (Hualnam) tate 1. Kam Khaw Zam 2. Niang Khaw Dim 3. Nuam Man 4. Suan Kam 5. Man Za Ciin 6. Ton Thang 7. Thang Do Ciin lak panin Pu Ton Thang leh Pi Niang Za Vung (Buansing) tapa upa pen ahi hi. Nidangin Pu Suam Nok’ pute pate Dakdung khua (tulai Mualbem khuapi kiang) ah teng uh hi. Mualbem hausa Lunpi a khan lai kum 1880 ma hun pawlin Pu Suam Nok’ pa Thuam Suan khan hun lai pawlin Dakdung khua panin Mualnuam ah inn bangzah hiam pem uh hi.


    A suah hun ciamtehna ginatak a om loh hangin upate genna panin kum 1937 April kha a suak hi dingin ki-um mawh hi. Kum 1943 in Mualnuam panin Zotang (Lushai Hills) ah pem uh a, 1952 in Manipur gam Lamka ah pemkik uh hi. Lamka zaang ah a ten ngeina uh Phaihel, Tangnuam, BCM HQ leh Lanva hi.

     Pa Nok Swan Lian in Zotang ah private sanginn panin class I zo hi. Class II leh III pen Kawnpui Mission School pan zo kik hi. Kum 1954 in Churachandpur Mission Compound ah class IV zo, 1955 class VI a zawh ciangin Lamka ah Government High School a om cil kumin NCC High School ah class VII sim hi. Class VII leh Class VIII tua high school panin zo a, kum 1958 in Imphal ah Bengali High School ah class IX lut hi. Kum 1961 in Cl-X zo hi. 1963 in PUC man a, 1965 in BA zo kik hi. Allahabad University ah kum 1967-68 April tan MA Pol Science na zom napin na khawlkik a, 1979 in Guwahati University panin MA zo pan hi.
   
Zi leh tate  
     Pa Nok Swan Lian (Tanghau) in Pa Sing Pum (Tawmbing) tanu Zen Khan Vung tawh 10 January 1971 niin nupa suahna nei uh hi. Pasian in tapa guk leh tanu khat pia hi.

1. Pa Thang Sian Mang Havildar, AMC, a zi Awi Deih Cing tanu 2 nei
2. Pa Pum Khan Pau, PhD, Asst Prof, Visva Bharati University, Santiniketan
    A zi, Nu Niang Van Ngai, tapa nih nei
3. Pa Gin Khan Lun, Teacher, Ebenezer Academy, a zi Niang Suan Cing, tapa 1, tanu 2
4. Pa Nok Khan Lang, a zi Cing Lun Vung, tanu 2, tapa 1
5. Tg. Thang Sian Mung, PhD Research Scholar (Sociology), NEHU, Shillong
6. Pa Do Za Khup, Indian Navy, Vishakhapatnam, a zi Cing Lian Vung tapa 2
7. Lia Zam Ngah Cing, PhD Research Scholar (Linguistics), NEHU, Shillong

A sanggamte:
1. Nu Dim Ngaih Man a pasal Dr. T.K.Muana ta 4 nei
2. Nu Niang Sian Cing, a pasal (L) Nang Khan Pau ta 1

Nasepna
1965-67:  Tuensang, Nagaland ah kumpi na (clerk) sem hi.
1974: Lamka ah Typing institute khat ka hong hi. Lamka ah a hong masapen ahi hi.
1982-3: Khadi Board Vice Chairman (Imphal)
1983: Lanva Saw Mill kipan
1984: India-Burma gamgi ah Ngalzang gam lei-in Paakmual khua saat hi.
*Tangnuam Govt Model School ah sangsia sem ngei hi.

Makai Sepna
Tedim Chin Union (TCU) HQ (India gam Tedim kampau minamte kipawlna)
President 1970-1989 (19 yrs)
Vice President 1992-93 (1yr)
Secretary 1968-70 (2yrs)
Executive member 2005-7 (2yrs)
October 2, 1990 TCU Kum sawmthum cinna lopna ah MINAM MAKAI pahtawina laipi kipia hi.

Tedim Chin Cultural Club (TCCC) HQ
President 1969-74 (5 yrs)
Secretary 1979-93 (14yrs)
Treasurer 1974-77 (3yrs)
Finance Secretary 1977-79 (2yrs)

Minam ading gim leh tawl phamawhsa lo-a a sepna hangin TCCC in pahtawina laipi 1-10-94 in pia hi.

Chin Students Association (CSA) HQ (tu-in Tedim Chin Students Association kici)
President 1964-67 (3yrs)
English-Tedim Chin Dictionary a bawl manin CSA in lungdampihna laipi 23-10-85 in pia hi.
CSA khawmpi 32 veina Tangnuam khua ah 20-23 Feb 1989 kibawlna ah Extempore speech ah khatna ngah hi.
1994 kumin Life Membership certificate kipia hi.

Chin Baptist Association (CBA) HQ (India gam Tedim kampaute biakna pawlpi)
President 1993-96 (term nih)
EC Member zong hun sawtpi sem hi.

* Churachandpur Baptist Fellowship ah President term khat sem hi.

Churachandpur District Congress Committee (DCC)
DCC ah Vice President a sep laitak June 4, 1977 akipan Acting president dingin MPCC president H. Nilamani Singh in guang hi.
DCC (I) President term tampitak sem hi (a hun zah kitel pak kei)
India gamah political party lianpen leh thahatpen Congress Party ah a hun sawtpitak zang hi.

Congress Party ading nasepna
Kum 1980 in Congress(I) Party leader hihna tawh a seppih khat Zingthan (Naga) tawh Pu Rishang Keishing Deputy Chief Minister a hihna dingin Delhi pai uh hi. 1982 February kha in All India Congress Workers Meet Delhi ah tung dingah kihel dingin Manipur pan bus 7 pai kik uh a, tua sungah amah pen makaipi in kikoih hi.

    Kum 1982 akipanin Khadi Board ah member khat in Congress party in koih a, 1983 in Vice Chairmanin MK VIB sem hi. Kum 1984 in Singngat Assembly constituency panin MLA tuh nuamin Congress ticket a nget leh ngahlo hi.

Zomi Council (ZC)
1998-2000: Chairman Zomi Council, Lamka (Lamka gam buai a ven zawh lian ahih manin kumpi lam panin buaina thuakte huhna (rehabilitation/compensation)limtakin buaipih kha hi.

Pasian tawh kimuhna
1993 kumin CBA in St Paul’s Institute ah Ulian Camp a neihna ah Pa Nok Swan Lian in Pasian tawh kim-in pianthakna hong ngah hi. Tua huna kipan Pasian thu lunggulh mahmahin South Korea gama khanlawhnate bangin khoihkha mahmah hi. Tua panin Pawlpi ah zong kizanga, Local Church committee ah makai a sep banah CBA HQ. ah makai sem kawikawi hi.

Laibu Bawlte
1. Mangkam Sinna: English-Tiddim Chin translation and composition (1968)
2.  Students' English-Tedim Chin dictionary (1st edition 1976)
3.  Kam Hau Ngeina
4. 1970 April kha-in Manipur gamah Sia Nok Swan Lian in khasim thukizakna Tangko khen a, Kawlgam pua-ah Tedim pau tawh thukizakna a kikhen masa khat hi.

A damlohna: Pa Lian in zunkhum (diabetes) nei ahih manin kum sawm sung bang zunkhum zatui tawh kikem hi. 16 September 2010 ni panin a khut leh khe veilam tuak tangtheilo-in om hi. Tuani akipan lupna tungah kikem toto-in 18 December 2011 zingsang nai 7:00AM  in Topa kiang zuata hi.

(A tunga Pa Nok Swan Lian tangthu a tom thei pen dinga ki-at ahih manin a kihel khalo ama thu tampi om hi.)


Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: PA NOK SWAN LIAN ( Students' English-Tedim Chin dictionary abawl masa) TANGTHU TOMKIM (1937-2011) Description: Rating: 5 Reviewed By: Cinpu Zomi
Scroll to Top