728x90 AdSpace

Hot
Menu
Zon-ol na Donate

Latest News

A Lamdang Pasian Kammal

Laisiangtho.
Thupatna
Leitung piankhiat zawh laibu tampitak kigelh khinzo in, pawlkhatte bang bu tampi mah kizuakkhia hi. A kizuakzo pen laibu (best-seller) ci in kithupisak mahmah hi. Tua banga a kizuakzopen laibute sungah tu ni ciangciang Lai Siangtho zaha kizuakzo, kikhawngpen laibu om nailo a, Lai Siangtho bu sanga a kikhawng zaw laibu zong om ngeilo lai ding hi. Tua in, Lai Siangtho Pasian kammal ahihna leh a thupitna, a lamdang ahihna hong lahna khat hi ci in ka ciamteh hi.
Wonderful words of life


Lai Siangtho bu, a diakdiak in Late 119, sung sim lehang  Lai Siangtho a thupitzia leh a lamdang phadeuh ahihna laigelhpa in na limgen mahmah hi. Late 119 pen Hebia mite laimungpi (alphabet) 22te bulphuha a kigelh, a kigualsuk dimdiam ahi hi. Aneu 1-8 ciang pen Hebia mite laimungpi masa pen ahi aleph tawh kipanin, aneu 9-16 pen Hebia mite laimungpi nihna ahi beth tawh kipana a kigelh hi in, Hebia mite laimungpi khatta in tang 8 ta huam hi. Hih bangin tang 176 a bei dong Hebia laimungpi 22te tawh kipanin na kigelhsuk dimdiam hi.

Late 119 pen thungetna tawh kisai a kikaikhawm thu honkhat leh Pasian thu lungngaihna tawh kisai kigelhna (a collection of prayers and meditations on the Word of God) ahih zah khatin Pasian kammal pahtawina, genna bekbek kammal kibanglo nam sawm bang laigelhpa in na zang hi. Hih kammal sawmte pen Late 119:122 simloh ah kimu hi. Tua kammal kizangte in mikang lai in anuai a bangteng ahi uh hi:1)      “Law” (Heb. tôrâh) 25vei,2)      “Word” (Heb. dāḇār) 20vei,3)      “Saying” (Heb. ’imrâh) 19vei,4)      “Commandment” (Heb. miṣwâh) 21vei,5)      “Statutes” (Heb. ḥūqqîm) 21vei,6)      “Judgment” (Heb. mišpoṭ) 19vei,7)      “Precepts” (Heb. piqqûḏîm) 21vei,8)      “Testimony” (Heb. ‘ēḏâh) 22vei,9)      “Way” (Heb. derek) pen a tam genna (plural) in 5vei, a tawm genna (singular) in 6vei,10)  “Path” (Heb. ’ōraḥ) 5vei cih bangin kimu a, Tedim kamin ngeina, thukham, thu, ngeinakip, thupiak, lampi cih bangin kammal tuamtuam tawh kiletkhia hi.

Late gelhpa in a tunga i gen Pasian kammal sungah a kipahna [delight] (Ps. 119:16, 24, 35, 47, 70, 77, 92, 143, 174), Pasian kammal a itna (vv. 47-48, 97, 113, 119, 127, 132, 159, 163, 165, 167), a zuihna ((vv. 4, 5, 8, 17, 34, 44, 56-57, 60, 67, 88, 100-101, 129, 134, 136, 145, 158, 167-168), a lungngaihna (vv. 15, 23, 27, 48, 78, 97, 99, 148), leh Pasian kammal ah a lungdamna [rejoice] (vv. 14, 74, 162) cih bangin pulakna na nei hi.

Late laigelhpa bekin Lai Siangtho pahtawi in thupisaklo in, akhang akhang in mi tuamtuam in zong Lai Siangtho na thupisak uh a, na pahtawi den uh hi. Tua bangin kithupisak in mite in a pahtawi kawmkal un, Lai Siangtho bu pen leitung maitang panin mangthang in beimang leh a ut a, a hanciam zong mi tampitak mah na om ngei hi. Bangbang hi taleh Lai Siangtho in Pasian thubu, mihingte kimakaih nading leh kha nuntakna ngah nadinga a kicing Pasian thubu ahih manin kuamah in susia zolo a, pahtawihuai, sinhuai, kanhuai in laibu khempeuh sangin thupizaw a, lamdang mahmah hi. Tua ahih manin hih zahtaka A Lamdang Pasian Kammal kuamah in a suksiat zawhloh Lai Siangtho pen Late 119:129-136 sung siksan in tawmkhat i gen dinga, tua i gen thute tungtawn in eite nuntakna ah a kizang thei ding thuhing pawlkhat gensuk leeng ka ut hi.

I.                   Pasian Kammal A Lamdanna (vv.129-130)
Kum 1600 sung bang kigelh laibu hi in, a gelhte zong hun tuamtuam a om mi tuamtuamte hi lai uh a, continent thum panin kigelha, a sunga thu kigente a kitukalh khat beek omlo hi. Tua ahih manin hih banga a lamdang Lai Siangtho, a sim mi khat in ama nuntakna ah Pasian kammal a lamdang takpi ahihna tel ding hi. A.     Pasian Kammal in Kicing in Lamdang Hi (v.129)
Piancil bu panin a banban in lemin Kilaakna bu dong lem lehang eite nuntak nadinga kisam theihhuai thu khempeuh kimu  thei hi. Mihingte nuntak nadinga a kisam thuteng Lai Siangtho in hong hilh hi. Lai Siangtho bukim in eite biak Pasian pilna kicing hong lak hi. Tua ahih manin Lai Siangtho sunga thu simloh thu dang behlap kullo, zong guanbeh kul selo in amah leh amah in a kicingsa ahi hi. Pitazuh in na khempeuh Pasian kiangpan ahihna leh a kicinna hi bangin hong gen hi, “Ama vangliatna leh ama  hoihna tawh eite hong sampa i theihna tungtawnin nuntakna leh Pasian sut nading tawh kisai na khempeuh ama  vangliatna tawh eite hong piazo hi. Amah in a thupi mahmah leh a manpha mahmah kamciamnate tua vangliatna mah tawh hong piazo hi. Tua kamciamte tungtawn in a hoihlo lunggulhnate hanga a piang hih leitung siatna tawh kipelhin Pasian pianzia na tan theih nading uh ahi hi” (2 Peter 1:3-4). Tua ahih manin a kicingsa Lai Siangtho beelin, thupi ngaihsut ciat ni.

B.     Pasian Kammal in Telnop in Lamdang Hi (v.129)
Lai Siangtho pen naupangno khat nangawn in a teltheih dingin a kigelh ahih manin telnop hi. Mihingte kisap leh zuih ding thute hong gena, tua khit ciangin Lai Siangtho gen banga azui nuamlo mite in mailam ciangin a tuahkhak ding thute zong genin, azui mite ngah ding thuphate zong hong gen hi. Tua bek thamlo in lawhsapna, tuahsiatna, cihmawhna, hihkhialhna anei mi khatin a kibawlphat theih nading thute zong kigelh hi. “Lai Siangtho buppi Pasian humuap hi a, thuhilh nading, mawhna kiphawksak nading, kibawlphat nading leh dikna thu a kipattah nadingin a manpha hi. Tua in Pasian mipa picinga na hoih khempeuh a sep theih nading ahi hi” (2 Tim. 3:16-17). C.     Pasian Kammal in Thuthak Hong Musak in Lamdang Hi (v.130)
A tunga i genna ah Pasian kammal in eite aa dingin kicingin kisapnateng hong piathei, piazo hi ci in gen hi hang. Hih munah a gen thu in Pasian kammal in thu namnih hong piak behna thu na gen hi. Tuate in khuavak leh theihtelna ahi hi, “Nangma thute hon khiatna in khuavaksak a, thu theilote thu theihtelna a guan hi” (Late 119:130). A cihnopna ah Pasian kammal Lai Siangtho bu leemin, simin hi lehang, tua in eite lungsim hong vaksak in thuthak theih theihna hong guan hi a ci hi. Worker’s Hospital, Yangon ah Nipi ni simin Kawlpau tawh kikhopna ka neiden uh hi. Tua kikhopna sunga a kihelden nupi khat tungah Kawl Lai Siangtho khat ka pia ngei hi. Tua nu in “Sia aw, nong Lai Siangtho piak hoihsa lua ka hih manin a siat ding ka lauthawnga, singkuang sungah hoihtakin ka kem hi” hong ci hi. Lai  Siangtho bu pen simlo, leemlo in singkuang sung peuhah gawl ding hilo hi. Inn kikhakcip bikbek a mial mahmah khat a kongkhakte, a padenpaukte i hon ciangin a sung hong taang pempam pahin a sunga om van khempeuh kiciantakin i muh theih mah bangin, Pasian thubu hongkhia in eima sungah khuavak bangin hong taang leh i theih ngei nailoh thuthuk tampi i thei ding hi. Khuavak in innsung niinte hong muhsak bangin Lai Siangtho bu lem a, simna in eite sunga om a hoihlo nate hong musak in tua panin i kisiansuah dan ding kitheipan ding hi. Innsung a om vante kigual sitsetlo (disorder) a, a kithehthaang zeizaite mei hong taan ciangin kimupah sitset a, hoihtak in i gual sitset thei ta hi. Tua bek thamlo in innsung ah khua hong vak ciangin i lampai nading mun hoihtak in honglak ding hi. Late 119:105 sungah “Na thu in keimah lam hong lak meivaak hi a, ka paina lampi ah khuavak ahi hi” ci hi.

Eite sunga hong taang ding khuavak pen Lai Siangtho simlohna tawh sumit in khuamial sungah ki om thei a, ahih kei leh Lai Siangtho mah sim tangtang in khuavak in eite hong taanin, kha lamah i picin theih nadingin thuthak nono thei a, lungnuam takin om theih nadingin mimal khatciat in teeltheihna (choice) i nei hi. Late laigelhpa in Lai Siangtho simna, lungngaihna, itna, zahtakna in ama pilna a khansaklam  theilua ahih manin “Na thuhilhnate lamdang mahmah a, ka lungsim khempeuh tawh tuate ka zui hi” (Late 119:129) na ci hi. II.                      Pasian Kammal Bulphuha Kalsuanna (vv.131-135)Pasian kammal pen lamdang mahmah cih bang ciang beka theih ding hilo in, tua a lamdang Pasian kammal tungah kinga in, bulphuh in nei a, i kalsuan ngam ding thupi ding hi. Lai Siangtho lui sungah Daniel leh a lawmteng thum bangin a gamtatna khempeuh vuah Pasian kammal tung bek mah na bulphu uha, midangte in mawhsakna thu tuamtuam a gen uh hangin Pasian kammal mah na ultungsak pen uh ahih manin, Pasian in na laamsang hi. Daniel bang ci lehang 605 B.C. panin 539 B.C. ciang dong Babylon gamah ulian khatin na om hi. Pasian kammal mah lenkip in Pasian tungah a na kingakh man ahi hi. Pasian kammal bulphuh a kalsuan mi khat nuntakna in niam cihbang omlo hi.

A.     Pasian Kammal Lunggulhna (v.131)Na thupiaknate ka lunggulhna in, ka kam ka in ka lei ka kha hi.” A kammal zatte tungtawnin ngaihsun lehang mi khat peuhin tui duhlua in a dangtaak mahmah a, tui a muhphet in a bawhpah laplap dan a gennuam hi. Naupang no gilkial khatin a nu nawi a teep ahi a, nawithawl khat peuhpeuh a muh ciangin a bawhpah buatbuat danin Christian khatin Pasian kammal lunggulh ding kisam hi. “Na khantoh theih nadingun, naungeek suaktungte bangin, kha lam nawizu siangtho na lunggulh un” (1 Peter 2:2). “Sakhi in lungtui luang sialsial a lunggulh bangin…” (Late 42:1) Pasian kammal lunggulh ding ahi hi.

B.     Pasian Hehpihna Lunggulhna (vv.132-133).Nangmah hong itte tungah na hih ngei bangin kei lamah hong kihei inla, hong hehpih in” (v. 132). Late laigelhpa in Pasian hehpihna in a ma tungah tungin, tua mah tawh a kalsuan ding lunggulh penin nei hi. Pasian hehpihna, Pasian ompihna a lungngulh theilo mi in kha lamah a si hi ding hi. Pasian lunggulh nopna a beisak thei nadangte paihkhiat kul ding hi. Leitung gualnopna bek lunggulhna, leitung nate nungzuihna in Pasian maipha ngah nading hong dal thei hi. Pasian ompihna leh Pasian gam a thuukzaw a i theih nadingin sun leh zanin Pasian i lunggulh ding kisam hi (Late 63:5, 6). “ Nong ciamsa bangin ka puk nading panin hong kem inla…” (v.130). Topa mahin makaih in lamlak a, khamuangtaka a kalsuan ding pen Late gelhpa lungngulh ahi hi. “Mi khat kalsuannate Topa kiangpan hi a, Ama lungkim banga a gamtapa Amah in kipsak hi” (Late 37:23). Topa in ama zat theih dinga kipia mite lunggulh a, a kipia taktak mite mah zang pah hi. Tu ni in eite lunggulh in bang ahi hiam? C.     Pasian Thupha Lunggulhna (vv.134-135)“…Kei hong nengniamte kiang panin kei hong honkhia in” (v.134). Laigelhpa in a lungsim sungah a kihotkhiat ding lamen ngeungau leh kilawm ka sa hi. “…Kei tungah siatna gualzosak kei in” (v. 133) na ci hi. “Na na sempa tungah na maitang hong taangsak in…” (v.135) ci in Pasian tungah na ngen hi. A cihnop bulpi in Pasian in amah thupha a piak ding lungulh hi. Laigelhpa in Pasian ngeinakipte kemcing in zui a, Pasian kiang panin zong thupha na lamen ngam hi. Tu ni in Pasian thupha deihin kilunggulhtek hi. Pasian in thupha hong piak theih nadingin eite in Pasian tawh i kithuukkholh hiam?  Pasian kammal i thupi ngaihsut hiam? Mizo gama i sanggamte nungak tangval, nupi papi cih om tuanlo in a kikhop uh ciangun Lai Siangtho tawitek in sim uh hi. Tu lai khangthak ka theih pawlkhatte in Lai Siangtho tawi a sim ding zumhuai sa uh hi. Lai Siangtho biakinn ah kenga simna pen zumhuailo in piangthak hing kici na pi biakinn pai ciangin Lai Siangtho bu kenloh pen a zumhuai pen leh a haivai pen ahi hi. Korea mite in Pasian thupha a san ding mah uh ahi hi. Banghang hiam cihleh a khuasung vakna uh meileeng sung nangawn ah nungak tangval, nupi papi in Lai Siangtho puaciat uha,  sim tangtang mawk uh hi. Thupha ngahloh theihloh ahi hi. III.               Pasian Kammal Bulphuha a Kalsuanlote (v. 136)A.     Lainat LuatnaMite in nangma thu zuilo uh ahih manin…” (v.136a). Late laigelhpa in Pasian kammal lamdang a sak luatna hong genin, tua khit ciangin Pasian kammal sungah kidiah in nuam a saknate hong gena, tuateng khit ciangin tua banga a lamdang Pasian thu a zui nuamlote thu ngaihsun in a lainatna thu hong gen hi. Mihingte in Pasian thukhamte palsat khinta uh hi. Amaute aa dingin hell khuk sung bek omlai hi. Nisim naisim in hell lam zuanin mi tampitak pai uh hi. Tua mite hehpih huai uha, lainathuai mahmah hi. Lai Siangtho in mihingte nuntakna kikhelsak thei ahihna a thei nailo mite tungah genhuai mahmah hi. Lainatna lungsim nei in eite hih theihna lam khat teitei panin, mapang ciatin na i sep ding  thupi mahmah hi.

B.     Luitui Luang Bangin“…ka khitui hawkluan in a luang hi” (v.136b). Late laigelhpa in hih zahtaka a manpha Pasian thu mite in a theihloh lam a theih ciangin na sa in, vei mahmah a, lainatna khitui luangsak (tears of compassion) hi. Khitui luangsak liangin kha mangthangte itin, vei ding hun hi ta hi. Zeisu mahmah in, “Mihopite a muh ciangin hehpihhuai sa hi…” (Matt.9:36).

ThukhupnaChristian laphuaksiam minthang mahmah ahi Fanny J. Crosby (1820-1915) in a laphuah “A Sia Ding Honkhia In” (Rescue the Perishing) cih la sungah hih bangin laimal na gualsuk hi.“A sia ding honkhia in,A si ding donin,Mawhna leh sihna panin dokkhia in,Kah in lamkhial mite phongin a pukte,Zeisu hotna theisak in amaute ci in la na phuak hi.Pasian thubu Lai Siangtho in nuntakna hong tun laibu hi a lamdang hi.  Hong gen bangin zui ciat ni. A thei nailote theisak ni. Lamkhial a om, lampai nading a theilote lamman hilh ni.
Source : https://skthang.wordpress.com.
Theihding : Suan Khen Thang's blog pan kalaak hi in ama gelh maw, kua gelh cih tel lian lo hi ingh. Ama at ahizong, midang at ahi zong athei te'n nong theihsakna ding un hong ngen ingh.

Zomi e-Library pan ngetna

Sum leh paai tawh nasepkhopna ding olno tak in HIH-LAI-MUN-PA'N kipiathei hi.

Hih atung a article hoihnasak na, hoihnasaklohna a hizong in na muhna te anuai a comment ah hehpihna tawh honggelhsak ve lawm. I LAIBUSAAL in article tuamtuam leh panpihna a tuamtuam te nangtungpan' hong lamenden hi.I nasepkhopna te HIH-LAI-MUN-PA'N ki-enthei hi.

  • Blogger Comments
  • Facebook Comments

0 comments:

Post a Comment

Item Reviewed: A Lamdang Pasian Kammal Description: Rating: 5 Reviewed By: Cinpu Zomi
Scroll to Top